Biren lamkaina sorkar in ‘majority’ ahiu aphotchenna diuva Floor Test abol angaiyin...

Biren lamkaina sorkar in ‘majority’ ahiu aphotchenna diuva Floor Test abol angaiyin Rajya Sabha result hin majority ahinau avetsah ahipoi tia O Joy sei

41
0
SHARE

Biren lamkaina sorkar in ‘majority’ ahiu aphotchenna diuva Floor Test abol angaiyin Rajya Sabha result hin majority ahinau avetsah ahipoi tia O Joy sei

Imphal,  Jun 21(UNA): NPP MLA 4, BJP MLA 3 chule AITC le Independent MLA khat cheh in Chief Minister N Biren lamkaina coalition government a kon haina anei jouva government ‘majority’ ahi jou tapoi, tin veteran politician Okram Joy in aseiyin chule Biren lamkaina sorkar in ‘majority’ ahina aphotchen nading a ‘floor test’ bol nadinga special assembly session bol dinga thumna aneiyin ahi.

Kakwa a achenna mun a Okram Joy in thuso miho akimupi na a, athah a kisem doh Congress, NPP, AITC le Independent kiloikhomna Secular Progressive Front in sorkar sem dinga aseiya chule Governor in ‘floor test’ abol dinga temna anei nunga jong parliamentary practice dungjuiya Governor in action alah lou hi vangset umtah ahi, tin aseiyin ahi.

Chief Minister N Biren in majority ahi photchenna dinga special house session bol nadinga hangsan tah a Governor henga asei ding ahi. Chief Minister in majority kahi nauva tia agel a ahile floor test bol hi aset na ipi um ham, tin Joy in thudoh aneiyin chule Governor in ipijeh a special house session bol ding hi avaigei sah ham, tin jong thudoh aneiyin ahi.

Tua BJP lamkaina sorkar in dan dihlou ahi, tin Joy in aseiyin, BJP in assembly election a MLA 21 bou aneiya ahivanga 2017 kum a MPP MLA 4, NPF MLA 4, AITC MLA 1 le LJSP MLA 1 chule Independent MLA 1 tosotna a dan dihlouva sorkar asem u ahi. Dan dungjuiya MLA 28 neiya chule party tampen hi a Congress hi sorkar sem dinga kouna apeh diu ahi in, kouna apeh louvu ahi.

Democracy gam a Governor in party tampen (single largest party) hi sorkar sem dinga kouna apeh masat ding, sorkar akisem masanga floor test abol diu ahi. State Governor in hiche dan jouse apalkeh a sorkar asem hi gamsung thusim a dinga melchih thei hi ahi. Political expert hon gamsung a politics umdan avet jing u ahi in, election masanga pre-poll alliance akisem lou vanga BJP in party dang ho tosotna a sorkar asem ahi.

MLA 21 bou neiya BJP sorkar semd inga kouna kipe hi constitution vekol dinga um Governor suhkhelna ahi, ati. Biren lamkaina sorkar hi MLA 9 in haina anei jouva ‘minority’ hiu ahitai, tin aseiyin chule majority ahiu photchenna dinga special house session akou uva, ‘floor test’ bol dinga thumna aneiyin ahi. State adang phabep a floor test hi nidan 24 sunga kibol ahi, ati. Rajya Sabha seat a BJP in goljona anei hin majority ahi avetsah ahi, tia seiya Chief Minister N Biren Singh demna thu O Joy in aseiyin, Chief Minister in parliamentary system hi ahetlou ahi, ati. Rajya Sabha election result hin government majority ahina aphotchen lou ahi in, House in majority aphotchen ahi, tin aseibe in ahi.

 

‘Floor Test’ bol uvin, adang aban ban a umding ahi: Congress

Imphal, June 21(ET): Opposition member phabep in coronavirus pandemic sunga chamna le lungmonna suhboi ding ago e, tia ngohna thu kisei Congress lamkai Khumukcham Joykishan Singh in Sunday nikhon nelkalna aneiyin, BJP lamkaina sorkar le akiloikhompi party hon tu dinmun a boina asem ahi, tin ngohna aneiyin ahi.

