Blankfire #5

Blankfire #5

351
0
SHARE

(Note: Blankfire a sodi hinthot jihon ahitheichanna khat changtum/party tum gotna hilou society lhangpia kapna bou akideiye, Na min le umna jong akisoloudi vanga nahin pehtha ngai ahi. –Ed.)

  1. Masanglai in kungfu kithepsah athohlo e anakitin tukhang hi achomte kichoia kithingnoi kiboltheisah athohlo-e kiti khang ahitai. I insung leh ileitol’a I umchan kholaia ipohdoh leh ei tobang chet bolthei umji ahijeh a vannoi boi ahitai. Thingnoi hilou khatjong akithingnoisah thei leh atah ho itida di ham. Ahin mijouse thingnoi le thingnoi kihisah ngen ahikit phaat hin akikichato ding aumkit tapoi.
  2.  

  3. Anchang manbai jin akihom’e ahin vote manlutah chohna dia kihom ahie. Min phatna dia kijoh ahi. Election hungnaita a le govt in hitabang vaicha genthei ho din anchang maibaitah tah in ajoh e titheina dia kibol ahi adoh tettut e. aphaatseh niseh ahiloutah jong leh haptaseh a hiti hi kumlhung lhalhung’a kiboljomdi hile vang nangbou nahi tithei ahi. Ahin akinemang lah-a jakhat lah a khat beh hitia kihom hileh phadi, hijong chum oh a hilou, aman um’a kihom hinalai vo henu damsel inge.
  4.  

  5. Eimi news nanah chu inopnop tahdohnading notice board bou ahi, kikhopna ding meeting notice ho sapna ding leh delhi gachena ho tahlangna di ahin thuso hetdinga khoh ho aumteng sappao thuso dimsetna khu ibola ba eimi thuso a kipe khohten diham. Tukal hiche ihinso peh un hung kititeng kim ham kimlou thu ham inpi ham buhpi thu ham kihenaven. Midang news a asoman peh a advertise gaboldi khat eimi news a manbeiya front page a sodi ti lunggel nei miching tahtah jong aum jeh kinep jong aumlheh e.
  6.  

  7. Ikinaipi isopi iheng ikom ichenkhompi ho sanga midang ichenkhompi louho kin le dong vannoi khompi hoa koudi mong ahi ajeh chu ichenkhompi louho to kikina ngailou kiki vetda ngailou ahi. Gamtum deljong chutima. Ichenkhompi I inheng louheng hoto kihoutoh sanga gampam dang miho toh kihoukhom pankhom dimong ahi. Ihiti tahtah jeh uva hiba kipa jalla khutbeng bengloi um hivehta!
  8.  

  9. Midang to kiboinading aumlou teng ei le ei kah a ikipetolouleh ipiba kiboldi ham, ahin eimite natsahna hi midang to ikigalpet jenga jong eile ei kah a kigaljong khoh kisalou ahi. Face to face a kisento kijotto vang thuchom ahin email dung facebook dunga inop nop seiya khat koma nahat am ikiboldi ham tivang koitapou injong abolthei di ahi. Ahin milungneng le akineosah jojon gal ajo ahi.
  10.  

  11. Mingol jong thip khinkhena aumleh achingto akilouve kiti ahiin khatvei veileh guldu hon bang’a chohjeju a society natgilna amagel danna seilhah a chelhahsahdi tingen hopi aching ham ching lhingjeplou ham ole siki vat a ching ho hidiu baha. Achingpen ahepen’a kigelhojong angolna alhinlelna khat umtei ahi. Midang lunggel jong dih intin kei gel bou dih ahipoi tithei hochu miching hiuvinte. Koima ngoldi nomlou, kichihsah ngen. Kei gelbou adih e tijouse accident a athilouleh meichanga thidi hitaleh kaching hih beh e keigel bou adih naisaipoi tingen hitavehta.
  12.  

  13. Mihem hi apen’a pat chonse sa a hung peng ahi. Hichu pi Eve theiga neh a kon ahijeh in ama ngohdi ahijenge. Ahin mihem lah a kapu kapaten sapkang anadouve tia kiletsah tah nam khat te hi apena pat phung thu changthu sutna a hung chonsesa ahitaove. Mi khat chu ipi phung ham, phung khat sunga ipi phung bah ham ti ihet leh society sunga kiboina thu hoa alunggel leh apanmun hetsa, koi thingnoi kiloikhomna apanpi am tijong hetsa te chu anavahna khat umjeng lou ham, itih tah leh kokhuh a ahung chomlutkha tahbah diuvem tibou dipdap um ahi.
  14.  

  15. Iboljouse nam minpua kibol, kichep golseh kiloikhomna jong nam minpua kibol, nungah heljong nam mina akibol louchabou. Ahin nam min kipu ngala pehlum kichepna a akichem ho ajatbep dehchet goal kipoh vang koijong hoilang kivetsah hen kiti hitam, khat le ni a gol lel chu akilommo poi khat vei nivei gol leljong akhohpoi ahin tamtah a hatmo leh phatseh a jona umkhalou kitivang asunga lhaiho ham apolanga tou le dingle ho ham khat johjoh in angah lou uleh benglam sports club ham hangsai sporting ham kisahjoleo phante.
  16.  

