BJP lamkaina sorkar douna a Left party hon gamsunga kal khat lhing...

BJP lamkaina sorkar douna a Left party hon gamsunga kal khat lhing kiphinna pan ta

135
0
SHARE

BJP lamkaina sorkar douna a Left party hon gamsunga kal khat lhing kiphinna pan ta

IMPHAL, Oct 10(ET): Manipur Left Party hon Thursday nikhon BJP lamkaina sorkar douna a India pumpi a kal lhunga kiphinna bol dinga tohgon um akipan tai, tin phondohna anei uvin ahi.

Kal lhung a kiphinna abol diu hi October nisim 16 chan hiding ahi’in, CPI, CPI(M), AIFB leh RSP panna a Left party hon Imphal khopi a um Irawat Bhavan mun a meeting abol nauva phondohna aneiyu ahi. Manipur CPI lamkai L Sotinkumar in Centre leh state sorkar BJP hon election sunga kitepna anei hou khatcha anatoh a abulhit pouve, tia ngohna aneiya chule Centre a BJP lamkaina sorkar vaipoh theplou jeh a society phabep in gimna ato ahi, ati.

Gamsung sum dinmun jong BJP lamkaina sorkar vaipohna noiya lhasam ahi, tin CPI lamkai pa in aseibe in ahi. Gamsung mi, adeh a vaicha genthei chule natong hon hahsatna ato sangpen ahi’in, BJP lamkaina sorkar in gamsung hi Hindu gam a sodoh ding lungtup anei ahi, tin ngohna aneibe in ahi. Left party hon BJP lamkaina sorkar vaipohna adihlou hi asosal ding ahi, tin aseibe in ahi.

Kal sunga kiphinna chom chom abol sung uva Left party hon natong ho lo kipe nempen akalna dinga jong thumna anei diu ahi. Village Defence Force (VDF) leh Home Guard personnel ho honorarium hi tua akisem ‘minimum wage’ sanga tam sah dinga kiphinna abol sung uva thumna umding ahi, tin Sotinkumar in aseibe in ahi.

Lampi sem ngai ho adihchet a kholchil masat dia Works Minister in engineer ho thumop

Imphal, Oct 10(ET): PWD Manipur Conference Hall a Orientation Programme on Data Collection for Road Asset Inventory Assessment of Pavement Condition leh Roughness Data kingon Works Minister Thongam Biswajit Singh in tunichun hondohna aneitan ahi.

Biswajit in engineer hon phatah a kholchilna anei masat tohgon ho lolhin dan jatchom ahitolhon a adihchet ahichet phatah a kholchilna nei masa ding in engineer ho temna aneiye.

Biswajit in khantou machalna chedan agang lheh tan science le technology panglou a machalna kotbul a kilut thei lou chu politician bouseh in gamsung kikhelna apodoh thei pon hinla mitin in amopohna cheh akihet a atohdoh le hichu gamsung khantou machalna ahi e, ati. Chuleh kidem kisei set hi aumding mong aumtah jongle aphachom a kidemna ho chu akilem e tin Biswajit chun aseibei.

Mipi navah nading a keng lampi lei kisemdoh hi PWD tohdoh thupi khat ahiban a state sung khantou machal nadia khangdong cha engineer hon lung le tha hoijo podoh cheh ding in Biswajit in temna aneikit e.

Chuleh natong hoi ho toh phat man jong government in melchihpih ding in tohgon akigong in, atumbeh a engineer hon hahsatna ato ho jong akom a ahin sei uva chu a kon hahsatna suhlhap nading lampi holdoh hithei ahi e tin Biswajit chun aseibei.

Biswajit in LEA Associates South Asia Pvt Ltd thalheng ho jong lemna anei e.

Chief Engineer Kh Temba Singh in achesa kum 10 phatsung a kikhelna lentah tohdoh in aum nai hijongle mipi ginchat bang a nomsel a lamlhah nading lampi semdoh nading hatah a eima cheh kingaito angai e, ati.

Tuni kingon a chun Additional Chief Secretary (Works) Dr Suhel Akhtar chu Jin-Ja-Um in apang in abanle department engineer le staff ho jong kingon a chun hon lhing in apang cheh un ahi.

SE Y Joykumar in natoh chungchang kholchil dia LEA Associates South Asia Pvt Ltd hi atumbeh a kilhengdoh ahiban a division level engineer hon natoh ding dan phatah a ahet nadiuva tuni kingon hi achombeh a kigondoh ahi e, ati.

