Blankfire #3

Blankfire #3

339
0
SHARE

(Note: Blankfire a sodi hinthot jihon ahitheichanna khat changtum/party tum gotna hilou society lhangpia kapna bou akideiye, Na min le umna jong akisoloudi vanga nahin pehtha ngai ahi. –Ed.)

  1. Kei sei kei gel bou chelha leh ti ngen beh ahijeh a vannoi leiset pumpi boilha jeng ahi. Kei sei kei gel jong dihmo thei thou ahi ti ngen ahung hia akiletsah akichihsah akihetsah ahung lhom’a, akineosah mithu jong lading’a kigonglha ahung umsaosao teng society ah kitona le machalna hung umtante.
  2.  

  3. Politics bolhon business lang boipi gamta, student leh hou/pathen natong hon politics boipi gamta, mi hilding miphohding upa/mipa ho hilding phoding joh a um tamta, society a thudih umnadia thunei vaipo hojoh thudihlouva natoh kitet ta. Mipi lunglutna le thildei vengtupdi,pao le ham chondan khandan jat le nam vengtup di ho asuboi joh a pangjita, second coming vang naithou hitante!
  4.  

  5. Mihem in ipiham khat atoditeng itiham khat in aumjin ahiloulou aboljie kiti hi thusim bua tampi kimudoh in pu le pa khang’a pat thusei hon ahinsei peh uve. Phaat chomkhat masang a anasoh phabep hoa konjong muthei mama umloi aumji’e.
  6.  

  7. Pasal/upa camp, nupi/numei camp, nupa camp, khangthah camp, chapang camp muntin a kumlhung a kiboljing. Thingnoi camp jong tamtah um, adangjong umbeding. Achutileh kihetna ding min a kiboiboi sanga Camp-mi te kiti jenga pha hilouha?
  8.  

  9. Ikam’a isei khat, ikhut in abol achombeh khat ti bol hi koima pou bolthei hilou, mi bolthei ho umchandan ahimonge. Ahin thada umtah khat chu hitabang ho hi ni khat hung kitahlangji, chuteng anung ama a uisu pedi hung kichuthoji ahi.
  10.  

  11. Mi bangkhat chu akiseljong hilou iholteng kimujoulou beh, koiman ahollouteng muntina kimuthei kit. Aboiya boijeng ham kitihojong ihmu mukit jeng. A inn a holdi ha, bazaar a holdi ha akholai lenna a holdi ha het hahsa loijong umkit.
  12.  

  13. Newspaper, magazine simjong hilou, TV news vejing jong hilou, radio news ngaijing jong hilou ahia thingnoi thingchung thusoh vannoi gamtin thu le la hejoukei hojong hi pachat umtah ahiuve. Ahin hitabang mi ho thuhetna jeh hi ivet leh a inn a behmanlou jenna vah hat a tapkong kihoulimna lampanga first class ho ahinomjiuve.
  14.  

  15. Mi toh bazaar a vahdoh khoma hotel a chadon teng mi bou chohsah, pan dukan a lhaithei, momthei hojong mi chohsa ngen nekit, sum neilou sum poloujong hideh kitlou hokhu abolthei aching hijengloudi ham, mi seiset mi vetda ahidi thu bou ahi.
  16.  

  17. Koima hetlou mi ahahsa agenthei kithopi ngaicha mama ho koima akithopinom umlou,a iunsung mi tahbah jong asopi aheng akom umlou bangji. Ahao aneijou mihet thei ho kithopi ngaicha jong hilou ho ipiham khatbeh a kithopidi kivat kitlou, taona manpehdi la kivat lou. Hiche hi maipha vetna ham, ole maise vetnomlouna joh ahidem?
  18.  

  19. Football world cup ivetkhom leh anome ti mijouse tobang ahi. Abang khatvang chu a bedroom a achangseh a avet jong leh nom sachehloi um, ajeh chu anop phat le ihmu akhah phat le avet thei ahi. Chutobangma chun inehkhom le atui theiye akitivang in mi bangkhat chun sa ahipouleh ichang’a ineh jong leh atuimopoi tiloi umkit ahi. Mi hi jatjat um tina ahimaiye.
  20.  

  21. Manipur ngailu kitam bang hin igam le nam ngailu jong kitam leh kihiti sam ponte. Mi lung holna gunna hinkho mansanga ithoh le ithoh ihahsat le ihahsat koima lung hol louva thusei lasah nomtah a bol phajo loudi ham. Chutileh ei lung hinholdi umjodi ahi miching lamkai honjong ihetlou lai u akilouve.
  22.  

  23. Tunia leiset chunga ahatpenpa jong jing le thai leh dolche tabanga hatmo hung hiji, tunia kon ija aselou khat jongchu jing le thai leh mi nasa thilbolthei tah khat hung kisohthei ahijeh in kiletsahna dijong umlou koima kinoisena dijong umlou ahi.
  24.  

  25. Tulai ADVISOR tamjo thulahlou ahilona jeh hi imadang ahipon, mi lahtheiding thu aseilou jeh u ahiji-e. Advisor phatah hidi deihon thilpha thilhoi seidi buoipi ngailou, mi kipana leh lunglam bou isei lebou min ithu alah ahi.
  26.  

  27. Mi inn a kholai ilen teng che phaat het angaiye. Kholai lenna ten sa-me akihon uvem, imut sohtauvem, ipi program anei uvem ti amit ha amaiso uva vetdi ahi. Ajeh chu kon kholaileng chetan atingai em. Kamphat ito kimahna um am tia min tounalai tang o atimana kitun tun jengdi chu uidah kihom tahihbeh leh mohseh hibepdi ahi.
  28.  

  29. Ima jong tonglou, moh vale jinga nehding jong kivat dehlou, a inchen jong lhasam dehlou ho khu abolthei hijeng loudi ham. Mi hi thagum’a kivahloi, lhoh a kivahloi, kamnal a kivahloi um ahin, moh imut mut a kivahthei ho vang seiset tah sanga pachat johdi ahibouve.
  30.  

  31. Ahina le dinmun sanga kithupisah ho chun kijumsona keu hilouva alungthim alunggel’a boina le lunghanna atojingdi ahi. Ihina sanga neobehseh le kilomlou beh a umkitjong chu mi nuisat kihithei kit ahi. Hijeh a chu ihina to kitoh bepseuvin ki umthei le vang akoikoidia phapen di ahi.
  32.  

