Cabinet in Jan 1 a kon ILPS kitup tah a chepi dinga...

Cabinet in Jan 1 a kon ILPS kitup tah a chepi dinga phatsahna nei

231
0
SHARE

Cabinet in Jan 1 a kon ILPS kitup tah a chepi dinga phatsahna nei

Imphal, Dec 29(ET): State cabinet in Sunday nikhon khovei January nisim 1 a kon gamsunga Inner Line Permit System kitup tah a chepi dinga thulhuhna anei uvin ahi.

Government Spokesperson Minister Thongam Bishwajit in thuso miho akimupi na’a, CM Biren lamkaina a CM Secretariat a Cabinet meeting um a chule CM in kitepna ananei banga January 1 a kon ILP system kitup tah a chepi dinga phatsahna um ahi, ati. ILP hi gamsung mi, sorkar in masanga a kon adei alungtup khat ahi’in sorkar in gamsung miho huhna ding ILPS rules and regulation chungchang a kihouna anei khoh ahi, ati.

Centre sorkar in ILPS phatsahna aneihi gamsung miho kipana ahi, tin aseiyin chule lolhingtah a gamsung miho, Civil society organization, simlai kiloikhom ho, meira paibi ho lungnat louna ding leh a phatchomna dinga akichepi thei nading dan ho state cabinet in giltah a aseikhom ahi, ati.  Cut-off base chungchang a Minister pa in CM in anasei thu aseiyin, hiche hi gamsung pumpi a kichepi ding National Register of Citizen (NRC) exercise dungjui hiding ahi, ati.

Nagaland gam a base year hi gamsung ‘hill state’ a akiphondoh 1979 kum ahi. NRC exercise akipat teng base year tepna dinga sorkar in gamsung miho dohna aneiding ahi, tin aseibe in ahi.Cabinet in Nambul vadung leh Imphal khopi a long vadung dang dang ho Imphal City Beautification project noiya athen leh ahoi nading thu jong aseikhom in ahi. Gamdang a kon agency thalah a fund lah dinga kihouna aneiyu ahi.

Hiche masanga Minister Bishwajit in MSSRDA 2020 Calendar hondohna aneiyin ahi. PMGSY chungchanga state sorkar in mun chom chom a lamlen sorkar in asemphat ahi, ati. 2000 kum a PMGSY akichepi a kon state sorkar in lamlen 6713 km lhing hi dangka crore 2330 lut a asemphat ahi, ati. 2017-2019 kum a lamlen 4970 km hi dangka crore 3037 sanction kibol na a kisem ahi.

PMGSY phase 2 noiya lamlen semna dinga phatsahna kinei project 56 kipe ahi’in, PMGSY phase 1 alolhin jou ahi. PMGSY phase 3 a dinga jong state lhingjou ahitan, 812 km lamlen semna dinga kigotna umkit a chule lamlen survey kibol lai ahi, ati. Aphat cha natoh jo nadinga department in hahsatna chom chom ato thu Minister pa in aseiyin chule kihouna a pang thingnoi kiloikhom honjong mipi phatchomna dinga kichepi khantou machalna natoh ho asuhboi lou dinga tosotna athum in ahi.

CAA leh Article 14 chungchanga ‘debate’ bol dinga CM chouna MLA Joykishan in san peh; aseina ding mun phapen hi Assembly floor ahi, tia sei

Imphal, Dec 29(ET): Congress MLA Khumukcham Joykishan in Sunday nikhon CAA leh Indian Constitution Article 14 thu a kinelkalna nei dinga Chief Minister N Biren Singh in chouna thu asei asanpeh in ahi.

Chief Minister in janni nikho a koi tobang CAA hin Article 14, Indian Constitution atongkha e, tia gel aumle kinelkal pi dinga CAA tosotna a Basu Ground, Khangabok, Thoubal district a ahoulimna a asei ahi. MLA Khumukcham Joykishan in CAA leh Article 14 chungchanga CM chouna san dinga kigotna kaneiye, ahivanga hitobang kinelkal nadinga platform kisuhtah State Assembly floor ho ngai ahi, tin aseiyin chule Chief Minister in amun hi nommo asah a ahileh gamsung mipi jouse apan theina mun hiding ahi, ati.

