BJP hi “Chartered Flight Horse-Trading Company” ahi, tia MPCC President M. Okendro...

BJP hi “Chartered Flight Horse-Trading Company” ahi, tia MPCC President M. Okendro in demna nei

68
0
SHARE

BJP hi “Chartered Flight Horse-Trading Company” ahi, tia MPCC President M. Okendro in demna nei

Imphal, Aug 20(ET): Manipur Pradesh Congress Committee (MPCC) in Congress Bhavan mun a Thursday nikho a press conference abol nauva tua BJP lamkaina sorkar hi ‘Chartered Flight horse trading company’ ahi, tin asei uvin ahi.

Ram Madhav in Congress party chule Assembly a kon haina neiya MLA 5 ho New Delhi khopi a BJP party a lahlut na kin anei na a ahoulimna MPCC President Moirangthem Okendro in adonbut na a asei ahi. BJP in mipi lungthim hi ama phatchomna dinga aman a, politics a thuneina atuh chah nom jeh a Covid 19 jeh a gamsung mihon genthei na sangtah ato ahi, tin aseiyin ahi.

BJP National General Secretary Ram Madhav in Congress hon sorkar asuhboi ahi, tia ngohna anei hi abon a sem thu chule jou ahi, tin aseiyin ahi. Manipur gam mi hon Congress atamjo ahi vanga state sorkar hi Centre thunei na a akisem dan ageldoh a amu soh ahi, ati.

Tu naicha Congress party a kon haina neiya legislator anahi mi 6 lah a mi 5 ho New Delhi a kino tah a ache uva, ama ama constituency miho Covid-19 pandemic laitah a adalhah uva BJP a alut uhi vangset umtah ahi in, Manipur gam mi hon Congress legislator anahi mi 6 hon ama chang ding gel na a thil abol uhi angaidam louding ahi, tin MPCC president M Okendro in thuso miho henga aseiyin ahi.

MLA anahi mi 6 lah a mi 4 hin 2017 kum a Congress ana dalhah uva BJP a lut u ahi in, tua national headquarter a avel a BJP a alut kit uhi ipi jeh ham, tin jong thudohna aneiyin ahi. Ama ama constituency mi chule congress toson ho khohsahna nei louva MLA anahi 6 ho lah a 5 hi BJP a lut u ahitan, ipijeh a Lilong Kendra ex-MLA hi amaho lah a pang lou ham, ahilouleh BJP in Lilong constituency asan lou ham, tin M Okendro in aseibe in ahi.

Constituency jouse a candidate dinga kigo chule atoson mi tamtah um ahi, tin aseiyin chule district wise committee in Congress party chunga tahsanna anei dinga MPCC president in temna aneiyin, tua umding by-election a amite dalha a chule ajoulhep ho thuhilna khoutah apeh uva chule Covid-19 douna a pan alahkhom diuvin jong temna aneiyin ahi.

Ex-MLA 6 hohi Covid-19 task force a chairman dinga jong nominate kibol ahi in, politics a amaho phatchomna ding bou agel jeh uva tu boipet tah a ama ama constituency adalhah u ahi, ati. MLA anahi mi 6 hon Congress party adalhah vang uva party toson mi tam cheh cheh ahi in, hiche hi tua umding by-election a kimu ding ahi, tin Okendro in aseibe in ahi.

Xxxxxxxxxxxx

MPCC in Rajiv Gandhi pen kum 76 lhinna mang; Ibobi in Congress MLA a kon haina nei ho demna sangtah nei

IMPHAL, Aug. 20 (UNA): Congress Legislature Party leh chief minister anahi Okram Ibobi Singh in party a kon haina neiya BJP a lut MLA anahi ho demna aneiyin, hitobang jachat na neilouva thil kibol hin ‘democracy’ totna aso ahi, ati.

Manipur Pradesh Congress Committee in Congress Bhawan, Imphal khopi a prime minister anahi Rajiv Gandhi pen kum 76 lhinni amang uvin, kin goun a President, MPCC Moirangthem Okendro, deputy CM anahi Gaikhangam, Congress MLA ho, MPCC officer bearer, Congress Councilor ho chule worker ho jong apang uvin ahi.

Kin goun a Okram Ibobi in ahoulimna a, akilhengdoh MLA hohin kum 5 lhing term apoh u ahi in, ama ama political party principle leh ideology ajui ahi. Ahivanga, kitahna nei louva jachat helouva party khat a kon party dang a thunei ding dei jeh a chom le le a legislator ho hin democracy dihtah asuhset uva chule mipi tahsanna apalkeh u ahi, ati.

Legislator hon mipi natoh phat cheh nadinga ruling party lut ding akhohsah uva ahileh alhengdoh ho henga phalna alah masat diu, MLA post a kon hangsan tah a haina anei uva chule ‘mandate’ athah akimaitopi diu ahi, ati. Party a kon haina neiya BJP a lut ex-MLA ho Ibobi in demna aneiyin, achesa kum thum leh keh lhing jum helouva Congress MLA banga chon uva ahivanga BJP sorkar atosot u ahi, ati.

Amaho hi sun teng leh Congress MLA banga um uva lhai le le uva chule jan teng amaho phatchomna dinga BJP a um u ahi. Party a alut uhi itobang phatchomna amu diu ham kahe pouve, hijong leh state chule ama ama assembly constituency dinga ipi abol uham ti akihe e, tin Ibobi in aseiyin ahi.