  33. Mi football kichep hat kipapia choh jejuloi, mi hatmo lainatpia bune nomlou le ihmumo leuloi ahat hole ahatmohon hibang loma mi kipapi leh lungnatpi ho ahetphah peh beh u hile phadi. World cup star ho thipi got hola kon hephachom lou, vo kaden anom’e!
  34.  

  35. Ikijato leh kinoisetopi thei umlou, ikinoiseto leh koima jathei umlou. Hijeh a chu kijato chitchat kalla pha umponte. Min ija hen itileh enjong mi jana nei ngai ahi. Mi inoise leh minjong ei einoisedi ahi. Ijeh inem itileh nathun them nachanding nathun themmo nachanding ahi tia thutheng bua jong kiseisa ahi.
  36.  

  37. Ei le ei ikibol leh ngeplah lah jeng bang hin midang hotoh kidintena hoa ki ngeplah lah jeng theile vang lungdam lungnachimna um lheh inte. Midang boina pehsanga imi isa chunga boina peh boltheijong hi nasatna khat himailoudi ham, eima leh imite damtheina ahi, ahilou chu thuchom hitantin!
  38.  

  39. Kisuh halna lampang thanomlou vang hi umlou tina ahi. Hiche hi mihem hina dihtah ahi. Khantou machalnadi thu le la kisei, politics le inchen khosahna di thu hoa ngaidan lunggel seidi tamhihjong leh world cup thua ajatjat khendohdi vang kivatlou ahi. Hiche hi anopna ahi tia lahdi himai!
  40.  

  41. Phaat ong nei le neilou kiti hi ilunglam leh ikhohsah ikhohsahlou thun bou apoh ahi. Phaat klaneipoi ka ongpoi kaboije aduh adah tiho jong chu akhohsahna lam leh alunglama chu niulhum khovah geia phaat aneithei ongthei kitma ahi. Sum kaneipoi tiho jong chu akhohsana lampi ahileh satdoh jetjet kitma ahi.
  42.  

  43. Tulaiya hi koima kikoukou kijoljol kiteptep ti umtalou ahi. Amale ama kikhohsah sah chu avangpha ahitai. Kikaisah a min eikijoljol le tiho chu kitunggo didan ahiji e. Lasahding, kichepding, nehkhom donkhomna a ding, kikhopna meeting a ding, ipipi a ding hileh min cha adop a akou atep athum dia kigel ho khang chu kichai ahitai.
  44.  

  45. Tulai hi ama ama phatchomna ding kihol ngen ahitai. Mi phatchomna di kabol e ti khatjong chun ama nehkhahdi themkhat beh aumlouleh iti chuba hitheidi ham, anelouva pha koimala aumdehpon. Mipi natong kahi itilouleh konba keimadibou tong kahibouve ba tia asaple tahkei diham.
  46.  

  47. Kinahnadi umlouteng kinahnadi hol khohten jong ngaideh lou ahi. Kidemto kiseiset to a phatchomna aumdijong tahsan aha umpon aumjong leh tamponte. Ipilam hileh kithangthip ki engset to jeh a phachomdivang sihmi ipiham khat te jong umloudi ahi heloulai kichihsah tah tah loi aumjing’e.
  48.  

  49. Vangam lhungdi ahitan leiset kichaidi ahitai tia pathen thuseihon anahaseilai a loubol ngaitalou, lekhasim jong ngaitalou tia vohcha sel le bong umsun kitha a neh neh jengdi, jing le thai kumkit lhakit leh chennadi mun le nehdi umhihjong leh akhohpoi tia van gam moh nga chu mijouse nuisat hiteidi ahi.Lampi jatchom jep a hitobang bolloi aumjinge.
  50.  

  51. Khantouna dia gam leiset themkhat pehdohdi ahi tiho hi oimodi ahipoi. Ijeh inem itileh hia chu mu thei palsentage kiti um ahi. Kho 350 val gam bon man beia ilhadoh a thina manna gei itonahlai leh dangka cror cror muna a kho khat leh gampheng neokhat lhadohdi chu golden chance hiloudi ham, ijo leh zalengam, kukiland lailungtah kisana mi chotpha a ihung umdi thubou ahe.
  52.  

  53. Min lhem/fake ID mangcha a Facebook hoa kinel kidem kijonkap kinah kiphinto lam’a khangtou leh aching ahe bana akichihsah akihetsah tamna te chu lekhasim lang hihen kivaipohna lam hileh ima hiloudiu ahi. Hiche hetna thei chu civil service exam ho leh MBBS/engineering entrance exam result ho ahi.
  54.  

  55. Kitomona leh kinahna boldoh aumlou leh kibungkhenna umlouding phatchomna mujong umloudi ahi. Mijouse kitoh tah a achenkhomthei leh satan leh anungjuihon ipiba aboltah uva iti neh akiholtah diu ham? Kinah kiboina lah a kitona dileh chamna thu seiho chu chomkhat hahsa tohjong leh leichung’a jong asanding umteidi ahi.
  56.  

  57. Wolcup kichai lunghelpia thidi kigoloi, player ho ngoldohpi loi, apanpi ho hat kipapina a khohelouloi, apanpi ho hatmo jeh a bu kisan nenomlou leh ihmumoleu loi, nangho wolcup ahi e, tukum wolcup kichai bep a kum 4 jouva hunglhung kitding wolcup adia kigopan kitloi jong umpan ta. Naval behseh uve!
  58.  

  59. Groupmail, Facebook group hoa jaova ahiala personal mail kithot tona a nei, khat le ni in kinielna personal tah akinielna aneiji khu ngolna tahlangna ahin lunghan diha, nuisatdi ham mitamtah in ahetheijipoi. Group leh personal akibahlouna hetheilou ho leh hea juinomlou ho chu kichihsah lhehjong leh mingol ahibouve.
  60.  

  61. Vannoi leiset vang akikhel thouve. Thil kidang dang jong asohdohtan, lolhinna thupi tahtah mujong aumjing in, nei le gou lama khantou machalna jong ilah uvah aumjingin hiti chun ipu ipa ten ana mukhahlou wol cup kichep vet theina TV hojong thinglhang kochong lang geijin inson toabng in ineisoh taove.
  62.  

  63. Ni nunung langleh thingnoi sepai jatjat hung chomdoh ding khotin vengtina kon party jatjat hung kisepdohdi ahi tia malai themgao pu Ngamsei leh mithun Jangpao hon totna a ananei uchu tun ilah uvah ahung lhung naitultul tai. Hijeh chun khodah uvinlang kiging phauvin, ijeh inem itileh chamlhatna ni anaitan nuijat jong i-umgotaove.
  64.  

