August 15 joule School, College ho kihongpan ding ahi: HRD Minister Pokhriyal

August 15 joule School, College ho kihongpan ding ahi: HRD Minister Pokhriyal

68
0
SHARE

August 15 joule School, College ho kihongpan ding ahi: HRD Minister Pokhriyal

New Delhi, June 7: Human Resource and Development Minister Ramesh Nishank Pokhriyal in aseina achun India gamsung a school le college ho August 15 joule kihong pankit ding in asei in ahi. Gamsung a covid-19 jeh a themjilna munho lha 3 val akikhah tan tuhin simlai crore 33 val in akihon kah ngahlel in aum uve ati. Chule tu session a exam kibol jouse result jong August 15 joule amathei pen a kiphong ding in jong asei in ahi. CBSE board in jong exam achailou hou July 1 apat July 15 kikah a abol ding u ahi in, ICSE/ISC noiya exam jong July 1 apat July 12 sung a chelha ding ahi in, NEET exam jong July 26 le umding chule JEE exam chu July 18 apat July 23 sung a umding ahi ati. School, College ho akihon pat phatle 30 pc attendance dan chepi ding chule class 8 apat anoilang ho kaipan nailou ding ahidan asei in ahi.

Kangpokpi a Covid-19 active case 26 lhingta; State COVID active chart a natna nei atamna pen district hita

KANGPOKPI, Jun 7(ET): District sunga Saturday nilhah a Covid positive case gangtah a akal a chule tuni jingkah a case akimudoh be kit toh kilhon a Kangpokpi district hi COVID active case ‘state chart’ a dinga asang pen a apang in, active case 26 um a chule Churachandpur a case kisei 34 lah a active case 18 um ahi.

Alangkhat a, District Magistrate/DC Kangpokpi, Somorjit Salam, IAS in positive case 14 akimudoh na mun chule hiche IQC ma ma a tuni jingkah a case 3 photchenna aumna Presidency College, Motbung ‘containment zone’ a aphondoh ahitai.

Presidency College Motbung a Covid 19 case hi agom a 17 lhing ahitan, abon uva Delhi a kon hung kile ho hiu ahi. Achesa May 25 ni a district sunga Covid 19 case masapen anaum mikhat hi Gujarat a kon hung kile ahi’in, BIET Centre, Leikop a akoi uva, hiche jouva Damdei Christian College, Taloulong a um Pune a kon hung kile mi 2 kihedoh a, aban a Pune a kon hung kile Goma Fevi High School, Toribari a um mi 6 covid 19 positive ahi kihedoh kit ahi.

 Hiche Institutional Quarantine Centre jouse a hi District Magistrate/DC Kangpokpi in Containment zone ahi phondohna aban ban a anei ahitai. Natna nei mi 2 holah a kum 3 chapang khat panna a numei 10 hi ahi’in chule adang 16 hi pasal ahi. Atamjo hi kum 20 le 35 kikah hiu ahi.

Alangkhat a, SDO Kangchup Geljang, Opendro Singh, MCS in positive ahi kihedoh ho tilouva centre a um adang ho test bol kit ding chule toilet koibe dinga thumna neiya kiphinna neiho toh kihouna asemna a boina lentah atoh in, chule centre a ahung um uva kon hahsatna ato hou thu aseiyin ahi.

Akivanga kiletsahna neilou officer pa in ama chunga um official, medical official chule police personnel hotoh kitho a thilse soh louva nilhah langa kiphinna bol ho ajol lunglhai a chule mi 14 hi Imphal chan apui ahi. Presidency College, Motbung a um adang ho se hi Monday nile test abol kit diu ahi.

Mopohna nei CSO ho lamkaina a Kangpokpi DHQ a intellectual hon Institutional Quarantine Centre chom chom a umho dinga ‘awareness program’ abol angai dan thu asei uvin ahi. Alangkhat a, Delhi, Bangalore le Hyderabad a kon Sunday nilhah nidan 4.50 don a lenna a Imphal khopi hung lhung chapang khat panna a mi 22 District Screening Centre ahung lhung tauvin ahi.

Amaho hi ADC Sadar Hills in KTC, KWWO le KYU kithopina a kibol COVID Emergency Food Kiosk mun a medical officer hon screen abol jouva neh le chah asem peh uvin ahi. District ho lah a active case tam napen ahivanga Kangpokpi District Administration in pandemic douna a abol thei chan abol a chule gamkai mihon jong jo chan a kithopina aneiyu ahi.

