Bol di leh sei di dol chieh-a kisahlel di

Bol di leh sei di dol chieh-a kisahlel di

237
0
SHARE

Civil lang’a kiloikhomna kiti phot hi aseidi leh aboldidol kichiehsel um’a kiphutdoh ngensen ahivang’in adon achanglou, akisahlel lounadi hoa ahung kisahlel teng buoiji ahi. Muntin’a Student kiloikhomna hojong Student ho ‘welfare’ lang sang’a politics lang’a kiha sahlel gam ahi. Hiche hi political party hon amaho phatchomna dia student ho amanchahji jeh u ahi. Manipur’a Kangleipak Students’ Association (KSA) hojong hi Student kiloikhomna dandang bang’a lekhasim lang leh Student ho phatchomna dia akisahlelnau kihedoh louva Imphal khopi sung’a kol le vai ho  dukan bol hon chi (salt) toh thilthenglou ahal uve tia dukan bol ho ana bulu nalam uva police in alamkai ho anamat ahi. Dukan hoa nehding chah ding thil kijuoh ho thil thienglou to kihal le kihallou khuolna neidi hi Consumer Club, Health Department leh police ho ham hidi, thepmona nei ho chung’a gotna peding chu government hidi ahi. Tua KSA Volunteer ho thilbol chu ILP thua kiphinna to kimatna um, gampam’a kon kol le vai ‘business’ bolho chung’a engsetna joh ahi. Sumtuong deina’a thil thienglou toh nehding thil chohpol ‘business’ bol ho moh vetdi tina ahidehpon, mi hohin ama ama kisahlelpi dol kisahlelpi chieh hen tina joh ahi. Thil thienglou toh nehding kihal nehkhah jeh-a dammo lo, hospital lhunlo leh athilo um hi henlang hitobang thil kijuohna dukan ho kibulu hilevang thu khat ahi. KSA Volunteer ho chaloh dihlou jeh in police in alamkai ho amatphatnin lhadoh ahina diuva kiphinna achuombeh-a hung umdoh kit ahi. KSA in alamkai ho kimat lhadoh ahilou jeh-a  ni 2 Bandh ahinkou tah in Dy CM Gaikhangam in kilhadohdi ahi tin anaseitan ahileh bandh chu ana kivohai tai. Tun akiman ho lhadoh ahitan thil thienglou to thilthieng kihal le kihallou thu umkitlou ahitai. Bandh le Blockade hojeh-a thilman avum aval’a akal teng Student kiloikhomna hon dukan hoa thilman akhuoljiu bang khu mipi jong alunglhai jia Student ho pachatna jong apiehji ahi. Ahin tuchung KSA volunteer ho kol le vai dukan bolho chung’a  achalohnau vang konjong a-oidehpouve.
`Bill 3 pass hung kibol’a pat boina kichaitheilou thua jong hi kiloikhomna jatjat hung kiphutdoh-a Bill 3 thu to akimatna jong umlou ho pouva thu sei, akisalel umdohji ahi. Thil khat jeh-a boina aumleh thubuoi bou kichieh-a seiya kisahlelpidi ahin gamtin gamtang to kichopolji jeh-a akisulhampen umlouva kiban notji ahi. Bill 3 thu jong akimatpina di umlouhel MLA election hopou to kikanbeh go; gamtum, kivaipohna tum, adangdang gamtin gamtang to kikaimat gojia abuoipen thu not-thapma umlodi ahi. Seididol leh kisahlelpi dol chieh bou mijousen kibuoipileh buoina lhomdi ahi.