Babysana thi thu a bandh in niseh kimanchah suboi; Babysana apa in...

Babysana thi thu a bandh in niseh kimanchah suboi; Babysana apa in statement nivei kapeh ahitai, tia police ho thuso nelkalna nei

303
0
SHARE

Babysana thi thu a bandh in niseh kimanchah suboi; Babysana apa in statement nivei kapeh ahitai, tia police ho thuso nelkalna nei

Imphal, Sept 2(ET): JAC in nidan 48 bandh abol jeh a gamsung, adeh a phaicham a niseh kimanchah aboiyin, lamlen a private gari phabep bou alhaiyin ahi.

Police hon thilse aso louna dinga munchom chom khoutah a anga u ahi. Thangmeiband kimvel a um lamlen ho police hon khoutah a angah uvin, kiphinna bol ho nidan 48 bandh toson dinga lamlen a akikhop louna diuvin phatah in angah uvin ahi. Strike sunga themjilna mun, bank, private institution jouse akikhah in chule Imphal khopi a kailhang Khwairamband bazaar jong athip chet in ahi. Bandh toson ho district administration in gihna anei vanga Paona bazaar leh Thangal bazaar a dukan ho akikhah in ahi.

Government office ho a jong office che lhomcha bou ahi, ajeh chu mipi va le na auto service, bus leh van ho bandh sunga lhailou ahi. Khurai lamlen lailung a bandh toson hon lamlen akhah uvin, Chief Minister N Biren Singh leh Standard Robarth founder Ph Landhoni lim kisemthu meiya ahal uvin ahi. Nongada, Imphal-Ukhrul lamlen a jong bandh toson mi tamtah in lamlen akhah uvin, lampi alailung a kiphinna abol uvin ahi.

Nikho kipat til a bandh toson hon Thangmeiband lamlen atin uva tyre meiya ahal u ahi’in, ahivanga police hon anomang ahi. Thoubal leh Kakching district a bandh toson ho lamlen a akikhom uvin, gari khatcha alhaisah pouvin ahi. Strike sunga dukan chule business establishment hojong akhah uvin ahi. JAC in akou General strike tosotna a Commercial Transporter, school leh college chule kailhang tou hon tosotna a anatoh u anga uvin chule bank transaction jong achelha pon ahi.

Babysana thi thu a thutah kholdoh nadinga Kakching Keithel a AMSU Kakching District leh Kakching Keithel Apunba Ema Lup lamkaina a toumun kiphinna abol uvin ahi. Alangkhat a Convenor in charge JAC, L Gyaneshwori in thuso aneina a thukholna boipi sanga police hon JAC member hojong aboipi uve, tin ngohna aneiyin ahi. Babysana thi thu a police hon mi 5 amat ahitan, ahivanga Babysana thi thu a thutah kholdohna umlou lai ahi. CM in assembly a case CBI khut a pehlut dinga pan lahdinga kitepna anei thu jong aseiyin, CM in JAC ho phat tep agelkhoh loujeh a general strike um ahi, ati. Co convenor L Pratap in anngol kiphinna abol a atahsa alel tah vanga jail a akoi nahlaiyu ahi, tin Gyaneshwori in aseibe in ahi.

Police ho thusei Babysana apa Ningthoujam Tomchou in suhthengna aneiyin, police ho henga statement nivei kapeh ahitai, tin aseiyin ahi.

SP Imphal East Meghachandra in Sunday ni a Babysana apa Tomchou in police ho henga statement apeh khahlou ahi, tia asei ahi. Tomchou in tuni sun a thuso miho akimupi na’a, statement masapen hi Kakwa OC Sanjoy henga kapeh ahi, ati. Kei leh ka insung mite room chom chom a eipui uva statement alah u ahi, tin aseiyin chule post mortem report la dinga JAC member hotoh Kakwa police a kache nauva  jong statement alah kit u ahi, ati.