“Article 14 Paras a CAA kisei ngailou ahi. Akhoh hi CAA provision in Article 14 provision apalkeh ahi”, tin Joykishan in CM Biren in hiche thu a chouna anei adonbut in ahi. Sorkar in policy douna a thusei ahet angaiyin, ngohna chom chom a amat thip thei ahipoi. Gamsung miho thaneina jana apeh ding chule political party lamkai L Sotinkumar kimat jong mijousen asan louding ahi, ati.

“Gamsung mihon CAA adoudal ihet u ahi’in, sorkar in CAA thu a adei ule referendum bol uhen”, tin Joykishan in aseibe in ahi. Thoubal district a CAA tosotna a rally abol chungchang a Joykishan in mi ijat in CAA atosot a ijat in adoudal em tihi muthei ahi, tin aseibe in ahi.

Kumkit 2020 sung’a Tourism, Horticulture leh Agriculture lampang hatah’a khohsah na kinei ding ahi: Chief Minister N. Biren

Imphal, Dec. 29 (ET): 2020 kum sung’a Government in Tourism, Horticulture leh Agriculture lampang hohi hatah’a gelkhohna kinei ding ahi tin Chief Minister N Biren in tunin CM Secretariat a thuso miho toh akihoukhomna’a anaphongdoh in ahi. Chuleh gamsung mipi te jouse jong kum thah kipa thupha jong athot in ahi. 2018-19 sung in gamsung law and order kitup jal in tourism lampang 59% in akalsang in ahi. Imphal-Tamei Tourist Circuit hopsung Longa Koireng mun’a Integrated Tourism Circuit sahchai in aum tan chuleh Pherjawl District akon in 2019 kum sung in Dk. Crore 12 manding thieng (ginger) metric ton 4000 lam gampam’a lolhing tah in akithot doh jouvin ahi ati.

Hiche toh lhon’a  Changman (black rice) metric ton 100 lam thot doh ahi theina ding in State company leh gampam company hon Memorandum of Understanding soi jong akikai joutan ahi tin Chief Minister chun aseibei. Aman aseibe na’a Mission for Integrated Development of Horticulture noi’a thinglhang leh phaicham District jouse a go twi kholna 40 lang sahbe ding in tohgon jong akinei in ahi. Prime Minister Kishan scheme noi in gamsung’a loubol mi Lakh 1.23 lam register akibol tan chuleh hiche scheme noi’a loubol mihon lhaseh leh Dk. 4000 cheh direct benefit transfer amu ding’u ahi. Model Housing Colony sah nading tohgon jong akinei jing lai ahi tinjong aseibei.

Guwahati a ‘Khelo India’ hongdoh dinga PM ahungleh kiphinna lentah umding ahi: AASU

Guwahati, Dec 29: Semphatna kinei Citizenship Act douna a All Assam Students’ Union (AASU) in Sunday nikhon gamsunga January nisim 10 teng Prime Minister Narendra Modi ‘Khelo India’ games hongdoh dinga ahunga ahileh kiphinna lentah kibol ding ahi, tin asei uvin ahi.

Press conference abolna a AASU lamkai in, January nisim 5 nikho a Guwahati khopi a umding India leh Sri Lanka kichepna T20 match chule January 10 a kon 22, 2020 sunga ‘Khelo India’ games umding hi organization in phatah a avet ding ahi, tin aseiyin ahi. “Citizenship (Amendment) Act phatsah ahi jouva Prime minister in Assam gam avilna ding amasapen ahi. ‘Khelo India’ avil a ahileh kiphinna lentah umding ahi”, tin AASU president Dipanka Kumar Nath in aseiyin ahi.

