CCpur a ATM Booth a sum koi a che Writer Safeguard Private...

CCpur a ATM Booth a sum koi a che Writer Safeguard Private Limited staff khat melhetlou hon kap lih; Dk. Crore 1.15 jong gudoh’u

442
0
SHARE

CCpur a ATM Booth a sum koi a che Writer Safeguard Private Limited staff khat melhetlou hon kap lih; Dk. Crore 1.15 jong gudoh’u

B.Lalboi Gangte

CCpur. September 4 (ET): Melhetlou gaal manchah choi phabep in tuni jinglam nidan 10:30 vel in SBI Churachandpur Branch mai’a ATM Booth ah sum koiding’a che Arambam Ranja Meeitei (37) S/o (L) Arambam Meeitei of Zouveng Khuga tampak chu thal in anakap uvin ahi. Ranja chu apet pet in Dist. Hospital anapolut uvin ahin Imphal lam joh vetkol ding’a refer anahi vang in damdoh jou lou talouvin Shija Hospital mun’a nilhah nidan 1:30 vel in ana thi in ahi. Ama akon in melhet lou hon Dk. Crore 1.15 anajam mang pe uvin ahi.

Hetthei khat chu CCpur khopi sung’a ATM Booth 16 ho’a sum koi/heng ding’a kimang Agency khat atong SBI Churachandpur Branch ah ATM ah sum akoi jouva mun dang ATM a koi kit ding’a akigot jing lai tah’a hitobang thilsoh hi lhung ahi. Hiche thilsoh pet tah’a hi Ranja Meeitei bou um ahi jeh in thilsoh umdan amu koima aumpon ahi. Ranja hi ATM chom chom’a sum koina ding’a Bolero (Registration No. NL07C 9242) khat amangcha chule ama kap hon ATM ah sum koi ding’a apoh Dk. Crore 1.15 jong analadoh uvin ahi.

Alangkhat’a hcihe thilsoh lhun masang chun Ranja Meeitei hi aloi mi 2 toh kilhon ahin aloi teni lah’a khat hin bol ding anei jeh chu Bank in alut in aloi khat pa hi LIC a bol ding anei jeh in analut kit in ahi. Thilsoh namun hi SBI Churachandpur Branch kimai to aum Chingtam Hotel mai ahi. Chuleh tuni Tedim Road dung’a dukan chunglang pang kikha nikho ahi jeh chun Chingtam Hotel jong akikhah in ahin akom vel achun me ding anche louhing leh pahcha joh nupi 4 vel atou in ahin koiman thal gin anaja pouvin ahi akiti. Chule hiche pet tah’a koiman thal gin kiti aja koima ana um lou jeh chun Ranjan hi Stroke jeh’a lhu hi ding ham ti in akimvel’a um hon twi anathe khum uvin, Bolero sung’a ajon doh phat uvin Ranjan tahsa chung akon thisan anamudoh uva kon in ahedobeh uvin ahi. Che phat chun District Hospital a jinglam nidan 10:57 vel’a anapolut uvin hiche achun ajet lang atainem’a meichang lutna maha mun ni anamudoh uvin dressing abol peh uvin Imphal ah vetkol ding’a refer anabol jeh uchun HYA Ambulance in anapohsuh vang in damdoh jou lou in thina atoh in ahi.

Hiche thilsoh thu CCpur Police in ahettoh lhon in Shivanand Surve, IPS, Additional SP (Law & Order), Lawrence Munluo, MPS, Additional SP (Operation) leh  Police hon thilso namun anadellut pai uvin amun aum mi chom chom ho akon in thu alakhom uvin chule Ranjan in akilhonpi teni jong thudoh nei ding in Police Station ah apui uvin ahi. CCpur District sung’a Bank Branch chom chom in ATM aneiho vetup ding in Fidelity National Information Services, Inc. leh Hitachi Money Spot kiti Company ni amang cha uvin amaho ATM a sum poimo ding jat indent abol dungjui uva Bank hon sum poimo ding jat apehdoh uva hiche akon Company tenin ATM a koi ding’a Writer Safeguard Private Limited amangchah ahi. Tuni thilsoh’a kaplih’a um Ranaj jong hi Writer Safeguard Private Limited a natong ahi.

Hiche thilsoh thu’a Manipur Police Headquarter akon in nilhah nidan 3:00 vel in DIG Range-III Kamei Angam Romanus, IPS leh Clay Khongsai IPS, IGP in thil umdan vetlhah na anei lhon in ahi. State Bank of India, Main Branch jong anapha lhon in chuleh Police in ATM a koi ding sum kiguh mang naleh mi 1 in thina atona chung’a FIR No. 67(09)2020 CCP-PS U/S 392/302/34 IPC & 25(1-C) Arms Act. a ajih lut uvin kholchil najong apan tauvin ahi.

Xxxxxxxxxx

Social Welfare Minister Nemcha Kipgen COVID-19 negative hita; Manipur a Covid-19 a mi 3 thibe, natna nei mi 90 kimube

Imphal, Sept 4(ET): Manipur social welfare minister Nemcha Kipgen, tumasang jep a test akibol na a kon a Covid-19 positive a ana kimandoh chu tuni nikho in test akibolkit toh kilhon in negative ahitan ahi.

Minister Nemcha Kipgen hi positive ahitoh kilhon a achesa August nisim 25 apat a vetkol ahinung a Babina Diagnostics Center, Imphal mun a test akibolkit nunga negative ahi hung kihedoh kit ahi.

“Keima tah in test kaga kibol a konna negative kahung hi kahin kihetdoh ahi, chuleh  Kangpokpi district medicak team leh Dr Lokeswor JNIMS chung’ah eikithopi nau leh medical care eibol nau chung’ah pachatna sangtah kape e” tin minister Nemcha Kipgen in aphongdoh in ahi.

Alangkhat ah Manipur a athahbeh in COVID-19 a thi mithum a umbe kittoh kilhon in agoma natna jeh a thi mi 35 aphatan ahi.

Nidan 24 sungin kum 60 numei khat leh kum 59 leh 39 pasal ni in natna jeh in thina anatoh un ahi. Thina toh ho hi Shija leh JNIMS a vetkol a um ahiuve tin additional health director Dr K Sasheekumar Mangang, Addl. Director & Spokesperson, Health Department, Manipur in aseiyin ahi.

Thina toh lah’a ni teni hi Imphal East akon ahi in chuleh khat hi Thoubal districts akon ahi akiti. Chuleh nidan 24 sung ma chun Manipur sungah athahbeh in Covid-19 natna nei mihem 90 mube ahi in, 24 ho hi security personnel ngen ahiuvin chuleh adang mi 66 ho hi agam mi gampam a lut leh pot bolkhalou cheh ahiuve tin Mangang in aseiyin ahi.