Additional SP Ghanashyam henga jong ama room a statement kapeh kit ahi, tin Tomchou in aseiyin chule statement jouse hi police ho henga nivei kasei ahitai, ati. SP pa in Tomchou in statement apepoi tia asei alunglhai louna thu jong aseiyin ahi. Statement alah kit nom uva ahileh authority hon kouna apeh diuva ngehna aneiyin chule CSO leh social media umna a statement avel a peh kit ding kanom e, ati. Tua vang hi CBI henga bou statement kapeh ding ahitai, tin adinna adin det pi in ahi.

CPI in Babysana thi thu a thukholna achelhah dan  demna sangtah nei

Imphal, Sept 2(ET): CPI member hon Babysana thi chungchang thu kikhol dan demna anei uvin ahi. Sotinkumar, Secretary, CPI, Manipur in thuso miho akimupi na a, JAC hon ni-ni bandh achepi hi Babysana thi thu a thutah kholdoh nading chule CBI khut a case pehdoh nading ahi’in, mipi gelkhoh loujeh ahipoi, tin aseiyin ahi.

Chief Minister in pan lah a chule process ho akichai teng CBI henga case pehlut dinga kitepna anei ahi’in, ahivanga sorkar in gelkhohna aneilou ahi. Thilsoh a themmona nei ho kholdoh ding got sanga Babysana Babysana insung mite chunga ngohna semding agot joh u ahi, ati. Kiphinna suhthip nadinga JAC member ho kimat a chule anngol kiphinna leh toumun kiphinna abol nau mun kinocheh ahi’in, hitobang chonchan CPI in demna anei ahi, ati.

Kh. Shamungou, General Secretary, Indian Association of Lawyers, Manipur Chapter in executive meeting kibol a ngaidan chom chom kinei ahi, ati. IGP Clay Khongsai leh SP Imphal Meghachandra statement hi kigeldoh a langneitah a kisem ahi’in, hiche hi dan dihlou ahi, ati. Police officer teni hin Babysana thina ajeh khat hi insung a lungnatna aneijeh a asei ahi. Amahon asei dungjuiya Babysana apa in ji thum aneiya, Babysana hi anuthah in avet ahi. Babysana in hitia hinkho man hah asah a, athi anu in apui dinga jong asei ahi, ati. Chule Babysana kikhailih na a kimang khao khat hi Babysana apaneo Ningthoujam Kumar chenna Haraorou inmun a akimu e, tia jong kisei ahi’in, amanin asei dungjuiya hiche hohi athina jeh hithei dinga aseiyu ahi.

Hiche thukhoh tah hi kholna um nalai ahi’in, IO hilou ahilouleh Special Investigation Team a kon hilou hon dan dungjuiya kikumna ahilouleh comment apeh theilou ahi. Police department leh administration a dinga SP hi IO chung ahi’in, ahivanga thukholna a pan alah loujeh a hitobang thu aseitheilou ahi’in, IGP jong chutima ahi. Additional SP A Ghanashyam Sharma (case kholna neipa) in SP a kon report apehlut kahse a comment apeh theilouvu ahi’in, report akipehlut teng lebou Director, State prosecution in court henga report apehlut ding ahi.

Mipin thukholna aum sunga ano loudiuva aseiyu hi thilpha khat ahi. Mipi ngohna anei uva alangkhat a akigongtoh lunggel dungjuiya pan alah u ahi’in, dan toh kitohlou hitobang thil bol louding ahi. Tua hi insung mite jong inmun a um talouvu ahi. Police hon apa statement alahnom a ahileh section 161 noiya hehna asem pet a alahdiu ahi’in, nivei athum theilou diu ahi. Avel vel a statement adoh uhi adihlouna um ahi. Statement lahding a asei uva Babysana apa hi themmona neiho list a pansah ding agot u tobang ahi’in, Indian Association of Lawyers in jong hitobang chonna dihlou tah demna anei ahi, ati.

CPI in Manipur gam a Indian Citizenship hina neiya mihem lakh 19 citizenship lahpeh thei ahiding alungkhampi na thu jong asei uvin ahi. Gamdang miho tua hi Assam gam a kon hung ahiuvin, sorkar in pan alahngai ahi, ati. Twi hah jeh a gamsung in boina sangtah ato ahi’in, Cabinet toukhomna a ‘drought affected’ mun aphondoh uhi CPI in lunglhaina aneilou ahi. Imphal East noiya um Lamlai constituency a twi nasatah a ahah vanga list a panglou ahi, tin tekahna ape uvin ahi.