ZRO Thanglienpau Group mi khamnathei toh kimat tha toh lhon a Calvin group in demna nei

Ccpur, June 7: Zomi Re-unification Organisation- Thanglienpa group akon Manghauthang Zou @ Wiliam aku 32 a upa, apa min aum talou  Liankhanhau, Hiangtam akon chu  khamnathei a crore lam man toh ana kimat than a chung a Calvin Group in demna sangtah ahin nei uvin ahi. Kiloikhomna akon thuso kimu dungjui in Manglienthang hi Thanglienpau group noi a corporal panmun tuh khat ahin, New Bazar mun a ahcha johdan a um a Thanglienpau in  khamnathei ho tol le le vesui ding a anganse mi ahi ati. Kiloikhomna akon thuso kimu chun asei na a William kimatdoh hin Thanglienpau KAni lei bol chuleh khamnathei a kivei ho ahin kheodh kit ahi ati. Hitabang phat boi lai a khamnathei hung kipo thei chu  permit ngai ding ahin. Hiche hin avetsah chu Thanglienpau hin khamnathei a sumkol veina anei na ahi akithopi aum in ahi ti aphot chen ahin, hitabang a natna um a boilai a hitabang natoh na nei ho hi mipi in doudal na anei ding uvin kiloikhomna in hetsah na le temna ahin nei uvin ahi.

Manipur a Covid-19 positive 15 akimu be toh kilhon a natna nei agom a 172 lhingta

Imphal, June 7(ET): Lenna a hung kile mi 6 panna a agom a mi 15 Saturday jan a Covid 19 positive ahi akihetdoh be in, hiche toh kilhon a gamsunga covid 19 positive agom a 172 lhing ahitai.

Active case hi 120 a kal a chule natna a kon mi 52 dam doh ahitai. Additional Health Director Dr K Sasheekumar sample 12 hi VRDL, RIMS a test abol uva chule adang 3 hi JNIMS a test abol u ahi.

Case athah 15 holah a numei khat panna a Covid 19 positive hi a mi 6 hi Thoubal mi ahiuvin, numei thum panna a mi 5 hi Ukhrul mi, numei thum hi Kangpokpi chule pasal khat hi Imphal West district a cheng ahi, tin Dr. Mangang in aseiyin ahi. Mi 8 hi Mumbai a kon train a hung kile ahi’in chule midang 7 hi Delhi a kon hung kileu, mikhat tailou amaho se hi lenna khat a hung toukhom u ahi.

Tahsa dinmun alel aumpon, chule abon uva COVID 19 Care facility RIMS le JNIMS a achon tauvin ahi. State health official honjong kivenna anei uva akimupi ho kholna chule containment process ho apat u ahitai.

 

BJYM volunteer hon media house anokhum CORCOM in demna nei

Imphal, June 7(ET): Bharatiya Janata Yuva Morcha (BJYM) volunteer hon June nisim 2 nikho a media house agih nau thilsoh CORCOM in demna aneiyin ahi.

M Sak-hen, Media Co-ordinator, Publicity Committee, CORCOM in thuso aneina a, achesa June nisim 2 nikho a Bharatiya Janata Party (BJP)- Bharatiya Janata Yuva Morcha (BJYM) youth wing volunteer ho Imphal khopi a um Electronic Media office a hunam a lut u ahi, ati. Media hi democracy pillar li channa ahi’in, ‘freedom of press’ hi BJP hon apalkeh a hunam vaihom umchan aneiyu avetsah u ahi, ati.

Media house mun a hitia aum uva chule natong ho lunghanna ding thil abol uhi media in thusei na dinga chamlhatna anei akisuhboi peh na ahi. Media institute hi service akhoh holah a pang ahi’in, Universal Declarations on Human Rights (UDHR) article 19 hin ‘freedom of expression’ leh ‘freedom of opinion’ phatah a venbit dinga kicheh tah a asei ahi. BJP umchan hin media ho jo a, amaho dei bou seiya pansah ding lunggel aneiyu avetsah ahi, tin thuso chun aseibe in ahi.

World Press freedom index 2020 dungjuiya India gam hi Press Freedom a gam 180 lah a 142 channa a pang ahi. Chamlhatna ding gal kisat na a media panlahna CORCOM in ahetpeh ahi, tin aseiyun chule Covid 19 pandemic kisei khoh pet a thuso a natong hon mipi thu hetsahna aneijing apachatna thu jong aseibe uvin ahi.

 

Ayush staff hon hahsatna ato ho state sorkar in avetlhah peh dinga AMADA in ngehna nei

IMPHAL, June 7(UNA): All Manipur Ayush Doctors Association (AMADA) in National Health Mission (NHM), Manipur noiya natong Ayush doctor ho boina le hahsatna state sorkar in avettup louva ahile kiphinna sangtah umding ahi, tin aseiyun chule Ayush staff hohi NHM, Manipur noiya staff ho ‘pay rationalization’ a kipan sahlou ahi, ati.