Hiche toh kilhon in state sunga agoma natna nei hi 6,699 apha tan,  5,046 ho hi agam mi in mun a khosa den ho mong mong ahiuvin chuleh 1,653 hi Central Armed Police Force (CAPF) ho ahiuvin ahi.

Positive case kimu hohi  VRDL, JNIMS – 33; Jiribam – 3 ; Shija Hospital -5; Churachandpur – 7; Bishnupur – 12; Imphal Hospital – 1; Imphal East RAT-3; Asian Hospital – 1; Thoubal – 6; Ukhrul – 2; Imphal West RD Wing – 1; Tengnoupal – 1; Babina Diagnostics – 5; Raj Medicity – 8; Maipakpi – 2 ahi. Chuleh amaho hi Imphal West – 10; Imphal East – 12; Bishnupur – 13; Thoubal -8; Jiribam – 3; Kakching -2; Tengnoupal – 15; Ukhrul -3 a hung kondoh ahiuvin gamchom a potdoh na neilou ngen ahiuvin, abon chauvin Covid Care facilities a vetkol dinga koi ahi cheh tauvin, a umna mun ho’u leh aki suhkhapi ho holdoh na hihen natna vetkol ding dan hijong le hoitah in angaicha jouse suhtup ahitan ahi.

Chuleh natna nei mi 125 hon damdohna a nei kit un ahi. Amaho chu CAPF (37), CCC Lamboikhongnangkhong (28), UNACCO (36), RIMS (2), JNIMS (2), NIELIT (7), Churachandpur Lanva (12) leh CCC Thoubal (1) RT PCR test kibol jouva natna akon jalen ana mu tauvin ahi.

Positive cases ana um mong mong hi 6699 apha in ahi. Hiche lah a milham – 5046 leh Central Security Personnel -1653 ahi. Covid-19 natna a kon a ana damdoh hi agoma 4899 ahi in, milham -3827 leh Central Security Personnel -1072 ahi in ahi. Tule tua active cases hi 1765 apha in, milham  – 1186 leh Central Security Personnel -579 apha in chuleh recovery rate hi 73.13 % ahi.

Tunikho chun mike mangcha in Imphal West khopi sung adeh in Sanakeithel, Paona Bazar, Masjid Road, Thangal Bazar, Dharmasala, Sagoltongbi, Awang Khunou. Awang Potsangbam, Khumbong Bazar. Kanglatombi, Sekmai and Awang Leikinthabi ah People’s Task Force leh Indian Red Cross Society hotoh kitho in Intensive Awareness Campaign on Covid 19 chu ana kipan in chuleh 1st September, 2020 apat chun Imphal leh akimvel ah Covid-19 a kon a kiven ding dan sapphong in ana um in ahi.

Xxxxxxxx

Kuki Inpoi Kangpokpi in CQC dei, Govt SOP deilou

KANGPOKPI, Sept 4(UNA): Kuki Inpi Kangpokpi chun government in inlang hung kile ho District Screening Cetre a RAT kibol jouva SOPs thah ajui uva a inmun uva vetkol ahilou leh umsah ding tia IQCs ho kikha thu a adeilou nau thu aphongdoh un ahi.

Kangpokpi Inpi in hiche tohgon thah kisem hi kichat umtah leh Community spread umthei nading a nailam pen ahijeh in inlang hinjon ho koitup nading CQCs kisem hen ati.

Kangpokpi Inpi lamkaina a Kangpokpi sunga Civil Society Organisation chom chom hon janhi chun Conference Hall, DC Office Kangpokpi munah kihoukhomna ana neiyun,  District Administration ho hengah masanga kibol banga testing leh IWC hi inlanga hung kile hoding in guon hikit hen tin ngehna ana bol uvin ahi. Hinla District Administration ho ana nom pouvin, danthah jui ding leh SOPs higher authority akon ahi tin ana donbut un ahi.

Alangkhat ah Kuki Inpi Kangpokpi makaina in  CSOs hon Community Quarantine Centres hi government tohgon hin nanjoulou natna kipehson na ahin lhunsah thei ahijeh in, ahithei chan in town sung, khosung leh area ahithei nalai jouse a bolding in pan alauvin ahi.

Lamminlun Singsit, General Secretary Kuki Inpi Kangpokpi in aseina ah Rapid Antigen Test tahsan theitah ahipon, test result jong dihlou tah in negative amoh sodoh thei in accuracy rate jong anem lheh in ahi. Chuleh phalbi ahung naitoh kilhon a kiven nading lampi thuhtah a gelkhoh angaidan jong aphonhdoh in ahi.

“Home isolation hi inlang hinjon ho dinga bollou phamo tia kibol tobang leh government in abailam lam a vai ahomtoh akilou tan ahi. Hijeh chun town committee, khosung haosa ho leh area CSO ho in a pan hoitah lah a CQC kituptah bol cheh a, ahung vailhung ho damna ding leh natna kipehson na aumlou nadinga pan lahcheh ding angaikhoh dan aseiyin ahi.

Chuleh inlang hinjon hon jong ama ama umna cheh uva town committee, kho haosa leh gamkai CSO ho ahung kipatdoh masang ngeiya hetsahna uva kituptah a aum nadiu gontup peh ahi masat thei nadinga abol cheh diu, Government SOP hijolouva, alhompen a nikho 14 CQC a umsah tei dingin jong hetsahna aneiyin ahi.

Chuleh, town committee, kho haosa holeh gamkai CSOs hon gari a ahung lhung ho District Screening Centre a kon a ama ama  Community Quarantine Centre cheh a akipu diuvin jong hetsahna abol in ahi.

Kuki Inpi makaina a CSO in district Medical Department hon aphatcha a inlang hinjon ho damtheina toh kisaiya phatah a ASHA ho beh   amanchah uva phatah a vetsuina CQC mun ho a anei diu leh RT-PCR test akingai chat banga abol diuvin jong temna leh ngehna aneiyun ahi. Chuleh Kangpokpi khopi sunga mipi ten jana neitah a social distancing, mask kito tei tei ding, hatah a natna a kon a kiven cheh ding injong temna aneyun ahi.

Xxxxxxxx

Ccpur simlai kiloikhomna phabep leh Zomi Chiefs Association in Ccpur thilsoh demna nei

Ccpur, Sept 4(ET): Simlai kiloikhom JOINT STUDENTS BODY Churachandpur (ZSF GHQ, KSO CCPUR, HAS Jt. HQ, MZP Manipur) in sunchang laitah a dei umlou tah guhchat lahchat kibolna ban a khohelou milham Ranjan Arambam (37), Cash Replenishing Agent (CRA) melsetah a kithana chungah demna sangtah aneyun ahi.

