CAA akichepi tah vanga BJP vaipohna hilou state hon chepi lou maithei

CAA akichepi tah vanga BJP vaipohna hilou state hon chepi lou maithei

225
0
SHARE

CAA akichepi tah vanga BJP vaipohna hilou state hon chepi lou maithei

Imphal, Jan 11(ET): January nisim 10 nikho a kon India gamsung pumpi a Citizenship Amendment Act (CAA) akichepi pan tah vanga BJP vaipohna hilou Madhya Pradesh leh Kerala chule state dang dang a CAA kichepi theilou dinga ginmona umjing nalai ahi.

Kerala gam a state Legislative Assembly in CAA leh NRC chepi lou dinga kilolna anei ahi. Ahivanga CAA hi Rajya Sabha leh Lok Sabha in phatsahna anei ahitoh kilhon a state sorkar in achepi ding dinmun a um ahi. “Notification akisodoh vanga Supreme Court in hiche thu a ipi asei kihe loulai ahi. Athu hi Supreme Court a khongai nalai ahi”, tin Madhya Pradesh Law Minister PC Sharma in thuso miho henga aseiyin ahi.

“Citizenship Amendment Act chungchang a Madhya Pradesh sorkar dinmun hi nikho kipat til a kon kicheh ahi. Chief Minister in adinmun photchenna anei ahitai”, tin PC Sharma in aseiyin ahi. Alangkhat a Madhya Pradesh CM anahi Shivraj Singh Chouhan in Madhya Pradesh sorkar in gamsunga CAA achepi ding dol ahi, tin aseiyin ahi.

“CAA hi Parliament House teni in phatsahna anei ahitai. Chief Minister in Constitution kitah tah a jui dinga kihahselna alah ahi’in, sorkar in hiche Act achepi ding hi mopohna leh boltei ngai ahi”, tin Bhopal a Shivraj Singh Chauhan in aseiyin ahi. Union Home Ministry in gazette notification asodoh na’a, Pakistan, Bangladesh leh Afghanistan gam a kon hung jam a Muslim hilou refugee ho citizenship kipehna ding Act hi January nisim 10 a kon chepi dinga asei ahi.

Citizenship Amendment Bill hi Lok Sabha in December nisim 10, 2019 kum a phatsahna anei ahi’in, hiche jouva Rajya Sabha in phatsahna anei ahi. President in Bill hi December nisim 12 nikho a phatsahna apeh’a chule anikho ma ma a Gazette notification kisodoh ahi. Act dungjuiya akisei gam a kon Muslim hilou refugee India gam a December nisim 31, 2014 kum masanga hung chenglut ho Indian citizenship kipe ding ahi.

Section 2(1)(b) dungjuiya amaho hi dan dihlouva gamsung a chenglut a kisei talou diu ahi. Hindu, Sikh, Buddhist, Parsi, Jain leh Christian hou hon India gam a kum 11 hilouva kum 5 achen u aphotchen thei uva ahileh citizenship changthei diu ahi. Hiche chungchang a sorkar in Rules asem loulai ahi’in, expert ho thuhilna alahkhom jouteng ule thulhuhna aneidiu ahi, tia thulhut in asei ahi.

Supreme Court a Act douna a political organization leh midang tamtah in hehna asem ahi. Indian Union Muslim League leh MP 4, TMC MP Mahua Moitra, Congress MP Jairam Ramesh, Peace Party of India, Jan Adhikar Party, Indian Ambassador anahi leh retired IAS officer ni, All Assam Students Union, Assam  Opposition lamkai Debabrata Saikia, Citizens Against Hate, Rihai Manch, Lok Sabha MP Asaduddin Owaisi, Kerala MLA T N Prathapan, “Makkal Needhi Maiam”, Kamal Hassan, United Against Hate, Tripura lamkai Pradyut Deb Barman, Assam Gana Parishad, Kerala Opposition Leader Ramesh Chennithala, DYFI, DMK , civil rights activist Harsh Mander, Irfan Habib, Nikhil Dey leh Prabhat Patnaik, Assam Jamait Ulema -E-Hind, Rajya Sabha MP Manoj Kumar Jha  chule adang tamtah in Act douna a Supreme Court a petition apeh ahi.

