Black Day kiman lolhing; aga aumdohna dem?

Black Day kiman lolhing; aga aumdohna dem?

278
0
SHARE

          Tukum Sahnit ni (Kuki Black Day) kiman chu muntin’a akiman jeh-a lolhing ahi tidi hileh “nasatah a lolhing” (successful) ti thei ahi. Manipur keu hilouva India sung mundang dang ajong midang leh govt  het thei tah-in ana kimang’e. 13 September Sahnit nia kimanlonna hi 1993 kum’a hiche nikho’a Tamenglong district a Joupi khomi milham galmanchah choilou ho ‘duha’ (lungthim)’a kibol’a mi 80 val alom chang’a kitha jeh hi ahipen’e. Hiche nikho’a Senapati district hopsung’a Gelnel khomi nunao chapang 17 jong ana kithat’e. Ahin Gelnel a hi khomiten galmanchah hoitah choi NSCN-IM thingnoimi tamtah chu ana kikaptopiu ahijeh in thina leh inn kihalna ana umjongleh galjoni ti thei ahi. Ajeh chu hiche Gelnel kibulu jeh in akho suhmang’in aumdehpon, mi bulu hon agalbol’u Tuilang lhang’a amachalnadi tah-a anagel uchu kijumsona’a ana nei u ahi. Southern Nagaland gam (Map) in ahuopnase hoa cheng Kuki ho deldohdi ti jeh-a hitobang kitha leh kho kibuluna ana um ahi. Siemthu meipum leh Cartoose ho’a tulai manchah nasatahtah choi ho ana kidintepi’a akho agam’a kon ana jamlou chu thina leh kho kihalna ana umjongleh gam huhdoh a um ahijeh in galjona ahi. 1990s gal laiya ipijeh-a mi chuja  thilo’a, kho chuja kisumang’a, mi chuja achenna’a kon mundang’a kichaolo ham ti ho nungvetna (retrospection) chuleh hitobang dinmun tokit louna dia maban vetna (introspection) ipi um’am ti hiche Sahnit ni kimanna kin (program) ho munkhat beh a um’em? Hiche nikho manjing’a Govt kom’a Memorandum peh-a “NSCN-IM hon khohelou mi hijatjat eina that nun ….” tia mi heh-heh jong aphatchomdi leh memorandum 60 val lang kipe’a ‘action’ umdi ahitai. Politics bol pansatna’a inei jongleh nampi politics bolna hidi ahi. Sahnit ni kamang’e kitina program a MLA Election thu pou akiseileh manlo umloudi ahi. Phaigam thingnoi Maoist Communist Party (MCP) hon tuchung Kuki Black Day kiman ana tosot ujong hi kipapidi ahidehpoi. Naga politics douna dia Naga thingnoi ho khutna Kuki ho thina lainatpi tah dan’a aseijiu hi ‘mitlhi lhem’ (crocodile tears) kiti bou ahi. MCP in hitia Kuki ho lainatpina aneileh ipi dia jani dung vel’a Kuki Chin ho gampam’a kon hung kichaolut mi, Manipur gam mi tahtah ahipoi atiuham?

         Tukal hiche nikho aga/aphachuom  umna’a  nitdi itileh athiho geldohna ban’a ipi jeh-a mi chuja kithia kho chuja kisumang’a mi chuja galjam ham ti ngaitoa phadi ahi. Memorandum jakhat jani kipe jongleh phatchomdi hinam tijong ngaito phaat hitadi ahi. Gam ning lang’a ho kholen a chendi, Tin/langva inn beh kikhu sohdi ti hi maban’a kivenna dia kalbi masapen hidi ahi. Kivennadi manchah neilou jeh-a mi chujat thina leh gam chanlona jong ana um ahi. Mi jousen akho agam thipi ngapchatna aneitheina dia kho chaga khat jong achenna kho’a kihuolsahdi ti ho ngaitona umhenlang Sahnit ni kiman tolhon’in hiche lam’a machalna ipi um’am ti velvelna jong umjileh aga umdi ahi.