BJP National observer hon Chief Minister N. Biren Singh vetchil na nei...

BJP National observer hon Chief Minister N. Biren Singh vetchil na nei diu

65
0
SHARE

BJP National observer hon Chief Minister N. Biren Singh vetchil na nei diu

Imphal, July 24: BJP MLA phabep le Chief Minister pa kikah boina ana um jing chu mipi hetding a sel ana hijing vang in tun hetdoh in ahung umpan tan ahi.

Hetthei khat chu BJP Central lamkai ho in National Vice President, BJP Baijaynt Pande le Former Union Minister Manoj Sinha chu state sung a BJP ho le lamkai ho chuleh kivaipoh na ho velhading ahin sol uvin ahi. Hiche BJP lamkai teni chu jani a state sung a party kikah a boina ho vetlhah na nei dinga hung vailhung lhon ahin, amani chu Hotel Classic Grande a um lhon ahi akiti. Lamkai teni chun BJP MLA hotoh kihou na anei jing dingu chuleh state BJP president thah a ana kilheng Saikhom Tikendrajit Singh toh jong kihou na anei ding u ahi akiti. Lamkai teni chun state usng a BJP lamkai lui  Thounaojam Chaoba jong kihou pi na an anei lhon tan ahi.

BJP MLA lamkai teni toh kimuto na ana nei ho chu deputy Speaker K. Robindro, MLA S. Rajen, H. Dingo, L Sushindro, Dr. S Ranjan, Vungzagin valte, L. Rameshwor, L. Radhakishore, N. Indrajit le Dr. Radheshyam Yumnam ahi lhon in ahi akiti. Lamkai teni chun state sung a party sung a boina aum jing toh lhon a BJP MLA ho le lamkai ho lunggel ngailhah na ahung nei lhon ahi. Lamkai teni hin Chief Minister panmun Biren in atuh jing ding thu hi centre lam agei hon toh leh centre lamkai hotoh kihou na anei lhon a hung kigel lha nalai ding ahi akiti.

Covid-19 boilai tah a  hitobang a lamkai le thanei na kichuna kinei hi vangset umtah ahi tin BJP lamkai lui khat in hetsah na ananei in ahi. Hitabang phat boilai tah a lamkai kikhel na nei ding a tohgon kinei hin BJP atoh khah thei ahi akiti. BJP sung a kipun khomna um thei lou na hi centre lamkai ho in agelkhoh pen ding u khat chu ahi akiti. State sung a NPF ho in BJP tosot na anei u chung chang a centre le Nagaland A BJP tosot party ahi lou u jong hi hetjing a kiginna neijing ngai na khat ahi tin jong hetsah na ana kinei in ahi.

Nagaland a amasapen ding’a covid-19 jeh a mi khat thi; Positive case thah 65 kimube

Kohima, July 24: Nagaland Health Department thulhut khat in aseina achun tuni chun Nagaland a Covid-19 case thah 65 akimube in chule mi khat in thina atoh in ama chu hiche natjeh a Nagaland sung a thi masapen a jong melchih ahitan chule tuni ma chun midang 7 adamdoh kit uve ati. Tuni a thina tohpa chun kum 50 a upa ahitan July 19 nikho a chu CHC Medziphema a dammo na dang anei jeh a admit kibol ahi in chipet chun Truenet mangcha in Covid test akibol in a result Negative ahi tin Senior Medical Officer (SMO) CHC Medziphema in Dimapur CMO lekhathot abolna achun aseiyin ahi. Tuni a case thah 65 kimudoh lah achun mi 1 chu frontline a natong ahi in, midang 32 chu Armed force personnel ho ahiuvin mi 25 ho chu gamdang akon hung kinungle ho ahiuvin midang 8 chu non-resident technical person on duty ho ahikit uvin chule midang 7 chu aveisa hon ana chotkhah nau kikholna akon kimandoh ahi. District wise a kikhen dan achun Dimapur akon mi 41, Kohima akon mi 21, Peren district akon mi 2 chule Tuensang akon mi 1 ahiuve. Tuhin Nagaland sung ah hiche natna veikha mi 1,239 aphatan hiche lah achun mi 819 hochu gamdang akon hung lutho ahiuvin midang 359 hochu Armed force Personnel aho ahiuvin mi 30 hochu frontline ho ahikit uvin chule midang 31 ho chu traced contact ho ahiuve.

