Blank fire #4

Blank fire #4

334
0
SHARE

(Note: Blankfire a sodi hinthot jihon ahitheichanna khat changtum/party tum gotna hilou society lhangpia kapna bou akideiye, Na min le umna jong akisoloudi vanga nahin pehtha ngai ahi. –Ed.)

1. Igam sung ah khantouna le kikhelna nasatah alhungtai kitileh adih dem adihmo dem akihetapoi. Kum 20 masanga Christmas kumthah golnop lai leh a kho a kho a veng avenge a houbung a houbung’a koi te lasah mike a kiha jahjo am koite mike hagina hatjo am ti umtalou, inting chung leh thingphung sanglai chunga hallo hallo ti ho leh lenkhom lasah ho kilha a kikhoto ho aumtapon lunghel jong aum bone. Ahin kikhelna umnalot lot in Christmas kumthah hoa mike ho kilha lou kimanglou abangtan chomkhat jouleh lenkhom jao holeh hou in kikhom jousen thu kisei la kisa ho koima dang in ajahtheilouna dia amichang cheh in abilkol to kisutoa khaogui ahin kibuto maithei ahitai.  

2. Kumthah ahunglhung poupou leh New Year resolution nei teitei ahia January lha kichailoulai leh resolution lekha huoilama um hitam ti hephakit talou. Akhoh dehpoi, resolution akisuhkeh louleh abanteng ipi resolution kibolding hitam ba na. Mi jouse aphatleh pastor hodia hildi phodi taopehdi umtadi ham! Akingolsah loi aumloujong leh akichihsah ngen hitaloudi ham. Angol holeh akingolsah tamna society sang’a akichihsah ngen tamna society hi boijo ahi. Kumtah hunglhun tolhon’in kichihsahna hi apailha thei thei in themkhat khat beh pailha tao hite.  

3. English pao idei behseh un ikho iveng a kin le dong function holeh Christmas new year ho kisana English ngenbou ithotaovin hiche hi khantouna ham khansuhna ham vang akihetapoi. Ijoleh kukiland sunga cheng jousen insung cheh a English pao a kihou ding buneh kon imut kon taona man hojengjong English pao hung kimang gamtan tin ama pao anu pao tho ho chu tulai khantounan aphahlou hung bangding dan ahitai. Eimi kikhopna hoa meilhei kol le vai khat ham ajao mana meilhei pao kol pao sappao a kihoulim ding adingdoh chasunin sappao a thusei lasah bolding itiu hi jachat umtah ahibouve.  

4. Igam sung uva chamna aumdung jui leh kumthah ahitolhon’a houbung assembly, village authority assembly le adangdang kihouna ho leh lamkai mopo thah ho kilhenna aumji’n village council chairman leh member ding, houbung deacon ding ho kichuna jong aumpantai. Thuboi lai chu nregs jobcard umloulai jong ahijeh in koima haosa vaipoa pangding jong athanom pon tua vang kichuna a kijeptoloucha bou vat ahitai ti thei ahi. Lhalo umna houbung hoa lamkai khat hidijong koima athase aumbeh tapoi.Hiche hi tahsa lhagao a khantouna ahi tidi himailou ham?  

5. Christmas New Year golnop akichaileh golnop dang umtalou tina um em? Anomjo cheh leh sum le pai tam suhmang chehna golnop dim ahi, kho le veng sports, area sports, khoppi, moupui golvah le adang dang sanehna ding, kisuh halna ding kivatlou. Mi vaicha genthei te vang ihisam pouve tina hilou ham? I sum jouse ikinehchai teng bat le tham’a I umjong leh khoh isah jilou u thu bou ahi.  

6. Ilah uvah thingnoi tamval hitantin mipi titahlouva thingnoi honjong suhlhomdi dei hung umsaosao ahitai. Suhlhomdi kiti nama jong leh contract business bolnom mla mdc election ho akisuhmang louleh hamsante. Thingnoi party suhlhomdi mongmong hi aseiya seidadi ahijeng’e, ijeh inem itileh ni nunung lamleh a kho a kho a thingnoi party hung umdoh di khosung khat’a party dang jukham sava hung kingolsah a mi vo ahung umleh malchame a hung kiban nehdi ahitai tia malai pu ngamsei le mithun jangpao hon totna gao ana mu u guilhunna hung hidi ahitai.  

7. Mun khat’a khat’in anop chabep agabol leh agaseia adalhahmang kei nungteng amun’a boina umji mong ahi.Gal kaplouding khat in hiti khati ikapdiu agatiji, gal kikaptona aumteng galkapdi lecture bolho kiholmo jita. Itoumun’a miboldi ajatjat sei vangchu kithem sohkei ahi.Burma, Manipur, Assam, Nagaland a kithethang te lah a hiche khuchi ihiuve tiding ngen leh mi boina gasemdoh thei bep vang kitam ahi. Kitona gasemdoh diloi umjolouva kitomona boldoh thei itam u hi boltheina khat hijeng lou ham.  

8. Ilah uvah khantou machalna het thei tah tah ahung umdoh tai. general meeting hoa jong award jatjat hopdohna ahung umdoh tan ijo leh award muthei teina dia nam min a kiloikhomna lamkai ho koma aban assembly kit teng keijong award neipe tei uvin tia vanomba hung kibol maithei ahitai. Nampi level award muna dia olimpik a prize lahteiding, la tamtah semdohteiding, chief seketary hiteiding, school college hon IAS IPS IRS MCS doctor enginer adang dang officer tam tahtah semdoh teidi kiha bol ngai ahitai. oleba sum hin tam todoh hole politics lutna award kipe hitamla akihetapon ahin khat min phatna peh chu ipi asetna umdeh am adeichan hiche award akipei tia certificate ban hopthei jong hichume.  

9. Veng sports, wardwise sports, dog sports, gambih Olympics, lagsa sports, neksa sports, seksa sports, sports atam lhehtan atamjo hila bolpeh sports ahikit in bolpeh lama ikhantou lhehdiuham akitijong lela cc meet first round a kitanglha gam jita. Eiho lah beh ah sports habol in bol uhitin power mangcha thei thei in chalai uhitin, match fix bolthei thei in bol u hitin khulah lah in kilha leu hen anopna ahijenge.  

10. Ilah uva lekha simsang lama machalna aumlhehtan doctorate degree neijong ipi vadung kiti ham abangtan kipa thanop lunglet jong aum lheh jenge. Doctorate atam chehcheh dungjui in professor jatjat jong atam lhehtan lekhasut lama gal boldi hijong leh americate jong kichatdi ahitapoi. Ahin doctorate le professor minpu atam laisea inam sunga satan natohna hatding kipunkhom sanga kikhentelna pungding ahi. Ajeh chu dortorate hohin leiko neochakhat thuhtah a asim u ahin atamjo lunggel chu hoplen theilou, ama gelbou dih a gel alamkhatna isei leh hetna athuhval jeh a adihlou mudoh loi umji ahi.  

11. Mi vaicha ho party Aam Aadmi Party Delhia MLA tamtah ahung kaidoh taovin ahileh Manipur langa mi haosa tamtah akihuol lel gamtaove. Ajeh chu AAP hohin nehguh chahguh bol mihao ho nikhat hinbolchahdi ti athupi u ahi. Mi haosa phabep kit chun itileh hiche vaicha party ah min khumna kaneitheijin MLA tetnadi party ticket kamutheidem tin akisalel gam kit tai. Gandhi lukhuh jom pitpet khuhdi thanom atam pantai, ole Gandhi lim umna ipiham khat joh deina hamla akihetapoi.  