Khunkho a Nampi lumsong kitung, hondoh hita

Kpi , Oct 10 (ET): Tuni chun Kangpokpi District, Saitu Gamphazol Sub-Division hopsunga um Khunkho Kuki Haosapu le khomiten NAMPI LUMSONG atun u chu Khaimang Chongloi, President Kuki Inpi Manipur in hondoh na aneitoh lhonin Pathen henga lhandohna Dr. Satkhokai Chongloi in ananeijin ahi.

Khaimang Chongloi in a houlim na a ichennau gam leiset huhna a ipu ipateu vin Vannoithang Britishte gaal la anakisat piu kum 100 lhinna hetjing na NAMPI LUMSONG tunia itundoh uhin khonung itu icha teu khang chan a Kukite hina le thusim tampi seidinga itundoh u ahi ati. Aman aseibe na a  hiche NAMPI LUMSONG hi tundoh cheh na dinga khotin Haosa hole khomite chengin kiphal tah le nam ngailut najal a  atun doh cheh dingu chu ahi ati.

Jangmang Haokip, Chairman AKWCCC in Khunkho ten NAMPI LUMSONG atundoh na chung uva kipathu asei tolhonin ahung lhung ding October 17, 2019 nikhole Centenary Commemoration, C. Aisan mun a kiman nading hungpang cheh din jong temna aneijin ahi.

Hiche song hondoh na kin a chun Hemjathang Khongsai, VP KIM, Shokholun Mate, G/S KIM, Lhunkholal Kipgen, Chairman C&C KIM, Jangmang Haokip, Chairman, AKWCCC, Hemang Haokip, V/P KSO (GHQ) cheng chule Lunpao Hangshing, Haosapu chule Haosa upa le khomite anapang un ahi.

Sorkar in ‘mob justice’ douna a pan ala in, ahin vangsetna toh chapang asumil e, tia WAD in sei

Imphal, Oct 10(ET): Bishnupur district noiya um Upokpi Khunou kho a mipi khangtou loutah a chon hon jinei minu chung bou hilouva achanu kum 9 bou hinalai chapang chungchang thu aseina hi thilse lah a thilse sangtah ahi’in, state sorkar in gangtah a pan alah jeh a thilsoh a pang mi 14 police hon aman tauvin chule gamsung dan dungjuiya amaho chungchang a thutanna nei nadinga natoh achelhah lai ahi.

Ahin, sorkar natong hon October nisim 6 nikho thilsoh a numei chapang nu lungthim sangtah a akitongkha in, thilsoh ageldoh teng alunggel ajat thum a asuhboi ahi. Social media a phat phabep ana kithot son a nu cha teni mipin avoh a abulu na thilsoh hin numei chapang nu lunggel ding avetsah ahi, ahivanga vangset umtah a numei chapangnu hi apa toh kidalha a chule thusoh henom ache jousen amanchah u ahi.

Women Action for Development (WAD) teamhon Wednesday nikho a thilsoh chungchang report la dinga Upokpi Khunou kho avil nauva dinmun umdan hetdohna aneiyu ahi. Thursday nikho a WAD office mun a thuso miho akimupi nauva Mk Saroj Khan, WAD volunteer in Child Welfare Committee (CWC) Bishnupur in insung mite avil in chule chapangnu akimup uve, ati. CWC Bishnupur in chapangnu avel a akimupi kit a chule angaicha counseling ho abolpeh diu atahsanna thu jong aseibe in ahi.

October nisim 6 nikho thilsoh ahitan, chapangnu hi tuni chan geiya professional counselor hon counseling abol lou ahi’in, achesa ni 5 sung chapangnu hi gimna chom chom lah a kikoiya kithoh sah tina ahi. Chapangnu apa te insung in mipin anu abulu pet a anu huhdoh ding agot jeh a iti abol diuham tihi koiman ahetlou ahi. Apa chenna vengsung mihon thilsoh umchan sei dinga kouna apeh u ahi’in, hiche hi bol louding ahi, ati.

Psychiatrist Dr Lenin in chapang akhangtil hohin lunggel boina, hahsatna ato teng ule amaho leh amaho hinkho kilah nomna lunggel anei uve tia avel vel a asei ahi. WAD volunteer hon thil umdan amu dungjuiya sorkar in thilsoh chungchang a koima dan a kon jamdoh theilou dinga kitepna aneiyin, ahin, vangsetna toh chapangnu huhdoh ding hi asuhmil ahi. Chule RIMS a natong numei chapang khat EGC room sunga suse pa jong gangtah a gotna apeh diuvin WAD in thumna aneiyin ahi.