August nisim 31 nikho a Indian Airlines, Jandhan Yojana loubol miho phatchomna dinga prvatised bol dinga thulhuhna um Communist Party in demna aneiyin, ahivanga nationalized bank 4 hi privatized kibol ahi, tin demna thu asei uvin ahi. Jammu and Kashmir gam a Article 370 kisuhmang a chule Union Territory ni a akikhen jong demna anei uvin ahi. Hitia sorkar in na atoh hin Nagaland ding gelna a Manipur gamsunga jong adei dei abol theiyu ahi ti avetsah ahi. BJP in manifesto a asei CAB phatsah ding ati hi CPI in demna sangtah aneiding ahi, tin aseibe uvin ahi.

Kiren Rijiju in Chandel district a natoh umho velvetna nei; National Sports University vetlhahna neiding

Imphal, Sept 2(ET): Chief Minister N. Biren Singh leh Union Youth Affairs and Sports State Minister (Independent Charge) chule Union Minority Affairs State Minister Kiren Rijiju in Monday nikhon Chandel District headquarter avil uvin, district sunga Aspirational Districts Programme umho velvetna anei uvin ahi.

Chandel hi hiche program noiya kilhengdoh district 117 lah a khat ahi. Kiren Rijiju hi Guwahati a kon MHA helicopter a Imphal International Airport sun a hunglhung ahi’in, hiche a kon ahungna helicopter a Chief Minister toh Chandel ajot ahi. Lamkai teni sun nidan 12.50 don a 18 Assam Rifles helipad lhung ahi’in, hiche a kon Chandel DC Office complex ajot a, thingnou atu lhon ahi. Lamkai tenin One Stop Centre jong DC office complex mun a hondohna anei lhon a chule Pradhan Mantri Ujjwala Yojana (PMUY) scheme noiya beneficiary ho LPG connection hopdohna jon aneilhon ahi.

N Biren Singh leh Kiren Rijiju in district sunga Aspirational Districts Programme noiya natoh chom chom umho velvetna anei lhon in, chule Chief Secretary Dr J Suresh Babu, Administrative Secretary, Chandel DC Krishna Kumar chule government official luboh dang dang in program chelhah dan thu hetsahna anei uvin ahi. ‘Review meeting’ jouva Kiren Rijiju in thuso miho akimupi na a gamsunga um district akhangtou adang dang hotoh kibanga Chandel district khantou sah ding hi sorkar in agelkhoh ahi, ati. Chandel hi Aspirational District of Manipur dinga kilhengdoh ahi’in, mun phabep a lhahsamna aneijeh ahi. Ahivanga achesa lha 8-9 sunga district hi sector chom chom a nasatah a khangtou ahi, ati.

Union Minister in education, health leh adang dang a hahsatna umho velvetna aneiyin ahi. Hiche sector ho gelkhoh angaiyin, centre sponsor scheme hohi kijahtona alhahsam jeh a achang ding hon bulhing set a amu theilou ahi. District sunga khantou sah dinga education, health leh communication hi thupi tah ahi’in, Aspirational Districts Programme guardian hina a Centre sorkar project ho kholna kanei ahi, ati. Kum khat sunga sorkar in hiche sector thum akhantou sah ding ahi, tin Rijiju in kitepna aneiyin chule state sorkar, Chandel DC leh Chandel district a official dang dang hon kikhelna semna dinga pan alah u akipapina leh apachatna thu aseiyin ahi.

Jing nikho teng National Sports University kisahna toh kisaiya natoh hojong velvetna neidinga Rijiju in aseiyin ahi. Gam thu chule work agency toh kisai boina phabep jeh a National Sports University aphatcha kisa theilou ahi, tin Union Minister in aseiyin chule University sah nadinga phat kivaigei sah louding ahitai, ati. National Sports University hi state ahilouleh regional university ahipon, National level institute ahi, tin aseiyin chule National Sports University hi ‘top class University’ ahina dinga sorkar in vannoiya University (top) hotoh MoU soi akai ahi, ati. Nilhah nidan 3 don a Biren leh Rijiju Chandel district headquarter a kon akipandoh lhon tan ahi.

