Blank fire #1

Blank fire #1

266
0
SHARE

Blankfire-15 (4rd Jan – July 14 July)

(Note: Blankfire a sodi hinthot jihon ahitheichanna khat changtum/party tum gotna hilou society lhangpia kapna bou akideiye, Na min le umna jong akisoloudi vanga nahin pehtha ngai ahi. –Ed.)

1. Christmas New Year kimanlai leh election dikon teng chini bongnoi hintohdi, hongphaltah a bong le vohcha ho toh dia hung kipedoh atamji bang hin avaicha agentheidi ho leh nam sung’a thilkhoh hoa hintoh dohdi tamji leh thanop umchom lheh intin society jong machal lheh intin phatthei changdi jong tamloudi ham!  

2. Kumthah damsel’a mu kipa jeh a pathen thangvahna peloi, neh le don jatjatna kumthah lemna party bol loi, Kumthah ahunglhun poupouleh tukum’a pat kisemphatdi ti lunggel nei, kumthah golnop kichai nia pat angai ngai hijing kumlhung thou kitam jeh a boina beitheilou hidi bahaimo?  

3. Phung le chang’a thilbol hi second coming kah a beitheiloudi ngap hitam, kipapi kin le dong ho hihen kinahna thei thei hoa jong phung level kigeiji hi anopna khatbon aumji-e, ijeh inem itileh imujing leh ihetkhahjing ikinaipi eima insung phung le chang ingailutlou leh imukhahlou leh ikinaipilou society le pathen ngailutdi chu hitheilou ahi thutheng bua jong kiseisa ahi.  

4. Kikhopna khat aumpou pouleh milah a dindoh teiding, thu seitei ding, la sahtei ding tiloi, thu tamsei hi chihna a gelloi, aphatcha kipatdi gola umlou tamjeh a aphatcha a perograme kichaitheijilou ahilam heloulai society chu iti machaldi hitam, nungchal lam’a machal ahiloungal leh!  

5. Football tournament khat kibolhenlang hichea pangdi team ho chu pathen ngailu team, gam ngailu team, phung ngailu team, sum le pai ngailu team, ama le ama kingailu team hileh hiche holah a koi team hin player leh supporter atamneipen dem, maichan nom hih inte!  

6. Society a dia aboldoh atohdoh kihelou, athi nikho leh athusim chom,cha kijihna a President, Vice President, Secretary panmun analoho hung kigollhadi lekha phengmai khat injong adolloudi tam lheh tante. Ijeh inem itileh kiloikhomna hi nitin lhatin in apung jing’in lamkaidi jong akiholmo dehpoi.  

7. Nehkhomna a kitona leh kingailutna aumthei bang hin tohkhomna leh hahsat genthei thohkhomna ah kithokhomna umleh khantou machalna umdidan seijou hiponte. Anedia kiphatlamna umlou banghin atongdia kiphatlamna neilou lhom leh koima ki engset to ponte.  

8. Mito kihoulimna a amabou thu seimun kipea adangho ima seisahmanlou ho khu bolthei tah le he lheh dana akigel vanga mingol hina tahlangna joh ahibouve. Abangkhat chun mi thuseipet kisan’a lahtan peh a anop chabepma thu seikitjeng. Umchan khanchan kihilna school hi aumlou vang’a koima hil louvajong hetdidol loi umjeng ahi.  

9. Phaigam mi hon thinglhang gam gari auction kibol dan’a chohjeng theija gel, pangal hon phaitol khopi laitah a thinglhangmi veng khat a cheh in song in hojong dukan’a thil kijoh dan’a ijatman ham tia dongjeng. Hitobang gam le in neite nam mi hi anunnom himailoudi ham, nikhat le zong gena tohmo hung bangdiuham ti thu bou!  

10. Minthanna leh haona ho aumpou leh ima ahimo aumpoi, chuleh kilungsetna in chi le nam, kum le lha ho khenna aneipoi. Ahilouding kihisahgot teijong hitheilou, ahiding khat chu hung kipeilelea hitheijeng ahithouve ti mutheina aumjing’e.  

11. Mihem khat kihingal, moh mi jong kihidehlou, ahia mi lungholna gun leh maipha vetna gun’a natoh thusei lasah bolgun’a hindi vang mihem hina jong kivat nintin, milen milal khat hilona jong umponte.  

12. Mi khangtou te kitahna lam’ah akitet e akitin akhangtoulou ho hi kitahmo leh lepchena lam’a kitet hijeng lou diu ham. Kitahna neilou ho malsomna achangji e tivang lekhabu ah akisimdoh khapon evangelist le pastor honjong aseikhapoi.  

13. Ei le ei hiche khuche kahi tia kitahlang sanga mijoh in amachu koi ham, ipi abola hoilaija umham, ipipi hia ham tiho ahinholdoh a ahintahlangjoh leh kiletsah umjo loudi ham, Ama le ama ahina le alolhinna kiseile hovang pachat aum mong uve.  

14. Haosa hina, mi upa hina leh haosa tauji kipoh lele thei bang hin ikho iveng igam leiset jong kikipoh lele thei leh iti thanop aum tadem, chutileh ei le ei kikah hoa gam kichuna a kinah kibaona ho lhomdom maithei ahi.  

15. Mipa khat hin kachate lekha kasimsah leh sap le leng ahung higam phat un sap pao kol pao bou atho taovin eipao va thusei lasah, lekhajih, bible sim jejong ahegam tapouve tin akilhasetne tia ahoulim thu akiseijin, hiche mipa cha te lah a jao kitamdan hinte.  

