CBI thukholna kichai masang’a MCSCCE (main) 2016 exam umthei lou ding ahi:...

CBI thukholna kichai masang’a MCSCCE (main) 2016 exam umthei lou ding ahi: KSO GHQ

128
0
SHARE

CBI thukholna kichai masang’a MCSCCE (main) 2016 exam umthei lou ding ahi: KSO GHQ

Kangpokpi, Sept 6(ET): Kuki Students’ Organization General Headquarters (KSO-GHQs) in akisaipi authority ho hengah  MPSC mains examinations, 2016 hi CBI in Manipur High Court in ngansena apeh toh kilhonna boina ana um ho kholchilna anei akichai kahse a exam athahbeh a umthei lou ding ahi tin phondohna anei un ahi.

Kiloikhomna thusodoh in aseina ah  achesa MCSCCE 2016 laiya pat a MPSC hi ana minse lheh ahitan hiche toh kilhon chun Manipur High Court jeng in jong suhkhel bolkhel hi kum ijat hamkhat ana umjing peh ahitai anati keuseh hilouvin MPSC sunga natong staff leh official ho holdoh a gotna pehding in ana sei un, hinla tuni chan in koimacha matdoh leh gotna peh a um aum naipon ahi. Ahileh koi ham hiche natoh phalou tong ho chu hitobang dinmun kicheh lou MPSC/Staff/official ho chu re-exam bol kit dinga nganse a umkit thei ham? Henge, ahileh hiche achung thu kicheh lou hon re-exam ahin bol kitdiu chu thengtah leh tahsan thei tah ahi nadiuvem.

Hitobang ngohna ho tamtah ahung umtoh kilhon in MPSC Secretary a kon in achesa nisim August 26, 2020 nikho a thusodoh anabol na ah hetkhel jeh a ngohna um maimai ahidan ana tahlange, hiche jeh a suhthegna khat kibol jeh maimai a MPSC chung chang theng jeng ding hitam tinjong KSO Thuphon chun dohna aneiyin ahi.

MPSC suhthenga thuso kibol chu tahsan hahsa tah leh semthu tobang leh election manifesto tobang bep ahi ati. Secretary MPSC in suhthengna aneina a MPSC in “natoh thilbol na jouse a kitahna um masang se a cholngah louva kitong jing ding ahi” ati chu simlai hon kitahna nei ho saina noiya exam bol akinomjo in exam body khat kitahna leh thenna holthu ho akipom pon ahi tinjong aphongdoh un ahi.

Chuleh UPSC khu ivet keh tahsan umtah leh kitah tah’a natong jing khat ahi. MPSC hi kitahna del nalai ahi in, hiche kitahna leh then na hi itih leh MPSC sunga um thei ding ham ti hi vangset umtah leh seitheilou thil khat ahitan ahi. Kum 50 joulang thu jong himaithei ahi.

Hiche thu toh kilhonin , Department of Personnel and Administrative Reforms (Personnel Division), Government of Manipur injong Law Department temna banga violation of Lockdown protocols under Section 55 of the DMA, 2005 jeh a MPSC in MPSC mains Examination, 2016 avoh hai ding in jong ana seiyin ahi.

Achesa 2 September, 2020 a kholchilna a umtoh kilhon a CBI injong MPSC henga answer sheets or books ki vetlhah dan ho MPSC (Procedure & Conduct of Business) Rules 2011 na dungjuiya lecturer ki mangcha ho hi hen chuleh examiners hon answer scripts umjat, subject scrutiny dinga kipedoh jat anikho, a nidan gei a kichehtah a ahomdoh dan leh kilhalut dan ho ahetsah ding hi CBI  in MPSC hilchana aneikhat chu ahi.

CBI in MPSC hilchan abol ho leh natoh dan pachatna akipe in hinla MPSC in ajui hinam hijeh chun CBI in mipi hetthei a kholchilna ahin neiya mona nei officer ho gotna peh ahiding jong lekha sodoh chun atahlange.

Simlai kiloikhom hon MPSC injong amasa tah a amaho sunga official ho hihen, lolhinna nei candidate ho hehen, lolhinna neijoulou candidates ho hijong leh nehguh chahguh a kigolna nei ho tahsan thei tah a aki suhtheng masat angaiyin, MPSC in thuso mangcha a suhthengna anei maimai jeh a theng jeng digng ahipoi, bailam tah a kisuhtheng thei ahi nah leh ipi ding a High Court in suhthengna hin bol un tilouva CBI kholchilna angeh ham ati. High Court in aphajo ding leh thutah kihetdoh thei nading adeina jal a CBI nganse na apeh hi ahi ding doltah ahi, hijeh chun CBI in report hin pedoh henlang chuleh MPSC sunga mona nei ho jouse exam kibolna jouse leh re-exam nahoa apanmun ho’u akon lahdoh hiu hen, chuleh candidate alolhing hihen alolhing lou hijong leh MPSC sunga ho toh kikhutjop na nei aum jong leh exam kibol na ding jouse a ngahsah hiu hen tinjong lekha chun aseiye.

Chunga boina kiseiho toh kisai in government koma kingeh nompen chu MPSC in tu tadi in CBI in kholchilna achai masang se in ipi exam hijong leh bol ding gotda hen, chuleh CBI injong simlai ho khonung ding gelkhohna ahin neiya MPSC sung suhthengna ahin nei a mona neiho ahin matdoh loi ding in jong temna aneyin ahi. CBI in kholchilna patah ahin chai a MPSC sunga nehguh chahguh hihen thenglou tah a chonval na ho ahin suhtheng teng leh thengthou tah a imalam jouse a re-exam hihen exam dang hijong leh bol hihen tinjong KSO-GHQ thuphon chun atahlangin ahi.