  65. Ipilam hileh ama le ama kihabol chun lolhinna aneiteiding ahi. Phatna lang keu hilou, phatlouna langa kihabol honjong lolhinna aneiteiding agajong akisanteidi ahi. Thilphalou khat bol kiukeuva kahephapoi kitimongmong bang chu athilbol jeh a chonset leh ajousei jeh a chonset hichu igop leh double chonset hidi ahi.
  66.  

  67. Nei le gou neidohnathei, jat le nam natohna thei, nampi hinjoutheina gamtum delna le mutheinaho dia bolthei jouse pihi houdan toh akikal ngen ahileh melma te khut a iti kihinjoudi ham, leiset chunga iti nei le gou kilamdohdi hitam, leiset a kichengnalaiya van gam thu bou boipi dijong chu.
  68.  

  69. Min idem manna iphahjoulou amoh hidehpoi. Hijeh chun dem a naumkhah leh eiphajoulouhon eidem ahi tin kimohpa hih in moh lunglen hihbeh in, aphalang jengbouvin gel loujen in. ijeh inem itileh dem theia um khat chu min ademji, seiphat theia um chu min aseiphatji ahi.
  70.  

  71. Manipur a political party khat hung chojeju dan pi hi aban MLA/MP election titahlouvin khovei MDC election teng vote campaign laileh Bongsa Joh Phallou hung kiti tei khat inte. Ipi khoh am vohsa le selsa du le nejingte lah a bongsa kijoh hihjong leh. Ahin ahachodoh masang a hung thipdoh kitdi ham tithu bou ahe, ajeh chu lamkai kichuna kitia chu hatna umngailou ahe.
  72.  

  73. Tulai kho haosa hidi hi thanop jong um, thada jong um hitadi ahi. Thunop pet chuleh nreges jobcard sum hung kilha teng haosa ho hinomnom um, percentage thua kikou kikaimang ho ahung umjiteng haosa hidijong ikimohpeh jong leh hinom aumjipoi. Ipi hileh thil khat chu aphatna le aphatlouna umcheh ahibanga thildang jousea jong chutima ahi tia lahdi ahimaiye.
  74.  

  75. Km 30 a sau/gamla lampi hi abuoi mong hiloudi ham? Imphal-Saikul lampi jong Km bou, lunghan le totna geiya kisei khat hi. Chura-Sugnu lampi jong Km 30 hi, aphai anome kitingailou. Tuibuong-Henglep lampi jong hi Km 30 bou sau ahia govt in siemjong asiemloulai hinalai. JAC for demand of Km 30 road repair, ahilouleh 30 Km road revolutionary front phudoh a pha ahe.
  76.  

  77. Pu pa gam huhdohdi loi um intin ajohdohdi loi um hihta, apu apa gou lamdohsa drug neho le jukham achaten ajohchai doh jong umthou chume. Gam huhdohdi ngen nampi natong ngen nampi lamkai ngen beh ihijeh uva independent gam inei nau mun hoa pucca bilding tam cheh cheh hichume, mi vaipohna noia um ihiuve tithu ahi.
  78.  

  79. Mihem hi ajatjat kium ahi. Mi tilkhouna lama talent neiloi um, mi tilset a mi kinahsah chu akilo nalamtah hiloi um, abangkhat chu kihetsah tah a thuseia mi bolgot khat suhthasetdi ti hi akipehnalamtah hikha loi um ahi. Mi tilkhouje leh mi kitonadi boltheilou ho chu a ipihamkhat akitoupha thimle phabep di ahi.
    Vo katei, khomiten anei loi le bong ho humpi in anehlounadia iti huhdohdiham ti thua kinel a kithatgam gohojong akiban nahgam kah uva haosapun abona ana kibanjohdoh gam hitaleh akilome.
  80.  

  81. Thu jousea kihetsah le kikum hotah hi ihamkhat kilo le lungjat aume! Media lam’a kum sot tah experience kaneije tikhatjong hilouloi self appointed media advisor to ET ahung umji hi! sapten mind your own business atiukhu lekhathem miching honjong asimdoh khah lou u ahidem!
  82.  

  83. Kinahna hi chungnun leh athemjoding kichu jeh ahi. Kidemtona a kinelna hi koijoh ngol lama nasajo am ti kitetna ahi. Ajeh chu mingol in kangol le tia asapkhahlou miching injong miching kahie tia asaple lou, ahia angol hihen aching hileh thusei le natoh in aphondohji ahe. (11/8)
  84.  

  85. Open letter aumtheile ibola close letter kiti kijakhalou ham? English pao jong hi vannoi jin atho vanga alhingmo tave tithei hile akilome. Oleba close letter khu akihon tengleh open letter hiji baha!
  86.  

  87. Tulaiya gam le society ngailu ho chu mingol dan’a um ahitai. Chuleh gam le society kanagilu e tia ama phatchomnadi kiboldoh theiho chu miching le abolthei dan’a umkit ahi. Ahin tahbeh a kaseipeh nahiuve, hitobang mingol ho chu mi lungset changdiu, miching ho chu mi vetda changdiu ahi.
  88.  

  89. Mi te kihoulim le kinielna hopi ivet leh Nampi issue ham kiti hojon g phung le chang issue a lengdoh gamta hila kati. Icha inau inu ipa ipi ipu hijong leh adihlou ho chu adihpoi ti thei ngen ahung umteng anveuvin kikhelna le machalna aumlou tah le tivehtang!
  90.  

  91. Election vote campaign laile salam chibai ho amanbeiya mijouse kihop peh bang hin election umlou laijong leh adeiho kipe thei leh mi vang kipah thei lheh inte. Election lai leh vote hol hon mi kot kiu, election jou leh mi hon vote tam mupen ho kot kiukit, aphaat hi kihom deldel tina ahi. 12/8
  92.  

  93. Thu le umdan pihi gam joh le compensation del association khat gangtah a phudoh ngai tante, achutilouleh gam joh jong hung hahsa ding, gam ijohlou leh compensation jong kimutaloudi hita chume.
  94.  

  95. Kum phabep masanga dangka sangli (char hajare) a gampheng khat anakijoh chu tun crore ija man hitadi baha! Tu le tua dangka crore 3 crore 4 man gampheng ho hi kum phabep jouteng ija ahung man kit tadem? Dangka sang li a gam khute anacho (nepali) ho chihdan, anajoh (kuki) ho ngoldan kiti hi kum phabep jouleh hiche tobang hung kiseikitdi thaset aum’e khat te ho!
  96.  