16. Ni nunung lang leh pa le cha kikah a kidouna hung umding, sopi le sopi kikah a kivetdana hung umding, sum ngailutna hung pung ding, jou le nal a kilep loijong hung umding kiti chu ‘second coming’ nailam hihjong leh ‘first going’ vang nailam teidi tahsan louthei ahitapoi.  

17. Nam sunga President jouse kiti le la boibehseh intin khosung, houbung sung, thingnoi thingchung jousea finance incharge jouse conference khat kibol leh camp sahna a mi ijat in nikho ijat asumang in, touna ding plastic chair pohle thahlena din truck ijat angai tadem computer mangcha a hisap bol khamset hinte!  

18. Seitho politics leh kidemto politics a ima phatchomna umponte. Natoh leh thudih bol chu achaina leh hung kilangdoh thouthoudi, tonglou leh thudihlou bol chu mei am ponsea kitom bang’a hung kadoh thouthoudi ahibouve.  

19. Midang hon itha jong kisit hijeng loudiham, ei le jong kithato, ikikiet tolou leh horong lah a ba gamtum kimudi ham, hijat mi’n ithat taovin, hijat ikithatodoh taove ti isit nahlai u hitaleh akilom’e.  

20. Tulai vannoi leisetna lamchomchom’a kitetna hi asangtan kihaboldi ahimaije. Thingnoimi party thah thah phu kitetna jong hi kitetna thupi khat ahijeh in tua jong ijat aban bolbe theiham hagel thuhdi kiti hileh akilomtai, amindingla kivat khat hai, alamkai anungjuidila kivat khat hai, sponsor dila kivat khat hai, nampi dia ipi phachomdi ham tibou.  

21.Christmas dikon’a December lha advance lhalo kilah jeh-a January sung’in sum jakhat jani jong neitalouva nehdi anchang jong kichohjou talouva thigamdi loi um’in thu akijai. Ahin chengkhat neilouho jong hospital lhung leu apet petna sangkhat sangni vang sakhaova kon lengdoh jetkitdi.  

22. Mi athi leh lunghem lainatpi loi, kipa thusei loi, thivuina kin’a galha a ahoulim leh kipathu negn sei, abang nui lah lah kit. Ngailut lunghempina ham, kipa golnop kikhopna joh hamla akiheji tapoi.  

23. Masanglai chun mithatdi gunda ho sum tamtah peh a kithalahji chu tulaija hi mi huhdohdi le dan vetupdi ho kithalahji khang ahitai. Mi thalah hojoh ngohdi ham, akithalah hojoh ngohdiham akihetheiji tapoi.  

24. Tahsa lang’a kichep golnop bol’a Area sports boljong kitetdimong ahi, Kingailut kihetthemtona diajong futbol pehkhomdi ahi, lentol pam lang’a vang ball peh bollouvin aphai.Lentol pam’a ball kitetna aumteng runner up aumtheipon, consolation prize hojong aumtheipoi.  

25. Uicha nat le uicha mipe hi mi bangkhat dia iti kijen hitam, uisa neh nehdi hijeng, abangkhat chun na uicha manbeija ikitha uleh sum tamtah naleunadi umtaloudi tia si-al lungthim kengla kivatlou, rabbied vaccine lou kap sang’a khetlih leidi ti hijeng, kijen keile akilom’e.  

36. Akina akidemto leh kivetda tah a umho jong akimuto teng nuiseuva kihouthei ho khu pachat umtah ahi. Koi pou bolthei ahipoi. Akam’a asei khat, aung’a agel leh abol achombeh hojong boltheina lentah hijeng loudiham!  

37. Koima akiboltheisah thei aumpoi, umjong leh itih chanpi hidi ham, ijeh inem itileh leiset chung’ah ima permanent aumpoi. Tunia boltheitah hojong jing leh ex-Minister. Ex- MLA, Retired officer ho hung hijiu, tunia melhoitah hojong chomkhat jouleh vet thei hitalou hiji ahi.  

38. Midang hon ama apachatdi bou dei, mihon ahina le anatoh aseiphongdi bou dei, ahia midang kiti phot pachatna thu seikhalou, midang in ipi thilpha abol em ti mongmong seid gelna neocha khatjong neilou ngenbeh ahijeh a koima pachat le seiphat changjoujilou hinte.  

39. Neh le chah kiholna a jou thu jeng bou seija hinkho mangho hi jou sei ahipouvin mi thase jong ahipouve. Ajeh chu akihinsona dia moh um hilou u, bol khat anei u ahithou uve. Jou sei jong hi koima pou bolthei hilou ahijeh in abolthei ho hi mi nasa tidi hijeng ahi.  

40. Kuki khopi cheh a kisei, international gamgi a khopi leh S.Hills district HQ dia kiseipen’a mi kitah khat beh news homdi umtalou, alahman phatecha peloudi tamjota. Phaitol khopia Kuki kiloikhomna lenpen a kisei lamkai tam umnapen veng a jong chutima, society khantounadi vang hahsa nalaijinte, khat teho!  

41. Ama phatchomnadi themkhat beh aumlou leh midang phatchomnadi neokhat jong bolnomlou ngen ahijeh a koiman midanga kon phatchomna amujilou hitaleh akilome. Midang phatchomnadi bolngen hileh mijousen phatchomna muthei tadi!  