Xxxxxxx

Mijouse pomthei order thah akisodoh lou leh tuition fee kila ding ahi: HiDiPSAM

Imphal, Sept 6(ET): Hill Districts Private Schools’ Association Manipur (HiDiPSAM) in tuni Richard L Haokip president leh Ashuli Kashipri secretary soikaina a thuso asodoh nauva chun lockdown sunga school tuition fee leh jilkung ho lhalo toh kisaiya lunggel chom chom aneina chung uvah alunglhai lou nau aphongdoh un ahi.

Tuni HiDiPSAM in kihoukhomna aneina achun achesa nisim 20th June, 2020 nikho a Commissioner (education-school) in order aso government in anung lahdoh a ahunglhung ding nisim 12 September, 2020 masang ngeiya nule pa, jilkung holeh school neiho in apomthei diu order thah ahinso diuvin ngehna jong aneiyin ahi. Chuleh HiDiPSAM in tuition fee chung chang thu a government in ngaikhohna ahin nei tei nading in kimupina akinei jing banah, memorandum, press statement chom chom leh Education department hojeng jong ana kikimupi in hinlah tuchan in kihetmosah tah leh nahsah in aumpoi tin thuso chun aseiyin ahi.

Government in tuni chan a kichehtah a thupeh thah aneilou jeh in achesa 20th June, 2020 a order jeh hin tuition fee jong ahiding bangtah in lahkhom ahithei lou jeh in jilkung ho school kikailou sunga online leh whatsapp akonna simlai ho aboipi vang uvin a lhalo diu peh dinga kilom akipe theipoi tinjong thuphon chun atahlang kit in ahi. Hijeh chun government in ahunglhung ding nisim 12th September masang ngeiya thu kicheh tah leh santhei ding thuso ahung umlou leh nop le da umlouva April lha apat private school hon tuition fee kila a boina leh hahsatna ahung sodoh leh akisaipi Education(s) department leh Education minister hon mo akipohdiu ahi tinjong thuphon chun atahlang kit in, chule tribal simlai kiloikhom honjong athu hi ahin vetsui peh diuvin jong ngehna aneiyin ahi.

XXXXXXXX

KIM President lui (L) Khamliankhup Lianzo insung mite vilna le panpina kinei

Imphal, Sept 6(ET): Achesa nisim 28th February, 2018 nikho a Kuki Inpi Manipur president panmun atuhjing laiya  tahsa dammona jeh a ana muollem Khamliankhup Lianzo in adalhah a insung mite insung genthei leh hahsa tah a ahung khosah jingu pohnatna jallin Kuki Intellectual Group (KIG) makaina in 5th September, 2020 (Misemni) nikho chun a chennau Thingjabuong khomun a vilna leh panpina thil pehdohna kin aga neiyun ahi.

Kin-goun kiman na a Letpu Haokip, President KIC in ahoulimna a tuchung KIG in hitobang pan ahinlah nachunga kipapi aum dan leh lunglhai aum dan aphondoh to kilhonin, insung miten panpi angaichatnau kiphalam lou a ahin hetsah uva ahile  KIC injong panpi ngaichatna a kipang jing ding ahidan aphong doh in ahi. Tuchung KIG te hin natoh phatah abol uvin, genthei ho panpina nabol uhi jomjing un tin jong tiemna aneiben ahi.

KKL President, Kamthang Haokip in aseina ah KKL in aumtalou Khamliankhup dammo laile thi nikho a bolthei chan ana kibol in tunung jong le aji achate akhohna aboina a kipanpi jing ding ahi tin jong asei in ahi. Tuchung KIG te pankhom danle thilbol dan apachat na jong nasatah in ana sei in ahi.

Dr. Ts Letkhosei Haokip, Convenor KReF in (L) Khamliankhup Lianzo nam ngailut dan le Nampi adia ahinkho bei pamai asahdan aphong doh in, aji Chingboi Lianzo jong lung lhalouva pang jing dingin temna anei in KIG te panlahna jong akipapi lheh in ahi.

Mangboi Khongsai, VP KSO, Ccp in inam uhi nasatah a akikheldan le tunung jongle ikikhel be-be diudan le pankhom jing dingin jong akikhom lamkai cheng tepna anei in KIG te pachatna sangtah apen ahi.

Hiche jou chun Paokam Haokip in KIG te dinmun chomthim in aphongdoh in, KIG Chairman S. Kipgen message simdohna ana nei in ahi. Chule aman aseibe na ah inam sung uva sum-le-pai don na tamtah umjongle (L) Khamliankhup te insung ngailut najal a muntin aum sopi Nagaland, Assam le Manipur ako’n member hon nei kham kham hung kisu khom ahin, tamhih jong le ngailut jal a kibol ahito lhon in  neisan peh diu himai inte tin akidong doh jat kham Rs. 2, 33,000/- (Two Lakhs Thirty Three Thousand) hi KKL President pu pehdoh nakin anaman sah in ahi. Chujongle KIG member ho, Executive Board ho le Chairman Pu jong aphongdoh in ahi.

Chukit jongle program short notice a hung kibol hijongle CSO lamkai akitiem jouse chungle KReF le inn neite chuban a khosung haosapu chung a kipa thusei na jong ana nei in ahi. Chule Inn neipi Pathen a akingaidan akipapi nathu aseina ban a CSO  lamkai thah ho pachat nathu aphuong doh in, society a dinga changed le transformation hinpo dohthei dinga akineppi najong asei in ahi.