Prime minister anahi Rajiv Gandhi in phat chomcha vai apoh sunga legislator ho navel vel a party adalhah uva achop le le u vetkol naing chule ‘democracy’ adih cheh thei nadinga Anti-defection law ana sem doh ahi in, ahivanga lungthim duha a kichem MLA hon 10th Scheduled (Anti-defection law) hi khohsahna anei louvu ahi, ati.

Rajiv Gandhi in Prime Minister hina a atohdoh ho thu aseiyin, thil gamlha tah chan mu a chule gamsung khantou sah ding deiya lamkai pilhing tah ahi, ati. Gam kinaipi ho toh kiloikhomna pha sem nom lamkai ahi in, LTTE hon Sri Lanka a boina sangtah asem u veng dinga Indian Peace Keeping Force ho ana sol a, phulahna a LTTE hon suicide bomber ho amanchah a atha u ahi, tin aseibe in ahi.

Congress lamkai leh worker hon PM anahi Rajiv Gandhi lim maiya jana vetsahna a pahcha akoi uvin ahi. Rajiv Gandhi hi August 20, 1944 kum a peng ahi in, India Prime Minister sagi (7) channa (1984-1989) ahi. Kum 40 a PM hi a, India gam a Prime Minister khangthah pen hi ahi in, achesa 1991 kum a Tamil Nadu gamsung Sriperumbudur a public meeting a suicide bomber khat in atha ahi.

…………………………..

‘Community transmission’ a kon kiven a chule Covid toh hinkhom je het dinga Minister Nemcha Kipgen in Senapati avil na a asei

KANGPOKPI, Aug.20 (UNA): Senapati leh Kangpokpi Covid-19 Minister in-charge leh Social Welfare and Cooperation Minister Nemcha Kipgen in district sunga Covid-19 pandemic ‘community transmission’ aumlou nadinga Senapati mihon pan alah diuvin temna aneiyin ahi.

Athah a kisa Conference Hall, DC office, Senapati mun a District Level Officer ho toh Deputy Commissioner athah Th. Kirankumar, IAS, District Medical Department, District Police chule civil society organization chom chom ho toh District Nodal Officer for COVID-19 Harekrishna, IAS panna a Nemcha Kipgen in ‘review meeting’ alamkai ahi.

Minister nu in athah a positing hi a Deputy Commissioner Th. Kirankumar, IAS alamto na thu aseiyin, hiche jouva District Administration, Medical Department chule District police in natna venna dinga itobang pan alah uvem, ti thu asei khom uvin ahi.

Senapati DC Th Kirankumar, IAS in COVID-19 douna a district in pan alah dan ho powerpoint a hilchenna aneiyin, simlai kiloikhomna, houbung, khosung authority leh adang dang panna a CSO chom chom toh kitho a hinkho huhdoh nadinga pan alah dan u jong aseiyin ahi. District administration, Medical department, district police, CSO chule district a um houbung ho apachatna thu Minister Nemcha Kipgen in aseiyin, ‘community transmission’ aumlou na dinga imalam jouse a district miho thuhilna anei soh diuvin tilkhouna thu jong aseiyin ahi.

Covid-19 pandemic toh hinkhom je het angaidan leh athupi dan jong Minister nu in aseiyin, HIV/AIDS, Malaria, Zika kiti vaccine umlou lai hitobang virus adang dang ho toh ihinkhom bang uva Senapati mihon jong hin je dan ahet ding chule hinkho man akikhel sah dan ho het angaiye, tin Minister nu in aseibe in ahi.

Natna neiho thet bol loudinga mipi temna aneiyin, ngailutna, tilkhouna chule tosotna leh kithopina peh joh ding ahi, ati. District Magistrate/Deputy Commissioner in positive hi ho leh a insung mite chule vengsung chant het bol ho chunga action kilom tah a alah dinga thuhilna jong aneiyin ahi.

Pandemic douna a mi jousen pan alah dinga temna anei toh kilhon a tu phat a Senapati leh Kangpokpi district hi adang ho dinga kihilna thei ahi jeh a akipapi na leh apachat na thu aseiyin ahi. Twisa nikhat a livei beh don ding, chi kilhah na twisa a ikam kho a chule World Health Organization leh Indian Council of Medical Research in SOP leh guideline asodoh ho khoutah a jui dinga mipi thuhilna aneiyin ahi.

Chule tu naicha Ministry of Social Justice and Empowerment noiya hondoh um Nasha Mukh Campaign (khamnathei suhmang ding) thu jong aseiyin, khamnathei douna a Senapati miho adeh a, CSO hon lunglut tah a pan alah uva district hi khamnathei umlouna district aso diuvin tilkhouna thu aseiyin ahi.

District Nodal Officer, Senapati and Kangpokpi for COViD-19, Harekrishna, IAS in lockdown hi umjom jing louding ahi in, September lha teng Manipur injong Unlock apat maithei ahi, hijong leh gamsung a ki angkoi nap hat hilou lai ding ahi, ati.

Minister Nemcha in Hypochlorite (bom/jerry can 5), PPE lhingset, gloves, mask, sanitizer leh adang dang ho Mao gate leh mun dang dang a frontline worker ho dinga pehdohna aneiyin ahi. District administration, medical department, police, voluntary CSO leh adang dang a frontline worker ho manchah dinga DC, SP, CMO leh CSO lamkai ho khut a pehdohna aneiyin ahi.