42. Ilah uvah Association atamvaltan ahithei leh eijuten jong association of associations kiti ho ban bolpat phat hitante. Association of Students association, association of chiefs association, association of Kuki associations, adangdang tamtah umthei tante!  

43. Mi lungtheng kahie tia alunga um um moh vohdoh doh jong hi ngolna jat khat bou ahi helou tam thoudi ahi. Mi lungtheng hon vangam alodi ahi akitinakhai eileh mi kitomonadi thei ahi henasa a lungtheng tah a thu seile jong chu vangam alut em, damun alut em kihethei leh thanop umtamante.  

44. Politics bol kiti hi jousei kitet leh khat le khat lungthim (duha) a kibolto kitetna ahijeh in nampi level politics a ivet leh mi ihetloukah a mi duha a kilhemlha hitam olebah midang te joh ei duha a lha dapvep hamla kihe talou!  

45. Mijousen adihlou abolteng adih tobang hijeng loudi ham, mijousen exam’a copy abolteng ipi adihlou um am,Tulaijin hiche hi adih mong in hiche adihmongpoi tijong umlou ahitan, adih bolngam le seingam jong umtalou ahitai.  

46. Football peh kichepna ana umdoh hi ichan geija phachom hitam, akichem hole kichep veho abon uva boldi khat umjing, loubol honbol thingbol tohding ho donlou khop’a kisahboina thei phatah, politics bolnathei phatah jong hithou!  

47. Aseijouse, ahamdohsun’in kipunkhomdi kingailutdi pankhomdi kinahloudi kithatoloudi ti, nampi ngailutna leh machalnadi thu seingen jong hikit. Ipi atileh akiseiho khatcha tahsoa umtheilou ahidem, ole akong’a chempong kipoh a chamna thu sei kiti te ahijeh hamla kihetalou!  

48. Election kiti phot khat beh a ikaidoh louleh gam le nam, kho le veng, mipi di naa kitongtheilou dan ahitai. Keima changtum phatchomna din gam le nam, kho le veng ngailu in kakilep’e ti aumleh hitobang mi chu mi kitah ahijeh-a mijousen Vote pehdi hijeng!  

49. Muntin’a hou inn sah kitetna um, membership drive boljong kitet, houbung thah thah phu jong aguh a kitetna um, lhagao langa machaldi kitetna aum aumlou vang kihe talou.  

50. Mihem kangailu e itileh inatoh in avetsah ngai, pathen ngailu jong ahindan in avetsah ngai, gam le society kangailu e itijongle chutima a chu inatoh ithilbol in avetsahdi bou hilouham!  

51. Society a hi ajatjat ki umdimong ahi. Ahitheiloubehdi seiloi jong um’in tin, mi sei mibol jouse nuisat bepdi loi um in tin, ahitheidi tah sei’a bol loi um intin, ahitheidi mama sei’a bollou behloi jong um hihta.  

53. Class X exam hi khompi nomtah bahsahloi, kumhei golnop banga mangjengloi, kimutona leh kihoutohna a mangloi, exam a adihlou suhbeina dia suhlhai toulhai thojeng loi. Ahia kumkit lhakit leh angai maleu hiji.  

54. Thinglhangmi lah a Yaoshang kichai lunghelpiten jiho hi chi le nam, hou le bih a khentum neilou milunglen ho hijeng loudiu ham, mi thabal chongba thanomtah a gajaopeh le gavetpeh jong chu loi le pai semna ahi tidi ahimai e.  

55. Upa camp bol loi, nupi camnp bol loi, chapang camp bol loi aumjingin ipi atileh nungah camp akibole kiti kijakhalou haimo, gollhang ho camp la muntina umsa, athah thah jong kibolbe jing nalai, camp munding kichuna umnalai!  

56. Vohcha khu sap pao’a ‘Swine’ kitia Ju khu ‘Wine’ kiti hilouham, achutileh Swine Flu sang’a Wine Flu hi eimi lah a kichat ha umjoh hiloudi ha? Ei lah a Wine Flu natgol hi phatseh’a langjing hilou ha!  

57. Midang khat kasopi ahi ti’a amapan eihetphahloudi toh, nang sopi kahipoi atiditoh, imah mah dia hung kisa nalaidi, sopi sopi kati tia na ijah ham tidi lheh lungjat umji, jachat thangtom jong um ngap louhaimo!  

58. Masang’a uicha’n bou aloh lhahsa anekit e kiti chu tulai khantouna khang ahiphat in mihem injong alohlhahsa nekit tam ahi. Power umlou ADC/MDC tia ana kilo lhasa chu tua chilva leuva nekitnom tam ahitai.  

59. Mi’n ka thilpha bol hehih khante ti ngen dan ahi hi vangset umtah ahi. Mi hetdi le seiphat channa di bouva thilpha ibol ahileh mi’n heta hihleh bollo umtaloudi chula. Ipi ti hitam, mi’n hekhante tia thilse bol hola hung kihedohji thou!  

60. Kin le dong function hoa chief guest a ipan nomleh Social lamkai, MLA ho sang’a thingnoimi lamkai ham, contractor ham ahilouleh MDC beh hidi dan ahitai.  

61. Huoilang swine flu ipipi flu natna hung umdoh ham vohsa bongsa kithat talou, kijoh talou, kinetalou, kin le dong hoajong satha saneh lhomta, sum senna ahutdom in akijensel ngap e tidi ahijeng’e.  

62. Gamsung huinun phatpehcha hin kichep golnop golse botheichanin habolin bolmai uhitin, kipa lasahna hojong chimlouvin kihabol mai uhite, ijo hitobang ho boltheilouna phat hahsa nikho ho hunglhung taleh kisihna hun umthei ahi.  

