Boina thah thah pengdoh jing: Mun chom chom’a gari 5 mei’a kihal;...

Boina thah thah pengdoh jing: Mun chom chom’a gari 5 mei’a kihal; UNC toson leh phaicham’a um CSO kikah’a boina umjing

163
0
SHARE

Imphal, Dec 19: UNC in National Highway’a economic blockade abol jeh leh UNC in phaicham mun chom chom’a counter blockade abol jeh’in gamsung aboi jing nalaiyin, mun chom chom mun thum’a gari kihal na thilsoh aumkit in ahi.
Thulhut dungjuiya Imphal khopi jon’a hung gari ni- Bolero (regd no MN01K 5285) leh Swift car khat counter blockade bol hiding’a ginmo mel hetlou hon Lamlai Police station noiya um Seijang munvel’a asuse uvin, jingkah nidan 4.30 don in meiyin ahal uvin ahi. Sunday nikho’a jong Ukhrul jon’a che gari holeh police gari panna’a counter blockade toson hon agom’a gari 22 asuhset-u ahi’in, Imphal-Ukhrul lamlen’a meiya ahal-u ahi.
Thilso namun’a um thuso mihon Bolero leh Swift gari meiyin akah chaisoh amu in, gari teni hi Ukhrul’a kon Imphal lam’a hung ahi’in, asung’a tou ho akailhah jou uva melhetlou counter blockade bol toson hiding’a ginmo hon meiya ahal-u ahi.
Alangkhat’a, UNC volunteer hon thilsoh chom khat’a gari thum meiyin ahal uvin ahi. Thilsoh masa hi Tadubi munvel ahi’in, thulhut kimu dungjuiya thih (iron) kipohna truck khat UNC volunteer hon jan’a meiya ahal-u ahi. Phat chomkhat jouva passenger bus (regd no MN 01 1668) leh Tata Sumo (MN05A 5481) teni hi Taphou leh Senapati kikah’a meiya kihal kit ahi. Senapati’a gari akihal’e, ti thu akithan jouva Sekmai munvel’a mi tamtah lamlen’a kikhom uva gari’a thinglhangmi atou um em, ti kholna anei uvin, ahin, thulhut kimu chan in thilse soh ima aumpoi.