Atuppan tupdoh tei (BJP hon abanban’a hinboldoh, Naga Peace Talk akivat khat...

Atuppan tupdoh tei (BJP hon abanban’a hinboldoh, Naga Peace Talk akivat khat hi)

97
0
SHARE

Atuppan tupdoh tei
(BJP hon abanban’a hinboldoh, Naga Peace Talk akivat khat hi)
Achesa December 11 (2019) ni’a Raja Sabha in CAB pass abol chu BJP hon sotna pat ana tup u khat atupdohnau ahikit tai. BJP hon boldoh dia agot u athupidom ho tuchan’a hi abanban’a ahinboldoh u ahi. Amasapen’a Jamu & Kashmir a Article 371 lahdoh anahin, aban’a Ayodha a Ram Mandir sahdohdi ti kum tona pat vote holna’a ananei uchu tuchung’a Supreme Court thaneina noija boldoh ahung hikit jong BJP ho tohdoh thupipen khat ahung hidoh kit tai. CAB (Citizenship Amendment Bill) hi ningkum’a Lok Sabha a pass anakibol vang’a Raja Sabha a anajolou u ahi. Tu Term a vang BJP hon Raja Sabha a-jong vote tamjo aneitah jeh uva pass akiboldi jong hetsa anahi. Ahin Lok Sabha leh Raja Sabha ah MP/Vote tamjo kanei naove tia amohbol jeng u hileh BJP/NDA sung’a CAB deilou MP jong tam kit anahi jeh a aboidi ahet jeh uva ipi lampi’a jotei diham ti agel u ahi. Hichena dia BJP/NDA sung’a CAB deilou ho suhlunglhaina dia CAB hin ILP leh Sixth Schedule chena ho ahuop loudi ti ahinboldoh u ahi. Hiche jeh a Manipur’a ILP chesahdi chuleh Sixth Schedule chena a CAB chesahloudi ti ahinboldoh masat u ahi. Hiche hi BJP lamkai ho chihna ahi. Ipi hileh Politician hohin ama ama phatchomnadi ahileh agam pumpi mipi dia thilpha ahi tia asei jeng thei u jong hikit chu hiche CAB thua muthei ahikitne.
Manipur sang’a Meghalaya a Ruling party NPP hin CAB pass akibolpou pouleh NDA a kon potdot jeng dia gihna ananeijing chu tua NPP hon Meghalaya a jakhat lah a somkole sagi (97 percent) hi Sixth Schedule noija kivaipohna ahijeh in CAB jong cheloudi ahitolhon’a support kibol ahi ahinti ahi. CAB jahda (oppose bol) teitei hojong Opposition party – Congress, Trinamul leh opposition dang dang ho ahijeh un athu (bill) hi adih adihlou, aphat aphatlou thu hibehseh talouva Ruling leh Opposition thua bou chedan’a um ahitai. Assam hi BJP vaipohna ahivang’a CAB douna’a Student ho lamkaina’a mipi kiphinna angaija umthou thou ahi. Hiche hi North East State holah a Assam bou hi CAB chesahna dia kitup/kisei ahidan mutheina jong ahi. NRC noija Bengali Hindu ho Assam a Citizenship kahlhahpeh mi Lakh 12 lah a mi Lakh 5 vellin CAB noija Assam Citizenship amu thouthou diuva umdoh kit ahi.
BJP hohin ipi Bill hileh Parliament a apohdohdoh u pass bol khamdi MP aneipet u ahijeh uva tuchan’a boldia agot ukhat ahinboldoh jom u ahitah jeh a aban ahinboldiuva ginmo Hindu hilou ho dia kichat umpen hi Uniform Civil Code (UCC) hi ahi. UCC hi India sung’a nam leh hou le tahsan jouse – Hindu, Muslim, Christian, adang dang leh le chondan (culture) chomchom nei jousen “Civil daan” – kichen, kida, gam thua kiboina ho, adang dang ho dia daan kibang neikhomdi ti ahi. BJP hon boldoh dia agot lah uva Naga Peace Talk thua achaina neidi tijong avat nalai ahi. CAB deilou hon Parliament ah pass kibol jongleh India danpi a Article 14 (mijouse kibahna) le Article 15 (ipi thu hileh khentum neilou) toh kikal ahijeh in Supreme Court a Case kibol thou thoudi ahi atiuvin tahsan vang umdehlou ahi. Ahat hat kijuina leiset ahijeh in BJP hon kum 5 sung’a aban ipi hinbolbe jongleu adeilou honjong atosot jeng diuva um ahi.