Centre in NSCN-IM thu asei lhah masanga Kukite tamtah atha thu aseilhah...

Centre in NSCN-IM thu asei lhah masanga Kukite tamtah atha thu aseilhah masat ding’a KIM in avel a PM memorandum pe kit

85
0
SHARE

Centre in NSCN-IM thu asei lhah masanga Kukite tamtah atha thu aseilhah masat ding’a KIM in avel a PM memorandum pe kit

Imphal, Aug 16(ET): Prime Minister’s Office in India sorkar leh NSCN-IM in chamna thu asei khom khumkha dinga asei Kuki Inpi Manipur in akipapi na thu aseiyin, ahin, NSCN-IM toh kihou khumkhana soi akai masang uva Thuingaleng Muivah lamkaina NSCN-IM hon Kuki tamtah atha thu aseilhah masat dinga avel a asei kit uvin ahi.

Shokholun Mate, General Secretary Kuki Inpi Manipur (KIM) leh Khaimang Chongloi, President, Kuki Inpi Manipur (KIM) in soi akaina Prime Minister Modi henga lekhathot apeh nauva, Manipur gam a um district 16 lah a Kuki hohi district nga- Chandel, Kangpokpi, Tengnoupal, Pherzawl leh Churachandpur district a atamjo hi ahi, ati. Hiche jeh a Kuki political demand suhlhapna um masa louva Kuki gam ho NSCN-IM ho lung holna a akiman got na aumleh Kuki ho kijou lhep na a kisang ding chule boina soh thei ahi, ati.

Hiche jeh a Kuki thu chule Naga ho thu hi akiseilhah gel nadinga ngehna kinei ahi in, NSCN-IM leh India sorkar in Kuki chenna gam atohkhah louna dinga kisei ahi, ati. Kuki Inpi Manipur in Manipur gam a nam chom chom toh lungmong a chen khom ding hi atahsan ahi in, hiche hibou machal nading lampi dih ahi, tin thuso chun aseiyin ahi.

Kuki Inpi Manipur in tu masanga India PM henga memoranda avel vel a ana peh lut nauva Framework Agreement hin Kuki ho chenna gam atohkhah thei louding ahi, tia kicheh tah a aseijing ahi. Kuki chenna gam akitongkha louva chule Kuki ho dinga Kuki chenna gam a hitobang ‘self-governance’ akigot peh a ahileh India sorkar leh NSCN-IM in kinoptona asem kisang ding ahi, ati.

Hiche jeh a India sorkar in ‘Sabka Sath Sabka Vikas’ achepi toh kilhon a NSCN-IM toh Framework Agreement finalize abol na a Kuki ho lungtup jong agel peh dinga temna kinei ahi in, India gamsung mi dihtah hina a Kuki hohi agam a akivaipoh thei nading a ‘autonomous political institution’ semdoh a, pu pa gam leh kihetna amanthah louna dinga aven na a pan lah dinga avel a ngehna kinei ahi, tin KIM thuso chun aseibe in ahi.

Pasal khat in kum 17 nungah khat suse, themmo chang pa Covid-19 positive hi

Thoubal, Aug 16: Tulai khamgahna le potdoh hahsat lai in Thoubal district hopsung kho khat a kon dukan bol pasal khat in kum 17 nungah khat aluppi in, police hon nungah suse pa amat jou a patepna abol ule Covid-19 natna nei ana hi in tun District Hospital Isolation Ward a chom koidoh ahi e tin tunia police a kon thulhut kimuchun asei e.

Themmo chang Md.Sidik Ali hin Thoubal Police Station hopsung  Sangaiyumpham Pulleipokpi Salam Macha dukan abol namun a August 11 ni jingkah nidan 9 a ahlu cho a che nungah nu chu athilchoh ama tah in akilahdia dukan sung a akoulut a aluppi a asuhset jeng thu hetdoh ahiphat a vengsung numei hon toumun kiphinna anei uva chu a kon a police hon Saturday nia themmo chang Md Sadali chapa kum 37 Md.Sidiq Ali chu amatdoh ahi.