Hiche ngailut thil pehdoh nakin chai ahito kilhon in, Inneipi Chingboi Lianzo in kipah tah le kiphalam tah in akisan in kipathu tamtah asei in, lungneo lou a hinkho amandan le Nampi a dia tohthei ho atoh nom dan jong asei in, Aji ngaitah a-umlou nunga ngailut achanjing dan ho jal a Pathen athangvah jing dan jong aseibe’n ahi. Tu le tu injong Chingboi Lianzo hi KWU Unit a jong thanom tah a pan lajing khat ahi.

Thongkholun Haokip, Thingjabong Inpipun jong KIG te mikhotona akipapi thu asei in, amanjong (L) Khamliankhup insungmite  dia inmun angaitopeh jing ahidan jong aseidoh in ahi.

Kuki Intellectual Forum guonna noiya neitokhomna a pan hinla phabep ho Daniel Nehlunlal Haokip, Paokam Haokip, George Haokip, Usb Lhungdim, Moreh Alert, Dr. J. Lhungdim  amaho chung a jong KIG executive board in kipathu ana phongdoh un, chuleh hiche donation kibol na a whatsapp group  muntin a pat pan hin la ho jouse, sum le pai tha le jung hin sepkhom ho jouse chung a jong kipathu aphondoh naban uvah, malam a jong kithokhom jing ding injong temna aneiyun ahi.

Xxxxx

Manipur a Covid-19 positive case 7000 valta; thina toh mi 38 lhingta

Imphal, Sept 6(ET): Manipur a COVID-19 natna nei positive mi 139 akimube toh kilhon in agom a natna nei mi 7022 apha tan, chule hiche natna akon thina toh mi 2 akibe tohlhon in athi mihem 38 aphatai, tin State Health Department thulhut chun Pathenni nilhah lam chun asei in ahi.

Hiche a positive kimudoh ho lah a mi 19 hi Central Armed Police Force (CAPF) aho akon ahi. Adang 121 hohi ahileh mipi akon ahin, hiho lah’a pasal 81 le numei 40 ahin, 74 hohi Imphal West akon ahin, 21 hi Imphal East akon, Senapati akon mi 1, Ukhrul akon mi 2, Tamenglong akon mi 1, Thoubal akon mi 18, Churahandpur akon mi 2 chuleh Bishnupur akon mi 2 ahiuve. Abon uva hi naivel akon akilah u ahin khol gamlha akon khatcha ajao pouvin ahi. Abon chau vin COVID kijen namun chom chom a akisol in, phatah in aum naumn hou akivekol jing in ahi, tin COVID-19 common Control Room akon in thulhut akimun ahi.

Athi teni lah a khat chu upa kum 53 mi Thoubal district akon ahin chule khat chu numei kum 31 mi Imphal West akon ahi akiti. pasal pa hi JNIMS a thi ahin, numei nuhi RIMS a thi ahi. Athina hon hi COVID-19 le natna dang a thi ahihon dan, thusoh kimu chun asei in ahi.

Hiche ban a, nidan 24 sungin RT-PCR test kibol na a  COVID-19 akon mi 189 adamdoh toh lhon in lha ong in aum tauvin ahi. Amaho pum a simtha in State sunga adamdoh mihem 5,164 (Mipi-4,013 leh CAPF – 1.151) aphatan adamdoh ho hi recovery rate 73.54 percent apha tauve, tin thulhut chun aseiyin ahi.

State sunga agoma avei, positive hi mi 7,022 ( Mipi – 5,331 leh CAPF – 1,691) ahin hiholah a 1,820 hi kijen jing lai ahi, tin thulhut chun aseiben ahi.

Itiham a boina toh aum le Government doctor ho hi inmun akon jingkah nidan 10 apat nilhah nidan 3 chan  niseh a Pathenni tailou a kihoupi jing thei ahi. Hichena dinga Sanjeevani OPD  App hi Google Play akon ahilou le www.esanjeevaniopd.com download thei ahi. Internet mangcha a smartphone/computer/laptop/tablet ho mangcha a dohna neijing thei ahi.

Mipi injong Psychological Support hi Helpline Number 8787457035, 9402751364, 7629943596; Hospita toh kisai a dohnom neihon  manbei na 18001032015 hi call thei ahin, chuleh COVID-19 thutoh kisai ho Common Control Room Number – 18003453818 hi aphatseh 24×7 a bolthei ahi.

Xxxxxxxxx

CM N Biren in hunam a kisuhsetna le sum kiguh thu demna sangtah nei

Imphal,Sept 6  (ET): Mayang Imphal a numei chapang khat hunam a kisuhset (gang-rape) nachung le Churachandpur a Dk. crore 1.15 kichom a mikhat kitha na chunga Chief Minister Shri N. Biren Singh in hitobang thilsoh ho deilou na hatah in demna aphong in ahi. Hitobang deilou umtah khonunga aso kitlou nading’a gotna sangtah pehdin kitepna jong aneiyin ahi.

Chief Minister’s Secretarait muna press conference anei na ah, CM N. Biren Singh in vannoi in COVID-19 akon natna aboipi laitah’a hitobang thil ahungso hin mipi chunga lungnat le lungsat abelap in hiche hi dei umlou tah thil ahi ati.