  17. Hoilah Lalu Prasad le aloiho jail banlut uhitam keijong c.b.i. case eikibolkhum in jail akilutkha dem ti MLA minister apat peon gei kihol leltah a imumo loijong Manipur gam ah aumtai ti thuguh akiseiphong letai. Manipur gama govermen paisa nehguh chahguh jeh a case kibol khuma jail lutdi hileh sajiva jail leh tihal jail in adollou dijeh in crore chunglang neho bou case neikham ahin anoilangho ima kiloponte tiloi aumkitin akilhamon loi aume. Lak phabep ho nehmang chu nehguh a kisimlou dan ahi. Heu guh le saipi guh iti kibah diham nehguh jeh a jail lutdi gel hinama jongleh!
  18.  

  19. Chavang Kut ahung naitoh kilhon’a kigot phat ahitai. Iti nakigot’am vang kahepoi. Numei nahim? Pasal nahim?…Nupi nahim?…ahiloule Upa nahim? Koiman nathil bol naboipi nagot heponte.Jinei, dongmanei ahiloule chang’a hinkho mang hijong lechun kicha hih-in koiman nahe phapon te.Kichat ding jong aumpoi. Bolchah ding ahimaiye. Ahin ching theitah toh thoa phatah-a kigel phat vang aphai. I nu-ngah hoitah tah chingtah-tah ho jatdang chung’a amelset phaponte. Gollhang ho jong tidaute, najat le na nam molphou dahen, midang ho mithai hidahen natile tuchung vang phatah-in kigong’in..Sum phaten kikhol’in nungah ho adeideiyu choh peh nading. namdang ho-a kon huhdoh nading ahipoule,bolthei chan bol angaitai.
  20.  

  21. Khaini kokta tamtah akimatna akihalvam vangin ane adu ho alunggim dehpoi, sengvai jukha abel bela akimatna akihalvam vangin ane adon ho alaina dehpoi. Ajeh chu nehphalou donphalou ho ijat kiman henlang ijat kisumang jongleh akisemna muna la kisemda dehlou apole honla pohle da dehlou ajoh honla johda dehlou. Hitobang thimkhatchu kitodi thu akihaseilaisea kitomona leh kibungkhena lampia kimalchal tultul . hou in houbung umbe laisea lhagao thu lhomcheh cheh. Natonglouva vangam ngatho jeng te chu bantho leuhan phangapdi baha!
  22.  

  23. MLA/MDC election teng lebou gam le nam ngailu umjiham kiti inpi election hoadijong gam le nam din na katohnome tia kipedoh atamtan saichang khophat laia lamkaidin nang pang o tia kisomoto khang vang ahitapoi. Hiche hi khantou machalna khat ahi. Ajeh chu jat le nam gam le godia natoh chu eima di natoh leh neh muna jong ahi. Lamkai jouse runner ahidehpoi ajeh chu runner hijong leh kenga lhainadi khang la hitalou bolero leh bike hoa lhai ledibou hita. KNA political party khanga lamkai ho gam le nam dia alhaile nalama aji achaten nehdi helou dehdeh kitivang chu ahitapoi. Ijeh inem itileh tulai ration superfine anchang man abaitan council natong jong atamtai.
  24.  

  25. Na thun them nachanding nathun themo nachanding ahi. Mi seise mi taimo mi ngaimah seiho chu amajong nikhat seiset taimo leh dem ahung hiteng kadah atidi ahimaie. Hijeh chun sopite dema naumlouna diuvin mi dem hih un. Khat le khat kitaimo kidemto kiphinto loujen un nikho phalou go le dai chimpei alhun teng navetda ho chung boua chulouding nangma chunga jong ni satda dehloudi go juhda dehloudi chimpei hon napeldehloudi ahi. Eima lunggel bang chet pi achelhah a mijousen ajui cheh theileh vannoi leiset hi vangam hitahih diham.
  26.  

  27. Thingnoi party thah sembeloudi tina koi dan umdeh aba abanban athah thah kibolbe da diham MLA election a manchah kham ahitahloujong leh MDC election a jong ngaithou ahi. Ichimtokah uva ibolbebe tah hihdioham. Thingnoi party chu gamtum delna di khelkhella ahidehpon. Ahin operation area dihi iti ihung kihop thei tadiuvam ti igel leh lungdonlouthei ahitapoi. Camp iki bankop theile vang aboipoi, anchang choding buhonding belnotding ikihoptohchet pouleh akhohdehkitpoi. Ahin midang namdang le solkal invang gamtum del dihtah leh gam ngailutah chu Kukite ahiuve atidiu hinam athah thah ahiti kisepdohjing piopihi!
  28.  

  29. Ijanmanga sana imuleh ehtum kimu hilou ham. UP Unnao district a lengte kulpi a sanatum laihon ehtum alaidoh teidiu tahsan aume. Hijeh chun janmang a pansa a lottery kichem ho leh nungah helji ho kichih thei maihen. Mang chu mang a lengmang ji ahibouve. Chomkhat tokay amantam e tia tokay business bolhojong hichea kon ahaodoh akihepon chuche malah kachoh a kavah leh kaki vahlih doh in sum tamtah kamang bep e ti atam chu tokay khat chu santum khat ahi tia tahsan hotoh tuchung mang kidang tahsan ho akikhetna umbehlou maithei ahi.
  30.  

  31. MLA Minister ho inehkang gamdiu ahitai, hichi jong chu khonung peh geia dia a umdoh aphachom tundohna hileh khohlou. Sports bol leh function bolna hoa ahamdoh sunin minister MLA ho koma paisa kidong chif guest a kikou hoilai itihkahjong hi politics lung agela ipi sum a pihi gamsung khantouna na atohdiu hitam lungdon aumtai. MDC MLA MP hohi chief guest le guest of honor dia kum 5 kilhengdoh hidan u ahitaove. Amahola thanom thou kit u, development na toh sanga function hoa sane ichelea sum themkhat ipehlele leh navah hijeng. Tuapat mla mdc election ahung umteng kajo channin chief guest le guest of honor functional president ha pangdin na vote manlutah neipen tia campaign bolje aakithepchuh ngai ahitauve.
  32.  