Xxxxxxxxxx

Swachh Survekshan Results 2020: ‘Cleanest City’ dinga Indore li vei kijom a lhendoh hita

New Delhi, Aug 20: Madhya Pradesh gamsunga um Indore hi alivei channa dinga India gam ho lah a khopi theng pen ahijing nalaiye, tin Swachh Survekshan 2020 survey result in aseiyin ahi.

India gam a ‘cleanest city’ kilhenna a Gujarat gam a um Surat khopi second spot a apang in, Maharashtra gam a um Navi Mumbai third ahi in chule Varanasi hi Best Ganga town’ ahi, tin asei uvin ahi. Madhya Pradesh Chief Minister Shivraj Singh Chouhan in Swachh Survekshan 2020 a India gam a dinga khopi theng pen a kilheng doh Indore miho akipapina thu aseiyin, khopi hi livei kijom na dinga khopi theng pen a kiphong doh ahitan, kum 6 kijom a ahin mu ding ahi, ati.

Mihem 50,000 a kon lakh 1 kikah chenna category noi Northeast zone a, Assam gam achungnung pen in ahi. Tezpur khopi hi ‘citizen feedback’ dungjuiya Best City a phondohna um ahi. Chule Jorhat hi Northeast zone a khopi theng pen ahi in, Diphu hi ‘Fastest Mover’ a alhengdoh uvin ahi. Sivasagar in ‘Innovation and Best practices’ a Best City amu in chule Karimganj in Best Self Sustainable City amu in ahi.

Mihem 25,000- 50,000 chenna category a Hailakandi in Innovation & Best practice a Best City amu in chule Silapathar ‘Fastest Mover City’ a alhengdoh uvin ahi. 25,000 noilang population category a Assam gam injong spot khat amu jouvin, ‘Fastest Movers’ City a Lamkhimpur apang in ahi. Chule Fastest Mover state leh overall category a Best Performing State winner a jong Assam gam pang ahi.

Swachh Survekshan 2020 hi Ministry of Housing and Urban Affairs (MoHUA) in agon ahi in, vannoi leiset a dinga cleanliness survey lenpen jong hi ahi. Nagaland in North East category fifth edition ‘Swachh Survekshan 2020 a award thum- Cleanest City, Best Self-Sustainable City chule Best City (Innovation & Best Practice) amu in ahi.

Mokokchung, Nagaland in 25,000 – 50,000 population category (North East India) a Cleanest City amu a, Chumukedima in Best Self-Sustainable City in North East award amu ahi. Pfutsero, Nagaland in 25,000 noilang category (NE India) a Innovation & Best Practice a Best city award amu ahi.

Union Housing and Urban Affairs Minister Hardeep Singh Puri in result phondohna aneiyin chule kin goun a ‘Report on Assessment of 97 Ganga Towns’ kiti lekhabu jong hondohna anei uvin ahi. Prime Minister Narendra Modi in 2016 January lha a ana pohdoh survey hi tuchung edition 5 channa ahitan, edition masapen a hi India gam a khopi thengpen award hi Mysuru in amu ahi.

India gam a mihem 1.9 crore chenna khopi 4,242 a survey kibol ahi in, Ministry of Housing and Urban Affairs tohgon noiya chelha ahi.

Xxxxxxxx

Manipur a Covid-19 positive 49 kimu be

Imphal, Aug 20: Achesa nidan 24 sunga CAPF 9 chule milham 40 (pasal 25 leh numei 15) Covid-19 positive case akimudoh be in ahi.

VRDL, RIMS a 2, JNIMS a 8, JNIMS RAT 1, Imphal West RAT 8, Bishnupur RAT 2, Ukhrul RAT 1, Thoubal RAT 3, Babina Diagnostic 24 a positive case ho kimudoh ahi. Natna nei hohi Imphal West district mi 19, Imphal East 6, Bishnupur 4, Chandel 1, Ukhrul 2, Senapati 1 chule Thoubal district mi 7 ahi in, natna nei milham mi 40 hohi abon uva gamdang a kholjin lou ahi.

Abon uva Covid Care facility a achon tauvin chule ‘containment’ leh ‘contact tracing’ kiti kivenna dinga natoh ho abol tauvin ahi. Achesa nidan 24 sunga natna jeh a athi athah akisei pon, natna a thi hi gamsunga mi 18 lhing ahitai.

Alangkhat a, achesa nidan 24 sunga mi 117 natna a kon adamdoh utoh kilhon a asoldoh tauvin ahi. CAPF- 70 leh CCC, Meitram a um mi 47 hi RT PCR test abol uva Covid-19 negative ahi jouva discharged abol u ahitai.

Manipur a tuchan geiya natna nei agom a 4925 (milham 3639 leh CAPF 1286) ahitan, discharged kibol jat 3002 (milham 2592 leh CAPF 410), active case 1905 (milham 1030 leh CAPF 875) lhing a chule recovery rate hi 60.95% lhing ahitai.

Psychological Support Helpline Number – 8787457035, 9402751364. 76299435961; Hospitalisation Helpline Toll Free Number – 1800-103-2015 chule Helpline Covid 19 Common Control Room Number – 1800-345-3818 hi aphat tin a kihong jing ahi.

