Bolthu kikhailih hung kiti kit (Police in ajeplih kitia JAC kisemlou)

Bolthu kikhailih hung kiti kit (Police in ajeplih kitia JAC kisemlou)

431
0
SHARE

Bolthu kikhailih hung kiti kit

(Police in ajeplih kitia JAC kisemlou)

                                  Singat Police hon mi khat ginmo thua amat uva ajepnalam uva thina chan atoloi kitina’a JAC kisemlou hi Manipur a dia akidangloi hidi ahi. Hiche hi thinglhangpa chondan Custom thua kihouna leh kihet them tona umjeh jong hidi ahin vangset umtah thilsoh ahivang’a kihet them tona khat umthei hi thilpha tah ahi. Chuleh Civil kiloikhomna lamkai ho kihapei jeh a chi le nam (communal) thua chelouva hitobang kihou lhahna khat hung umdoh jong hidi ahi. Hiche thilsoh a chu achesa August 31 jinkah matah a Singat Police Station a kon Sub Inspector khat leh Assistant Sub Inspector khat nin Singat Vengnuam a kon Ginlam Munluo kiti pasal khat khamnathei (kaani) a kivei nahi tia ngohna neija agamat lhon’a Police Station a ajep un akiseije. Matna umpa chu akilep ham, atah asei ham, khamnathei ah kakiveipoi atileh police hon thutah aseidohna dia ajep u ahi akitie. Jingvai lang’in police station a kon akimanpa chu anajamdoh e jong akiti kitnin holmoa aumjou ajing jingkah a khopam’a Nepali ho bongbuh khatna ana kikhailih a kisei ahi. Ajamdoh mong ahidem, ahilouleh police ho maman ajeplih phat uva apohdoh uva bongbuh khatna chu akikhailih dan’a abol uham ti hi ahi. Akikhailih chu kikhaidi ahin amapa hi khaova alol kikhi vang’a atouva mudoh hikit ahi. Akivo akitha nung’a akikhailih tobang’a kikoi ahi kiti hi phaicham miho lah a aha um jeh a thinglhang lang’a hon jong mi bolbol ahinthopat u hitaleh kilomthim ahi. Nupi hon Singat Police station aga delkhum uva Ginlam gaman teni alemat uva athipa (Ginlam) inlang’a apui uva alunghanau aseikhum uva ahouset u chu miman le mivolih a ki ngoh Police teni jong kiphalam le kisih tah a mitlhi akitheh lhon’e akitie. Phaigam miho lah hileh hitobang mivolih a ki ngoh Police teni chu mipi hon amatkhahleh malchame a anei diu ahin themmona nei tenin jong “kathem moi” tia ngaidam athumlhon keu hilouva kiphalam leh nommo satah a aumlhon jeh a mipi lunghanna jong phajep hidi ahi. Kivolih mong hen tia avoh lhon ahiloudi hetsa ahi. Ginlam Munluo chu amale ama anakikhailih ahijongleh police hon amatna ajepjou u ahin jum le jachat jeh a kikhailih tahbah ahijongleh police ho thepmona khat um thou thou ahi.

            Alangkhatna, Police Custody a akivolih e kiti ho hihen, mipi hon bolkhel khat nei mi khat amat uva ajeplih jiu hi thadi, jeplihdi mong atiu hijilou ahi. Kijepdan jong um ahijeh in anasalai jepkhah loudi ti hi police ahia, thingnoi ho ahia, mipi ho ahia ahelou tam jeh a kijeplihlo tam ahi. Khutsoi, khutkhel jeh a Police Custody a kijeplih kha ho akikhailih dan’a akikoiji e kiti anakiseiji chu Civil mi hon jong ahinjui uva amale ama akikhailih e kiti jouse akivohlih, akitha jouva akikhailih tobang’a kikoija hung kihasei ahitai. Ahin hoilai hileh amale ama kikhailih kiti jong um mama ahi. Churachanpur police hon thilpha tahtah aboldoh u hung kiseipan chu tukahlah thilsoh khat le ni thu ah minsetna ahinnei u hi district police pumpi minphatna asuhkhah ahi. Ni phabep masang’a jong chu jan nidan 10 lang’a Churachanpur police station a kon mi 2 Civil dress a anapotdoh lhon’a mito gakina lhon’a service pistol gei analha ahi. Singat a police teni jong hi Civil dress a Ginlam hi ain’a kon agapuidoh lhon’a kisei ahi. Khamnatheija a kiveila tam, anela tam, sumholna’a nei police la tamkit hi imajouse boina ahi.