Thilsoh toh kimat in vengsung mipi’n kihouna anei un, themmo changpa agangpen a gotna pehding, suhset a um nu government in kithopina agonpih ding, ihamtia government in ngehna ho asuhbulhit loule state sung numei kiloikhomna le CVO toh kihoumat a kiphinna chelhah pi din thulhuh asem un ahi.

Manipur a COVID-19 natna a mi 3 thi kit, natna a thi agom a 16 lhingta; nidan 24 sunga case athah 179 kimu be

Imphal, Aug 16(ET): Manipur gam a Sunday nikhon Covid-19 positive hi a mi thum athi be kit in, tuchan geiya gamsunga dinga nikhat a coronavirus jeh a athi atam na pen ahitai.

Additional Health Director Dr. K Sasheekumar Mangang in asei dungjuiya, Regional Institute of Medical Sciences (RIMS) Hospital, Imphal a kijen Covid-19 positive hi a adamlou ni athi in ahi. Mikhat hi kum 44 a upa BSF sepai ahi in chule mikhat hi Thoubal district mi kum 94 a upa ahi, ati.

Imphal West district mi kum 73 a upa Covid-19 natna nei khat jong akijenna Jawaharlal Nehru Institute of Medical Sciences (JNIMS) Hospital a virus jeh chule natna chom chom anei khom jeh a athi in, hiche toh kilhon a gamsunga natna jeh a thi agom a mi 16 lhing ahitai.

Wahengbam Leikai, Imphal West a cheng kum 73 a upa pasal khat hi achesa Friday nikho a tisat leh hai hahsat jeh a JNIMS hospital a apohlut u ahi in, Covid-19 positive ahi akihetdoh jouva JNIMS a kijen a, Sunday nikho a anatna alel a thi ahi.

BSF sepai khat hi 182 Battalion, Koirengei a um ahi in, amah in kal (kidney) natna aneiya chule RIMS hospital a Covid-19 jeh a kijen ahi. Ama jong Sunday nikho a thi ahi. RIMS Medical Superintendent Dr Ch. Arunkumar in Imphal West Superintendent of Police henga natna jeh a thi pa kin chaina sem nadinga lekhathot ape in ahi.

Achesa August 14 ni a RIMS CCC kidney natna leh Uraemic Encephalopathy chule Anemia natna leh Covid 19 positive hi jeh a admit abol u ahi.

Alangkhat a, achesa nidan 24 sunga sepai 111 panna a Covid-19 case athah agoma  179 akimu be in, hiche toh kilhon a gamsunga Covid 19 positive case agom a 4,569 alhing tan ahi. Covid 19 positive hi a mi 68 ho lah a mi 60 hi gamdang a kholjin lou ahi. Positive case 68 hi general public (milham) ahiuvin, amaho lah a Imphal West district mi 47, Imphal East mi 9, Thoubal a mi 4, Ukhrul mi 3, Noney leh Senapati mi 2 cheh chule Kangpokpi mi khat ahi.

Abon uva Covid Care Facility a achon uva chule angaicha containment leh contact tracing ho apat u ahitai. Hiche phat sung ma ma a gamsung mun chom chom a CCC a kon mi 194 discharged abol tauvin ahi. CCC Meitram a mi 45, Lamboikhongnangkhong a 44, Tamenglong a 30, Thoubal a 26, CAPF 18, RD Wing 13, Senapati 8 chule RIMS leh DH Thoubal a kon mi 5 cheh RT PCR test akibol nauva Covid 19 negative ahi tah jeh uva discharged abol u ahitai.

Manipur a tu leh tua positive case hi 4569 (milham 3377 leh CAPF 1192) ahi in, discharged kibol 2632 (milham 2385 leh CAPF 247) ahi. Chule active case hi 1921 (milham 977 leh CAPF 944) ahi in, recovery rate 57.60% a um ahi. Covid-19 positive atamjo hi symptoms umlou ahilouleh anatna neo neo bou um ahi in, amaho hi hospital a akijen u ngai lou ahi.

