Aug 19 news

Aug 19 news

237
0
SHARE

KhYU in Ingourok haosapu chung’a khutlha KNF-Z demna nei; Thilsoh KNF-Z in hilchetna pe

Imphal, Aug 18(ET): Monday nilhah nidan 5:30 vella hem le thal mangcha a melse tah a Ingourok Haosapu Thenkholal Khongsai kivohna chung’a Khongsai Youth Union in demna thuphon anei uvin ahi.

Satgoulal Khongsai, Secretary Information & Publicity min’a thuphon kimun aseina ah Suspension of Operation (SoO) noija um Kuki National Front – Zougam (KNF-Z) hon Ingourok Inpipu Thenkholal Khongsai chu achenna innmun akon amit akan uvin anapui doh un atahsa chung vetngam umlou tah in thisan naisan anaso uvin chuban in Santro Car jong atolmang peh uvin ahi ati.

Haosa hi Kukite chon na Custom Culture Institutional Head ahina dolla jana sangtah kinei ahin, Mipi/Japi nunao chapang mitmua jana neiloutah a Haosa khat chunga khut kilha hi vangset um akisa in hitobang lungneo na lungput neija haosa chunga khutlha a thisan so KNF-Z ho sangtah in demna akineiye ati. Chule milham chunga bangol je a kigihna neija khutlha hi khangtoulou ho umchan ahin haosa Upa chunga khutlha hi ngahphat ahitai.

Alangkhat a Information & Publicity Secretary KNF-Z in thuphon aneina a Thenkholal Khongsai hi Leimata gamkai a ding’a LTT kiloikhomna in command a akoi ahin, KNO thulhuh dungjui a KNO Operation Area a Non SoO um theilou ding ti thulhuh dungjui a action kila ahi tin Khongsai Youth Union thuso donbutna aneiyin ahi.

Aman aseibena ah Thenkholal Khongsai lamkaina noiya Lunkhosat Khongsai @Sasat, New Kungpi ana sollut in March 22, 2019 nichun Longphailum kho, Tamenglong District a Security ho leh LTT ho kikapto na in thina anatoh in alongdamsa KKL Cemetry a akivui ahi. Chule ama lamkaina mama in April lha chun LTT ho Leimata Area ahunglut uvin Thenkholal in agam sunga asel a Area sunga recruitment abol’a aman jong anung u ajui ahin, LTT Headquarter akon Santro Car khat leh manchah ijat ham khat ama mopoh na noija dinga issue ahin bol u ahi ati. August 6, 2020 nikho in jong Security hon Nohgin, Bongmol kho leh Paokam, New Kungpi kkho akon chu Loktak Project Komkeirap a 9mm Pistol khat toh anamat thao ahin, LTT ho thal ahi amani statement dung jui hetchen ahi.

KNF (Z) in tuni chan in gamsunga koima Phung leh chang ahi lou leh changval in koima chunga gahna akibol khapon bol jong kibol lou ding ahi. Ahin koi hi jong le hem le thal choi a gamsunga thilse bol ho vang itih a jong kimoh vetlou ding ahi.

KNO Operation Area a Non SoO um theilou ding ti thulhuh dungjui a action kila ahin tu nung tuma le Area sunga thuboi ahung um kit leh Khongsai Youth Union in mo nakipoh ding ahi tin jong aseiben ahi.

Xxxxxxxxx

Naga Peace Talk thu a boina sulham dinga PM in IB director nganse na nei

New Delhi, Aug 18: Prime Minister’s Office in Naga Peace talk suboi thei ding hiche thu a thingnoi kiloikhom ho chule Centre Interlocutor kah a boina aum agel khoh na thu aseiyin ahi. Intelligence Bureau Director, Arvind Kumar in kihouna lampi dih a ahin pui kit dinga Prime Minister Narendra Modi in nganse na anei ahi. NDTV thulhut dungjuiya, Ministry a senior official khat in achesa kum 6 sunga RN Ravi in Interlocutor hi na a Naga thingnoi kiloikhomna chom chom toh kihouna anei ahi in, ahivanga achesa lha 10 leh 11 sunga akihou nauva boina ato u ahi.

Arvind Kumar chule IB Special Director Akshay Kumar Mishra in boina suhlhap nadinga mopohna akilah dinga PMO in mopohna apeh ahi. Nagaland gam a NSCN-IM thingnoi ho, RN Ravi chule National Naga Political Groups (NNPG) kah a boina aum hi Centre in alungkhampi ahi. Ravi in BJP toh kiloikhomna neiya Nagaland a akilhengdoh sorkar demna anei hi asan thei louvu ahi.

Independence Day nikho a Ravi in ahoulimna a, “Nagaland gam a mipha pen chule natural resources phatah tah um ahi in, vangset umtah a tuni a hi gamsung hi India a dinga ‘worst-performing state’ hi ahi”, tia asei ahi. Alangkhat a, opposition party hon Framework Agreement thu a Centre demna anei jing nalaiyu ahi.