Thilsoh chungchang a police in agan nathei pen a matdoh a aum nading’a aboipi jinglai ahitoh kilhon in, mipi ho ngaikham cheh din jong temna anei in ahi. Alangkhat a Home Department le State Cabinet a aluboh ahidan le thilsoh chungchang a kholgil na (investigation) phatah a avetsui dan jong aphongdoh in ahi. Achesa nisim 2 September ni a, Mayang Imphal a thilsoh chungchanga ginmo a um mi 6 jong mat in aumtan, chule mat a umho chunga charge-sheets jong lha ni sung ngei a Prevention of Children from Sexual Offences (POCSO) Act, 2012 kijih lut ding ahidan jong media ho masang’a aphong doh in ahi. Chief Minister in, long man ding a dangka Rs. 5 lakh athipa insung mite kipe ding ahi dan aphong doh in ahi. CM in Civil Society Organisations le Joint Action Committee hiche chungchang thilsoh toh kimat a kiphutdoh ho kom a alungnop na aphongdoh in chule mona neiho mat a aumdoh nadiuva maban a kithokhom angai dan jong aphong doh in ahi.

Churachandpur mun a, 4 September nikho a thilsoh chungchang ahin, ginmo a um mi 3 mat a aumtoh kilhon in, dohna le kholchil na phatecha achelhah jing lai ahidan jong asei in ahi. Chujongle adih a thutan na aum dingdan kitepna, athipa inneipi phone akon akihoupi dan jong asei in ahi. CM in aseibe na a, DGP Shri L.M. Khaute in Churachandpur avil a investigation bol ho avetsui din jong ahil in ahi.

CCTV camera ho akon a phachom pi mudoh ahidan jong asei in, chule Shri N.Biren Singh in aseibe na ah, district sunga um Kuki thingnoi kiloikhom, tulaitah a Suspension of Operation a umho akon a kholdoh ahi nading a DGP Shri L.M. Khaute anganse dan jong asei e. CM in, Government dan dungjui a athipa insungmi sumlepai a kithopina kipe ding ahidan jong aphong doh in ahi. Mipi akon kithokhom a panlah ding dan jong  ngeh na anei in ahi.

XXXXXXXXX

DGP LM Khaute  in Ccpur  thilsoh chungthu vetlhah nanei

B.Lalboi Gangte

CCpur. September 6 (ET): Melhet lou gaal manchah choi phabep sum dei na jeh’a Arambam Ranjan Meitei @ Ranjan ana kaplih nao chung’a kisemdoh Joint Action Committee (JAC) in tunin (Sept. 6) CCpur khopi sung mun chom chom 17 a toumun kiphinna ananei uvin ahi.  Chuleh Khuga Tampak Youth Association (KTYA) gonna’a Khuga Tampak Youth Club Hall mun’a kiphinna achelhah phatsung in JAC akon lamkai hon houlimna anei uvin hiche naban’a  Zenhang Lamka Haosa Letkhochinthang Valte lamkai nan Zenhang Lamka Village Authority lamkai hon jong toumun kiphinna’a pan analah anala uvin ahi.

Hiche toh lhon’a Ranjan kitha na chung thu’a thil umdan ho velha ding leh thilsoh toh kisai’a kholchil nanei ding in LM Khaute IPS DGP/Manipur in CCpur  vilna anei in chuleh  SP/CCpur office ah JAC lamkai hotoh kihoukhom najong ananei uvin ahi. Chuleh thuso mihon Ranjan chung kholchilna ichan aphah hitam ti’a LM Khaute IPS DGP/Manipur dohna aneinao’a  Bank mai tah’a thilsoh nachung hi Police Department in jong thupi tah in akila in chuleh kholchil na kinei ho jong lamjang tah’a achelhah jing toh lhon’a agannatheipen’a mona neiho matdoh ahi nading’a mipi jong Police ho kithopina apeh ding temna anei in ahi. Chule hiche thilsoh chungthu’a SoO representative ho toh jong State authority ho JMG (Joint Mechanism Group) noi’a kihouna akinei khom in amahon jong mona neiho kholdoh na ding’a pan lah nathei chan’a kithopina apeh ding uvin jong asei uvin ahi ati. Aman aseibena’a CCpur khopi sung hi Nam leh pao chom chom chenkhom na mun ahi naban’a phat chesa ho’a sottah cham nale lungmonna um’a bittah’a kicheng khom ahi in ahin tuchung thilsoh hin mijouse lungthim akhoikha in ahi.  Hiche naban’a hiche thilsoh hi High level in pan alah ahi in DGP level ah monitor kibol ahi ati.

Xxxxxxx

Covid test kibolna chung a Babina Diagnostic in suh thengna nei

Imphal, Sept 6(ET): Babina Diagnostic akon thuso kimun dungjui in achesa September nisim 4 nikho a  sample ana kila a nisim 5 nikho a result phondoh na kinei lah a suhkhel akon a mikhat positive hiding chu negative ana kiti khah toh lhon in, amipa chu hetsah na ana kinei in a result chu thah peh na ana kinei in ahi akiti.

Suhkhel na chung a suhtheng na ding toh kisai a sample ana kithah lah kit a tetst ana kibol kit toh lhon a positive anahi toh lhon a hiche chung chang thu a mipi hetding a bolkhel na tahlang na ahung kinei dan Babina in thuso in suhthengna ahin nei uvin ahi. Maban a hitabang suhkhel na um kit nalouding a panlah na akinei jing dan jong hetsah na ahin nei uvin ahi.

Xxxxxx

Nodal officer thu’a Centre scholarship chungchanga Manipur simlai ho lungboi

Imphal Sep 6(ET): Ishan Uday (North-Eastern Region)-University Grants Commission scholarship 2019-20 bol Manipur simlai lekha them ho state nodal officer umlou jeh in chanvou muthei lou din aumlo tauvin ahi.