12. Mihem khatcha lungthimse kengdia ginmona neilou chu mipha midih leh mingol ahimaiye. Ijeh inem itileh hitobang mi chun mi tamtah hi miphalou lungthimse keng ahilam ahetlou ahi. Chutobangma chun mijouse ama bang’a tahsan theilouva gel chu miching tidi ahijenge. Ajeh chu miching mi lungthim dihlou hon mingol midih leh mijouse tahsan ho chu lheplhah in akoijitai. Ahijeng vangin mi kitah leh midih chun nikhat leh miching le kitahlou ho chunga ehtum ahintah thouthoudi ahi.  

13. Khamul nemul kihoi hi tulai vannoi fashion khat ahipet tah danna aumjeh in igam sung uvajong mi bolbol boljeng itam kit un upa tehse ho sang’in gollhang khangthah hojoh khamul chuol kutkut a um atamtan BLADE sem company ho sum mu vang lhasam thoudi ahi. Alangkhat ah upa jineisa hon khamul akimet jolsilsel un gollhangho sangin aki nalsahthei kit un society a kikhelna le kibung butunna vang ipipi lam hijongleh aumjinge tiding ahijenge.  

14. Function program khat a lemna thusei bolpa apat adingdoh jousen ahung kikhom jouse chung’a kipathu seita, vote of thanks seidipa di khendom domjia pha hilou ham, program ala iminchonsahji ngal un. Abangkhat chula anaal’a naal lhajeng ahia thuseijong kathempoi ti, abangkhatloi kit in seiding tamtah kaneiin kahung dindoh leh kahaimil gamtai tia phaatsaotah sei thou kit nalai. Hiche bon avaltai kiti abangloi chun kamasanga seipan jong ahinseitan tikit ngala misei sasa velseikit. Phaat akinotan kiphatlam aume tia seichomdi gokitlouva akigotna bep sei thouthou. Khantou ham khansuh ham vang akihetapon ahin iboldan uhi 21st century akon 19th century ilhunkit u ahitai.  

15. Ilennao gam leisset hi khat le khat kingailutna gam ahidungjuijin ahahsa agenthei avaicha khat kithopi sang’a abolthei ahao aneijou ho kithopi dijoh kivatlouna mun ahitai. Akitithei te tah khat in kin le dong khat abol leh aneilou honjong ajokham kham beh a hongphal tah a anei agou hintohdohdi tam, aneijoulou te khat in kin khat aboljong leh ahao aneijou ho tahbah injong kithopina neokhat beh jong hintohdoh nomlou, aneilouhon mihao honbon kithopilou kei aneilou in ipi kapehdi ham tia kithemchan kit. Hiche hi mihem hina dihtah ahin Christian dihtah hina ham hilou hamvang akihetapoi.  

16. Gam le nam ingailut louleh ichanga iti kihindi baham. Ajeh chu gam le nam ngailutna beiya neh le chah sum le pai holna hahsa ahitai. Hijeh a hi gam le nam ngailu itam behset jeh uva igam le inam sung boilhajeng ahitai kiti ahi. Hinna dinga gam le nam ngailutna hilouva thi kigo leuva gam le nam ngailutna a natong umsaosao leh igam inam tua sanga khangtoudi ahi. Tua atamjon igam le inam ingailutdan upi hi gam le nam din kikhoto to umbouvinte.  

17. Eimi lah-a thingnoi thingchung kiloikhomna ho lah a lamkai panmun neijouse pihin atumin kiloikhomna khat semleu member di sehsehjong phamaipi hipontin meeting bunehkhom boldi tijongleu kho neo ho pohjoudi hiponte. Ajeh chu mi themkhat akisuhto leh ipipi association ipipi party kitijeng ahin kiloikhomna jousen register abolngaaidi hileh registration office a clerk ho chadonnadi sum mu maimaijong building khat sahdohna kham hitante.  

18. VIP kihisah jouse VIP ahidehpoi. VIP um in kaum nompoi tijouse jong akineosah jeh hilou, aam admi party member jong ahikit dehpoi.Sum kaneipoi tijouse sum neilou ahitahbah poi, konba sum kaneije kahaove atitahkei diham. Society a dia thilphachomdi khat bolna dia sum it, mi khat gah kithopina dia themkhatjong pehdohnomlou ahiala aphachomloudi noppal thina a dia sum chu thingna bahsahjeng loi jong umkit. Hitobang mi hohi Aam Admi Nahein Party ticket a election hintet diho hung hiuvinte.  

19. Haosa ho association bon aumthei leh haosa hilou/kho chaga association jong bolthei hithou loudi ham. Khomi association umle vang haosa association ho imut nomthei ponte. Ajeh chu khomi association ho agenda number 1 di chu jobcard sum thu hijengdi ahi. Village chief association aumtan aumloulai khat hi Villageless Chief Association ahi. Ajeh chu kho le veng jong umlouva kho nei haosa jong tam ahitah jeh in boldoh pat phaat ahitai.  

20. Kinielna kitijong hi aphachomdi loi aumin kiniel kumlhung jongleh panna bei kamchah sah le navai lohso sah loijong umkit ahi.Kiniel kitijong hi kijato leh miching ho kiniel’a kiniel theijong ahin kingol niel kitijong umkit ahi. Tulai computer le internet mangcha a kinielna tamjo hi aphatchomloudi dandan ijat kiseijong leh changvai lah a jun kitha kitibep chu hidi ahi. Kinielna tamjo hi mingol kichihsah anasai kiti mudohtheina loi jong aum kit e. Thu ijat iseia kon ahinai adihnai atiloudijong ngaitodoma pha hilou ham khat te ho! Mipi lah a kiniel niel jong hi mi kukal pun bena ahibouve.  

21. Houbung thu lhagao thu lampanga kibungkhenna leh kivetdana boldoh hovang houin kikhomkhalou jukham party holeh mitamtah in agaosap mithat miman mi sum lahpeh ho sangin achandiu datmo umjo loudi baha! Akhohdehpoi, thingnoi hokeu kiloikhomna jatjat bolthei hiu ham bible lamajong party jatjat bolthei hivehta. Tulai kho khat vengkhat ah houin ijat umbejong leh tila banga petrolmax chohla hahsa talouva chowkidar le pastor dila adim adoh hita!  

22. Mi abangkhat loi chu mitoh atoukhoma akihoulimteng aseiboua pandi angaidi himhim kigolou. Hitobang miho hi mi thusei ngaije kihilna a short course ah gajao leo oja ho sanga thu tamseidi ngen hikitdiu ahi. Time pass bolna a mandi iti ngal lou leh kamtam leh mi seimun pelou ho khu ikimuto pipi leh chomkhat anakhongai tadio hilai gache tadinge tia kikhomangjeldi chu damdoi phapen hidi ahi.  

23. Private school la tam cheh cheh jeng akaidi chapangla kivat dehlou. Council school la tamchehcheh jeng akaidila tambe chomdehlou ahiala oja la kivatdehlou.Bible college jong tam chehcheh jeng bible jildijong umjing kit thou. Bible hin simchai atam chehcheh leh pastor tohmun hol tam chehcheh kit. Pastor thei atam chehcheh leh kibung kikhenna jong umbebe ngap hitamla kihetalou.Lekhasimsang atam jepjep leh thaguma natoh bolnom lhomchehcheh ta.Hiche sanga social worker lampanga kiheidoh jong tam chehcheh kitjeng.  