“Delhi in territorial boundary kikhel na umlouva Naga ho cultural identity thah kitepna anei ahi. Ahivanga tribe ho kah a jong boina tamtah um a, tuchan geiya alampi umlou lai ahi”, tin official khat in aseiyin ahi.

Xxxxxxx

Education Policy thah lolhing tah a akichepi nadinga Task Force akisem joutai: Education Minister

Imphal, August 18(ET): Education Minister Dr. Thokchom Radheshyam in gamsunga Education policy thah lolhing tah a akichepi thei nadinga special task force kisem na akijou in, gamsunga chepi pan dinga gontup sa ahitai, tin aseiyin ahi.

Education policy thah chepi nadinga National Education Policy, 2020 thu a Department of Education tohgon na noiya expert leh official ho toh giltah a kihou khom na chule meeting ho kinei ahi, tin Minister pa in aseiyin ahi.

Hiche chungchang thu a meeting athum vei channa Tuesday nikho a akibol in, Higher Education pe a Central officer ho leh DM University Principal leh official ho toh kihouna kinei ahi, tin Dr. Th Radheshyam in aseiyin ahi. Meeting sunga state a um Central Institution official ho leh principal ho toh National Education Policy, 2020 chepi ding thu a giltah a kihoukhom na kinei ahi, ati.

Meeting a Commissioner, Higher, Technical Education leh Vice- Chancellor, Dhanamanjuri University, M. Harekrishna, Joint Secretary, HTE leh Registrar DMU, Dr. Nivedita L, Director NIT, Prof. Dr. Goutam Sutradhar, Director, CDC, MU, Prof. Th. Ratankumar, CAU, NSU leh MTU a Registrar ho chule official ho jong apang uvin ahi.

Higher Education level jouse a seminar leh workshop ho gon ding, NEP 2020 thu lhangsap ding, Institution faculty jouse a NEP, 2020 copy ama ama Institution Head in ahop ding, government department chom chom kithopina lah ding ho thu panna a kihouna a ngaidan chom chom aseikhom uvin ahi.

Zonal Education Officers (ZEO) official ho leh Higher Secondary Education Principal ho toh ol a kihouna akinei kit e, tin Minister pa in aseiyin ahi. Meeting a hi boina leh hahsatna akitoh thei ho chule tua education policy thah hi phatah a akichepi thei na dinga semhoi ding dan thu akisei khom e, ati. Meeting a Commissioner, Education-S, T. Ranjit Singh, Director Education (S), L. Nandakumar Singh, Chairman COHSEM, L. Mahendra Singh leh mopohna nei official ho pang ahi.

Dr. Th. Radheshyam in Education policy thah hi India gam a education system apha pen peh ding tupna a kisem ahi, tin aseibe in ahi. Review meeting hohi Conference Hall, Samagra Siksha, Manipur mun a abol u ahi. Policy giltah a hetthem angai dan thu Minister pa in aseiyin chule stakeholder jousen policy akholtoh chet uva, policy kichepi na a ngaidan leh lunggel asei uva, pan alah diuvin jong temna aneibe in ahi.

Xxxxxxx

Covid-19 positive khat thi kit, natna a thi mi 18 lhingta; achesa nidan 24 sunga case athah 78 kimu be

Imphal, Aug 18: Tuesday nikho a Covid 19 natna jeh a mi khat athi kit toh kilhon a gamsunga natna jeh a thi mi 18 alhing tan ahi.

Health Additional Director Dr K Sasheekumar Mangang in asei dungjuiya, kum 75 a upa numei Covid 19 positive khat akijen na Jawaharlal Nehru Institute of Medical Sciences (JNIMS) Hospital a thi ahi. Athi nu hi Imphal West district mi ahi in, natna adang dang tamtah jong akop khom ahi.

Achesa nidan 24 sunga Covid-19 positive case 78 akimu be in, gamsunga natna nei agom a 4,765 lhing ahitai. Athah a kihet be case ho lah a hi security personnel 5 pang ahi. Dr Mangang in asei dungjuiya, natna nei milham 73 ho lah a Imphal West district a cheng mi 4 hi stae dang a kon hung kile ho ahi in, adang mi 69 hi gam dang a tu naicha akholjin na umlou ahi.

Local transmission case kisei lah a Imphal West a case 40, Imphal East a 16, Bishnupur a 9, Noney a 2 chule Thoubal a 2 ahi.

Achesa nidan 24 sung ma ma a Covid 19 a kon dam doh a mi 55 discharged abol tauvin ahi. CAPF 20, CCC Lamboi Khongnangkhong a 29, Lanva Churachandpur a 5 chule TK Ukhrul a mikhat hi RT PCR test abol nauva Covid 19 negative ahi tah jeh uva akijen nau mun a kon discharged abol u ahitai.