 

Manipur sorkar in ‘asymptomatic’ leh anatna khohse lou Covid-19 positive ho ‘Home Isolation’ a aum thei nadiu SoP sodoh

Imphal, Aug 17(ET): COVID-19 positive hi a mi atamjo hi asymptomatic (natna kihelou) ahilouleh symptoms neo cha cha bou nei ahi in, medical treatment angaichat lou ahi.

Hospital leh healthcare professional hon Covid-19 natna khoh neiya ahilouleh Covid toh kisaina neilou natna dang dang neiya leh emergency case ho avetkol thei nading chule vangsetna toh aumlou nadinga mi jen dinga aum theiyu ngai ahi. Hiche jeh a Health and Family Welfare Ministry, India government in achesa July nisim 2 nikho a ‘Revised guidelines for Home Isolation of very mild/pre-symptomatic/asymptomatic COVID 19 case’ ana sodoh ahi.

State tamtah in Covid 19 positive hi a ahivanga anatna um behseh lou hohi Home Isolation bol dinga dan kisema jui ahi. Tekah na a, Delhi a COVID 19 active case 50% tobang hi Home Isolation a um uva, pandemic dou nadinga ‘framework’ phatah a apeh u ahi.

Manipur gam injong ‘home isolation’ a um nom a Covid-19 positive case hi a ‘asymptomatic ahilouleh mild symtoms’ nei ho dinga ‘home isolation’ apohdoh ding ahi. Hiche hi Covid natna neiya koi tobang inmun a kikhum tup nom chule akisei tobang a anatna akhohse lou hon akilhen thei diuva kikoi ahi.

Chief Medical Officers (CMO) hon Home Isolation a umthei ding Covid-19 positive ho koi hiuvem ti ve ding leh kholtoh dinga medical team alhen diu ahi. Chapang kum 10 noilang ahilouleh naosen (asymptomatic) hohi Home Isolation a umsah ding gelkhohna kipe ding chule naovop numei a naonei nading (Expected Date of Delivery) alhom pen a lhakhat tobang kivat a chule asymptomatic hi ho jong ‘home isolation’ a umsah ding khohsahna kipe ahi.

Home Isolation a um natna nei ho jouse dinga Health Department in Fingertip Pulse Oximeter (home isolation phat akichai teng nungpeh thei ding) chule triple-layer mask ho ngaichat dungjuiya apeh thei ahi.

Chief Medical Officer in home isolation a um adamlou ho dinmun (health status) aniseh a vekol ding Medical Officers/Team asem ding ahi. ‘Home Isolation’ hi nikho 14 sung hiding ahi. Chule home isolation phat akichai teng ‘home isolation’ a um adamlou ho chule aum khom pi ho RT-PCR a Covid-19 test kibol ding ahi.

 

Nepal a munchim jeh a mi 18 vel in thina toh

Kathmandu, Aug. 16 (Xinhua): Central Nepal a mun chim na a mi 18 lam in thina ana toh uvin mi 21 lam tu chan in akiholmo in ahi. Hiche amang ho holdoh ding toh lhon in Nepal Police, Armed Police Force le Nepal Army ho in alhang mipi hotoh kitho in natoh na anei uvin ahi. Munchim na Jugal Rural Municipality, Sindhupalchowk district achun tu chan in thilong  18 mudoh ana hi in chuleh  mi 21 akiholmo nalai in ahi akiti. Thilong 18 lah achun 11 chu chapang ahiuvin ahi akiti. Hetthei khatchu Nepal gamsung ahi un 300 vaal munchim nathei ding um ahi akiti. Sindhupalchowk administration in centre ang a hiche munchim a jeh a thilong ho holdoh ahi a suhtheng ahi jou teng alhang sunga cheng ho hi munchomkhat a chondoh na ding a hetsah na kinei ding ahi  tin ahin sei uvin ahi.