  97. Ipu ipa lamdohsa ahingal lou leh itha isum suhlutna khatjong hilou thil le logam le go khat chu iti keithil, mijouse thil, nampi thil ahi, ahilouleh keija tobang in kagel e kiti jengtheija thu kinei theidi ham ti jong gel khat ahi.
  98.  

  99. Aphaat dungjuija thu le seite maimai hilou, nasatah leh tomngai tah a kinel kinel jeng angahna aphatchomna jong umlou. Thu le la khat a ikinel leh achuhna khat beh umtheiji le phadi, kamchahsah kiti chu ipi kiseina ba ahidem!
  100.  

  101. Mi thilbol natoh khat chung’a panlahna khat jong kineilouva hitin khatin bol un, hiti khati nabol u adihpoi kitiji hohi aphachomlou ahe.Mi advice ipeh leh kipahdidan ahin tua adviser tamjo ho hi mi sulunghang kigo bep ahinajong um maitheiji ahi.
  102.  

  103. Mi khat akitha teng thuso a condemn bol vang akoijousen aboltheiye. PM, CM, HM, political party, student kiloikhomna, adang dang tamtah in condemn bol a kichai jengthei ahijong hi phathou ahi.
  104.  

  105. Mi’n thilkhat aseileh hejong hechenlou, jajong jachenlouva adon achangloubeh a donbutna kinei hi bilngong himailoudi ham. Sapte thuchih in nachot masangin namasang ven, nasei masangin gel in atikhu kihildom doma phadi ahi.
  106.  

  107. Khopi sung khat a Berlin wall aum’in independent country 2 tobang ahi. Khopi sung khat veng khat hingal’a all Manipur bandh aumleh hiche khopi sung akeh khat bandh um, akehkhat bandh nitlou teidi ti. Anom’e e politics u hi!
  108.  

  109. Facebook a humpi banga kinel a kipet to gojeng ho khu facebook sanga face to face joh ah kikinelsah le vetnom umdidan dan world cup le action cenema vetnom um ho chu eh bep hinte, ahin face to face ahiji teng ui gucha bang jeng ngen hikit diu baha! Akhohpoi pasal pipi kisambuching sang’un!
  110.  

  111. Alunghan jong leh kihedohlou, mi mudia nuisiuseu leh mailhaisel’a umthei ho khu mi kidang mi bolthei hidiu ahi. Ahin hitobang boltheina nei ho hi kichat tijat umtah kichih theijun kitinadi ho ahiuve. Alunghan leh kitom thethu hojoh mama khu kichat tijat di hiloudan ahe.
  112.  

  113. Kho neocha cha a cheng te igam a khopi ahung kisah leh in ho ah kicheng hihjong leh jing kah nilhah a acheng ho thilnen le eh bo beh a ipan a sum ikilo theijong le pha chu la em! Ahin khopi thah a cheng hon bandh ahinkou niu leh nikhotha lona di umtaloudi!
  114.  

  115. Ahamdoh athusei jousea mi tilkhouna le pachatna thu himhim umlou, mi demdi ti lungput bou neiho khu umjimong ahi. Ajeh chu mingol ho bouvin mi lunghansah abolthei hilou, miching mihat mihoi honjong mi asuhlunghang thei ahi.
  116.  

  117. Smart city deimo koi umdi ham, adeiho igama umsahteina dia gam pedoh goho jong oimo thei ahipoi. Smart city titahlouva smart village hijong le achop le amat thodi hinalai ahi. Ahiloungap leh oversmart city jong del nahlaidi ahibouve.
  118.  

  119. JAC in demand aboljong hilou Luongman dangka lakh 5 kipe jel jeng. Luongman jong hi athumlou ho, JAC umlouna ho joh kinchella kipe dan ahitai. Ole thum’un kipeloudi nahiuve, thuum hih un kipeding nahiuve kiti te khang joh hitam!
  120.  

  121. British te khanga ihat le ilet dan sei seija igam le inam letdan jong sei seija asunga ahomkeu hisanga tut u leh mabana hat didan leh idinmun joh seija pha hilou hamo sopite.Vannoi anapo British te jong tua hi America te sot tol bep bou ahitah u jong geldoh a pha hilou ham!
  122.  

  123. Khantounadi thu, inchennadi thu, kitonadi thu seijin koima akiniel akina akikohto umlou, aphachomlouding thua kinel’a kimantogo jeng kivatlou hi itiba America te iphahjou diu hitam, America te malah imusit tah u kol samvou kengchot pot leh bongnoi thah le ho iphahna diu jong hamsadi ahe.
  124.  

  125. Milah a thusei dia adindoh poupou leh keihi thuseijong kathempon tia naljet a thu sot tah seiji ho khu mijou nahi bouve kiti henlang tou to kiti leh lungdam ahi. Ole thu kaseitheipoi tia athem tave eikiti leh atijiu hidi baha?
  126.  

  127. Mi bangkhat ho chun athilbol atohdoh alunggel ho mipi hetdia news a soteidi deiten mama, abangkhat kitma chun abolgot le adinmun ho news a sodi la thase thim, gichathim tobang, soloudila dihthei sabeh kitlou!
  128. Koite hamkhat lah a Election kitiphot aumlaisea kitona le kingailutna hinkho khankho gam le nam thu umloudi ahi ajeh chu apu apa khanga election kitet hi achondan u hilou ahi. Haosa a kivaipo te chu haosa thaneina to kikadel democracy a election to kitohtheiloudi mong ahi.
  129.  

  130. Election ahungnai teng het theina thil aumji e. Ipi Election hamkhatbeh vang naithou kit hitante, independent gam jong hilou, state thu jong hilou, district khat del thu ahung gin doh kit teng nipi anaitai ti kihet un. Ole khovei a election umding khat tou umkit hitam?
  131.  

  132. Iseijingsa thu khat hi avel vel a ihaseival teng athupina mangji thei ahi. Khat koma thil khat thum a kiphinjing vang ning kitel mana ihung kipedoh theijong ahi. Ahin thu le la seina hihen thil khat thumna hileh aphat achang umkit thouma ahi.
  133.  

  134. Mihem hina khat a ahina le adinmun kichiehlou thangkip bang’a a colour kikhel le le ho hi kidah le theida umpen ahi. Tunia ihiti diu ahi ti humhel’a ajing leh alamchombeh khat seikit kiti chu hui mutlong le thei thingna tobang bep ahi. Kihetsah lheh jong le hen mi sei jouse adih e itia idinmun ikhel le le theileh eima mi hina a ima umlou tin a ahi.
  135.  