  33. Inam sung ah lhagao langa khantou machalna nasatah aumpantai. Ijeh inem itileh thingnoi holah a imelma ngaidam di tiloi toh bible crusade bol loitoh houin sahdi tiloi toh gospel music concert boltoh koi hi ikidemtoa koi hi ikiseiset todi hitam ibona thilpha thudih sei le bol ngen ihiuve. Alangkhat a hou lamkai reverent bangkhat lungput ahileh tahchapa kuki chapa phu kalahman vangam jonponge ti hikit. Thingnoi holeh bible them pathen thusei minthang hon kut comiti koiho ham chavang kut phaitola kiboljingham tia lhagao thua halnadi crusade speaker hina leh nam natohna a aseidiumong ahi, akilom akilom lou akito akitolou chu chutitante. Ajeh chu ni nunung langleh iseidingdol lou langa kikumna nalah uva hung pungding ahi tia themgao thusei guilhunna ahi.
  34.  

  35. Mi bangkhat te pi hi ching hinaovem aktileh mi lungthima lhagam diu hita hila. Ipi mimi ipi roro kiti hitam ivetleh ipi kiki kiti ho vuidohnadi lampang a kisahna kicheh jepjepta iki vuina dia athanom pena kipang kit hitaleh kilom. Ichenkhompilou gamdanga hon sum ihinpehdiu hinam amaho min ihiti tosot u. vatot khela Ahcha tiding kiti henlang AH kiti tijong leh khatvei lheh leh ah-cha hin kiti teidi ahi gelphalou miching tah asao muphalou um hitaleh akilomtai. Hijeh chun sopi deitah te dah unlang gal lam veuvin kun jemjuma nachotna ding bou vetdan. Ijeh inem itileh sochatna hi ei le ei a bou um ahi.
  36.  

  37. Chif guest association bolphaat hitalou haimo sopite. Muntina kingon atam chehcheh jengtan injole kichena marriage kin hoa jong chif guest, guest of honor leh functional president ho hung umleh akilomtai. Ipi khoh am hiche hoa panding social worker la kivatlou contractor la kivat lou mla mdc la kivat lou. Ahin hiche kin jingun jin ja um kin neipa hoa sum todi hi chief guest association in a rate khat fix abol louleh inchen atohkhahdi loijong umtante. Chif guest a panjeh a bat le tham in achup khat hung umleh aji ach ate to kinahna hung hidoh khante.
  38.  

  39. Kut dihtah manding ahi tiho hi koima hetlou le gelphahlouhel beh thusei ahiuvin kipapi pachat aumlheh e. Koi miss kut, koi mistress kut thu umlou, koi chavang lanu, koi phalbi lanu kilhenna thu umlou kut dihtah jubel kibot kituna achip toh lasah toh nungah gollhang kituhtoa lamkhom toh bontol kho toh, selkal kitet toh, katei katei akiseijongleh thanop lungjat aume. Any level kut hung kigong henlang hitabang kut dihtah chu kimangle koi ham hiche kut comiti demdi, miss kut midang hon alan keihon kalapoi tia lunghang kitom miseisedi jong umtaloudi, kei kouna lekha eikipepoi tia lhasedila umloudi. Chuteng gospel party hon kut kimandan hindem henlang kingai leh thanop umcheh kitdi!
  40.  

  41. Cannan gam, Jerusalem gam hohi vangam thudan bouva ana kiseiham kiti tulang hin eimiten jong gakholjinna mun’a neiloi, taona manna ding mun kijen penna nei hou lamkai loi, zalengam kukiland ho hin nungngaikitaloudia kivuiden dia hiche khoiju le bongnoi lonna gamtep gam jonjing loi kaden enjong bahara di kineijou henlang khatvei beh gaki che henlang taona gakimang leh ti mi tamtah umtante. Ahin sochatna hi gamtheng che le chelouva kingamdi hileh achejoulou hovang I atitadem.
  42.  

  43. Vo katejo chif guest ho leh guest of honor hon function a asumto u pi hi thanopnop jong aum ngap tai. Adon donna ipi function ham boljingdi lungjat aumbouve. Nehdi sildi helou genthei hahsa ho sanga kumhei golnop kut kichep golseh hoa sum lak tamtah kipeichai jipi hi gam le nam sunga ahao anei tamthou tina ahin lungletjong aume. Eimite hina dihtah ahinai. Niseh leh sa themkhat khat nehsanga ineh nini leh oina leuva kine ahi. Nikhat golnop hoa dia sum tamtah tah kisumang ho hi thinglhang kho khat a community hall ham sahdohnathei, twinehdi semna a mankham set ahi. Ahin golnop beia mihem iti kihinkit di ham akiseilang lang adih ahimai e.
  44.  

  45. Sopite kitonading ahiphot leh nam min a kiboi boi sang in Kuki- Mizo-kibungbutun tileu hen dihtheipen inte. Chin ho leh Mizo ho la November 1 Kut ah ahung pang jipouvin, Chandel district a old kuki ho seida tautin Hmar honla Kuki Zomi Mizo khatcha apomkit dehpopuvin Komrem hola chutima ahijeh un Kuki-Zomi-Hmar-komrem-old-kuki kut chibai itimai uva pha hilou haimo
  46.  