Patsoi, Imphal West a Congress lamkaina a opposition party member phabep umna a Joykishan in, BJP hon changa vaihom abol jeh a NPP MLA 4 in sorkar atosot na a kon haina anei ahi, ati. Thangmeiband MLA Joykishan in, BJP lamkaina sorkar in Indian constitution tahsanna aneiya chule mipi adang aban ban a umding, chamna umjeng ding ahitai. Ahivanga amaho hin kichatna aneiyu ahi, tin aseibe in ahi.

Gamsung politics thu a centre a kon lamkai tamtah achom chom a kon achesa ni phabep sunga ahung uve, tia thulhut aum jouva asei ahi. Ajay maken le Gourav Gogoi (Congress), Himanta Biswa Sarma (BJP chule Conrad Sangma (NPP) in igam sungu ahung vil u ahi.

Thulhut dungjuiya, gamsung dinmun velha dinga hung Congress lamkai teni hi Imphal Hotel a quarantine abol uva ahivanga Chief minister advisor khat panna a BJP lamkai hohi quarantine kibol louva ava le sah u ahi. Manipur gam a coronavirus hi community transmission auma ahile ruling BJP sorkar in mopohna abon a akilah ding ahi, tin Congress lamkai pa in aseibe in ahi.

Henglep (ST) AC MLA T Thangzalam Haokip jong hi BJP primary membership a kon haina neiya BJP MLA 3 holah a pang ahi in, party a kile kit dinga kouna einei vang uva saffron party a kakinungle kit loudiu ahi, tin phondohna aneiyin ahi.

 

NPP in BJP lamkaina sorkar tosot adalhah ajeh hilchetna nei

Imphal,  Jun 21(UNA): National People’s Party (NPP) Manipur Unit in N Biren Singh lamkaina BJP sorkar a kon NPP in Covid 19 pandemic sunga haina anei ajeh sagi asei uvin ahi.

Thangminlien Kipgen, President, NPP Manipur Unit in thuso anei na a, ajeh sagi holah a hi Steering Committee aumlou thu jong aseiyin ahi. BJP lamkaina state sorkar hi 2017 kum a political party 5 kipunkhom a kisem ahi. Tuni chan a Biren Singh lamkaina sorkar hin athu a na atoh a chule Coalition partner ho tahsanna achan na dinga avel vel a akisei vanga Steering Committee sem ding nopna aneilou ahi, ati.

Common Minimun Programme umlou ahi, tin ajeh ani channa a aseiyin ahi. March 2017 kum a sorkar akisem a hi, keima party in gamsung khantou nadinga ‘Common Minimum Programme’ sem dinga proposed abol ahi in, ahivanga hiche hi avel vel a akisei nunga jong atah kisolou ahi, ati.

Coalition government kisem hi amin (name) kiphut lou ahi, tin jong aseiyin ahi. Political party jousen ideology le identity anei cheh ahi in, political party nga umna coalition government hi amin kisem peh lou ahi, ati.

Ali channa a sorkar in thulhuhna anei teng coalition partner ho dohna aneilou ahi, ati. BJP lamkaina sorkar 2017 kum a akisem doh jou jouva kon BJP in NPP aumlam chule sorkar kisemna dinga pan natoh ding tahsanna anei le House a Floor test bol dinga apet pet a kouna nei uhen, alah asuhmil ahitai. Gamsunga dinga thulhuhna lentah tah ho asem teng ule BJP in NPP dohna aneilou chule National ahiloule state function ho geiya kouna eipeh louvu ahi, ati.