Tuni a thina tohpa sample chu BSL-2 (RT-PCR) report dungjui in Covid-19 positive ahi in chitoh lhon chu SMO in CMO heng ah Community health centre chu khahtup ding in thupeh abol in ahi. Tuhin Nagaland a active case 701 aum in hiche lah achun mi 697 ho chu symptom neilou ahiuvin, mi 2 chu symptom nei a kihedoh ahiuvin, mi khat chu symptom hin nei pan2 a kihe ahi in chule mi khat chu akhoh sie in ICU a ventilator mangcha in akijen in ahi.

 

Mizoram a ni 37 sung’a 23 vei ling kihot

Aizawl, July 24: Mizoram a tuni ling akihokit toh lhon in nikho 37 sung’a ling 23 vei akihot doh in ahi. Amasapen chu achesa june nisim 18 a ana kihot ahi.

National Centre for Seismologyr akon thulhut dungjui in tuni ling kihot chu 3.8 richter scale a ahin, epicentre chu Champhai district ahikit e akiti.

Achesa nikho phabep sung’a Champhai district sung’a gojuh jeh in munchim jong analhung ahi tin official thuso in aseiye. Chule Dungtlang kho a water supply line (pipe) jong hiche thilsoh chun asusei ati.

Hetthei khat chu hitobang lingkihot Champhai district sung’a umjing jeh a mipi ho kichatna anadim a jan teng mun chom a buhneo kisem a ana gehdoh jiu ahi.

Champhai, Saitual, Siaha le Serchhip district ho hi ling kiho in atohkhah mun ho ahi.

Lha masa chu Mizoram Government in central government heng’a kithopina ana thum ahin chule CM Zoramthanga in jong centre government in state sung’a ling kihol thu kholna neiding’a Seismologitsts ho thumna anei ahi.

Zokhawthar le Champhai district a chenna inn phabep panna a Houin building jong ling kiho chun asusehset ahi.

 

Manipur a ILP pass kithahbol nachung a IPAK hon doudal

Imphal, July 24(UNA): Indigenous People’s Association Kangleipak (IPAK) hon thuso khat abol nauva chun tulha July 21 nikho apat state authority hon Manipur a Inner Line Permit issue abolpat kit uhi ahilou beh khat ahi in hiche hin gamsung a covid-19 akhan sah cheh ding dinmun in aum e tin thil kibolna chung a demna thuphon abol uvin ahi. IPAK General Secretary L. Romen Meetei in aseina achun State special secretary (Home) H.Gyan Prakash makaina noiya ILP pass kibolkit hi asung a cheng mipi hon kideldoh na ding lampi khat ahi in chule state chuom a natna veisa ho Manipur hunglut khaleu tijat umcheh ding ahi in tupet a hiche thil kibol in angai jong ahipon Govt. lhatsamna khat ahi tin aseiyin ahi.

Thulhut in aseibena achun ILP pass tupet a kiboldoh kit in gamsung mipi ho phatchom nading ham ahilou le state government revenue nading a kibol ham tin dohna jong abol uvin hiche tobang thil hi akibol jom le agamsung a chengsa mipi ho ding a masang a muthim jing pan ahitai tin asei uvin ahi. Government in hiche natna akon kivendoh nading in pan nasatahin lajong leu ILP pass kibol kit hin gampam akon aveisa khat jong hunglut theina chance lientah um ahi in akinthei pen a ahithei leh angah diuvin asei un ahi. Mipi ho chihtheilou jeh in Jiribam leh Thoubal district sung a jong community transmission um ahitan chule Security force ho sung jeng a jong natna vei tamtah um u ahitai ati.