Gamsunga natna nei agom a 4765 (general 3544 leh CAPF 1221) ahi in, discharged kibol jat 2789 (general 2515 leh CAPF 274) ahitai. Active case hi tua 1958 um ahi in, hiche lah a milham 1012 leh CAPF 946 pang ahi. Chule recovery rate hi 58.53% a um ahi.

Psychological Support Helpline Number – 8787457035, 9402751364, 76299435961; Hospitalisation Helpline Toll Free Number – 1800-103-2015 leh Helpline Covid 19 Common Control Room Number – 1800-345-3818 hi aphat tin a kihong jing ahi.

Xxxxxxxxxxx

AMSU in Governor henga memorandum apeh na a ADGP Arvind Kumar pohgih lentah kipe hidinga aginmo nau thu seiyu

Imphal, Aug 18(ET): All Manipur Students’ Union (AMSU) in achesa July nisim 17 nikho a ama leh ama meithal a ana kikap Additional Director General of Police (Law and Order) Arvind Kumar hi pohgih lentah kipe hidinga aginmo na thu asei uvin ahi.

Thilsoh a Arvind Kumar vangphat umtah a sohcha ahi. “Achesa July 17 ni a ADGP Arvind Kumar in ama lamkaina a police department a natoh phat jeh a kipaman peh ding officer ho recommend bol ding committee toh kihouna anei jouva ama office chamber mun a ama leh ama meithal a kikap ahi”, tin Governor Najma Heptullah henga AMSU in memorandum apeh nauva asei uvin ahi.

Governor in ‘drug case’ a pang police personnel ho gallantry award akipeh thu sihnei langneina umlouva akhol dinga memorandum a ngehna anei uvin ahi. Tuesday ni a AMSU in lekha apeh lut nauva, Bishamayum Debson Singh, SI, CDO, Imphal East natoh dihlou akisosal jouva state sorkar in gangtah a Chief Minister’s Police Medal for Gallantry award apeh alahpeh kit apachat na thu asei uvin ahi. Debson hi tu masanga khamna thei poh jeh a ana kiman kha ahi.

SP Imphal East in Chief Minister’s Medal sang dinga proposal apehlut thu khol dinga K Radhashyam Singh, IGP (Intelligence), S Gautam Singh, SP-CID (SB) chule Joyce Lairemmawi, SP-CID (CB) panna a committee akisem doh thu AMSU in ahetpeh na thu asei uvin, hijong leh thukholna kinei hi amin mai mai abol uva, police personnel rank nem ho atodoh uva adang hon kihuhdoh na a aneidiu hilouva dihtah a abol dingu adeisah nau thu asei uvin ahi.

“Chief Minister Trophy fo Anti-Drug Campaign leh Chief Minister’s Trophy for Community Service Award a dinga list kipe olice personnel ho khamnathei kimat na case chule khamna thei a kivei ho kithopi a pang aume, ti tahsan umtah thulhut AMSU in anei ahi. Amaho hi suspend jong kibol a chule reinstate kibol kit ahi. Tua thukholna anei nauva hi iti dan a terminate/suspend kibol police personnel ho service a reinstate kibol kit a chule gallantry award sang dinga kilheng ham ti akhol diu ahi.

Gallantry award kipeh na a hitobang suhkhel lentah aumna amasapen ahipon, tu masanga jong ‘fake encounter’ a pang police personnel tamtah Republic Day leh Independence Day nikho a Gallantry award kipe ahi. Supreme Court in EEVFAM vs. UoL thu a thulhuhna anei dungjuiya, award kipe atamjo chunga charge-sheet kisem ahi. Hiche jeh a Gallantry awardee ho kilhenna leh recommendation kipeh na a adih a na toh a, mipi het theiya bol ding ahi”, tin AMSU in apehlut memorandum a aseibe uvin ahi.

Governor in pan alah a, thukholna phatah a anei uva chule retired Judge, High Court noilang hilou khat lamkaina a athu phatah a akhol diuvin temna aneibe uvin ahi.

Xxxxxx

CM Biren in BJP national president JP Nadda henga gamsung politics dinmun hetsahna nei

Imphal, Aug 18(ET): New Delhi a kholjin Chief Minister Biren Singh in Tuesday nikhon BJP national president kimupi dinga kouna aneiyin, Manipur gam a politics dinmun ho hetsahna aneiyin ahi. Tu naicha Congress party membership hina a kon haina neiya MLA anahi mi 6 ho leh Chief Minister N Biren Singh tua hi New Delhi khopi a BJP centre lamkai ho toh kimuto dinga um u ahi.