 

State sorkar in August 31 chan ‘Lockdown’ phat suhsaobe dinga thuso nei

Imphal, Aug. 17(ET): Manipur a niseh leh gamdang/gam pam a kholjin lou gamsung mi Covid-19 natna nei kimudoh atam cheh cheh jeh a state sorkar in Saturday nikhon August nisim 31 nikho chan Lockdown phat suhsaobe dinga thuso anei tauvin ahi.

State Chief Secretary leh chairman, State Executive Committee, State Disaster Management Authority, Dr Rajesh Kumar in Chief Minister N Biren Singh lamkaina a Saturday nikho a Imphal khopi a Cabinet minister ho toh kihouna (review meeting) anei jouva lockdown phat suhsaobe dinga order asodoh ahi.

Hijong leh angaicha khoh ho home delivery leh supplu kipe, bongnoi leh bongnoi thil ho kisem, kijoh, dammo na thu toh kisai, agricultural, fishery, animal husbandry sector, finance sector, commercial/private establishment chule emergency service ho kiphal ding ahi.

Central leh state government office, dukan, spare parts leh tyre toh kisai dukan, MNREGA natohna chule construction natoh ho akihon ding kiphal ahi. Chule jingkah nidan 8 a kon nilhah nidan 2 chan (Sunday nikho tilouva) vengsunga um niseh ngaichat ho kijohna dukan, thei kijohna, bongnoi, ahsa leh nga kijohna ho district jouse a kihong ding ahi.

Sunday tilou nikho dan jouse jingkah nidan 10 a kon nilhah nidan 3 chan Thangal bazar leh Dharamsala a wholesale dukan ho kihong ding chule Paona Bazar, Thangal Bazar leh Nagamapal pam a um inn sahna thil kijohna, hardware, electric thil, cement kijohna dukan achombeh a um (standalone) ho akihon ding jong phalna kipe ahi.

Imphal West, Churachandpur, Pherzawl, Tamenglong leh Noney district a retailer (dukan bol hon) Monday leh Thursday nikho teng wholesale dukan a thil akichoh theiyu ahi in, Imphal East, Senapati, Kangpokpi, Ukhrul leh Kamjong district mihon Tuesday leh Friday nikho leh akichoh theidiu chule Chandel, Tengnoupal, Thoubal Bishnupur, Kakching leh Jiribam district in Wednesday leh Saturday nikho teng wholesale dukan a kon thil akichoh theidiu ahi.

Dukan bol hon wholesale thil chohna dinga gari akipui theiyu ahi in, ahivanga ama ama district commissioner in pass/permit apeh ngai ahi.

 

Sub-Inspector Gallantry Award sang pa hi 2013 kum a Dk. crore 3 man khamnathei po a mat a ana um ahi: AMSU

Imphal, Aug 16(ET): Achesa 2013 kum a crore 3 val man khamnathei po a mat a ana um Imphal East CDO a SI Beishanayum Debson Singh tukum Chief Minister’s Police Medal for Gallantry for 2020 peh a aum jeng hi lungdon umtah ahi e tin All Manipur Student Union (AMSU) in tunichun government dohna aneitan ahi.

AMSU thuso in asei na ah achesa April 28, 2013 nia Moreh jon go Imphal East Singjamei Bheigyabati Leikai mi Sub-Inspector Beishamayum Debson Singh chu akilhonpi Manipur Police commando mi 11 toh international market a Rs 36402000 man Respifed Tablets le pseudoephedrine tablet apoh jeh uva Pallel mun a ana kiman uva Kakching Police station a ND&PS Act section 21/29 le Arms Act section 27 noi a achung a FIR no 62(4)2013 jihlut a ana umsa chu Chief Minister’s Police Medal for Gallantry notified vide reference number 27/6/2020-H(CM-MEDAL) dated 12 August 2020 nia Gallantry sang ding 6 channa a apan jeng khamnathei doudal chief minister thilbol natoh hi lungdon aumlheh e, ati.

Hitolhon a tuchung a Gallantry sang Police jouse kholchilna a khamnathei a kivei hetdoh ho kipaman nunglah pih ding a AMSU in ngehna anei ahi.

