Boina chunga boina (Party a kon chomdoh MLA ho Election tetsah...

Boina chunga boina (Party a kon chomdoh MLA ho Election tetsah kitloudi ti)

642
0
SHARE

Boina chunga boina

(Party a kon chomdoh MLA ho Election tetsah kitloudi ti)

                                  Mijouse chunga sohji hihih jongleh mihem in boina khat ato teng aban jong umbe, meilhei ho paochamtuh a “arumba/alumba mathakta mairen happa” (pohgih chung’a kikoibe) kiti hi India politics a Congress ho chung’a chu (soh) tididan ahi. Tukum Lok Sabha election a Congress ho ahatmo uva kon President Rahul Gandhi in haina lekha ahinpeh a lamkai thua akisuh chehchuhlou chung chon’ah Congress ho pohna Kartanaka leh Punjab State govt ah boina alhung’in tugeijin ima seitheilouvin aum’e. Karnataka a hi Congress leh Janata Dal – Secular (JD-S) ho kigom uva govt apohkhom u chu BJP hon phuhlhuh teidi tia apei jeh un Ruling MLA mi 15 lang’in haina lekha apeuve. Amaho  haina lekha chu sanpeh jong hikitlou u, BJP hon Camp a ahenden uva Assembly a atamjo kivetna a dia BJP lang’a pang dia chohdoh a umdan’un akisei kitne. Punjab a Congress lamkai leh MLA Navjot Sidhu injong haina lekha apekitnin hichu Chief minister in asanpeh kit pai ngal’e. Hiche kahlah hin ipile ipi kitohkha kit hitam, Uttar Pradesh a Sonbhadra district ah gam (phailei) thua kiboina khat jeh in khomi ho meithal’a kikap tona ah mi 10 lang athilon ahileh athiho chu Congress mi ahijeh un General Secretary Priyanka Gandhi Vadra jong athiho gavildin analengdoh in ahileh govt nin anahenden kit taove. Hichea Priyanka Gandhi kihen thua lunglhailou vetsahnan muntin’a Congress hon kiphinna anei uto lhon’in Manipur Congress hojong Ex Chief Minister O Ibobi leh Manipur Congress President Gaikhangam lamkaina’n Imphal ah toumun kiphinna aneikit uve. Hichea Congress hon kiphinna abolnauva Ex CM O Ibobi in party khatna kon chomle ho suhthipna dia ana kibol daan ‘Anti Defection Law ‘ hi semphatna achomle hohi ni 2 sung’a MLA ahina lahdoh di (disqualify) chuleh Election atet thei kitlou dia daan semphatdi tin aseije. Hiche hi O Ibobi in adeidan asei thu bou ahin koiman ima a agelloudi jong tahsan umtah ahibouve. Tu tua thunei vaipo hi BJP ho ahijeh un hitobang daan sem malah koikoi Congress a kon akichopdoh sahbe theijin itileh Congress party hi akithaimit theidem ti kichepi bang jeng ahi.

            Karnataka lang’a Congress a kon chomdoh MLA ho mi khatna dangka Crore 50 cheh kipe (kicho) in akiseijin, Congress lang hon sum hijat jatna MLA akichohna a hin govt nin GST (Tax) kilahleh govt din sum muna hinte tia enghouna nei tilou abolthei umbehloudan ahitai. Anti Defection Law hi BJP ho maman anasemdoh ahin tua hiche daan hi kijui ham kijuilou ham kihetheilou khopma umdan’a vang kilang thim ahitai. Hiche mutheina chu Manipur jeng’a jong um ahi. Anti Defection Law dungjuija MLA chomle khat ‘disqualify’ bolna dia hi Speaker khutna ki-ngam jeng’a akisei vang’a Ruling party thu thu bou hijengdan’a umkit ahi. Anti Defection Law kichatna jeh a O Ibobi kum 15 detchetna CM touna a anatou ahi. Congress ho mama Centre a ahung hatdoh kit teng uleh hiche daan (Anti defection Law) ahinsemphat ngal lou uleh tutua vang tahsan umlou ahi. Ajeh chu daan kiti hi thuneinamun’a toutou hon amaho phatchomna dia amanjiu ahi hi Congress honjong ahet uleh asei u ahi.

SHARE
Previous articleThusoh chom chom
Next articleThusoh chom chom
Editor at Eimi Times.