Sunchang laitah a guchat michom holeh toltha na hi chamna dei jing Churachandpur gamsung mipite in kingaithem thei lou ding ahi. Hitobang melhet lou hon dei umlou tah a chalohna anei uhin gamsung suhlinglao na leh kichat tijatna asodoh in ahi tinjong thusodoh chun aseiyin ahi.

Simlai kiloikhom hon Law Enforcement Agencies hon akinthei lam pen a hitobang dei umlou tah a chon ho ahin matdoh diuvin jong temna aneiyun, chuleh simlai kiloikhom honjong jochan a gamsunga cham le lungmonna aumthei nadinga kithopina kipe jing ding ahi tinjong thusodoh chun atahlang un ahi.

The Zomi Chiefs Association (ZCA) in jong State Bank of India (SBI), Churachandpur branch melhet lou hon a bulhu na chungah demna sangtah aneiyun ahi. Thulhut kimu duijui in gucha ho in Rs. 1.15 crore apohmang na ban ah Mr. Arambam Ranjan Cash Replenishing Agent (CRA) jong ana kapkauvin hinla damdoh jou talouvin 1:10 pm don chun ana muolliem tan ahi. Covid-19 jeh a lockdown laitah a hiche thilsoh hi gamsung mipiten gel hahsa tahkhat ahi.

ZCA in a thite insung aki lunghempi in, alha nom in choldo tahen chuleh District Administration ho chungah tahsan na lentah akineiyin, miphalou ho aphatcha a matdoh ahiding jong kinepna ahi, chuleh gamsung mipi injong ahithei chan a kithopina pecheh ding injong temna aneiyin chuleh gamsung mipiten demna neicheh ding in jong temna anei un ahi.

Xxxxxxx

TSA-GHQ

Imphal, Sept 4(ET): The Thadou Students’ Association, GHQ in achesa September 2, 2020 nikho a Government of Manipur in MPSC secretary henga lekha thot anei toh kilhon a main re- exam um leh umlou ding chung chang thu a Disaster Management Act 2005 dungjui a akhongaisah ding thu akipapi dan aphongdoh uvin ahi.

Thadou Students’ Association, GHQ in Government of Manipur chuleh MPSC henga tulai tah a Disaster Management Act 2005 in aphallou naban a hiche chungthu hi CBI in kholchil na aneijing ahitoh kilhon a dan toh kitoh lou a natong officer ho mochan ahi kahse a exam hi chelhahsah lou ding in ngehna jong aneiyun ahi.

Xxxxxx

Electric Current in man

Imphal, Sept 4: Tahsan umtah thulhut kimu khat in aseina ah tuni nilhah lam nidan 2:00 vel chun mikhat electric current in amatjeh in thina atoh e akiti.

Thina tohpa chu Letlam of M. Songpijang (Leimata), Henglep Sub Divivision ahi jong akiti.

Xxxxxxxx

Govt natong khat in kum 10 sunga asuhset jing thu numei khat in phongdoh; MHRC in athu ahet tolhon a Women Police officer ho thudohna nei

Imphal, Sept 4(ET): Suhset a um numei ho chungthu phatah a kholchilna neidia gamsung mipi’n lhang asap lai in, kichenpi ding minpan a government natong khat in kum 25 numei khat kichenpi lou hel a kum 10 sung asuhset jing thu agingdoh kit e. Hitia aumchan lhon aloi agol kom a ana seidoh jeh a jong numei nu hi ana thoh lo jing ahi.

Bolgenthei na ato thohlel a um kum 25 numei nu hi lunggim genthei a khosa jing ahi jong doctor ho thulhut a pat hetdoh ahikit e. Akidang cheh chu Imphal West hopsung Lamphel mun a Women Police Station chun panpi ngai numei nu kithopi tahsang a agimbol cheh joh ahi. Hiche thilsoh hi achai na kei in MHRC heng alhung in, MHRC in hetsahna lekha apeh jong Women Police Station Officer-in-Charge in donse in anei kit pon, station a um hon MHRC thakhel a che pa chun phatah a lekha apehlut sang a OC hunglhun angah joh din ana seipeh un ahi.

Chuphat chun MHRC Registry in tuni jingvai nidan 11 a Commission kom a OC le duty officer hin sol ding in Imphal West Superintendent of Police jihtho a hetsahna apeh pai ahi. Chutolhon a Women Police Station OC le mi 4 ho Commission kom a tunia che uva adinmun u hilchenna anei u ahi.

Langkhat a numei nu chun Langol Laimanai a cheng PWD Assistant Engineer Meipuipou Golmei in hunam a hinkho amanpi thu, class X achai jou a aumchan lhon le graduate achai jou a Golmei akimupi a akichenpi nom lou thu ho MHRC ahetsah ahi. Numei nu hi kum 15 ahi a pat Golmei hin kichenpi dia ana tep a pilhing ahichan a kichepna ana nei jing ahi. Meipuipou Golmei in numei nu luppi ding bou a alhen le kichenpi dia agel theilou thu a ana donbut ji ahi e.

Achungchang thilsoh hi na sa behseh a numei nu hi lungboi lo a, MA asimlai jong banjom lou a um ahitai.

Numei kisuhset na chunga ngohna kinei mi 2 Police khutna kipehlut

Imphal, Sept 4(ET): Tu naicha a numei kisuhset na panla ngohna kinei mi 2 in tuni in Imphal West District police ang a kipehlut na ana nei lhon in ahi.

Kipehlut na nei teni chu Md. Mohammed akum 19 a upa, apa min Md. Kalam le  Md. Salim apa min Md. Majahar, Heibong Makhong, Thubal district akon ahi lhon in ahi akiti. Thuso kimu dungjui in kipehlut na nei teni chu Wabagai MLA Md. Fajur Rahim le Social Worker Md. Nasimuddin makai na a kipelut lhon ahi akiti.

Hetthei khat chu numei akisuse nu chu kum 16 a upa ahin, RIMS ICU a ahinkho ana bei ahitan ahi. Hiche thilsoh a ngohna kinei lah a themmo na ana kichan pen numei nu dongma pa Md Maza Khan, apa min Md. Sikandar chu police in khatvei ni a ana mat u ahitan ahi. Police in hiche thilsoh a panla Md. Mohammed apa min Mohammed Sanayai chu matding a ahol nalai u ahi.