Act hi hou thu a kibungkhenna chule fundamental right leh Constitution Article 14 kipalkehna ahi, tia alhangpi a hehna sem hon aseiyu ahi. Hiche hi houthu a kibungkhenna ahi’in, hou thu a chamlhatna neiding hi Constitution kibulphu na ahi, tia aseiyu ahi. Hiche thu a lha masa a Court in Centre notice apeh ahi’in, January kal ni kah a Centre in donbutna apeh dinga Court in asei ahi.

CBI hon thukholna anei dinga Court thutanna EEVFAM leh HRA in kipapi

Imphal, Jan 11(UNA): Extrajudicial Execution Victim Families Association, Manipur (EEVFAM) leh Human Rights Alert (HRA) in achesa April nisim 9, 2002 kum a Pangei a tolthana thilsoh Central Bureau of Investigation (CBI) in akhol dinga Chief Judicial Magistrate, Imphal East in thuso anei akipapi uvin ahi.

HRA executive director Babloo Loitongbam leh EEVFAM president Renu Takhellmabam in thuso aneina’a, EEVFAM Vs Union of India case a Supreme Court thutanna a Manipur gamsunga ‘extrajudicial killing’ ho a CBI thukholna umdan court thupeh hin kichehtah a apohdoh ahi, ati. CBI in Case record ho khol dinga Special Investigation Team (SIT) asemdoh dinga court thutanna chun asei ahi’in, hiche record thu a authority hon angaicha FIR ajih’a chule December 31 2017 kah a thukholna ajo a, charge sheet asem u ahi.

FIR 39 kijihlut ahitan, phat kitep akichaina jong kum ni val ahitan, ahivanga closure report leh charge sheet 13 bou kipe nalai ahi. Pangei bazar a Asem Romajit leh Yumnam Robita kitha na case jong hi Chief Judicial Magistrate, Imphal East (CJM) henga kipelut closure report case khat ahi. Thukholna hi EEVFAM leh HRA in asan theilou ahi, ajeh chu District Judge in prima facie extrajudicial execution hi 2012 kum a Gauhati High Court, Imphal Bench thuhilna dungjuiya ‘judicial inquiry’ kibol a kon amudoh ahi.

Hiche jeh a Romajit leh Robita insung mite chule EEVFAM in CBI hon witness ho statement he na sa sa a apachat lou ahi, tia achouna a petition apeh ahi. CBI hon thilsoh a pang CRPF personnel ho chungchang thu kiseina dinga kon ahuhdoh got ahi.

Tuni chan geiya charge sheet kisem 13 a hi Manipur police personal 70 val themmona neiya kingoh ahitan, ahivanga Union sepai koima themmona neiya kingoh loulai ahi hi lungdon umtah ahi. Dan pam a tolthat a apang uve ti photchenna aum vanga amaho chunga ngohna ima kisem loulai ahi. Pangel tolthana thilsoh jong hitobang ma ahi’in, centre sepai ho themmona neiya akingohna case khat ahi. Gamsunga um magistrate court chom chom a hitia ‘closure report’ kipe 6 chouna a EEVFAM in hehna asem ahi.

CBI/SIT in sihnei langneina umlou, thudih tah chule thukholna thuhtah aneiya athu akhol ding EEVFAM leh HRA in akineppi na thu jong aseibe uvin ahi.

Congress in BJP vaipoh dan demna nei; lha ni val CrPC 144 kikoi demna sangtah nei

Imphal, Jan 11(UNA): Centre leh state ani a BJP lamkaina sorkar hi kichat umtah ahi, tin Manipur Pradesh Congress Committee in aseiyin chule Imphal West a lhani val CrPC 144 akoi uva, mipi awgin hunam a asuhthip u ahi, ati.

Congress Bhavan, Imphal a MPCC vice president leh MLA anahi T Mangibabu in thuso miho akimupi na’a, Jammu and Kashmir gam a sorkar in ‘interner service’ alahdoh lou dinga sorkar thuhilna anei apachatna thu aseiyin ahi. J&K gam a internet service hi nikho 155 lhing kikhah ahitan, internet mu hi gamsung miho dinga Constitution Article 19 noiya ‘fundamental rights’ ahi, tia court sangpen in asei ahi.