  136. Eima chang bou kiki ngailu soh kei leh aphatna um intin kitona le kingailutna jong umdom maithei ahi. Society ngailu, houbung ngailu, gam le nam ngailu itam jeh uva kibungkhenna leh kitomona umjo ahijeh in ei le ei bou kingailut hi phajo maithei hiloudiham?
  137.  

  138. A insungmi asopi aheng akom ngailu louva gam le nam society leh pathen ngailu aumthei leh kikhol phat ngaidi ahi. Mihem in amujing asopi bon angailut louleh amukhahlou pathen iti angailutdi ham atibang’a gam neilou hon aneilou apennalou gam itiba anagilut theidi ham!
  139.  

  140. Thil khat isei ibol pat ngal leh achuhna khat umkah a kilep le lea achaina leh thipmang deldi kiti hi nasatna leh boltheina ahidem oleba mitlouna leh asuhsah umlou hina kiphondohna khat joh ahidem! Alhangpia vang isei khat boldoh tei di ti chu mi nasa hina hileh akilome.
  141.  

  142. Soi (sign) bol hi phaat lutloudan second som jong hilou ahia amantamdan seijou hilou ahi. Hemkham kinoptona soikai jonghi phat lutdi hilou, ahia soikaina dia kihou leh kimuto hi phaat le sum tamtah lut ahijeh a soikaina umlou hinte. Ahin thil hi igel khoh le gelkhohlou thu bou ahijeh in ei kigelkhoh louleh kigelphatdi himailou ham.
  143.  

  144. Halleluiyah yehovah pathen tijouse pathen ngailu hidehlou maithei ahi. Chutobangma chun gam le nam society tijouse jong gam le nam society ngailu hidehlou maithei ahi. Ahin itohtho tahlou jong leh ikam beh a pathen le society ngailutna seiho chu akam beh a pumseilou ho sanga angailut joh nahlai hiloudi ham.
  145.  

  146. Ipu ipaten milong ivoh leh aki kijolpi e antiuchu tukhanga hi meilhei ten Kuki ho mah mah di ibol lai chan in kipunkhom ding kingailut ding chenkhomding thusei langah akihabol uve ati diudan ahitai.
  147.  

  148. Tohding akitileh koima akikhompon Neh ding itileh mi tamtah akikhomji e kiti hi adihlouna chan aum’e. Ajeh chu neh jong hi natoh danna neiloijong tam ahi. Chuleh ane dinga che ho chu sei ngai chate mi kouna a chejel jel hi thou u ahikit e.
  149.  

  150. Mipin amudiudol anchang chini chi le malcha ho akihop peh leh kipathu alhangsap leujeng uhi kipa lainat jong aumngap e. ajeh chu koiman achandidol ahop peh khahlou abangjenge. Ichandidol ikipeh chunga hachangpa kipa itho thei leh ichandia kilomlou ho gei ikipeleveng ithimil gam maithei u ahe!
  151.  

  152. Chavang kut jong hi anom cheh chehding hileh akilome. Chin kuki mizo kut ham, Meilhei te kut ham, Kuki chin mizo kachin Naga international kut joh ham chomkhat jouleh America te jong hung jaotei diu kinep ahi. Village level kut a pat state level kut leh international level kut ahunglhung tai.
  153.  

  154. I ipi hamkhat suseloujong akivetda thei leh ipiham khat eilovang muda thei hinamante, ajeh apol beija jong mi khat kimoh lungset jengthei kit, mi hi vetda changdi mong leh lungset changdimong loi jong um ngap hitantem!
  155.  

  156. Government agent di election um leh candidate nomination file boldi hi ijat ahitadem, atam thoudem, olebah khatcha jong ahung potdohda dem. Khatcha jong umlou maithei ahi ajeh chu konba government agent kahi, government in thuk thuk atileh chom lele jeng kahi ati tahkeidi ham!
  157.  

  158. Ball peh lama kiha peh ten te, kumlhung lhalhunga ball tornament bolte, ball club tam bolpen te chu state lig leh cc meet hoa mi point munabep leh khut thah lhaona bep leh anakaisangsa khatjong eh kheh a khea kithoudoh kitlou kiti hi ball lama machalna ahitahleh tia kihahseldi tamlheh inte.
  159.  

  160. Mi bolbol boldi ahi timana iboltheiloulam khat a kilop jong chu chilset khum thei bep kihithei hichume, akitinah vanga ikilonalam ipiham tijong geltoh masatdi hibouchu. Vohchal lhaimana vohpi thaigep lhai thona bailam hibou chu!
  161.  

  162. Milungtheng aphai kitivanga ilunga um um moh vohdoh chu lungthen man hidi ham, ngolman joh hidiham aching angol kitilouva mijousen het khen hah asah ahi. Lungthengtah in thu kaseije tijong chu mol kiholdohna khat hithei ahi.
  163.  

  164. Society khat a hi jachat heloi, helouloi loi um mong ahi. Jachat he ho sanga jachat helou loi hi abolthei tidi ahijenge. Jachat helouloi umhih leh boldohloudi tamdi ahi. Chubang chun society a angoldomloi jong umtahih henlang aching leh akichihsah keuseh hitaleh boldohloudi tamkit thei ahi. Jum helou leh angol danna kisei ho hi pachat johdi loi jong um ahibouve.
  165.  

  166. Land of president chu CCpur khopi sung bouva dia reserve ahiloujeh in Naga ho chenna tilou Manipur thinglhang gam sunga president kitiphot jouse hi kikhomdiu hileh khoneo ho lentol khat in doltaponte. Ajeh chu kiloikhomna thah thah nitin in apunbe jing’in koi chu thingnoi koichu songnoi kiloikhomna hitam ticha jong akihekhen thei tapoi.
  167.  

  168. Football club bol hi kichep ngailut khohsahna ham kiti politics joh dan anahilam hephalou tamdi ahe. Hichitah jeh a hiba imphal phaitol khopi sunga I footbol club ho akichepji teng uleh mi kichepna hitahbah jiu dan ahe.
  169.  

  170. Chih le thep bolthei kitijong leh ama phatchomna di bouva ching le bolthei ho chu mijonchih leh mi lunghanna bolthei ahijeh un seiphat le ngailutna achandiuvang ginchat aumpoi. Hitobang ho chu koiman amaichang laitah a aseisetlou pouleh akhohsadehpoi.
  171.  