Haina neiya MLA 6 hohi kal masa a anaum legislative assembly a one-day session abol nauva trust vote a vote ana pe louva Congress MLA 8 ho lah a pang ahi in, BJP in voice vote a ‘trust vote’ abol u anajo u ahi. Amaho hi achesa Sunday nikho a New Delhi jon a kipan doh u ahitan, thulhut dungjuiya BJP party a akilahlut nading u thu toh kisaiya kholjin u ahi.

Congress MLA anahi mi 6 hohi Centre a lamkai hon kihoupi dinga kouna aneiyu ahi, tia thulhut in asei ahi. INC MLA anahi mi 6 lah a mi 5 hi BJP party a lut ahi. CM anahi chule CLP lamkai Okram Ibobi Singh sopi cha hi a MLA Henry Okram Singh in thuso miho telephone a akihoupi na a, “Mi 5 BJP party a kalut diu chule Md. Abdul Nasir (Lilong) hi party dang a lut ding ahi”, tia asei ahi. Ahivanga, Nashir hi ipi party a alut ding Henry in aseibe lou ahi.

Alangkhat a, Manipur Congress in haina nei MLA ho demna aneiya, politics ethics jui ding ahi, tin asei uvin ahi. Congress MLA anahi tua BJP a lut mi 5 hohi Henry Okram Singh, Oinam Lukhoi Singh, Ngamthang Haokip, Ginsuanhau leh Paonam Brojen ahi. Thulhut dungjuiya CM Biren Singh achanu jipa leh Congress MLA RK Imo Singh jong Delhi a che ho lah a pang ahi.

CM Biren in tu masanga MLA anahi hotoh centre a lamkai ho Delhi a kakimupi uva chule BJP a lahlut nadinga kouna kaneiya, lamkai hotoh kakihet to sah ding ahi, tia anasei ahi. Tuchan geiya New Delhi khopi a um Congress MLA anahi ho hin centre a BJP lamkai ho akimupi u hitam, ti photchenna thulhut umlou lai ahi.

Xxxxxxxxx

Assam Rifles hon Dk. crore 1.60 man dan in aphal lou thil chule thil po mi 4 man

Imphal, Aug 18(ET): Assam Rifles hon HQ IGAR (South) makaina noiya Tuesday nikhon dangka crore khat leh sang somgup man vel hiding cigarette chuleh dan in aphal lou thil tamtah aman uvin ahi.

Yairipok vel a dan in akha thil akipo e, ti thuguh sepai hon amu jouva Yairipok-Hongbi lamlen a Mobile Vehicle Check post asem u ahi. Team hon dan in aphal lou thil po hidinga aginmo u gari akang thum chule Maruti gypsy (green colour) khat akham u ahi.

Gari ho phatah a akhol uleh WIN cigarette packet 34,500, Esse Light cigarette packet 1,000, thoukang lou box 11, tinned fish box 4 leh Mikko thoukang lou 6 panna a thil dang dang amat u ahi. Dan in akha thil po a mi 4 jong aman tauvin ahi.

Akiman mi 4 hohi Khundung a cheng Benjamin (52), Chakma a cheng Ningthar (55), Chakma a cheng Somi (48) chule Lilong, Imphal a cheng Amzad (40) ahiuvin, chule akiman dan in aphal lou thil hohi agom a dangka 100,60,000 vel man hiding ahi.

Akiman thil chule miho abon uva Customs and Excise Department khut a apedoh tauvin ahi.

\xxxxxx

RD & PR noi a tohgon ho chelhah dan Minister Biswajit in velvetna nei

Imphal, August 18(ET): Rural Development and Panchayati Raj noi a tohgon chelha ho Rural Development and Panchayati Raj Minister Shri Thongam Biswajit Singh makainan tunichun velvetkhom kihouna New Secretariat minister conference hall ah achelha e.

District thah ho a Deputy Commissioner ho chu MGNREGS thu a District Programme Coordinator mopohna jong atuhtha ding a kihou sung a seilhah ahiban a district thah 7 hon hiche tohgon chelhah nadia angaichat ho hin pelut cheh ding in jong minister chun ahetsah e.

Chule tukum October lhakim kah a tohding bituh jat jong tongdoh tei ding le September kah a job card nei jouse bank account honsah soh kei ding in Biswajit in official le Deputy Commissioner ho athuhil e. Chule RD & PR noi a tohgon chom chom chelhah dan jong kihoukhom sung chun seikhomna jong anei uve.

Kihoukhom na a chun Addl. Chief Secretary RD&PR Dr.Suhel Akhtar, DC, DPC le department official ho jong apang un ahi.