Publicity Secretary, AMADA, Dr. Kh Gopeshwor in Thokchom Leikai, Kwakeithel a Sunday nikho a thuso miho akimupi na’a, Ayush doctor hohin NHM, Manipur noiya kum 14 lhing contract basis a na atoh u ahi’in, achesa 2006 kum a kon Ayush staff jousen hahsatna ato ahi, ati. NHM, Manipur noiya natong Ayush staff agom a mi 4 (ayush doctor le Ayush Pharmacist) hiche natoh atohnau phat sunga thi ahitai.

NHM, Manipur noiya contract basis a agom a Ayush staff 277 (doctor 176 le Pharmacist 101) in na atoh ahi’in, hiche lah a doctor 75 hin kum 12 lhing NHM noiya service term ajo ahitan, chule 2015 kum a Ayush Directorate kisemdoh a, hiche noiya hi doctor 30 inbou na atoh ahi, ati. Ayush doctor le pharmacist lah be (regular) a chule Ayush directorate hi thahat sah cheh ngai ahi, tin aseiyin ahi.

MPSC noiya Ayush doctor phabep recruitment chelha ahitan ahivanga MBBS doctor ho khatvei a 300-400 kilah toh kibah lou ahi. Department dang dang a Central Sponsored  Schemes (CSS) scheme kiti ho noiya natong staff ho regularization kibol banga NHM (CSS Scheme) noiya natong Ayush doctor le pharmacist hojong state sorkar in regularization bol ding agel thei ahi.

Ayush staff ho lha lo chule central government in phatsahna anei banga ‘annual increment’ phatah a amu louvu ahi, tin jong aseiyin ahi. Thangmeiband MLA Khumukcham Joykishan in Assembly a hiche thu apohdoh vanga tuchan a sorkar a kon action akilah na umlou ahi. NHM, Manipur noiya natong Ayush doctor hole MBBS doctor ho lo hi nasatah a kikhe ahi’in, ahivanga, doctor ani a degree hi Manipur Health Services Rules (MHSR) noiya kibanga kibol ahi. Sorkar in athu aganna thei pen a asei loule association in kiphinna sangtah abol ding ahi, tin gihna jong aneiyin ahi.

Association spokesperson Dr. H Robindro in, Ayush doctor hole MBBS doctor (Medical Officer-in-Charge, Primary Health Centre, District Nodal Officer leh adang dang) ho mopohna le natoh kibang ahi. Amaho hi abon uva pandemic sunga frontline worker hiu ahi’in, tu dinmun a jong hi Ayush doctor jouse screening centre, institutional quarantine centre, community quarantine centre, sample collection team, state/district Covid 19 control room, surveillance team, quick reaction team, rapid response team, interpersonal communication team, district coordination team le adang dang a medical officer a kimangcha ahi, ati.

Bishnupur district a screening centre a duty abolna a heart attack a Ayush staff (Pharmacist) khat athi thu jong aseiyin, N Biren Singh lamkaina sorkar in hiche thu avetlhah a, athi pa insung mite kithopina apeh dinga temna aneiyin ahi. May 5 ni a Cabinet in regular doctor 300 lah dinga phatsahna anei akipapina thu aseiyin, Ayush doctor le staff ho panlahna ho sumil louva ahetpeh diuvin temna aneiyin chule regular hi sah ding sorkar in agel peh dinga temna aneibe in ahi.

Press conference a association member hon aum talou RK Promodini Devi, Ayush Pharmacist jana pehna chule insung mite sum a kithopina jong anei uvin ahi.

 

KWWA in census dih louva ‘Delimitation process’ bol ding doudalna neiyu

Imphal, June 7(UNA): Politics a machal nading bouva population data dihlouva Delimitation process kibol hi Manipur khonung suhset na hiding ahi, tin Kangleipak Woman Welfare Association in aseiyin ahi.

Association in thuso anei nauva, nam pumpi in khantouna dinga pan alahkhom phat, lungmong a achenkhom phat angai pet a hiche aumhi vangset umtah ahi. Kangleipak a thil lhung masa chule tu dinmun hin kipunkhom a panlah angaidan thuhilna eineiyu ahi. Sum le pai chule politics a phatchomna dinga nam kikhen nading natoh hi melma ho tohgon ahi, tin aseibe uvin ahi.

