Blankfire #2

Blankfire #2

313
0
SHARE

Blankfire (July 15 onwards)
(Note: Blankfire a sodi hinthot jihon ahitheichanna khat changtum/party tum gotna hilou society lhangpia kapna bou akideiye, Na min le umna jong akisoloudi vanga nahin pehtha ngai ahi. –Ed.)

151.Tulai hi numei pasal kibang ahitai, thepna leh boltheina dangdang chanvou neina hoajong numei pasal kibang ahitai akite. Hijeh a hiba numei hojong pasal sang’a khohjo, mengphela khamjing loi umjong hivehta.

152. Du la dua kijong kolchu dumosah, deila deija kideimosah, nom la nom’a kidasah a eikijol jol le ti, sim la simnom’a adasasa’a kisimsah dan’a kisei. Hitobang miho hi leiset chung leh vanchung ah munla neipouvintin leinoiyah kicholdo loileu phapendi ahi.

153. Ima helou hotah tah in koima ima dohnomlou, koiman adohlou hotah tah ki Advijor sah kitnomji, chih thilit a ching le thil heho ima heloudan’a mi thil dong lele loi umkit, kate katei, hiti jeh tahtah a hiba boigamji hinte.

154. Bandh, le curfew ho hi atheida keiloi aumvang’a phaje saloi tam, abangkhat chun boina kichaithei hih beh leh tia boina hung kichaidi kikhotoloi umnalai ahe, mi hi ajatjat ki umji mong ahe.

155. Mimotah khatjong akipehnalam, aboltheilam khat aumjie akiti-e. Ahin munkhatna sinthei hilou ho mundanga sinthei ahilam akijakhapoi. Seiphatna lekha kipe hobon mi kinepna bang hijilou seisetna lekha kipe ho I atitadem!

156. Mipha pha achevah e, athivah hohi mipha ahijeh a …..kitiji hi adihna umjong leh aphatlouna khat chu miphalou hon chevahnalou dia phamo tah a umjingdi atimaithei u ahi. Miphalou ho achevah aumlevang aphat jeh a chevah a kiseidh kit mong hinam akihepoi.

157. Seminar tampi akiboltan, houin najong thu tampi Sunday niseh leh akiseijin ahivangin ihina, ilhohbu, ihetna leh idinmun hon atuo hinam ti helou atam jeh a society sung boina dim ahi jeh in hiche thua seminar le sermon ho haboldi dan hileh akilome.

158. Thilpha bolna lama boltheina neiloi umintin, thilse bolnalama bolthei loi uminte. Ahin thilse bol lama bolthei ho aphatheijun mi lungset leh seiphat achang jiuve tivang akijakhapoi, ole umthouva kiseidohlou, kijakhalou joh ahidem akihepoi.

159. Jou seija kivah ho chu mi khat kom’a khatvei kal jou aseitheilou, ajoulheptheiloudi ahi.Ahin joubolthei mi tamthou hiya khoh dehlou, joulhep thei mingol la tam, michingtah holeh kichihsah tah hojong jouseiya kivah hon lhemlhaji thou!

160. Ihindan ikicheidan ithusei iumchandanla ki-ki standard sah mama, ihekhalou hon ei musangten maithei, Ahia I insung, I invel tui le bon thanglhajeng, ivengsung lampi hola bonnang dimjeng, go ahajuh jep leh pukhri kisoh kitgam jeng.

161. Thu pha-pha, ahoihoi seivang hahsalou, atohdoh joh hahsa ahijeh a toumun a tohding seitho leh tohtho hi akibahlouna um ahi. Ahin ahoi apha ipiham ti tahbah jong helouloi um ahijeh in seithoa thiem hojong pachat umthou ahi. Ajeh chu asei beh a pangtheilou loijong um ahi.

162. Mihem hi datmo um akihi-e. ei hephalouhel khatjong kideicha a kithipigot jeng, eihephalou khatjong kikipapiloi, kilainatpi loi, apul kidouloi um ahi. Eihephadi ho kilainatpi thei henlang chubang chun eilainatpi khatjong chu kilethuh jouleh phalheh divang ahe.

163. Sapte thuchih a “ahnou keu masang’in ijat ham sim hih in” kiti hi kihilna thei tah ahi. Ijeh inem itileh tohding bolding kiseipan bep nalaija tohdoh boldoh umsa tobang’a kisei lele hi tamji ahi. Ahpin atui hijat athai tia ahnou hijat keudi ahitai kitigo to kilou umji ahi.

164. Tulai hi khantouna khang ahijeh ham school oja honjong school chapang ho vothei talou, alen injong chapang khat phoh thei talou, nu le pate jong achate kisan masang’a uhpoh ngam talou, achate phatmona hojong ahoihoina a sei tam ahitai. Hijeh a hi phatmo nalama machalna um hivehtaba.

165. Mi bangkhat chu foreign gampam akiti poupou leh moh thanop jeng, moh gel thupi jeng, Gampam foreign a che di thanom loi, foreign akon kithopina mudi thanom loi, foreign a boina hahsatna aumleh kithopina thotdi thanom jeng. Ei gama isopi hahsatna toh umteng hibang hin kithanom levang thanop uminte.

166. Ahunglhungdi thu seikhomdi kihoukhomdi mong ahi. Ahin aphachomloudi achesa thu ho seija khat le khat kitaimoto ham, ei le ei kiseiphat ham, itohdoh ho mipi koma seiphongnadi hovang umda leh machalna hinte ti tahsan aume.

