Centre le State govt ho hung kibolto dia um (Bill a kon...

Centre le State govt ho hung kibolto dia um (Bill a kon Act ahijouva meikong)

557
0
SHARE

Centre le State govt ho hung kibolto dia um
(Bill a kon Act ahijouva meikong)
India gam munchom chom’ah hitilomlom’in kiphinna leh boina hung uminte ti hi CAB/CAA thua koiman anagel loudi ahi. Ahin CAB (Bill) pass hung kibol’a CAA (Act) ahung hidoh joujouvin Assam ah boina khucheng ahung umpaijin CAA deilouna’a kiphinna bol ho police in meithal alhakhumna ah mi 30 lang akisukhan tuchan’a athi mi 4 ahitan akisukha ho athi umbe din jong akiseije. Delhi a University khat le ni ah jong Student hon CAA deilounan kiphinna abol’un gari phabeppi jong anahal lhauve. West Bengal a kiphinna akhucheng kit nin Train (Rail) gei anahal lhauve. Aboinapen Assam a Curfew akiladohtan, Internet kikhah jong akihong kit tai. Kiphinna lamkai Student tamtah hentup in akikoijin ahi. Tua hi aban ipi hungsoh a itobang kiphinna hung chebe diham seithei ahipoi. Chomkhat kiphinna ahung khongai hi neh le chah neng chetna kisuhtupna dileh Christmas dikon ahijeh a inn che diho suhboija aumbe louna di tijong hintin govt nin kiphinna ho nasatah a akimaitopi jeh jong hidi ahi.
Alunggel thei atamjon vang hitobang daan (CAA) hi boldoh hung hileh dihthei ponte ti anahipeh vang’a abolgo honk on ipi seijongleh kaboljoudi ahi tidan’a aboljeng u ahi. Bill ahilaija chu India a Scientist mi sangkhat lang’in hitobang Bill deilouna’a soi anakai uva govt anapeh u ahi. CAA thua kiphinna nei leh adeilou ho sei chu ahileh hitobang daan hi India daanpi (constitution) toh akikal’e ti ahi. Indian Constitution Article 14  dungjuija hi mi jouse dimun kibang chetna um ahi. Chuleh Article 15 dungjuija hi koima hou le tahsan (religion) thua khentum umloudi ti ahikitne. CAA hin mijouse dinmun kibang’a kikoina leh hou le tahsan thua khentum anei ahi ti hi CAA deilou ho panna ahi. Ajeh chu CAA hin hou le tahsan jeh a gamsung hung jamlut ho Citizenship apehdi ahileh Hindu, Muslim, Christian, adangdang koi kitilouva apehdidol chu Muslim ho kipeloudi ti um jeh a India Constitution toh akikal’e ti ahi.
CAA pomlou/deilou hon Supreme Court a Case abol u ahin aseichaina dia phaat le nikho ijat hunglut diham tivang seithei ahipoi. Ipi hileh India a Parliament hi thanei chungnung (sovereign) ahijeh a daan asem khat chu Supreme Court ninjong akhel (change) theilou ahi. Hiche jeh a daan kisemsa khat chu Parliament mama’n akhel, anung lahdoh, asemphat dibou ahin Supreme Court ninjong ima alotheilou ahi. Ahin Constitution hinadol (basic structure) hi kikhel theilou di ahi ti Constitution mama’a umkit ahijeh in CAA hin Article 14 leh 15 atongkhai/akikal’e tia Supreme Court nin aseileh CAA hi boithei kit ahi. Hichan lom’a Court apandi (aseidi) jong tahsan umlou ahi. Ajeh chu CAA deilou hojong hi Politics a Opposition (Non-BJP/NDA) ho ngen ahijeh un CAA deile deilou jehjong hibeh louvin akimui. West Bengal, Kerala, Punjab State govt hon CAA hi a-state uva chesah loudi atiuve. Ahin Centre govt/Parliament nin asem daan khat chu nomle daleh State govt hon achesahtei ngai, achesahlou ho President Rule kikoikhum thei ahikitne. Hiche ho jeh a ipi hung sohdi ham hinvetdi ahinalaije.