Nga (5) channa a Ministerial Portfolio Allotment a dohna ahiloule hetsahna ima umlou ahi, ati. Deputy Chief Minister Y Joykumar apanmun a kon lha phabep masanga akilahdoh hi atekahna a aseiyin, hiche hi Manipur thusim a kijih den ding ahi, tin aseiyin ahi.

BJP spokesperson S Rajen Singh in National Food Security Act (NFSA) noiya anchang kihop thu a thuso anei hi ajeh gup channa a aseiyin ahi. Hiche jeh a Deputy CM toh athu a kinel kalna um a, aman jong nan gam ule Ministry a kon Minister 4 umho nabon uva hai uvin, tia chouna thu asei hi dem dinga lomtah ahi. Ahivanga coalition ding gelna a thipbeh a kaum ahi, ati.

Achaina a NPP in Lok Sabha Election 2019 le Rajya Sabha election 2020 thu aseiyin ahi. BJP lamkaina sorkar kiloikhomna a pang kihi ahi in, ahivanga, keiho party hi 2017 Rajya Sabha election, 2019 Lok Sabha election chule tu naicha um 2020 Rajya Sabha election a candidate kilhenna dinga ngaidan le lunggel seikhom dinga kouna eipeh louvu ahi. Tua sorkar kivaipoh dan hi chang vaihomna chule democracy hilou ahi, ati.

Hiche jeh a achunga kisei thu jouse hi kigel khom a party in BJP lamkaina state sorkar tosot tahlou dinga thulhuhna anei ahi, tin NPP President thuso chun aseibe in ahi.

 

Manipur politics boina thu sei dinga Conrad Sangma le Himanta Biswa Sarma gamsung hung lhungta

Imphal, June 21(ET): Manipur Legislative Assembly a NPP MLA 4 in BJP lamkaina sorkar a kon Rajya Sabha election masanga haina anei jouva NPP National Chief le Meghalaya CM Conrad Sangma chule North East India a BJP architect Himanta Biswa Sarma Sunday nikhon Manipur gam a ‘special charter flight’ a ahung lhung in ahi.

Thulhut dungjuiya, lamkai teni hi state unit NPP le BJP kah a boina sulham dinga hung ahi in, ahivanga, official tah a ahung lhon na ajeh hi kisei lou ahi. Tahsan umtah thulhut in asei dungjuiya NPP le BJP lamkai teni hi Imphal airport a sun nidan 11.30 don a hung lhung lhon ahi in, ahung lhun lhon jouva Classic Grande Hotel a che lhon a chule Ministry a kon haina lekha pe a Manipur NPP MLA ho akimupi lhon ahi.

Manipur BJP a kon NPP MLA hon haina anei jeh uva Centre a NPP le BJP kiloikhomna sangtah a atohkhah ahi. NPP hi Centre a BJP lamkaina NDA sorkar toh kiloikhom ahi. Conrad Sangma hi gamsunga NPP le BJP kah a boina sulham dinga hung ahi, tin thulhut in aseiyin ahi.

Conrad Sangma le Himanta Biswa in ani lhon a Chief Minister N Biren Singh chule BJP lamkai dang dang jong akimupi lhonin ahi. Conrad Sangma le Himanta Biswa ahung kholjin hi Chief Minister N Biren Singh lamkaina a politics a boina thu sangtah aumjeh a athu len ahi in, ahung lo na lhon alolhin a ahile Speaker Yumnam Khemchand jong lungdam thei ding ahi.

 

Manipur a Covid-19 case 64 kihetdoh be; natna nei agom a 841 lhing, active case 591 lhingta

Imphal, June 21(ET): Achesa nidan 24 sunga Manipur gam a pasal 35 le numei 29 panna a Covid 19 positive case athah mi 64 akihetdoh be in, hiche lah a mi 43 hi RIMS VRDL a test kibol a chule mi 21 hi JNIMS VRDL a test kibol ahi.