Xxxxxxxxx

ECI in by-election ding toh kisai kihoukhomna nei; Manipur a by-election bolna ding Assembly segment  5 bou akicheh e tia sei

Imphal, Sept 4(ET): Election Commission of India in tuni mun phabep a seat ong huhdim nadinga by-election um ding toh kisai in kihoulim khomna kikhop na ana nei un ahi.

Election Commission of India (ECI) akon thuso kimun aseina a tunaicha a Manipur assembly seat 13 dalhah a umho lah a seat 5 bou by election bolna ding in akicheh in ahi tin hetsah na anei uvin ahi. Hiche seat nga ho chu Wangoi, Wangjing Tentha, Lilong, Saitu le Singhat ho ahi.

Hiche thu chung chang a thudoh ana kinei na a joint chief electoral officer, Manipur Nongmeikapam Ramananda  in assembly segment 8 ho a court a petition case aum nahlai dan hetsah na ana nei in ahi. By election hung kibol masang a hiche case ho suh lhap ahi le election bol thei ding ahi dan jong hetsah na nei uvin ahi.

Under Secretary Pawan Diwan min a kisodoh thu kimu dungjui in tu le tua by-election nei nading seat 65 Assembly/Parliamentary Constituency a um in, hiche ho lah a state chom chom a kon in State Legislative Assembly seat ong 64 a um in chuleh seat khat Parliamentary Constituency a aume tin aseiyin ahi.

Aman aseibe na ah Commission in Chief Secretaries/ Chief Electoral Officers ho a kon atamjo chomkhat khophat lou jeh leh tulai natna hojeh a khongaisah dinga ngehna jong akimu in review akibol jing in ahi ati.

Thusodoh in aseibe na ah ahunglhung ding nisim 29 Nevember 2020 masang ngeiya jong Bihar a General Assembly Elections hi kichai tei dinga um ahitoh kilhon a agoma seat 65 a by-elections leh Bihar General Assembly Elections jong thakhat a bolkhom hung himaithei ahi in Commission in phat kilem dungjui a tohgon ahin bol ding ahi ati.

Xxxxxxxxxxx

India mi COVID-19 natna nei lakh 39 valta; Adamdoh lakh 30 phata

New Delhi, : Union health ministry in nidan 24 sung a Covid-19 natna 83341 hetdoh be pum a tunichan a India mi Covid-19 natna nei hi mihem lakh 39 avaltai, ati.

Chule nidan 24 sung a mi 1096 thina toh pum a tuchan a India mi Covid-19 natna a thi hi mi 68,472 ahi in, agom a natna nei 39,36,748 lah a adamdoh hi 3037152 le natna a pat damdoh loulai hi mi  8,31,124 vel ahi.

Maharashtra a natna nei agom a mi 2,05,774 vel hi India a dia akhohse pen ahi nalaiyin ahi.

India a Friday nikhon Covid-19 natna a damdoh lakh 30 aval tan tuhin recovery rate 77 per cent aphatai tin Union Health Ministry in thuphon aneiyin ahi. Chule tuhin Covid-19 natna akon damdoh jat leh Active case hi lakh 22 vel in akikhe tai jong ati.

Xxxxxxxxxx

Kangpokpi a mejoh nupi hon Corona warrior khat kipapina leh lemna neiyu

Kangpokpi, Sep 4(UNA): Kangpokpi Corona Warrior Hevei Haokip chu a mejoh chan khompi hon Nute Kailhang munah Covid-19 natna adamdoh jouvin jana lentah pumin pachatna anapeuvin ahi.

Kum 60 mi Hevei Haokip hi medical department noiya ASHA workers ahi puma phat ong anei seh leh nute ijat hamkhat toh Kangpokpi town sunga Nute Kailhang mun a me ajohji ahi. A mejoh khompi nute hon hangsan tah leh damsel a coronavirus natna a konna ahung kiledoh a ahung damdoh kit jal in loupi tah in kipapina kinguon ana neipeh un ahi.

Lunggel thei tah leh miki phaltah Vengthah Ward No. 3 a um Paominthang Kipgen leh Hatnu Kipgen teni nupa in Cake hoitah leh kilomtah ana tohdoh lhon in, hiche cake a-atsah uvin, kipah thanom tah in mejoh nute hon ana nekhom un ahi.

Mejoh ho lah a Pepe kiti khat in a aseina ah, insunga minu khat ahina banah frontline worker khat hiche Covid-19 natna in ahinphah jeng chu lunggim na leh pohnatna in kadim uvin ahi ati, chuleh aman aseibe na ah ahung damdoh a damsel a ahin kiledoh kit thei nading in phatseh in taona in kageldoh jing un, tunia damsel leh thahat tah a kimelmutuo thei a ka um uhi kipana in kadim uvin, tunia hi kipapi na loupitah a kibolpeh ahi ati.

Hiche lockdown laitah ahin adeh in Kangpokpi DHQs a nute ho insung kitoudel nadinga mejoh ho hin gentheina sangtah atoh dehset un ahi.

………………….

KKL GHQ noi’a kiphutdoh KKL Blood Donors Club in akiphudoh akon tuni chan’a thisan Unit 198 pedoh ta

B.Lalboi Gangte

CCpur. September 4 (ET) : Kuki Khanglai Lawmpi KKL-GHQ noi’a KKL Blood donors Club kiphudoh akon tuni chan in thisan Unit 198 apedoh tan ahi. KKL Blood Donors Club toh kisai’a Kamthang Haokip, President KKL-GHQ in aseina’a genthei hahsa leh lungkham natoh panpina ngaicha ho ding’a kalson kinei na ajeh hi damlou thisan ngaicha tamtah um ji toh lhon’a hitobang dinmun toh ho boipi’a bolthei dan dan’a panlah ding ti ahi. Thisan ngaicha ahung tamval teng thisan lah na ding leh ape ding hahsatna anakito jing jeh’a hiche lang toh kisai’a boipi leh panpi khat hi ding’a achesa April 15, 2019 nikho’a KKL GHQ noi’a Seikhomang Founder lamkai na’a KKL Blood donors Club hi hung kisemdoh ahi ati.