24. Itih leh joulei thinglei kakivat mandiham tia nikhotha homtho lotlot a kin le dong khatjong lhatheilouva hahsa genthei aum vangin kho helou bang khop a nomsa loi la kivatlou. Tohding thamding helou banga Christmas apat January lhalhung geiya kichep golnop bol loi, jan lenkhom bola lamtol a nungah gollhang kivaiho jengla kivatlou, thinglhang sports kabole tia nilhah teng sekmai tuitheng nam lahlah jeng gollhang la kivat lou. Thinglhang sports ho hin kingailutna khat le khat kikah ah ahinpohlut jinga akinaidoh akideidoh ahung kichengdoh di hung tam nante tia kinepdi himai.  

25. Siki man ju idon leh chengsom man khamdi ti hi koima bolkhahloujong ahidehpoi. Koi judon jukham khalou danna ka don koiman hehih khante tia mi het hetdia umho jong oimo di ahidehpoi ajeh chu khang masa langhon anachaisa ngen ahi. Achomte ham asaote ham kipoh khatjong chun mi hetsah tei ngai, min ithilpoh amuloujong leh kathilpoh nahetlou ham tihojong athahbeh koibol khahlou bol ahilou jeh in jachatpidi jong ahidehpoi. Ahin kum 20 kum 30 masanga style ho tua pohdoh jing jongchu kilomthei hinam.  

26. Tulai music track hung umdoh to kilhona kijoulhepna jong tamcheh cheh jengta. Track ijuia ikam ikat maimai jong leh kon moh hetdoh talou, kijoulhepna leh ki benglam bolna phatah ahilamla koiman hepha jitalou, angaaiho tamjo la aw sanga music ahagin laisea nomsa kit nalai. Koima oimo di ahipoi ajeh chu computer khanga I um phaat ua hi agingthei achohthei joh kiha thupi sah a lasathem honjong track a la kisasa kilha aw juina dia acting nasatah a practice aboljiu ahijeh a oimodi jong ahidehpoi.  

27. Mi joulhep a hinkho manghon hetdi khat chu khat komah khatvei tou jou kiseithei intin kilhemlha thei nante. Ahin avel vel’in koima lhemlha thei pon nate. Min tahsanna nanei chu mi lheplhahna a nanei leh nang le nang kilhemlha le mi vangse nahibepdi na maban lampi kikhah lele jengdi ahi kihet inlang kisemphan. Mi jou mi nal, tahsan theilou tia midang’in ihetdi vang hinlojong umponte. Ahin jachat heloudin vang olmona hidehponte.  

28. Themcha chunga kitahlou chu tamtah chunga kitah loudi ahi thutheng bua kiseisa ahi. Pan dukan ham tehsepi puri hotel dunga dangka jakhat jani hoa kon kilepdohdi nehmangteidi tiho chu sangsom sangja chunga akitahloudi hetsa ahijeh a chunga pan phat theina apehloudi ahi. MLA officer le mineijou hon nehguh chahguh abole tia mi dem dem hojong hi jakhat jani chunga kitahlou ho ahijeh ua nehguhna thei mun alojoulou u ahibouve. Hitobang mi ho chu adem miho dinmun ah umleh khohcheh diho ahiuve.  

29. Sadar hills Gunhom vadung huhbitna association bon ibol leh koubru gama thing le go huhbitna di association jong bolthei hilou ham. Gundung panga haosa village chairman ho keuvin song le nel tax akilah theidiu ham, koubru gamkai haosa honjong association khat gangtah a aboldoh uva thing le go tax hadona akidon lou uleh gam le go huhbitna hahsante. Chomkhat jouleh Sugnu area gunhom vadung huhbitnadi association khat jong hung umtan tin chuteng Dingpi lhang huhbitdi association, thangjing lhang huhbit association, aban ban hung umbetantin hichu gampumpi kihuhbitdi ahitan thanop aum lheh e!  

30. Namdang ho koma inmun loumun joh gohojong oimodi ahipoi. Ajeh chu atahsa ato alu kijoh bon aumtheia politics kijohdoh bon aumtheileh e inmun kijoh chu inop leh Bengali koma kijoh intin inop leh pangal komah kijoh hihta. Koi angol hija atamjo sangaalhomjoa thil ajohdi baham. Eimi koma thil ijoh leh amanjong lhom nakah a palsentage pehdijong tam hiche sanga guhthimcha pangal ho koma ijoh leh dangka dobola kimu. Tulai eima dibou kivet phat ahitai. Isopi inam mi phaitol veng khat a pangalten avelkol uva juntha ehtha a apotdoh ujong leh mol thohjing jongleu ei ichen loupou leh khoh deh am, inmun kiban johchai leuhen vengsung kiselnadijong umtapontin akingolsahla umtapontin jampi te inkah hileh navah jeng!  

31. Mi’n ikimumosah a kihoupi kham isahlou chu ipiba kiseidi ham. Akihoutoh loute chu sorkar injong kihoupi kham asah loudimong ahin phunnadi thu aumpoi. Ei le ei kikah a letjohdi kichubou politics bolte chu gam le nam thua kihouna umhihjong leh akhohna umdehpoi. Eima eima party phung le chang bou boipia jeep le car a ilhai theia in le lou ikisah thei leh nampi chu asohsoh sohta hihdiham.  

32. Gollhang kisonpi theitah leh thahat tah khatjong chun akihatsah a akiboltheisah a mi amoh vohvoh louva mi amoh phinphin lou leh ahatlo ipiba umdi ham, sepai thalchoi khatjong chun amite chunga ahahem louleh ipiba athalchoilo umham. Ahin aphamotah khat chu adon achanglouva kimoh hatsah kimoh boltheisah leh mi lunghan thangtomna boldoh hon asalai achotkhah ham, achotkhel jong leh adamlaini achomji e. Tulai vannoi leiset aphatapoi kitihi leiset chu phamo ahipon leiset chunga cheng mihem hojoh phamo ahibouve. Upa tehse chingthei ho vaipohna chu phadi ahin, gollhang in hunama vai apohna leiset chu iti phat takei diham!  

33. I pathen hou I penthah dan u dih lou ngap hitam lhagao langa ihat val ji jeh u ham akihetapoi. Tulai ilah uva lasathem music bolthem hojong ihung penthah teng leh gospel la bou sahdi kilungset kingai joldei la ho hi satanic dana geljita. Joldei la sah jeh a vangam lutloudi ahile vang sochatna thupha hi aseiphong ho ham akiseipehna ho joh ham ahet themlou hidin tahsan ale umtai. Ahin ju le sa numei a kingolsah sanga hitobang lhagao lama hatvalna chu tahsa lhagao dia gamchenga phachomjo ahinahlai jeh in kipapi aum thouthouve.  

34. Tahsa thu politics thu bouva haat dichu lhingtheilou ahi. Pathen thu le lhagao langa jong ihat jeh un nam sepai hojong houbung kiboina thua kikum tei jiu ahi. Kikumjong leu kitha kimat aumloupou leh khoh deh am, hou in kichuna a pan nasatah a lahjong chu nam natohna khat hithou chula em. Houbung ahijeh a kibung khen na umjimong ahin aban banjong abung abung’a kikhentelna hung umnalaidi ahi. Ajeh chu tam chu hatna ahi, houbung itam teng uleh hatna umdi ahi. Hichi kisei tahsan san chu misei jouse tahsan ho hikitdi ahi.  

35. Thinglhangmi lah a miching mi bolthei tahtah achihdan ansatdan pangal ho kheljong umdi ahi.Ei society lah ajong hitobang mi chihna le boltheina phajou le kheljou ho chu kithang atpi aumthouve, ahin pangal ahijenge akitileh jou le nal sei, jonchih, lepche, guhchat lahchat tojong kivet cheptha ahikit e. Pangal lungthim kenghon asopi pangal ho alungsetdi mong, akihoutheipi dimong ahi.Tribal pangal hohin Lilong langa jong inmun khat beh nei tei unte.  