Langkhat a hitobang amopo ngaichat ahilam ahetlou dan in Manipur education department official hon aseikit uve.

Hiche Ishan Uday (NER) hi UGC in 2014-15 a ana patdoh ahi. Hiche scheme noi a kumkhat sung a Rs 4.5 lakh sum mu na nei insung hon kum 4 sung a Rs 5400 a pat 8400 kikah class 12 a mark amudungjui a lhendoh simlai mi 10000 vel hon amuthei diu chanvou ahi.

UGC in 2019-20 a chanvou muthei ding ho August 25 nia aphondoh a chu Manipur simlai atamjo panglou ahitai. Khonung a simlai hon state in nodal officer aneilou jeh a dalhah a aum ahetdoh bep ahi.

Tu le tu a National Institute of Technology (NIT) Manipur a simlai class 12 a 92.2 percent mu Ksh. Thoungamba chu simlai dalhah a um khat ahi.

Thoungamba in IFSC code asutkhel asudih ding state a pat nodal officer umlou jeh a dalhah a um hidan in asei kit e. Chule DM College, Imphal a pat hiche chanvou ngaito simlai khat in jong amupon, DM mopo hon state higher education department toh kihou matna neidan in aseikit uve.

Directorate of Higher Education  OSD Th. Roben in asei na ah UGC dan dungjui a chanvou thu a achaina simlai ho kaina college in aboldia kisei dungjui a state in achom a nodal officer anei ngailou ahi, ati.

OSD chun UGC toh kihou matna akineikah a hiche thudol a seithei ima aneilou dan in aseikit e. Chanvou velvet phat achaina October 31 ahitolhon in simlai le nu le pa ho lungboi gam ahi ajehchu chanvou mudia lhendoh hon sum masa amupan ahitai tin dalhah a um simlai hon asei uve.

Ksh Thoungamba in kaloi kei sang a mark lhom jo lhendoh a um khat in jong sum amu pantai, ati. Hiche thudol a nohna hi amopo hon agangthei pen a asuh navah angai e tin chanvou thum simlai numei khat pa Keisham Pradipkumar chun aseiyin ahi.

Chanvou hi state mi jat dungjui a kipe ahi in, state chanding a-ong a um chu state dang kibang a hoppeh pai dia dan a kisun kit ahi.

Xxxxxxxxxxxxx

Nikhat sunga India a Covid-19 case thah 90000 kimudoh be

New Delhi, Sept 6: India sunga COVID-19 natna nei 90,632 nikhat sunga kimube toh kilhon agomin 41 lakh aval tan hiche hi nikhat sunga natna nei kimube toh kigom khom ahitai, chuleh adamdoh mihem 31,80,865 aum tah toh kilhon in national recovery rate to 77.32% aphatai tin Union Health Ministry data chun atahlang in ahi.

Coronavirus natna nei agoma 41,13,811 alhing tan chuleh, thina toh 70,626 alhing tan ahi. Hiche hi nidan 24 sunga mihem 1,065 in thina ato toh hichan hung geidoh ahi.

COVID-19 a thina toh hi 1.72% in khehnem na aneitan ahi. Tule tu in active cases 8,62,320 anei in 20.96% ahi tai. India sunga COVID-19 August 6 lha chun 20-lakh ana lhing tan, August 23 chun 30 lakh ahin phatou kit in  September 4 ni chun 40 lakh ahin phatou kit in ahi.

ICMR report dungjui in September 5 geiyin agomin mihem 4,88,31,145 samples test ana kibol jouvin, chule Saturday nikho mai mai chun mihem 10,92,654 samples test ana kibol jouvin ahi.

Athahbeh a thina toh mihem 1,065 apha in, 312 hi Maharashtra akon ahin, 128 hi Karnataka akon ahin, 81 hi Uttar Pradesh akon ahin, 71 hi Andhra Pradesh akon ahin, 69 hi Punjab akon, 61 hi Tamil Nadu akon, 58 hi West Bengal, 34 hi Bihar, 30 hi Madhya Pradesh, 25 hi Delhi, 22 hi Haryana, 19 hi Chhattisgarh, Puducherry  Uttarakhand akon mi 18 cheh leh Gujarat, Jammu and Kashmir a Jharkhand mi 15 cheh ahiuve.

Natna dang dang toh kithokhom in Rajasthan a kon mi 14 athi in, mi 11 Kerala ah, Goa leh Telangana a mi 9 cheh,  Tripuraa mi 8,  Assam leh Odisha a mi 7 cheh, Himachal Pradesh a mi 4 leh Andaman and Nicobar Islands, Arunachal Pradesh, Chandigarh, Manipur leh Meghalaya akon mi khat cheh in natna dangtoh kitho khom in thina anatoh un ahi.

Thina toh agoma mihem 70,626 lah ah, Maharashtra a mihem 26,276 in thina atoh tampen in mihem Tamil Nadu ah mihem 7,748 in thina atoh kit in, Karnataka ah 6,298, Delhi ah 4,538 , Andhra Pradesh ah 4,347, Utter Pradesh ah mihem 3,843, West Bengal a 3,510, Gujarat a 3,091 chuleh Punjab ah 1,808 apha in ahi.

Tu chan a Madhya Pradesh a Covid-19 a thi hi mihem 1,543 thi aphatan, 1,122 hi Rajasthan, 886 hi Telangana, 781 hi Haryana, 770 hi Jammu and Kashmir, 735 hi Bihar, 538 hi Odisha, 462 hi Jharkhand, 356 hi Chhattisgarh, 352 hi Assam, 337 hi Kerala leh 330 hi Uttarakhand a thijat ahi.