BJP hunam thahat vaipohna a kon gamsung chule democracy huhdoh thei hi court sangpen bou ahi, ati. BJP in gamsunga hunam a chang vaihomna abol ahi’in, ‘democracy’ toh kitoh a kiphinna kibol chule thuseina a chamlhatna hohi CrPC 144 lha ni val Imphal West a akoi uva asuhboiyu ahi, tin Congress in demna sangtah aneiyin ahi.

Sorkar hi mipi ding ahi’in, sorkar in natoh pha chule tohgon pha abol teng mipi kipah ahi. Sorkar in adihlou abol teng mipin kiphinna anei ahi’in, ahivanga sorkar in CrPC amanchah a hunam a mipi awgin asuhthip got ahi. India hi ‘democracy’ gam lenpen a kihe ahi’in, ahivanga tua BJP vaipohna noiya gamsung alol kimeh ahi, tin aseibe in ahi.

BJP sorkar in ‘democracy’ tha a hunam a Karnataka leh Maharashtra a sorkar semding agot ahi’in, Supreme Court in pan alah jeh a ‘democracy’ kihuhdoh ahi, tin Mangibabu in aseiyin BJP sorkar hi mipi doudal, kibungkhenna sem a chule constitution toh kitohlou ahi, ati.

Athah a Law a kisemdoh CAA douna a gamsung mihon pan alah ahi’in, CAA douna a kiphinna bol ho sorkar in asuhthip theina dinga tohgon chom chom anei uva Act chom chom noiya amat uva jail a akoiyu ahi. Manipur gam a jong CPI lamkai L Sotinkumar in CAA douna thu aseijeh a Jail a kikoi ahi. Sorkar in lha ni val CrPC 144 akoi hi dihlou ahi’in, ‘democracy’ kisuhminset na ahi, tin aseibe in ahi.

BJP in CAA tosotna a campaign chom chom abol thu a Mangibabu in gihna aneiyin, khang aban ban in boina ato teng BJP sorkar themmona hiding ahi, ati. CAA hi gamsung phatchomna dinga kibol ahi, tia mipin agel a ahileh CAA tosotna a support campaign chom chom BJP in abol ngailou ahi, tin aseibe in ahi.

Kuki Inpi Manipur (KIM) in Kum thah maicham kingon anabol

Mangneo Touthang

Imphal, Jan 11(ET): Imphal khopi hopsung Langol KBC Church mun’a tunin Kuki Inpi Manipur in ” Vaipo a pang chun gunchuh tah in pohen” ti Bible chang mangchan in kum thah Maicham kingon ana um in ahi. Kingon achun Kin thempu in Rev. Tonglet Haokip, President KBC leh Rev. Holkholet Khongsai, Principal TTS ana pang lhon in ahi. Chuleh kingon achun Rev. T. Lunkim, Administrative Secretary, KCC, Dr. Hawlngam haokip, President MBC, Rev. Prime Vaiphei President, All Manipur Christian Organisation le hou lamkai phabep hiche nachung chon’a Letpao Haokip MLA, Thangzalam Haokip MLA, Tongpao Mate MDC, Hatlhing Doungel, MDC le Chinneivah Haokip, MDC hon jong pan anala uvin ahi. Chuleh KIM le abahkai CSO jousen jong pan anala uvin ahi.

Hiche toh lhon’a Pathen houna lam’a KUGAA le KNT hon phat ana makai uvin chuleh kingon chu session 2 in ana kihom khen in ahi. Session 2 na’a chun nam sung’a MLAs, MDCs  hung kikhom akon Minister Letpao Haokip, Hill Area Chairman Thangzalam Haokip le Tongpao Mate Hon’ble Vice Chairman ADC Chandel hon jong hoilim naleh taona ngaichat anaphongdoh cheh uvin ahi.

Kum lhinglou khat kisuhset nachung’a Police hon bol ding lom abol lou jeh’a mipi lungsao

Imphal, Jan 11(ET): Numei chapang kum 8 khat kisuhset nachung’a Police hon mona neipa amat lou jeh in Borayangbi Thoubal Leikai mipi ten mona neipa inn anabulu uvin chuleh Police in agan nathei pen’a amat ding uleh daan dungjui’a mona neipa gotna apeh ding uvin kiphinna ananei uvin ahi.