167. Vo kateijo, lhang khat maimaija phung khat sunga kho le haosa hijat jat ium thei uha, achutileh kho khat khat a hi in ijat cheng phaloi aumdi o? Hichi jeh a kho khat akichaije akitijongleh in 5 loi, in 10 noija loi hiji hinte. Kho tam, haosa tam jeh a khantouna umdi hileh America te ikhel diu ahitai.

168. Selthi nungsanga seltho kai ibola phatchomda diham, seltho ikaipou leh bong le loi tho kikaijong hithajeng chula em. Sel thi masanga tho kailoi umin tin selthi nunga tho kailoi umji mong ahi. Hiche hi khonung limna khat ahin khonung jenga limdohlou sanga phajo nalai ahi.

169. Kuki min hi adeilou honjong kiselna’a aman, election teng business a neigo tam, adeija thipi gohonjong aletnadi leh ahatbena dia mi hoitupdi ti umlouva delmangdi ti bou hinalai ahi.

170. Mi din na katonge tia itohdoh sanga inehdoh iguhdoh tam taleh koi akipah dem. Sum nehguh bou nehguh chahguh a kisei, kin le dong khatna sa akitha leh akehkhat langdeh kigumangji khu nehguh ahilou leh donguh ba hidi hitam.

171. Inpi kiti hi haosa tina hilouham, achutileh ipipi inpi iti umthei hitaimo, chapang inpi kitijong ahung kija kit tan ijoleh gollhang inpi, nungah inpi, nupiho inpi, tehse ho inpi hung umdidan ahitai, upa inpi la aumsa. Haosa deite ihijeh uva inpi jong idei u hibouvinte.

172. Hoilang ipi twilet leh munchim jeh a hahsat genthei toh ho kithopina hung ngai hitam, wat app leh club min jatjat ahung kijadohtan chomkhat laija mobile phone news editor taital kipoh ngen ahunghi akichaitai kiti tun Admin (administrator) taital (title) nei ahung tam kit tan khantouna khat ahi tidi hijeng inte.

173. Nehkhomna kin khat akibolteng akikou mongmong loi aumin, koulou phamo tia kikouloi aumjin, ahunglouding henasa a kikouloi aumjin abangchu bazaar a kimuto jeh a gah kikou maimai loi jong aume. Aipi chu hileh akikou chu akikou ahijengin akikoupoi tinadi umlou ahi.

174. Tulai huinan dan pihi mithase din tohdi aumpoi kiti leh mi meidoi din kungbul jong kichat thei ahi tia kiseiji adihna chan aume tinathei ahung umji e. Ai kohan thojengdi ti loi leh ponvai kigotdia kigosalem’a umlomlom divang!

175. Alupna mun’a nomtah a mobile phone kichoija facebook, wats app group ho mangcha’a bolchahdi hijeng tia lhangsamji hohi akoimi hileh amahotah hungchomdoh uhenlang gal lamkaijin pang ngapleujong thukhat, hungtao ikiboldiu chu tia mi hungtahbah teng atokekea jamdi ho ahinomjie.

176. Thuso isim leh Society dangdang sanga ei society machalna hi haosa leh C-in-C tambe jinghi ahi. Kho leh thingnoi party sem abai behset jeh hinantin hinlah ijoleh public sanga haosa leh C-in-C hung tamjo diham ti ahi. Thil hi atamval teng athupina aumtheitapoi ti thu ahi.

177. Kichih theidi, limgeh a umdi akiti teng kicha tija tah a dimdi tina ngap ham, mohva valoudi akititeng I indan sunga kikulkhup jenga I inmai ivengsung tahbah a vadohloudi tina ngap ham! Mi le sa ho en ikichat banga amahonjong eikichat ahi hetdia pha ahe.

178. Ajamjam, a inn alou dalha-lha sum leuding, vohcha leuding, mol anehding, a inn alou changtalouding ahung kiti tah invang a inn’a kanglong kikhai umtalou, koiman kichatlam, jamdilam geltalou. Abul bul’a pat hitia seidi lamkai anaumleh ong, hachangthah thah ium jiuve, kolvom hobon deulouva!

179. Khai…khai… thu akhohtai, gollhang ahathat hung chomdoh un akitileh polou khat ahung chomdoh e kiti thuchih hi tuni geiya kithojing ahijeh a aching athem, angailu akhohsah ho hung chomdoh un akitileh koima kivatlou hileh akilomin thanop nop aume. Seithodibou hilou, atongdi thanomjong tamleh Kuki peace accord kitijong kijapan tante.

180. Minu mipa te leh tehse hon atu achetau apho pho pet ukhu aphatpet ahijin ahingaosap uham ahung lhasetkhum teng uleh vang leh damtheina chang koima umbehlou ahijeh in katu kacha ibol’a hiti khati nahim tia kiseipet hi aphatpet hididan ahe.

181. Mijousen amagelcheh hi adihpen, athupipen, aphapen, machalnadipen, kitonadipen ahi atijeh a boina um ahi. Min ithusei lahen itileh mi lahtheidi seidi ahijenge. Aching athem ngen, adviser negn ahung hijiteng boiloji ahi.