Athah a natna anei kihedoh holah a Chandel district mi 1, Imphal East 2, Imphal West 3, Kakching mi 6, Kamjong district mi 20, Kangpokpi district mi 18, Tamenglong district mi 8 le Thoubal district mi 6 pang ahi. Amaho hi abon uva state dang a kon hung kile ahiuvin, COVID Care Facility a achon tauvin chule angaicha ‘containment’ le contact tracing hojong abol pan tauvin ahi.

Manipur gam a Covid 19 positive case 841 lhing a chule active case 591 lhing ahitai. Sunday nikho a natna a kon damdoh mi 18 hospital a kon discharge abol tauvin ahi. JNIMS Hospital a kijen mi 17 le RIMS hospital a kijen mikhat RT PCR test abol nauva negative ahi jou uva discharge abol u ahitan, hiche toh kilhon a natna a kon damdoh mi 250 lhing a chule recovery rate hi 29.72 percent lhing ahitai.

Koitobang test akibol masanga natna (symptoms) neiya aumle Health Care Facility a apet pet a isolation/observation a koi ding chule sample lah ding ahi. Hitobang pan kila khonunga dinga thil phachom tah hiding ahi.

Hitobang ho a dinga lupna agom a 145 um ahi. Bishnupur, DM a lupna 32, Chandel DM a lupna 10, Churachandpur DM a lupna 22, Jiribam SDH a 10, Kakching CMC a lupna 8, Kamjong CMC a 2, Noney PHC a 2, Parbung CMC a 2, Thoubal DM a 6, Tamenglong DM a 10, Senapati DH a 15, Ukhrul DH a 16, Mao SDM a 6 chule Moreh SDM a lupna 4 kigong ahi.

Social media mangkhel jeh’a mi khat kiman

Imphal, June 21(ET): Tulai social network mangcha them ho ding’a chihna kibe naleh khantou na ahi vang in amangcha them lou ho ding in achung’a gotna sangtah lhung thei ding dinmun ahi tan ahi.

Hitobang chun  Social Networking site Facebook mangcha’a Rajya Sabha MP Leishemba Sanajaoba chung thu dei um lou tah’a post anabol Ningthoukhong Mayai Leikai Ward No.13 akon (L) Kh. Jugeshwor Singh chapa Khwairakpam Keshworjit Singh (36) chu tunin Bishnupur Police hon achung thu kholchil na nei ding in anaman tauvin ahi.

KANGAILUT HENGLEP A/C MIPI TE HENGA HILCHETNA

Imphal, the 21st June, 2020

TUCHUNG IGAMSUNGU MANIPUR A BJP-LED GOVERNMENT SUHLHUH NADING A KEIMA T THANGZALAM HAOKIP, HENGLEP MLA IN PAN KALA NAHO AJIEH HENGLEP ASSEMBLY CONSTITUENCY HONGSUNGA CHENG SOPI ULEH NAU HO (- THADOU, GANGTE, VAIPHEI, KOM, RONGMEI/ KABUI, CHIRU, AIMOL, CHULE KOIJOUSE) AMASAN NABONCHAUVIN KAJA NA SALAAM KAHIN BOL E. AJIEH HO CHU ANOIYA HOHI AHI.

  1. HENGLEP LAMPI (THINGKEU-HENGLEP ROAD JONG KITI) SIEMLO CHUNG THU A (EST. COST RS.157 CRORES)HENGLEP MIPI EIJOU LHEP;
  2. RAIN WATER HARVESTING PROJECT AT KHOIRENTAK KHUMAN VILLAGE (ESTIMATE COST RS.2.5 CRORES) CHINGAI A/C, UKHRUL DISTRICT A NAGA TE LUNG HOLNA A ACHONDOH;
  3. KUKI CHATE HAHSAT NAHO IMACHA A AGELLOU CHULEH NOISE TAH A AKOI;

1 -HENGLEP LAMPI (TICHU S.KHOLIAN APAT HENGLEP JOTNA), ASAUDAN 31.5 KMS. SIEMDINGA AKITEP A HENGLEP GAMSUNGA CHENG MIPI EIJOU LHEP:

KUM 2017 MARCH LHA A HENGLEP A/C GAMSUNG A CHENG SOPI ULE NAU IN NEIDEISA JAL ULEH NEI NGAILUT JAL UVA LHENDOH A KAUM JOUVIN ASSEMBLY SESSION AMASAPEN PEN IN ZERO HOUR A KADING DOH IN HENGLEP LAMLEN KUM TAMTAH PI SIEMCHAI LOU A UMA AGAM MIPI AGENTHEI THULEH AHAHSAT THU KANA SEI E. HICHE TOH KILHON IN AGAMSUNG A NATGUOL (EPIDEMIC) AHUNG UM TAN AHILEH ANIVEI CHANNA IN NINI JOU IN ASSEMBLY FLOOR SUNG IN ZERO HOUR MAMA IN KANA SEIPHA KIT IN AHI. AHINLA ZERO HOUR A THU KISEI HOCHU ADAN DUNGJUI IN DONBUT NA AUM THEIPOI. AJING NIKHO IN HENGLEP GAMKAI A NATGUOL THU TOH ALAMPI HAHSAT DAN HO IMPHAL A NEWSPAPER ATAMJON AHIN SO TAUVIN AHILEH VANGPHAT UMTAH IN SUGNU A/C APAT HUNGKAIDOH CONGRESS MLA, HON’BLE PU K.RANJIT SINGH IN CALLING ATTENTION MOTION ABOL IN AHI. HICHE JOU HIN HON’BLE MLA AND LEADER OF THE OPPOSITION, PU O.IBOBI SINGH(EX-CM) IN 45 MINUTES ZEN THU ASEI IN HITIHIN ANASEIE ‘AMA TERM 3 SUNG (15 YRS) ZEN CM AHISUNGA HENGLEP LAMPI ANASIEM LOU PHAMO ASAH DAN THU ASEI IN CHUBAN IN KAKOMA JONG AKIPHATLAM THU VEINI ZEN ANASEI IN AHI. AMAN ASEI BELAP NA AH “CM TERM 3 KAHISUNG IN KOIMACHA KHAT BEH IN HENGLEP LAMLEN THU ASEIKHA POI ATI, KOITOBANG “AMO POKHAT” IN TUNI PHAT A SOPI HON’BLE HENGLEP MLA T T HAOKIP IN ASEIBANG HIN ANASEI HENLANG, EINA PHUT LEH IBOL A KASEMLOU DING HAM?” ANATIN AHI. CHUJOU IN HON’BLE CM PU N.BIREN SINGH AHUNG DINGDOH IN “CONGRESS GOVT. IN TERM 3 AVAIPOH SUNG UVIN ANASEM TAHIU JONGLEH KEIMAN KASEM DING AHI ANATIN AHI”. HICHE THU HI SEPTEMBER 13, 2017 NI IN CHURACHANDPUR A PU N.BIREN SINGH, HON’BLE CM, CCPUR MIPI TEN RECEPTION ANABOLNIU CHUN MIPI 10,000 MASANG A ANASEI PHA KIT IN HENGLEP LAMLEN SEMNA DING IN RS.58 CRORE PACKAGE KAPIEH DING AHITIN ANA PUONG IN AHI. HICHE PET TAH CHUN AHUNG KIKHOM MIPI JOUSE PAUCHUOM CHUOM CHET THO HIJONG LEU AKIPAH SUO KEIJUN KHUT HABET BET IN ANABENG UN AHI, AJEH CHU HENGLEP GAMKAI A CHENG KUKI CHATE IHAHSAT NAU LEH IHESOH NAO LEH IGENTHEI NAO CCPUR DISTRICT SUNGA UM KOIJOUSEN EIHETPI SUOKEI U AHI. KEIJONG HENGLEP MIPI TE AKON IN SEIPHAT KANA CHANG IN ABIEL MIPI JONG ANA KIPA LHEH JENG UN AHI.