Hiche tobang phat tijat umpet a government in kithemchan nading a hiche tobang tohgon hi abollou beh ding u ahi in ami asa natna veiho joh akhohsah ding u ahi in chule hiche natna hin aphat masang a ILP pass bollou ding in jong tiemna anei uvin ahi.

 

Covid-19 natna jeh’a hou lhacha mi 2 in gamdang’a thina anatoh

  1. Lalboi Gangte

CCpur, July 24 (ET): Covid-19 natna jeh in tunin (July 24) CCpur District sung gami hou lhacha 2 in gamdang’a thina anatoh in ahi. Thina toh hou lhacha teni chu Rev. Khaikhanthang (63) H/o Donkhanngai of Tangnuam leh Pastor. H. Chinsuanmang H/o Mercy Vung of Zion Veng, New lamka ahi. Hetthei khat chu Pastor. H. Chinsuanmang hi PCI-R noiya Cambodia mun’a missionary natong ahi naban’a Philippine ah Bible jil nathei ding anamu jeh’a a-insung miho toh Philippine a um’u ahi. Chuleh Covid 19 natna jeh’a Bible College akikha toh lhon’a inn lam (CCpur District) jon’a a-insungmi cheng toh Philippine apat direct Flight ah Guwahati hung lhung uva a flight u ana reshedule jeh’a Guwahati Quarantine Centre um’u ahi. Ahin Quarantine ahin chai uva Lamka guest house a aum jing lai uvin damlou nan anaphah jeh chun GNRC ah admit anakibol in hiche achun Covid test anakibol na’a negative anahi. Phat chomkhat jou in GNRC akon in Lamka guest house mama’a ana umsah kit uvin ahin nikhat jou in anatna in ahin pha kit jeh chun Health City Hospital mun’a admit anakibol kit in ahi. Hiche Hospital mun’a Covid test ana kibol na’a Covid-19 positive anahi khah jeh chun damdoh jou talouvin tuni (July 24) jingkah nidan 1:00 vel in ana thi tan ahi. Pastor. H. Chinsuanmang longdamsa chu Guwahati mun’a vuilem in aum tan ahi. Alangkhat’a Rev. Khaikhanthang hi Thangkhal Baptist Church (TBC) Delhi a founder ahi naban’a Ex.Chairman leh Ex.Local Pastor ahi in amahi Covid-19 natna jeh’a achesa June nisim 28 nikho akon St. Stephen’s Hospital, New Delhi mun’a ICU a um’a July nisim 9 akon ventilator a kiumsah ahi. Government protocol dungjui’a Covid-19 thumvei test bol na ding lah’a (ani vei channa chan negative ) athum vei chana test ding anga jing lai tah’a tuni (July 24) jingkah nidan 3:00 a thina anato ahi. Chuleh Rev. Khaikhanthang longdamsa hi Rev. M.C Tuang, CBA Church, New Delhi leh TBC(ABA), New Delhi Organization in Alpha & Omega Christian Cemetery, Block, Near Sanjay Gandhi Hospital, Mongolpuri New Delhi mun’a ana vuillem tauvin ahi.

 

Nikhat sung’a Covid-19 case kalna pen ding’a India a case thah 49,310 kimudoh

New Delhi, July 24: India sung’a nitin a Covid-19 case kimudohbe akal jing toh lhon in tunin Covid-19 positive case lakh 13 aval tan ahi. Friday nikho a India in France gam anakhokhel ahitan chule tuhin gamsung’a thina toh mi 30,601 apha tan Leiset chung’a Covid-19 natna jeh’a thinatoh tamna pen US, Brazil, Britain, Mexico leh Italy ban a gup (6) channa in apang tan ahi.

Tuni chun India gam’a ding’a nikho khat sung’a covid-19 positive case thah kimudoh tamna pen ahin case 49,310 mudohbe ahin thina toh 740 ahi, case thah kimube ho toh tu tua India a positive case 13,06,002 aphatai.