.63. Tahsan theitah ho tahsanjou ahilouteng tahsantheilou ho society chu itobang ahitadem! Tulai mi moh tahsan san hohi mi ngol dana um hitaleh akilome. Ahin mi tahsanna ichanlouteng ipi kiseidi hitam!  

63. Tulai khantou machalna dungjuijin society sung’ah Dr. atamtan koi hi dammo jendam thei ham, koi hi natna boldoh thei joh ham akihethei tapoi. Doctorate atamlaisen society natna le kibungkhenna asohdoh e kiti nalai, heihah!  

64. Lamkaidi kivatlou nam mi te chu minasate tidi hijengloudi ham, social lam hihen politics lam hihen thingnoi leh houbung lang hileh lamkaidi bep chu kivatlou ahijeh in kisonlelnadi aumpoi. Mi ijat lah a lamkai kihia lamkai hina a ipi kibolthei am ti thu bou ahe.  

65. Election kiti khat ahungnai kit tan insung kingailutna ankong leh kipunkhomna thu hojong hung kiha seipankitdi ahitan chomkhat tadi chu chini bongnoi, chibai salam kibolna ho hung niengdi tina ahijeng’e.  

66. Houbung leh society kivaipohna hoa bon athenglou, adihlou aumthei leh ‘dirty politics’ athensel divang aseiya seidadi hijeng louham, dirty politics athensel nikho hung lhundi vang mang’a jong matloudi ahijeng’e.  

67. Bible a theichang aga teng nipi anaitai kiti thulem bang’in khantou machal natoh holeh gam le nam ngailutna ho ahung kihasei teng election anaitai ti hetdi ahijeng’e.  

68. Kho khat a Govt Primary LP school um hi khantou machalna lentah khat ahi. Hithei henlang inn 10 chunglam kho jousea ah Govt LP School umthei leh hiche school hoa kaiding chapang tam le lhom chu thuchuom hintin, sum hintohdoh ding govt natong vang tamdi ahi.  

69. Christian ho lah a lhagao thu lama machalna aume ti mutheina khat chu good Friday jong bad Friday tidi joh ahibouve tia kiniel lea mathah, mi banga houin kikhomjong hidehkitlou u, hitobang miho hin ni 3 jouvin akiti e atiuvin akhoh leh ester Sunday jong khu ester Tuesday ahin hisah teidiu ahe!

70. Ni nunung lang, second coming ahungnai teng leh gal le tol hung tam ding, pacha ucha kikah a kinahna hung umding kiti chu guilhung hitam, vatjep nalai ahidem, ole naoso nat kipan bep joh hitam akihethei tapoi 

71. Election laileh candidate ho leh anungjuiho akaidohtei dia kisei sohkeijiu ahijeh in akailoudi beh hojong akaijel dia kiseitheilou chu election tetdia fit hilou hididan ahi. Ajeh chu election kiti hi jou sei competition khat ahithouve.  

72. Hou-in sung titah louva kikhopkhomna ho phot a thuphon khat boltaphot in Pakai min’in kahin tem’e atijing kei u jonghi kilomthei beh hinam, ole Christian phatah kahi-e tina a lahdi hijeng loudi hamla akihetapoi!  

73. Imin masang le imin ban’a kijih TAITAL (Title’) dei ho hi athi teng uleh alhansuong lenjep, saojep ngaidi dan ahi. Title thupisah hojong oimo thei ahidehpoi, sum mubena leh aphatchomna aumpoi ti thu bou ahe.  

74. Tulai hi ipihamkhat boldi iti leh thingnoi ham, thingnoi to kinaidi ham hiteidi hileh akilomtai, MDC election a pat houbung, kho le veng khat tundohdi ham, nungah heldi geija thingnoi backing khat nei ngai hitaleh akilomtai!  

75. Mi thil lahje ham, nehje ham hea alepehje leh anehman pehje helou ho chu alolchang’a sagu hal ahilouleh ngaling ho ohji hilouham? A ojong leh akhohdehpoi, hospital a operation bola lahdoh thei ahithounai.  

76. Thu aseiteng vannoi leiset pumpia thunei pen, imajouse hesohkei, ama lunggel bou dihjeng’a gel atam jeh a society a kitona umtheilou ahe. Kei tobang’a ching, kei sang’a ima hejo aum’e ti gel ngen hileh kitona hung dimtante.  

77. Ahina in ato atolou kihetlouva mi’n abolnai tia mi bolgot jousea thanom jiho tah hi pachat jong aum ngap e, mi nuisat bep ahidiu akihetlou u thu bou ahe. Lekha he jep, sum le pai neijep, meithal nei jep ho boldi loi um hilouham!  

78. Koima soh hidi nomlou ahia mipi soh hidi vang kichutho jeng u ahe. Mipi soh a pangdi jong ihiti kichutho uleh mipi hi ichana vangpha hitau vintem agelje aumtapoi.  

79. Demand kibol (akithuum) jouse pihi ei kipetei leh kimuji hileh vannoi leiset hi vangam tobang hitaloudi ham, chutileh gamtum titahlouvin demand khat bol’a bandh boljousen jong adei musoh intin ’a Kuki district Kuki state, independent Kuki land hojong kiban mugam tantin nom lheh inte.  