  172. Mi thangtomna theija mi dem ho chu thilpha boljoh ahi. Thangtomna hinneitheija thilpha khat boldoh thei chu apha ahijenge. Mi maichang pachat bolho joh chu tijat umtah ahi, ijeh inem itileh hitabang ho chun mi benglam pachat a konna ipi kanedoh theidem ti ahibouve.
  173.  

  174. Du la dua kidumosah, dei la deija adeito aseiset thuoa kideimosah. Hitobang mi ho hi jong le siel to kitekah hilou ha? Ajeh chu kijong kolchu dumosah kiti leh siel in aneh le achotpha akp e kiti hi pu pa khanga pat hung kisei paochamtuh khat ahi. Mihem kihia Jong le Siel tobang hidi vang!
  175.  

  176. Anehman athil chohman pelou holeh pelhingjilou ho chu a lol’a ngari ling ki ohthei ahe. Mi jou le nalla lhemlha hojong chu ama akhoh cheh a lheplhah hung hidi ahe, natah sanlou leh anave mongmong te ro.
  177.  

  178. MLA, MP, MDC hidi thanom atam bang in mipi le society phatchomnadi thilkhat beh bolnom leh boltahbah tam leh ikhantou diudan America te chu inung u della pangdi baibai iboldiu ahibouve. Hiche ho tilou mipi natohna di umlou hitamla akihetapoi.
  179.  

  180. Ni nunung lang leh nalah uva nam le gam ngailu, a pupa chondan custom ho ngailu, a ham a pao ngailu, a houbung kiloikhomna ngailu, a phung a chang ngailu hung tamdi ahi kitichu alhung hitam ole alhunlamcha jong helouva hiche ho ngailu ngen hitamla!
  181.  

  182. Iboltheilou lam’a kikum leh thanopten jong hi nikhat leh jum kiholdohteina ahi helou umjimong ahi. Ajeh chu mi hi ikilonalam umcheh ahin ikilonalam ipiham helouva kilo jong chu mi penthah manna pengthah ho hidi akiloh jong chu lotdoh thei ahi.
  183.  

  184. Match fix hi kichepna hoa bou hilou, kitetna kitiphotna jong umthei ahe. Thepna le hoi kitetna hoa jong match fix umthei mai ahe ajehchu kitetna ahisoh kei thouve. Match fix a hat a kiletsahdi le kipadijong vang!
  185.  

  186. Meilhei te golnop ningol chak kouba jong meilhei te sanga thanop pileh habol loi aumtan ki ngailutna vang sangthou dan ahe. Meilhei te chavang miss kut ah akhuti thanop kit un ahiloule kut le ningol chak kouba hi kilhehpi ngap a phadi ham, khat te ho.
  187.  

  188. Sum lhem aumbanga pharisai jong muntin a um ahi. Pathen ngailu lhem aum banga socity ngailu lhem jong um ahi. Socity dia aboljouse jong ipiham khat a ama phatchomna ding hung hidohna theidia khuvevuloi umji ahi.
  189.  

  190. Angol le jachat helou loi umjeh a sochatna umjithei ahi. Aching ngensen lah a chu achingpendi kichuna umjia ima boldoh hijilou ahi. Angoljep ho chu hangsan kit, achingjep ho meisan kit ahi. Chutima a chu jachat hehon ima abolngam kitlou ahi.
  191.  

  192. Kin le dong hoa chief guest kikou hi jaana jeh ham, ngolbolna jeh joh hitam akihetapoi. Ajeh chu sum peding bou vetchepna a jingun jaagun dia kikou hi chena lhongpi ahitan, kidopsangna jeh a kikou alhom lhehtai.
  193.  

  194. Society sunga adoncheh a sumdong atamvaltan fund drive association ban phudoh thei hitabouvinte. Hitobang association hung umdoh leh khat le khat sumdon natoh kihettopehna hung umdoh intin sum penomlou ho chunga kiphinna neidia jong kithokhom thei hidi ahi.
  195.  

  196. Halna hi ajat-jat um ahi. Pathen lhagao thua halna loi, tahsa thanopna thei jeh a halna loi, sum mua halna loi, kut golnop halna changloi, judonkhama halna changloi, kingolsah mongmonga halna changloi um ahi. Halna changji ho hi alaamloi umteiji ahi.
  197.  

  198. Igamsung uah VIP loi, ki VIP sahloi atamvaltan koi chu koiham akihetheitapoi. Mijouse VIP hitaleh koimacha VIP hitaloudi ahilam geldohloujong aumjinge. Midang in VIP nahi-e itileh thukhat ahin ei le ei VIP a kigeljengdi vang thubai behseh hiponte, hahsa salou umnanjong.
  199.  

  200. Mijouse kitonapen hi golnop kipa le nehkhom ho ahi. Golnop hoa halla gulla boltheilou, jukham a kingolsah a aolah lahdi, khat to kinahding ti ho boltheilou amilou dana kigel loi atamtah jeh a anopna hojong hi anoplouna umji ahitai.
  201.  

  202. Amelhoi hola akam alei aseilang alhohlang kichairapveh, akamthem le lhoh neijep hola vomjong leh a rasi kivatjep kit, lhohpha le melhoi kigom hovang hahsathou mama hinte, ahitilounah leh vompi jepna ding thingtum amubaipoi kitiponte.
  203.  

  204. Tulai phaat phatlai, chamna in vai ahoimlai ahijeh in thingnoi thingchung ho hileh lhangphonga mipi maija tou maimai jong hitalou dindoh a thusei lasah le laam hojong khoh talou. Hiche hi second vangam hitaloudi ham!
  205.  

  206. Tulai hi scientific age ahitolhon’a ima jouse percentage leh qota system hijengdan ahitai. Chuleh thingnoi khang ahijeh injong imajousea thingnoi qota umdan hitam akihetapoi. Kitetna jatjat hoa jong tribal qota, thingnoi qota loi um hinag hitam, katei katei, ihapmal toh uve.
  207.  

  208. Thu le la khat chung’a mijouse lunggel akibah leh iba kisei diham, ibola kinahna, kinielna, kidemtona ho umdi ham. Ahin ama gel bou adih a gelho chu leiset chung’a mingol kiloikhomna a member khat kahie ti geldoh ngai ahi. Midang geldan dihmo isah bang’a ei gel jong chu midang hon dihmo asah loudi ham, khat te ho?
  209.  