Churachandpur a duty bol police khat meithal a kibulu

Ccpur, Sept. 2(UNA): Melhetlou mi phabep in Sunday jan a Churachandpur police officer khat abulu uvin, thilsoh hi gamsung miho dinga kisonlel na ahi.

Akisukha ASI pa hi Thangzason ahi’in, New Lamka, Tiddim road a duty abol pet a abulu u ahi.

Churachandpur Deputy Commissioner Pawan Yadav, IAS in CrPc 144 asodoh in, dan noiya mi 5 kalval kikhom theilou ding chule dan juilou ho gotna chang diu ahi. Dan hin Law and Order chule Media miho akan dehlou ahi.

Churachandpur a duty bol a police officer chan akibulu thei hin gamkaiya dan alhahsam avetsah ahi’in, hiche thilsoh jeh a gamsung mihon lungmon lelna anei uvin ahi. Gamkaiya gang ahilouleh dan sem dan a kiloikhom mi (mob) ho jeh a lunggimna um ahi’in, Churachandpur Magistrate in sub section 2, section 144, Code of Criminal procedure 1973 asodoh hi September nisim 2 nikho a kon nilhah nidan 5 a pat jingkah nidan 6 sung kichepi ding ahi.

Congress MLA phabep leh BJP anajop Congress MLA 7 kigomkhom’a Regional Party khat semdoh ding gou

Imphal, Sept 2 (ET): Manipur gamsung kum tamtah vai anahom Congress Party tulai lamchom chom’a boina anei dan ahung kihasei lheh jeng kit tan ahi. Thulhut kimu dungjui in achesa Lok Sabha Election a Congress Party in losamna ahin neiya kon in Party post dalha MLA 12 kigom khom in Regional Party khat phu ding tohgon anei uvin ahi. Congress lamkai khat in thuso miho toh akihoulim na’a Congress MLA tohmun dalha 12 ho leh BJP ana jop Congress MLA 7 ho kigom khom in Regional Party khat phuding ago uvin ahi ati. Chuleh agom’a Congress MLA 19 hohi guthim’a kihoukhom ji uva Manipur gamsung’a Regional Party khat phudoh ding lunggel leh tohgon jong anei un ahi ati. Hiche na chung chon’a Party minsah ding kihoutoh na anei jouvin Party thah semna dia registration bol ding jong tohgon achai tauvin ahi.

Alangkhat’a Environment, MAHUD, Horticulture and Soil Conservation Minister Th Shyamkumar hi Manipur Legisltaive Assembly Speaker pa Tribunal leh Supreme Court ang’a a-ohden nalaiyin chuleh Congress MLA 12 leh BJP anajop MLA 7 hon abel vang uvin 10th Scheduled in Congress dalha’a Party thah semding in phalna anapeh lou naban’a phutlou chang’a Regional Party thah khat semdoh ding kiti hi thil hithei lou tobang dinmun in aum nalai ahi. Hijeh chun disqualification case ahung kisuhmang phat anga’u angai in ahi. Ahin Political party thah khat hung umdoh leh tule tua BJP kah’a thanei ding kichu nahi umta lou ding chuleh Political Party thah khat in abol ding’a lom ho abol bang’a natoh ho ahin bol ding ahi.

Ginlam kikhailih  nachung’a Amrita Sinha IPS SP/CCpur in  Police personnel 5 suspend bol

B.Lalboi Gangte

Ccpur, Sept. 2(ET): Achesa August nisim 31 nikho’a Singngat gamkai Napali ho bongbuh mun’a kikhailih sa’a ana kimudoh Ginlam Munlo longdamsa chu tunin Imphal mun’a Post Mortem ana kibol jou tan ahi. Hiche thilsoh nachung’a thil umdan kholchil na achelhah jing na ding in Amrita Sinha IPS SP/CCpur in special team khat asemdoh in hiche team hin phate cha’a kholchil na anei ding leh thepmo nanei ho daan toh kitoh’a gotna kipe ding ahi ati.

