Babysana thi thu’a kisemdoh JAC in nidan 24 bandh abol jeh a...

Babysana thi thu’a kisemdoh JAC in nidan 24 bandh abol jeh a niseh kimanchah boi; Sorkar in Standard Robarth authority ho amat dinga AMSU in thumna nei, thu kholna suboiya simlai kiloikhomna koi ahi PWG in aseidoh dinga Joykishan in sei

154
0
SHARE

Babysana thi thu’a kisemdoh JAC in nidan 24 bandh abol jeh a niseh kimanchah boi; Sorkar in Standard Robarth authority ho amat dinga AMSU in thumna nei

Imphal, July 24(ET): Babysana thi thu a kisemdoh JAC in nidan 24 Manipur bandh akou jeh a Imphal khopi a niseh kimanchah sangtah in aboiyin ahi.

Babysana hi aumna Standard Robarth School Canchipur hostel a athisa kimudoh ahi. JAC in abol nidan 24 bandh hi AMSU chule kiloikhomna dang dang in atosot ahi’in, bandh sunga Khwairamband bazaar, Paona bazaar, Thangal bazaar akikhah in, lamlen a lhai gari jong nidang a toh tekah dinga alhom in, chule bank, private office, school leh college ho akikhah soh in ahi. Government office a che jong lhomcha bou ahi.

Thangmeiband a bandh toson ho lamlen a akikhom uvin, gari lhai ho alamtin uvin ahi. JAC in Ningthoujam Babysana thi thu phatah a kholna aum dinga thumna anei ahi. Education Minister Th Radheshyam in janni a simlai nu thi thu toh kisaiya ginmo mi 2 akiman’e, tia asei ahi’in, akiman teni hi koi ahi JAC in aphondoh diuva thumna aneiya chule gangtah a achungthu tanna anei diuva thumna aneiyu ahi.

Tu masang a simlai kiloikhom SSUM in simlai nu thi jeh a lunghan vetsahna a school akha u ahi’in, ahivang a Manipur State Human Rights Commission (MHRC) in simlai nu thi thu a Suo Motto case bol sang a school kikha adeilou nau thu simlai ho henga aseiyu ahi. Deilou thilsoh aumlou natei ding’in police hon muntin avengbit uvin ahi.

All Manipur Students’ Union (AMSU) in Babysana thi thu toh kisaiya Standard Robarth School authority ho amat diuvin thumna anei uvin ahi.

“Principal Pheiroijam Landhoni Devi, Coordinator Pheiroijam Romita Devi, Administrator Ibotomba, Head Warden Kamei Ileen leh Dormitory warden Nongmaithem Jinnty hi nidan 12 sunga ‘booked’ bol a chule thudohna neiding ahi”, tin AMSU President Peter Laishram in thuso miho AMSU Headquarter mun a akimupi na a aseiyin ahi. Case a pan la a school teacher adang dang ho min jong AMSU in anei ahi’in, amin u ol a aphondoh ding ahi, ati.

AMSU in Ima Khunthoknganbi Shanglen a um Standard Robarth boarding a um simlai ho nu-le-pa te toh July 25 nidan 11 teng kihouna neiding a meeting akou ahi’in, nu-le-pa te meeting a apan diuvin temna aneiyun chule meeting a pang lou ho thusei kila louding ahi, tin asei uvin ahi. JAC in Babysana thi thu a kisemdoh JAC in bandh akou atosot diuvin simlai kiloikhom hon ngehna aneibe uvin ahi. Class VII simlai Babysana hi aumna hostel room a athisa kimudoh ahi’in, school authority hon ama-le-ama kithat ahi, tia aseiyu ahi.

“Bandh hi thutah kholdoh nadinga pan kilahna ahi”, tin Peter in aseiyin chule sorkar in thutah akholdoh louleh AMSU in kiphinna akehlet ding ahi, ati. Chule Kakching a kon bandh toh kisaiya kiman volunteer nga ho alhadoh diuva jong AMSU in thumna anei ahi.

Kivaihomna daan kituplou jeh leh thilsoh chom chom hojeh in gamsung numei leh chapang hohi abit thei pouvin, athanei na’u akilahmangpeh ji tauve tin AMSU Bishnupur District Committee a President Khangembam Madhumangol in aseiye. State Government in school boarding ho’a khoutah a kigahna ding daan kituptah hin semhen tin ngehna aneiye. Babysana ginmo umtah a athina chungchang jong akisaipi authority in akinthei lam’a ahin kholdoh ding’in Madhumangol chun temna aneikit’e. Chuleh AMSU Headquarters in kiphinna ahinbol jouse AMSU Bishnupur District Committee injong kithopina kipejing ding ahi tin aseiben ahi.