  47. Gospel singer tilou tulai lasa minthang dom kahi ti pasal khat chu aw ngei theina di leh stage chunga kichop lele nadia menghiuheu maimai jong hitalou mengpheldi ahilouleh hitheilou ngap hitam. Phalbi jan dap phat hile gahmomjap chu thukhat chavang nisa emsise pet kisana nam thit thet mit ngui jije lonthim lelea stage chung kaldaohdi kiti vang hi Kukite rock star khat hina dia qualification poimo tah ahitai. Ihitinah lou uleh ihitidiu ham. Lasah themlou awngeilou talent neiloula ihipouvin stage chung hi ithepna pohdohna di hitalou ihina pohdohna a mangcha atamtan mipi hon iti eimu diham ilasah angai diham I umchan avetna hachangthah diham tijong geldoh louchu damsel jenga pha hilou ham, dopthei tunthei papoh thei kiletsahpi thei khat beh umtang uvo govaleh in nakidomdoh vehtau tua hi toljepna a neidi lungjat umngen! Lasah man sum tampi le selchal khat eikipepoi tinom ngenbeh hinalai. Amasatah in ama gam leh eikigonpeh kham kham kipahtah a sanje kihil masaleuhen chuteng hichengse jong chu nakipehbe diu ahi tia kiseisa um hilou ham!
  48.  

  49. Vo henu karei ningol chakkouba a hi nga (fish) bou meilhei hon ahonpeh jiu ham kiti thinglhang mi holah a vohcha le uicha hol akisuto saosao uvin keivang uicha katha got ahitai tiloi keivang tukum vohcha khat kithat mongmong hen kati ahi tiloi, KG a ichohtho le hijeng tiloi aumtai, Christmas vohcha hol hiuvam kiti. Ahilouleh meilhei ho kut ipehdoh uva eihon ningol chakkouba ikilah ngapdiu hitam.
  50.  

  51. Kidem kinielna hojong hi aumlou leh dihtheilou ahi. Democracy a opposition party hon govt dem kiticha adem teng lebou khantou machalna umdoh thei govt diajong kisemphatna le kisuhjangna phatah ahi. Aphadinga midem chu midemjong akitipoi. Engset sumsel mitthip jeh a midem hokhu ahi. Eijute hi thu kingaito pehte ihiu dankhat hitam kidem mohbol bol loudi itimanna moh thip behdi ti ibang jeng kit jiuve. Kumdang lhadanga state level chavang kut thu in lha ni tobang kidemna alosoh jin tuchung khoiva kibenglha ibang kit taovin lunghel bon aum ngap leuve. Oleba kidemtojong ikhop jeh u hitamla kihetalou. Ahijong leh kipa aumcheh e.
  52.  

  53. Vo katejo chif guest ho leh guest of honor hon function a asumto u pi hi thanopnop jong aum ngap tai. Adon donna ipi function ham boljingdi lungjat aumbouve. Nehdi sildi helou genthei hahsa ho sanga kumhei golnop kut kichep golseh hoa sum lak tamtah kipeichai jipi hi gam le nam sunga ahao anei tamthou tina ahin lungletjong aume. Eimite hina dihtah ahinai. Niseh leh sa themkhat khat nehsanga ineh nini leh oina leuva kine ahi. Nikhat golnop hoa dia sum tamtah tah kisumang ho hi thinglhang kho khat a community hall ham sahdohnathei, twinehdi semna a mankham set ahi. Ahin golnop beia mihem iti kihinkit di ham akiseilang lang adih ahimai e.
  54.  

  55. Eijuten vang hin English pao ingaisang mama uve. Thinglhnag kuchong khosung khat ah chavang golnop leh miss chavang kut kitena kin kibol henlang ahung kikhom khosung mipi ho paodang tho umhih jongleh microfon tuh hon English pao a seiteiteidi tina dan um ibah sah jengtaove. kut golnop leh miss contest a hi English pao bou mandi kitina um ngap hitam. Sopi mizoten la vannoi leiset a amaho pao ngaisang pen u, amaho pao helou chu miajong gellou u. eijuten la kikhopna kin neocha aumjong leh conduct bolpen pen chun dih le dihmole English pao nangjengjung a tho teidi hijeng. Mi ikhelna pen u hinte. Hijeh chun kipa aum thou thouve.
  56.  

  57. Koipa ham khat in kanu le kaji akinah leh koiham khat langa kapangjeptei e ati chu umji mong di ahi. Hichu mihem hina ahi. Ihet khahlou beh football ham cricket ham kichem hojong ipanpi khat umtei hikit ahi. Ahia konbon panpi tum nanei e jong tilouva nathuseidan chun hiche te napan pi e tina ahi tia ei le ei kiginmo jeng vang chu, akisei akidoi joh ihet theilou khat tou himaithei vehta. Ahimmonga jong akonjong ukhrul khopi sunga kuki gam le nam leh kuki state thu agaseidihah tah, chuleh konjong nagalim thua tuibong a seminar ahung bolkom deh dihahta, amoh a khat langho ana kikoumanlou, kouna lekha ana lhungmanlou ahi ti thubou hichume atheng thenga kiseidoh nomlou hibou chume ei le ei kah a. Panpi neilou gel ho ikiginmoto u dana ikisei uleh gantuo imaikan diu ham!
  58.  

