Bill thah kipomlou ding ahi: KIM leh MTFD

Bill thah kipomlou ding ahi: KIM leh MTFD

214
0
SHARE

Imphal, Aug. 23 (ET): Tuni Kuki Inn Imphal’a Kuki Inpi makaina in District level’a Kuki Inpi ho, Haosa ho, CSO ho, politician ho cheng toh Meilhei ten New Draft Bill asemna’u chungchan thu’ah lunggel seikhomna aneijun ahi.
Hiche toh lhon’in akikhom lamkai ho’a kon ngaidan chom chom tichu tuchung New Draft Bill thu hi donbut na pehlou ding tin anasei uvin, KIM in bill thaht akipom pon ahi tin asei uve. Chujong leh Kuki Inpi Committee akilhengdoh cheng in aganna thei pen’a ahin vetchil diuvin jong seikhomna anei uve.

Manipur Tribals’ Forum, Delhi (MTFD) in Monday ni’a chu gampam miho Manipur a lutna ding vetchilna ding’a kisem bill thah hi tumasang’a kisem ho toh akibahlouna umlou ahi tin ana sei’e. Chuleh bill lui ho jong President in ana sanpehlou ahi’n, tuchung’a athahbeh’a kisemdoh bill jong hi “Savun peng thah sung’a Ju Lui kikoi” tobang ahibouve tin asei in ahi.

“Manipur Regulation of Non-local People Bill, 2016” ti’a kiminvo bill thah hi anti-tribal lungput nei’a kisem ahi. Chuleh Churachandpur’a thiluong kuo kijam ho thu kiseilham nailouva bill thah kisemdoh hi thinglhang mite kinoi sena keu hilouvin Constitution of India Article 332 toh jong kikal ahi tin MTFD in asei’e.

MTFD in aseibena’a chun JAC-ATB in boina suhlhapna ding leh Churachandpur’a kijam thiluon ko ho jana neitah’a vuidoh ahina ding’a sorkar heng’a ngehna ananei ahi’n, hitolhon’a thiluong kuo ho vuidoh nading a condition phabep jong anasem ahi. Sorkar in hiche thu ho suhlhap na ding leh thiluong kuo ho vuidohna ding’a kisem condition ho asuhbulhit masat ding chuleh muona neiho guotna apeh masat ding’a lomtah ahi tin MTFD thulhut chun asei’e.

Alangkhat’a, Manipur sorkar in thinglhang mite boina ho sulham louva bill thah apohdohna chungthu’a Naga Political Leaders’ Forum Manipur (NPLFM) in alungkimlouna aphongdoh in ahi. Chuleh Dy.CM Gaikhangam in anti-tribal bills ho akiladoh tai ti’a mipi lah’a aseidoh jing hi vangset umtah ahi tin NPLM in asei’e. Mipi jouse hopding leh phatchomna ding’a kisem Bill ho hi mipi’n jong atahsan’a kipahtah’a asan ding ahi ahinleh thinglhang mi kuo ho kithana chungthu aki suhtheng loulai se’a thilkibol ho hi gasoh lou ding ahi tin Forum Secretary in asei in ahi.