BJP-lamkaina Manipur sorkar adet in, ‘term’ kichai chan sorkar asem ding ahi:...

BJP-lamkaina Manipur sorkar adet in, ‘term’ kichai chan sorkar asem ding ahi: Ram Madhav

57
0
SHARE

BJP-lamkaina Manipur sorkar adet in, ‘term’ kichai chan sorkar asem ding ahi: Ram Madhav

Imphal, June 24(ET): BJP General Secretary Ram Madhav in Wednesday nikhon Biren Singh lamkaina Manipur sorkar in 2022 kum chan term alhing a apoh ding ahi, tin aseiyin, National People’s Party (NPP) toh party kah a boina suhlhap nadinga pan alah jing lai ahi.

Madhav hi Northeast State a party vekol khat jong ahi in, CBI hon Congress lamkai le CM anahi O Ibobi Singh ‘corruption case’ toh kisaiya thudohna anei nikho uva Imphal hung kit ahi. Achesa kum khat sunga Manipur sorkar det hinam ti thudoh jong aumin, Manipur a coalition government hi adet jing in chule election jong ajo jing ahi, tin BJP General Secretary Ram Madhav in aseibe in ahi.

“2022 kum (akit Assembly election aum kah) chan kidet ding ahi”, tin Imphal Airport a thuso miho akimupi na a aseiyin ahi. Chief Minister N Biren Singh injong ministry a boina ho asei nompon, hiche hi insung thu ahi, tin aseiyin chule boina kisulham vah ding ahi, tin atahsanna thu aseibe in ahi. 2017 Assembly election jouva BJP in NPP le regional party dang dang panna a coalition government asem ahi.

Alangkhat a, CBI hon Imphal khopi a Wednesday nikhon achesa 2009 le 2017 kum kikah a development fund dangka crore 332 lhing alam louva akimang e, tia ngohna aum thu toh kisaiya nidan thum val CM anahi O Ibobi Singh a inmun Imphal a thudohna anei uvin ahi. Ngohna kisem hi Manipur Development Society a Singh chairman ahi lai ahi.

Congress hon hiche hi Manipur a BJP lamkaina sorkar huhdoh nadinga BJP natoh ahi, tia ngohna anei kit u ahi. “Lamkai huhdoh nading ahi in, hiche hi imadang ahipon, twiya lhum ding kon kong huhdoh nadinga phat kilah be tobang ahi. CBI chunga mipin tahsanna anei alhaso ding ahi”, tin Congress lamkai Gaurav Gogoi in aseiyin ahi.

Biren Singh lamkaina sorkar in boina ato lo na party a kon haina neiya NPP minister 4 ho Centre a BJP lamkai hotoh kihou dinga New Delhi khopi a apuiyu ahitan, akah uva boina suhlhap ding agot u ahi. “Manipur sorkar det hinam tia achesa kum 1 sung thudohna naneiyu ahitai. Adet jing ahi in, election jong ajo ahi. Tuni jenga jong athah a kilheng doh Rajya Sabha member kipapina le lamtona kin kimang ahi”, tin Madhav in aseiyin chule hiche hi gamsung miho le BJP lamkaina dinga lolhinna loupitah ahi, ati.

Achesa June 19 ni a Rajya Sabha election a BJP candidate Leishemba Sanajaoba in Congress candidate anajo ahi. “Keiho government hi coalition ahijeh a kinel boatman neocha um ahi in, centre a lamkai hon athu adoh mai mai ahi. Hiche hi insung thu ahi”, tin CM Biren injong BJP lamkai holeh Ram Madhav akimuto nau hotel a thuso miho henga aseiyin ahi.

“Rajya Sabha election hi 28-24 a kijou ahi. Ima jouse mutheiya um ahi in, party adet louna aumpoi”, ati. NPP minister 4 tilouva BJP MLA 3, AITC MLA 1 chule Independent MLA khat injong coalition government atosot nauva kon haina aneiyu ahi. Opposition Congress injong BJP a kon haina nei mi 9 ho alahlut a Secular Progressive Front (SPF) kiti kiloikhomna noiya coalition asem ahi. MLA hon haina aneiyu nikhat jouva Governor Najma Heptullah akimupi uva, Biren Singh lamkaina sorkar douna a ‘no-confidence motion’ pohdoh nadinga assembly special session akou dinga ngehna aneiyu ahi.

