Bihar a kon numei hoto party bol (Milun ho umchan kivelhi...

Bihar a kon numei hoto party bol (Milun ho umchan kivelhi keu)

212
0
SHARE

Bihar a kon numei hoto party bol

(Milun ho umchan kivelhi keu)

                                 Bihar a kon MLA phabep Manipur  a ‘Study tour’ a ahung naova Moreh-Tamu lang aga phah uchu bazar kai maimai leh gamgi lang gave maimaija gacheu hileh ‘boina’ jat khat umloudi ahin tua Tamu lang’a numei hoto party abol uva alaamkhom u lim (video) kithejal thu hi thilse leh umchan hoilou  thupitah in National TV News Channel ho gei ah choh jejun akiseilo jeng’e. Hiche a numei hoto kikoija laamkhom Bihar MLA kiti hohi MLA hilouva MLA nungjui hojoh ahiuve tia ngoh a um MLA khat nin suhthengna aneije. MLA-pa chun anungjui, worker hoto hungkhom ahiuvin ‘birthday party’ khat kanei diu ahi atiuva ana potdoh u ahiuvin hoilaija koito alaamkhom u kahepoi ti hi ahi. Bihar lang’a hiche thu kithan hin Bihar gam le mipite jouse gei asuminse e tia anungjui kipui MLA-pa themmo nasatah achan uve. Nungah hoto laamkhom, party bolkhom chu thuchuom ahitan, ipi jeh a MLA hon official study tour a anungjui midang akipuileu ham ti hi ngoh a um MLApu themmo chanlo um nalai ahi. Hiche hi mipi’n hahsatah a govt kom’a Tax apeh sum ho ahilou lam’a kisuhmangna ahi tia seiloi um ahi. Manipur a pansa political party NEIDP hon Indian sunglang’a kon kol le vai ho Manipur a ahung uva Moreh lang’a numei hoto party ahungbolpan uhi India govt nin ‘Act East Policy’ tohgon anei aga hoilou lamtah ahi atiuve. India sung lang’a kon milun ho Manipur a ahung uleh Moreh gaphah teidi ti hi India leh Myanmar gamgia khopi khat ahiban’a South East Asia gam hoa hung “Moreh thil” kiti jatjat ho manbai tah a kichoh thei ahijeh jong ahi. Ahin tu mapan louva hitobang numei hoto party bolkhom’a donkhom laamkhom ho akiseipatleh ichan hamkhat geisa jong himaithei ahi. Thailand lang’a numei kijoh ho lah a gaki huilha kiti hi India keu hilouva vannoi gamdang dang’a kon mi kitol tol jeng ahi. Ajeh chu Thailand a numei kijoh kiti hi govt daan in aphal, gamsung sum muna phatah khatna jong anei u ahi. Tamu lang jong Thailand lang bang’a “kihuilhana” munpi khat hung hileh Manipur jong aphalou lang’a ahintoh khah di ahi ti hi Act East Policy phatah a ahung kichepi’a Jiribam le Moreh kikah Rail/Train ahung lhunleh acham’a lha hung hidiham tia kihollel loi um ahi.

                    Milun, mipi lamkai MLA, Minister hohi aumchan u, anatoh u, athusei u, itobang’a kisa uvam ti hi avelhi keu loi tam ahi. Alamkhatna seidin mipi lhendoh lamkai MLA hohi anopnop in um u henlang anopnop utoh lamkhom jongleu mipi dia atohdiudol akitoh pou uleh athu thu u hi, khohlou ahi. Mipi vetjui thei ahijeh uva apha-pha a aumdiu dol ahi ti jong ahikitne. Hiche Bihar MLA ho nung hinjui hoto numei ho judonkhom laamkhom hi kon hoija kon lim analhah a thuso miho kom’a anapeh khohten ham ti hi ahi. Tulai Mobile phone khang ahitah jeh in mijouse hi koima sollouva (self style) adon adon’a Cameraman leh journalist higamji ahitah jeh a thuguh kisei, aguh a kibol kiti umthei talou ahi. Hiche “laamkhomna” video a kon milun dang dang hon kichih theina’a ahinnei diu ahi. Mipi hojong khantou machalna di thusoh ho sang’a hitobang aphachomlou di laamkhomna hoto bang thu asimnom kit ahi.