BJP kivaipohna akisuhtup loulai jeh a BJP worker phabep in by-election umding...

BJP kivaipohna akisuhtup loulai jeh a BJP worker phabep in by-election umding lungkham pi

61
0
SHARE

BJP kivaipohna akisuhtup loulai jeh a BJP worker phabep in by-election umding lungkham pi

Imphal, July 11(ET): Assembly seat 60 lah a member 5 ‘disqualify’ akibol a chule mithum in membership a kon haina anei toh kilhon a seat 8 hi a ong a um ahi in, ahivanga High Court in Trinamool Congress MLA Tongbram Robindro ‘disqualification case’ thu a pan alah jouva, Election Commission of India in assembly constituency 7 a by-election phondohna anei ding tahsan ahi, ajeh chu lha gup val seat a ong a umthei lou ahi.

“Manipur a BJP lamkaina a coalition government kipo ahi in, party functionary semphat ding hi kiboipi a, groundwork hi tua aboipi louvu ahi”, tin BJP worker khat in aseiyin ahi. BJP lamkaina sorkar hin ‘ground politics’ akithopi ding ginchat umlou ahi, ajeh chu kiloikhomna political party hohin sorkar lamkaiya party akhel got tobang a kimu ahi, tin aseibe in ahi.

Hiche jouse hi Manipur Pradesh BJP president dinga athah a kilhengdoh lamkai in BJP office bearer ho alhen loujeh ahi in, abol ding dol hi ahi. Ahivanga parliamentarian khat panna a BJP legislature thum joh themmo achan ahi. “State BJP president dinga athah a kilhengdoh Prof. Salam Tikendra lhahsamna/mitmo jeh ham, ahilouleh BJP lamkai luboh ho leh parliamentarian ho akikum jeh uva state BJP in party organization hi office bearer lhen a athahat sah theilou ahi, tihi Centre a BJP lamkai hon ageldiu ahi”, tin BJP active member dang khat in aseiyin ahi.

Prof. S Tikendra Singh hi June nisim 2 nikho a Manipur Pradesh BJP president dinga kilhengdoh ahi in, ama akilhendoh toh kilhon a office-bearer ho term kichai ahi. Party thahat sah nadinga party president in office bearer thah alhending ahi, tin aseiyin ahi. Athah a kilhengdoh BJP president Prof. Tiken in proposal thumvei athot ahitan, ahivanga BJP legislature luboh holeh Parliamentarian in office bearer thah a koi lhending ham ti thu a lunggel kibah louna aneiyu ahi, ati.

State BJP organization hi President tilouva office-bearer 16 in apoh ahi. Prof. Tiken President thah dinga akilhen jouva amahin Vice President 6, General Secretary 2, Secretary 7 alhen ding ahi in, hiche lah a khat hi Sangathan Mantri (Organization Secretary) a National BJP office in alhen a chule khat hi Treasurer dinga alhen ding ahi.

State BJP office bearer dinga proposal kipe list athah lah a Nimbus leh Sarda hi ‘general secretary’ ding a kisei holah a pang ahi, tin thulhut in aseiyin ahi. State secretary a dinga proposal kipe holah a Joykishore, Nongpoknganbam Basanta (Heirok), Inaocha Devi, Meena, Priyokumar leh Premananda Meitei pang ahi. Ahivanga, akisei amaho hi centre a lamkai hon aphatsah soh diu ahi tina thei umlou ahi. List a amin panglou ahivanga Centre a BJP lamkai hon anatoh hetpehna anei khat tou jong pang thei ahi.

Party worker hon office-bearer post dinga atoson ding mi akihol uva akisah boi jeh uva organization groundwork hi ahong a um a, hiche jeh a hi by-election a party in lhahsamna ato thei ahi, tia BJP worker phabep in lunggel anei ahi.