36. Tulai hi khantouna khang ahidungjuiyin jingun jin ja um kin neipa ho hi nampon silpeh sanga thingpeh neokhat a kipathu kijih khu ipeh leh kichaijeng ahitai. Hitobang memento hi almirah sunga koidijong hilou bang dung dokhang chung dunga tahding koiding ahijeh in function golnop hoa chief guest a hapan ho adeh a mla, mdc ho dia indan neo khat atuma sah hung ngaididan ahitai. Ponsil khat hijoleh kin le dong khat a manthei, memento hi midang kipeson theilou ahijeh a akoinading boilo maamsap bangkhatloi aphun gamtaove ti akijajapjap tan, hiche ija mantheilou memento pihi dangka asang sangin akicho e tia gelloi umta!  

37. MLA MDC election a vote kilhah masanga akaidohdi kihet bon thukhat kisa a tua hoilai gam ham khat a Mijat kisimna (census) kibol loulaia a result hetsa jong aumtai. Ama dei chieh min’a minkhumna neidi atiu chu akithungaitopen umlou jeh un alhomte lah a seikhamlou alhomte ahung hidiu hetsa ahitai. India Manipur langa hojong akikum theithei gakikum beuvinlang akikhenteldeh ho khu gasuchehbe leuchun pha hilouham, phaigam asaam gam keuva ibolthei uham, kolgam a jong kikhenbena ibollou uleh hoija mi hetkham ihitahdiu ham.  

38. Tahsa le lhagao akikhentheipoi.Tulai vannoi leiset gamtin muntin ah hou natong hon politics thu boipita, politics bolhonjong lhagao thu le kin lampanga koima otcha kitlou ma. Chomkhat jouleh pastor reverend hon combat dress hin kiban von untin AK nadu ham M-16 nadei ham, achomte asaote nati tichu kanome ahintina diu nikho hung lhung maithei ahi. Chuteng MLA Minister thingnoi leh social lamkai hon pastor/reverend ho sangkhol chuol khu hin kiban ah untin church building thenso, mougop kin, maicham lhandohna kin thempu minister in hung pang taovinte. Hichu tahsa leh lhagao thu chekhomna leh kikhentheilouna dihtah hung hidi ahi.  

39. Khanglai sports, veteran sports bon iboltheileh tehse ho tournament jong bola pha hilou ham, kichep golseh lama ikhantoudiu kinep aumlheh in olimpic jong ilhun gamdiu kinep aume. Muntin phaat tina golnop sports kibol jongleh ipi khoh deh am, development fund ho leh jobcard sum ho tornament hoa iban mandoh gam ujong aphatna khat umthou ahi.  

40. MLA MDC holeh a Term um kiloikhomna lamkai bangkhat in apankitnom manna kanatoh bangkhai kajotheina din neison kit un kiti hi ki benglam bolna ahi. Natoh bangkhai neithei chu amitmo jeh hilou ham, abolthei agutchu akitah nah leh a term sunga tohdi khat atohdohdi ahi. Toh bangkhai nei ho chu seijong aseingam nalai jiuve, jachat umtah joh hidi ahi. Kamitmo jeh in katongdoh mantapon neilungset unlang neisondoh kit un ti aumleh mi kitah hiding akitah jeh a lamkai pansah kit thei ahi.  

41. Gamjoh akitileh koidang hiding ham, gam nei ho bou hihihta, gam neilouhon ba hoilai a akilah uva gam ajohdiu ham. Moreh lang’a gam joh akitileh meilhei pangal naga ho ahidichu jouthu ma tah hijo di ahi. Gam neihon gam johdi a it jeh-a ajohlou ahi. Tua ajohlou laihon jong kihabol’a inmun loumun acre tamtah tah joh theichan hajoh a joh a inehchai tokah ithitokah a neh kiticha neh a ijo leh eiti inam mite ti suhnadi helouva iumteng gamtum delchu guilhunna hitaloudi ham!  

42. Miseise midem hojong taimodi ahipoi.Ajeh chu amaho umtahih leh mijouse kibang hitading akiphalel umtalouding ahi. Iphahjoulou akiseisen akideme ti hi thuchih khat hilou ham? Dem le seiset a umthei ho chun boldoh anei tina ahi mijouse tahsan ahi. Kidem kiseito jeh in koima avaicha chuompon koima jong anatlo athilo dehpoi. Bolding helouva midem miseise hojoh hi dem sang’a pachatna pehjoh thei ahi. Mi 3 akivop leh khat umlou kah leh ni tenin aumlou penpen chu aseiset ahi tijong mihem khantouna khat ahi.  

43. MP/MLA/MDC Election teng gam le nam society ngailu khantouna dei pathen he miching mi kitah ahung tamji hi society machalmona pen ahi. Hiche ho hi louva nam naa society naa tohthei hilou ngap hitam! “Keihi mijou minal kahin election kaidoh theina dia gam le society ngailua kilep kahibouve, kakaidoh teng kei le ka insung kisem inting gam le mipi hepha nangting ima khohsahna vang hin nei ponge” ti aumleh hitobang mi chu mi kitah mi dih hiding ahinkhoa election sotdohdi ahi.  

44. Tulai khang hin pasal kisonpi umtah tah hojong government service private service ima jong bol lou, thaguma nikhotha a naa toh a ama neh kham beh leh a kuwa nehna kham beh kiholdi tilouva ABC themkhat ahetpi kiletsahna a nei natoh neo bolnomlouva anu apa kivahsah sah jeng, abangkhat chu aji achate geiya anu apan anehdi aholpeh tha hinalai.Kum 25 lhing chu ama le ama alonaje akihetlou leh panna bei mihem list a pangthei ahi. Panna bei list kisem leh eimi te jong kitam thou inte!  

45. Insung inpi kiloikhomna hojong faction ache hi datmo diham ipi kidatmo di ham tijoh diham akihetappoi.Insung khat phung le chang bah khat bon ikitotheilouva lamkai thua kiboina jeh a kikehsona aumthei leh nam pumpi hopma kiloikhomna khat chu itiba faction cheda diham. Tunvang thingnoi party ho oimodi ahitapoi. Thingnoi party ho bou faction chethei ahi tina aumloujeh in student kiloikhomna hihen insung inpi kiloikhomna hileh faction chemo ahipoi tidan joh hamla akihetapoi.  

46. Kuki Nam pumpi a dia kiloikhomna lenpen kahi kitia Kuki ho kho le gam midang’in ahinvat thua seidi boldi kaneipoi, hitobang thu ahiteng kiloikhomna dang kipedoh ahi ti thu kija hi alungdong adatmo umkhante. Ijeh inem itileh kiloikhomna chungnungpen hon gal laiya mi kitha leh kho le veng kisuhmang thubou agenda a anei ahi. Chubanna ichennao gam hinvat ho chu phaigam mi ahikit leh hitobang mi te thilbol khat dem’a jahda ding chu kiloikihomna len hon maipha vetdi umtaloudi ahijeh a kikum loudiu mong ahi. Koi sol louva kipedohten Manipur gamgi huhbitdia hapandi ahijenge.  

47. Sum nei le neilou kihetna chu sum kaneiye ti leh kaneipoi tihoa kihe ahipoi. Society a thilkhoh khat a mandi sum jakhat jani hintoh doh in akitileh sum kaneipoi ti ngen hisa. Dammo vangset jeh ham, hiche nikho kah a sum hijat kitina ahung umteng jakhat jani neilou honjong sangsom sangja hin loidoh jeng kit thou. Abangkhat chun hoiya ken sum kaneidi ham tia ahiala forein bank kisana sum koiloi jong um maithei. Thingnoi thingchung govt natong abang khat kit chun sum neh kabolpoi tidana uma bilding kisah kit thou!  