80. Kuki politician ho Naga kho a govt office koidiloi, office building ho sahna leh thensona dia thanom tah a panla diloi, lunglen keng le Christian dihtah hina hijengloudi ham, ijo hiche office a gache Kuki hon mol ahinnehji diuham ti thu bou.  

81. Chomkah louva Ex title hin kipohdi mi hung umsausau tadi ahijeh in lunghel jong um ngap inte. Romance a Ex hidiloi, election politics lang’a Ex hung hidiloi ihung tamdiu ahijeh in Ex society khat hinbol’a all Manipur bandh jong ahung kikouni hung um maithei ahe.  

82. Lekhathem tahtah honla ama paova thu aseile English tamjo jaojita, lekha ajih ujonglela chutima, lekhathem khat hia eima pao a lekha pum jihtheilou ho sanga Thadou-Kuki-Lish pao a lekha jihthei ho gamchang’a phajo nalai himailoudi ham!  

83. Bat neilou hi chonphatna lentah khat dan’a um ahitai. Achutileh sum bat nei, thil bat nei ho hi mi chonse hidiu tina hitaleh akilome. Mi khat chun sum ibat louleh eingailu tah mi tidi hitaleh akilomtaye katei katei!  

84. ADC sang’a neojo party ticket ngaina Election umnalai jong leh athanom kivatloudi ahi. Ahilou ngap leh Village Council member di election a jong hi party ticket ten kibolpan leh pha ngapdi hitam!  

85. Ihina tah akiseikhah leh alunghang umji mong ahi. idon kap khah khat jong chu ama le ama kiman jeng, alhangpia thu kisei khat in ahinatah aseikhah jong umji ahi. Alunghang hojong oimo thei ahipoi.  

86. Kho min veng min hojong ajat jat hung umdohta, gamtheng gam a mun le lhang ho minla kivat talou, old testament new testament a min le mun hoa ikho iveng u min la dimta, ahsi, nisa le lhatah ho thusim to kimat kho min veng min jong umdohtan lunghel hel jong aum ngap e!  

87. Democracy kivaipohna gam’a ichen khah u aphatchomna lentah khat hi khatvei veileh saneh na, chini bongnoi leh chibai bol neng jeju jeng, nam ngailutna thujong chutima!  

88. Ju sem, ju joh ho hi thepmo chansahdi ahipoi, kon nachoh teiteidi, na chohlouleh kathadi atila ahipon. Achodi leh adondi umjeh a min ajoh ahi. Leiset umlaise leh mihem umlaisea adonding leh ajohding umdi ahijeh in kon iti ju joh akham teidi ham? Judon thina thei ahi kon ahaila ahipon!!  

89. Koi hi thudih a thilbol hia koi hi adihmoa bol hitam. Koi hi pathen thu le la to kitoh a natong hia koi hi akitohloua thilbol hitam akihetheitpoi, aseijousen ama dihmona kihetlouva midang dihmona ngenbou sei..  

90. Nampi lamkai aumpoi, ajeh chu nampi lamkai ngen ahijeh ahi. Nampi thalhenga thuseidi, natongdia mipi’n atundoh leh mipi jousen apom cheh lamkai aumteng nampi lamkai hidi, nampi thelhenga thusei lasah hojong hung hithei tante.  

91.Mihem in Title adeidandan hi amin ban’a ipiham khat beh kijihdi deina a EX MLA candidate, Ex MDC Candidate ti ho gei hung umdoh ahitan ijoleh “Almost Ex MLA/MDC Candidate” (MLA/MDC ana tetgo) ti Taital jong hung umthei ahe, tijat lujat jong aum ngap e.  

92. Tuchung MDC Election hi anoptoh lheh jenge, thingnoi level a kibolto diloi, Friendly match tobanga kitetdi loi, khat sotlhahnadi ahipou leh katetdi ahi tiloi, khat kailounadi ahileh kei haitange tidiloi, ahinkhoa kivetdato leu diloi, election kiti chu hiche hiba hihihta!  

93. Society a seimun chang inting, adviser post ho kituh kha hen itileh sum le pai podoh a pandi hi chena lhongpi khat hitaleh akilomtai. Ahilou ngap leh mipi masanga thuseidi leh advisor post hojong hi kiki choh tho ngap hitam la akihetapoi.  

94. Mipi natong ding, nam le gam ngailu itam behseh taovin, midang isopi iheng ikom hojong mipi soh di leh gam le nam khohsahna thei chance pehdomdom a pha hilou haimo, ole mipi soh leh gam le nam ngailutna jonghi a Fee peh ngai hitam!  

95 Til lai pu le pa khang’a chu mipi lah a vote anakiholji ahin tu computer khang’a vang hi thinglah a vote kiholji ahitai. Mihem chihna sanbe dungjui’a kum ijatham jou lang leh vanthamjol le twi nuoi’a vote hung kihol tamaithei ahe!  

96. Reverend pastor ho natohdi atam chepcheh jeng’e. Houin a thusei kin thempu boldi toh, birthday, anniversary maicham ho lhandohna neidi toh, Candidate ho kiphondohna kin a thempu taona mandi toh ……, kum 5 jouseh leh hin pastor ho tohdi jong atam dehset e!  

97. Party ticket kachangpoi tia lungphatmo loudi ahi. Eiho lah a party hijat um’a election commission in ahet le ehetlou thupilou, khatpen pen’a MDC election tetjengthei hilou ham. Party hojong hin constituency khat’a mi 3 beh party kibang ticket pejengleu khatbeh kaidoh diu hija akhoh lheh-e!  