KKL blood donors Club akisemdoh toh kilhon’a  April 15, 2019 akon in tuni chan’a tahsa damlou thisan ngaicha ho ding in member 106 in thisan Unit 198 atohdoh tan ahi. Chule KKL Blood Donors Club akon in Shija Hospital, Imphal ah thisan Unit 31, RIMS Imphal ah Unit 25, JNIMS, Imphal ah Unit 7, Sielmat Christian Hospital ah Unit 8 chuleh District Hospital CCpur ah thisan Unit 127 ahi. Hetthei khat chu KKL Blood Donors Club ah tuni chan in member 106 aum toh lhon’a koi tobang member pang nom aum jong leh amin akikhum lut thei ding ahidan atahlang in ahi. Chuleh koi tobang dammo najeh’a thisan lhasam holna ding helou hon itih phat hijong leh Kamthang Haokip, President, KKL GHQ ahilou leh Seikhomang Haokip, founder KKL Blood Donors Club akijat matpi jing thei ding’u ahidan jong aphongdoh in ahi.

xxxxxxxxxxxxxx

Fire Dept. leh ADC CCpur panlah na’a disinfectant anakikap

B.Lalboi Gangte

CCpur. September 4 (ET) : Jalhang’a Covid-19 kilahson jeh’a CCpur District sung’a Positive case kimudohna tam napen PKT Street lutsuhna bul’a building chu tunin (Sept. 4) Salem Veng Village Authority, Defence Committee kithopina noi in Fire Department leh ADC CCpur panlah na in disinfectant anakap uvin ahi.

Hetthei khat chu Salem Veng Area ahin Sept. nisim 1 chan in Covid-19 positive kimudoh 30 ahi in, Sept. nisim 2 nikho’a 3 akimudohbe kit toh lhon in positive case 33 alhing tan ahi. Ahin positive kimudoh mi 33 hohi travel history neilou ngen ahi. Hiche toh lhon chun case kimudoh namun ho Containment zone in phondoh in aum tan ahi. Contianment zone ding’a kiphongdoh hochu Village Authority, Area hopsung ah kiloi khom na chom chom holeh CCpur Police ho sun le jaan umlou in alut leh apot ding venbit na in duty apo jing uvin ahi. Chule niseh’a insung thil keu ngaicha ding ho volunteer hon angaitoh peh uvin ahi.

Xxxxxxxxxxxxxx

Moljol kho’a Social Audit, MGNREGS Gram Sabha anachelha

CCpur, SEPT. 3 (ET): 2019-2020 Financial Year a athum vei channa ding’a Social Audit , MGNREGS  Gram Sabha chu tunin Moljol kho, Sangaikot Block ah mask leh social distancing jui pum in anachelha in ahi. Audit kibol hi achesa July 20, 2020 akon July  25, 2020 chan sung ahi. Audit hi phatsot tah Covid-19 jeh in ana chelha thei hih jong leh tunin (Sept. 4) ana bol thei pan tauvin ahi. Kingon achun Sangaikot Block BDO (MGNREGS) thalheng in Tunzasuan, EO, Hamid SO, Lelien MIS  leh staff dang  leh Khosung Haosa,VA chuleh khosung mipi job card holders ho jouse panna in Gram Sabha ana chelha in ahi.

Hiche toh lhon’a District Social Auditor L. Vahboi  in Social Audit kibol na’a finding ho phondohna anei in chuleh Audit kibol sung’a bol phat ding’a kimu ho asei lhan in ahi. Chule Program lamkai leh recording bol Kimneithem, VRP in Social Audit kibollona ajeh hilchenna ananei in ahi. Hiche scheme hohi inchen nomsa, service neiho ading apon ajeh chu Govt. in khohsah na hahsa genthei ho ding’a abol ahi jeh in moh bolbol lou ding in temna anei in ahi. Chuleh chanvou mu ding’a kilom lou hon jong achanvou ho cancel/surrender abol thei ahi ati.

Xxxxxxxxxxxx

BJP Lok Sabha MP 2 leh AGP MLA 1 Covid +ve hi

Guwahati, Sept 4: BJP Lok Sabha MPs 2 leh AGP MLA 1 Assam a Covid-19 +ve ahi anakihedoh in ahi tin thulhut kimu chun aseiyin ahi. Hetthei khat chu Jorhat Constituency akon kaidoh BJP MP Topon Kumar Gogoi hi achesa Sept. nisim 2 nikho chun Covid +ve ahi anakihedoh in chuleh Mangaldoi seat akon kaidoh MP Dilip Saikia hi janni (Sept. 3) chun anakihedoh in ahi akiti. Hiche naban’a Tezpur AGP MLA Brindabon Goswami mi jong janni (Sept. 3) nikho chun Covid +ve ahi anahedoh uvin ahi.

Hiche toh lhon’a MP Topon Gogoi hi tun Gauhati Medical College Hospital a admitted akibol chun plasma therapy ape uvin chuleh Saikia leh Goswami hi tu le tun home isolation a aum lhon in GMCH a pohlut ahi lhon nading in kigot naho achelha jing in ahi. Alangkhat’a tuni chan’a Assam akon Parliamentarian 3 BJP Rajya Sabha MP Kamkhya Prasad Tasa leh legislator 25 chuleh former Chief Minister Tarun Gogoi ho cheng Covid +ve ahi tauvin ahi. Chuleh legislator 25 Covid +ve hochu BJP akon 13, BJP allies akon 6 (AGP-4, BPF-1 leh Independent-1) chuleh Congress leh AIUDF akon 3 cheh ahi.

Xxxxxx

Naxal galguh bol ho douna ding’a Chhattisgarh CM in CRPF Battalion 7 thum be

Raipur, Sept 4: Naxal galguh douna manchah ding in achesa 2018 kum a state ana pehsa CRPF Battalion 7 ahin peh ding in Chhattisgarh Chief Minister Bhupesh Baghel in tunichun centre kom ah ngehna aneitan ahi. Baghel in Naxal hatna mun ho a phatsah ana hisa mobile tower 1028 tundoh dia jong Union Home Minister Amit Shah lekha apeh a chu ngehna anei ahi.

Baghel in aseikit na ah Union Home Ministry in achesa 2018 kum a Naxal hatna Bastar sahlam Sukma le Bijapur district a manchah dia CRPF Battalion 7 ana phatsah sa ahi e, ati. CRPF battalion khatsung a hi sepai 1000 um ahi. Hiche hi Jammu and Kashmir a pat CRPF battalion 10 lahdoh ho a pat battalion 7 state sung Naxal hatna mun ho dia tupet a ngaichat ahi, ati.

Tu le tu a hi state sung a Commando Battalion for Resolute Action (CoBRA) ho pum a para-military force battalion 33 um ahi e. Chule Chief Minister Baghel in centre phatsah sa mobile tower 1028 hi tundoh ahile state sung a kihoumatna hi hatah a asemhoi be ding ahitolhon a tower tun nading mun jong suhtoh ahitan chujongle khangthah ho Army lut thei nadia lampi honpeh ding a jong ngehna anei ahi.