Puducherry in natna dangtoh kigom a thi mihem 298 anei tan, Goa 229, Tripura 144, Chandigarh 69, Himachal Pradesh 54, Andaman and Nicobar Islands 50, Manipur 36, Ladakh 35, Meghalaya 15, Nagaland 10, Arunachal Pradesh 8, Sikkim 5 leh Dadra and Nagar Haveli leh Daman and Diu in 2 gel aneitan ahi.

Health Ministry in alunggimpi pen hi natna dang dang toh hung kithokhom a thu 70% ahi dan aphong doh in ahi. Chuleh natna nei, athi amang leh adamdoh ho kisimna hi .

Indian Council of Medical Research leh website a kon ahi in adih leh adihlou hi vetchilbe hinalai ding ahi tinjong aphong doh un ahi.

xxxxxxxxxxxxx

UCM in themmo sangpen chan, themmo ho government in thichan gotna apeh angai e tia sei

Imphal, Sept. 6(UNA): Imphal West Mayang Imphal Assembly Constituency hopsung Yendao Palli a achesa September 2 nia suhset ahijou a khohelou a mudoh a um Pusham Wasila, 14 d/o Md Abdul chung a khansetah a chatloh ho United Committee Manipur (UCM) in themmona sangpen achantan ahi.

Thuso bol UCM IPR Secretary BM Yaima in hiche thilsoh hi UCM in khoh akisa lheh in, state government in thilsoh agelkhoh a themmo chang ho thichan gotna apehdia ngehna anei ban a hitobang avelso lou nadia phatah a amopohna bolcheh ding in police department jong temna anei e.

Wasila chung a thilsoh hi akhatvei na ahipon numei chapang chung a hitobang thilsoh phatah a velha dia First Track Court (FTC) natong thei a tundoh loiding in UCM in state government kom a ngehna jong anei in ahi.

Akhanse ho abon a matdoh thei nading a panpi tum neilou a government achaloh angai in chule Wasila chung a thilsoh achaina ahithei nadia panla cheh ding a mipi temna aneiban in Wasila insung miho alainat pi na jong UCM chun aphongdoh in ahi.

xxxxxxxxxxxx

CM Arvind Kejriwal in hapta 10 sung chelha ding Delhi government tohgon Anti-dengue campaign hongdoh

New Delhi, Sept 6: Chief Minister Arvind Kejriwal in ama chenna in a tui kiveiden ho suhthengna nei in hapta 10 sung chelha ding Delhi government tohgon anti-dengue campaign tunichun ahongdoh tan ahi. Hiche tohgon noi a hi Delhi sung tui veiden namun ho suhtheng a natna hung pengdoh thei ho a kon mipi vendoh ding dan lhangsap hiding ahi.

CM Kejriwal in asei na ah ningkum bang a Delhi a khosa mi crore 2 vel in tuchung a jong pan alah a dengue natna a kon mipi vendoh hiding ahi, ati. Hitolhon in Deputy Chief Minister Manish Sisodia, cabinet minister Rajendra Pal Gautam le Kailash Gahlot hon jong tohgon chelhah thudol twitter ah atahdoh cheh uve.

Sisodia in asei na ah chenna in vel a tui veiden loudan in atamjo’n akigel in hinla minute 10 tobang phatah a in vel akikhol le tui vei na mun mudoh tei in aum jui in, hiti ho jeh a hiche tohgon hi poimo tah ahi e, ati.

Hiche tohgon hi tunia kipan a Sunday ni seh le chelha ding ahi in, ningkum jong chun mi poimo tamtah in hiche tohgon hi ana lunglut pi lheh ahi. Ningkum September a hitobang tohgon patdoh ana hi a pat 2015 kum a dengue natna nei 15867 le ana mollem mi 60 ana hi chu tukum a dengue natna nei mi 2036 le amollem mi 2 bou ahi tin government in aseiyin ahi.

Hitolhon in Sunday ni seh le minute 10 sung in vel tui vei namun ho velha jing ding in Kejriwal in minister, MLA le mipi ho temna anei in ahi.

================

JEE Main themvetna jou a simlai lakh 15 ho dia NEET medical entrance exam NTA in chelhahpi pai ding

New Delhi, Sept 6: JEE Main themvetna kichai bep a simlai lakh 15 ho a dia NEET noi a medical entrance exam September 13 a chelhahpi dia National Testing Agency (NTA) kigong tup sa um pai ngal ahi. Joint Entrance Exam (JEE Main) themvetna September 1 a kipan chu tunia kichai bep ahi.

NEET themvetna pang dia min pelut hi agom a 15.97 lakh ahi in JEE to kibang lou a pen le paper a themvetna chelha ding ahi e tin NTA official thuphon chun asei e. Themvetna kikah tah a chelhah thei nading in exam centre jong 2546 a pat 3843 in tamsah be ahi in chule classroom khat a simlai mi 24 masang a ana tou ji jong mi 12 bou a din suhlhom ahi.

Hitolhon a simlai ho themvetna mun aphatcha lhun thei nadia ijakai gongtup ding in NTA chun state government ho ngehna anei un ahi. Chule NTA in lutna kotbul le exam hall sung a hand sanitisers koi jing ding, admit card jong barcode mang a vetlhahna neiding, exam centre tamsah be ding, classroom khat a simlai tam tousah lou dia agontup ahi.