48. Gam le nam dia kipedoh nam sepai party simjoujai hilou neite kho le gam chu ipi atileh midang in thipbeh-a inn akisah a kho le veng atundoh got jeng thei hitam tia mitamtah in agellaiyin awgin khat in thu ahin seijin nam sepai ho chu amaho le amaho kikah a kikaptodi bou ahiuvin midang kho le gam hinla ho toh kimaitodi ahipouve tin ahin hilchentai. Lhang khat gamkai neocha khat a jong nam sepai jatjat umjeng, amaho le amaho kikah a akibolto uleh khulah lah jeng, ahia joulei thing le go umna gambeh neokhat huhnadia uhpoh dijong umlou chu chamna deite tina himailoudi ham, oleba khat le khat ki ot to jeh a midang toh pangkhom ngen hiji ngap hitam!  

49. Tulai hi datmo um atamjinge. Upa tehse ho kihouna, an nehkhomna umdi akitileh chapang chacha jong pangta. Haosa ho kikhomdi ahi akitijong leh kho le veng jong umlouna a haosa jong tamtah kikhopna a pangta. Kum 40 chunglam ho pehlum kichepna veteran sports a jong kum 40 noilang mi tamtah kichem gam ta. Kum 40 chunglam ho kichepna ahi ti henasa a kum 3 kum 5 cheng vatnalai ho chu iti hat in hatjongleu jou le nal lutna ahin corruption jat khat ahi. Sadar hills sports jong all Manipur sports bangjengta.  

50. Tulai minu mipa bangkhat chu achate joh in phoh gamta. Nu le pa ten achate ahil aphodi ham kiti. Iphohthei ihilthei chate neijong chu kipa um ahi tia ilah thei levang apha ahijenge. Ahin anuti apati achate ti phoding hilding hitaleh ipi kiseiditam kon aphodi ahildi hitam volunteer dila umpontin. Chapang chacha jong anu apa umchan jachatpia hahdoh ngamlou jong aum gamtan vanna kona khat phohdi le hildi la hung khelha pontin iba kilodiham khang kikhel ahitai tidi ahimaije.  

51. Tulai hi kichang ngailut khang ahitah jeh in midang hon eihin boipi intin eidin mi thingam in pang inte ti hi kinepda di ahimaiye. Itileh election kakai theidi ham tibou kigel, itileh kei party hat thei diham tibou khohsahna khang ahitai. Eima le eima dibou, I insung I phungsung I party dibou kikhohsah cheh phat ahitan nam pumpi society pumpi di gel ho chu angol danna um ahitah jeh in ama chang amadibou kigel hojong oimodi ahidehpoi.  

52. State level festival hi atamvaltan ipipen hi area level, local level, village level hitam akihethei tapoi. State level program ngenbou ahiphat hin athupina jong alhomtan chomkhat jouleh kho khat vengkhat program gonop kin le dong jouse jong state level hung hitantin, hiche jong chu hung kisit kit intin chomkhat joukit teng leh national level hung ban hi intin achainaleh gonop hihen kitetna jatjat hileh international level ahi akitilou leh hiche state level ho bep a jaonuom koima hung umlou ni hunglhungdi ahitai.  

53. Tulah el hoses (air hostess) mu lanu ahung tam lhehtan tangpa bangkhat chu kinepna a dimloi abangkhat chu ei hin kihephataponte tia lungimloi aumsausau hitaleh akilome. El hoses katupme tia hinmu tahbah jong atam lheh tan hiche hi tup le doi molso lanu melhoi donghoi atam lheh e tina ahin kipa umtah ahi. Ahin thil khat hi mi tamtah in ahinmuthei ahiteng leh amanlutna jong alhomsahtoh akiloujin ahi. Hijeng jong leh mi bangkhat chun ama mu chu midanga to kibangchet hijong leh ama a chu jatchom chungnung deh a kigel loijong aumjie. Hiche hi mi kikimna ahin koima kiseisetnadi jong aumdehpoi. Akiletsah dehloi aumloujong leh mijouse kibangtantin hichu hoija hitheidi hamba.  

54. Mi bolding sei, mi bol khat dem, mi bolkhel khat mudoh, mi thilbolding dan hitin khatin bolle chun hoidi ahi tiho hi thil hahsa ahipoi. Eima tah in ihin bolteng katei kagelto abang hihbeh e hung kitiji ahijeh a nahet leh hungboltango ti umji ahi. Hoi hihjong leh them hih jong leh mi thilbol khat chu nabol pha e kipapi aume tije helou chu chihna haona in dimjong leh amihina a vangse mihem khat ahimaiye.  

55. Koiman nang nabol khiel e bon tilouva ipiham kabolkhiel tia kitomjah ding kitiho hi ipihamkhat miho ama le ama akimane kiti chu ahi. Hiche khuche thilpha thilhoi kabol ahi ti hi ei le ei kiseiphatna ahin sakhi ngalpenga avuntailou ipi abeh dem. Hijeh chun thu le la kholtoh masat a lunghan kitom boldi ahijong leh boldia pha ahi. Chuleh ei le ei kiseiphat sanga midanghon eihin seiphat joh chu ki benglam seiphat ahingal louleh aphapen ahi.  

56. S in ajolel ima aumpoi akiti jeh ham ole S hin ipi atina hamla akihetapon ipi lekhajem doi le ai choi khat tou hitam. Mi khat lunglhaisahdi itileh Sa inehsah leh lampi umjeng, hijeh a S in ajolel aumpoi kiti hitam, oleh S in Sum akoudoh thei jeh a S hi hiti minche hitam? Ajeh chu sum in ajolel chu mihem lah a akidangloi hiding ahin mihem to kibanglou leuva kidang chu la umkit pontin. Sum nei chu power nei tina jong ahikit tan ahileh power nei chun power aduchatbe dima ahithou kit e. Power kichuna jeh a vannoi boi ahitai. Achuti leh boina bul chu S hijengloudi ham!  

57. Houbung tamtah phudoh hi Lhagao langa khantou machalna ahi. Kho khat veng khat a houbung khatbou umna chu akitetpiding umlou ahijeh a khangtouloudi ahi. Hijeh chun lhagao langa minung delphah jouna dia kihabola inn 20 chunglam kho khat veng khat sunga houbung hou inn 3 beh tundohdi mong ahi, tahsa lhagaova phatthei channa le damtheina ahi ahilouvang akihetapoi. Thingnoi party kipunkhomtheilou, party tam thu isei leh iha kigel sohkei, ahia doi le tup kibang lhagao thu leh bible kibang chet jui Christian ho lah a houbung tam cheh cheh jeng. Ihitiu leh thimanlou, kivuimanlouva vangam direct ibanlut teidiu kinepdi ahimaiye.  

58. Election tet jousen kakaidi ahi tisoh kei, koi chu akailoudi hitam kihe talou ahia achaina leh khat bou kaidoh thouthou. Khat suhboina dia tet khatjong chun kakaidi ahin alungtup alolhina asuhboi got pa ham nu ham akaida tahbah leh akaitobang’a kigel loijong um maithei ahi. Ipiham khat deina a tet khatjong chu akailoujong leh adei chu amupou leh akaitobang hijeng kit dan ahi. Achutileh candidate jouse akaidia akisei jiu khu adihna jong umthou ahimaiye.  