Xxxxxxxx

Thisan penom phalpih lou thu a MHRC in Dr. K. Rachandra Singh, Assistant Professor, RIMS kouna nei

Imphal, Aug 18(ET): RIMS Imphal blood bank a June 28, 2020 jingvai nidan 10:15 a thisan pedia che Meitram Sanatomba @ Sana Meitram chu Department of Immunohematology and Blood Transfusion, RIMS a tong Dr. K. Rachandra Singh, Assistant Professor le junior doctor hon thisan apeh got ana phalpih lou seh hilou in, kinelna sangtah jong ana sohdoh in, hiche thilsoh jou a pat Meitram Sanatomba chu imuthei lou, kichatna nei jing le lungthim natah in ana um lo e. Hitia umdan kikhel leu a aum hin chapang ho gei le a-insung mi ho lungsung anatsah in chule Sanatomba jong thisan pehding phalpih ahilou a pat atahsa jong khesuh cheh ahi.

Chuphat a RIMS Psychiatry OPD a July 6, 2020 Monday nia kivetsah a July 15, 2020 nia akivetna thulhut (report) pehdoh a um chu MHRC a apehlut ahi.

Hiche thilsoh kihoucham pi dia Dr. K. Rachandra Singh in July 5, 2020 nia ajinu Sanatomba in a asol chu Sanatomba ana umlou pet ahi in hinla Sanatomba jinu chu anop chabep in ana han khum ahi.

Ajinu ngeh dungjui in July 6, 2020 jingvah nidan 11:30 velchun Imphal West Babupara SSA office ah Sanatomba ache in ngaidam kithum to in thilsoh chu seicham ana hi e.

Hitia kihoucham nung July 7, 2020 nichun Dr. K. Rachandra Singh in michom chom mang in Sanatomba gihna abolsah in, aji acha toh hinkho nom mo tah in amang un, hitolhon a Sanatomba in thilsoh thu seilham dia MHRC kom a hehna apehlut ahi.

Hehna bol Meitram Sanatomba kum 42 chu Sega Road Takhelambam Leikai, near City School,PO & PS Imphal,Imphal West District ,Manipur 795001 a cheng aumtalou Meitram Ibopishak Singh chapa ahi in, donbutna pe ding chu Director RIMS le Department of Immunohematology and Blood Transfusion, RIMS a tong Assistant Professor Dr K Rachandra Singh hilhon ding ahi.

Xxxxxxx

Ashok Lavasa apanmun Election Commissioner a kon hai

New Delhi, Aug 18: Kumkit a Election Commission panmun lubuh tuhthei dia um Election Commissioner (EC) Ashok Lavasa in apanmun a kon haina lekha tunichun President Ram Nath Kovind kom a ape e tin ama kinaipi khat in aseiye.

Haryana cadre IAS officer pa hin tu a apanmun EC hi kum 2 lhingdeh tuhthei nahlai le Sunil Arora a  kon Chief Election Commissioner (CEC) panmun hin lo ding ahinalai e.

Tu a apanmun adalhah tolhon a panmun lubuh chu dia EC Sushil Chandra hi pang thei ding ahitai.

Lavasa hin union finance secretary ban a panmun len dang jong ana tuh ahi. Lavasa hin West Bengal, Manipur, Goa, Punjab, Uttar Pradesh, le Uttarakhand election jong ana vetkol ahi e hinla September lha a Asian Development Bank (ADB) panmun alo ding nikho chet vang aseidoh pon ahi.

ADB in vice-president panmun a dia Lavasa apansah thu jong July 15 nia ana phondohsa ahi.

ADB in aseikitna ah Lavasa hin Indian civil service a panmun poimo tamtah ana tuh lah a het thei ho chu Union Finance Secretary, Union Secretary, Ministry of Environment, Forests, and Climate Change; le Union Secretary, Ministry of Civil Aviation le tu le tu a Election Commissioner panmun tuh, hetna tamtah nei ahi, ati.

Hetding chu achesa 1973 kum a International Court of Justice Hague A panmun lo dia EC panmun dalha Nagendra Singh ban a EC panmun dalha a haina neikit hi Lavasa ahi e.

Singh chun apanmun adalhah masang a India president kom a na ana toh ahi.

Lok Sabha election model code of conduct kal a Prime Minister Narendra Modi le Union Minister for Home Affairs Amit Shah houlimna anei chungchang thutanna jong Lavasa in ana bol ahi e.

Hiche chung a Balakot thilsoh thu in mipi panpina athum e tia Lavasa in PM Modi chu themmo ana chan ahi.

Lavasa chapa director hina Nourish Organic Foods jong Income Tax in akhol jinglai ahiban a ajinu Noel Lavasa le a-insung mi ho Income Tax department in avetlhih jing ahi.

Xxxxxxx

Facebook a langnei tah a thu kisei ho kholchilna neidia Congress in Mark Zuckerberg lekha thot

New Delhi, Aug 18: Facebook a deisahna neitah a Bharatiya Janata Party (BJP) thu kithethang jing thu kholchilna neiding in congress party general secretary (organisation) KC Venugopal in tunichun Facebook CEO Mark Zuckerberg lekha athot tan ahi.