182. Gammang’a humpi kapdi thu kiseidiham tia thanomtah a kigo hochu invela vohcha lhaile ho kapdi thupou akiseleh koiba thanom’a lipkutkutdi hitam, Nikhotha leh nehman kisumang ho jatbeh kiseidoh henlang thil thupi khat beh ah achuhna khat umdohtheilevang kilomtah hidi ahi.

183. Thu haseija pang ho chun atohjong atohdi, atongloudi chun seijong seidadi hilevang aseidi kichuthona umloudi, nang seijo tia kijato tah a seimun ki ot tuo, kipehtuona ho dim mintin chuteng angaidijong umkit tahih inte.

184. Koipu thidiham, pasal achal hulte tamtah kisuhtona’a akham akingolsah aumin akinaloi achohlhajeng uve ti thu kijalou hi second coming naithou hitabouvinte. numei chapang hobou lungneo jeh a nuohjiham kiti pasal chalteh hojong anuohloi aume kitijong kihelna khat tidi ahimaije.

185. Mi themkhat ikisuhtoleh group thah khat phudoh jeng kiti hi thil jousea umdan ahe. Ipi khantouna khat nin iphah u hitam ilah uvah FB group leh Wats app group hi jong eh vadung kiti chu ahung bang kit tan thingnoi group leh houbung tamtah umtoh ahung kilo thimtai. Group khat leh group dangkhat kidemtona vang aumpon kipa aume.

186. Midang’in I inn ilou ahaldi toh, ei le eihon ikihaldiu toh, hiche hiba hijahi politics kiti chu. politics chedan dihlou aga hung kimudohpan, naoso nat kipatna hinalaidi. Meikong ho chu 1990 lai geldoh aum’in alungheljong um ngapbouvinte.

187. Thil aphalam’a manje hetloujeh hitam facebook wats app ho aumlou abangtan, iti navah um hitam, lungsuboidi thu le la kijatalou. Kipa umchu, tuchun boltao boltao tinathei umtalou, thumanlou, thudihlou pou kithejal’a toumunaanop chabep kiseiho chu ichan agentadiuvem lungsetbon umleu unte.

188. Thil phachomlou loi khat lah a athupenloi khat chu ahileh thil khat asojouteng demna thuphon bol hi ahi. Sangtah in kidem henlang nemtah in kidem jongleh aga chu thakhat hithouthou ahi, hichu aphachomlou gel ahi. Ipi thu ipi la hileh dem kiti hi ahahsavang hilou ahi.

189. State Assembly a Tribal MLA um phatchuom le phatchomlou iti kihetda diham, a umle umlou iti kibahdiham, um tahihleh agamohtou toudi tahbahjong umloudi, Anti-Tribal Bill pass kibolteng jongleh thipbeh a vedi bep aum ngaai chula em, moh a haltao, boltao ahung kitilo bepme ti thu bou ahi.

190. Thinglhangmi ho ahung pangkhomtan bandh bol lam ah ahung kithutoh tauvin meihal lam’ajong kitosot tona ahinnei tauve ahung kitileh ati kihotjengloi umdi ahijeh in athihojong mohseh hidehloudi ahi. Ahin chomkah louleh ipi ahung kichu kitdiuvem tibou ahe.

191. Khatvei veileh duty khat bolna a minu te ihmumo bunemanlouva aumjiu hi aw. Nisa bandh duty athipdome akitileh Meisa (meihal) bandh duty ahung umdoh kit. Mnu jousen ama ama insung chieh ah koima potdoh theiloudi tin curfew koitheilevang munkhat a Nisa bandh, Meisa bandh duty gabol ngailoudi hiya.

192. Lhagao thu bible thu seina vang ahipoi. Ahin new testament a koiholoi ham chun taona aman teng uleh lampi dung ah akhut adom un vanchung lang adah jiuve, hichu mihon kataonaman muhih khante ti deina ahi akitie. Eimadi hihen nampidi hileh itaona man pathen in ahetle hijengloudiham.

193. Jankhang janvai geiya lamlen le kholai dunga nupi hon duty ahitiboljing uleh ijoteng upa hon in-ngah a pangdi kahipouve tin bandh boldi hintiget uvinte. Upa hon ajiteu chunga kiphinna khat hinbol khaleu Government koma kiphinna sanga hung khohjo maithei, Ibobi, Modi le Obama hogeijin alonaje ahetloudi ahe.

194. Mipi akon kiphaltah leh ngailutna neitah a Donation hung kitohdohji hohi alhunnadi alhunjiloukom um ahijeh in Donation box hohi thih a kisem box ahiji ngaibouvinte. Chuleh donation box chabi choi hohi thigeiya kitah ho hile lungmon umdi ahe, achutilouleh box thu ah chapang nehthei kichu hung bang khante.

195. Boina jonghi mi bangkhat dia van’a kon maana hung khelha tobang ahijin jangpu leh jangpi hodia kipeinadi, lhainadi, boldi seidi tohdi thamdi dimlhajeng ahi. Hiche dungjuiya cholman lhaiman lojong umthoudi.

196.Thu le la aboiteng thuso simdi thanom tam, mipi simdia ahetna leh athepna podoh dijong tam, thusoh lasoh chomkhom’a wats app le FB a news thejaldila tam, chomkhat jouleh self-styled journalist association hung kiphutdoh a President, secretary le Finance post hojong hung ong sausau maithei ahijeh in thanopjong aumbouve.