59. Telephone a amin seidijong golouva hello kei kahe, hello nihet a, nihet louha tipaijengloi ho khu mobile company hon handset leh simcard asempet uva khu amin u ajihtha jiu hintin asimdohtheilou hitobang mithupi min jihsa save kibolsa ho hetheilou simdohtheilou ho mitmo jeh joh hinte. A insung bep a bosspa jong tamthou ahijeh in bosspa akitileh kon ahejoujai di hitam, nang leilei bosspa a kigel nahileh na inn leitol khokhel khalou lai khat nahi maithei ahi.  

60. Pu le pa te khang in kitahna gutchuna potthona leh kithungaina ana umin tukhang hin jou le nal lepche le kiseingailouna kitetna um abangjengtai. Mi kitahlou mi lepche alomchanga chenna a mi kitah khat le ni chenghojong aminset thajeng jihi vangset umtah ahi. Mi kitahlou tamna pen kho le veng hina a prize sandi vang hinlojong umponte. Ajeh chu hichea gold medal chu eh gold medal tailou koiman peponte.  

61. Bandh bolding ding akiphindingding kikinno phaat ahitai ijo second phase election hung kichai leh bandh kikou jong leh kon ija ahinseloudi ahi. Vote kiholpetcha phat mantam hi kichohdi ahi. Ijo leh akiphin bandh bolho jong koiman ahindonloudi nikho hunglhungdi ahi. Sadar hills thu la vote holna beh a neidi kigo koimajong aumtapon kiphinna thei pen chu job card sum thu hijeng lou ham.  

62. Sum le pai a lhepna thoh jou mihem chu vantil lom hihihjong leh mihem jatchom hidi ahi. Mihem khat chu mi kijoh kitileh koima nomloudi, lunghangnalaidi di ahi. Ahin judas banga ihina I vote I politics ho sum le pai themkhat a kikijohdoh gamji hita chume. Election laiya vote lhahni dehdeh hi dangka somthuma sanatum banga mantam vote kijohdoh ji atam tai.  

63. Toh ding thamding seiding phatah tah hoi tah akisei val teng tahsan aummolojie. Itihlai ham khat teng leh boldohdi tohdohdi phondoh le kitepna ho hi ahoitheival jin kineppi aummoleujitai. Hiche sang’a iboldohjou dikham bou seiya pha hilou ham. Tamtah seiya ima boldohlou sanga themcha seiya khat beh boldohdi chu gamchenga thilpha thilhoi hijodi ahi.  

64. Aphaatdungjuiya iphatchomnading kivettheilou chu amimo hijengdi ahi. Hijeh chun eima dia apha leh itonnadi ikibolpouleh kon ipi seileh asohsoh soh intin agaigai gaitante. Tulai hi kithutahsah jong angol danna um ahitah jeh in dinmun det umlouva jet le vei vetlea eima dia apha chu botho jengdi ahi, midang hon inung ima ah eiseisejong leh jum leh sailichanga koi thidi ham bon kiti ahi. Mi seisetlou demlou chu panna bei ahi.  

65 Hoilah election khat umham thu le la a kikapto ikhulah lah jeng taovin hiche hi khantou machalna khat ahiloulebah ipi hidi hitam. Ahin meichanga mi ikaplebou ikapdoh meichang mama a chu eihung kile kaptheilou ahin thu le la a mi ikaplevang ikapdohna meichang mama a chu ihung kile kapthei ahi.  

66. Vo kareyo henu, vote lhah kichainung jenga jong itobang candidate pa vote ipeh diuham, ipi jeh a ama chu vote ipeh diuham tia kihoulimna aumjing nalai e, hiche jong chu thinglhang joukutochong langa vote lhah kichailam jong hephalou loi hile thukhat, atua city town sunga computer mancha a kihoulimna neiho hinalai. Aphai kipa aumthouve, kenbajong hichea akihoulimna jiu mun khu thudang hetdang beija T le K thu akinelnao ham katin thudang seina a aman u ahijong le apha ahimaiye.  

67. Eimi tenjong cenema bol lama koima ki otcha lou, film company tam langa bolywood Hollywood jong kitetjou thou dibaha! Motion picture album khat ibol leh film company min thah thah hungpot doh jeng, film company min hojong zongchal ngaochal film company akiti lou chabou vatloi, ngollai company loi chihlai company loi, thanopnop umjeng, film titahlouva film company minjong moh nop jengloi umthou kit!  

68. I pathen hou I penthah dan u dih lou ngap hitam lhagao langa ihat val ji jeh u ham akihetapoi. Tulai ilah uva lasathem music bolthem hojong ihung penthah teng leh gospel la bou sahdi kilungset kingai joldei la ho hi satanic dana geljita. Joldei la sah jeh a vangam lutloudi ahile vang sochatna thupha hi aseiphong ho ham akiseipehna ho joh ham ahet themlou hidin tahsan ale umtai. Ahin ju le sa numei a kingolsah sanga hitobang lhagao lama hatvalna chu tahsa lhagao dia gamchenga phachomjo ahinahlai jeh in kipapi aum thouthouve.  

69. Kithei talou, tulai phaat le khantouna dungjuia kichen kal jubili jatjat kiman hi ahung popular lhehjengtan aboljoulou ho ochat thangset di khat ahung hikit tadem dipnat aume. Akijam tho hohin guhchat nikho jubili mandidan in ahung umtai. Akichengsa honbon jubili aman leh akichengloulai hon kihel kidei kingai kal kum jubili man ngapdi hitam tia kigoloi jong um hitaleh akilome!  

70. Kiloikhomna jatjat bol hat te lah a tuni geiya air hostess association leh doctorate degree union bol umdohloulai hi akidang ngap jenge. News a air hostess le dortorate mu hi ahungtam lheh tan kipapi diha tijatpi diham lungboi jong aumji nga e. Amaho kiloikhomna hi aumda ngal le aphatna khat umjoh ham. Ahin khat ahung kiphudoh kal chu chomkah loua faction hungche paidiu hung kidemto paidiu ahi tin themgao hon tupet society dinmuna kon asei uve.  

71. Tulai government service mu ahah lhehtan kitetna jong asang lhehtai. Service len le pha ho dehdeh hi mijousen adei vanga mijouse changthei ahipoi. Lolhinna kiti hi ipilam hileh moh a hung ahipon athem ho lah a apontho holeh vang neijep ho bou chang ahi. Ahin hahsatah a lolhinna nei bangkhat loi chu athilmu chunga kijong kolchu dumosah loi jong aumkit jie. Kijong kolchu dumosah malah achop le amat thoa kilahdi ahibouve.  

72. Kihoukhomna kitijousea hi thilpha kitonadi kipunkhomnadi kisei ahidehpoi. Chutah sangin kihouna akisuhlouleh thingkeh le moltum kimatna lengdoh hichea kona chu kibungkhena umdohpaiji ahi. Thingnoi hihen songnoi hileh kigopkhomna dia kihouna ijatvei aumji vangin kikhenna lam suhdetna ahinajong ahinomjie. Akingaisa nungah gollhang hovang kikhendoh chen dia kihouna anei uleh kikhen malah akisipdet chehjiuve. Thingnoi leh thingchung hovang achutipoi.  

73. Twikhanglen chunga kitolhon ajet avei avet leh twin gen, donding twi vatkhat jong mulou. gammang thinglah a vahle hon ajet avei avetleh thingphung ngen, innting khomding thing muhahsa. Jiding holhojong chutima a chu ajet avei numei pasal deimjeng, jiding lhendi helou. Twi poupou donjengthei hile mi poupou hi jiding hithei jengdiba hia itidana ba hiti hitam!  