 

CM Biren, Congress MLA 1 chule Congress a kon haina nei MLA 6 ho New Delhi jon a kipan doh tau

Imphal, Aug 16(ET): Chief Minister N. Biren Singh chule tu naicha 11th Manipur Legislative Assembly a kon haina neiya Congress MLA anahi mi 6 ho leh Congress MLA RK Imo Sunday nikhon centre a BJP lamkai ho kimupi dinga New Delhi jon a lenna a aleng doh tauvin ahi.

MLA 7 panna a Chief Minister leh CM Personal Secretary 6 chule RK Imo leh Governor OSD panna a agom a mi 14 special Spice Jet lenna a tuni nilhah nidan 2.30 don a New Delhi jon a cheu ahitai. New Delhi a che MLA anahi mi 6 ho lah a O Henry, Md. Abdul Nashir, Oinam Lukhoi, Paonam Brojen, Ngamthang Haokip leh Ginsuanhau pang ahi.

Ipijeh a kholjin uham ti mipi het dinga aseidoh loulai vang uva Centre a lamkai hon Ministry akhel a, MLA party dalha a haina nei ho a kon mi 2 portfolio apeh diuva Chief Minister in ngehna anei got hinti tia thu kithang ahi. Ahin, thulhut chom khat in amaho kholjin hi tua Congress a kon haina neiya MLA ho by-election a BJP party ticket apeh tei nading uva kalsong u ahi, ati.

Tahsan umtah thulhut khat in, Chief Minister in Ministry khel nom na nei jong leh hiche thu hi Centre a lamkai ho henga apohdoh louding ahi, ajeh chu cabinet kikhelna aumleh boina aum thei na dinmun len ahi, at. Chief Minister in Congress MLA anahi mi 6 ho kitahna a majority ahina photchenna anei nom ahi in, mi 6 hohi abon uva Central BJP lamkai hon hetpehna anei uva chule a umding by-election a BJP ticket peh tei dinga kitepna anei diu hi CM in aboipi ahi, ati.

 

Manipur a College ho boina sangtah in alhunden e: KSA

Imphal, Aug 16(ET): Simlai ho khankho ding gelkhohna a National Education Policy 2020 danthah hi simlai ho dia boina asolou nadia avekol ding lomkhat gangtah a gondoh angai e tin Kangleipak Students’ Association (KSA) HRD Secretary Romen Soibamcha a kon tunia kimu lekhathot chun asei e.

Manipur college ho a kihil phatsung UGC gon dungjui a che hinam ahiloule Research and Academic contributions le Professional Development, Co-Curricular le Extension Activities chesah ding dol UGC dan juitheilou ho jong hetdoh angai e ajehchu NAAC dan bulhit joulou college hon UGC a pat sum le pai panpina muding dol aban ban a hung bing thei dia aumtolhon a geisang lou hel a college ngaichat thil le lo ban a hilkung umding jat jong alhingkei a government in agon loi ngai ahi e tin lekha a chun asei e.

KSA in asei be na ah UGC dan dungjui a college a dia regular principal gon a um chun kum 5 sung panmun alo ding, kum 5 kichai nung a panmun atuhjom ding le avel a interview che a panmun losah hibep dia dan um hijongle college tamjo a principal hohi regular aumpon incharge ngen tobang ahi in, hitia college principal kigong adihlou hi gangtah a government in angah a regular principal agon a asuhtoh loi angai e, ati.

Chule KSA thuso in aseikit na ah aided le government college hilkung UGC gon thepna neilou hon thepna aholkhom nadia phat bitep gon pih a, phat bitep sung a thepna nga joulou chung a dan tahkhum dia gon ding le geisang lou a college hilkung ho 7th pay apehpan ding in jong ngehna anei uve.

National Institutional Ranking Framework (NIRF), Ministry of Human Resources Development, Government of India in India gamsung a college le university 200 ahoipen a alhendoh holah a Manipur state a ho apan phah lou na jong hiti ho jeh ahi in, imalam jouse a state a college ho lhahsamna thuh tah a um hohi suhtoh loi ngai ahitai tin KSA thuso doh chun asei.