Thinglhang le phaicham miho kikhenna dinga pamlang tohgon ahi mu chet thei ahi, tin organization in aseiyin chule itidan a gamsung hi hitobang tohgon phalou neiya politics ho a oh uham, tin thudoh jong anei uvin ahi. Thinglhang le phaicham miho khonung hi alangni kinoptona le kihetthem to na a seilhah ding ahi, tin aseiyun chule gamsung mi dihtah ho khonung hi mangthah thei ahi, ati.

Manipur gam umdan (geographical structure) hin jong thinglhang le phaicham miho thakhat ahi avetsah ahi. Thinglhang a lamkai phabep gamsung Chief Minister hiya chule lamkai tamtah political leader a pang ahi. Tua state sorkar injong thinglhang khantou nadinga natoh khohsahna anei jing ahi, tin thuso chun aseibe uvin ahi.

 

KTC le KTCF hon Kangpokpi DHQ hopsung Quarantine centre chom chom a umho tilkhouna nei

KANGPOKPI, Jun 7(ET): Kangpokpi Town Committee (KTC) le Kangpokpi Town Churches Fellowship (KTCF) hon Lunseh Kipgen, Chairman, KTC lamkaina a Sunday nikhon Kangpokpi DHQ hop sunga um Insitutional Quarantine Centre chom chom a umho avil uvin ahi.

KTC Chairman pa amajong a insung mite toh community quarantine centre a aum nau phat akichai jouva IQC chom chom a umho vilna le tilkhouna nei dinga thulhuhna aneiyu ahi. Dan hi mijouse a dinga kibang ahi, tia amahi ‘home quarantine’ a umding ana nom louva a insung mite toh lha masa a Arunachal Pradesh a kon ahung kile jouva community quarantine centre a um u ahi.

Mopohna nei lamkai khat hina a dinmun ahetthem a, Town Churches Fellowship hotoh kihoukhomna asem a, centre a umho tilkhou dinga vilna nei dinga thulhuhna aneiyu ahi. Team a hi Officer-in-charge, Kangpokpi PS, Inspector Khogen jong pang ahi’in, Diamond English High School, MBC Hr. Sec. School, Kangpokpi Govt. High School, Tribal Girl’s Hostel, BJP Office, JNV Kangpokpi, Kanggui Christian College, Salem Academy, Yaikongpao UJB School le Tumnoupokpi Quarantine Centre avil uvin ahi. Kangpokpi DHQ hopsunga um IQC le CQC hojong pang ahi.

Ache nau centre jouse a KTC Chairman Lunseh Kipgen in aumho akimupi in, ahin, social distancing ajui uvin chule pontho a apan uva, dan ajui diuvin temna aneiyin ahi. Quarantine centre chom chom a um hon neh le chah chule umna kisuhlou jeh a hehna thu asei nau ato thu aseiyin, ahivanga athupi pen hi damtheina le lungthim kicholna ahijeh a imu kham kham a ahithei thei na a umgot a lunglhaina neiding hi ahi, ati. Sorkar in ahung kile jouse dinga abolthei chan abol ahi tihi ahetthem diuvin jong aseibe in ahi. Rev K Hangshing in centre a umho lhagao lam a tilkhouna aneiyin chule Evangelist Paoboi injong Nepali pao a aumho tilkhouna le taopehna centre jouse a aneiyin ahi.

Salem Academy a um CQC a KTC le KTCF hon Manipur gam a dinga centre a peng naosen masapen Emmanuel Quarantino vetna anei uvin, sum a kithopina le taopehna anei uvin ahi. KTC le KTCF hon Government chule District Administration hohi town a neh le chah kisemna a jong kithopina aneiyu ahi’in, KWWO le KYU volunteer hon COVID Emergency Food Kiosk a pan sangtah alah uva chule IQC chom chom a um ho neh leh chah thah na a jong pan alah u ahi.

Waikhom Mani Girl’s college Thoubal QC a boina um

Thoubal, June 7(ET): Tuni chun Waikhom Mani Girl’s college, Thoubal Quarantine Centre a boina neokhat ana soh in ahi. Kiphinna bolho lah a mikhat in aseina ah Test nivei kakibol uva negative kahiu ahitan discharge lekha in charge hon eipeh nom louvu ahi, Sum muthei sah na a eiumsah u ahi tin aseiyin ahi.

Kiphinna bol ho chun College chabi akhethong but loujeh uvin gate chu ana suseuvin ana domdoh uvin anapot uvin ahi.

Thulhut kimu dan in hiche QC a hi Covid-19 Positive khat aumjeh a inmate hon a incheh u jondinga kiphinna aneiyu ahi jong akiti.