Venugopal in hitobang a party khat deisah tumna Facebook a thu kisei chungchang hi thilpha lou tah ahi tolhon a kholchilna hi ngaikhoh ahi e tia asei ahi. Chule 2014 a pat Facebook a vetda na thu kisei ho mipi het a tahdoh dia congress chun ngehna anei ahi.

Wall Street Journal thuso chung a hi congress le BJP kah a sangtah a kinelna jong ana sohdoh a Rahul Gandhi in BJP le RSS khutnung dan a asei jong Union IT minister Ravi Shankar Prasad in khoutah a ana nelkal ahi.

Chule Congress le CPI (M) in joint parliamentary committee in kholchilna aneidia ngehna aboljong  Union parliamentary affairs minister Prahlad Joshi in ana kahlhah ahi.

Tunia congress in ngehna lekha athot hi Facebook in adonbut nailou ahi.

Xxxxxxxx

Tathagata Roy khel a Satya Pal Malik Meghalaya Governor a pansah hi

Shillong, Aug 18: Kum 5 phat akichai tolhon in Tathagata Roy thakhel ding in Satya Pal Malik chu Meghalaya Governor panmun lo ding in tunichun akondoh tan ahi.

Rashtrapati Bhavan thuso in Malik Meghalaya Governor dia asol ban in Maharashtra Governor Bhagat Singh Koshyari chu Goa Governor mopohna jong apehtha e.

Roy hin Tripura Governor panmun kum 3 atuhjou a kum 2 sung Meghalaya governor mo apohkit ahi. Alhangpi a governor hin kum 5 phatsung a mo apoh hijongle E S L Narasimhan chun kum 12 sung in Chhattisgarh, Andhra Pradesh le Telangana governor panmun ana tuhkit e.

Lhakit a tahsa kum 75 lhingding Roy in CRPF kibulu a mi 40 in thina ato a pat retire army khat in Kashmir thil khamgah dia ana sei atosot jeh a jong ana minse sa ahi.

Roy chun Rashtrapati Bhavan a pat thulhut amu mu a chu Satyapal Malikji chu akihoupi a Shillong a dia liemna anei pai ahi.

Roy in kaphat hi May 20 a kichai ding ana hi chu tun ahunglhung bep e, ati.

Roy in August 2018 nia Meghalaya governor panmun ana lo pan ahi. Chule Malik kum 73 hin October 31, 2019 nia Ladakh le JK tia Jammu and Kashmir union territory a kihop khen masang a governor panmun ana tuh ahi.

Xxxxxxxx

India aheng akom gam 5 toh huikong lentosah dia asem nalah a Pakistan panglou

New Delhi, Aur 18: Covid-19 natna in international huikong kitol asuhboi jing lai tolhon a heng le kom gam 5 toh huikong a kichot to ding tohgon akinei e tin civil aviation minister Hardeep Singh Puri in tunichun aseiye.

Puri in Sri Lanka, Bangladesh, Afghanistan, Nepal le Bhutan toh huikong lentosah din kihouna akinei in Pakistan vang akipansah pon, India mi gampam a ohden ho puidoh nading a hiche tohgon hi kigong ahi, ati.

Gampam a ohden ho Vande Bharat Mission (VBM) noi a puidoh ding huikong hobou tu a hi phal na India in apeh ahi in, tu le tu a hi USA, UK, France, Germany, UAE, Qatar le Maldives a huikong kisol bang a gam 13 a huikong sollut ding jong India in tohgon anei ahi. Hiche gam ho chu Australia, Italy, Japan, New Zealand, Nigeria, Bahrain, Israel, Kenya, Philippines, Russia, Singapore, South Korea le Thailand ahi e tin Puri chun aseiye.

Gamdang toh huikong lentosah dia August 15 nia Canada gam a ana kisol chu anukhahpen ahi.

Xxxxxx

Northeast sung mun chom chom akon Myanmar mi lekha sim a hung 24 lam kithah doh ta

New Delhi, Aug 18- Ministry of External affairs  Government of India le Myanmar Government in kihtokhomna ana nei utoh lhon in Tengnoupal District a Deputy Commissioner M. Rajkumar IAS le Myanmar, Tamu District a Deputy  Commissioner  Kyaw Win Oo in kijah mat tona ana nei hontoh lhon in Myanmar akon lekha sim a India usng a um mi 24 lam Moreh college a quarantine a ana um jou utoh lhon in Sub-district Hospital Moreh a staff ho in ambulance khat a ana thah doh taovin ahi.  Myanmar simlai ho chu 24 Integrated Check Post ICP a Thermal Screening kibol jou a Indo-Myanmar Friendship Bridge a ana kipedoh a Myanmar Authority ho ang ana kilhut ahi akiti.