Hiche toh lhon’a hiche thilsoh chung thu kholchil na akipat toh lhon in Amrita Sinha SP/CCpur in Singngat Police Station mun’a posting aum Police personnel 5 suspend jong anabol tan ahi.Amaho chu  SI T. Lalbiakmuan, ASI H. Muanthianlal, Constable T. Doulalven, Constable S. James Ngaihte leh Constable Pauchinmuan ahi. Amaho cheng hi suspend ahi sung uva reserve line DHQ-Churachandpur a um ding chuleh phalna jao lou’a Station adalhah theilou ding uvin gah na achung uvah akoikhum in ahi.

DC-CCpur in CCpur khopi sung CrPC  144 phongdoh; VDF le IRB 200 vel kikoi

B.Lalboi Gangte

Ccpur, Sept. 2 (ET):  Pawan Yadav IAS, District Magistrate, Churachandpur in thuso aneina’a CCpur Lamka khopi sung’a nilhah lam nidan 5:00 akipat jingkah nidan 6:00 sung 144 CrPC aphongdoh in ahi. Chuleh Superintendent of Police, Churachandpur akon thupeh dungjui in CCpur District sung’a daan leh thupeh dinmun suse thei leh jalhang adia lungmon naleh cham naho suse thei ding’a boina thilsoh lhung thei ding dinmun aum jeh in thilsoh  hoilou lhung ding ho venbit na ding’a kikoi ahi. Hitoh lhon’a  Code of Criminal Procedure, 1973 a Section 144 noiya Sub-Section 2 in thunei na apeh toh lhon’a kham na anei in chuleh thuthah aum masang se’a tuni (Sep. 2) nilhah  nidan  5:00 akipat jingkah nidan 6:00 kikah sung Lamka khopi sung’a mi 5 sang ah tamjo um khom leh mi tong kha thei thil choi um thei lou ding ahi.

Churachandpur a 144 CrPC akikoi toh lhon in police, VDF le IRB 200 lam team ni in kiso in ana khopi sunga ana kikoi in ahi. SoO a jao galguh bol ho jong camp a akile ding uvin thupeh ana um in ahi. Hiche police team teni chu IGP khat makai na le DIG khat kithopina in ana kikoi in CO 1st IRB in jong akithopi dingin hetsah na ana kinei in ahi.

 

Manipur  a kon simlai  2 in Chandrayaan 2 lhathah sunga alenlut pet ISRO HQ’a konna vethei dia chanvou chang lhon

GUWAHATI , September 2: Manipur a kon simlai chapang 2, Sony Nongmaithem leh Wahengbam Devanand teni hi Chandrayaan-2 natoh le aumdan vetthei na chanvou achan lhon jeh in, ISRO HQ a  konna vet thei lhon ding ahi.

Amani hin ahunglhungding September nisim 7 nikho leh Indian Space Research Organization (ISRO) headquarters,Bangalore munna PM Narendra Modi toh live a avet dingu ahi.

Sony hi Kendriya Vidyalaya Loktak a pol 10 simlai ahin, Wahengbam hi Jawahar Navodaya Vidyalaya, Yaralpat a kon pol 9 simlai ahi.

Manipur Chief Minister N Biren Singh in twitter mangchan Sony Nongmaithem leh Wahengbam Devanand chu congratulate abol in ahi.

Amani hitobang chanvou achan lhonna hi Chandrayaan 2, quiz competition on space technology kitetna a alolhin lhonna kona ahi. Amani chunchonna sahsolam gamkaiya konna simlai chapang lhendoh a um ho chu,Tejaswini Gajurel,Assam, Tripura a kon Ankur Roy Kumar, Arunachal a kon Lige chuleh Meghalaya mi Ribait Phawa hocheng hi ahiuve.