Indian Union a gamsung kilahlut douna a Oct.15 teng bandh umdi

Imphal, Oct 10(ETT): Thal choi United People’s Revolutionary Front of Manipur (UPRFM) thingnoi hon October nisim 15 nikho teng gamsunga nidan 18 lhing strike bol dinga thuphon anei anei uvin, Manipur (Kangleipak) gam Indian Union a akilahlut chule Manipur State Legislative Council kisuhmang douna a kiphinna abol diu ahi.

L Rolin @ Thoupangba Meitei, Information and Publicity secretary in thuso aneina’a, achesa 1949 kum hiche nikho a Manipur in chamlhatna anei amansah ahi’in, nikho hi ‘Black Day’ a kimang ding ahi, ati. Shillong khopi a achesa September nisim 21, 1949 kum a Manipur lengpa Boddhachandra hi hunam a ‘merger agreement’ soi akaisah u ahi’in, Manipur National Legislatures dohna/phalna kilalou ahi, ati.

General strike hi  October nisim 14 jan kim a kon October 15 nilhah nidan 6 chan umding ahi, tin thuso chun aseibe in ahi. Manipur gamsung India in alahlut dan UPRFM in thuso aneina a hilchenna anei uvin, gamsung India a akilah lut jouva dinmun ho gamsung mihon itobang ham ti agel angaiye, ati. September nisim 21, 1949 thu a kihouna umding ahi, tin aseibe uvin ahi.

Governor Dr Najma Heptulla in ‘One-day Conclave’ hondohna nei; Business amachal nadinga ‘Entrepreneurship Culture’ ngai ahi, tia sei

Imphal, Oct 10(ET):  Governor Dr Najma Heptulla in Hotel Classic Grande, Imphal khopi a Thursday nikhon ‘Promoting entrepreneurship and harnessing untapped potential of geographical indications of Manipur’ ti thupi a ‘One Day Conclave of Local Craft Entrepreneurs, Traditional Craftsmen and MSMEs hondohna aneiyin ahi.

Nikhat um Conclave hi Mission for Economic Empowerment of Traditional Artisans and Craftsmen (MEETAC) kiti Department of Commerce and Industries, India government noiya um autonomous body in PHD Chamber of Commerce and Industries (PHDCCI) toh kitho a agon ahi’in, Startup India, Standup India, Government E-market place leh Geographical Indication thu seina ding a agon ahi’in, akibol thil hi gamsunga um craft entrepreneur ho, traditional artisan leh craftsmen ho tosot nading ahi.

Patron umlou jeh a gamsunga artisan hon hahsatna sottah ato ahitan, khut a kisem thil hohi mangthah lou ahi’in, tua hi hiche thil ho amanlut na min ahet cheh cheh ahi, tin Governor in ahoulimna a aseiyin ahi. Market thah a amaho aumthei nading uva state sorkar in 2018 kum a Mission for Economic Empowerment of Traditional Artisans & Craftsmen (MEETAC) anapat ahi’in, artisan ho natoh chohing kit nading ahi, ati. Mission hin khangthah ho ngaichat akhohsah nading chule gamdang a thil joh ding khohsahna apeh ahi.

Article leh von chule thil athah thah hohi National Institute of Design, Central India Regional Council (CIRC), Indian Institute of Packaging leh institution dang dang toh kitho a MEETAC in apohdoh ding ahi. Dr Najma Heptulla in ahoulimna a PHD Chamber of Commerce & Industries panlahna akipapina thu aseiyin, Chamber hi industry, trade leh entrepreneurship tosot nadinga kimangcha ahi, tin aseiyin chule MEETAC leh PHDCCI in gamsung economy phatchomna sangtah abol doh ding akinepna thu aseibe in ahi.

Prime Minister Narendra Modi in ‘Make-in-India’ kiti brand hohi gamsung ‘economic powerhouse’ ahina dinga ahondoh a, Startup leh Standup India kiti programme hotoh abol khom ahi. Startup hi gamsung economy khantou nadinga ngaicha ahi’in, tohmun thah kisemna hi phatchompi umtah khat ahi. Chule Standup India scheme hi entrepreneur numei hon amaho business akisemdoh thei nadiu mun kipehna ahi.