98 Eima sopi leh insah inlhang nehding sildil kivat hojong gelphalouva ahetkhahlou gam’a hahsat genthei toh ho sum le pai thot dia panla leh lunggel nei ho chu Christian dihtah leh mihem hina a ngailut khotona dim, vangam’a jong kipaman tamsandi ho himailoudi ham?  

99. Election tetding’a kum tamtah kigoloi um’in tin, lha khat lha ni kigoloi umin tin, withraw boldi monga nomination file bol loijong umin tin, kailoudi henasa a nomination bol’a withraw jong boldehlou loi jong umhih ta, hiche hi ahi mi jatjat kikimna kiti chu!  

100. Koima nehguh chahguh, pehguh bol aumpoi, lhangphong tah a kibol joh ahibouve. Lhangphong’a ne le pe chu iti nehguh pehguh kitidi ham!  

101. Mi bangkhat in mi iphahjoulounao thupou aseijin, ahin Americaten jong iphahjoulounau tam ahi. Mi choudoh/phindoh-a eiti miti khulah lah a umdi ti lampang’a jonghi koima ki otchalou ahi, zongthohdi ngaovin athohkhaji e ti thu bou.  

102. Gojuhlai, vadunga twilet lai lebou bomdo umj ham kiti election lailejong bomdo aumjie akitin ole bomdo kiti poupouva hi nga (fish) oh jeng ham, ole songchang le guljong ohji ham akihetapoi!  

103. Lekhasimlouvin exam ka pass e ti khang ahitapoi. Lekhasimlouva exam pass ho chu ichan’a them ahitadem, ima ahetloudi thu bou ahi.  

104. Mi, melma umlouna a gal uma gal boldi tu seivang hahsa behlou ahi. Masanglai jong chun melma ho umlouna lang munkhat a galboldi kigoloi ana umjeh a melma umna lang’a sopi tamtah boilo hilouham.  

105. A umdanpi hi “admission open for election candidates, admission fee for elction candidate hijat jat” tia advertisement hung kiboltamaithei ahe!  

106. Thutheng bu ah chate ho paklaija nanu napa thun nungun akitin tulai hin pateho najinu thun nungun, nute ho najipa thun thungun akititan lhagao lama khantouna vang um hididan ahe.  

107 Uncontest a election kaidoh aumji hi a constitenci miho dia manna lentah ahi, ajeh chu uncontest ahiteng mipi sanehna holeh chini bongnoi donna ho umjilou ahitab hiche ho thanop pi hodia vangset umtah ahi.  

108 Thudang lading beija ponlap akikhaidoh in, vote muna dia taopehna kin akineijin, public meeting aumin, mipi ankong sokhomna aumin, hiche chu chief guest ah apangin, ipi pi akibole kiti thu bou kijajing kahetah hih e.  

108 A-in alou aji acha hephalou leuva society a dia natong le lhaile ho jouse hi kipaman in election kiban sotdoh leu ipi ahungsoh un society a din ipi ahinboldoh tadiuvem ti igel leh thanop louthei ahipoi  

109 Facebook/social media hoa kinelna hi aphachome, aphachompoi ti thua kinelna conference khat kibol henlang amin le aumna jou le nal bolho se mipi masang ah lhangphongtah in kinelna um leh koi chu humpi tobang hia koichu ahnou tobang ahidem vetnom umdidan wolcup chu eh hijengdi!  

110. Ahamdoh sunin free and fair election umhen, dihtah in mipi vote lhahna umhenlang mipi dei lhendoh in umhen, kitha kinah kibaona beijin election chelha hen tia sam, athil umdanpi hila kigihna leh hunam kimanna ngen beh tabang jeng kathei tahih e.  

111. Mipi kiloikhomna ho hi thil boltheitah ahi. Ajeh chu thilsoh khat aumleh demna sangtah apehthei ahi. Demna kipeh jeh bouva thilpha ichan umdohbea ichana thilse sobeda thei am ti vang thuchom ahi.  

112. Mi khat tou bandh blockade bol lama ahung kihapeh thim ham, social work, japi natoh langa ahung ha jangput thimham, mi kithopina jatjat ahinbolteng mohna hilou, duchat tup le doi khat jeh hijidan ahin hitobang ho chu mipinjong sotlhahdi gotloudi tundoh dijoh hilouham, ole?  

113. Hoilang ipipi thu soh a ipipi election um hitam adondon’a numei kiloikhomna hon pasal MLA leh pasal MDC candidate ho taimona leh kinielpina ahinnei tauvin ahiloungap leh hin imajouse numei hobou banpehdoh ngap a pha hilou haimo.!  

114. Hoilang ipi um ham, gari jouse ponlap apah lahlah gamtan, sanehna leh dondi ajat-jatla nenglha jeng, escort gari in ajui VIP gari jong tamcheh, kumhei golnop nikho lai sangin thanop jong aum ngap jeng’e!  

115.Lamkai ho moh demdem loudi ahi, mi dem ithanop nop utoh ijo lamkai hung umhih leh demdi ihetloudiu, chuteng avangse di chu mipi mama ihidiu ahi.  

115. Heihah ipiti kit hitam, akisei minthang kei gamkai mama ahikit te, polling nikho le phaat hunglhunglou laija vote akitatchai kit tai kiti, midang gamkai dang sang’a advanced hina khat tidi himailoudiham!  

116. Tulai khantouna dungjui’a sumlo nadi hi ajatjat um ahitai. Election hoa hi sum sumang loi tamjong leh sumlodoh loijong tamkit ahi. Chomkhat jouleh Bolero jeep jong hungtam chehcheh kitdi, kikhoto jong aum ngap’e.  