74. Phailei jao sangam khat a kho khat tungdoh theite, kho khat a houbung tamtah tungdohthei te, phung khat sunga nam natongdi party khatval umtheite, lhang khat gamkai khat a nam natong party tamtah umtheite, koima thu kingai pehloute. Midang namdang koima jong gingloute, Achang cheh a deuloute. Kichat um, datmo um mi te hi kithang atpi di himailou ham!  

75. Election akichaitan aban agamlajep nalaije akitinakhai eileh bandh blockad kibol lou hi kiphinna thei umlou, sorkar chunga mipi lunglhaisoh keijeng to akilouve. Ole mijouse hi bandh boljong chim gam hitam, bandh umlouna nikho ahung kijom teng anopmo sesu abangjitai. Hiche hi Manipur minthanna khat ahijeh in moh suhdaodi apamaiye!  

76. Anei chu kipehbe ding aneilouchu aneisunjong kilahdohpeh di ahi tia kisei chu achedih jinge. Sum neiho kipehbe, service neiho aphajep kipehbe, Ahin ipilam hileh aneilouho chu lahpehdijong aumlou loi umkit ahi. Hiche hi ajehbei hiponte. Pehbe thei le lahpeh theia um dinmun ahijeh himaithei ahi.  

77. Kon ija aselou loikhat jong kihetsah mama, kon ija aselou loikhat jong chu kithupi sah mama, kon ahetphahlou loikhat jong chu mithupi mi het theidol tah a kigelkit. Akigelna bang ahilou teng leh adon achanglouva lunghanga mi dem, mi phin kigo umji, Hiche hi society a mi kikimna ahi tia lahdi himai louham!  

78. Amitakip hi changtumbu poa kisei ahijeh in koi chu changtumbu po dihtah hia koi chu patchon tumbu po hitam akihethei tapoi. Eima bol cheh hi akhohpena kigel soh kei ahi. Ahin adon achanglouva kichangtumbu pohsah jong chu eima cholna bep hidi ahi. Changtumbupo kahi ti ikihetleh pohda di hijeng didan hilou ham, kon pon atila ahipon!  

79. Solomon bang’a michingpen danna kigel, humpi banga hangsan danna kisei, Alexander leh Napoleon banga vannoi lajoudi bangleua hat le boltheia kigel, film star ho banga mijousen hoi eisah a eidei diham tia kigel, katei katei ahiti tahtah jeh a vannoi leiset aboije kiti hidi hija hi o ba.  

80. Jingkah hung jingthoa pat kholai leng, buneh phat le imut phat lebou a in jon, pan dukan leh puri hotel dunga nilhuma kihoulimna hoa pangthei, insung tohdi thamdi donlouva society muntina jangpu, ama inchen beh phate kivet tupjou jong hidehlou, neh le chah sum le pai langa olmojong hidehlou. Hitobang niho jeh a insung khosung vengsung le nampi ahidi banga khangtoulou ahi.  

81. Bandh boldi la kivatlou, sumdongdi la kivatlou, aneijou aneilel la kivatlou, moh dunglen vailen tho dila kivatlou, imacha bollouva moh umla kivat lou, bunemanlou le ihmu manlou leuva natong la kivatlou, hahsatah a sumhol la kivatlou, bailamtah a sum mudi ti la kivatlou. Akivatlou ngen ahijeh a boina umji ahi.  

82. Mi bangkhat chu thivuina kin hihen moupui jineina kin hileh houlimna phat amu poupou leh election politics thu seijengloi, Kuki nam thu seiteiding tiloi, pupa khanga pat phung le chang inchen khosah thu seijou keiding tiloi, kate henu, school chapang ABC hillin kiban hil leu lungdam um inte kati nama!  

83. Tulai hi thil le thil kilheh bartar system hitalou, imajouse kijoh a kicho ngen hita. Thilman ho jong ajohpan anop jatjat asah jeng, hiche kalval hitheiloudi tijong umlou. Ahia inmun loumun hopi hi ivet leh fix price hita, 50% off kitijeng. Hichi sangchun manbai tah a kijoh kitileh phajolou hammo. Oleh tulai dukan hoa special offer, percent hijatjat off kitibanga imajouse fix kibolsa negn hitamla kihetalou. 50% off bon aumleh chomkhat jouleh inmun SALE, special puja offer, Christmas discount ho nga thei ahitai.  

84. Koiman kipaman pehdin eihepha hihjong leh ei le ei kipaman kipeh a vohcha ahcha kithadi hijeng louham. Tulai kipaman hetpehna jatjat hohi moh a koima kipelou ahi. Atohphatman le sum peh jeh a kipaman kipeji ahi. Kipaman hinpedi ho kilunglhaithei chu abolthei kipaman changdi mong ahi. Lottery a bou koima lhentum umtheilou ahin adanga vang mai kivetna umtei ahi.  

85. Sum le pai chunga kitahna neilou mi chu thildang danga jong kitahloudi ahi. Kitahna neilou chu ipi boljong leh lolhing louding a inchen jong detlouding ahi. Bat nei lah a sum bat nei kiti hi sapset channa khat ahi. Mi kitahlou hon bat aneijingdi athinung jongle bat neipuma alhagaovin hinkho amanjingdi ahi.  

86. Tulai hi plastic polythyn honjong sa anehthei u hitale akilom’e. mi sangkhat val nehdia kihon sa abel bel a kitung ho chu mi ja nga bouvin aneh vang in anejou thouthou thei uve ajeh chu plastic polythyn akichoi cheh u ahi. Umchan hoilou ahi akitijong lela akihabol cheh to kilou, mihem bou hilthei phothei ahin hiltheilou mi ho chu ipi ahitadem, jong le ui ho bon bolhih in itileh angai ahin umchan hiltheilou chu mi hilou iti le kichaivot.  

87. Thilpha helou koima aumpoi, abollou jeh u bou ahi. Tahsa thu lhagao lang thu politics thu kipunkhomdi kingailutdi tiho thilpha ahi ahai koima aumpoi, koiman ajuilou thu bou ahi. Lolhinna dia kihabol di potthodi kitahdi tijong koiman ahaipoi, lolhinna deimo jong koima aumpoi. Henasa bollou jeh ahibouve. Tulai koima angol umtalou angolpena min akoihojong akham chabepma chih thilit ngen ahibouve.  

88. Ititlou tup kiti hi chonset lomvang hipontin ahinvang ngolna khat ahibouve. Mijousen adeidei mujou henlang ahinomnom ahithei leh ipiba kiseidi ham. Ahin ihina idinmun kivet a itupthei itupmo hojong kihetdi ahi. Hiche kihetlouho chu chinglhehjong leh minol ahilou leh miching ba hidiham.  

89. Election result kiphon toh MCS result kiphon toh class X le class XII result kiphon toh tulah vang hi acha vohcha bong le kelcha hon thohjou tahihbeh unte. Mi kipapi hojong hi sial lungthim keng tamji ahi adeh a election kaidoh ho kipapina a kholaileng ankong sem ahcha vohcha choi/toh hohi fund themkhat kadeije tina vanomba khat ahibouve. MLA MP MDC kaidoh honla sial lungthim bep mandoh mokitjilou u, anom’e.  

90. India Standard Time sanga minche le nasajo Manipur Standard Time juilouva aphaatcha kikhopna mun lhung ho chu anunnom ahiuve ijeh inem itileh amaho chun aphatcha a kikhopna hunglhunglouho chunga lunghang ding chomkhat jouleh ageipena hungpangjidi ahitai. Mijouse ageipena panding kitetna khang ahitan kikhopna hoa lhungei chu jachatna hilouva mitna tah a kilah khang ahitai.  