Gamsung nidan 24 bandh jeh’in Bishnupur district munchom chom jong aboiyin kailhang a um Bank, school, dukan leh sumkol veina munchom chom hojong akikhah sohkeiyin, private gari themkhat tailouvin passenger gari khatcha alhaipon ahi. Oinam leh Nambol teni a um bank, school leh dukan hojong akikhah sohkeiyin ahi. Nambol kailhang ah nupi thiljoh themkhat bou aum un, passenger gari khatcha jong alhaipon ahi. Dammo veiset leh hou thu toh kitoh tailou gari dang khatcha alhaisah pouve.

Bandh kibol in Thoubal kailhang jong atongkhan jingkah langchun dukan leh sumkol veina mun ho anakihong in ahin nidan 9:30 vel a kipat chun akhah sohkei tauvin ahi. Passenger gari khatcha alhaipon Bandh toson ho Thoubal kailhang ah ahungpot un lamlen tinding anagouvin hinlah Thoubal District Police ho vetkolna noiyin mi ana lamlhah sah uvin ahi.

Kumbi Apunba Nupi Lup, AMSU Kumbi-Wangoo Branch leh Kumbi College Students Union honjong Babysana thi jeh’a kisem JAC in gamsung pumpi nidan 24 bandh abol tosotnan Kumbi kailhang ah kiphinna abol uvin ahi. Kumbi leh Wangoo kailhang teni akikhah in, ahinlah deilou thilsoh vang aumpoi akiti.

Moirang, Ningthoukhong leh Kwakta jong bandh in nasatah in atongkhan ahi. Dukan leh sumkol veina mun jouse akikhah in, Moirang, Ningthoukhong leh Kwakta kailhang ho ah mi jong alhom lheh in ahi. Moirang Sub-divisional Headquarter hopsung’a um office ho ah jong employee khatcha akailou jeh un natoh imacha anabol tapouvin ahi. School leh bank hojong akikhah sohkeiyin district sung’a lhai passenger gari khatcha jong alhaipouvin ahi.

Alangkhat ah Jiribam District ah vang nidang bang’in gari ho alhai thou uvin ahi. Ahin Jiribam a kipat Imphal chan lhai gari ho alhai pouvin, vehicle service counter phabep jong akikhah in ahi. Nidan 24 bandh kibol sung hin Jiribam Police hon district sung muntin khoutah in avengbit uvin ahi.

 Sawombung Meira Paibi honjong Sawombung ah tuni chun Babysana kitha deilou vetsahnan toumun kiphin abol uvin ahi.

Babysana thi thu kholna suboiya simlai kiloikhomna koi ahi PWG in aseidoh dinga Joykishan in sei

Imphal, July 24(ET): Standard Robarth Hostel room a Ningthoujam Babysana athisa akimu thu a PWG kiti dan pam a um kiloikhomna in khohsahna anei Thangmeiband MLA Khumukcham Joykishan in akipapina thu aseiyin chule School principal lang a pang a simlai nu thi thu a thukholna lamtin a simlai kiloikhomna koiham ti aseidoh dinga ngehna aneiyin ahi.

Joykishan in thuso miho akimupi na’a thingnoi kiloikhomna kadou vanga amahon na pha atoh houhi pachat ding ahi, tin aseiyin chule thilsoh chungchang a simlai kiloikhomna leh CSO tamtah thipbeh a aum alunglhai louna thu aseiyin ahi. “Vangsetna toh numeinu in thudih a thutanna amu nadinga thudih dei ho jousen pan alahding ahi”, ati. Thuso phabep a People’s War Group (PWG) in School Principal Pheiroijam Landhoni Devi tosotna a simlai honk hat in thukholna akhah uve tia aseiyu ahi.

PWG in simlai kiloikhomna hi koi pen ahi aseidoh loujeh a Babysana thu a thudih a thutanna thum a simlai kiloikhomna adang jouse dinga minsetna ahi. AMSU in vangsetna toh nu dinga pan alah hi mipin amu ahi’in, SSUM, SUK chule adang dang injong JAC atosot ahi. Ahivang a PWG in asei simlai kiloikhomna hi koi ho hiuham tihi mipi het a aseidoh ding ahi.