Xxxxx

NSAP beneficiary ho dinga dk. 4,97,74,000 ama ama bank account a kithot ahitai: Minister Nemcha Kipgen

Imphal, Aug 20(ET): Social Welfare Minister Nemcha Kipgen in Thursday nikhon National Social Assistance Programme (NSAP) fund ho PFMS a kon Direct Benefit Transfer a beneficiary ho account a kithot ahitai, tin phondohna aneiyin ahi.

Ministry of Rural Development, India government in National Social Assistance Programme (NSAP) noiya  financial assistance (wef April – June 2020-21) Ist Installment a dinga agom a dangka 4,97,74,000 asodoh ahitai, tin Minister Nemcha in aseiyin, hiche hi Indira Gandhi National Old Age Pension Scheme (IGNOAPS), India Gandhi National Widow Pension Scheme (IGNWPS), Indira Gandhi National Disability Pension Scheme (IGNDPS) chule National Family Benefit Scheme a beneficiary ho a dinga pension benefit/financial assistance a kipe ahi, ati.

October 2019-December 2019 sunga pension amount hi agom a beneficiary 61,770 in ama ama bank account a amu ding ahi. IGNOAPS beneficiary 55,160, IGNWPS beneficiary 5355, IGNDPS beneficiary 911 chule National Family Benefit Scheme (2020-21) beneficiary 344 in ama ama bank account a sum amu diu ahi.

Beneficiary hon ama ama bank ahilouleh ATMS a sum akilah doh teng uleh Covid-19 pandemic kisei khoh lai ahijeh a SOP kisodoh ho phatah a ajui diuvin jong Social Welfare Minister nu in temna aneibe in ahi.

Xxxxxxxxx

Ex Congress MLA 5 BJP lutho leh CM in Union Minister kimupi diu

Imphal, 20 Aug, (ET): CM N Biren lamkaina a Delhi che ex Congress MLA 5 ho BJP a lahlutna umjouvin Union Home Minister Amit Shah kimupidin angah tauvin ahi. Amit Shah toh akimujou uleh  Manipur Cabinet Reshuffle umdile umloudi thu kihe ding ahitai tin akiseijin ahi.

Alangkhatnah tunin ex Congress chief minister OIbobi in Congress a kona BJP a chomlut hohi  kitahna le chepi neilou ho ahiuve tin demna aneijin ahi.

XXXXXXX

MHA thupeh palkeh in Mizoram govt in state sung lutding ajahda e: Assam Rifles

Aizawl, Aug 20: Union ministry of home affairs (MHA) thupeh palkeh in military leh paramilitary ho state sung lutding ajahda e tin  Assam Rifles (AR) in Mizoram government themmo achantan ahi.

Mizoram-Assam gamgi Vairengte check-gate a Covid-19 noi a dan juidia kisem ho juilou le hunam a Assam Rifles sepai mi 15 hunglut thu media in ahin tahdoh a pat hiche thu hi hung ging doh ahi.

State government in  Assam Rifles che le va le  adal jeng hi MHA thupeh apalkeh ban a gamsung a dia thilpha motah sodohsah thei jong ahi e tin Assam Rifles thuso chun asei e.

Assam Rifles hon Aizawl kom Zokhawsang quarantine centre ah Covid-19 natna nei ho phatah in akivekol in state sung a natna akithethang pon, government lhohsat nading boldoh jong akineipoi, ati.

Assam Rifles in aseikitna ah Vairangte lutna bul a che le Armed Forces ho suhboi lou dia avel vel a state government kom a ngehna jong kinei a chujongle ahunglut thah sepai ho quarantine a koidia jong kisei jing a, Covid-19 toh kimat a state government dan sem ho palkeh ding kigong khalou hel ahi e, ati.

Chule Vairengte a August 18 nichun sepai ho medical test chelhah ding thu ana kisei poi tin Assam Rifles hon aseikit e.

Dan juilou le hunam a Assam Rifles hon kotbul akal lhah hi avel a sosah kit lou dia state home department in 23 sector Assam Rifles DIG Brigadier Vinod S lekha ana thot a, Aizawl le Vairengte kah a civil vaihomna suboi dia lhei le sepai 25 hochun Vairengte a sepai 15 ho kotbul lut nadia pan alah thu jong state home department chun lekha a tahlahna jong anei ahi.

Home department lekha chun aseikit na ah Covid-19 kivendoh nadia dan kisem ho AR hon ajui behseh lou dan jong May a pat August 10 kahsung a sepai 1124 hunglut aum in, hiche lah a 10 percent ho chu Covid-19 natna nei ahiuve, ati.

Hitia Assam Rifles ho umchan le chaloh hi state government le Mizoram mipi dia jong kichat umtah dinmun asodoh thei ahi e tin home department chun aseikit e.

Hiche thudol a chief minister Zoramthanga in August lhasung a state sung a paramiltary ho lut le khamtang dia Prime Minister Narendra Modi kom a ngehna jong ana nei ahi e.

Mizoram gamsung a Paramilitary hon Covid-19 natna aha pohlut kei ahi e.

Health department thu sodoh dungjui a sepai mi 339 vel hin Covid-19 natna anei in, hiche hi state sung natna nei 873 a pat sim a 38.83 percent ahi e. Covid-19 natna nei 339 lah a Assam Rifles mi 101, BSF 230 chule CRPF le Indian Army a kon mi 4 cheh ahi.

Hiche ban a National Disaster Response Force (NDRF) a kon natna nei mi 32 ho jong abon un adamdoh soh tauve tin health department thuso chun aseiye.