 

Manipur sorkar boina NPP in BJP atosot kit ding ahi tai: Himanta Biswa Sarma

Imphal, June 24(ET): National People Party a MLA 4, Y Joykumar Singh (Ex-Deputy CM), N. Kayisii, L Jayanta Kumar Singh leh Letpao Haokip hon BJP government lamkaina adalhah utoh lhon in NEDA convenor chule Assam Health Minister jong hi Himanta Biswa Sarma in NPP in BJP athah a tosotna anei kit a akijoppi kit ding ahi tin asei in ahi.

Meghalaya CM le NPP Chief  Conrad Sangma makaina in tuni chun NPP MLA mi 4 hon Union Home Minister Amit Shah akimupi uvin chule BJP national president JP Nadda in jong Party HQ ah Himanta Bishwa Sarma toh Sangma jaona in NPP MLA li ho akou in ahi. Amit Shah toh minute 90 tobang akihou uvin Manipur a BJP hotoh government semkhom ahah dan aseikhom uvin ahi. Shah in aboinau ho chu suhlhap peh ding in asei in chule Conrad heng ah NPP hi Meghalaya toh Manipur a BJP hotoh kitho a Government semkhom ahitoh lhon a chule NEDA a jong panmun lientah nei ahi jeh un aboina thu ho Centre lhutlou hel a Congress ajop jeng uhi phamo asahthu aseipeh in ahi. Kihouna aneijou uchun Assam Finance Minister Sarma in Twitter ah NPP in Manipur govt. semna a pan alahkit ding ahitai tin ana tahdoh in ahi.

Hetthei khat chu achesa June 17 ni BJP MLA thum resigned akibol uvin chule BJP government semkhom pi MLA dang gup jong resigned akibol uvin CM tosot louding in thulhutna ananei tauvin ahi. BJP Govt. semna akon jamdoh a Congress tosot ho chu BJP MLA, S Subhashchandra Singh, TT Haokip leh Samuel Jendai ahiuvin, NPP MLA li, TMC MLA T Robindro Singh, Independent MLA Ashab Uddin ahiuvin CM Okram Ibobi Singh in jong Governor Najma Heptulla heng ah floor test neiding in jong lekha ana thot man in ahi.

Churachandpur VK Tawna CQC a boina um

Ccpur, June 24(ET): VK Tawna High CQC a covid 19 positive khat puidoh dinga Medical team ho tuni jingkah nidan 9.30 don a ache nauva centre a umho toh akah uva boina aumin, Medical team hon natna nei mikhat apuidoh ding centre a um ho nana phal peh pouvin ahi.

Medical team hon ‘inmate’ ho ‘discharge process’ chelhah dan thu a kihoupi dinga akou vang uva, aumhon akimupi uvin, adamlou mikhat akoudoh ule centre a umhon medical team le police team ho aumnau mun a kon achou kit u ahi, tin thulhut in aseiyin ahi. Medical team, police team le volunteer ho sei ngai louva kamcheng ngailou tah anaman nau ban a police team ho kinahpi ding chan a centre a umhon achou jeh uva police team ho lunghanna soh ahi.

CCP Police hon  positive khat Isolation ward a puidoh ding inmate hon aphal pouve, ti thu Medical team ho a kon jingkah nidan 9.40 don a amu jou uva Addl SP (IUCAW) le i/c CCP Quarantine Centre lamkaina a police team ho medical team ho kithopi dinga amun che-u ahi. ‘Minute 30’ tobang centre a umho ajol vang uva inmate ho aum nauva kon hungdoh lou chule police le medical team ho kihoupi ding athalheng jong sol ding jong aphal louvu ahi.

Indan noiya um hon positive natna nei mikhat puidoh nadinga lampi a ot diuva police hole medical team hon achaina a thuhilna apeh jou uva, inmate ho aum nauva kon balcony a hungdoh uva authority hon duty abol diu alamtin u ahi. Indan noiya umhon positive mikhat umna mun hi kot jong akha peh u ahi. Police team hon achaina a hunam aman uva, adamlou mikhat apuidoh uva, District Hospital CCP Isolation Ward a achon u ahi.

Hiche centre a boina aum thu toh kisaiya mi tilkhou a pang koiham ti kholdoh nading chule gamsung dan dungjuiya action lah nadinga natoh chelha ahitai.

CBI hon Dk. cr 332 alam louva akiman thu toh kisaiya CM anahi O Ibobi Singh thudohna nei

Imphal, June 24(ET): CBI hon Wednesday nikhon ‘Development Fund’ dangka crore 332 alam louva akimang e, tia ngohna thu toh kisaiya chief minister anahi O Ibobi Singh achenna Imphal khopi a nidan thum nailam thudohna anei uvin ahi.