Xxxxxxxxxxxxxxxxxxxxxxxxxxxxxxx

Moreh college full fledged college hita

Tengnoupal, Aug 18: State Government thupeh dungjui a Moreh college full fledged college a ana kiphondoh toh lhon a hitabang tohgon hin alhang sung a themjil nalam a nasatah a machal na ahin pohlut ding dan hetsah na ahung kinei in ahi. Hitabang tohgon hin Moreh le akimvel ho a nu le pa te chuleh simlai ho kinepna lentah apeh ding ahi akiti.

Hitobang tohgon hung kinei na ding a panla jouse chung in Moreh college vaipo ho in kipa thu seina jong ahin nei uvin ahi. Hitabang tohgon hung lhun na ding ahi keile ka innei pu OM Haokip, hiche college chaiman ana hi in pan nasatah kana lah lhon ahi tin CHinneivah Haokip, MDC Chandel in hetsah na ahin nei in ahi. Hiche toh lhon a college a jilkung a pang ho le natoh na dang dang nei ho in abol ding uva lom phate a akibol ding uvinjong MDC nu chun temna ahin nei in ahi.

xxxxxxxxxxxxxxxxxxxxxxxxxxxxx

BJP Minister 2 lahdoh ding a um

Imphal, Aug 18:  BJP sung a boina jat chom chom anaum jing toh lhon in Chief Minister N. Biren in tuni in BJP Minister 2 lahdoh ding ahidan hetsah na ahin nei in ahi. Thuso kimu dungjui in Congress akon BJP hin jop ex-MLA ni chunga hiche panmun hi pehding ahidan jong hetsah na ahung kinei in ahi.

Minister panmun akon lahdoh ding teni chu Heirok Assembly Constituency MLA, Th. Radheyshyam Education, Labour and Employment LE  Churachandpur Assembly Constituency akon V. Hangkhalian Agriculture,Veterinary & Animal Husbandry ahi akiti. Boina toh kisai a Governemnt jong keh thei ahijing nahlai dan jong thuso chun asei be in ahi.

xxxxxxxxxxxxxxxxxxxxxxxxxxxxx

KYKL in a 27th vei channa Martyrs Memorial Day mang

Imphal, Aug 18- Manipur galguh bol Kanglei Yawol Kanna Lup (KYKL) in tuni in Athoubasingi Ningsing Numit (Martyrs memorial day ) ana mang uvin ahi.

Tuni kingon achun WESEA region a chamlhat na ding a ahinkho ana phal doh hoc hung a jana salam ana kipe in ahi. Hiche kingon chu kiloikhomna battalion 1,2 le 3 ho camp a ana kimang ahi. Hiche kingon pi chu 1st battalion a ana kimang ahin Commanding officer (CO) Captain Dhana, Meeyam-gi Yawol Lanmee (MYL) le Chief of Army Staff, MFL/KCP H. Ibomcha teni in kinei pa le jin gun hina panmun ana lo lhon ahi.

Kingon achun Captain Robin jong chu jin ja um in ana pang in ahi. Kingon kiman na achun aum talou army ho geldoh na in minute 2 thipbeh in ana ki um in, covid natna doudal na a frontline a pang ho jana pehna jong ana kinei in ahi. Kingon achun KYKL lamkai ho in politices le sum le pai lama chamlhat na nei ding apoimo dan tahlang na ana nei uvin ahi.

Xxxxxxxxxxxxxxxxxxxx

MCS akon IAS kaisang

Imphal. Aug 18- Manipur State civil service phabep IAS in ana kaisang uvin ahi. Tohmun hung on toh lhon a akaisang dinga lhendoh anahi ho chu Anna Arambam, Ranjan Yumnam, Rangnamei Rang Peter, Kimjalhai Kipgen le D. Gangmei ahiuvin ahi.

xxxxxxxxxxxxxxxxxx

China toh gamgi thu a kiboi toh kisai a Naval commander ho in kihoukhomna nei ding

New Delhi, Aug 18: India sung a naval commander ho in New Delhi mun a August nisim 19 nikho akon a nithum conference aneiding u ahi akiti. Defence minister Rajnath Singh in hiche conference kipat nikho le houlimna anei ding lamkai ho vailhun na jong aneiding u ahi akiti.

Hetthei khatchu Navy ho jong hi twi khanglen a India le China hung kiboi a pat kiging sa a um u ahi. China in twi lam a ahin nokhum ding ginchat ahi jing toh lhon a kiginna hi ana nei peh u ahi akiti.  Hiche conference hi navy chief Admiral Karambir Singh makai na a kibol ding ahin, covid chungchang a kivenna a panlahding dan thu jong kihou khomna a pang ding ahi akiti. Hiche conference ahi covid akon kiven ding dan le hiche akon a iti hinkho man a natoh toh kop thei hiding ham ti ho jong seikhomna kinei ding ahi akiti.