DH/CHC Kangpokpi min phat na chunga ADC Sadar Hills in kipapina nei

Kangpokpi, Sept 2(UNA): Tu naicha a Kangpokpi District Health Department in state sung le thinglhang district lah ading a min phat na ahung chant oh lhon in tuni in ADC Sadar Hills Councillors ho le kiloikhomna jat chom chom in kipapina ana nei uvin ahi.

Member of District Council le Chairman, ADC Sadar Hills, Haokholal Hangshing, Executive Officer (Town) Paominthang Doungel le Satkholen Khongsai ho in tuni jingkah in District Hospital (CHC) Kangpokpi vilna anei uvin, Medical Superintendent pa toh ana kimu to uvin kipa thuseina ana nei uvin ahi. Chairman pa in CMO Kangpokpi,  Medical Superintendent pa, MO i/c CHC (PHC) Saikul le MO i/c PHC Motbung ho chunga kipa thuseina ana nei in ahi.  Cahirman pan asei na a District Hospital (CHC) Kangpokpi in hitabang a state sunga CHC hoi napen kivet na a top 5 a ahung um thei hi kithang at pi thei tah ahin, district adinga suhmil thei lou khat ahi tan ahi ati. Hospital a hitabang a mi le thil kining lhinglou thu ho kijah na chunga nopmo akisah in, hitabang hahsat na ho jeh ahi natong ho in niseh a hahsat na ato u ahi ati.

Dr. Paotinlal Haokip transfer kibol lou ding le mun chom a akichon lou ding dan thu a jong mipi ho hetsah na ana nei in, mipi ho kithopi jing dinga hospital aphate cha a akipoh thei na dinga pan alah dingd an jong tahlang na ana nei in ahi. Alangkhat a Kangpokpi Town Committee, Kangpokpi Women Welfare Union le Kangpokpi Youth Union in jong CMO Kangpokpi, Medical Superintendent, MO in-charge CHC (PHC) Saikul le MO in-charge PHC Motbung ho chunga kipa thuseina ana nei uvin ahi.

Kiloikhomna ho in thuso anei na uva district sunga tahsa damthei na le mi jan na ding a hung kisei mo ho chunga kipa thuseina anei utoh lhon in Medical Superintendent, District Hospital Kangpokpi, Dr. Paotinlal Haokip chunga adeh in kipa thusei na ana nei uvin ahi.

 

RD & PR Minister Biswajit in Iril vadung a lei sahna ding ‘Foundation stone’ hondohna nei

Imphal, Sept 2(ET): Rural Development and Panchayati Raj Minister Thongam Biswajit Singh in Naharup Pangong mun Iril vadung a lei kisahna dinga foundation stone hondohna aneiyin ahi.

Kshetrigao constituency MLA N Indrajit umna a package number MN 04118 noiya lei sahna ding ‘foundation stone’ hondohna anei ahi. Thuso miho Minister Biswajit in akihoupi na’a, lei hi Meitram Construction kiti private company in dangka crore 6.33 lut a asah ding ahi, tin aseiyin chule technology thah thah kimangcha ding, 2020 kum kah a sah jou dinga kisei ding ahi, tin hetsahna jong aneiyin ahi.

Government department in khantou nadinga na atoh ho mipin atosot dinga Minister pa in temna aneiyin, kijot to na kisem boi hi mijouse a ding ahi, ati. Society a um mi jouse kah a kipunkhomna, khantouna leh chamna aumna dinga lamlen kijot to na sem  angaichat dan thu jong aseiyin ahi. PMGSY phase 11 noiya agom a natong 458 sanction kibol ahi’in, hiche lah a natoh 53 hi lei kisemna ahi’in, thinglhang leh phaicham ani a ahi, ati.

Manipur gamsung hi PMGSY 11 a dinga kilheng north east pumpi a state ani channa ahi, tin aseiyin, natoh dan hojeh a department in aganna thei pen a PMGSY III a akilhin thei ding tupna anei ahi, tin aseiyin ahi. Lei kisah ding akipana thu MLA Indrajit in aseiyin, Suspension Bridge khel a RCC lei kisah ding hi gamkai mihon aphatchompi ding ahi, tin aseibe in ahi.