Ibobi Singh in thuso miho akihoupi na a, CBI ahilouleh hiche thu toh kisaiya thudohna nei/thukholna nei authority ho sei ngai dinga anasei ahi. Manipur Development Society a chairman panmun hi April 2013 a kon August 2014 kum sung, kum khat bou katuh ahi, tin suhthengna aneiyin chule aman asei dungjuiya, kum 7 tobang chairman kahi e, tia niseh thuso phabep a kisei hi abon a thudih ahipoi, tin aseiyin ahi.

CBI hon sum lui (old denomination) dangka lakh 26 vel amudoh uve, tia ana kisei thu jong suhthengna aneiyin, sum lui amudoh uhi dangka lakh 1 vel bou ahi in, chule hiche sum hi ka chapa jineina a ngailut jal a eikipe ahi in, sum hi insung mihon ka pohdoh hai u ahi, ati.

Thukholna nei agency hon retired IAS officer le MDS chairman anahi O Nabakishore Singh jong Thursday nikho a thudoh dinga kouna apeh u ahi. Ibobi le Nabakishore Singh hin MDS Chairman panmun anatuh lhon jeh a ani lhon a ‘booked’ kibol khum ahi.

MLA 9 in Biren lamkaina sorkar a kon haina aneiya BJP lamkaina state sorkar in boina ato laitah a CBI ho hung ahi. BJP hon coalition government a kon haina neiya NPP minister 4 hohi Delhi a Centre a lamkai hotoh athu seikhom dinga apuidoh u ahitai, tia BJP thulhut in asei ahi. CBI team hohi agency headquarter a kon Tuesday nikho a Imphal hung lhung u ahi.

CBI ho hung phat le sorkar boina phat akito thu a thudohna anei nauva agency official hon thukholna chelha jing ahi in, mi phabep kholna kinei ahitai, tin asei uvin ahi. CBI in hiche case hi kum masa November nisim 20 nikho a state BJP sorkar in ngehna anei jeh a atuh pan ahi. Ibobi chule adang dang hon June 2009 a kon July 2017 kum sung, MDS chairman ahi sunga pan alahkhom uva ‘development works’ a dinga kipe dangka crore 518 lah a dangka crore 332 vel hi alam louva anehguh u ahi, tia ngohna um ahi.

CM anahi Ibobi Singh tilouva MDS chairman anahi DS Poonia, PC Lawmkunga le O Nabakishore jong CBI hon amin phah ahi. Chule FIR a hi MDS project director anahi Y Ningthem Singh le S Ranjit Singh, administrative officer jong minchong ahi.

 

India a Covid-19 case lakh 4.5 val; Leiset chung’a case million 9.2 valta

New Delhi, June 24: Tuni chun India gamsung ah Covid-19 case thah 16,000 akimudoh kit in tuhin India gamsung ah case vei 4,56,183 aum tan hicha lah achun active case 1,83,022 ahi in mi 2,58,685 ho adamdoh tauvin chule 14,476 hon thina atoh tauve tin Health Ministry thulhut chun asei in ahi. Tuhin recovery rate hi 56.38 per cent ahi in chule government laboratory jong 726 aphatan chule Private lab jong 266 aphatan ahi. Tuni pungkah 24 sung in India gamsung ah test 21,51,95 akibol doh in ahi. India gamsung ading in Maharashtra state sung ah natna vei atampen uvin tuhin case 1,39,010 aphatan chule mi 6,531 hon thina atoh tauvin ahi.

New Delhi khopi sung ah case 66,602 aphatan chule mi 2,301 hon thina atoh tauvin, Tamil Nadu state sung ah case 64,603 apha in chule thina toh mi 833 aum tan ahi. State 10,000 val case neiho chu Gujarat a case 28,371 aum in chule mi 1,710 hon thina atoh uvin, Uttar Pradesh (18,893), Rajasthan (15,627), Madhya Pradesh (12,261), West Bengal (14,728) chule Haryana (11,520) state ho ahi.

Johns Hopkins University in thuso khat abolna achun leiset pumpi a tuni Wednesday jingkah chan a avei mi 9,239,794 aphatan chule thina toh 4,76,945 aval tai ati.

US gamsung ah mi 2,439,406 tobang in avei nalah ah mi 1,23,770 hon thina atoh tauvin US gamsung ahin avei tampen tan chule thina toh  jong atampen in ahi. Brazil gamsung hi ani channa ahi in mi 1,145,906 tobang in avei tauvin chule 52,645 hon thina atoh tauvin ahi.