Gamsung mihon handicraft, jewellery, textile leh adang dang a thepna sangtah anei uve, tin Dr Najma in aseiyin ahi. Geographical Indications (GI) hi thil sem ding dan hetna ahi’in, GI registration akibol toh kilhon a akisem thil ho alhem (counterfeit) hon market alo theilou ding tina ahi.

Textile, Commerce and Industries Minister Th Biswajit Singh in President hina a houlimna aneiyin, Government e-Marketplace (GeM) hi tua sorkar natoh thupi tah khat ahi, tin aseiyin ahi. Handicraft sector product ho tahlang nadinga thupi tah ahi, tin aseiyin ahi. Artisan leh amaho Self Help Group ahilouleh Federation ‘identity’ neiya artisan numei leh Micro-entrepreneur hon Government e-Marketplace (GeM) a ‘Seller’ tia register akibol u ahi. GeM hi Department/organization/PSU chom chom in angaichat Goods and Service ho online a akilah theina ding ahi’in, GeM hi local entrepreneur ho hahsa louva market kisempeh na ahi.

Conclave a Dr. D.K. Agarwal President (PHDCCI),  Dr. Mahesh Y. Reddy, Secretary General (PHDCCI), Anurag Bajpai, IFS, CEO (MEETAC),  Dr. H.P. Kumar, ex- Chairman and Managing Director (NSIC), Sanjay Joseph, Deputy CEO (Government E-Marketplace), Ministry of MSME, SIDBI, Bank of Baroda; Quality Council of India, Controller General of Patents, Designs & Trade Marks, National Institute of Design (NID), Ahmedabad official ho, Biswajit Sarkar & Associates founder, Geographical Indications expert ho, PHDCCI official, state government senior official ho, Local Craft Entrepreneurs, MSMEs, MBA simlai holeh Department of Entrepreneurship, Manipur University leh adang dang jong apang uvin ahi.

Maibam khosung boina hi houthu toh kisai ahipoi, tia TRCCP in RCAC panlah dan kidang asahna thu sei

Imphal, Oct. 10(ET): Maibam khosung thu Rongmei Christian Advocacy Council (RCAC) in hou thu toh aseibeh a sangtah a seiding agot Tingkao Ragwang Chaoriak Chabuan Phuam, Manipur (TRCCP) in kidang asahna thu asei uvin ahi.

Maibam khosung thu hi thu neocha a kipan khosung thu ahi’in, hou thu toh akisaina ima umlou ahi. Hetthei khat chu khosung a kon kimu thulhut dungjuiya Thangal (Longjang) kho a kon hung kichon a Jonathan Pamei te insung miho hi 2005 kum a khosung a achen diu ana phalpeh u ahi’in, Thoubei (Pei) kho upa ho henga ngehna anei jou ahi, tin RCAC thuson aseiyin ahi.

Khosung dan ajui lhingset uva ahileh khosung a cheng thei dinga kho upa hon phalna apeh ahi’in, ahivanga Jonathan Pamei leh a insung miten khosung ana chenlut masang uva kinoptona aneiyu dan hohi tukum August lha a kon apalkeh pan ahi, tin thuso chun aseibe in ahi. Zeliangrong nam miten amaho chon leh khan pupa khanga kon achepi aneiyu ahi tihi thutah ahi’in, hiche jeh a khosung dan palkeh khosung mi koi hijong leh pupa chonna dungjuiya suhkhel suhdihna aneidiu dol ahi’in, khosung a lungmonna aumthei nading ahi, ati.

Khosung thu a kho dang ho akikum jeh uva khosung miho alungjin laitah a sihnei langneina umlouva thutanna neiding police hon themmona neilou khosung miho chunga IPC section chom chom apohdoh uva First Information Report (FIR) ajihlut kit uva khosung miho asuhgim cheh u ahi’in chule tuni a jong khosung a kon Gaingangpu Gonmei kiti mikhat police hon amat ahi.

Themmona neilou khosung mi kimat chule khosung miho chunga jouthu a ngohna kisem a FIR kijihlut ahi, tin aseiyun chule achesa October nisim 8 nikho a Bishnupur DC conference hall mun a SP, OC leh CSO dang dang umna a party tenin kihetthemna ding asem toh kitoh louva na kitong ahi, ati. Gaigangpu Gonmei dan beiya alhadoh diuvin TRCCP in thumna aneiyin chule RCAC in chamna suboi thei leh boina khohset nathei jouthu leh thulamleng aseithang lou diuvin  thuso a aseibe uvin ahi.