197. Kate katei, hoilang ipi boina khat hung umdoh hitam Sovereign State demand boldi kitilou chabou ahi. Thalchoi Group ho kikah a kithatona a anathi jousepi chu tuchung tobang kiphinna a thi hileu Tribal Continent lom hitahihjongleh Tribal independent Country behvang demand hisa hidi ahi.

198. Mohseh ahe, ILP thua hitobang boina hi themkhat amajeptan, khovei tuphat hileh mi phabep dia 2017 February teng ipihamkhat umdia kipei khutchelna di golden chance hitadi. 2017 adiala vaima jep, 2015 May-June a diala vaigepjep kit.

199. Tulai pihi jat min, nam min hoa kiboina khang ahitah jeh in mi khat chu apenpen leh athiteng alhansong chunga jihdi ajat min leh anam min ho seitohsa a koija pha hibouvinte. Thadou kineisahloi, Kuki kineisahloi, Zomi kineisahloi, Mizo kineisahloi, tun Tribal kineisahloi, aban ipi kineisahtenloi ahung hitadem!

200. Kihetalou, sun le jana duty kipo hi gam le nam huhnadi hitam government office huhna di hitam, government inla khai “nupi ho hichan geija na inn nalou donlouva ka office ho huhnadia pan nalah uhi kipa aume” ti kamcheng khatla umlou, akiphin ham, govt sepai kithopi ham akihtapoi.

201. English te thuchih a sakol masanga kangtalai kikoi (putting the cart before the horse) kitileh eipaova muloulaija delhoh kiti hi akibangthim’e. Tupet tah a thu kisei, thil kibolho hi hiche paochamtoh ni kibolna aha umlheh e.

202. Kho khat vengkhat phung khat akon’in MLA candidate phabep umdohleh khatbeh kikai loudiham kitite dan’in Political Demand jonghi ajatjat phabeppi kibol jengleh khatbeh kimunalou diham ti gelthei hibouvinte. Ahilouleh nuoiya kijih hohi khatpenn, phante natipenpen u neipetauvin ti ngapma pha ham!

203. Haosa hon hon gam ajuohdohji e ti thu anakiseiji in tun MLA hon agam ule amiteu ajuohdoh uve akitikittan, gamjuoh kitetna a hi kon first aladem? Kuoi hi gam le nam huhdi ham, kuoi hi ajuohdi ham akihetapon, numei loikhat banga ama le ama kijuoh aumlou pouleh kipa aume tidi ahijeng’e.

204. Sum a hi thil jouse kicho thei, mihem jong kichothei, politics jong kichodoh thei, kiphinna neigojong kichodoh thei ahi atijiu khu ichan dih ahidem, amuh kisippeh kitijong aumji’n ipihamkhat a muh akisip levang koima apaodoh theiji tapoi akitin paodoh theilouna chu ipia kisip ahitadem?

205. Lekha hetlou jeh leh ima hetlou jeh a bolkhel ho chu chunga panjong angaidam maitheidi amavang henasa a sum le pai leh ama ama dinmun khohsahjo a bolkhel ho chu nikhat leh atohga hung kiphongdoh thouthou loudi ham. Ijeh inem itileh henasa bolchu chonse, mihem in atutu a at ne akitie.

206. Nu oisung khat akon peng ucha naocha ho bon akitotheilouva adoncheh ajatchomcheh aseitheileh paochomchom thoho leh thinglhang le phaicham miho kitomodi chu datmo umloutah hidi ahi. Ipi hileh pendol, neojo upatjoh kitijong hi politics lut gamji ahitai.

207. Tribal lah a sum le pai nei abolthei cheh hochu miten benglam bang’in angolbolun alhemlha deltaovin ahileh lheplhah a umho chun amaho sanga gamchenga chingjo le ngoljo nalai mipiho pichu abenglam lhep got kit u ahitai.

208. Tulai mihem kiti vanghi ching lheh jongleh lekha ahetlouleh boilhehta, lekha them lheh jongleh achinglouhel hojong boicheh kit, lekha thep to chih kophola ajonchih behseh kit jeh uva leboikit, ahitijeh a hi hiti ahitai tidi himai.

209. Akitohloudi te chu sanatum le songmantam kisahjongleu kei joh sana emset leh songmantamjo kahi tia kitohloudiu, akitohdi te chu jong-eh kisahjongleu kitohdiu ahi. Mi’n malang adelleh en nunglang deldi chu dihthei di hinam sopite.

210. Social media (FB, Wats app) hoa koima sollouva pontho tah a kinelna a pangjing ho khu sumlonadi natoh helou le aphachomloudi khat seina a kihabolten ho ahijeh un kipaman pehdi hileh prize di moreh langa gatol tho ngaijinte. Ajeh chu hitobang natohna a kihabolten ho population hi tamthou ahitai.

211. Mipi kiphinna gimneitah leh sotpitah ahung umjiteng mi bangkhat dia changpal lei lhung tobang hiji, mi bangkhat dia a inn alou aji acha lam hephalouva kithipei kit, mi bangkhat dia election a dia panmun kisiemna phatah hung hikit, anom’e tidi himai.

212. Jou le nal seilea ima jouse hung kichai jingloudi, meithal power a imajouse hung che jingloudi, phung le chang thua kibungkhenna boldoh a phatchomna neidi kiti hung hithei jingloudi, tahsa lam thu gelna a pathen thua kisel hojong ahitheilou phat le nikho ho hung lhungdi ahe.