 

Arunachal Pradesh a sepai hon NSCN-IM 6 kap lih; galmanchah tamtah man

Guwahati, July 11: Indian Army, Assam Rifles chule Arunachal Police hon Nginu, Longding district, Arunachal Pradesh gam a Saturday jingkah a ‘joint operation’ abol nauva NSCN-IM thingnoimi 6 akap lih uve, tin thuson aseiyin ahi.

NSCN-IM thingnoimi ho aume ti thuguh sepai hon amu jouva tohgon phatah a akisem uva, lhang operation abol u ahi. Sepai tamtah akitol lut thingnoimi hon amu uva hi ajamdoh thei nadinga meithal akap u ahi, tin Defence thulhut in aseiyin ahi. Sepai hon jong meithal a adonbut uva, kikaptona a thingnoimi 6 akap lih uva chule Assam Rifles sepai khat kisukha ahi.

Sepai hon rifle 6 leh meichang, bomb (IED) chule gal laiya manchah kikoina tobang jong amudoh uvin ahi. “Indian Army leh Arunachal Police joint team hon operation abol nauva NSCN-IM thingnoimi 6 akap lih uvin chule Nginu, Longding, Arunchal Pradesh a kon July nisim 11 ni a meithal, meichang leh bomb chule gal manchah dang dang jong amudoh ahi”, tin Eastern Command, Indian Army in aseiyin ahi.

Operation amachal jing in, athi thingnoimi ho chule Myanmar a um NSCN-IM faction hotoh kisaina anei dan uho kholna chelha ahi. Chule akisukha sepai pa thi na thei dinmun a aum tapoi, tin thuso chun aseibe in ahi.

Assam Rifles hon Nagaland gam a um thingnoi kiloikhom ho douna a pan alah jing utoh kilhon a achesa Friday nikho a Chedima kho kom, Kohima district a jong gal manchah tamtah amudoh u ahi. Gal manchah tamtah aume ti thuguh sepai hon amu jouva lhang a operation abol u ahi. Thukholna anei nauva sepai hon manchah tamtah amudoh u ahi.

Akimu manchah holah a 60 mm mortar bomb 3, M-60 anti-tank rifle grenade 2, 7.62 mm sniper chang 390, 7.62 mm AK-47 meichang 109, 7.62 mm pistol chang 51, PEK (bomb) kg thum chule AK-47 magazine khat jong pang ahi. Akiman thil ho North Police Station, Kohima khut a maban thukhol dinga apeh doh u ahitai, tin Assam Rifles thuson aseiyin ahi.

NSCN faction hon centre sorkar toh achom a ceasefire agreement soi kaina anei ahi. Arunachal Pradesh hi non-ceasefire zone ahi in, ceasefire hi Nagaland gam a bou kichepi (territorial limit) ahi. Northeast a thingnoi kiloikhomna lenpen NSCN-IM, NSCN-K Yung Aung faction chule ULFA-I thingnoimi hojong Arunachal gam hiche lhang a hi um u ahi.

Achesa January lha a, National Investigation Agency (NIA) hon Tirong Aboh, legislator, Khonsa constituency thi toh kisaiya NSCN-IM thingnoimi 4 douna a charge sheet asem ahi. Arunachal a legislator Tirong Aboh hi ambush abol uva, midang 10 toh atha u ahi. NSCN-IM leh sorkar in achesa 1997 kum a kihouna apat ahi tan, kum 23 lhing hi prime minister chom chom 6 toh kihouna aneiyu ahitai.

Achesa August, 2015 kum a Union government in thingnoi kiloikhom hotoh Naga thu suhlhap nadinga ‘framework agreement’ soi kaina anei ahi. Ahivanga, alangni in akihou nauva Naga flag leh Constitution thu a kihou lhahna anei theilou ahi.

 

India a Covid-19 active case sanga natna a kon kijen dam lakh 2 val a tamjo ta

New Delhi, July 11: India gam a Covid 19 natna a kon damdoh jat hi active case sanga atam jo tai, tin sorkar in Saturday nikhon thuso aneiyin ahi.