Odisha, Madhya Pradesh le Chhattisgarh government in themvetna pang ding simlai hoc he le nading gari gonpeh din aphongdoh un, chu ma bang chun Indian Institute of Technology (IIT) simlai masa hon jong themvetna pang ding che le nading gari ngaicha ho agonpeh diu ahi.

Kolkata Metro Railway general manager Manoj Joshi in simlai le akilhonpi hon admit card avetsah a jong aphatcha themvetna mun alhun thei nading metro a touthei dia gon ahi e, ati. Hetding chu Covid-19 jeh a themvetna phat chon dia Rahul Gandhi, West Bengal Chief Minister Mamata Banerjee, Odisha CM Naveen Patnaik, DMK president MK Stalin le Delhi Deputy Chief Minister Manish Sisodia hon ngehna anei chu Supreme Court in aphatsah lou ahi.

Chutolhon in Punjab, Rajasthan a pat congress, West Bengal (Trinamool Congress), Jharkhand (Jharkhand Mukti Morcha), Maharashtra (Nationalist Congress Party le Shiv Sena) hon themvetna chelhah ding hi akipapi lou hel ahi.

Hiche NEET-UG themvetna May 3 umding chu July 26 a chon hi a chu a pat September 13 a dia chon hikit ahi.

Xxxxxxx

Bihar Assembly Election tet dia women commission palai akehkhat kigong

Patna, Sept 6: October lha a aphat kichai ding Bihar State Women Commission palai akehkhat ho state assembly election tet ding in kigotna anei uve tin thulhut chun asei e.

Usha Vidyarthi in Paliganj, Nikki Hembram in Katoria, Dilmani Mishra in Brahmapur chule Pratima Sinha, in Islapur a election tet ding in kigotna anei un ahi.

Palai ho hi MLA ahisoh kei e. Mishra hi 2010-15 a Brahmapur BJP MLA ana hi in, Usha Vidyarthi hi 2005-2010 a Paliganj a pat BJP MLA ana hi in, Nikki Hembram in BJP ticket in 2015 chun Katoria ana tet a losam ahi. Pratima Sinha hi 2007-2010 a Islampur JD(U) MLA ana hi in,

Manju Kumari hi 2013-2015 a Samastipur JD(U) MLA chule Renu Devi hi 2005-2010 a Dev JD(U) MLA ana hi e.

JD(U) ticket kineppi Mishra in commission a pat numei ho a ding natoh tampi kabol in ahin MLA khat hina mi tamjo dia thilpha kabolthei ding ahi e, ati.

Paliganj a hatah a mipi dia natong Vidyarthi in BJP ticket kadei in ahin kamulou le independent a katet ding ahi ajehchu kei hi post graduate le law degree nei kahi in mipi in athalheng ding in lekhathem adeitai, ati.

xxxxxxxxx

Opposition hon Parliament toukhom sung a government phoujah dia nasatah a tohgon nei

New Delhi, Sept 6: Ahunglhung ding Parliament toukhom ta China toh kiboina, Covid-19 thu, economy le state ho GST chanvou thu a government kimaitopi ding in Opposition party ho nasatah in akigongtup tan ahi.

Hitolhon a Opposition lamkai hon tu hapta sung a kihoukhomna aneidiu ahi. Parliament toukhom na hi September 14 a kipan ding ahi.

Congress President Sonia Gandhi in ama party ho September 8 a atoukhompi ding ahi. Chule tuchung Parliament toukhom sung a Opposition ho kilungkhat tah a pangkhom ding in Trinamool Congress (TMC) luboh Mamata Banerjee, Shiv Sena lamkai Uddhav Thackeray le JMM luboh Hemant Soren hon JEE/NEET le GST thu a kihoukhomna anei pet uchun asei uve.

Congress hon jong Parliament a dohna bolding ho gontupsa akoi uva chule UPA bahkai se jong kaikhom dia agon u ahi.

TMC lamkai Derek O’Brien, CPI(M) general secretary Sitaram Yechury chule CPI leader D Raja hon government kimaitopi dia opposition ho pankhom cheh dia temna anei u ahi.

Chuban a China toh kidinte thu a government panlah dan jong phongdoh dia opposition hon ngehna anei diu ahi.

Chule Covid-19 chung a government panlah dan, NEET exam thu hojong opposition hon pohdoh dia agonkit ahi.

Chule president lui Pranab Mukherjee jana toukhom masapen jong khongaisah hiding a tohgon um ahi. Chule amollem ho chu Rajya Sabha MP Amar Singh le M P Veerendra Kumar abanle Lok Sabha MP H Vasanthakumar ahiuve.

Xxxx

CCCL in simlai pachanna neiho kipapi nale vangthumpeh na kingon nei

Kangpokpi, Sept. 6 (ET) : Christian Centre Church Leimakhong (CCCL) in Church Executive Board tohgon nanoi in tunin State le Central Board nanoi’a HSLC le HSSLC a lolhinna nei houbung sung’a simlai ho kipapi nale vangthumpeh na kingon Church conference hall mun’a  Pastor T. Baite kin-thempu hinan anamang uvin ahi. Chuleh Pastor T. Baite in khangthah simlai hohi khonung’a ding’a khompi ahi naoban’a tahsa le lhagao hinkho ajong mi jouse kinepna ahi toh lhon’a bidoi kicheh tah neipum’a akal ason ding uvin thuhilna anei in ahi.