 

Manipur in 74th Independence Day mang; Mihem hinkho jouse hi manlu tah ahi, tia CM in sei

Imphal, August 15(ET): India gam dang dang banga Manipur injong August 15 nikhon 74th Independence Day amang in, 1st Battalion Manipur Rifles Parade Ground, Imphal khopi a Chief Minister N Biren Singh Chief Guest panna a state level kin achelha in ahi.

National Anthem kilha sunga CM In National flag khaidohna aneiyin ahi. CM Biren in ahoulimna a, mihem jouse hinkho hi sorkar dinga amanlu pen ahi, tin aseiyin chule thi na thei natna vetkol nadinga sorkar in bol thei chan abol ahi, ati. Doctor, nurse leh medical staff hon ama chang kikhohsah na nei louva Covid-19 nat douna a pan alah u sorkar in hetpehna aneiye, tin aseiyin chule Dr. Tharoijam Utthan lamkaina a JNIMS doctor team hon JNIMS a natna neiho ajen u akipapi na thu aseiyin ahi.

Gamsung mihon healthcare worker chule frontline worker ho athet bol lou diuvin temna aneiyin, COVID 19 nat douna a sorkar atosot diuvin temna aneiyin ahi. Hospital a adamlou admission akipeh loujeh a vangset um thilsoh lhung ho thu aseiyin, hospital leh doctor hon koi hijong leh adam lou ho jen ding aphal da lou diuvin temna aneiyin chule koi tobang adamlou ho jen ding nom louva hospital leh doctor aumleh gotna chang ding ahi in, hiche thu a sorkar in thuso anei ahitai, ati.

Cabinet Minister chule Consultative Committee on COVID-19 member hotoh kihouna kineiya lockdown extend bol ding thu kisei ding ahi in, hiche chungchang a guidelines leh SOP ho kisodoh vahding ahitai, tin jong aseiyin ahi. ‘War against Drugs’ a sorkar lolhinna ho thu aseiyin, Fast Track Court akisemdoh toh kilhon a khamnathei toh kisai case ho a mi 110 vel themmo kichan ahitai, ati. Gamsung mun chom chom a police hon drug factory hojong amat ahi, ati.

GTV, GTH, CMHT, CMST leh scheme dang dang hohi tehse ho panna a mi tamtah in aphatchompi a, akipa sah ahi, tin aseiyin chule tua sorkar hin jouthu a kitepna aneilou, akitepna jouse bulhit ding khohsahna apeh ahi, ati.  PM Modi lamkaina noiya Northeast a khantou machalna ding tohgon chom chom chelha a, Northeast India a chamna leh khantouna um ahi. PM in tu naicha dangka crore 3000 lhing Manipur Water Supply Project agon a, Union Road Transport and Highways Minister Nitin Gadkari in dangka crore 3000 lhing National Highway project chom chom nisim 17 nikho a video conference a kon foundation stoen hondohna anei ahi, ati.

Aumtalou Rifleman Ratan Salam, 4th Assam Rifles lunglet leh hangsang tah a apanna hetpehna a CM in Major Laishram Jyotin Singh Ex-gratia scheme kiti athah a kisem doh scheme noiya Ratan jinu dangka lakh 5 cheque pehdohna aneiyin ahi.

Chief Minister in Bishnupur SP Priyadarshini Laishram, Inspector Oinam Ajit Singh leh Women Constable Okram Bijeta Devi ‘Chief Minister’s Trophy for Community Service Award’ pehdohna aneiyin ahi. Chief Minister’s Trophy for Anti-Drug Campaign award Thoubal SP Dr. Sarangthem Ibomcha, ASI Anoubam Krishna Sharma leh Head Constable Moirangthem Rinash Meitei in akisan uvin, Paona Brajabashi Award Best NCC Boy Cadet award N Bunty Angom in asang in chule Rani Gaidinliu Award for Best NCC Girl Cadet award Mayanglambam Nenita Devi in asang in ahi.