Ahin, kiphinna sangtah abol ding chungchang thu aseipon, khopi a Modi ahung ding photchen ahi jouteng kisei ding ahi, ati. “Modi leh BJP in Assam gam suhmang ding tohgon anei ahi’in, kitou thim louding ahi. CAA douna a kiphinna hi sottah che ding ahi. Supreme Court a dan dungjuiya athu hehna kisem ahi’in, tahsanna akineiye. Boina sem louva kiphinna aban ban a umjom ding ahi”, tin Nath in aseiyin ahi.

Citizenship Act alahdoh diuvin AASU chief adviser Samujjal Kumar Bhattacharya in thumna aneiyin, chule mipin kiphinna abol louna dinga sorkar panlahna jouse kive jing ding ahi, ati. Ahunglhung ding nikho a Guwahati khopi a kichep golseh ni umding ahi. Amasa hi cricket match ahi’in, January 5 teng umding aban a hi ‘Khelo India’ hiding ahi. Ani a kive jing ahi, tin aseibe in ahi.

‘Vet jing ding’ ati hi ipi aseina ham tia adoh uchun Bhattacharya in, “Aphat alhin teng kahetsah diu ahi”, tin adonbut in ahi. Assam Chief Minister Sarbananda Sonowal in CAA hi gamsunga dan dih louva hung lut Hindu Bangladeshi lhomcha bouvin aphatchompi ding ahi, tia asei thu hi ipi ham ti aseidoh dinga thumna aneiyin ahi.

December nisim 14 nikho a Sonowal in, CAA hi lhomcha inbou aphatchompi ding ahi’in chule aphat ahiteng ajat kiphong ding ahi, tia anasei ahi. AASU general secretary Lurinjyoti Gogoi in Assam Finance Minister Himanta Biswa Sarma National Register of Citizens (NRC) chungchang a thuso anei dohna aneiyin ahi. Sorkar in ami jat hi lakh li, lakh nga leh lakh som hi mipi jouva alhep ahi. Hiche hi NRC a kon kihe ahi atiu ahi”, tin aseiyin ahi.

NRC authority hon data aseidoh lou diuva Supreme Court in kicheh tah a akha ahi’in, state sorkar in NRC a ajat aseiya ahileh official phabep in data aguh a apehdoh tina ahi, tin Nath in kholna anei diuvin thumna aneiyin ahi. Citizenship Act hi gamsung mi atampen a lakh 5.42 in aphatchompi ding ahi, tia Sarma in December nisim 16 nikho a asei ahi’in, NRC a reject kibol ho list kholna anei jouvu ahi. August 31 ni a NRC list achaina asodoh nauva lakh 19 val amin chonglou ahi.

November nisim 20 nikho a press conference abol nauva Union Home Minister Amit Shah in Rajya Sabha a gamsung pumpi a NRC chepi dinga aphondoh ahi’in, Centre in NRC asan lou dinga state sorkar in Centre henga ngehna anei ahi, tia Sarma in asei ahi. Manipur leh Meghalaya gam a kipe Inner Line Permit (ILP) tobang Assam gam apeh diuvin Bhattacharya in thumna aneiyin ahi.

Dan dihlouva hunglut jouse ho a kon gamsung mi dihtah ho huhding kadeiyu ahi. Bangladesh gam a kon dan dihlouva hung hohi Hindu hihen Muslim hijong leh akhohpoi, hou thu akhohna aumpoi. March 24, 1971 kum jouva hunglut a gamdang mi mikhat jong kilalut louding ahi, tin aseibe in ahi. January nisim 17 nikho chan gamsunga gamsung mi dihtah ho kiloikhomna 30 toh kiphinna chom chom aban ban a bol dinga AASU lamkai hon phondohna anei uvin chule gamsung mihon atosot diuvin temna jong anei uvin ahi.

Minister Jayantakumar in Health & Wellness Centre, Palliative Care Unit, CMHT Enrolment Camp leh Mega Health Camp hondohna nei

Imphal, Dec 29(ET): Health and Family Welfare Minister L. Jayantakumar Singh in Sunday nikhon Health & Wellness Centre, HWC, Wangoo, Primary Health Centre, PHC, Wangoo Laipham, Kakching district hondohna aneiyin chule Palliative Care Centre jong hondohna aneiyin ahi.