XXXXXX

Compartment themvetna lolhing simlai vetnem lou ding ahi: KSA

Imphal, Aug 20: Compartment themvetna lolhing simlai 5329 ho government le private school hon maban sim thei nadia kot ahonpih cheh a vetnem lou ding in Kangleipak Students’ Association (KSA) in tunichun temna aneiye.

KSA in compartment lolhing simlai ho khonung state government le private school hon gelkhoh a aneilou kumdang bang a achejom le mohvet lou ding tia asei ban tu natna hise lenlai a nu le pa genthei hahsatna hetpih lou a fee sangtah alah u jong vetkol a ngah ding in jong temna anei un ahi.

KSA in pelthei lou thilsoh jeh a banjom theilou simlai admission hol ho kot navah a honpih ding le ihamtia dan kikhel aumjong le mipi het a tahlang ding in jong  temna anei uve.

Chule class 10 le 12 themvetna pang ding simlai ho sum tamtah lut a school phabep in hostel ten ti a aumsah jong boltah lou ding in KSA chun school ho thupeh aneitan ahi.

XXXXXX

Manipur a pat leithao lahna dia MoU kibol nunglahdoh hihen: Eco Network

Imphal, Aug 20(ET): Manipur gamsung adeh a Ukhrul, Kamjong, Chandel, Tengnoupal le Tamenglong a leithao lahnadia Government of Manipur leh India in Memorandum of Understanding (MoU) asemdoh chu voh hai ding in hatah in Environment Conservation Network (Eco Network) tunichun government kom a ngehna aneitan ahi.

Agammi dohna umlou hel a hitobang tohgon government in abol hi gamsung dan adeh a Article 21 toh kikal, gam toupha kineh holna suboi ding ahi e tin kiloikhom ho thuso chun asei e.

Chule hiche tohgon hin vannoi a dia gancha thing le song haosapen a kihe Northeast gam lahlou aso nading hiche tohgon hi velvet lou a khoh ahitai, ati.

Hitolhon a tohgon suh hai a umthei nading a MoU asemsa nunglahdoh dia Eco Network chun Manipur Government le India ngehna anei ahi.

XXXXXX

NEET Exam Centre tamsah be ding ahi e: Education Minister

Imphal, August 20(ET): National Testing Agency (NTA) Chairman in September 13, 2020 a National Eligibility cum Entrance Test (NEET) umding exam centre tamsah be dia atep tolhon a state government school ho le Central Board of Secondary Education (CBSE) school ho exam centre a dia gon hiding ahi e tin Education Minister Dr. Thokchom Radheshyam in aseiye.

Hiche thu a simlai ho le nu le pa hon hahsatna ato ho Wednesday nia NTA Chairman toh kihouna aneipet a asei a pat simlai hon state sung a exam apehthei nadiuva exam centre hi tamsah be dia hung umdoh ahi e tia Radheshyaam chun New Secretariat ama office chamber a phondohna anei ahi.

Radheshyam in themvetna hi SOP dan noi a phatah a gontoh ding ahi in, lolhinna sangtah madel a kigong cheh ding in simlai ho tepna jong aneiye.

XXXXXXXXX

Congress in party a kon Sagolband A/C MLA nodoh ta

Imphal, Aug 20: Sagolband A/C MLA RK Imo Singh chu kum 6 a din congress a kon nodoh ahina lekha Manipur Pradesh Congress Committee (MPCC) General Secretary (Adm) Hareshwar Goshwami in tunichun asodoh in ahi.

Indian National Congress dan noi a kum 6 sung Rajkumar Imo Singh hi Disciplinary Action Committee in thulhut apeh dungjui a MPCC President in apaidoh ahi tia Goshwami chun asodoh ahi.

XXXXXXXX

Centre in Naga thu kihouna banjom dia agon Nagaland government in kipapi

Dimapur, Aug 10: Prime Minister, Union Home Minister chule Government of India in Indo-Naga kihouna banjop dia agon thu tunichun Kohima a State Banquet Hall a kihoukhomna nei People’s Democratic Alliance government palai hon akipapi lheh un chujongle hiche tohgon lolhin nadia theitop so a pan lahding anopnao jong aphongdoh un ahi.

Chule kibahlou naho chom koidoh ding le Naga nam semtoh ding tupna a Joint Legislature Forum (JLF) nuse dia akigotna nunglah doh ding in PDA chun NPF ho tepna jong abolpai e.

JLF in Indo-Naga kihouna lolhinna dia mipi huikhom a pan lah jing ding le NDPP, BJP chule independent member ho toh thakhat a chekhom ding, chule Independence Day nia Governor in natongdoh joulou a state government asei jong mipi in ngaithei beh hih jongle state khantou machal nadia theitop so a panlah jing dia tuni toukhom hon thulhuh anei ahi.

Xxxxxx

Jilkung kamkeh sahlou a state pumkhatna suse thei tohgon kipomlou ding ahi

Imphal, Aug 10(ET): Phalna umlou a government tohgon chung a college jilkung ho kamkeh lou dia Directorate of University and Higher Education in August 10 nia thuso abol Manipur government tohgon demna aneiban in Covid-19 natna hise umlai a India le NSCN-IM kah a kihouna Manipur gam tongkha thei ho apomlou ding ahidan United Peoples’ Front (UPF) in tunichun phondohna anei uvin ahi.