India a coronavirus case hi lakh 8 val ahitan, ahivanga kipa umtah khat chu gamsunga natna a kon kijen dam tam cheh cheh ahi. Tuchan geiya Covid 19 natna a kon mi 515,385 damdoh ahitai. Natna nei hi tua 283,407 lhing ahi in, hiche hi natna a kon kijen dam ho leh athi ho kisim tha lou ahi. Virus jeh a India a mi 22,000 val thi ahitai.

Centre chule state sorkar in Covid 19 natna achal vetkol nadinga tohgon chom chom anei ahi, ati. “Containment zone, surveillance activity, aphatcha natna kikhol doh chule clinical management akitup jeh a tuni a Covid 19 natna a kon damdoh jat hi lakh 5 val ahi”, tin thuso chun aseiyin chule active case sanga natna a kon kijen dam hi 2,31,978 a tamjo ahi, ati.

Hiche toh kilhon a India a recovery rate hi 62.7% lhing ahitai. Achesa nidan 24 sunga natna a kon kijen dam mi 19,870 lhing ahi, ati. Active case 2,83,407 hi tua central leh state government hospital a doctor ho vetkolna noiya um (severe case) a chule pre-symptomatic patient ho home isolation a um ahi, tin jong asei uvin ahi.

“Registered medical practitioner jousen Covid testing recommend abol thei dinga phalna kipe chule Rapid Antigen akipohdoh jeh a Covid 19 test hi atam thei pen a kibol thei ahi”, ati. Government data dungjuiya, India a Covid 19 test kibol sample 1,13,07,002 lhing ahitan, hiche hohi India gamsung mun chom chom a um ICMR diagnostic noiya um public leh private lab 1180 a kibol ahi.

“Public sector in lab hi 841 a akalsah a chule private lab jong 339 lhing ahitai. Nikhat a sample test kibol jat hi kal jing a, janni nikho a agom a sample 2,82,511 test kibol ahi. Tuni chan a Test per Million (TPM) hi India gam a 8,193 lhing ahitai”, tin thuson aseibe in ahi.

Thambalkhong GP Pradhan leh Member in account lhem a MGNREGS sum akilahdoh jeh a FIR kisem khum

Imphal, Jul 11(ET): Porompat Police station in Thambalkhong Gram Panchayat a Pradhan leh Ward Member chunga MGNREGS lo Manipur State Co-operative Bank a kon alam louva job card neiho soi kigu a akilahdoh thu toh kisaiya FIR ajihlut tauvin ahi.

Pradhan Thambalkhong GP Koijam Ongbi Roma Devi, w/o K Olen Singh, Ayangpalli road a cheng chule Ward member Sarangthem Ongbi Anita Devi (35), s/o S Ibomcha Singh, Thambalkhong Sabal Leikai chunga FIR no 100(6)2020 PRT-PS u/s 420/468/120-B/34 IPC (Cheating, forge documents as a genuine with Criminal conspiracy) noiya case kijih lut ahi.

Job card natong mi 6- Mutum Ichal Devi, w/o M Subhash Meetei, Toijam Geeta, w/o T Raghubatti, Lairenmayum Romila Chanu, Toijam Binarani, Sarangthem Nganthoibi, Toijam Sophiya in hehna asem jeh a case kijih lut ahi in, abon uva hi Thambalkhong Sabal Leikai a cheng u ahi.

Hehna asem nauva mi 6 hohin MGNREGS lo hi tu masanga Manipur Rural Bank, Kongba leh Porompat Branche a akihon u bank account a lut ji ahi, tin asei uvin ahi. Job card neiho account a lo alut e, ti thu ahet jou uva bank a tha man kilahdoh dinga acheu leh amaho account statement a lo alut ima amu louvu ahi.

