Centre in ground rule palkeh SoO noi’a um thingnoi ho chung’a ...

Centre in ground rule palkeh SoO noi’a um thingnoi ho chung’a action lahen ti’a State Govt. in kithulhuh nanei

926
0
SHARE

Centre in ground rule palkeh SoO noi’a um thingnoi ho chung’a  action lahen ti’a State Govt. in kithulhuh nanei

Imphal, Oct. 17 (ET): Phat sottah akon kilungkhat tah leh kicham del’a hung chengkhom jat le nam chom chom sung’a India Government leh State Government toh SoO soi kaikhom Group phabep gamsung choh chavei dia kisa aum toh lhon’a India Government in vettup na neihen lang chuleh bolthei chan bol hen ti sei ding in tunin Chief Minister N. Biren lamkai nanoi in Chief Minister Secretariat Cabinet Hall mun’a Cabinet meeting kibolna achun kiphatsah na anakinei in ahi tin State Government Spokesperson jong hi Education Minister Th Radheshyam in thuso miho heng’a aphongdoh in ahi. Chuleh tuchung Kuki ten pupa gam huhbitna ding’a British ho anasatnao kum 100 lhinna kingon kiman ding toh kisai’a “In Defence of Our Ancestral Land and Freedom” ti thucheng kijih jeh’a jat le nam kah’a kihetkhel naleh thuboi laboi hungsoh ding ho vendoh na ding’a State Government in panna theichan in pan anakilan ahi. Hiche nachung chon’a janlhah (Oct. 16) chun Chief Minister pa lamkai na noi in Kuki CSO holeh Kuki Inpi lamkai ho pannan kihoukhomna anakinei in hiche achun Kuki Inpi lamkai hon British tetoh gaal anakisatna kum 100 lhin geldohna’a phaisung’a Memorial park khat le Oct. nisim 17 nikho hi gamsung’a restricted holiday ding’a ngehna ananei’u State Government in jong ana kisanpeh in ahi ati.

Alangkhat’a Kuki Inpi leh Kuki CSO lamkai ho phatsah dungjui’a thulhuhna akinei jou in SoO noi’a um Kuki thingnoi kiloikhomna phabep in mi anagih uvin akichatsah uvin thal jong anakap utoh lhon’a Ground Rule asukeh uvin ahi. Chuleh thal kap le micham sulung linglao kiloikhomna chu koi pen ahi  hetdohna ding in kholchil na jong achelha jom jing in ahi tin Minister Th Radheshyam chun aseiye. Aman aseibe na’a KSO Saikul in Social Media ho’a Saikul leh Tengnoupal a apet pet’a School ho kha ding’a thu ahin tahlang jeh uvin simlai kiloikhomna chung’a FIR jihlut in aum in chuleh thu le laa aphalam lam’a bolding in hatah in pan akila in ahi. Koi hile jat le nam khat chung’a thilse chule mi lungsung tongkha thei thu le natoh koiman abol theilou ding hiche nachung chon’a gamsung mi jouse ding’a thunei vaihom khat um ahi ti koiman asuhmil lou ngai ahi ati. Chuleh kilungkhat tah leh chamdel’a um Manipur mipite kah’a kinah kibou chuleh thilse sosah louna ding’a gamsung’a um Civil Society kiloikhom naho, simlai kiloikhom naho leh SoO noiya um thingnoi kiloikhomna hon pan hatah a alah ding uvin Minister Th Radheshyam in temna jong anei in ahi.