Bandh deilou vetsahna thusei le thilbol kipan

Bandh deilou vetsahna thusei le thilbol kipan

245
0
SHARE

  Bandh kiboljing chunga lunglhailou vetsahna natoh hinbol hi adondon ah ahung umsausautan anukhahpen’a hi Progressive Manipur kiti phaicham miho kiloikhomna khat ahi. Hiche Progressive Manipur hohin ahunglhung ding October 2 nikho leh bandh deilouna’a kijotna aneidiuvin thuphon abol uve. Hiche nikho khel-khel alhennau hi Mahatma Gandhi penni ahijeh ahi. Mahatma Gandhi chu mipi kiphinna lamkai khat anahie. Ahin ama kiphinna chu India mipi te chamlhatna dileh thildihlou behseh kibol ho chung’a noplouna jeh ahi. Kiphinna ijat anabol vang’a thisan sona leh thil le lo suhsetna ho, mei hal ho anabollou, toumun kiphin, an-ngol kiphin, mipi kijotna ho analamkai ahi. Ahileh tua Progressive Manipur hohin Gandhi penni’a khel khel’a bandh deilou vetsahna’a kijotna abolgot uhi kiphinna iboljongleh Gamdhi in anachepi kiphindan ho kijuihen atina ham, ahilouleh Gandhi jana leh geldohna tokop, politics lutna’a kibolham jong akihepoi. Ahin hitobang natoh, bandh deilou jeh a thusei le thilbol hi mipi akon’a hung umpanpan ahitan abanban’a ahung machaldi jong ginchat umtah ahi. Tu masang jep jong chun Thoubal lang’ah simlai kiloikhomna DESAM hon bandh deilou vetsahna’n kijotna ananei uve. Chomkhat jouvin All Manipur Bar Association (AMBA) kiti Lawyers (Ukil) ho kiloikhomna injong bandh kiboljing deilou vetsahnan kijotna ananei uve. Student kiloikhomna lahlah a bandh kiti deilouna thu sei jing hi DESAM ahi. Kum phabep masang chun phaigam thingnoi KYKL honjong bandh hi anakhah un hinlah akhoh cheh bep e ti thei ahi. Tua hi mipi a kipatna bandh deilouna thu ahung kihaseiya mipi mongmong in bandh hi ahin pum theida’a boljong abolda leh alampi phapen hung hididan’a um ahitai. Manipur mipi pumpi tongkha thei thildihlou thu le la a vang Manipur bandh kiti jongleh thu khat hidi ahi. Tua hi anomnom in phulou helouva bandh abolpa hi mijouse theidapen chu ahi. Hiche jeh a hi bandh akitileh koiman hole jong atitahlou, koiho bandh bolham tia ami le amun avet uva pelthei ahileh apel jeng u ahitai. Govt in tahte atileh bandh bol’a lamlen a meihal a gari che ho kiting hi hunam (force) a anocheh thei ahi. Chuche sang’a khohjo, bandh bol lamkai ho matdi tia ahol leh koima a-inn alou dalha-a sot tah kiseldi umlou di ahi. Ahin govt injong bandh bolho chung’a khucheng’a natoh aneinomlouna jong hi govt mama jeh a bandh kibol ahikitji jeh hidi ahi.

  Gandhi kiphinna boldan holah a toumun kiphinna leh an-ngol kiphinna, mipi kijotna hohi govt tahbah injong gelkhohna aneipeh jilou jeh-a gari lhaisahlouna bandh kihabol ahi. Hijeh a chu bandh bol deilouna’a pan la hohi thilpha tah bol ahivang uva mipi tosotna chandi atiuleh ipi jeh a mipi hon adondon’a nop phat-phat uleh bandh akou uva aboljiuham ti jong asuhlhapna (solution) lamjong avetdiu ngai ahi. Progressive Manipur hon Bandh, Blockade, Curfew hon mipi mama ichan atohkhah-a sum le pai lang’a manna asodoh ham tia mipi hildi atiu hi mi hetsa ahijeh in bandh umlouna dia govt lang joh hin itobang natoh aneidiham ti joh haseileu dihthei din aum’e. Ipi hileh mipi atamjon bandh vang hi achimchah ahitai.