Baghel in Naxal hatna district 4 a pat CRPF specialised unit Bastariya 2018 a kila tobang a lahkit angai in abanle che le na navah nadia Bastar sung lampi jong sem be angai in, state sung a naxal galguh hohi centre kithopina a kon jo thei jong hiding ahi, ati.

==============

Covid-19 thu a kihilna chelha

IMPHAL,  Sept 4(UNA):  People’s Task Force Covid-19, Indian Red Cross society, Manipur State Branch, Indian Medical Association le Association for Health Care Providers of India ho kithokhom na noi in munchom chom ah Covid-19 thu a kihilna tunichun achelha e.

PTFC-19, publicity and propaganda mopo M. angamba Meitei in asei na ah Industrial Students Association toh kithokhom in Kongpal Lai Hiden mun kihilna ah Ch.Sarat le M.Bochou, secretary IRCS Manipur State Branch Dr.R.K.Nimai, Chairman IRCS I/E Branch Narendra Ningomba, co-convenor PTFC 19 N.Bimol ho chu mihil in apang uve, ati.

Chule Y.C.B Brahmapur Aribam Leikai toh kithokhom in youth Club Brahamapur mun kihilna a chun secretary AHPI Dr James Elangbam, President YCB A. Ruhinikumar Sharma, secretary IRCS Manipur state Branch D.R.K Nimai, Deputy director, Health Directorate Dr.R.K Rosie le YCB Gurumayum Priyobarta senior member ho mihil a pang ahi, ati.

Chule Loitang Khunou Youth Club, All Manipur Nupi Marup Loitang Khunou Branch le Naharol Yaipha Thouni toh kithokhom a Loitang khunou Community Hall le Kadangban community Hall a Covid-19 thu a kihilna a chun Chairman IRCS Manipur State Branch, Dr.Y.Mohen, secretary IRCS I/W Brach Dr.O.Ratan, convenor PTFC-19 B.K.Moirangcha, anesthesiology Dr.Monika Thokchom le advisor SNYTK Irengbam Tomba ho mihil a pang ahi.

Kholche lou beh a niseh a mi 100-150 tobang natna nei a kihe ho chung chang jong government in mipi het a ahilchen angai in chule natna a kon kivendoh ding dan jong het them angai e tia mihil hon mipi temna jong anei ahi.

Hitolhon a SOP dan ho phatah a jui cheh a hon lhat na a che lou a muh kitom jing a kikah tah a um hi natna a pat sochatna hoipen  hetcheh ding in mipi temna anei un ahi.

==============

Makhan kho mi Ab Kaidihemang kithopi dia LNKR, LPNR in ngehna bol

IMPHAL, Sept 4(UNA): Achesa June 15, 2010 nia Makhan vadung a police commando khat in government in apeh meithal a akapkhah Makhan kho a pat Nampuilungbou Abonmai chapa Ab Kaidihemang chungchang dihtah a tan ding in Liangmei Naga Katimai Raungdi (LNKR) le Liangmai Pui Naga Ruangdi (LPNR) in government kom ah ngehna aneitan ahi.

LNKR le LPNR thuso chun asei na ah Makhan khomi Ad Kaidihemang kum 30 hi Berean Baptist Bible College, Bangalore a Theology graduate hin chai bep hi constable No. 0601029 Takhellambam Anou Meitei S/o Mahindro Singh, Wangkhai Kongba Leishram Leikei in kinahso na ima umlou beh a ameithal a akapkhah ahi, ati.

Hetding chu chuche nikho a Makhan khangthah phabep chun Makhan vadung tuilen chu avetlai uva tui lon gin chu ima jahphah na ahilou tolhon a Ab Kaidihemang in o-sang tah a aloi ho akou pet tah a gal lang khat a pat commondo lo mho lah a khat chun kinahsona ima umlou hel a Ab Kaidihemang akap jeng chu aveilam op akapkhah a a spinal cord jong set lo chu vet tahsang in Imphal West CDO kisun Gypsy 2 MNO1 5391 le MNO1 -6391 a chu mi akapkhah u hena sa a jamdoh pai ahiuve.

Kapkhah a um pa hi lhakhat val hospital a akijen vang a dam theng thei lou le lupna a pat thoudoh thei lou a um a a-insung miho toh hahsatah a khosa a kum 10 sung genthei tah a ahin boipi u ahin, ama hi insung neh le chah hol le anu apa tehse boipi a khosa khat ahi.

Thilso pet a Imphal West SP ana hi L Kailun IPS chun khosung mi le insung ho kiphinna neilou ding le akisukhapa vekol dia a-insung mi khat government noi a tohmun khat gon peh dia asei dungjui a June 17, 2010 nia L Kailun le akisukhapa insung mi hon DGP ana kimupi uva tohmun gonpeh dia seilhah ana hisa chu tunigei a tahso hilou lai ahi in, DGP in jong vide letter No. E/31/212012-PHQ (Adm) Pt-D/14115 dated 19/9/2016 a Under Secretary (Home), Government of Manipur lekha ana peh jong aphachom dehpon, Awangbou Newmai MLA, Tamei-52(ST) A/C, in jong vide U.O. No. 05/01/MLA/52(ST)A/C2019 dated 17/1/2019 a CM lekha ana pe kit in, aban in Z. Kikhonbou Newmai vice-Chairman Hills Areas Committee in Radhesyam, IPS Chairman, Manipur Police Constable Recruitment Board D.O. 2/2/(Vc-HACyLA/13 dated October 2015 ni in lekha ape kit in, chujou in Dr S. Ibocha Singh IGP (Adm), in Secretary (Home) vide No. E/31/21/2012-PHQ (Adm/ (Pt-1) dated 19h September 2016 ape in achaina kei in L Kailun, ADGP in vide No. 18/5/2013-1GP (L&0-I0/145 dated 31st January 2013 in Director General of Police lekha athot kit in hinla aphachom ima aumpoi tin kiloikhom teni chun aseiye.

LNKR le LPNR chun achaina kei a chief minister kimupi dia kigong jong alosam phat a media ho kithopina kithum a chujongle alamlou a meithal kap Takhellambam Anou Meitei atohmun a pat paidoh dia ngehna kinei ahitai, ati.

==============

Lha 4 jou a India le China toukhom lhon ding

New Delhi, Sept 4: Moscow khopi a chelha Shanghai Cooperation Organisation (SCO) kihoukhom sung tunilhah chun Ladakh boina thu a defence minister Rajnath Singh in China te ama kibahpi General Wei Fenghe akimupi in ahi. Hiche hi May 2020 a Ladakh boina sojou a pat India le China kah a kihouna masapen hinalai ahi.