UPF in kum 2000 thusim nei Manipur gam hi Inida le NSCN-IM kihouna in asuhset thei a kon vendoh nading a Manipur mitin kihoukhom phat ding laitah a college Jilkung ho kamkeh lou dia government tohgon hi vangset umtah ahi, ati.

Mipi kamkeh ding jahda ahilai a Manipur gam khel lamdang ahile dei umlou tah thil sohding in UPF in government gihna aneiyin ahi.

Xxxxxxxx

KMA in CCpur District sung’a Rehab Centre umho kithopi nape

B.Lalboi Gangte

CCpur. August 20 (ET) : Korea Manipur Association (KMA) in Manipur sung mun chom chom’a khamnathei ne johsah leh kijoh ho (sex worker)vetkol na mun Rehab Centre chom chom’a panpi na anape uvin ahi. KMA in janni ( Aug.19) leh tunin (Aug.20) panpi na anapeh nao mun hochu CCpur khopi sung’a um Rehab. Centre 3 tichu Overcomers, Family Lane, Bijang, Agape, Rengkai-Muolhlum leh Gilead Balm, Kanaan Veng ho’a kithopi nan Dk. 3,000 cheh SN John, President, Zillai GHQ chungchon’a anape uvin ahi.

Hetthei khat chu Korea Manipur Association (KMA) hi Manipur mi South Korea a natoh nei leh jil nachom chom neiho kiloikhom na ahi naban’a hiche ahin Meitei, Naga leh Manipur a thinglhang mi pao chom chom thoho kiloikhom na khat ahi.

xxxxxxxxxxxxxxxx

Medical Superintendent Dist Hospital CCpur in Director, Health & Family Welfare heng’a ngehna anei tuchan donbutna umlou

B.Lalboi Gangte

CCpur. August 20 (ET) : Manipur sung’a District Hospital jouse lah’a pilhing pen’a het’a um District Hospital, Churachandpur ah natong Grade-IV jaona’a Technician, Nurse leh Doctor ding kining lhing lou jeh in Sanction post tamtah a-ong aum natoh kisai’a Dr. Vanlalkungi, Medical Superintendent, District Hospital, Churachandpur in achesa Aug. nisim 11nikhon Director, Health and Family Welfare heng’a sanction post tamtah huhbit louva um ho avelvet thah ding leh National program chom chom patdoh ding leh tahso ahi toh lhon’a staff kining louva mipi deina bang’a kingah na Hospital ahi theina ding’a avetkol ding in ngehna ananei in ahi. Hetthei khat chu District Hospital, Churachandpur a natong ding sanction post leh natong ding jat hi Casualty & Trauma Centre ah Doctor 10 um na ding’a 6, Nurse a sanction post um hih jong leh apoimo dungjui’a 7 akikoi in, Nursing Sister 8 um nading’a 7, Staff Nurse 52 um nading’a 38, Sweeper 20 um nading’a 4, Ward Attendant 30 um nading’a 15, Ayah 4 um nading’a 2, Chowkidar 3 um nading’a 1, Cleaner 2 um nading’a 1, Peon 2 um nading’a 1, Postpartum Grade IV khat um nading’a koima umlou, Oncology a sanction post um hih jong leh Medical Officer (Doctor) khat leh Staff Nurse khat chule Grade IV khat kikoi, Dialysis Unit a sanction post um hih jong leh Staff Nurse 2, Technician 1leh Grade IV khat kikoi, Cook 3 um nading’a 1, ECG Technician 3 um nading’a 1, LDC 6 um nading’a koima umlou, Dental Technology, Plumber, Medical Record Officer leh Specialist Neonatology khat cheh’a sanction post aum vang’a koima umlou ahi toh lhon’a hiche hin avetsah chu sanction post jouse a-ong ngen ahi tina ahi ati.

Hiche toh lhon’a District Hospital a natong ding Staff akining lhing kah’a National flagship program kimkhat jong patdoh ahi jeh in Government in natong ding’a alah hilou District Hospital in apoimo jeh’a Grade IV, Nurse, Computerized OPD vekol ding Computer Operator leh Technician phabep agoitho ahi. Voluntary nurse ding’a manbei’a natong mi phabep aum jeh’a Hospital hi chelha jom thei dinmun’a um ahidan aphongdoh in ahi. Chuleh Medical Superintendent in Director, Health and Family Welfare, Government of Manipur heng’a athil ngeh ho tuni chan in donbut na amunaipon ahi.

 xxxxxxxxxxxxxxxxxx

CCpur District a Scrub Typhus case 2 kimudoh

B.Lalboi Gangte

CCpur. August 20 (ET) : Churachandpur District sung’a tukum (2020) sung’a ding’a sahit akon pengdoh natna “Scrub Typhus” natna case 2 mudohbe ahi toh lhon’a case 4 alhing tan ahi. Scrub Typhus case thah 2 hi Patjang kho akon numei kum 35 leh Selbuhjang kho akon numei kum 55 akon ahin tuhin anilhon in Samaritan Nursing Home ah admit in aum lhon tan ahi.

Hetthei khat chu achesa a case 2 anakimudoh nachu Monglenphai akon pasal kum 22 leh Suangdoh Village, Suangdoh Sub Division akon pasal kum 32 akon ahi. Scrub Typhus hi chuhlai tichu May-October kikah’a alhangpi’a um ahin kivetkol nading’a lou kisemdoh loulai ahi. Scrub Typhus akon kivendoh na ding’a aphapen chu gamvah hon toka chol chen ding, kengkoh se ding chule tol lah dung’a jong moh tou tou lou ding hi aphapen ahi.