  59. Kut a khamtang kive a saipikhup ponjem sangkhol ho kivonna pupa laam thoho pichu ipi nam mite lam hitam ahetheilou atamtai. Joulei kon lam ham phailei kon lam ham akihekhen thei tapoi. Inam lam hi kholgil kholthuhdi ahinai ahin adih bangtah a thodi vetsahdi ahi. Tulai kuki tribe jatchuom chuom ho nam lam hi meitei nam lam leh naga nam lam toh kilou leuva semloi aumtai. Hitabang semthu nam lam ho mipi masanga vetsahdi vang nam lam suhbohna joh hilou di ham. Aphat le nikho dungjuiya custom culture ho semhoidi ahi kitinakhai eileh pulam palam semthu behset vang pu pa lam chintupna hiponte.
  60.  

  61. Hetsah : Suhchop touchup tho kiti hi dongmaneihodia kokhuh a choplutna, thingnoimi hodia thilona, elction politician hodia aban kailouna, khochaga kichauhat hodia inmun loumun det neitheilouna, hou natong hodia tohmun post pha mulouna ahi hetna dia special coaching class khat hung kihongvahdi ahitai. Amun le aphat ola hetsahna hung kipeding, oja jilkung diho jong suhchop touchup jeh a boina toh experience sangtah tah nei ngen hiding ahijeh a tuition fee jong tamdi ahi. Chuleh NREGS jobcard deina a apenna kho le veng dalha a khoneocha a kichomlut ho hetdia pha chu MP election ahung naitan iejm tia UPA sorkar ahung kilekit louleh BJP-NDA ten thangthip le engkhanna a jobcard hi JOKE-card ahinso maithei u ahi ti seminar jong hiche coaching a umjidi ahi.
  62.  

  63. Misei jouse moh tahsana kichom kalang lele chu anun nom ahi ajeh chu mi umdandana um ngai ahi. Chi le malcha beiya koiman metui anetheipoi. Athu ala abul abal beiya Chi man kaldi ahitai kijohtaloudi ahi, supply hungtaloudi ahi kiti chu iti kitahsan mongmong ahidem vo vannoi mite. Petrol man, anchang man kaldi ahi kitileh tahsan thei ahi. Chi hi twikhanglen a twi akon kisem ahi ihetlou uleh Singat jou langa thinglhang kho khat ajong Chi kimu, pat twi khat a Chi kisem thei ahi nahetlou u ham vo lungthim lhomte. Twikhanglen twi khuja althet dontheilou kinong jengjung khu Chi ahibouve, leiset chuna nehding chahding kiti mongmong beihel jongleh Chi hi twikhanglen twi akan tokah a umdi ahijeh in chi kimulou, kijoh lou, supply umlou di ahitai tia bora khat cheng kichoh jeng chu kum kit kumlhun Christmas nehkhomna hoajong tothei ahijeh in akhohdehpoi.
  64.  

  65. Sopite thildang imadang thu to mehbeh louhelbeh din thil khat gah kiseileh, Kolgam (Burma) a Kuki aumpoi ti theina leh hilchetna ipi aumthei pendem gah kingaito tem uhite, aumpoi tina hilouvin. Kuki te kitichu phungmin boipi, hinpi leh thipigo te ahiuvin Kol gam a eimiten amin ban uvah phungmin ajihpouve. Oleh Kol gam a Kuki hopi khu Kuki tahtah hilou khat u ahidem, ahinah uleh iti phung ngailu lou phung min sun ngailouva umdiu hahtah, India a Kukite hila min banna phungmin jih sehsehjong lunglhailoulai Kuki deina lotlotna min banna phungmin jihjong kisitnalai nampi mingei jihdi kiti nalai. Hiche hi Kuki dopsangna ahima’n kihahsel vehtang. Nampi min dopsuhna joh ahi hetna dia ipi iseidiu hitaimo. Thilkhat kangailu e itimnna adonlou ibol khum chu phalbi laiya pahcha hon dapsante tia twisa chap khum tobang hithei ahi.
  66.  

  67. Khaije khaije kolgam lang aboi kigo tai, kumkit lhakit luchang simna (census) a eima deipa sutlutna aumtheiloudileh kanampi kasopi ban thigam jongleur khoh deh am ti lunggel ngen hitaleh akilome. Manipur India akon kipatdoh a thu gaseitoh diloi kinah kibauna chunga kerosene gachapbe theiloi ikipatdoh lou uva hitia isopi hou imoh vet uleh 1990’s Naga gal dikon a Assam gama isopi ho T le K thua kiboina ananei uva T le K akinah leh Eimi ho athiuve kithi chu kolgam kisan ah hung umdoh kha leh moh a koi malchame khambon kihilou hitia achuomchuoma ikiseikit nahlai uleh koi gamtum mua koi MP nei malah galjam hung umkitding Difiuji taital ikilamdoh kitdiu nailam kiukeu na hi.
  68.  

  69. Tilla gollhang chapang khat aloipa ham anu apa ham to akinah manna thingnoimi lutding tiho nuisat anahin tulangsangpi hin upa tehse MLA MDC hojong election a khat to kinah jeh ham, thika bolding chanlou jeh ham, service qota kichu jeh hama nam sepai panjengdi ti lungput tamtah um hin gam le nam ngailutna a nam sepai pangding kivatjongleh thangtom party nam sepaidi vang akivatpoi tina ahin kuoite ham thusei hileh huphur aum ngaptai!
  70.  

  71. #Nam sepai la kivat lou, phung sepai la khatcha kimulou ahia nampi gamtum munadi mangjel nalai. Society sunga thilphalou khamna thei bol leh kiveina a mangho suthipdi nam natong hihen nisa bandh party hileh kivatlou ahia khamnatheia kivei leh ane abol la beidehlou. Thingnoi thingchung kigopkhomdi ti kihaseilaisea la faction balke banga pungcheh cheh. Theology simchai tamlaisea la houbung pung kitma, anome hiche ho jouse hi machalna ahithouve tia lahdi himai.
  72.  