Thina toh 740 holah a mi 298 chu Maharashtra akon ahi, Karnataka akon 97, Tamil Nadu a kon 88, Andhra Pradesh akon 61, West Bengal akon 34, Gujarat akon 28, Uttar Pradesh le Delhi akon 26 cheh, Rajasthan akon 11, Madhya Pradesh akon 10, Jammu and Kashmir le Telangana akon 9 cheh ahin, Punjab akon 8, Assam, Odisha le Haryana akon gup cheh, Kerala akon 5, Uttarakhand, Jharkhand le Puducherry akon thum cheh chule Chhattisgarh, Tripura leh Goa akon khat cheh ahi.

Maharashtra state natna nei tamna pen gam in apang jing in tuhin case 3,47,502 aum in aban ah Tamil Nadu leh Delhi ain case 1,99,749 leh 1,27,364 um ahi.

Nikho thum channa ding in tuni chun Covid-19 natna akon kijendam tamna pen nikho ahikit in tunin natna nei mi 34,602 akijendam in, tuhin recovery rate 63.45 aphatai tin Friday nikho Union Health Ministry thuphon in aseiyin ahi. Chule thina toh hi 2.38 percent in akhesuh e jong akiti.

Tujingkah nidan 8 chan chun India sung’a natna nei kijendam mi 8,17,208 aphatan chule tuhin mi 4,40,135 natna nei vetkol in aum uve akiti.

July 23 nikho chan chun sample 1,54,28,170 Covid-19 test akibol tan ahi.

 

AIIMS Delhi a Covid-19 lou test kibol panta; Kum 30 upa khat chung’a test kipan

New Delhi, July 24: India gamsung a kisemdoh Covid-19 lou chu tuni chun AIIMS Delhi a Phase-I kipatna ding in test abolpan tauvin Phase-I sung a hi mi volunteer 100 tobang test kibol ding ahi dan thulhut chun aseiyin ahi. Hiche lou test bolna ding achun mi 3,500 tobang registered akibol uvin mi 22 screening akibol in chule tuni chun amasapen ding in Delhi a cheng pasal khat kum 30 mi chu tuni nilhah nidan 1:30 chun dose 0.5 ml aki kaplut in tuchan in side effect aumdoh naipon ahi. Hiche lou kikap jou chun pungkah ni tobang vetlhah in akoi uvin imacha ati loule ni 7 sung vetlhah a kikoi kit ding ahi tin Professor Dr. Sanjay Rai chun aseiyin ahi.

Indian Council for Medical Research (ICMR) in hiche lou test boltheina ding a phalna apeh lah a AIIMS Delhi jong hi jao ahi toh lhon a hiche Covaxin lou test kibol Phase-I chu tuni a chu anapat u ahi. Volunteer mi 375 ho chung a test kibol ding ahi in hichelah achun mi 100 chu AIIMS a kibol ding ahi in Phase ani channa a achu mi 750 chung a test kibol kit ding ahi. Rai in aseina achun mi 50 test kibol masaho chu dose niem kikap peh ding ahi in imacha abuoi aum loule aban a test kibol ding mi 50 ho chu dose sangjep kikap peh kit ding ahi ati. Hiche lou hi Hyderabad based Bharat Biotech kiti hotoh ICMR le National Institute of Virology (NIV) ho kithokhom a asiemdoh u ahi.

Manipur Assembly monsoon  session

Imphal, July 24(ET): Manipur Governor Dr. Najma Heptulla in India kivaipohna dan a Article 174 dungjui in ahung lhung ding August 10, 2020 jingkah nidan 11 leh Assembly Hall a Eleventh Manipur Legislative Assembly meet chelha ding in thuso abol in ahi.

Shillong a July 26 jankim akon total lockdown kipan ding

Shillong, July 24: Meghalaya Chief Minister Conrad Sangma in tuni thuphon abolna ah Shillong a July 26 akon July 29 chan total lockdown um ding in phondohna nei tan ahi. Hiche thulhuhna hi CM le Deputy CM lamkaina meeting a phatsahna anei u ahi. Meghalaya a tua hi active case 466 um a mi 87 kijendam ahi tan, mi 5 in thina ato ahi tai.