British ten “Rebel Leader” tia aminsah’u (L) Enjakhup Kholhou kum 145 lhinna...

British ten “Rebel Leader” tia aminsah’u (L) Enjakhup Kholhou kum 145 lhinna Innsung miten loppehna kingon neipeh u

330
0
SHARE

British ten “Rebel Leader” tia aminsah’u (L) Enjakhup Kholhou kum 145 lhinna Innsung miten loppehna kingon neipeh u

B. Lalboi Gangte

Ccpur, Aug 14 (ET): Vannoi’a gal-len khat’a kihe 1917-1919 phatsung’a mikang (British) hon Kuki Haosa gal-hang ho Kuki te Jalen tah’a anachen nao gamsung leh ana zalen nao huhbit nading’a British te vaipoh nanoi’a umding noplou jeh’a lungkhat thakhat’a pang khom’a hangsan tah’a kum thum sung British ho gal ana kisat nao’a gal lamkai pipu (Commander-in-Chief) anahi (L) Enjakhup Kholhou apenkal Kum 145 lhinna innsung mite hon tunin Jolzam khopi mun’a kingon ananei uvin ahi. Hiche kingon achun (L) Enjakhup Kholhou geldoh naleh janan minutes 1 thip cheh in ana um uvin chuleh (L) Enjakhup Kholhou hi 14 August 1874 kum’a peng ahi in  26 October 1921 nikho’a ahinkho anabei toh lhon’a alongdamsa Thenjol mun’a anakivui in ahi. Kingon kimanchah naphat sung in Enjakhup Kholhou Mounu Kimkhoneng in amahet dol-leh ana mudol thusim ho phondoh na ananei naban’a tule chate, insung miho ding in maicham asem in chulhe maicham lhandoh naleh taona chu Pastor. Lamcha in ananei in ahi.

Hiche kingon’a Ajang Khongsai President Khongsai Inpi-GHQ in (L) Enjakhup Kholhou thusim aseina’a Enjakhup Kholhou hi Thenjol Kho (Naga -Hills) Haosa (L) Sonhel Tupa Tonghel Lhoumang chapa 4 lah’a ani chan na ahin amahi 14 August 1874 kum in achen nao Thenjol, Naga Hills mun in anapeng in ahi. July nisim 19,1910 kum in 3rd Assam Rifles a analut in ahi. Assam Rifles apanlai chun lhani ding suty  ahung in chulai phat chun Vannoi Gal-len khat (1917-1919) ahitoh akitoh phat chun ki nung le ta louvin ana um in ahi. Hiche lai phat chu Kuki te jong Sapkang tetoh kidou’a aum jinglai tah ahi jeh chun Kiljong (Zampipa) lamkai nan Kuki Haosa len hon Sepai pangsa ahi jeh chun gal boldan ahet ding jeh chun galkap ding dan training pe thei in te tin Kuki Sepai ja lamkai din anatem uvin ahi. Hijeh chun Enjakhup chu gal lamkai ja pansah ding anati uvin ahi. Kuki Haosa hon ama chu Chongjang kho’a anakou uvin anajol uvin hiche achun “Nangma sorkar sepoy umdol aboncha hethemsa nahi jeh chun British Sorkar hi itin lou ule Ipu Ipa gam leiset isopi i-u inaovu tampi in achan lo ding’a aum tan hijeh chun nang in jong galbol na lampang’a gal lamkai pipu (Commander-in-chief) hina ponlang chule mipi lam’a thanei vaihom (High -Command-in Chief) chu Laijangpa Tintong Haokip pang hen tin anakihoupi uvin ahi. Enjakhup in “Kanu le Kapa dong un lang anop lhon le pang nange” tin ana donbut in hitoh kilhon’a anu le apan ijem tia thina man na anei le Sel in kosa inting, amitchang din Khi le Alukhap din Dahpi toh tompon in Saipikhup in hin tom nao ving’e tin anakitem lhon in ahi. Akihou lhah nao bang in Jampi Khopi chu anajon uvin, Jampi achun Feb. nisim15, 1917 nichun Jampipa Khotinthang (Kilkhong) Sitlhou leitol in Sielchal khat atha uvin kihahsel nan sathing salung nen Anglo-Kuki War1917-1919 kiti pat in ana um in ahi. 1917-1919 galpi hi Kuki te chenna gam jouse tulai’a North-East India ti’a ihet’u gamsung le lhum gamkai Burma gamsung phabep’a British te ana dou uvin gal anasat pan tauvin ahi. Kuki ten British te anadou hi Gal-len Khat ahi tah jeh in Gallen khat’a galsat te Namkhat’a hung kisimtha ahitai ati. Kum thum (1917-1919) hiti’a akidoupi jou uvin British ten Kukite hi athu uva anun lou jeh un Haosa Gal-hang jouse ana man un, abang Burma Homalin Songkul’a anahen uvin, abang Sadiya twikol’a Kuki Haosa 24 lam gotna anape uvin, adang Haosa len 12 ho Sodiya Twikol’a ana kaimang lah uvah Enjakhup Kholhou jong hi anapang in ahi. Hiche laiphat achun Kuki hobang’a British ho anadou le anasat ngam koima ana umpon, Kuki ho hiti’a British ho kum 3 sung anakisat pi uchu British ten Anglo-Kuki Rebellion (1917- 1919) tin anamin vo uvin ahi.

Aman aseibe na’a Kimkhoneng Enjakhup Kholhou mou-nu in chapa laigil ga anei masatpen Seikhongam hi tuni chan’a adam nalai in ahi. Enjakhup in Nam le gam ding’a lamkai thu anit’a abukong dalha’a Nam natong’a kipedoh khat ahi nachung’a lhalo phate cha’a sang’a atoh mun akipat kaisang’a atoh na’a mija umtah khat anahi in ahi. British ho sat nading’a hem le thal kap ding’a training peding ngaichat ahi jeh chun Haosa Len thum hon Jubel choi in ana thum uvin ahi. Aman kingellhah na aneihi ama changval leh aji achate phatchom nading’a ngel lha hilou’a Kuki Nampi leh gam le go chuleh Kuki te Zalenna kivaihop na sukeh ding ting ding’a kipedoh’a 1917-1919 kum thum sung gaalpi len chu ana ting ahi.

Hiche toh lhon’a Solet Lhungdim, Kumpi-pa in houlimna aneina’a Enjakhup Kholhou hi itobang miham iti leh Khonung ding thu geldoh thei mi ahi in chuleh Kuki Nam mite khonung di khohsah lou ana hile ana pang lou ding ahi. Aman Kuki Nam adia ipi eidal lhah peh uvem tihi eiho kigel doh phat ahi tai ati. Chuleh hiche kimanchah na phatsung in Paozangam Haokip Vice President KKL-GHQ, Haopu Haokip, President KSO-CCpur, H.haopu Khongsai, Chieg of Joljam, Mungpu Lenzo, President Khongsai Inpi-CCpur, Jamkhomang Khongsai, President KHSO-CCpur, Khailam Haokip, Secretary Jolzam VA, Letminthang Khongsai, KHYU hon jong houlim na ananei uvin ahi.

Alangkhat’a Enjakhup Kholhou het jing nading in Jolzam kho mun’a Memorial Park kisem peh na’a ama limlah Statue kitung jong September lha sung’a hondoh hi ding ahi tin Committee in tahlang na ananei uvin ahi.