Independence Day kiman na kin goun a Deputy Chief Minister Y Joykumar, Cabinet Minister ho leh MLA ho, Chief Secretary, DGP, civil, police leh military officer luboh chule adang dang jong apang uvin ahi.

Dr Uthan Covid-19 positive hi

Imphal, Aug 16(ET): Manipur sung a covid-19 natna amasapen a ding a jan dam na ananei Dr Uthan chu tuni in covid-19 positive ana hi in ahi. Uthan chu tuni in JNIMS Covid ward a koi in ana um tan ahi.  Tu naicha a achu Dr. Uthan hin PPE suit a thimil liu a mi an ajan chung chang video ana kithe thang khah toh lhon a mipi in achung a kipa na phondoh na ana nei jing u ahi.

State Level Pineapple Festival tukum manlou dia voh hai hi

Imphal, Aug 16(ET): Covid-19 natna hise khohset lai ahitolhon Manipur a dia tohga golnop lenpen a kihe State Level Manipur Pineapple Festival kingon tukum manlou ding ahithu ADCC member jong chule Manipur Pineapple Festival Committee Chairman Seilenmang Khongsai in Khousabung DCC headquarter mun a gangtah a kigong thuso miho toh tunia kimutona aneipet a aphondoh ahi.

Hiche thu hi committee member hon gelkhomna nei ahijou a tukum nat le sat jeh a kingon manlou dia gellhahna kinei ahi in, mipi hahsat gentheina hetpih Chief Minister le government agency hochung a kipathu phondohna aneiban in loubol ho hahsat gentheina thuso a hin tahdoh thuso miho chung a jong MPFC chairman chun kipathu aphongdoh e.

Hetding chu achesa 2008 a pat loubol ho tilkhouna a kumsih le Khousabung, Churachandpur mun a  State level pineapple festival hi lengthei hoipen kitetna, loubol ho kipaman hopdohna abanle donghoi kitetna kingon a man ana hipan ahi.

Kangpokpi a Nasha Mukh Bharat Campaign kipan

Kangpokpi, Aug 16(UNA): Union Minister of State for Social Justice and Empowerment in adehset a India gamsung district 272 ho a 2020-21 kum sung a khamnathei doudal ding tohgon hondohna anei banjom in Kangpokpi district in jong Independence Day ni chun lolhingtah in tohgon sutjom ding in DC Office Conference Hall ah District Level Office ho panna in Deputy Commissioner Somorjit Salam, IAS in ahongdoh tan ahi.

India gamsung district 272 khamnathei sang a kihe lhendoh holah a Kangpokpi hi asang dehset ahi e.

Kangpokpi district a dia Nasha Mukh Bharat Campaign hi Kangpokpi District Social Welfare Officer le District Administration gonna noi a chelha ahi.

DC Kangpokpi, Somorjit Salam, IAS in natna hise umlai phat le nikho hahsat lai kisen a niseh tobang a khamnathei mat a aum jing a kon khangthah holah a khamnathei mangcha atam dan mudoh thei ahi in, khangthah khamnathei a kibol den hohi ngailutna neitah a boipi a abanle department ho le mipi kithokhom ngai ding ahi e, ati.

Usharani Devi, District Social Welfare Officer, Kangpokpi in khamnathei doudalna tohgon noi a hi awareness generation programme, focus on higher educational institution, university campus le school ho, mipi lah, natna jending dan ho gei vetsui ding hijongle kumkhat sung a Kangpokpi district sung a hi lakh 10 lut a block jouse, kailhang, school le college ho a thucheng tahdoh hiding abanle khamnathei a kibolden ho houlimpina jong nei ding tohgon ahi e, ati.

Gamsung a khamnathei doudal ding hi tohgon poimo tah ahitolhon a 2017 kum a sum le pai crore 43 gon ana hi jong 2020 a hi crore 260 gon a um ahitai tin  “International Day Against Drug Abuse and Illicit Trafficking” kingon man nikho chun Minister of Social Justice and Empowerment Thaawarchand Gehlot in ana phondoh e.

