Bandh kikoujia kiladohpai ji

Bandh kikoujia kiladohpai ji

186
0
SHARE

  Anom-nom’in bandh boltheina gam ahijeh in bandh koudi jong akivatpon hinlah bandh kikouva kibolpan loulaiya kiladohpai (kivohai) kiti jong adimset kit’in mipi lungnohphahna (confusion) bep ahiji-e. Mipi di gelna’a bandh kikou ahi tia mipi di gelna mama’a bandh kiladoh (kiboltalou) ahitai ti thuphuon jong adimsetji tai. Bandh ikou ngal leh bollhah tei-tei di tina ahipon, mipi hahsat di gelna’a akichejomda jong leh thil phatah ahithouve. Ahin geltoh chet masatna umlolu bang’a hetman louva bandh kikouva kichepi loi, bandh nikho le phaat kisuchomloi, kisuhai loi hi newspaper office ho lunggimna leh kisuhboina khat ahi. Bandh kou jousen seileh koima changtum phatchomna dia bandh kikou ahipoi atisohkei diu ahi. Ahin bandh kikou jouse mipi pumpidi gelna leh phatchomnadi ahidi jong tahsan aumpoi. Ipi chu hileh bandh chu koulou, bollou ahaimoleh nikhat nini masang’a akikoulona jeh jong phatah-a phon masatna, akhohleh mipi lungset le tosot channa thei ngehna thuphon tojong boltha’a phadi dan ahi. Thilse khat asoteng kin-le-bong’a (apet pet a) bandh kikouva khucheng’a kibol’a kahlah-a chele vahle ho kiginman louva kilha’a kisuboi kiti hi bandh bolhon bolthei uhen boljou nama jongleu thildih ahiloudan het phaat ahitai. Bandh bol hi atam behseh jeh-a govt injong hole jong atilou ahitai ti hi mimolpen injong kimoh houlimna’a asei khat ahitai. Bandh akikouva gari kilhaisahlouna (bandh kiha bolna) mun hoa mipi chele vahle hodia bou boina hiji, govt la a-ipi hutlou kiti jong thudih ahina sot ahitai.
  Outer Manipur Tribals’ Forum (OMTF) leh JAC-AATB hon achesa 28 August nikho’a kihouna ananei nauva chu September 1 jankim apat ni 4 (sept 5 gei) Manipur thinglhang gam jouse’a bandh boldia anaphon uchu boltahlou din aseitaove. Hiche hi September 2 nikho leh Manipur Regulation of Non-Locals (MRNL) Bill 2016 kiti Manipur Assembly toukhomna’a pohdoh-a ‘pass’ boldi tia thuso ana umkhah jeh-a hiche thua lunglhailouna vetsahna ahi. Ahin hiche MRNL Bill hi Assembly a kipodoh taloudi ahi tin govt akon thuphon ahung umtah jeh-a ni 4 thinglhang gam bandh hi kiladoh ahi. Ipi jeh-a hiche MRNL Bill hi Assembly a kipodohlou di ahitai hung kitiham ti chu thuchuom ahitan hinlah hiche thua bandh boldi kiti hi nikho phabep masang’a kiphong, boltahlou di ti jong anikho hunglhun masang’a kiphong ahijeh in akichiehna khat um ahi. Chuleh OMTF leh JAC-AATB ho thilbol le natoh (politics) hin ipi lampang adoi hitajongleh thinglhangmi hodia thusei le natong’a akisei jeh un bandh boldi ana tinauva Manipur bandh tilouva “thinglhangmi ho chenna gam’a bandh” atiu chu dih ahi. “Manipur bandh” kouva district khat jong bandh lou tam ahi.