Athu akhol nauva lo hi Pradhan leh ward member in Manipur State Co-operative Bank, Porompat a kon account lhem (fake) a kon dan dihlouva akilah u ahi thu ahetdoh u ahi. Hiche account hi job card natong ho phatsahna umlouva document leh soi asemthu uva ahon u ahi.

Thambalkhong GP a hi job card worker 2006 vel um ahi in, hiche lah a Pradhan leh Ward member in MSCB Bank a job card neiho het louva account lhem 300 vel ahon dinga aginmo nau thu jong aseibe uvin ahi. Case akijihlut toh kilhon a Porompat police hon thukholna apan tauvin ahi. Police hon MSCB Bank avil uva chule Bank a kon hiche toh kisai document ho achomkhom u ahi.

Chule themmona nei ho mat ding jong agot u ahi in, ahivanga June 24 ni a Session Judge Imphal East a Anticipatory bail akilah masat jeh lhon jeh a kiman theilou ahi, tin police thulhut in aseiyin ahi. Hehna sem hon thudih a thutanna aumna dinga Manipur Human Rights Commission heng jong ajot u ahi. Commission in achesa June 24 ni a MHRC Act, 1993 Section 12 noiya case ajihlut a chule DGP in July nisim 8 kah a investigation report chule FIR copy toh apeh tha diuva thuhilna anei ahi.

General Manager, MSCB, Additional Chief Secretary (RD&PR), Manipur government injong July nisim 8 kah a donbutna apeh dinga Commission in asei ahi. Hiche dungjuiya, Additional DGP (HR), General Manager, MSCB, Project officer, DRDA Imphal East, Manipur government in Commission henga donbutna apehlut ahitai.

ATM booth akon sum ladoh got jeh a mi 2 kiman

Imphal, Jul 11(UNA): Manipur police hon tuni chun Imphal Palace Compound a um ATM booth khat akon sum ladoh go mi 2 ana mandoh uvin ahi. Akiman teni chu Palace Compound a cheng A Norendro Singh chapa Asem Rjoit (29) chule Singjamei Mayengbam Leikai a cheng (L) S Boson chapa Seram Bikram (20) ahi. Hiche sum pohdoh nading a aman chah u Maruti van registration no. AS01A/5662 jong chu amandoh uvin ahi. Imphal East SP Jogeshchandra Sanasam in aseina achun hiche teni hin Palace Compound a Bheigo Mill kom a ATM Booth akon sum ana lahdoh got u ahi in Quick Response Team hon thu akijah jah in aki dellut pai jeng e ati.

Aseibena achun night patrol hon hiche ATM booth chu akehkhat bou kihong amu uvin agavet chet uleh ATM machine chu ana Susie uvin hiche suhset nading achun LPG cylinder leh Oxygen cylinder khat jong amangcha uvin chule cutting torch khat jong amangcha uve ati. CCTV footage akon amu dungjui uchun hiche teni chun machine ahondoh nading uva chung pungkha kehkhat tobang aboipi u ahitan hinlah ana lolhong pouvin ahi. SBI (RBO) a General Manager pa’n jong jingkah in amun agavil in ATM akon sum khatcha kilahdoh lou aphohchet in ahi. Hiche ATM achun dk. 16,90,000 aum in khatcha akitongkha pon ahi.

 

Dist Hospital, CCpur a N95 mask hoilou supply toh kisai’a kiman Dr. M Dinesh Singh “bail” a kilhadoh