HWC leh Palliative Care Centre hondohna anei toh kilhon a amun a Mega Health Camp leh CMHT (Chief minister gi Hakshelgi Tengbang)  enrollement camp jong abol uvin ahi. Chief guest a pang Jayantakumar Singh in ahoulimna a Wangoo PHC a angaicha doctor leh nurse chule gamsung miho ngaichat hohi masanga amun kavil a kahet ahi, tin aseiyin chule PHC Wangoo Laipham hi Community Health Centre (CGC) a state cabinet in upgrade abol ahitai, tin aseiyin ahi.

Fund lhahsam jeh a tua CHC a thil, manchah leh staff lhasam ahi, tin Jayantakumar in aseiyin, ahivanga sorkar in health sector a jo channa gamsung mi ho deibanga pan alah ahi, ati. CHC Wangoo Laipham a aumsa staff chungchon a doctor thah khat posting bol dinga kitepna aneiyin ahi. Mega Health Camp a dammona achom chom test 53 jong manbeiya abol peh uvin ahi.

CMHT card holder hon phatchomna amu ho thu aseiyin, akipe hospital ho a kum khat a dangka lakh ni chan manbeiya kijen theiyu ahi, ati. Health insurance jat hi PMJAY (Prime Minister Jana Arogya Yojana) card holder ho a dinga dangka lakh nga a kikalsah ahi, ati. Gamsunga tua hi hitobang mu nathei hospital 25 um ahi’in, hiche a hi CHC leh UPHC chule state leh district hospital jong pang ahi. Guwahati a Narayan Superspeciality Hospital khat jong ‘empannelled’ kibol ahitai, ati.

Health sector machal nadinga gamsung miho tohgon sorkar in atosot dinga temna aneiyin ahi. President a pang Kumbi MLA in ahoulimna a politic leh khantou machalna natoh achom chom a koiding ahi, tin aseiyin ahi. Scheme thah hohi gamsung miho phatchomna ding ahijeh a gamsung mihon aliem ahi, tin aseiyin chule state health department natoh pachatna thu aseiyin ahi.

Kin gon a Dr K Rajo Singh, Director Health & Family Welfare, Dr Prabin Singh, Joint Director, Heath, guest of honour a apang in ahi. Health minister leh team hon CHC, Wangoo, Laipham a um unit chom chom hojong avil uvin ahi.

Bangladesh gamsung dap jeh’a  mi 50 val in thina toh

Tetulia, Dec  29 : Bangladesh gamsung adap cheh cheh jeh in mi 50 val in thina chan jong atoh tan ahi tin thulhut chun aseiyin ahi.

Weather official hon aseina’a Bangladesh gamsung’a ding’a temperature nem pen nachu Tetulia mun’a tuni (Dec. 29) jingkah lam 4.5 degress Celsius chu tukum sung’a ding’a lowest temperature ahi tan ahi ati. Hetthei khat chu Tetulia hi border town North Bangladesh gamsung’a um ahi.

Hiche toh lhon’a Senior official Government health directorate Ayesha Akhter in aseina’a Bangladesh gamsung’a achesa Nov. nisim 1 akon Dec. nisim 28 sung in acute respiratory infection jeh in mi 17 in thina atoh in chuleh diarrhea leh nat na chom chom jeh in mi 33 in thina chan jong atoh tan ahi ati. Chuleh cold related illnesses tichu influenza, dehydration leh pneumonia jeh in mi tamtah Hospital mun’a kijen ding in jong adim lha jeng tan ahi ati.

Aman aseibe na’a hiche natna hi vei hi atam jo working class mi te ngen ahi ati. Ajeh chu amaho hin von kivon ding anei lou jeh uvin  adeh in chapang leh ahan ho chung’a pneumonia hi aha chuh deh in ahi ati.