Hetding chu District Level Nasha Mukh Bharat Campaign Committee a DC hi chairman le District Social Welfare Officer, Kangpokpi hi member secretary hiding chule SP Kangpokpi, DLSA District Judge, Kpi; CMO Kpi; ZEO Kpi; Regional Joint Director (Education), Kpi, CDPO Saitu Kpi District, Rural Health Organization, Kharam Thadoi, Kpi le Rural Community Development, Saikul, Kpi; Ngahchong Kipgen, retired ZEO le Thanglensei Kipgen, retired SBI Manager, Kpi; New Light, Kharam Thadoi, Kpi (IRCA) le state Coordinator PMU, Ministry of Social Justice, GoI ho chu committee member hidiu ahi.

Tripura Central University VC panmun a GP Prasain pansah ahi AMGSU in kipapina phongdoh

Kangpokpi, Aug 16(UNA): Manipur University Social Sciences Dean le Commerce professor ana hi GP Parsain chu Tripura Central University Vice Chancellor panmun lo dia pansah ahi All Manipur Gorkha Students’ Union Manipur in akipapina aphongdoh uve.

AMGSU in kum 2020 hi mihem a dia genthei hahsat phat ahivang in GP Prasain in Tripura Central University vice chancellor panmun lo dia ahung um hi Manipur Gorkha ho dia kiletsah umtah ahi e, ati.

AMGSU in Kangpokpi district sung Charhajare tolkon GP Parsain hi Hindi Secondary School, Kanglatongbi a hung seilen, Banaras Hindu Unversity, Varanasi a pat M.Com le Ph.D. hin chai a Manipur University ana lutpan a kum 30 val hilkung a hung pang le lekhabu 7 sodoh le research lekha 67 ana simdoh holah a 8 jen vannoi a ana kithejal abanle 2010 le 2014 kum a New Delhi a Fellow of Indian Commerce Association a kon kipaman jong ana sang,  Indian Commerce Association, Indian Accounting Association, Indian Institute of Public Administration a Life Member le United State of America, Myanmar, Bhutan le Nepal a academic thu a ana kalsong khat jong ahi.

Tunia mopohna thah achan hi Manipur mipi ding seh hilou in North East mipi dia kiletsah pi umtah le ama lolhinna hi Gorkha nam deh ding a kitilkhouna phatah jong ahi e, ati.

TLRF in paocheng thah alambe lekhabu kihop machal jing

Imphal, Aug 16(ET): Thadou Linguistic Research Forum (TLRF) in alambe le akholdoh Thadou paova paocheng phabep Lockdown sunga kihom jing chu tuchan in amachal jing ahi.

Paojahao Kipgen, Lhangsam Thadou Linguistic Research Forum min a kimu thulhut in aseina ah Kangpokpi District gamkai sung Keithelmanbi le Haipi vella houbung 30, Kangpokpi DHQ sunga houbung 15, Leimakhong le avella houbung 15, Saitu lhang a houbung 20 le Tujang lhang a houbung 20 ho akihomdoh tan chule Motbung, Saikul, Twilang, Kangchup le adang dang jong kihom jom nalai ding ahi ati. Chule Phat masa chun Saparmeina, Leikot le Khengjang ho a jong ana kihomsa ahitai jong ati.

Hiche tohgon hi pao khantouna ding le pao dihtah hetbe nading’ akibol ahi ban a pao kilambe ho houbung hon ahettoh uva amanchah nathei diu tohgon thupi tah jong ahi ati. Houbung khenna umlou hella lhunsah dinga kigelkhoh ahi. Tulai houbung hile hoilai mun hile midang pao jenga thucheng kimang ho eima pao joh kimang le tia tohgon hi Pathen jallin alolhing jinge ati.

Lekhabu neocha hi TLRF natoh kipatna ahitoh lhonna mipin amanchah cheh din jong nam mite temna chule tuchanna TLRF lamkaiho le akithopi hon lekhabu ahopdohna a houbung le changval a tosot jing ho chunga akipana thu jong seiyin ahi.