HICHE TOH KILHON IN NITHUM VEL JOU IN PWD OFFICE, IMPHAL A EINA KOU UVIN KAKIHOULIM NAUVAH KENJONG ALAMPI SEMDI DAN KADEIBANG TAH CHU KANASEITAN AHI LEH CALCUTTA AKON IN COMPANY LENTA KHAT ANAKOU UVIN, ALAMPI CHU KEIMATAH ZAUNA IN SURVEY ANA BOLTAUVIN AHI. LHA THUM JOU VIN DPR (DETAILED PROJECT REPORT) ACHAI UVIN A ESTIMATED COST AHILEH RS.157 CRORE VALZEP AHI. HICHE DPR CHU NEC (SHILLONG) LEH DONER (NEW DELHI) AATHOT UVIN AHILEH APPROVE AHINBOL TAUVIN AHI. HICHE LAMPI MINCHU “HENGLEP-THINGKEU ROAD 31.5 KMS.” AKITIN AHI. P.W.D. CHIEF ENGINEER IN ASEIDAN IN HICHE LAMPI CHU APRIL, 2018 APAT KISEM PAN DING AHI ANATIN AHI. AHINLA VANGSET UMTA CHU AHILEHUKHRUL LANG MI HO LUNG HOLNA IN KAHET LOUKA IN HICHE FUND (SUM) CHU “KAMJONG TO KONGKAN THANA” KITI LAMPI KHAT (UKHRUL/KAMJONG DISTRICT SUNG A UM) DING IN ANA HEIDO (DIVERT) TAN AHI. HICHE THU HI KAHETDOH PHAT IN AKOMA KANA CHE IN KALUNG DAMLO THU KAGA HETSA IN AHI. HINLA AMACHUN “NA HENGLEP LAMPI CHU NEC LEH DONER IN APPROVE ABOLSAU AHIN KISEM THOU THOU DI AHI” EINATI PE IN AHI. VEI TAMPI PWD OFFICE KANACHE A, NEC SHILLONG A JONG LEH DONER NEW DELHI A KANACHE IN, HINLA THIL UMDAN KAKHOLCHIL JOUVIN  MAY, 2019 IN N.BIREN SINGH CM AHI NA APATNA LAHDO NADING IN KA MLA CHANPI MI 13 HOTOH (MINISTER 3 HO PUMA) DELHI LAMA CAMP KANABOL PANTAUVIN AHI, AHINLA MINISTER 3 HO AKI RESIGN NOMLOU JEH UN KANA LOSAM TAUVE.

2 – RAINWATER HARVESTING PROJECT AT KHOIRENTAK KHUMAN VILLAGE UKHRUL DISTT.A ACHONDOH:

HICHE PROJECT HI CONGRESS GOVT. PHAT LAIYA ANAGUON U AHI CHULEH CENTRAL GOVT. FUNDING AHI. MANIPUR GAMSUNG A DINGA MUNLI IDENTIFY ABOLNAUVA CHURACHANDPUR A/C LEH HENGLEP A/C JONG HUNG JAUKHA AHI. BJP GOVT. AKISIEM JOU JOUVA KANABOIPI AHIN, HINLA ADANG MUNTHUM HO ACHAIJOU KEI UVA JONG HENGLEP A/C A PA HI A SUM AUM NAIPOI TIA EINA LHEP AHI. D.O.LETTER VEILI SANG KANA SUT A U.O.NOTE JONG VEINI ZEN KANASUT AHI. VEIKHAT CHU MINOR IRRIGATION A CHIEF ENGINEER PA, BROJEN SINGH AKOUVA KAMASANG TAH A HICHE ‘RAINWATER HARVESTING NA HI PU T.T.HAOKIP ANAPETAN ATI A KA U.O.NOTE A JONG “PROCESS” TIA ANASUT SA AHITAI. HINLA NILI VEL JOUVIN M.I.CHIEF ENGINEER PA IN PHONE EIHIN BOL IN “HICHE KHOIRENTAK A RAINWATER HARVESTING” HI CHINGAI A/C, UKHRUL DISTRICT A AKICHUON DOHTAI AHIN TIN AHI. HON’BLE CM IN EICHONSAH AHI ANATI. KALUNG AHANG BEHSET IN CM PA KANA KINA PIN AHI. AHIVANG IN PHAT KHAT LEH HUNG HITHEI DING AHI TIN EINA LHEP GUON AHI.