Hiche kimuto na hi India le China in alangto a gam teni kah a kihet them lou naho seikhom ding adei dungjui a gon a um ahi e. Kihouna a hi ministry of external affairs joint secretary (East Asia) Naveen Srivastava jong pang ding ahi.

Kihouna kichai tolhon a External Affairs Minister Subrahmanyam Jaishankar in China te ama kibahpi Wang Yi chu September 10 le akimupi kit ding ahi. Geldoh ding chu Ladakh le Aksai Chin a India le China sepai ho kidinte a pat boina hi hung lendoh ahi.

Xxxxxx

Facebook a Imphal Times news clip share bol khat in gihna mu

Imphal, Sept 4(ET): Pasal khat in facebook Imphal Times a news clip khat state Labour department noiya um Manipur Building and Other Construction Welfare Board sunga ahiding bangtah a fund ho aki manchah loudan atahlang jeh in phone call a mangcha in melthet lou ho a kon in gihna ana mu in ahi.

According to report, a person identified as Thulhut kimu dungjui in Suraj Nameirakpam in Imphal Times ah hiche thu hi shared abol jouvin Sany Thokchom kiti khat hin Imphal Times a thusoh share abol jeh in gihna aneiyin ahi. Hiche toh kilhon in Laphel Police ah FIR jihlut in aumin, chuleh Cyber Crime police station a pehson ahitai tin thulhut chun aseiyin ahi.

Xxxxxxxx

Moreh khopi sung’a mask jaolou a vah le ho kileusah pan tading

Tengnoupal, Sept 4(ET): Jing nikho akon Moreh khopi sunga mask kitom jaolou a vah le ho Dk. 200 cheh kileusah pan ding ahitai tin tuni Moreh Police Guest House a Moreh police makai na noi a khopi sunga nam lamkai hotoh kihouna a chun seilhah na anei taovin ahi.

Tengnoupal District Police  Superintendent  Th. Vikramjit Singh makai na noi a tuni a Unlock 4 hung ki chepi toh lhon a juiding dan hochung a kihou na ana kibol toh lhon a hitabang thulhut chu jui ding a seilhah na ana kinei ahi. Tuni kihou na achun Moreh khopi sung a Dukan ho a Social distance phate a jui ding dan le maitom lou aki matdoh le dangka 200 leusah ding in thulhut ana kinei in ahi. Tuni kingon achun  I. Dineshkumar SDO Moreh, Th. Krishnatombi Additional SP (ops) Tengnoupal District Police, M. Amit Singh, Additional SP (ops) Moreh Police, L. Meghabarna Singh SDPO Moreh Police le adang dang ho in govt thalheng in panlah na ana nei uvin.

Moreh khopi sunga nam kiloikhomna pan la ho chu Meetei Council Moreh, All community development organization Moreh, Hill tribal council Moreh, Manipuri Muslim Council Moreh, Tamil Sangam Moreh le Gorkha samaj samiti Moreh ahiuvin ahi.

Tuni kihou na achun nam lamkai ho in Imphal lam akon hung ho Thermal Screening bol ding adeisah dan u jong tahlang na ana nei uvin ahi. Kihou na kingon kichai chun Th. Vikramjit Singh, S.P. Tengnoupal District police  le police officer dang dang ho in mipi kiloikhomna lamkai ho ang a maitom hop peh na ana nei uvin ahi. Tuni in Moreh police ho in jing nikho akon maitom kitom cheh ding uvin kholhang sapna ana nei uvin ahi.

Xxxxxxxxxxxxxxxxxxxxxxxxxxxx

Numei chapang chung a khanse khat gotna pehding a ngehna kinei

Imphal, Sept 4- All Meitei Pangal Students’ Union, Manipur in tuni in Mayang Imphal Bengoon Loukol mun a kum 14 a upa numei khat ki suhset na chung a asuse pa matdoh a gotna pehding in ngehna ahin nei uvin ahi.

Simlai kiloikhomna chun numei le chapang chung a khanset na ho suhbei ahi nading a govt in panlah na anei na ding uvin jong temna ana nei uvin ahi.

xxxxxxxxxxxxxXXXXXXX

Nagaland a covid case thah 41 ana kimu be

Kohima, Sept 4: Nagaland sung a tuni a covid-19 positive case thah 41 ana ki hetdoh be toh lhon in state sung a covid case agom in 4,107 lam apha tan ahi.  Case thah ho chu sample 950 lam test ana kibol na a hetdoh a ana um u ahi.

Case thah ho lah a chu 23 chu Dimapur akon ahin, 17 chu Kohima akon chuleh Phek akon khat ahi. Alangkhat a tuni in state sung a covid akon damdoh na nei mi 37 ana um in ahi. Nagaland health minister S Pangnyu Phom in state medical team ho ang a ki venna ding tohgon jat chom chom abol ding uvin thupeh ana nei in ahi.

Xxxxxx

Russian Covid-19 Vaccine kipatep na a boina ima umlou

Moscow, Sept 4: Russia te COVID-19 vaccine, Sputnik V chu Russia in lha masa a  jah dinga phalna ana peh toh lhon in, mihem chung a patepna kinei na boina ima aum pon ahi tin akisei in ahi. Sputnik chu mi 76 chung a patep na kinei na a ni 21 sung a antibody response kimu toh lhon a lolhing a ana kisim ahi. Hiche virus sung a buhse veina a pang adenoviruse jong chu Sputnik vaccine hin asu mang thei in ahi akiti.

Hiche mihem chung a patep na kinei na achun kum 18 aon 60 kikah ho in panlah na anei uvin, patep na a pang ding a pehlut na ahung kinei uva konna ni 28 sung a hospital sung a kikoi ahiuvin ahi akiti. Vaccine patep na nei ho in ana doulal pen uchu akikap lut til a akikap na maha, tha beina le lung vaina anei u bou chu ahi akiti.

Xxxxxxx

Kpi pasal chapang khat in a penni kho  mikithopina a mang

KANGPOKPI, Sept. 04(UNA): Kangpokpi DHQ sung a senior journalist Kaybie CHongloi chapa Christopher Mangminlen Chongloi in tuni in a kum 8 alhinna penni kho chu JN Public school a akai khompi a simlai aloiho tahlal ho kithopina in ana mang in ahi.

Christopher chun penni kho man na chung chang a apenna apa in jatchom a man ding a ana thumoh jing toh lhon a sum anei ho ana khol jing a lha ni lam ahin kholdoh jou a dangka 1155 lam ahin lhit toh lhon a asum ho achu aloi tahlal khat songkhol thah, toka thah le slipper ho chuleh kichepna phabep anachoh peh ahi.

