Boina loudi khatna kiboina (Sports University mun min leh Airport min)

Boina loudi khatna kiboina (Sports University mun min leh Airport min)

252
0
SHARE

Boina loudi khatna kiboina
(Sports University mun min leh Airport min)
                Gam min khat ham, mun khat min hamkhat thua kiboina hohi adon achanglou ngensen ahi henasa’a kiboina umjing hi asunglang’a akiseidohlou ipiham khat kijeji jeh ahi. Manipur a National Sports University (NSU) koidi ana kitia pat amun thua kiboina ana um’a tua amun di ahung kicheh jouva hi agam le amun min thua kiboina hung umdoh kit ahi. Amasa’a chu NSU hi Thoubal lang’a koidi anatiuleh phailei mun khat ahijeh a apamaijin loubolna theilou thinglhang gamgolai hoa jong koithei ahi tiloi ana um ahi. Thoubal phaicham chin’a thinglhang phailei bolthei louna akitileh ana kidoi chu phaicham chin’a thinglhangmi ho gam Maring ho kho khat gam anahi. Phailei jaova ahidi jongleg Compensation sum tamtah seidi ti si-al lungthim ana umkit ahi. Amun di thua kiboina ana umjeh a phaicham chin, Imphal khopi toh kinai dang khat ahung kiholleh tua Imphal West leh Kangpokpi district gamgia Haraothel/Koutruk ho gam’a NSU sahdi ti hung umdohlo anahi. Hiche lai, hiche lhang hi phaichammi holeh thinglhangmi ho gamgi thua kiboina adondon’a umjing ahijeh a kiboina umlouhelna akichehsel mun khatna NSU hi koimo, sahmo hilouhel ahi. Tua hi Union Sports Minister (MoS) Kirren Rijiju in NSU sahna di mun min hi Koutruk tia ahung suhdet ham, thusomi hon ajih jeh uham, State govt nin NSU kisahnadi hi Koutruk mun ahi tia abol mong ham akihetapon hinlah KSO Sadar Hills in Haraothel gam ahijeh in NSU umnadi mun jong Haraothel kitijodi ahi tia pang kit u ahi.
      Compensation chu ainmun aloumun atohkhah khahna ho alet aneo dung juija govt nin apehle kichai jeng thei hilou ham ti hi ahi. Kangpokpi jaona’a Kukite chenna khopidom ho bon meilhei pao min ngen hithou ahi. Haraothel leh Koutruk gam atohkhah gel ahileh NSU, Haraothel/Koutruk tijeng thei jong hi, NSU Manipur itijongleh kichai jeng thei hinalai ahi. Compensation (gam man sum) thua kiboina ngen ahiji jeh a Rail lampi kisem jong machal theilouhel ahin tua NSU mun min thua jong hin natoh machalmona khat hung hiding’in akimui.  Thinglhang district gam phaigam district sung ahi tia politics kibolna khat ahilevang Koutruk gam’a NSU umdi kiti hi ajahda loi jong oimo thei ahipoi.
Manipur hi chi le nam chom chom chenna ahijeh a thunei vaipo hojong hin boina theileh midang khat nin ajahda di ho abolda a phajengdi khat ahi. Imphal Tulihal Airport tia kiminvo jong amun min ahileh kichai jeng khat chu ‘Bir Tikendrajit’ (BT) Airport tia hung kikhel kit ahi. Manipur pumpia Bir Tikendrajit bou Manipur gal hang leh Manipur gam dia ahinkho anatohdoh dan’a BT Road kiti jong umta a tua gamdang mi ho bolbol kabol’e kitidan’a BT Airport hung kiti kit hin nam khat, pao khat tho meilhei te bou kidopsangna leh midang huoploudan avetsah jeng ahi. Kolkata Airport chu Subhas Chnadra Bose Airport akisahleh Subhas Chandra Bose chu India pumpi dia jalen galsat khat anahijeh a kilommolouhel ahi. Gauhati International Airport jong Assamese ho min khat – Gopinath Bordoloi Airport hung kisah jeh a Imphal Airport jong International Airport ahung hileh BT airport sahdi ti hung hidohdan ahitan adon achang louva kiboina leh kinelna khat hung hidoh kit ahi.