3 – KUKITE IMACHA A IGEL LOU ULEH IJALOU DAN U CHU NINGKUM LAIYA “CENTENARY CELEBRATION OF ANGLO-KUKI WAR” KUKI CHATEN INA MAN NAU TOH KISAI A SAIKUL A/C SUNGA UM AISAN VILLAGE A LUMSONG KIPHUT DING LAI MI KOIHAMKHAT HON COMPLAINT ABOL MANZEN UVA EINA SUHCHATVAI PEH U AHI. KUKI INNPI MANIPUR LAMKAIHO LEH KUKI MINISTER 2 LHEPLHAH NAN HICHE NIKHO – KUKI TEN BRITISH TE ANADOU NAU NIKHO CHU “RESTRICTED HOLIDAY” TIA MANIPUR GAZETTE LEH CALENDAR A KISUN DING AHI TIN JONG ANASEI IN AHI. HINLA ABOLDE POI. KUKITE FUNCTION KHAT A CHIEF GUEST A AKIKOU JONGLEH SUM TUONUOM LOU ATUO SUN SUN JONGLEH RS. 1 LAKH VAL TUO KHALOU AHI. ALANGKHAT LAMA UKHRUL A SHIROI FESTIVAL DING AHILEH KUMSEH A RS.7 – 8 CRORE ATUONGAP CHAT JING AHI. KHOUSABUNG A PINEAPPLE FESTIVAL AKIBOL JI PHAT JONGLEH RS.50,000/- VAL ATUO KHA PUON AHI. ANDRO PINEAPPLE FESTIVAL ADINGA KUMSIEH LEH RS.50 LAKH – RS. 1 CRORE CHANG A SANCTION JI AHI.

TUCHUNG CHASSAD KHUO KIHAL LHA NACHUNG THU AJONG APAN LAHDAN KALUNG ALHAI PUOI. THADOU PAO THOLOU KHUO KHAT ANA HITAMA LEH APAN LADING DAN CHU KAMIT LHAN KAMU MASAN AHI.

AKICHAI NADING A KASEI NOM AHI LEH, TUCHUNG KATHIL BOL HI KABIEL MIPI TE LEH EINGAILU CHENGHON NEI OIMO DIU LEH NEI IPLEL DIU KATAHSAN E. NANGHO HETPI LOUVA GAMSUNG’A DING’A THILPHA KAPOHLUT TAMTAH AUM IN, HINLAH CM BIREN IN GELKHOHNA IMA ANA NEIPOI CHULE AMA GOVT A IUMLAI SEUVA INAMPIU LEH IGAMSUNG DIUVA APHACHOM DING KAMUDOH TAPOI. KEIHI MLA DEILOU KAHIPON MLA KHAT TOHDING DOL INAMPI LE GAMSUNG’A DING’A TOHJOH KAGOT AHI, KATHIL GUON LEH KAKAL SUON PATHEN PHATSAH AHILEH KABIEL MITE DINGA THILPHA SUOH INTE TI KATAHSAN IN AHI. SOPI ULEH NAU CHULEH EI NGAILU JOUSEN IPAU PA PATHEN KOMA TANGLOUV A NEINA TAOPEH JING DIUVIN KAHIN TEM UVE.

KEIMA NA SOPIU

T THANGZALAM HAOKIP