  73. #Gamsung le namsung boina tamjo hi iboltheilou leh ibollouding bol lama kipedoh le kilop tam jeh ahi. Thilkhat chu minjong abolnai tia enjong mohbolbol jeng. Lhagao milou hel leh ahindan’in tohlou hel khat pathen bible simdia kipedoh, galkap ngapchalou sepai thingnoi pangdia kigo, nam ngailutna neilou khat nam natong, social worker, politician kitijeng, lasa them lou khat jong album boljeng, imacha jong helouva mi thusei jouse forum leh facebook hoa mi nel leh donbut, lekha jihthei jong hilouva lhaseh kalseh lhakehseh thuso ho boljeng, haosa dinmun lodia kilomlou hel khat in kho haosa pojeng, kichep langa hetna leh thepna neilou hojong thanompenkit. Hitiabon hichan igei uhi inasat jah-jah u ahe tidi ahimai e, jachat aumjie tithu bou.
  74.  

  75. Tahbeh leh thengpet in nasei peh uving kate sopi deitah te. India leh Manipur vaipoten Moreh leh Burma lang akhuti lungvil uhi imadang jeh ahipoi. India Company ho sum munadi, meilhei te dia phaigam kehletnadi leh kiveina-a sum munadi ahi. Moreh business khopi ahung hiteng inmun nei ina umnahlai nah uleh ei ute thingnoi hodia Tax don nopna hidi, hichu zalenna gam leh kuki land gamtum sanga nomjodi ahitai. Thanop aume nampi manthahna ahidi vangin.
  76.  

  77. Mi pontho anatohdoh ah akihen, mi thase a inchen akon akihethei in, mi thudih aboldoh akon mi akipah in, mi lungthim dihlou athusei athilbol’a kon ahung kihethei in, mi hat athildop leh athilpohjouva akihethei in, mi hangsan athilbolngam akon akihethei in, mi ching athusei a lekhasut a kon akihethei in, mi ngol chu kangol e tin sam lele hihjong leh athusei ami houdan leh aminiel akon akihetheiye. Society khat khosung vengsung khat a hitobang jatjat mi aum chieh e, hichu mi kikimna ahi tia lahdi himai e.
  78.  

  79. Kin khat function khat aumteng apolang’a um atamji hi mi lhinna leh mi jatkim kisuhkimna ahi ti het theina khat ahijeh in anopna uma lahdi ahi, koiman apolang’a kon program khat jaoji hokhu seisetlouding lunghan khum jiloudi ahi. Ajeh chu indan sung’a khu koiman bu athuh’a ahoplou ahi. Kin khat a nehding bou thupia gelloi umin tin buneh saneh sang’a thu kisei la kisa ngaidi thanomjoloi um hihta, akitinah vang’a. Ahilou ngapleh bunedi bou lungput neipuma function cheji ho khu a in munna packing kithahtho jileh a bahara ham athaoman ham huoidoh loudi baha!
  80.  

  81. Tulai hi numei le chapang langho sangin upa lung geltheitah ho lungneo jojita, phun nom jita, nuohnom jita, tehse langhojoh kingolsah a pho phodia lungjat umjita. Gollhang jineidia lomhola nungah hel louva ban um, jineisa upa tehse hojoh pi samsao akitileh lipthel jota. Hiche hi khang kikhel itiu chu ham, ole khang kile bung butun joh ham, ole tulai chatnabi ham, tulai style ham, ole upa gangam style joh ham, aphaatpoh kitichu hitam agelje aseije jong aumtheijitapoi.
  82.  

  83. Lekhathep manna mihem aching tidi hitaleh ipu ipa teu ABC anahelou ho pichu ichanna mingol hidiu hitam, hinla amaho chihna maiphading tu khangthah te iumpouve. Tulai hi lekhathem computer them holeh city a umho hi angol atamlhehtai tina thei tamtah niseh in muthei ahijing’e. City khat’a umkhom ho phatkhat khat khat leh vannoi hetdia akisaptuo jiuhi anuomji lheh e. Computer le internet groupmail aumnai tia gala kon songtuma kikisepto jengji vanghi aw! Society tongkha thei thu khat aumleh hichelai mun le phaat na kimutou hitin seikhom uhite tinathei muna umho jong vannoi hetdia kisamtoji ho hi anuomji lheh e !!
  84.  

  85. E bolkohlouding khat in mi natoh thilbol khat chungchang thua dem ngapcha kiti hi phahlelman jehbou hilou ajanmang noplou jeh jong hidi ahijeh in kipana aneitheinadia thumna anei phavehta. Mi phajou hon asanga mimo khatjong chu abolhoi e tia apachat ahi.Mi in phante atiti boltavehta, ija ken mijouse thanopnadi leh phatchomna di kaboldohthei e tina ngaplou. Ikisosal kah a ikam kihupdi ahi tijong het angaina chang umji ahi. Akikap kha kha, akimanman mi…..ama le ama akiman’e, awnghawm kidoia meichang akikapleh kikapkha hivehta!!
  86.  