B.Lalboi Gangte

CCpur. July 11(ET) : Churachandpur District Hospital manchah ding’a N95 mask hoilou kipe natoh kisai’a Doctor 2 anakimatdoh jou nung in Session Judge Imphal West in Doctor teni lah’a khat Senior Medical Officer Mairembam Dinesh chu Medical ground in lha 2 sung Interim Bail ding in anapotsah in ahi. Hetthei khat chu achesa July nisim 7 nikho’a FIR no. 3(4)2020-V&AC PS pansa’a Dr. M. Dinesh Singh, Sr. Medical Officer, Central Medical Store, Directorate of Health Services & State Nodal Officer, State Health Society hi anakiman ahi. Chuleh kholchil na anei dungjui uva N95 Mask hoilou choh na ding’a pan alah ahidan akholdoh uvin chuleh mask sem company chom chom akipat  ‘supply order’ umlouva mask chohna leh District Hospital, CCpur heng’a hiche ho pehna’a panla ahidan ahetdoh dungjui uva mat’a ana um ahi. Hiche naban’a Mask hoilou choh natoh kisai’a Progressive Enterprises Guwahati a natong Rahul Jain in 12% commission chan’a supply bol ding’a kihouna anei’u ahi. Hiche nading in rate umsa alhangpi Blue Sky Guwahati, Plastisurge Guwahati, Mahabir Pharma leh Surgical Guwahati, Plastisurge Industries Amravati chuleh Patni Pharmaceuticals, Guwahati ah rate quotation alakhom uvin hiche jou chun achesa March nisim13 nikhon Blue Sky, Guwahati in mask supply na ding in tender akheh jou in mask kimangsa leh ahoilou 2000 val Manipur a District Hospital, Ccpur ding’a supply anabol khah ahi tin Police akon thuso chun atahlang in ahi.

Hiche toh lhon’a tun Dr. M.Dinesh Singh, Sr. Medical Officer, Central Medical Store, Directorate of Health Services & State Nodal Officer, State Health Society hin tahsa dammo na anei jeh in Interim Bail ah analhadoh uvin ahi. Chuleh ahung lhung ding Sept. nisim 11 nikho leh Court ang’a lou (medical) lekha hotoh ki report ding ahi. Alangkhat’a Doctor khat pa hi ahileh Dr. Kangujam Rajo, Director Health Services, Manipur ahi in ama jong Session Judge Imphal West in ahung lhung ding July nisim 16 chan ding in interim anticipatory bail anape in ahi. Chuleh PR bond dan in Dk.Lakh 1 jong Court in ana leusah in ahi.

 

EEVFAM in ‘fake encounter’ a thi ho a dinga aganna thei pen a thudih a thutanna nei dinga thumna nei

Imphal, July 11(ET): Extra-judicial Execution Victim Families Association, Manipur (EEVFAM) in 11th Foundation nikho a sepai hon akaplih vangsetna toh ho chunga thudih a thutanna gangtah a achelhah na dinga thumna anei kit uvin ahi.

Rights body chom chom, adeh a Human Rights Alert in atosot u ahi in, agom a ‘fake encounter case’ hi 1528 lhing ahi. Athu hi Supreme Court anga kikoi ahitai. Achesa October 2012 kum a case akisem jouva Supreme Court in case phabep CBI hon akhol dinga thupeh aneiya chule vangsetna toh ho chunga aganna thei pen a thudih a thutanna anei dinga thuhilna apeh ahi.

Ahivanga, tuni chan a vangsetna toh koiman thudih a thutanna amu loulai chule ‘extrajudicial killing’ a pang themmona neiho gotna kipe loulai ahi. Kiloikhomna kiphu doh kum 11 alhin toh kilhon a ‘fake encounter’ a vangsetna toh ho jana vetsahna a pahcha akoi uvin ahi. EEVFAM in hahsatna ato ho thu seikhomna jong anei uvin chule akihoulim nau abon a social networking site Facebook a live a ape uvin ahi.