117. Katei katei, tuchung kiboltonapi hi MLA election chu anepte ahitan MDC election’a bon ihitiu leh kuki state hinmu leuhen election kiti tetdi tahbahjong khatcha umlouva ikichaigam teidiu ahe!  

118 Kukiland state kinei henlang MLA MP jong seat tamtah kinei henlang, MDC jong hi insonna khat kaina thei umhenlang, TV channel leh newspaper jong eipaova loi, english a loi kineihenlang, election teng ikikidemto ikijeptona nahojong thuso ho ah pahlah lah le phabepdi!  

119. Mi meidoi leh hahsa thoh ngapchalou ho chu ajamji-e, ahung jam e kiti ahin pasal khangtah lailai hojong ahung jame kiti ji vanghi jachat um hilouham, “Ajam” kiti thucheng mongmong hi kimuda, kijahda le phadi hilouham, lunghan le kitom pumin “akile” (return) tai kitijoleh pasal hina joh hiloudi ham?  

120. Aumdanpi hi chomkhat jou phaatkit election kit langteng Repoll demand committee leh JAC against Repoll demand committee, JAC against Ink in ballot box, adangdang ho hung umdoh teidi leh akilom’e.  

121. Midang ding thilpha bolh hahsa ahidehpoi, ngailutna leh khohsahna umlou jeh a bou abol umlou (lhom) thu ahi..Ahin thilse bol leh Khat khat suhboinadi vang bol hahsalouhel ahijeh in aboljong tam ahi. phatthei munadi ahi, ahilou, thuchom ahi ti thu bou.  

122. Akaijeh a kipa vetsahna a khamdiloi, akailoujeh a lunghan lhaset vetsahna a khamdi loi, ponlap khaidoh le maicham semna kin kibolho chu gelphah muphah hiloudan hitaleh akilomjeng’e. Hiche hiba hihih ta election kiti chu.  

123. Scientist hon mihem hi zong akon ol ol’a hung hung umdoh ahi anatiu chu adihna chanjong um adi ahi. Thuchihbu a – zong in ipihamkhat abolleh aban ban’in abaol un…… tia kisei khu mihem lah a aching athem honjong athoji ahi.  

124. Centre langa kon mi thupi khat Manipur ahung poupou leh akimupidi, memorandum pelutdi kichutho jeng, hitobang kimupina leh lekha pehlutna nei hi tohdoh thupi khat a lahdi ahimaije, aphatchom aphatchomlou la akiheji tapon.  

125. Election jou vote kiphon jou akai le akailou kihet jounung kisana kidemto kiboltona hovang anomjie. Koi hi sum nei leh neilou mana kaija kailou ham, koihi achih jeh athep jeh a kaija koihi angol jeh a kailou ham akihethei tapopoi. Ahin Gandhi in election ah mi akaisah theije tivang kinelna bei ahe.  

126. Thil kiti hi atamval teng a value (manlutna) lhomji ahi. Tahsa la lhagao langa chapang chacha hojong Rev,pu tamta, thingnoi thingchung langa jong bosspu, c-in-c pu ho tamta, elected selected member kitijong MDC hung umdoh apat tamkit ta, achutileh milen milal tamna nam ihiu hijeng loudi ham!  

127. Politics hi chih kitetna bou hilou jonchih kitetna leh duha a kiboltona , mi tam huitp jou kitetna ho ahi. Politics kabole kitia mi ithejal leh number game ahung hiteng boiji hitachula ke!  

128. Mi hi ajatjat um ahijeh in Ihatpet ideidei iboltheipetna na hatoh a tohdi, ijochana mi kithiopidi tiloi umintin, ihatpet iboltheipet tia adihlou bol leh ijotho khat chunga kichepdi tiloi aumkhah jongleh leiset chung’a angaina ahi tidi ahimaije.  

129. Maiphavet kiti hi mijousen lampi khatbeh, munkhat beh a abol ahi. Maiphavet boltheilou ho chu lamkaija jong pangtheilou, apanjongleh lolhing theilou ahi. Hijeh a chu lolhingtah lamkai hitheina dia maiphavet haboldi dan ahi.  

130. Thudih akiseiteng koiman angainomlou ahileh adihlou ho, jou le nal thu ho bou kisei seijeng henlang society sunga jong jou le nalla ki bnangbou nahe tia ki benglam pachatna ho bou umleh phajo ngapdi ham. Manthahna ahidi thu bou ahi.  

131. Tohding thamding aumteng keijong tia kigolna (Q) kimukhalou, Thupi lapi akisei teng Hall pamlam’a ho hunglut loi uvo tia kisamsam, bunehkhomna ahung hiphat levang amasadi kichuthojeng, mi tamtah adondon’a hung chomdoh hung chomlut banjengji 

132. Phung level a ipiham khat bolvang ipailhathei pouve. Lolhinna nei khat phung level a boldan aphai kiti hi exam pass ho bou kiseina ham ahilouleh school exam pass ho tailou adang kipapina loppehna kin ho phung level a bolthei ahilevang thukhat hithou vinte.  

133. Munkhat thilkhat thua amachu atah ahipoi, ajou asei ahibouve, kei hi atah le thudih sei kahie ti ho aumji teng leh alang langa dihmo gel ham, alang langa dih gel ham khat jojoh vang hiteidi ahi, kitolou phondohna ahi tithu bou ahijie.  