213. Phung le chang thu upa naopa thu hasei hohi nunglang thu seija boipi ahijeh un amalama machalna divang umloudi ahi. Kijonkapna vang hipontin ahijongle iba kilodiham, americaten jong phung thu changthu neojo lenjo thu ahasei jeh uva chidang gamdang sanga vanthamjol aphah u hiteidi ahi.

214. Kipunkhomdi thu akihasei laisea kikhentelna um ahijeh in tukal kipunkhomdi thu seitahlouding, kitonadi thu akihaseilaisea kitomona umji ahijeh in kitonadi thu seitahloudi ahi. Ahilouleh kikhentelbeu te kiti ngapleh kipunkhomna aumjodem.

215. Boina khat aumteng phat sottah asun ajan umlouva kipeilea lhaile ho pikhu government in lhalo apeh ula ahipon ipi aneh uva a insung ipia avah u ahidem, boina umtahihleh tohding thamding dang aneina diuvem datmo aumkom aumjie.

216. Kanatohna le kapanmun’a kon’in haitang’e kiti henlang, mi’n achutileh aphai kipa aume haitahbah tan hintileh ipi akisei tadem? Lungkhamdi ahipoi, Paupu banga mi’n nalungsim a etmaimaileh ….(mi’n nalungthim avet maimaileh …. itile kichaivot.

217. Kut bolloi umintin, Sports bolpeh bolloi umintin, thilong oploi umintin, toumun kiphinna boldiloi umintin, bandh bolloi umintin, dungpei vaipei tholoi umintin, kon ipi ti am, kon ipi abollam ti hephalou loijong umdimong ahi. Hiche hi society ah ajatjat aki ume tina himailoudiham.

218. Sum a kitahlou hola kidem, sum holgunkeiya kipei hojong kadem, sum neilou hola imadijong katikitlou,thulah ajong kikoilou. Mijouse kitah tah a umtheina din inson ah sum gana thingphung khat kinei sohkeile mijousen kitahna hinkho amantahloudi ham.

219. Minphatdi bou gelna a natong ho chu koiman hinpahcha tahileh aboldoh phachom umjongleh amadia phachomloudi hitalouham? Tulai mi hopi hi credit deina maimai bouva thusei lasa thilbol ngenbeh. Ki benglam pachat behpma thanom theiho vang chu pachat jong um ngap ahijeh in credit (minphat) jouse hongphal tah a pehdi ahimaije.

220. Junchen khohelou khat angoh e kitidan’a society sunga kitomona hohi government natoh ahi tia ngohloi, michingtah leh kitohtah a ana khosa pu le pa ho ngohloi. Ngohdi ihetlouleh ei le ei iki ngohdi, ei le ei themmo ikichanteng kitona umtante.

221. Lekhathem honjong aphat le amun dungjuiya ipi iti seidiham helou. Thiluong chunga houlimna kamange kitia hitobang phat pha kamu jeh in kakipah in pathen kathangvah e kitiji khu!! Thuseinadi phat eikipeh jeh in kakipah e itile thukhat. ABC helou ipu ipateu thiluong chunga akitomjiu chu aphaat le amun dungjuia seidi le boldi ahet jeh u ahi.

222.Thina khat, boina khat, kipa thanop golnop khat aumleh laa kisemdoh jeng cassette a hung kiboldoh jeng, chomkhat jouleh album a jong hung kithodoh jengkit. Lasem lasah langa eijute kon iphah diuham, lunglen la, vahcoina la, gam ngailutna la sem le sah hoa koi ki otcha diham. Laa a gam deldohdi hilevang ……!!!

223. Lekhathem honjong aphat le amun dungjuiya ipi iti seidiham helou. Thiluong chunga houlimna kamange kitia hitobang phat pha kamu jeh in kakipah in pathen kathangvah e kitiji khu!! Thuseinadi phat eikipeh jeh in kakipah e itile thukhat. ABC helou ipu ipateu thiluong chunga akitomjiu chu aphaat le amun dungjuia seidi le boldi ahet jeh u ahi.

224. Nam sunga kitomona bulpi a kisei milui milun ho ahung kibanchai teng uleh khangthah lah ah lekhathem aching abolthei kitonadi lunggel nei hung umdoh intin kitona jong hung umdoh ditam akitileh vo katei akhohcheh, akukal cheh, kitomona cheh bulpi hung kisepdoh gamdiudan in aumtan kikhoto aume!

225. Tulai hi thi le man toset vangsetna hoajong kisopi bolna leh kichuomsaha ho dim ahitah jeh in keiho mi le sa ahibouve, nanghoa ahipoi, aboipidin hung kikum hih un, keihon kisasah naovinge ti lungput jong um ahitain aphatna khatjong um nuijat aumnakhat jong umji ahi.

226. Delhi a gache jousen innlang ahung kile teng sangkhol toka kengchot thah holeh nehthei ahinpohjiu ahilou jeh in kimoh nep pidi ahipoi ti hi ol ol’a hung kihedohpan pandi dan ahe. Maimol thethua inlang hung kile sanga chomkhat hung kiki thehdoh tadi nalai hen tijong um maitheiji ahi.