China in twi chung a muntin a gam ahin lo jing toh lhon a India in jong kigotna nasataha kinei ahi tin maritime affairs expert Rear Admiral Sudarshan Shrikhande (retd) chun asei in ahi. Commander ho in hiche kihou na ahi kithokhom a iti panlah ding ham ti ho jong seikhomna aneiding u ahi akiti. Indian kong ho hi Persain guld chan a che le thei ding a kisem ahitan ahi.

Xxxxxxxxxxxxxxxxxxxxxxxxxx

India a Covid case thah 55,079 lam um, achesa nidan 24 sung a mi 876 lam in thina toh

New Delhi, Aug 18: India sung a achesa nidan 24 sung in covid-19 case thah 55,079 lam athah beh in akimu in chuleh mi 876 lam in thina ana toh uvin ahi.

Tu chan a hiche natna nei hi mi 27 Lakh aval tan ahi akiti. Covid case hi tu chan ahi India sung a 27,02,742, um a chuleh athi hi mi 51,797 lam lhing ahitan ahi. Hetthei khatc hu India sung a Covid case hi achesa August nisim 7 achu lakh  20 an akhel ahitan ahi. Indian Council of Medical Research (ICMR) akon thuso kimu dungjui a August nisin 17 channa sample test kiboldoh hi 3,09,41,264 lam lhing ahitan ahi akiti. Achesa Monday nibou achu gamsung a test kibol doh jat chu 8,99,864 sample ana hi ahi.

xxxxxxxxxxxxxxxxxxxxxxx

Kuki galguh bol ho SoO lhagup kisusao be

IMPHAL, Aug. 18: Kuki galguh bol hotoh  Suspension of Operation (SoO) chu ana kisusao be in ahi. Kuki National Organisation toh suh sao be na chu February 28th 2021 chan a ding a suh sao be na ana kinei ahi. Thuso kimu dungjui in hiche kisuhsao be na chu kihou lhah na ana umtoh lhon a lha 6 a suhsao be ding a kinoptona kinei ahi akiti.  Hiche soi kai na achun Special secretary (Home) government of Manipur, H.Gyan Prakash le Addl. Director General of police (Intelligence) Manipur, Ashutosh Kumar Sinha IPS teni in panlah na ana nei in chuleh KNO lam akon in  David Hangshing, T. Samuel Kuki le TS. Haokip ho in panlah na ana nei uvin ahi.

Xxxxxxx

UCM in Dharma Rakshak Samiti ho gihna nei

IMPHAL,  Aug. 18(UNA): All Manipur Dharma Rakshak Samiti in UCM General Secretary Khuraijam Athouba Facebook post chung chang a ngohna ana nei uchu ni thum sung a suh dih na le amona ho hilchetna ahung nei lou ule daan toh kitoh a gotna kipe ding ahi tin UCM in hetsah na ahin nei uvin ahi. UCM Information and Public Relations Secretary BM Yaima akon thuso kimu chun asei na a “All Manipur Dharma Rakshak Samiti” kiti kiloikhomna khat in UCM General  Secretary Khuraijam Athouba August 12 Facebook post “Happy Birthday Womaniser .. You are Goat to many …” chung chang a suh theng na le ngaidam thumna ahin nei ding a hetsah na ahin nei utoh lhon a kiloikhomna in Samiti office anakihol a akimu loutoh lhon a akin thei pen a kiphonna ahin nei ding uva hetsah na ahin nei u ahi. Samiti lamkai hiding a kihe khat houpi ding a phone ana kibol na a aki pick lout oh lhon a UCM in Samiti toh tuni nilhahlam nidan 4 a kiloikhomna teni kikah a kihou na nei ding a tohgon kinei na a koima ahung loutoh lhon in hitabang kiloikhomna sakho mina kisem a mi kiloikhomna suh minset ding a hung kigong kiti hi angai na ahipoi tin UCM akon thuso kimu chun asei inahi.

Xxxxxxxxxxxxxxxxxxxxxxxxxxxx

Nagaland a COVID-19 case 3,500 vaalta

Kohima, Aug 18: Nagland sung a mi 65 athah beh a covid-19 positive ana hi utoh lhon in confirmed case 3,500 aval tan ahi. Tu le tua state sung a case an akiudoh jat hi 3,520 ahi akiti. Caase thah ho lah a chu 41 chu Kohima akon, 23 chu DImapur akon chuleh khat chu Mon akon ahi akiti.

Tu chan a Dimapru sung a case umjat hi 1796 ahin hiche lah achu active case 1153 ahi akiti. Kohima a case kimu doh jat hi 976 lam ahin chuleh tu le tua natna nei hi 639 lam ahi akiti. Mon district sung a case 264 lah a tu le tua positive case hi 72 ahi akiti. Nagaland state sung ading a covid case tamnapen hi DImapur ahi aban a Kohima ahi akiti. State sung a covid natna kimudoh na lou district hochu Phek, Kiphire le Longleng district ahiuvin ahi.