134. Pangal kol le vai ho jonchih, tribal mi ho thutah, kitah tia kiseiji chu thusim ahitai, tulaija hi tribal thinglhangmi hojong pangal jonchih sanga nasajogam ahitai, mijonchih koiman avetnomlou bou hi thaset umna ahi.  

135. Sopi heng le kom, jat le nam kibahpi haopen te ihiudu tahsan aumtai. Burma, bandladesh, Nagaland, Mizoram , Tripura , assam ho bana Israel gam jenga jong inam mi kibahpi ngen hita olmonadi aumpoi, ipao le ham kinaipipen insah inlhang to ikisopit theilou bou hi aboina ahi.  

I36. Ikho iveng igamsung ilhangsung dunga kiphaosah bola gamdang lhangdang kho le veng dang a kon I inmai dung hin hopa a chele vahle lamlha ho chung beh a ihatna leh iboltheina ivetsah joulou leh pasal hina ba umtadiham, jachat umtah ahi ti thu bou ahi.  

137. Computer khang ahijeh a boinalouloudia kikiboigam hitadi hija o, computer, internet ho um masanga website jong umlou, website ho thua jong kinelna kiboina umlou. Internet, mobile phone, facebook ho jeh a kideh a kidei kingaija kichengloi, akidemdi leh akikaltodiloi ahiti ihijeng uve.  

138. Mi banga aneijou aincheng gutgutjong hilou Mi natoh khohlaitah a tohdi thamdi helou banga kisemjolsela vahle ho leh thil khohtah boipia lhailejong hilou bandh laitah a dunglen vailen tho thei hokhu pachat aum ngap bou uve, seiset di malah in.  

139. Khohelou thal choiloi leh mona neilou Khosung pasal ho ajite maija Bend kibolsah a kijep chu nam sepai phung sepai, candidate sepai ho hoilang umgam hitadiu ham, ole ei le ei thu le meichanga kikapto khohjoh jeh a kho mi lhangmi ho kihephalou hitavehta.  

140. Ija mi kanagilun kakhotoi tina hilou, kon koi jou le nal a mi alhep lhah em, koi hochun sum le pai aphachomlou dia asuhmang’em ti boipia lungkham sanga eima damtheinadi leh mi’n ilheplhahlounadi kiboipi joleh phajo bouvinte ka.  

141. Min iseiphatdi deilou koima umlou, mi seiphatdi himhim lungput neilou, seiphatdi deigun (credit dei) ho hi seiphat pachat ahungchanlouteng lunghangjia thilpha abolnomjilou ahijeh in mi seiphat le pachatje helou itam jeh uva ikhantou lou u hididan ahi.  

142. Ei le ei ikigelna sanga sangjo kihileh phalhehdi ahin, ikigelna sang’a nemjo akihijiteng leh boiji ahi. Mi kiletsah ama le ama kigelsang ho chu toljepna a kineidi ahi kiti thujong hoilai lekhabu hamkhat a kimu hile akilome.  

143. Ipi ti hitam election chula sotlai peh in ana kichaitan tuchana bolero flagpost pahlah lah taleh kiloma athipchet nalaijeng in, ijo hung sotbe leh hiche thua JAC hung kiphutdoh intin bandh blockade hinkou get kit unte!  

144. Election laileh vote nipeh diu, eipelou lou kitidi, election kichai teng Vote peh jeh a Fine nipeh diu kiti kit thu hi vote ipehjong leh Fine jong pehdi tina hileh akilomin achutileh chomkhat jouteng vote campaign bolbou hitalouva Fine campaign boljong hung umdi dan ahitai.  

145. Kipunkhom aphatchomdan mijousen he mama, deijong deimama ahia ama ama michang phatchomnadi ahilouleh kipunkhom tahtahdi koima nomkitlou ahi. Hiche jeh a hi kipunkhomdi ihaseilaichan’a kibungkhenna um hidi baha?  

146. Khonung nampi khompi dia kineppi ho gam le nampi dia kiphinna hoa pan ahitilah jing uva bandh blockade bol, mipi kijotna hoa amasangpena apanjing uleh khompi di hilouva boina semdia humpi hidi kithemchuhna joh higam u hitaleh akilomjie.  

147. Jou thu adon achanglou thu khat jonghi akisei seileh atahsan goloi umji ahi. gampam mi nahiuve tia mingol phabep thusei pi adihna chanjong aum’e tia tahsan gojong umji ahitan ole benglam in abilkol atham’a keijong athi kahitai ati thogo loi um hitam nuijat datmo aum’e.  

148. Ahihih e, gampam lang deljing jonjing I umjeh uva mingol loikhat hon gampam mi ahiuve iti ngap u ahidem, Hiche phung le chang a kon vahmang gam mang kahi itijeh uvajong hi agama ana chengdetsa te a ikiseilou khat tou u ahidem !  

149 Mi bangkhat hi aminphat aminchepet leh ipi phung, ipi nam mi ham kiseidohlou kihedohlouva phungdang namdang dan’a kihe le kisei, ahia minset le phatmona ahinboldoh teng ahina phungmin le nam min dihtah ho hung kitahlangji dan ahi.  

150. Election laileh gam le nam ngailu, society khohsah, khantou machaldi thu sei atamji banghin election kiti aumlou, agamlat laijong leh hitobang mi tamji leh khantou machal kadeipoi kitijong leh inop ida kibang’a hunglut taloudiham!  

SHARE
Previous articleET Cartoon Collection #1
Next articleET Jokes #1