227. Miss kut umloudi akitileh kut jong akibollo aumpoi tidi tam, miss kut aumjongleh ademdi tamcheh, pu lam pa lam bou khohsahdi ahi tiho tahtah min pu lam pa lam bou boldi atileh thanop jong aumpoi tikit, abaotam tedia kon ipi bolleh demnadi hethou thou, min imacha boldadi tijongleh boldi ahi tidi ngen hikit. Minna ikiboiboi sang uva baotamte kisahdi hija hi.

228. Ucha, pacha, nupa kina a kitohmo hokhu kipapilou behdi, akitomaonadiu thu jong seiloubehdi ahibouve, alah uva khat to nahung kinahteng abon uva hung pangkhomdiu hichepa hichenucha hiba hijahi nahintidiu ahe.

229. I society sung’ah lamchomchom’a sumhol atambehsehtan chomkhat jouleh ihungkhantou diuvang kinep aumlheh in igam ujong hung pahlah-lah jengdi tahsan aum’e, idam nah uleh. Sum hollou chu konba alupna a akama agabahlut diham.

230. Gamsunga chamna umhen itileh election kiti mongmong umloudi, panmun khat lonom chun thepna ham, lottery system hama bou amudi ahi. Chutileh faction acheuve kiti thujong umtaloudi, hiche te phung le chang thu ah akikhen un, hiche holoi chu contract natohdi akichu uve kitijong umtaloudi, ichannau gam hi cham le lungmon dimtante.

231. Phat le nikho kikhel dungjuijin tulai hi mihem hojong a nam hina kikhelna leh kihetdohna umjing, Chavang kut kihabollaisea Naga nam a um phabep Kuki sopi hung hidoh jingdi, Kuki nam mi hojong Naga hidehdeh hijeplou loijong umdalou. Mijouse hi Adam le Eve chilhah akihileh kitomonadi umloudidan hija.

232. Group khat kiti photna lamkai khat hidi thanomtenvang tamthou ahe. Thingnoi group group hitam, watsap group group hitam, group phudoh ihiti thanop u. mi li le nga ikisuhtoleh group khat lengdoh taleilei, c in c, chairman, secretary leh panmun dangdang loding kigollha jeng. Hiche hi machalna khat himaidan ahitai.

233. Kihouna aneidiu ahi, tunin meeting anei uve kiti hi kisei kumlhungding kija kumlhungdidan ahe, aki houho hitin khatin akinopto tauvin aseilhatauve kitila akijamongmong hihlaijin. Mi’n akoukouva ajoljol petna kikaisahji hohi nungah hihen koi hileh achainaleh kitunthopna nailamji ahe.

134. Mi thilbol natoh khat phalheh jongleh akalna a thilkhat bolteidi, seiteidi ti hi Satan agent hina khat ahijeh in meidil jotna lampi a chejingna khat ahi geldoh di hinte. Ole damun lutdi thanom ten ngen hitamla akihepoi. Mi pachat je he le tilkhouthei ho chu kipana khatvang achan teidiu tahsan ahe.

135. Ahina sanga sangjo lenjo le thupijoa kigelkha ho chun lunglhahna atoteiji hilouham? Lekhathem tamtah ahinaleh adinmun tothuh-a tohding helou, khangthah thahat tah hola thaguma na tohding nomlou tam. Hiche jeh a hi vannoi leiset boi hinte.

136. Tohding thamding helou tobanga kipa golnop le kichep langa lunglut le thanom vang tam thoudan ahe. Hitobang hin natohdi leh kipunkhomna lang ah kithanom sohkei theileh ajeje khat vang umthoudi ahe.

137. Mi tamtah kisuhkhom manna koima kichatloudi ti chu mihangsan tah danin kigel jongleu numei le chapang hina bou ahi. Mi hangsan ho chu achangseh in mi tamtah to kimaito jongleh olmo dehloudi ahi. Aloi ajatmi tamtah toh aumkhom petna humpi bangjeng ho chu achang uva alhatniu leh mengnou hitaovinte.

138. Tukum pi chu Bill 3 jeh a boina umjeh ham, demna le gotna thu kikaplahlah jeh ham Meitei kisoh dehdeh holah ah kumdang bangin nigon chakkouba bol achoh jeju tahih beh e. Ahilouleh CHAK-kouba hilouva CHA-kouba joh bola chatui tambeh hijongle kisonsah a kichaite ahitadem!

139.Tulai mi angol tapoi. Angolpen hojong chu ilheplhah gotleh eisanga jonchih gam jiu ahitai. Thu kisei thil kibol jouse hi kum le lha toh hisap kibolthaji ahitah jeh in moh seisei tiho hi bolda a atoh a joh seidi phajodi ahi.

140. Gam le society adia tohdoh boldoh imala mi hetthei dia boldoh aumpon, hijeh chun seminar, conference, khoppi holeh golnop dangdang ho habola bola society adia iboldoh leh hahsat genthei ithohna ho haseijin kiseihenlang report pedi kiki chutho jengleh aphapen himai loudi baha, ole!

141. Kin le program khat a phaat kino nunga sot tahtah houlimna mangji ho dia Camp khat bola pha ahitai. Upa camp, nupi camp, chapang camp, nupa camp, milun camp ho akibolloute la aumtapon thu seisotlou camp kibolleh dei aumtabouve!