  210. Politics lang hihen, nungah hel lam hileh ititloulou gel hi mi nuija bep thei ahi. Athu achuom, igel itoh achuom hidi itilevang thukhat ahi. Igam u letdan iseileh atepije bei tobang, ahia atah a ipi dinmuna I umham ti igel teng gam let gam neo thu umtheilou ahibouve, khat te ho.
  211.  

  212. Politics lang hihen, nungah hel lam hileh ititloulou gel hi mi nuija bep thei ahi. Athu achuom, igel itoh achuom hidi itilevang thukhat ahi. Igam u letdan iseileh atepije bei tobang, ahia atah a ipi dinmuna I umham ti igel teng gam let gam neo thu umtheilou ahibouve, khat te ho.
  213.  

  214. Thu khat hi ihaseival teng athupina umjilou joh ahi. Khatvei phatah a iseile kichaijeng lou diham. Avel vela isei teng aja angai hodia chim ning kitel umthei ahi. Khat vei nivei seija aban chu seitho lam sanga tohtho lam joh kihabol leh phacheh inte.
  215.  

  216. angailut diham tahsan aumpoi. Ama le ama kingailu mi chun ama damtheina di akigel masatpendi, abanna ainsungmi ajat anam chuleh pathen angailut thei bepdi bou ahi.
  217.  

  218. Pasal upa jineisa ho nungah hon hepa hepu ahinti leh thukhat ahin golhang pipi hetlou nungah hon heap ahintiji vang koi thepmo ahidem, akouho thepmo ahidem akikou (hepa kitiho) thepmo joh ahidem?
  219.  

  220. Changvoh chang at loukon laija nilhah lang teng judonlou akhamlou ho khu pasal hilou hitam, Kut golnop teng jukhamlou chu gollhang boltheilou hina khat hitam, Jukhamlou, limgeh a um chu mi umdandana umlou tina hitam, ahitipeh leh asalai kilhokhahna hung umdi ahe.
  221.  

  222. Thu le la khat chunga kinel kumlhung ho khun ateh thi geijun kinel jongleu aphachomdi aumlou ahetphat u hitalou hammo? Kihoutohna dia kinel hilouva koijoh dih a koijoh mo ham ti kinelna hoa chu seitoh malah seichavaina sangcheh cheh bep ahe, khat teho.
  223.  

  224. Mijousen akhamchabepma ama ama boina aneicheh ahi, mi boina ngaijang sanga mi boina pehbe kigoloi aumji’n ahi. Mi chunga kingailoudi ti kihilna school khat honphat hitabou vinte.
  225.  

  226. Atam te ihiuve, ajeh chu phung le chang thu he kitam, nam ngailu la kitam, nampi natong la kitam, nam sepai party la punbejing, pathen natongdi la kivat dehlou, aching le kichihsah la kivatlou. Ajuidi, ahe tahtah, aching mongmong, atongdi leh angailu tahtah kitam levang vang phadi hija.
  227.  

  228. Judon jukham kinah kibao umlouna function chu alolhinglou dan’a um ahitai. Hibanga judon jukham kidel thanom ihiuleh judon jukham kidel festival khat bol ngapma pha ham, I umdan uhi kidah dah aumte, jukham akingolsah vetupdi hotahbah akham le boina sempena pangloijong umji.
  229.  

  230. Lasem labol them’a kithangte hin haolenphai thu hibang kiseikum lhungta a itidana haolenphai thua lasem leh album bol hung potdoh loulai ham, chuleh tot them nuina ngen seidohthei tea kon’a hiche thua totna thugil kiseidoh loulai ahidem datmo aumleu tabouve.
  231.  

  232. Kuki gamnoi kiphutdoh kitijing hi kamang ham katah ham, totna ham atah ham kalhoh angollhatai. Atah ahileh thingnoi party semlanga Guinness world record imu vahdiu tahsan aumin gamtum kimuhihjong leh ipiham khatvang kimu ahithouve. BJP thingnoi, congress thingnoi, aam aadmi thingnoi, election tetnathei party jousen thingnoi ahinbolvahdi hitante.
  233.  

  234. Isang’a len ho lah a kamtampen’a panjong hi umchan hetlouna thupi khat ahi. Kum lang’a lenjo hijong leh asang’a chapang ho chu mi thupi officer jaa thei ho lah ngena tou ahileh mi kihoulim mi thusei ngaijoh a pan chu umchan hoi leh chihna tahlangna ahi.
  235.  

  236. Kichep golnop ballpeh kholailen ho hi gollhang chapang khangthah hodi bou hidehloudan ahe. Tehnung voinung’a jong gollhang chapang ho thanopna holeh bolbol boldi kiti hi gu le chang hon athohjoujilou ahe. Ipihile khoh deh am, munkhatna akap le adon thosang’a kichop tet kilhaitet ulsa potna hojoh chu tahsa damtheina ahi atiuve.
  237.  

  238. Prime Minister igam’a ahung leh local prime minister ho thanom loi, kiphalama mathah loi, maipha vedi kichuloi, ima phatchomna eihinpoh pehhih jong le khohlou, aman eihepha hihjong leh en ama ihetpouleh khohlou, chibai kigalbol thei sohkei beh hile phading!
  239.  

  240. Eihephalou loi khat lainatpi le thangtompia kitom thethudijong chu ilainatpihon hepha tahih henlang, ikitom leh ilunghankhum honjong hephakit tahih leh lainat umbe di, kitombenom umkitdi. Min ilainatpi hehenlang ikitom ilunghan thujong he henlang, mitkou laplap jeng le vang lungnachim uminte.
  241.  

  242. Thupi lapi khantounadi thu kiseina hoa koima alunglut umlou, totna leh kisuh halna hoa vang koima athada umlou. Hiche jeh a hi ilah uva khantouna aumvanga machal theilou ahidem, ole ki machal val leh koiman ithoh joupou vinte tijeh a machaldi lampang ikhohsahlou u ahidem?
  243.  

  244. December lha ahunglhung poupou leh vohcha sel le bong holdi committee, ahondi committee, anedi committee, atuipoi tidi committee hung umdoh masajita. Second hand von thingdia kigo nimsetloi umji bang hin Pathen thu, lhagao thu,lasa ding, thuseiding ho lamjoh khohsahna umle ti dei committee jong aum ngai louham!
  245.  

  246. Tulai khantou dungjuijin sports lama prize kisangho hojong agimnei theitai. Champion hon cup adohjiham kiti vohcha kelcha uicha ho hiphip joy sapnan akineita e karei! Dog sports ahung polular in tun pig sports jong ahung kipan tan chomkhat jouleh buffalo sports, elephant sports hojong hung umleh akilomte!
  247.  