Guwahati a Lockdown July 19 chan kisusao be

Guwahati, July 11: Covid-19 natvei akimudoh tam cheh cheh jeh in Senior government official holeh wards ho akon thalheng ho, Nagrik Committees, Assam Police leh Kamrup Metro District Administration hon meeting anei nauva chun Guwahati a July 19 chan lockdown umjom be ding in aphatsah tauvin ahi. Assam’s Health Department a Principal Secretary, Samir Sinha in aseina achun lockdown aki suhsaobe loule masang a natna jahlou nading a akitingtan ho chu lahlou sohding ahi ati. June 29 apat chun Guwahati hi complete lockdown ahitan, Tuhin Assam a Covid-19 natvei mi 15,536 aphatan hiche lah achun mi 9,848 hon damna akimu tauvin, mi 35 in thina atoh uvin chule mi 5,650 active case aum nalai in ahi.

Manipur a Curfew koi kit ding’a deisahna thu kisei

Imphal, July 11(ET): Manipur sung a Covid-19 toh kisai a boina toh hon frontline a natong ho tilou chung a curfew kikou kit ding adei danu hetsahna anei jing uvin ahi.

Hetthei khat chu hiche natna hi state sung a mipi lah a hung ki the thei ding a aum toh lhon a kichat tijat na um jing ahi. Thuso kimu dungjui in state usng a gari joh ho in Dimapur akon a gari hung kitol ho Mao chan a mi asol uva gari kilheh tona anei sah ji u ho jong hi tijat umtah ahi tin hetsah na ahung kinei in ahi. Hiche gari hung kitol ho ahi khamnathei ho jong hung kipo jing ahi toh lhon  khamnathei kiveina a ahung kijah jing dan jong tahlang na ana nei uvin ahi. World Health Organisation (WHO) noi a scientist ho in covid-19 hi hui a che ahi ti a phondoh na ana nei utoh lhon a hiche natna mitin in ahin nei thei ding ahi dan hetdoh na ana um in ahi. Manipur sung a hiche natna nei hi mi 1593 alhin tah toh lhon a tu le tua natna nei hi mi 750 ahi akiti.

Manipur a Covid-19 case11 kimube

Imphal, July 11: Tuni chun mi 11 hochu Covid-19 natvei ahidan RIMS akon mi 4 chule SDH, Lab Jiribam akon mi 7 akihedoh in ahi. Amauho chu Imphal west akon mi 1, Jiribam akon mi 7 chule Ukhrul akon mi 3 ahiuve. Achesa pungkah 24 sung achun  mi 11 ma CCC, Meitram akon mi 1, Kamjong akon mi 2 chule Ukhrul akon mi 8 hochu RT PCR test result dungjui a Negative ahijeh uvin apotdoh tauvin ahi. Tuhin Manipur a Covid-19 veikha case 1593 aum in hiche lah achun active case 750 aum in chule mi 843 ho adamdoh tauvin ahi chule Recovery rate jong 52.91 ahitai.

Kuki Inpi Meghalaya in CM Relief Fund Dk. 1.10 lakh pehdohna nei

Shillong, July 11(ET): Kuki Inpi Meghalaya makaina noiya Meghalaya CM Relief Fund a ding’a project ana gon naova adondoh u Dk. 1,10,500/- chu janni (July 10) nilhah nidan 7:00 vel chun CM Conrad Sangma khutna pehdohna anei taovin ahi. Chule tohgon lolhinna ding’a sum le pai a pan la jouse chung’a jong kipathu aphong uvin ahi.

CM Conrad K. Sangma in hiche thilpha boljeh chun kiphathu jong aphongdoh in chule kithokhom jing ding in jong asei in ahi.

Alangkhat ah tuni chun Meghalaya Case thah 76 mudoh ahitoh lhon in nikhat sung a ding a amudoh tamni pen u hiding a melchih ahitai. Tuhin agamsung uva active case 215 aum in ahi. Umpling a um BSF campus a jong avei mudoh ahitoh lhon in containment zone in ana phongdoh tauvin chule government in health official ho heng ah Umpling toh kinai a um Rynjah-Umpling, Nongmensong le Mawpat a cheng ho test bolding in thupeh anei in ahi.