Hiche toh lhon’a T. Touthang Chairman CEB in houlimna aneina’a tulai vannoi khantou machal dungjui in khangtah simlai hon Information Technology (IT) hi chingthei tah’a amanchah uva chule vannoi kikhel dungjui’a simlai ho jong aphalam’a kikhelna hinkho anei ding uvin tilkhou na aneiyin ahi. Chule pachanna nei simlai ho kipa thilpeh houbung secretary Lalboi Kipgen in CEB thalheng in anei in ahi.  Alangkhat’a Covid-19 jeh in japi hop in kingon kibol thei hih jong leh apang ding’a lom houbung lamkai, Department lamkai chule nule pate phabep in pan anala in ahi tin Lalboi Kipgen chun aseyin ahi.

xxxxxxxxx

Nagaland a Covid +ve case thah 50 kimudoh; agoma case 4,178 lhingta

Kohima, Sept. 6 : Nagaland a Covid +ve case thah tuni 50 akimudohbe toh lhon’a agom’a case 4,178 alhing tan chuleh adamdoh mi 77 jong aumbe in ahi. Case thah kimudoh 50 lah’a 42 hi Dimapur akon, 7 hi Kohima akon chuleh khat hi Mon akon ahi. Chule Minister of Health and Family Welfare S Pangnyu Phom in aseina’a contact tracing hi Integrated Disease and Surveillance Programme (IDSP) team in kholchilna anei toh lhon’a primary contact jouse self isolation a akoi uvin ahi.

Xxxxxx

Forest Range Officer khat in lamlen ana semphat

Kakching, Sept. 6: Kakching District kaon Naorem Munal Meitei Forest Range Officer in tunin Kakching Wairi akon P.R English School kikah’a lamlen a kotong ho semphat na ananei in ahi. Hiche lampi hi mipi tamtah ding’a kijot tona mun ahitoh lhon’a tulai Covid-19 hahsat na chung chon’a lamlen ho chele vale thei atahlou phat in mipi te ding gelkhoh najal in pan anala in ahi. Hiche toh lhon’a Munal in mopoh nanei Department hon gamkai sung mipi hahsatna agelkhoh’a agannathei pen’a lamlen ho asemphat ding in ngehna jong anei in ahi.

Xxxxxxxxxx

Daan toh kitoh louva go kisat ho kimandoh

Imphal, Sept. 6(UNA): MPS Additional SP H. Basulal Singh (LO) Jiribam makai na in Borobekra Police Station akon District Police team hon go (bamboo) piece 5,725 vel kiphu lhu’a gamlah lamlen pang anakisel anamudoh uvin ahi. Jiribam District hopsung Borobekra Sub-Division sung’a go (bamboo) phuh lou ding’a daan aum naban’a hiche go hohi Cachar District, Assam a joh ding’a akikoi lai’a anamatdoh’u ahi tin thulhut chun aseiyin ahi.

Thulhut kimu dungjui’a go kimandoh ho jouse chu Chhotobekra Police Outpost akikoi in chuleh Forest Rang Officer, Borobekra Sub-Division a Indian Forest Act, 1927 dungjui’a daan kitoh’a kholchil na anei ding uvin anapelut uvin ahi. Chule Superintendent of Police, Jiribam District in Sub-Division sung’a um mipi ho heng’a Reserve forest land authority akon phalna ima umlouva go/thing aphuh lou ding uvin hetsah na anei in ahi.

Xxx

Lockdown masang’a ticket booked bol ho nikho 15 kah’a Centre in refund bol ding’a propose

New Delhi, Sept. 6 : Vanleng’a tou ding hon achesa March nisim 25 nikho akon Covid-19 jeh’a lockdown hung kiphondoh masang’a ticket booked kibolhon ticket man authority in anung le ding’a anga jing utoh lhon’a Supreme Court heng’a affidavit filed kibol masang in Ministry of Civil Aviation (MoCA) leh Directorate General of Civil Aviation (DGCA) in passenger koi hijong leh March nisim 25 masang’a ticket booked bol ho jouse alhingset’a nikho 15 sung kah’a anung le ding in proposed abol uvin ahi.

Hiche toh lhon’a Centre States in scheme ahinsemdoh na’a ipi airline hi jong leh sum din mun hahsat na jeh’a passenger ho ticket booked man apet pet’a apehdou jou lou ding din mun’a aum khah leh hiche sum chu Credit Shell a koi ding chuleh passenger koi hi jong leh ticket booked abol na airline ma ma’a March 31,2021 sung kah’a adeina’a chekit thei ding ahi. Ahin hiche option hi foreign carriers ho’a kimangcha thei lou ajeh chu nikho 15 sung kah’a refund abol tei tei’u ngai ding ahi.

Alangkhat’a passenger koi tobang kholjin (travel) nom aum lou leh Credit Shell akon mi khat heng’a transferred hithei ding ahi. Ahin passenger hon Credit Shell a um a sum u amanchah lou uva ahileh hiche sum chu lha seh’a interest kal ding chuleh sum chu interest pum’a alhingset’a March 31,2021 jou teng anung le ding’u ahi. Hetthei khat chu DGCA in achesa April nisim 16 nikho’a lockdown (March 25 to April 14) sung’a ticket booked kibol ho refund bol ding in asei in ahi. Chuleh hiche (March 25 to April 14) phatsung’a ding’a ticket booked kibol hon Supreme Court heng’a refund abol ding uvin ngehna ananei uvin ahi. June nisim 12 nikhon Court in  airline operators leh travel agent ho consult abol jouvin Centre heng’a hiche chung thu suhlhap nading lampi ahol ding in hetsahna anei in ahi. Chuleh Justice Ashok Bhushan makai na’a three judge bench in Sept. nisim 9 nikho leh petition ahin lah teng Centre affidavit jong consider abol ding ahi.