Xxxxxxxxxxxxxxxxxxxxxxxxxxxxx

Governor le CM makai na a Teachers’ Day lemna thuthot kinei

Imphal, Sept 4(ET): Manipur Governor Dr. Najma Heptulla le Chief Minister N. Biren Singh makai na  in Teachers Day hung lhung ding toh lhon in lemna thuthot anei uvin ahi.

Governor Najma Heptulla in lemna thuthot ahin neina a gamsung a Septmeber nisim 5 hi Dr. S. Radhakrishnan penni kho ahi toh lhon a jilkung ho ana ngailut jal a Teachers Day tia hung kimin vo a anikho hung kinit jing ahin, hiche toh lhon a jilkung ho in Dr. Radhakrishnan geldoh na a themjil nalam a simlai ho chung a panlah na le kithopina nasatah a anei u ngai ahi tin ahin sei in ahi.

Chief Minister N. Biren Singh  in jong Teacher’s Day lemna thuthot ahin neina a Dr. Sarvepalli Radhakrishnan peni kho jilkung ho nikho a kinit hi jilkung ho in gamsung le namsung ading a natoh doh na anei ho u kipapi na vetsah na a kibol ahi tin hetsah na ahin nei in ahi.

Jilkung ho in simlai ho hung khan et na ding a panlah na ahin nei dan uhi thil thupi tah ahi toh lhon a, jilkung ho hin gamsung oltah a asem u ahi tin tahlang na ahin nei in ahi.

Manipur Education Minister Dr Thokchom Radheshyam in lemna thuthot ahin neina a mipi hin jilkung ho chung ahi bat enei soh kei u ahin, jilkung ho hapan nalou ahi le ahinkho uhi thilchom beh a che ding ahi tin ahin sei in ahi. Jilkung phatah panlah na sang a thil thupi umlou dan jong hetsahna minister pa chun ahin nei in ahi.

xxxxxxxxxxxxxxxxxxxxxxxxxxxxxxxxxxxxxxx

Assam Govt in hapta kichai a lockdown kikoi le jaan curfew ladoh ta

Guwahati, Sept 4: Assam government in kal kichai nikho a lockdown ana koi ji ule jaan curfew ana bol ji u chu lahdoh ding in phondoh na ahin nei taovin ahi. Govt akon thuso kimu dungjui in covid toh kisai a daan gah na ding kisem ho chu containment zone ho bou a kichepi ding ahitan ahi tin hetsah na ahung kinei in ahi. Hiche hetsah na chu Chief Secretary Kumar Sanjay Krishna in tuni a phondoh na ana nei ahi.

Hiche kal kichai nalam lockdown kibol le jaan curfew chu state sung district sung vaa le naho pum a achesa June nisim 28 akon case ana kal jeh a suh tang le chepi a ana um kha ahi. Chief Secretary akon thuso kimu chun asei na a kal nikho ho a lockdown kibol le jaan curfew chu akiladoh tan hinlah mipi in kiven na nei jing uvin tin hetsah na ahin nei in ahi. State govt in containment zone polam a chepi ding thil ho phondoh na ana nei utoh lhon in, themjil na mun ho le simlai ho kikhop khom an ding mun chom chom a ahunglhungding Sept nisim 30 chan a khan a akinei nalai ding dan jong hetsah na ahung kinei in ahi. Hiche lha sung a online class ho kinei jing nalai ding ahidan jong tahlang na ahung kinei in ahi.

Jilkung ho akeh khat themjil na mun ho a umthei ding a hetsah na kinei hi, onlince class kisai le simlai pol 9 akon 12 chan school che nom ho anu le pa in phal na apeh ho classs lahpeh ding a kisol ho hil ding a phal na ana kipe ahidan jong hetsahna ahung kinei in ahi. State sung a public transport jong ahunglhungding nisim 7 akon a covid daan ho jui pum a chepi thei ahitah ding dan jong tahlang na ana kinei in ahi. Social, academic, sports, entertainment, cultural, religious, political functions le thil kingon khoh phabep ho mi 100 pan lah na chepi thei ding ahidan jong hetsah na an akinei in ahi.

Mipi lah a pot teng maitom kitom ding le covid daan kisem hop hate a jui ahi an ding in jong hetsah na ana kinei in ahi. Kichenna gol vah ho vang mi 50 aval thei louding dan jong tahlang na ana kinei in ahi. Ahunglhungding nisim 20 chan a thi vuina a mi 20 aval theilouding dan jong hetsah na ahung kinei in ahi. September nisim 20 jou a a mi 100 chan phal nap eh ahithei ding dan jong tahlang na ahung kinei in ahi.

Ahunglhungding September nisim 30 chan a mii kikhop na athupi lou ho kha jing na akinei nalai ding toh lhon in, daan kisem ho district  magistrate ho in vetsui na anei ding dan u jong hetsah na ahung kinei in ahi.  Kum 65 chung lam a upa, nao vop ho chuleh chapang akum 10 noi lam ho inna aum cheh ding uvin hetsah na ahung kinei in ahi. Mipi lah chil set ahi lou le maito kitom lou ho dangka 1000 lam leu sah thei ahi dingdan jong tahlang na ana kineiin ahi.

Xxxxxxxxxxxxxxxxxxxxxxxxxxxxxxxxxxxxxx

Sugnu a COVID-19 testing centre tuni kihong pan ding

Kakching, Sept 4(ET): Sugnu guest house, Kakching district a covid-19 tetsting centre thah hondoh na ana kinei chu jing akon natoh na kipan ding ahi tin Chief medical officer Dr T Manihar in phondoh na anei in ahi.

CMO pa in hiche thu chu centre vetlhah na ana neina a ana sei ahi. Sugnu a case ana kimu toh lhon a mipi in tijat na ana nei jing jeh uva hiche centre chu ana kisemdoh ahi tin CMO pa chun asei in ahi.  CMO pa chun district surveillance officer Dr E Kiran toh guest house chu vetlhah na ana nei lhon ahi. Dr T Manihar in thuso miho toh akihou limna a Sugnu a achesa ani phabep masang a hoima a potlou mi phabep positive a ana kimudoh hi mipi in tijat na a anei tohlhon a hitabang centre hi hung kisem doh ahi tin ana sei in ahi.

Hiche centre hi jing nikho le staff 6 kihto a natoh apatding u ahidan tahlang na ana nei in ahi. Hetthei khat chu Kakching district sung a quarantine centre 26 lam ana um ahin hinlah September nisim 2 nikho akon PR English School COVID Care Centre le Kha Manipur College a COVID testing centre tilou ana kikhah gam ahitan ahi. Tuni a centre vetlhah na nei team chun Sugnu a um community Health Centre jong vetlhah na ana nei uvin ahi.