Athum channa ding in Russia gamsung ah mi 598,878 hon avei tauvin, A li channa ding in India gamsung ah avei mi 440,215 aphatan, a nga channa ding in UK ah avei mi 307,682 ahiuvin aban a Peru (260,810), Chile (250,767), Spain (246,752), Italy (238,833), Iran (209,970), France (197,804), Germany (192,480), Turkey (190,165), Mexico (191,410), Pakistan (185,034), Saudi Arabia (164,144), Bangladesh (119,198), Canada (103,767) chule  South Africa (106,108) ahi. Gambung mi 10,000 val thina toh ho chu US (1,23,770 ), UK (43,011), Italy (34,675), France (29,723), Spain (28,325), Mexico (23,377) India (14,011) ahi.

 

Agriculture Director in ‘fertilizer’ lhasam louding ahi, tia loubol miho alungkham lou dinga temna nei

Imphal,  Jun 24(UNA): Agriculture Director in loubol miho ding gelna a angaicha fertilizer ho hop/peh nadinga department in abol thei chan abol ahi, tin aseiyin chule gamsunga lou/har lhasam louding ahi, tin aseiyin ahi.

Agriculture Director Laltanpuii Vachhong in ama Chamber, Sanjenthong a Wednesday nikho a thuso miho akimupi na a asei ahi. Laltanpuii in tu le tua hi gamsunga um loubol mihon angaichat Urea kihopna achelhah jing lai ahi, tin aseiyin chule pandemic jeh a gamsung pumpi a kikha a chule factory jouse akikha jeh a Urea alhahsamna le boina um ahi, tin suhthengna jong aneiyin ahi.

Ahivanga, lockdown relax akibol jouva department in India sorkar henga athu apohdoh a, Chief Minister Biren Singh amatah injong tosotna aneiya mopohna nei Union Minister henga Demi Official (DO) ajih ahi, ati. IT Department Software dungjuiya, hal (fertilizer) hi phaicham a district li- Imphal East, Imphal West, Bishnupur le Thoubal district a chelha ahi. Fertilizer hi tukum June 16 a kon kihom pan ahitai, tin director in aseibe in ahi.

Loubol mi lousan a natong ho lou neihon loubol ho Jamabandi original apeh diuvin temna aneiyin, ahilouleh loubol miho fertilizer kilah a ache nauva Jamabandi Xerox copy apeh uva, chule aning khat a Daag no, Patta no chule phailet let dan ho ajih diuvin temna aneiyin ahi. Hiche hi fertilizer kipeh nading bou ahi in, adang ima ding ahipoi, ati. Manipur a hi acre khat (sangam khat) a har/lou kg 30 cheh hi nivei ngai ahi.

Patta neilou ahivanga kum tamtah ama phailei a natong loubol miho lou akihop na a district phabep a boina um ahi. Hitobang boina hohi Bishnupur chule district adang phabep a um ahi, tin aseiyin chule patta neilou loubol miho jouse jong lou kihom ding, hijong le mopohna nei extension officer hon phailei mun avil masat a, spot verification le adang dang abol masat ding ahi, ati. Department in hiche thu (information) ho alahkhom pan ahitan, department in angaicha jat lou hopna dinga abolthei chan abol jeh a loubol miho akichat lou dinga temna aneibe in ahi.

Loubol miho lungneng tah a aum diuvin temna aneiyin chule fertilizer hi dangka 266.80 a joh dinga state in aman asem/atep ahi in, koi tobang hiche sanga mantam jo a joh aumle department in ‘essential commodities act’ noiya action alah ding ahi, ati.

SEWO in aji sugim a tha ding go pa aganna thei pen a mat dinga ngehna nei

Thoubal, Jun 24(UNA): Social And Educational Welfare Organisations (SEWO) Hayel Labuk, Thoubal District in Sangaiyumpham a kon numei khat ajipa in abolgim a chule tha ding agot na thilsoh demna sangtah anei uvin ahi. Hiche thu hi June 20 ni a kihedoh ahi.

Sorkar chule mopohna nei authority hon themmona neipa aganna thei pen a amat diuvin SEWO in temna aneiyin ahi. SEWO in thuso anei nauva, vangsetna toh nu amatah toh kihouna kineiya thutah ho kihe soh ahi, tin aseiyun chule Ngariyan Makak, Imphal East a cheng ajipa apa Md. Abdur Rashid akiman tan, ahivanga ajipa akiman hih laiye, ti thu jong kihe ahi, ati.

Vangsetna toh Sanatombi in asei dungjuiya, ajipa chule ajipa sopi numei ni le atehpu hin a engbol a, asuhgim jing ahi. Ajipa in numeinu kam sunga hunam a ju asun a chule avohna jong tamtah um ahi in, hitobang chonchan hi dei umlou tah ahi, ati. Mopohna nei authority hon vangsetna toh nu ajipa amat uva chule gotna kilomtah a apeh diuvin thumna aneibe uvin ahi.