  248. Ngailutna kaneije tia iseijja kichaibep ahileh ipi ngailutmodi aumdem. Ahin kamcheng beh a mi ngailutjong chu seitho beh a ngailulouho sanga gamchenga phanalaidi ahi. Thil hethem theijinte tia kigelhon ahet themtheilou leh ahethemtheiloudia kigelhon itiba ahethemthei tadem.
  249.  

  250. Vengsung sports hihen lhang sports hileh kichep petna ikiboldiham tia kijot tona aumlou leh anopna vatdan ahitai. Worl cup hoa bon hitobang kinahna kikiet tona ho aumthei leh eiho gam’a apolanga ikiboldiham kiti ho leh kichep petna khut tuma kijot to hohi umdimong ahi tidi himai, anopna a lahdi hijeng!
  251.  

  252. Haosa meeting hoa hin tua pat koiman job card sum asuhchavai louding, hijat kalval inehlou diu, khosung mite chandidol alhingkei hihihjong leh percent ijat ham beh pehteidi, thing le go moh joh joh loudi, tiin kilolna hung umhenlang kilolna palkeh keh thingnoi ho khutna kipedohdi ahi ti hung umlevang va ah cha akang dem!
  253.  

  254. Sum demand ikibolkhumdi ham tia phone call lalou ho chu thukhat ahi. Khat chunga lungnopma neijeh a mi phone lahpehloujong thukhat kitma. Number hetlou jeh a call kilaloujong chu angaina hithou. Ahia Mobile phone choi ngal’a ajeh apoljong umbehlouva min phone abolteng lamanlou le lalou ho khu felna vetsahna hijeng loudi ham!
  255.  

  256. Christmas a sa nehlou sanga manda jengdi tiloi hi akichiehna khat umjo ahi. Ijeh inem itileh tahsa beija lhagao chu athisa ahi kiti hi thutheng a jong kisei ahi. Tahsa oivadi gel chu lhagao lam gelna joh jong himaithei ahi. Christmas kipana akinahvang’a tahsa oivanadi aumlouleh Christmas kipana jong bukimtheilou tobang ahi.
  257.  

  258. News a imin le ilim kitahdohdi thanom ngen ihijeh un khosung vengsung jousen news khat bolcheh leh lampi khat beh ah mijouse min khatvei beh news a kimutahihdi ham. Chutileh tunin nupi hon thing apouvin, upa hon song apouvin, nungah hon twi akhai uvin, gollhang hon ball apeh uvin, nilhah in upa naolhang holeh gollhang ho ju akham un akidel uve tiho beh thuso ah pahlah lahjengdi!
  259.  

  260. Khoppi, Jubilee, hohi kum hijat jat lhinna ahi tia kimangji ahina’n abangkhatloi chun ama changtum’a aji toh akingailai, akichenlai geldohna a mangloi, abangkhat chun gamvea chena dia chance phatah a neiloi, abangkhat kitchun khat to kimutona a mangloi, ahidimong ahi tidi hijeng dan ahe.
  261.  

  262. Leiset gampheng kehletbe thei hihih tajong leh kho thah thah, veng thah thah tundohmo ahilou hi kipa aumin machalna ahi tidi hijengdan ahe. Haosa association member pung cheh cheh intin kin le dong khat aumleh sum hintohdi jong tambe intin aphalheh jenge tidi himai. Kho le veng kikehsoa kho thah veng thah akibol louppu leh.
  263.  

  264. Tulai hi sum/paisa khang ahitah jeh in sum hintohdoh doh chu touna thupi pi alodi ahimaije. Hou natong ho sang’a politician ham, business ham hojong chun sum ahin tamtodoh pouleh hou thu lang’a kikhopna thupi pi hoa jong pulpit lang alothei, houin thenso hojong bolthei, hou thua kikhopna kin thupi ponlap khaidoh a jong pangthei ahitai. Hiche hi tahsa lhagao kitohdel’a achena himailoudi ham!
  265.  

  266. Lhagao lam jeng thu bou boipi taleu hen chenna ding in le lou, gam le go neilouva ki umgam taloudi ham. Tahsa lang inchen thu bou boipi taleu hen ithinung leh vangam kilut kit taloudi. Isei langlang adih e. hijeh chun inchen boipi holeh lhagao thu bou gel hojong oimodi khatcha aumdehpoi.
  267.  

  268. Gampama um kumlhundi kona in hungji ho hi Christmas le new year mangdia hung jiham kiti jineidi loi, jineina kina jaodiloi, chabel domdiloi, kiguh tholthodia kigoloi.Ipi hileh lungel khat neija inlam hinjonji ho hi achuhna khat vang umthou nante.
  269.  

  270. Khantou machalna di lunggel (Idea) hoitah tah ineija, seijong iseilea atah tah a boldi ahahsat a koiman ajuilou leh ipi phachom diham. Hiche sang’a mi pom thei le jui thei seile chu lunggel nasatah hihih jong leh phachomjo maithei loudi ham.
  271.  

  272. Christmas mandidan kigotna jatjat nei ki umjeng vanglah. Hou in kikhop pet lenkhom pet hoa bazaar lang phahdi, inthip khatna duri point boldi, buneh dikon leh hall in lang thideldi tia kigotna jong hi Christmas thanopna khat ahithouve.
  273.  

  274. Kum khat a khatvei sang’in Sunday niseh leh Award jatjat kihom jingthei leveng alunglhai akipah ding tam vehta. Prize tijong umchomloudi,atam theichan’a award sangdi tamsahdi,chutileh kum khat sunga achanglou hung umbeh taloudi, chuteng mijouse kipah tante.
  275.  

  276. Tulai thingnoi songnoi atamtan koi hi haosa ho moltum hia koihi khochaga ho vengbitdi hitam akihethei tapoi. Ole haosa association honjong private army aphudoh khat u hitam, ahilouleh ni nunung lang leh amitakip inAK jangvoh beh ahin kichoija insonna thingnoimi hung hidi ahitai kiti chu guilkhung hitam!
  277.  

  278. Lamkai hidi deite chu kumlui sung ah lamkai panmun tuhkhatahihjong leh olmodi ahipoi. Khovei kumthah teng ahoubung, khosung, vengsung ho ham, social kiloikhomna ho khat beh a lamkai panmun khatbeh hina teidia taona to thoa kiha gotdi himai loudiham!
  279.  

SHARE
Previous articleBlankfire #2
Next articleBlank fire #4