Mipi tamtah in meivah choipum in mona neipa Abdul Keiyum inn anabulu vang uvin a inn ho vang anasuhset peh pouvin ahi. Hetthei khat chu Abdul Keiyum hi ji (married) khat jong ahi in ahin achesa Jan. nisim 9 nikho in numei chapang khat a insung’a anapui lut’a anasuhset ahi.

Hiche toh lhon’a hiche thilsoh chung thu Kumbi Police Station a um hon anajah jah uvin anadel lut uvin mipi kiphin ho anasuthip uvin ahi.

Borayangbi khosung mipi ten aseina’a hiche thilsoh nachung’a Police mona neipa chung’a bol ding’a lom abol lou nachung’a mipi ten lungkimlou vetsah na’a janhi (Jan. 10) nilhah lam’a kiphinna anakinei ahi ati.

Delhi Dawrka a Manipur Bhawan thah kihong vah ding ahitai tia CM Biren in asei

Imphal, Jan 11 (ET): Tuni a CM Bungalow Durbah hall a Sub-title winner Mr. India leh Mr. Asia 2019 Kshetrimayum Bhakta Kumar lemna kin anei jou uva CM in thuso miho heng a aseina achun Delhi a Manipur gammi ho kijen ding a ache phat ule umna ding kitup neilou ho ding a boina lentah aso jing akigelkhoh toh lhon a Delhi Dwarka a lupna 20 umtheina Manipur Bhawan thah Dk. Crore 150 lut a kisa vah ding ahitai ahi.

Tuni a lemna kin kibolpeh Bhakta Kumar hi ‘Pride of Nation’ award chu GoI in ningkum December 15 nikho a chu apeh uh ahitai. CM in Manipur gammi hon lam chuom chuom a gamsung minthan nading ahin pohlut jing uh akipapi thujong aphong in ahi.

Masanglai apat ana um Khwairamband bazaar a Thong Nambonbi achimlhah jong Archaeological Survey of India (ASI) hotoh akihou mat jing in chule kisempha ding ahi in hiche tobang gamsung manlul tah a anei ho hi kiveng bit jing ding ahi tin CM pan asei in ahi.

Standarth Robarth School ‘Ban’ kikoi lahdoh dinga toumun kiphinna um

IMPHAL, Jan 11 (ET): Standard Robarth Higher Secondary School, Canchipur a simlai ho nu le pa teho chule staff hon Saturday nikhon school chunga thingnoi kiloikhom hon ‘ban’ akoiyu alahdoh diu thumna a school mun a kiphinna abol uvin ahi.

Kum masa June nisim 18 nikho a Standard Robarth Higher Secondary School Canchipur a hostel room sunga simlai Ningthoujam Babysana Chanu ginmo umtah a athisa akimudoh jouva KCP (People’s War Group) thingnoimi hon school ‘Ban’ abol uva chule nu le pa chule guardian hon school a kon achate ho alahdoh uva, alha sunga school danga asol diuva thuso jong aneiyu ahi.

‘Ban’ kilahdoh ding thumna a kiphinna abol nauva school a assistant teacher hi a A.Kedarnath in kiphinna kibol hi koima ahilouleh group douna a kibol ahipon, achesa 1994 kum a kon simlai pha tamtah kisemdoh na school akihon kit theina dinga ngehna kineina ahi, tin thuso miho henga aseiyin ahi.

Ngangbam Robert inn a bomb anasupoh

Imphal, Jan 11(ET): Imphal khopi hopsung Chingamathak mun’a Ngangbam Robert cheng na inn mun’a melhet lou miphabep in jan lam nidan 10:00 vel in bomb anasupoh uvin ahin koima vang nakisukha pon ahi. Ahin tuchan in Police hon jong koi khut nung hi ding hi ahedoh naipon ahi.

Hiche toh kilhon’a hiche thilsoh nachung’a Sinjamei Chingamathak mun’a mipi tamtah in bomb kisupoh deilou vetsah na in toumun kiphinna ananei uvin ahi. Chuleh maban’a hitobang thilsoh aum kit lou nading in ngehna jong ananei uvin ahi.