142. Lasah lasem langa gamtum mudi hilevang ki olmo pontin ichan hamkhat jong kipha tabouvinte. Thu le la langa ihat banghin ima jouse ah ki hat leh tua sanga ki machal chehdi ahe. Ahilou ngapleh nam la ho hi English le hindi in kiban ledoh henlang Modi leh Obama kithot leh achuhna khat umbouvinte!

143. Ei le ei ikithamto teng ngeplahlah jeng, meipum ginjong ngei lhehji, midang to ahidi teng lunggel theitah kibang jeng, manchah hojong a apgam leh agingtheilou bangjita. Propaganda le athu maimaia choh thethu bou kihijita.

144. Chapa kahe, ipi khantouna in iphah u ahitadem, chapang chacha leh numei ho kisan phung le chang thu seina a kukalten loijong atamtan hitipia hi society kitona le machalna ummongdi hinam lungdon aume. Chapang injong kijapina neitalou, numei injong numei kahi ti kihet talou, katei katei hoilang kivedi hitam!

145. Suong phu khang ahijeh hin suong mistri ho leh suong chunga lekha jem khenthei ho dia income muna phatah hung hijingdidan ahe. Jubilee suongphu, anniversary suongphu, The hetjingna lhansuongphu ho bana tua athah beh a chi le nam kihetna suongphu hung kipan, kitetna jong hung ummaitheidin BAAL themgao hon asei uve.

146. Midang jeh a ei le ei kikah a ki oimotonadi thu ngailoubeh ahi. Iki oimotodi leh koima them changdi umponte. Mi ioimo itaimoleh ei kioimo masatpendi ahi. Ei le ei ki oimoje kihesohlei leh midang oimonathei kiheloudi ahi.

147. Iphamkhat ithoi a akhoh chehcheh leh ithoidale hijeng loudiham. Kumlhung lhalhunga niseh leh kihouna aume kitia achaina umthei mongmonglou chu asohsoh soh agaigai gai nalo lo kilo o tidi himailoudi ham. Ole meeting boljing hi akoikoi ahia imoh thanoplhah u ahitadem, a imajong hutlouho kisan ihin kibanphindoh diu hile akilomthime, khat teho!

148. Society le Politics a ima lungdon lungkhamnadi aumpoi, ijeh inem itileh mi phabep hon niseh sun le jana kihoulimna anei uva bolding bollouding, apha ase, adih adihlou, boina khat iti suhlhapdiham tiho abona aseichaijiu ahitai, facebook le watsapp hoa meeting aboljiu thu bou ahi.

149. Mihem le gamsa akibahna um ahi. Ajeh chu sa’n akhonung athipin mihem in akam athipie akitie. Gamsa’n jong athinathei kihetlou, mihem injong kihetdehlou, thilopi nei leh boldoh thei gel chieh chu thakhat tidi hijeng loudi ham.

150. Namkhat sung society khatsunga koima akithuohchet leh akingailu sohkei aumdehpoi, akitoh tauve kitihojong asunga kiketto saosao sohkei ahi. Ahin midang society dang hettheia kidemto kiketto kisosalto leh kidel ho chun amitmona le ngolna atahdoh hidi ahi. Eiho society vang ichutisam pouve, oleba !!

151. Niloupi hunglhungdi ahitai, ni jakhat lhinna ni anaitai, hijeh a hi khopi gamlatah langa thi op hojong kipah uva lam le lasah choh jeju jengu hintin inlanga akiboi hojong kiboijing u hinte. Ni jakhat hihen ni jathum lhing leh itobang prize hung kisangdiham ti akihetlou thu bou ahi.

152. Ipi festival hileh boycott bolloi aumji vangin kon na boycott tabone tia nommo asahloudidan mutheina aumjin thangtom aum ngapme. Lungphatmo malah nahung panlou uchu akijen sel jenge, mi tamdan chu, kitibou vinte, oleba boycott bolloi umham umlouham jong kihephajilou hitamla akihepoi.

153. Mi khat chu aphatmona tamtah umjongleh aphatnatah khatbeh umloi tam ahin aphatmona ngen kihea kiseia aphatna himhim kiseilou loijong umji ahi. Chubang’a chu imacha a panna neilou kiti khatjong chu apanna khatbeh umji thou ahijeh in mi kikimna ahi tidi ahimaiye.

154. December lha ahung lhun poupouleh secnd hand bora dip dimkhat hongdoh dia kigojengloi, Christmas le new year a dia bong le voh holdia kipei khuchengloi, chini bongnoi podohdi leh homdia kigopanloi, picnic le party program gongpanloi, anome!!

155. Gamtum, kivaipohna tum deldel hojong hi hinban mu tahbah uleu gam hohi atum tuma hung kibanhop godiu, achaina leh kho khat veng khat gei chu separate administration thumloi, separate state thumloi, independent state demand bolloi hung umbouvinte.

156. Iboipidi dol cheh kiboipi thei chiehleh phajengdipi tua student holeh hou natong hon politics boipi, chapang hon phung thu chang thu boipi, politics bolhon business lang bou gel, thingnoi langhon hou leh sports lang boipi. Upa tehse hon atute boipilouva nungah lang mitkoulet loi umkit!!

157. Kiphinna khat nei kihi ham kiti record khat del joh kihi hitamla akihetapoi. Ipi hileh record khat boldoh kiti poupou chu nasatna khat ahi tia lahdi himailoudiham. Mi’n ni somko bandh blockad anaboljouleh enjong ni jakhat vuilouva koi chu record mongmong hidi ahi.