  87. #Ihilouna thu akiseileh koiba lunghang diham, ihinatah thu akiseiteng lebou kima, kilunghangji hichume. Ikigotkhah japteng ning kihel chehchuh louding koiba umdi ham, hiche ho hi aumkitlou leh kikhuolna leh kisemphatna umtheilou hichume. Ei hihen mi hileh opposition party umlouna chu machalna umlou khat in anop aning bep aboldi ahi. Midem mitaimo miseise hojong demdi ahipoi, midem them ho aumlouteng nuijatna umtaloudi, nuisat thei mi jong umtaloudi ahi, hiche gothet thutdi, nuomloudi ahi.
  88.  

  89. Mipi kikhopkhomna kiti poupoua jukham kingolsah kiboltheisah umji hi angaina ahi kitijong leh avaldehset mite aum’e. Jan program ahipou pouleh jukham ding laam ding, kon ipi thu asei ham tijong umlou chothethu ding, aolah lah ding hoh lah lah ding tihi anomsaloi akingolsahloidia anop vanga aning kitel amit thip loi dimset kit di ahi het angai e.
  90.  

  91. Thuso a ideilou lang, ei kapkhajaplang ahung kiso/kijih khah leh thuso bolho ipi thepna qolification anei u ham thilsutje ahepouve kiti, eima lungdeilampang ahung kisei khah leh editor ho itobang degree anei u ham anasa mongmong uve kitikitjeng. Khat to ikikidemto pi, midang kingoh go nalai, vo karen, ihitilou uleh ihiti diu ham tite ahijenge. Kineppi umtah leh thil hethei ditah honjong English newspaper hotoh national paper dangka cror lang lutna le atuong muna newspaper hoto eipao newspaper tekah loijong umji nailai datmo leh nuijat jong aumji ngap e.
  92.  

  93. Kiging’un kiging’un haosa ho, centre a BJP te lamkaina a sorkar ahung kisem leh congress ho natoh lah-a akhup athal’a ahin lemasat pendiu chu MGNREGS jobcard hung himaithei ahi. Hijeh chun haosa poding kichu jeh leh kho le veng sem thua kiboina neiho Christmas hung naitolhon in kicham jeng taovin.
  94.  

  95. Thil khat chu ijat vei ki thienso thei ham, alui teng isemphat le thah thenso kitdi hileh thukhat. Filim natiuvan philim joh natiu hamjong khu ijat vei kithenso jia ijat vei release kibolji ham, khatvei bou release kilhadoh jia kihomjal jiham katileh filim khat pi hi muntina release akibole kiti vehta o, ole aveding tui luong banga ahung kitolthodi lungthim joh hitamla akihetapoi. Pao dih manjoh a show kibolding ahi tijoh a phalou ham? Epi kisei diham ikitahlou jeh uva phaigam mite chalak a ikibolto u hitahi.
  96.  

  97. Tulai kin le dong moupui golvah nehkhomna atamtan akikoujouse achejidehpoi. Ahin kouna lekha kipe ho che hihjong leh mikou kin bolte dia lungdondi ahipoi. Invitation card kipe hihjong leh nehkhomna ahipou leh chejeng tamthou ji ahitan bu le mae joh lhingdi hinam tijoh lungkhampidi ahi. Ijeh inem itileh mipi buneh na a khu coupon kiti bune kikou ahi ti hetna lekha hal kichoi khelkhel jong ngailou ahi. Hiche hi ei society anopna khat ahi, khantoulou vetsahna khat ahivang’a!
  98.  

  99. Mi vaicha ho party Aam Aadmi Party Delhia MLA tamtah ahung kaidoh taovin ahileh Manipur langa mi haosa tamtah akihuol lel gamtaove. Ajeh chu AAP hohin nehguh chahguh bol mihao ho nikhat hinbolchahdi ti athupi u ahi. Mi haosa phabep kit chun itileh hiche vaicha party ah min khumna kaneitheijin MLA tetnadi party ticket kamutheidem tin akisalel gam kit tai. Gandhi lukhuh jom pitpet khuhdi thanom atam pantai, ole Gandhi lim umna ipiham khat joh deina hamla akihetapoi.
  100.  

  101. Vo henu I news upi hi haosa lamkai nam natong lamkai ho min list tahdohna leh meeting notice board tojong ahung kilou ji e. chubanna eiho news ahi kitinah vanga ivetda khat demna a neidi tiloi, news editor ho suhkhelna muthei kieu loi, eima mimal thu leh thusoh hiloulai hopi thusoh holah a sodi tiloi, advertsise boldi tia asoman ijat, iti kahin pehdi ham tijong umdehlou loi katei katei! Akhohdehpoi, ajeh chu eiho newspaper ahi. Eikhoigi hotel (eiho hotel) a bu nea anehman pehloudia kingaito pa chu ibah khahdiu, mi nuisat leh seichah khat ihidiuham tithu bou ahe.
  102.  

  103. Function dunga sotpipi thu sei hohi itobang thudih thupha seijong leh koiman angainompon chomcha seihojoh dih le dihmo leh seiphat le pachat achangjiuve. Thusei le lasa ho angeimo leh asot dehsetloi umkitji nalai. Thusei sot hon aseichaiteng mipi khutbeh tamjo khu thu kisei kipapina hilouva thusei angah jeh ahinomji e. Thusei sotloudi ineolaia inu le ipan ihil lou ahijeh a eima le eiman kihetdi loilah a khat ahi.
  104.  

  105. Civil kiloikhomna assembly hoa nampi thu le la seikhomna leh nampi politics kivaipohna ho thu bou kiseiji ham akitileh kipaman hopna kin khat jong ahung hidoh hi kipapi umtah ahin kipaman hom hojong kipaman pehthei ahi. Chuleh tulai phaat phatloujeh ham Civil kivaipohna hoajong defence secretary panmun umta, kichat tijat jong um kisonpi jong umkitma. Ijoleh civil kiloikhomna hoajong town commander post hung umdi ham seithei ahitapoi.
  106.  