Manipur a Covid-19 positive 49 kihet doh be; natna a kon mi 70 dam doh be

Imphal, June 24(ET): Achesa nidan 24 sunga Manipur gam a Covid 19 positive athah 49 akihetdoh be in, hiche lah a numei 25 le pasal 24 pang ahi. Mi 29 hi VRDL, RIMS a test kibol a chule mi 20 hi VRDL, JNIMS a test kibol ahi.

Positive ahi athah a kihedoh holah a Churachandpur district mi 11, Imphal West a 3, Imphal East a 2, Jiribam a 1, Kakching a 5, Kamjong 5, Kangpokpi 2, Noney 1, Senapati 1, Tamenglong 2, Thoubal 1 chule Ukhrul district mi 11 pang ahi. Chule amaho hi abon uva gamdang a kon hung kile ho ahi. Natna nei ho Covid Care Facility a achon tauvin chule kivenna dinga boldinga lom ho jouse jong apat u ahi.

Wednesday nikho a agom a Covid 19 positive hi a mi 70 RT PCR test akibol kit nauva negative ahi jou uva hospital a konin discharged abol tauvin ahi. Bishnupur District Hospital a mi 32, JNIMS a mi 10, RIMS a mi 11 chule UNACCO a mi 17 dicharged abol u ahi.

Manipur a tua positive case hi agom a 970 lhing a, hiche lah a active case 642 hi a chule natna a kon kijendam mi 328 lhing ahitai. Gamsunga recovery rate hi 33.81 percent ahi.

Thanlon MLA gihna na’a panla HPC-D Manipur Region Cadre khat Police hon mandoh

B.Lalboi Gangte

CCpur, June 24 (ET): Churachandpur District Police akon thulhut kimu dungjui in lha masa lam’a Thanlon MLA Vungzagin Valte gihna bollah’a panla HPC-D Manipur Region akon Cadre khat akimandoh tan ahi ati. Chuleh HPC (D) Manipur region apat cadre mat’a um hi Malsawm Darngawn (32) S/o Mr. Hringa of Thenmuol Village ahi. Hetthei khat chu thuguh pole ho’a kon thulhut amu dungjui uvin SP/Ccpur thupeh nanoi in Police hon janni (June 23) Rengkai Bazar lah’a amatdoh’u ahi. Ama akon in i10 car (red colour) Reg.No. MN04P-1770, 9mm Pistol khat, Magazine 1 leh 9mm chang 8 toh anamat tha uvin ahi.

Hiche toh lhon’a Police hon thudoh anei nao’a Thanlon MLA Vungzagin Valte gihna bol lah’a panla ahidan aphongdoh in chuleh amahi FIR No.32(04) 2020 CCP-PS U/s 400/384/506/34 IPC & 25(1-C) Arms Act pansa’a Police hon anamat ahi.

Natong mi lhom na chunga Minister pa makaina a kihouna um

Imphal, June 24(ET):  Labour & Employment Minister Dr. Thokchom Radheshyam in tunin department lamkai ho toh natong mi vat na chung a kihou na ana nei uvin ahi.

Lamkai hon hitabang a natong ho lhom na aum na lou ding a task force asem ding uvin jong hetsah na ana nei in ahi. Conference Hall, SSA Babupara a kihou na achun minister pa in data hop hate a kholtup ahi a, laour gap ho vetsui na kinei a boina ho aphat cha a hetsah ahi ji nading in thupeh ana nei in ahi.

Tulai natna um jeh in natong ho tamtah a inlam a akile uvin hiche toh lhon a natong mi hung vat ahi akiti. Gamsung a natoh an jat chom chom a atong ding mi um lou ho hi agamsung mi thepna le hetna ei ho in asuh bulhit uva atoh ding uvin jong minister pa in hetsah na ana nei in ahi. Toh ding hung tam ding toh lhon a natong ding mi phate a ahung kisep doh na ding in jong minister pa in temna ana nei toh lhon in a onglai jouse sudip ding in vaipo ho nganse na ana nei in ahi. Dr. Th. Radheshyam in aseina a gampam akon mi hung kiel natoh ding hol jong adimset in hiche ho natohna hol peh ding ahi tin jong ana sei in ahi.

Tuni kihou na apanlah na a ana nei ho chu Additional Chief Secretary Labour & Employment,  Letkhogin Haokip, Additional Secretary Labour & Employment, Th. Chitra, Mission Director, Manipur Society for Skill Development,  Kh. Diana Devi, Deputy Labour Commissioner K Bono Singh le adang dang ahiuvin ahi.