91. Vaang kivetna Lucky draw hi huinun khat hunghi kit dan ahitai. Lotery result kiphon dikon jan sehleh amang sanga ajing leh tujan kamang hiti khati tia Daniel mang lethem banga mangle aumsaosaojitai. Lottery kichep jonghi atuong ho thanom cheh cheh, amangho thangtom cheh cheh, lekha kap tobang hithou ahi.  

92. Sum/paisa jeh a kikhenlo loi aumthei bangin akigomkhomloi jong aumthei thouve. Election jeh a sopi inko kiloikhomna khat jong kikhentelna aumtheiyin election jeh mama a kigomkhom kingailu kihouthei jong aumthei kit e. hiche hi democracy phatna le phatlouna ngohdi himai louham.  

93. Job card khang hung kichai maithei ahijeh hitam Kho kichu, haosapu hidi kichu,village authority member beh hidi kichuna ho, kho tah tah semdi ti ho ahung thip jep toh akilouvin lunghelbon aum ngap’e! Tulai mi tamtah in angolpi MGNREGS Job card khang hi hung kichai taleh pathen houjong hung dihdom di baha?  

94. Tulai hi khantouna to kilhona mijousen mobile phone akichoi ahitai. Chapang hojong mobile phone toh hung pen tha abangjeng taove. Ahin mi bangkhat chun amabou mobile phone nei le choi dannin aumnalaiyin milah a atouteng, hou-in kikhopna dung jenga jong aginsah toh mitoh akihoutoh chohlha jeng loijong aumnalaiye. Milah a mobile phone Mandan school khat hon phat hitalou ham?  

95. Mi’n anu apa adalhah a aji kom’a beh ding ahi kiti thutheng bua kimu hi dihtah a juiya ji aneiteng anu apa dalha a donlou tahbah loi aumin hitobang hohi anu apa akipahna dem ole alhase de mama ama cheh in kihet theilou chu alonaje bei kitiho chu hitante.  

96. Society khat sunga mijouse thil leh nei khat chung’a kineisah tah leh apu apa lamsa danna thusei lungput neiho aban thigamdoh kah a kitona le machalna umloudi ahi. Kukalna kiti hin ipi thilpha apohdohngai em, midang dia thilpha asolou leh hitabang miho dia thilpha bou sohtei tei inte tina umdeh am? Hijeh chun vannoi leiset a thilse pen bolthei danna kigel hon ajet avei avet masatdi hi thumop ahi.  

97. Mihem khat hia ithikal ngahlelkei mi tamtah aumkhahdi hi vangset umtah hidi ahi.society khat sung’a lamkai bolthei tamtah hi athidi it umjongleh kithidoh loi le tia alungthima tao tao jeng tamkit ahi, koiman vang lhangphong in hitobang lungel anei le adei aseidoh poi.  

98. Mi bangkhat chu mi’n aseiphat apachat leh ki benglam bolna a gel’a lunghangji, mi bangkhat chu tosot panpina a thu khat in aseileh a bil-ngon jeh ham a phate ajahtheilou hidiham neidem’e tia lunghangji, mi bangkhat chu mi’n athu kihoulimna a asei leh kipah, abangkhat chu lunghang ahi. Lunghanna ding ihol leh hahlou, lungdamnadi iholejong mahding lunghannadi khatcha umkitlou tina hiloudi ham!  

99. Manipur thinglhangmi lah a kuoitete ham in apu apa u khang’a pat abolngai u Luira laam khu nungah theng jineiloulai hobou laamna golnop ahi akitin Mary party hilou ho hiche laamna a ajaoleh athilo jie jong akiti e. Tulai namtin nungah ho hiche laamna a pangtei teidi apanglou hojong thidi ahi kitina umlevang kumseh leh nungah nungah pul umtobang jeng intin gollhang bangkhat din nungah ho puldou jong beitultul jengin te!  

100. Khojatheilou nangong khat kom’a thu khat seiham, ngaidam thumham chu jathei hihjong leh amuthei poupeh ipiham khatvang aseije ti ahet thei teidi ahi. Ahin mithi luong chunga kabolkhelna neingaidamin kiti hi thi jouva jong khoja thei mithusei hethei um tina ngap ham, ilah uvah akidangdang aumjing akiboljing nalaije. Mi thinung teng ngaidam thu kiphatlam thu kiseiji hi ngaidam kithumna pa ham nuham chun ajahthei hileh koi ngaidam malah kahin petna chu naseimo ham kiche doh in ahinti joh maithei ahi. Kaa ochang’a kap puma nei ngaidam o ti kisihna hileveng pathen injong ngaidam nante. Hiche sanga a insungmi adamnalai ho kom joh a ngaidam thumjoh phadi ahi.  

101. Program khat a minchuong hilou bangkhat in seiloudi ham katileh conduct pun phat ahinhon jeh a dindohloudi kanoplou jeh ahi tiho hi aman seihihjong leh koiman nopmo asahloudi ahetphah lou jeh ahibouve. kijen chun kaseinom lheh jeh a kahung dindoh ahi tingal leh hijeng loudi ham, seida di dindohda di itileh conduct pu phat hon jeh a seitei teidi dindoh teiteidi tina umlou ahi. Kahin seisao jeptan la ti ngala haitange tikitlou loijong hi ipi seia kingaito ahidiuvem, iseisao ikihetleh chaitange tidi hijeng louham. Khantouna kiti hi hiche ho themthem het hi ahibouve.  

102. Aaam Aadmi party hopi hi Manipur ah hung hat tahbahleu cha le kuwa du ho boi tendiu ahi. Manipur a cha man atambehseh e kiti ahin office a thilkhat kibolsah peh jeh a chadonna di sum kilah kipeh ho hi AAP hon ahin suhbei uleh cha khela coffee donnadi, kuwa nehna di khela raja khaini nehnadi kipehto kithumto hung hithei thou ahijeh in lungkham aumpoi. Hijeh chun cha le kuwa du ho din aboina umdehponte.  

103. Tulai hi khantouna khang ahiphat in election laijong leh thinglhang kochong langa Vote hola gache ngaitalou hotel dung, camp ho leh khopi sunga khat inn a kimutona aumleh kichaijeng. Chomkhat jouleh mobile phone, facebook leh internet hoa paisa kipehtona leh kilahtona hung kiha manteng vote campaign jong hiche hoa hung kibanbolding camp hoa gachejong ngailoudingt, munkhat hotel khat dunga kimuto kihouna hojong hung umloudi ahitan anavahna khatjong aume tidi hijengloudi ha.  

104. Tin le ha tho in kipangkhom henlang kikiseiphatojong leh koima kitetjoudi nalaipi kidemto kiseisetto kihoptel kibungkhen chun ipi ahinpodoh dem venau hite. Ahcha te ipiham khat atoditeng akichutouvin a aolah lah jiuve kiti chu mihem injong athoji ahi.  

105. Mi bangkhat chun news a imin kitahlangdi ham, inatohdoh ho mipi jahdi le mudia tahlangteidi ham ti, mi bangkhat chun kikhopna khat a amasanglang akitoudoh sahlou ham mi hetdia amachu ihung dindoh peh uhen o akiti louleh lunghang lhase jeng, mi bangkhat kitchun kanatoh kathilbol ahoi aphat pouleh ei le ei kikiseile hihjong leh akhohpoi ti kit, mipi kikhopna ah eikiphongdoh khante tia conductor hon amin agah phah jongle polanga kikhomang jeng, mi hi ajatjat um tina hijengloudi ham.  

SHARE
Previous articleBlankfire #3
Next articleBlankfire #5