  107. Midang khat le midang khat akinah leh midangkit khat chomlutna bol lhon hih o tia akina teni pheldi jong umji ahin ucha pacha akinah teng achomlutna gapheldi koima aumjilouna hi angai ahi. Ijeh inem itileh pangalte ham, kuoite hamkhat kiseina bang’a ucha pacha kina gaphel chu akinateni joh hung pangkhoma miphelpa joh ahin levoh thei ahi akiti-e. Abangkhatloi kitchun mi akinah poupou leh phelkhen malah sabhas very beri good tuchunbah habol lhontang tia kipaman khutbeng umkit ahi.
  108.  

  109. Tulai Christmas le New Year bouseh hitalou houin kikhopkhomna kiti phot hoa pathen thusei ho totna nuina leh kisuh halna lampang bolthei hochu speaker thusei thiem ho ahitai. Ajeh chu tahsa kisuh halna beia lhagao kisuh halna umtheilou ahi. Nuina tamna message bou min angainom ahitan lhagao kisuh halna um le umlou kon seitalou. Thupi seipa itobang hinam akitileh athiem nai tia itidanna akitileh thupi sei sungin akinuilhung jenge ti hi a popular lhehtai
  110.  

  111. Pastor reverend ho lunghang theiloudi mito kina loudi kiniel loudi politics abolmodi tina um am, thingnoi hon bible thu pathen thu aseitheiloudi tina um am, hou lamkai holeh thingnoi lamkai ho akimuto uva taona amankhom theilou diu politics thu aseikhom theiloudiu tina um am, khat le khat kidemto theilou mongmong di tina um am, kidemto kinielto teiteidi tina jong umdeh am?
  112.  

  113. Lekhabu jih ho hihen cinema bol ho hileh moh a hopdi moh a vetsahdi itilou ngal leh kol pao meilhei pao mizo pao leh sap pao hoa jih ding bolding ahi achutilou leh nathiljih nathil bol chu asimnom avenom mi kichuthodi kei nasopipa nasopinu kahilou ham naloi napai kahilou ham nampi society adia natong kahilou ham moh a kasim ding moh a kavetdi hilou ham ti umsaosao di lunghan manna seilou loudi naseidoh bollou loudi nabol nakhat lengdoh maithei ahi.
  114.  

  115. Ibol lam ikilo nalam hi ipi ham het a boldi mi bolmana ipi ham moh bolbol loudi ahi. I society boina tamjo hi abolding dol hilou lampang bol aseilouding lampang sei akikumnalou di hoa kikum imajousea kithu hetsah atam ji jeh ahi. Kichep lang bol hon kichep lang boipi hen, kichep helou hon kichep lang boipi dahen. Nupa kikah thu teh le mou kikah thu seiding hi nungah gollhang khangthah langhon haseida hen. Hou natong ho leh nam natonghon atohdi lamcheh tong hen. Chuteng nalah uvah khantou machalna umtante.
  116.  

  117. December 25 ahung nai tultul jiteng nilhah seh tobang leuva ahon hon’a kijot lea khong le dah to choh thethu jengloi, bus truck jeep le car hoa loud speaker choh je jua la lha a choh jeju loi atam lheh jihi mipi suh halna keu hilou carol che party ho kisuh halna jong ahijeh in kuoima oimo di aumpoi. Abangloi chu lengpi twi theng in halna apeh a happy Christmas tia lhangsam le loijong aum kit nalai jin lhagao halna ham tahsa halna ham vang aki hetapoi.
  118.  

  119. Thusei lasah aphaat le amun to kituoh hinam ti vet ngai ahi. Kichen nikho ham thi nikho ham, lhagao thua kikhopna ham, thil khat lopna kin ham hoa politics thu gam le nam thu, thingnoi thu, kivaipohna thu ho seijong chu adih kisei nama hijong leh kituoh theilou khat aume. Thi uopna kin hoa khutbeh to laam toh, kipathu, kipathu ngen nui siuseova sei sei hojong khu kituoh thei behlou ahi.
  120.  

  121. Ipi thu ipi laa hitaimo, christmas a christian hilou kol le vai meilhei ho kisan halna achanjiuva party bol khovah goleujeng’a anai vel’a hou-in kikhop hojong subuoi leujeng loi, Christmas lopna hi chance lahna a nei goa kho le veng kichuna a mandi tiloi, sports bol’a lenkhom jaomo jen’a chatmo leuva umloi, nungah gollhang kiheltona dia chance phatah a neiloi, anop tuoh lheh jeng’in “Christmas nopdan jesu pien lamlam kahephapouve” tiho chu anepte hidan ahung hitai.
  122.  

  123. Hou le houbung lang’a kiphal tahtah jong Christmas new year teng leh houbung phabep ho ah aumji e. Amaho houbung honbon sanehna dia sum hijat jat ato uleh enjong hijat jat pohdohdi ahi tia aguh a kitetna jong umji thou. Christmas, New Year golnop teng lenkhom houin kikhopna hoa jong panglou sahon mehon a jong panglou camp mai dunga touva kihoulim loi, lampi dunga kijot leloi hojong mi kikimna khat ahi.Chuleh hitobang ho hi a inmun’a kon hung potdohlouhel loi leh bazaar ning khat a ga mangjel jiho sanga phanalai ahi.
  124.  

SHARE
Previous articleBlank fire #4
Next articleSept. 10, 2016 Local news