By election boldoh dia dei le deimo loi (Power le Ju du...

By election boldoh dia dei le deimo loi (Power le Ju du hon ipi corona gel loudi)

37
0
SHARE

Aug 24 Editorial

By election boldoh dia dei le deimo loi
(Power le Ju du hon ipi corona gel loudi)

Koiman MLA by-election hiche lha, hiche nikho leh boldi ahitai ti aphondoh loulai vanga mipi kiloikhomna holeh hetna neiloi phabep hon tu natna hise dinmun khoh pet tah a MLA by-election boldi kiti hi ahilou behdi khat kisei ahiti saosao taove. HERICOUN kiti phaicham civil mi kiloikhomna hon tu dinmun’a election boldi ti thua pha asahlounao thu anasei masapen’un, chuin chihna thepna nei loi khat hon jong aban ahinseibe uve. Eiho gam’a election kiti hi mipi ahonhon’a kitit khomna, nehkhom donkhom, mipi kikhop ho bolna ahijehn in  ipi social distancing tihola umthei loudi, natna kithejalna phatah hidi ahi atiuve. Govt nin jui ding SOP jatjat sei jongleh changvai lah a jun kitha to thakhat chet ahidi hetsa ahi. Tu dinmun’a bazaar, dukan ho jeng jong angaija kihong theilou lai, mi tam umkhomna school jong kihong loulai, Christian ho dia houin kikhop jong umloulai, Bus, taxi, leh mipo gari (passenger gari) dangdang jong angaija lhailoulai ahi. Hitobang dinmun’a MLA election boldi kiti chu vote lhah ni (polling day) bou election hilevang polling booth hoa mi them khat khatna oltah a bol’a social distancing hojong jui thei hidi ahi. Ahin by-election ahijeh a polling station khatna vote hengdi mi jong hung kivatlou maithei, vote hengdi ho kikaito, kinotona ho gei hung um thei ahitoh, nehkhom donkhomna holeh campaign bolna a mipi kikhopna hoa kon natna hise kithejal di vang hi seilouva hetsa khat hidi ahi. Judon atam jeh a natna hi kihathejal ahi tia jujoh, juhon hojong hung kihabol chah laitah ahi. Election laileh ju hi neng dehset, jukham hon ipi corona ipi natna gelpha louva moh ngol lentho diloi jong hung dim nalai thei ahi.
Tuchung MLA term ajat chombehna hi term kichai kah a MLA Seat 13 langjen a-on (vacant) tah jeh a by-election jong nasa thou di ahi. Ruling party lah a BJP honvang akintheipen’in kiboldoh loile atidiu hetsa ahi. Constitution dung juija MLA by election hi lha 6 “sunga” boldi ti ahi. Seat 13 hi khatveija abon’a ong ahipon April langa kipat August lhakim gei themkhat khatna hung ong ahijeh a abon’a by-election hi bolkhom tei di tina ahi. “Lha 6 sung’a” kiti bou ahijeh in lha 6 lhin ngadoh khel kheldi tina jong umlou ahijeh a tua BJP hohin akinthei pen’a boldoh a BJP hulteh govt semjou kham MLA neidi ti hi atup adei u ahidi jong hetsa ahi. Hiche jeh a MLA phabep party danga kon BJP a chomlut ho BJP ticket pehdi thu akichieh chiehleh by election boldoh loidi ti hidi ahi. Election Commission nin phante ahinti ti leh by-election umjeng di ahi. Ahin Election Commission jong hi Independent Body khat ahivanga Centre a Ruling party in tu hi abol phat ahitai ti khat jong anga di ahi. Corona jeh in election kivochon theile ti hi vannoi leiset gam chomchom’a jong um ahi. America (US) president election jong tu ahunglhung ding November lha a um di ahitan President Donald Trump leh atoson ho adinmun u hoilou jeh a election hi kivochon theileh atiu ahi. Hoilai gam hileh aban kaidi kinem behlou hon election kivochon henlang akikai kitlou jongleh chomkhat beh vaipo’n kipanbe nalaileh ti adei sohkei u ahi. Manipur a hi by-election bou ahijeh a BJP hohin corona umle umhihleh koi vohchon malah kiboldoh loile atidiu ahi.