Xxxxxxxxxxxx

India a Covid +ve case thah 69,652 kimudoh; agom’a Lakh 28 valta

New Delhi, Aug 20 : India a nidan 24 sung’a Covid +ve case thah 69,652 akimudohbe toh lhon in agom’a case Lakh 28 aval tan ahi tin Union Ministry of Health and Family Welfare akon thulhut chun aseiyin ahi. Tuni case thah 69,652 hin agom’a case 28,36,926 lah’a active case 6,86,395 aum tan ahi. Chuleh nidan 24 sung’a Covid jeh’a thina 977 aum toh lhon’a agom’a 53,866 alhingtan ahi.

Hiche toh lhon’a Ministry akon thulhut kimu dungjui’a India sung’a ding’a covid-19 in atoh khah dehset hohi Maharashtra agom’a active case 1,56,920, adamdoh/migrated 4,37,870 chuleh thina toh 20,687 ahi. Chuleh Tamil Nadu a active case 53,860, adamdoh/migrated 2,89,787 chuleh thina toh 6,007; Andhra Pradesh a active case 85,130, adamdoh/migrated 2,18,311 chuleh 2,820 fatalities; Karnataka a active case 79,798, adamdoh/migrated 1,56,946 chuleh thina toh 4,201 chuleh Delhi a active case 11,068, adamdoh/migrated 1,39,447 chuleh 4,226 fatalities ahi.

Xxxxxxxxxxxx

Nagaland a Covid +ve case thah 25 kimudoh; nikhat sung’a mi 215 damdoh

Kohima, Aug 20 : Nagaland a Covid +ve case thah tuni 25 akimudoh vang in active case sang’a tamjo tuni adamdoh jeh in discharge mi 215 ana kibol tan ahi. Chuleh case thah kimudoh 25 lah’a 15 hi Dimapur akon, 9 hi Kohima akon chuleh khat hi Mon akon ahi. Hetthei khat chu nikho khat sung’a ding’a Covid-19 akon damdoh sang napen jong ahitan ahi.

Hiche toh lhon’a adamdoh mi 215 lah’a 192 hi Dimapur akon , 21 hi Kohima akon chuleh 2 hi Zunheboto akon ahi. Achesa Aug. nisim 6 leh 18 nikho chun Covid-19 akon damdoh agom’a 134 anahitoh lhon’a nikho khat sung’a ding’a adamdoh tamnapen anahi in ahi.

Xxxxxxxxxxxx

Mizoram a Covid +ve case thah 14 kimudohbe; Aizawl khopi sung Aug. 24 chan lockdown kisusaobe

Aizawl, Aug 20 : Mizoram a nidan 24 sung’a trucker 12 jaona’a mi 14 Covid +ve case anamudohbe toh lhon’a agom’a case 874 alhing tan ahi tin Health Department official akon kimu thulhut chun aseiyin ahi. Chuleh tule tun gamsung’a active case 472 um nalah’a security personnel mi 201 (42.58%) alhing in ahi. Tuni’a kimudoh +ve case thah 12 hi Aizawl District akon 2 leh Kolasib District akon 12 ahi tinjong aseibei.

Hiche toh lhon’a Aizawl District sung’a case thah kimudoh mi 2 lah’a khat hi upa kum 51 mi ahin amahi +ve ahi akihetdoh masang’a kon Govt. facility noi’a quarantined um ahitai chuleh khat hi khangthah pasal kum 23 ahin amahi Aizawl a filling station a natong ahi. Alangkhat’a Kolasib District sung’a kimudoh +ve case 12 hi abon’a truck driver ho ngen ahi. Amaho hi Assam leh Meghalaya akon hung lut ngen ahi.

Health Department in aseibe na’a tuni Covid +ve akon damdoh mi 18 lah’a 4 hi Assam Rifle personnel ho ahi in chuleh adang 11 hi BSF jawan ho ahi. Tuni mi 18 adamdoh toh lhon’a gamsung’a tuni chan’a adamdoh mi 402 alhing tan ahi ati.

Hetthei khat chu State Govt. in Covid-19 natna nei ho akon kilahson na aum lou nading’a natoh anei jing utoh lhon’a Aizawl Municipal area sung community spread um lou nading in achesa Sunday nikho akon nikho 4 sung complete lockdown anaphongdoh naban’a August nisim 24 jingkah nidan 4:30 chan ding in asusaobe kit uvin ahi.

Xxxxxxxxxxxx

Meghalaya in State entry point jouse lha sunga hapta masa sung khah ding

Shillong, Aug 20 : Meghalaya Deputy Chief Minister Prestone Tynsong in State entry point jouse lha sunga hapta masa tichu Sept. 1 akon Nov. 1 chan Meghalaya Govt. in kha dinga kilolna ananei chu tunin hetsah na anei in ahi. Chule hiche kibol lona ajeh hi frontline worker checkpoint a duty bol ho suh jangkhai nading ahi ati.

Xxxxxxxxxxxx

Meghalaya covid-19 case thah 126 kimu be

Shillong, Aug 20: Meghalaya in tuni in state sung a tu chan ading a covid case sangpen ding in case thah 126 lam ana mudoh be uvin ahi. Tuni a case thah hop um in state sung a active case 925 apha tan ahi akiti. Health Minister, Alexander Laloo Hek in asei na a tuni  a case thah holah a case 106 chu East Khasi Hills district akon ahi ati. Hiche lah achun armed forces personnel 41 ajao in, muntin a test bolna akon mi 39 ajao in, BSF 16, Ganesh Das Hospital akon staff 5, CRPF  3, central govt health worker khat ahi ati.

