Boina holbe loudi kitonadi holbedi (Aug 30, 2016)

Boina holbe loudi kitonadi holbedi (Aug 30, 2016)

220
0
SHARE

Boina tamjo hi acham’a hung hilouvin mihem ho lungthim’a kon joh ahibouve ti mutheina hi tutu’a State pumpi tongkha boina police ‘recruitment’ thu leh “anti-tribal bill” thu ahi. Police recruitment hi aumsehleh lunglhailou jeh a ‘complain’ bol umtei teiji, ahia dihtahen dihtahihleh akibollhah-a ‘result’ akiphondoh photleh koiman ima aseilou, boinagun jong umlou ahi. Ahin tuchung 2013 police constable recruitment thu vanghi jatchuom beh ahung hidohgo chehcheh in angaikhoh lou beh-a gamsung boina lentah hungsolo nathei khat nin aumdoh e. Hiche thua akiphinloi umphatna govt (Chief Minister) in ipi lodi nati am tia thuso mihon adohnau a chun “hitobang kiphinna (strike, bandh, blockade) hohi umjing mong ahi” atibepme. Kikihouvintin aseilhapna khat vang hin kibolnante beh anatileh kilom ahi. Chuche malah akiphuong bang’a hiche recruitment hi pakeng laam hileh athahbeh-a abul’a kipan kitdia govt lang’a kon kiguonna aumjing’e. Recruitment Chairman jong akikheltan velbol kit dia thilguon aumvang’in abul’a pat kipat kitdi nikho masapen’a hi ipi hungsoh diham akihepoi. Hiche kahlah hin Senapati district lang’a Candidate holeh a-insung miten lunglhailou vetsahnan ni 2 bandh abol u akichaijin, August 30 kah-a velbolkitdi thu akilahdoh louleh kiphinna khohcheh boldi, hichea chu State govt gari kitiphot Senapati district sung’a lhaisah loudi ti jong aum’e. Chandel district a Candidate holeh a-insung miten velbolkit dia kisei akinunglahdoh louleh Chandel district a phat teplou bandh boldin kilolna anei uve. Churachanpur district a mipi leh Student kiloikhomna thupidom jousen hiche recruitment velbolkitdi kiti hi anoplounau aseisoh kei uve. Bishnupur District a hon Recruitment kichaisa ‘cancel’ kibolna thua Court a Public Interest Litigation (PIL) boldi atiuve. Imphal east hon jong hiche recruitment chelhahna lou din 30 August ni’n bandh akou tauve.

Churachanpur JAC-AATB honjong ILP tobang Bill thah kiti phot kipomloudi ahi ati’n, alangkhatna phaigam mi –JCILPS hon ILP tobang Bill khat pass akibolkitna akichesah tokah-a kiphinna kiboljingdi ahi atikit uve. Alang lang’a kibangchet ti thei ahi. Kihoutroh-a alang lang’a kinoptona thei Bill khat jih (draft) bolkhom mojong hilouhel ahi. Anti-Tribal Bill kiti thua ipi atileh Tribal ho kikah jeng’a pankhomna umlou hitam, abul’a chubang’a anapangkhom hokah-a jong tulang’a kikhentelna umdoh ham ti jong hi nuijat umkhat hi, tribal ho kikah jeng’a kiningsuhna um, kitodohna malah kitomo kiholbena khat ahidoh e. KSO leh HSA (Hmar) CCpur JAC-AATB akon’a akikangse jouva Thadou kiloikhomna langhon pan ahalah ujong hi kitomona muthei ahi. ILP thua phaicham mi ho Centre govt kom’a kiphin ahiuvin; Bill thua Tribal ho State govt kom’a kiphin u; thinglhang le phaicham mi agom’a State govt kom’a akiphinnau chu 2013 police recruitment thu ahidoh-e. Govt leh mipi kiloikhomna lamkai jouse hin thudih leh kitonadi gel phot phot leh ajeje umdi ahi.