BANGZIEK A THINGTANG CHIET CHIET KIBANG LO?

BANGZIEK A THINGTANG CHIET CHIET KIBANG LO?

380
0
SHARE

I gam  Manipur I vak et leh, gam nuom mah mah a hi. Stadium of India ahi, aziek chuh alailak hi phaicham ahi a, aning kimvel thing tang ahi. Zie tawbang gam hi country dang ale um khel dingin gin chak aum puoi. Pathien in athawn a ei piek u gam chu ahi. Amah vang akhawvel sa(hot) mawng mawng ahi tam ahih loh leh ei haw le I haw ki bawl ihi tau em? I gam u hi a sa mah mah tan. Tukum sung chu sa kasa sam puoi ti  I um dingum? Umlo maithei ihiu hi. Ale bang zieka khuti sat ei tam?
India sunga thingtang gam dang te minthang mah mah haw vak gen taleng, Ooty, Shimla, Nainital, Ranikhet, Almora, Shillong, Kohima leh Aizawl te hi le thingtang mah mah gam ahiu hi. Amah vang amau gam hi adap(cold) nalai mah mah hi. Shimla, Nainital, Ranikhet vel achun vuuk (snowfall) le a um sek nalai ahi. Kohima, Shillong, Aizawl te chu vuuk kielo mah leh, ei gam taw teh in a gam uh a vawt nalai mah mah hi. Ale thingtang chiet chiet, Himalaya tang dung khat zui khawm chiet chiet bang zieka temperature kibang thei lo ahi die maw? Amau mi te pilvang ah idem aleh government kisuuk ziek ahi dem?
“THE CHIPKO MOVEMENT”(eipau in “kawlhchak” English a “Cling” Kiti kha Uttarakhand apata kipan ahi. Bang tawbang movement ahim itih leh, Sunderlal lawi upat na a, thing kiti mawng mawng, insak na ding hi henla, furniture ding hi henla, mei a tih ding hilele phal loh ding tihna ahi. Timber businessman te’n asaat guot phat ule, mipi ten athing pen chu a kawlhchak mai sek u le saat thei sek lo ahiu hi. Tichun Thing saat mawng mawng khap ahung hi ta ahi. Zie haw ziek akhun amau gam khu avawt dieka, vuuk le akie zel sek ahi. Chun a gam ua boruok le a thientho a a nuom mah mah mai ahi.
Ei thingtang mi chu thingtang lo bawl lo thei lo I hi puoi, I nek hawl na pen ahih ziek in. Inkuon thum vel in tang lien tak khat chu I vaat un I haal sek u ahi. Ale inkuon siing (above 10000) val vel chun, tang bang zat I haal tum ding um leh? Thing le guo(bamboo) bang zat I saat(cut) tha ding um leh? Ale lo dinga I vaat u chu  ahi ding mawng in kawih ta leng un, business ding mawng mawng in Thing bang zaat, mau bangzat I saat tha dingum le? Thingtang lo bawl na dinga thing le mau ki saat tha pen kha business purpose a dinga pai theih loh ahi dem? Midang gam achun furniture leh thil chuom chuom a mat ding haw khu plantation a bawl chuom bik ui. E.g teak plantation, cedar plantation, bamboo plantation etc. etc. zie chun thing dang plantation lo him him chu akhawih lo mai ui.
Ei thingtang mi’n le, thing le guo bei a khawsa theilo ihih ngal u chun, plantation chuombiik ki nei hen la, gam haw va haal tum khel khel ding le thing phuuk a ngai khel khel puoi. Agamlak mah akhun thing no tam tak tuh khawm mai leng, khuti leh, thing dang ki khawih kha puon tin, mau umsa le ki saat tha puon tin, I gam u huih hung thieng intin, temperature le adap zawk loh lele zie sang ahin sa zaw kit lo dingin kaging cha ahi.
I THIL BAWL TE UH VEL ET KIT HITIU:
1.    Thing le mau business hah chawihsa’n taluo.
2.    Jhum cultivation(thingtang lo) bawl na a thing le mau te matdan I het loh uh.
3.    Duh am tak luotna ziek.
4.    Plantation bawl loh ziek leh thing no phuhding ngaituoh loh ziek.
5.    Thil pha cheng midang in bawl u hen, thilpha lo a tun lele midang mawh chansak ziek.
I duh am tak luot na ziek un, I tu a chateu a ding bang mah siitsak I nei puou hi. Tua hi I muh I neih cheng u I mat u chun, dan le khangthak te le khang hungum zelte’n bang a neding um bang tin ahing ding um? Kiel le dangchak hun thuok ding ahiu hi. Guoh la zu ta puon tin, nek ding hung ki tasam tei tei ding. I gam la hung sa deuh deuh ding, natna chi tamtak zen damsen loh hung pawt ding ahi.
Zie ziek chun, tua khang te hi ki gel phai ting un, ngaituohna dik leh,thil dik/pha bawl zaw lengun, ei haw gam hi hung hawih ding ahi.

– Jom Gangte