Alangkhat a MLA Joykishan in Education Minister chule Imphal West SP in gamsung mi ngolbol ding ago’e, tin demna aneiyin ahi. “Mi amat uleh ibol a aseiphong louvu ham”, tin aseiyin chule kiphinna suhtang nading bou agot u ahi, ati. Babysana hi ama-leh-ama kithat ahi, tia jouthu kithansah a numeinu sorkar in amat loujeh a demna jong aseiyin ahi. Sorkar douna a social networking site a thu jih ho gamsung hihen lang gamdang hijong leh amat theiyu leh mipi lunghanna thei jouthu seiya numeinu ipijeh a kiman lou ham, tin Joykishan in sorkar thudohna aneiyin ahi.

Standard Robarth School boarding a anaum simlai khat in aumsunga gimna sangtah ato thusim ho sei

Imphal, July 24(ET): Standard Robarth Higher Secondary School a anaum simlai khat in school boarding a aum laiya athil to ho thu aseiyin, ahin, athusim asei masang a koi ahi aphondoh loudiuvin temna aneiyin ahi.

Numeinu hin tua graduation abol ahitan, IT thuso miho heng’a Standard Robarth boarding a aum laiya athil to chule athil mu ho aseiyin ahi. “Keima thusim kasei hi Babysana chunga thudih lhunna ahiding kakinepna ahi”, ati. Ka u numei khat leh kanao numei ni toh boarding a 2009 kum a kon 2012 (class 5 -8) kum chan kaum ahi’in, kum 4 kaum sunga warden pa in simlai ho ajeh kicheh louva gimtah a abolna kamu in, thingnoimi hon mi asuhgim bang a asuhgim ahi. A engbol holah a kei leh kasopi numei hojong kapan u ahi, ati.

2009 kum a boarding kalut masat pen chun ucha numei ni leh numei khat boarding a kon ajamdoh jeh a assembly ground a avoh u kamu in, mivo a hi Madam Landhoni jong pang ahi. Numei khat hi neocha ahi’in, inn ngaiya um simlai ho voh sang a phatah a counsel bol thei ahi. Warden in tol a alup sah a chule melset tah a ting a avel vel a lungsetna beihel a avoh a chule ichan a simlai hon na asah ding ham tijong agel lou ahi, ati.

Class 5 kahi chun kamin pasal min toh akilo jeh a pasal min jih a eingoh uvin, tol a kamai eingat sah uvin eijep uve. Simlai ho suhkhel suhdih a lampi dih a hil sanga warden in simlai hohi gucha, jachat helouva angoh a assembly lentol a melsetah a avoh ahi. Simlai khat in a konggah (belt) akiholmo jeh a midang a aman leh belt a akhai uva avoh u ahi. Nikhat go nasatah a ajuh jeh in boarding campus a twi akivei soh in, warden hon nga aman uvin, nga man ho vet seh seh jeh a simlai ho warden hon ajep uve, tin aseibe in ahi.

Simlai vo a lunglhai ho ahiuvin, pathen min a simlai ho agimbol u ahi. Numei melhoi khat tou pasal in ahel/ajol leh ajep uvin, athisan aso jong leh alunglhai tokah uvin avo uve. Simlai dongma nei aumleh counseling bol ding lampi dih a puiding ahi, ati. 2010-2011 kum a sangtah in ka dammo in, kakhut jetlang abon a achatthei pon, ka pa alunghan phat lhathum jouva kijen dinga eisol uvin ahi. Kakhut anat warden in ahet vanga gotna a washroom (pam chena) chan bucket lentah eidop sah’a, hiche jeh a kanat khohse a, kum khat lut kakijen ahi.

Warden li in kanaonu leh aloiho hohi lesbian (nu-le-nu kikoi) ahiuve, tia ajumso uva, melsetah a avoh u ahi. Warden khat in ka unu leh aloinu akouvin, ima sei louva ajep kit in, chule pasal toh khalah a angoh ahi. Inchung sangpen a kaum uva warden room keiho bantah a um ahi’in, aban a washroom um ahi. Jingkah kisutheng dinga simlai ho bucket le toothbrush la a ache nauva athim nahlai jeh in khon khat apeh kha uvin, hiche a jong warden in khon sutheng lou chule sum mang hol a eingoh uvin, eijep uve, tin aseibe in ahi.

Kasei jouse hi thutah ahi’in, kamu soh ahi. Ka thusim hin Babysana akithopi ding kinepna kanei ahi’in, koi kahi neiphon doh lou diuva avel a ngehna kanei ahi, tin simlai nu in aseikit in ahi. Simlai hon tahsa chule lungthim a gimna sangtah ato na a Right To Education aphatchomna umlou ahi.