Adang ho chu West Garo hills akon BSF 10, milham 2, inn hung kile 6, health worker khat,  West Jaintia a chapang hospital a khat chuleh East Garo Hills a inn hung kile khat ahi. Hek in hetsah na ahin neina a tuni in mi 5 lam in damdoh na ana nei in ahi ati. State sung a damdoh an nei hi mi 735 lam ahitan ahi akiti. State sung a covid natna tamna pen district hi East Khasi Hills ahin tu chan a case 571 lam um ahitan ahi akiti.

State sung a tu channa positive case hi agom a 1,661 ahitan ahi akiti. Covid akon thina toh hi state usng a mi 6 lhing ahitan ahi. Tuni a sample tetst bolding a kisol 45,151 lah in 43,020 ho ch unegative ahi in, 470 nga jing ahi nalai in ahi akiti.

Xxxxxxxxxxxx

ZB lekha thot na a Liangmai mite apangpoi: LNC

IMPHAL, AUG 20:  Achesa August nisim 8 nikho a Zeliangrong Baudi in RN Ravi lekha thot ana nei chung ahin Liangmai mite in tosot na akinei pon, hetpeh na akinei pon ahi tin Liangmai Naga Council (LNC) in tuni in hilchet na ahin nei uvin ahi.

Chaman deina a natoh na akinei le ZB president Athuan Abonmai natoh naho hi mipi ho puikhel na a jah lou ding ahi tin kiloikhomna chun hetsah na ahin nei uvin ahi. Kiloikhomna in ahin sei be na uva Indo-Naga Peace talk toh kisai a RN Ravi in Naga mite chung a natoh na anei ho hi vangset umtah ahi tin hetsah na ahin nei uvin ahi. Hitabang natoh akon a Naga mite kikah a kihet khel tona hung um ahidan jong tahlang na ahung kinei in ahi. Indian govt in hiche kihou na hi ahiding doltah a achal lhah sah a, phate a khumkha na anei ding uvin jong temna ahin nei uvin ahi.

Xxxxxxxxxxxx

Naga Army kiti hi adihpon, PAN joh tiding ahi: GPRN

Imphal, Aug 20: Naga  galgul bol ho in a sepai ho Naga Army atiu hi adihpon, People’s Army of Nagaland joh tiding ahi tin Nikato Pilot Sumi , in charge of MIP, NSCN/GPRN in tuni in hetsah na ahin nei in ahi. Pilot Sumi akon thuso kimu chun asei na a NSCN/GPRN hi achesa 1980-81 a ana kiphut doh ahin, Nagaland Defence Armed force ading a People’s Army of Nagaland (PAN) tia ana kiminvo ahi ati. Article 1, military R&R, NSCN/GPRN akon hetthei chu kiloikohmna sepai ho hi people’s army of Nagaland (PAN) tiding ahi ti muchet na nei thei ahi akiti.  Naga Army tia kiminvo napa hin amin tah pa asu mang kigo in hiche agan nathei pen a kheldoh ding ahi tinjong hetsah na ahung kinei in ahi.

Xxxxxxxxxxxx

Eklavya Model Residential school  Quarantine  Centre Moreh a um mi 66 ho test result negative hi

Tengnoupal, Aug 20: Myanmar gamsung a lei le lampi sem a pang Indian 128 lam jani a gamsung ahung lut utoh lhon in mi 62 ho chu Imphal lam a pohsuh ding in ahung kitol lha in, mi 66 ho chu Moreh CHikim Veng a um Eklavya model residential school Quarantine centre a ana kikoi uvin ahi.  Kh. Gojen Singh, Chief Medical officer ( CMO,)   Tengnoupal District vetsui na noi a Doctor Ahongshangbam Cecil,  District  Nodal officer in sub- district hospital  Moreh akon Doctor 2 le Nurse 3 toh kitho in centre mun a um ho chu Repid Antigen test ana bol na uva negative ahisohkei uvin ahi akiti. Residential school a kikoi ho chu itih le hin pohdoh ding ham ti vang aki he hih lai in ahi.

Xxxxxxxxxx

Compartment a lolhing simlai ho vetnem lou ding ahi: KSA

Imphal, Aug 20(ET): Compartment themvetna lolhing simlai 5329 ho government le private school hon maban sim thei nadia kot ahonpih cheh a vetnem lou ding in Kangleipak Students’ Association (KSA) in tunichun temna aneiyin ahi.

KSA in compartment lolhing simlai ho khonung state government le private school hon gelkhoh a aneilou kumdang bang a achejom le mohvet lou ding tia asei ban tu natna hise lenlai a nu le pa genthei hahsatna hetpih lou a fee sangtah alah u jong vetkol a ngah ding in jong temna anei un ahi.

KSA in pelthei lou thilsoh jeh a banjom theilou simlai admission hol ho kot navah a honpih ding le ihamtia dan kikhel aumjong le mipi het a tahlang ding in jong  temna anei uve.  Chule class 10 le 12 themvetna pang ding simlai ho sum tamtah lut a school phabep in hostel ten ti a aumsah jong boltah lou ding in KSA chun school ho thupeh aneitan ahi.