Chahsat gamkai eimi ho gentheina

Chahsat gamkai eimi ho gentheina

1131
0
SHARE

Chahsat gamkai eimi ho gentheina

By: Jangminthang Haokip, Chassad Avenue, Imphal

Tu masang jep a pat chun Chassad/Kamjong gamkaija Eimi ho chunga NSCN (IM) ho kithanei sahna le sosetna ho hi ina jajing uvin ahi. Agamkai miho a kon kija dan in, KNA cadre phabep hi sepoy hon hiche gamkaija hi ahin puilut uva, tua hi Molvailup a hi Camp khat jong asemdoh uva chuleh amaho combine force chun NSCN (IM) cadre ho phabep jong anamat uva, hitia KNA hon hiche vella camp ahinnei jeh u le sepoy ho toh akivop uvin eidou uve tiho jeha hi amaho hung sousang uva, Eimi milhamho ahin suhgim pan u hidan in aseijun ahi. KNA cadre ho chu Chahsat gamkaija chu ummong ahiuleh NSCN (IM) khut a konna mipi chu aventup jou u hileh phading ahin, chuleh hiche gamkai hi eiho majority hina gam ahilou jeha eimi ho hi tokang detdet a cheng ahiuvin, hijeha chu aphapen ding chu Eimi thingnoi mi ho hi hiche gamkaija hin umdau leh aphajo dem tihi ngaidan khat chu ahi.

Agam kai mi khat seidan in, ‘KNA ho hin eiventup jou lou diu ahileh hiche gamkaija hi hung jong hunglou beh diu dol ahi. Ajehchu amaho hung um jeh in gaal asohdoh dehdeh jeng in, kigaal bolna khat hung sohdoh leh hiche gamkaija Kuki chate hi kachen joulou diu, kahung kichaudoh uva muntin a kahung kithe thang diuva um ahitai’ atin ahi. Hiche gamkaija hi Eimi kho/village som/10 valbep um ahin, hicheho laha jong chun Chahsat tailou adangse hi khoneo cha cha jeng ahitan, Tangkhul te vang chun kho lentahtah aneijuva, hiche gamkaija hataha majority jong hiu ahin, hijeh a chu tua hi kiphaosah taha KNA ho phinna tobanga Eimi milham ho chunga hitobang sosetna hi ahinbol pat u ahi. Eiho thingnoi miho hi eimi le eimi kikaha ahiteng hangsan tah in akikapto jiuvin, jatdang thingnoi miho toh kidinte ding ahiphat leh manchah le meichang a alhahsam jeh uvin,  akilep mang ji tauvin, chuleh meichang jat jong hi mi toh nidan khat le ni tobang kikaptona umleh kichai jeng ding bep aneiju ahin, NSCN (IM) te vang hi manchah le meichanga kilhasam louhel ahiuve. SoO noijah kium jong leh khonung leh ipi ahungso ding or ichan ihin phah diu ham kihelou ahijeha manchah thah thah lamdoha meichang jong niengtah a nei ngai ahi.

Kukite hi ichennau phataha ivet leh mi toh kidouva gaal kibolto thei jong ihi pouvin ahi. Ajeh chu jatdang ho kikah lah jeng ah khoneo cha cha in icheng un, mi nehchinto in akium in, kidouna aumteng, khoneo cha cha ahijeha min bailam taha asip thei le asuhmang thei jeng ihiuvin, hitobang soft target hithei ding mi tamtah ium jeh un, mi toh kinah-kidou ding kiti mong mong jong hi gelda beh leuhen pha ahitai. Ikihatsah le ji vang uva, haosat idei behseh jeh uva kho neo chacha isembe be uva haosa ihibebe jeng u ahin, khosung khat a inn gup/inn sagi laha akihaosat a ipi aphachom ding um mong mong ham? Kho khat inn 10/20 chenna a haosat ding bon aneo behseh e tia jachat umtaha kigel ahin, hinlah mi abang hi ama le asopi ho sehseh in kho semma amaho innsung sehseh chu haosa le khochaga hikop jong ium nalaijun ahi. Alhompenna inn somnga kiti jong leh lhom nalai ahin, hithei henlang kho khat hi alhompen in inn 100 tiho hi kihithei leh kiventup jong bailam jep ding ahin, tun gaal jouva ichihjep uva khoneo neova chen hi iboltah lou diu ham akiti leh hoilang (MG)NREGS hung umdoh ham, hichea sum themkhat mu ding deiman in kho imoh semsem uvin, ikichaideh jeng un ahi. Isopiu Naga ho vang chu kho lentah taha cheng ahijeh un, kidouna aumteng jongleh alonaje aumji pon, chuleh gam ngailut dan a jong hin Naga ho gam ngailut dan hi jatchom beh ahin, eiho vang hin tun jong gam ikijoh joh ji nalaijun ahi. Nagate vang hin gam johdoh kiti mong mong hi abollou beh jeng u ahitai.

Achaina in, amaho mi cheng jongleh amaho thingnoimi ho umlouna vetsahna a Kangpokpi gamkai dung banga hi eiho chenna hijongleh ilhomjohnau munho a chu mitoh kihet khel sanga eimi thingnoi miho jong aumlou uva phajo ahi. Aum ngal u leh giin le jaa theija um uva, min achou ngamlou u hileh phading ahin, tun mi phindoh bep in apang jiuvin, agenthei leh athohgim chu agama cheng Eimiho akihiji tan ahi. Amaho umji jeh in bailam tah in kidouna asohdoh jin, mitoh ikidou teng u leh gaaljona la ichang khapouvin, jachatsah leh lhaset sahbep ihiji tauvin ahi.  Hiche kisei hi koima atum a demna ahipon, pohnat jalla Chahsat gamkaija miho geldan ho jong phabep kilakhom a hin kisei ahin, ikihet them diuvin ikitem un ahi.