158. Mi bolding iseile abaija bai, anopma nom, ei boldi khat nin ahinseiteng koiman angainomlou ahi. Mi taimo jong abaiya bai, en ibolteng mi bolbang banga kibolthei kitdehlou ahi. Hijeh chun mi boldi bou sei hilouva ei boldi joh ipiham kivetdi, taimoa umlouna dia mi taimo loudi hinte.

159. Tribal unity tia kisamsam chu bandh hung kibolteng muthei ahung hiji tai. Khatnin bandh kou, khatnin hetphahpehlou, hephajongleh engkalna a bandh joplou, hijong chu khopi sungkhat mama hi. Khanin iphamkhat abolleh khanin boycott bol. Hiche hiba unity dihtah hinte.

160. Ikitha ikivoh seh leh hemkham kitijing hi ipi tina ham, custom jonghi ei le ei kah a mandi ahibouve ti ijatvei kiseidiham, nahiti jeh uva nahitiu ahi. Nangho tailou custom nei le thupi sahten koima umtalou. Hiche jeh a hi molthoh la kichailou, meichang nehla kichailou hivehta.

161. Tunaicha a hoilai ipi kho hamkhatna Declaration anakibol chu akipalkeh kit te, kilolna hohi palkeh di monga kibol ahi kiti hi iti dih a dih hitam, nampi tongkha thei koiman ama michang lungel’a milah a aseiloudi kiti chu eh asohjintai. Aban kon itileh ahinpalkeh kitdiham ngatho di hijeng.

162. Gamsung aboijin anompoi iti kitheidiham, gamsung ah vaichat sumle pai hahsatna aume iti kitheidiham, Festival golnop jatjat kiboltheija, sports golnop jong akichaitih umlouva kibolthei, Christmas kumthah golnop adia kigotnala angaija khucheng jing, gamsung anomin sum lepai jong akivatpoi tina himailoudiham!

163. Ahoi apha adeilou koi aumdem, thilkhat ahoimona leh adihlouna ngen mukeuva pachatnadi leh tilkhouna thei umjongleh akam le alungthim himhima potkhalou hochun society adia hoilaia ipi panna aneiloudi jeh a amihina akiphondoh bou hidi ahi.

164. Aumsa bon akideimoa kitona aumtheilouleh aumloulai achombeh khat a kitodi tivang chu hahsa bouvinte. Aphapen di khat chu eima eima dei leh hinathei theia uma kinahda phot, kitomona ho mi hetdia umsahlou phot joh hi kitona hijo bouvinte.

165. Thil khat henasasa a kihetmosah a mi dongji hotah hi theida aumtaove. Helou monga mi dongji ho chu seipehnom jong umnantin kihetmosah a mi dong ho hi engkhan ahiuvin aeng alouva donbut dia kilomtah ahiuve.

167. Juar kap, lekha kap, lagao lo akonin ahaodoh in a inchengdoh e kiti akijakhapoi. Chubangma chun tohding thamding donlouva moh vava moh um um ho akititheijin a inchengin sum aneije kiti jong akijakhapon inchendi leh sum neidi deiloula koima aumkitpon datmo vang aumlheh e.

168. Thil khat asetna leh ahoimona seije ihetleh ahoina leh aphatna jong seije hetdidan ahi. Athengpoi, akichehpoi tiho chun tua thengsel, hoisel leh kichehsel a lim ho hung kitatdoh hi tunvang aphatai, ahoitai, athengtai titheileh kilomtah ahi, ole ahidimonga ilahjeh uhamla kihetalou.

169. Mi’n ithu lahen itileh mi lahthei seidi dan hile akilome. Thu khat iseisei jenga konla ipi naseijemcha itilouleh malchakoh joh kibang hijengloudi ham. Alangkhatna mi thusei mi thilbol jouse dih hen hoilheh jongleh akalna a thu seiteidi tiloi jong kivatlou.

170. Thudih seisei chu koima vetnom changloudi ahimonge. Kiletsah tah a thusei houlim bolhojong koiman angainom dehpoi. Seikhel sanga tia amu kisip banga koima paodoh ngam umji talou, akamtam tam chu angol dana jong umkit, not thapma jong hung umji ahi.

171. Tuchung pihi chini bongnoi hung nengpantaleh akilombouve. Ajeh chu phat le nikho ache chetan ahileh kum 5 lhunnadi ahung nailam kit tai. Ahin chini chohlouva koia moh ngathodi vang second coming pong ngajeng ho kibangkhathei ahikitne.

172. Ipipijong iboldoh u hitam thanop jong aum ngap bouve. Europe football Club ho igamsunga pahlha jengta, European League tornament jong igam sunga kibol’a khulah lah jengta. Europe lang leh TV hoa Europe football Club ho kichep ngai talou, uniform honjong akikhetna bei, akichepdan vang kibangdi hinam ti thu bou.

172. Mi kumhei golnop bolteng thusei lasa a pangla hilou buhon mehona pangjong hikitlou, lenkhom lasahkhomna a toumaimai behjong bollou, in ngah beh a pangjong hilou, vahmangkei buneh phat khuchenga hindel anehchaichaileh kikhomangjelkit. Hitobang hohi nomsa ahiuve tidiham mi vangse ahiuve tidijoh ham akihetapoi.