Assembly in Dk. 25,69,90,14,000 lhing ‘Demands for Grants’ 6 phatsah; Phaicham leh...

Assembly in Dk. 25,69,90,14,000 lhing ‘Demands for Grants’ 6 phatsah; Phaicham leh thinglhang miho kah a boina soh louva ‘land ownership title’ peh ngai ahi, tia Chief Minister in sei

67
0
SHARE

Assembly in Dk. 25,69,90,14,000 lhing ‘Demands for Grants’ 6 phatsah; Phaicham leh thinglhang miho kah a boina soh louva ‘land ownership title’ peh ngai ahi, tia Chief Minister in sei

Imphal, February 25 (ET): 11th Manipur Legislative Assembly in Tuesday nikhon dangka 25,69,90,14,000 lhing Demands for Grants 6 phatsahna anei tauvin ahi.

Demand hohi – Rs. 172,52,03,000 (Demand No. 4 – Land Revenue, Stamps & Registration and District Administration), Rs. 2294,19,78,000 (Demand No. 5 – Finance Department), Rs. 70,78,95,000 (Demand No. 25 – Youth Affairs and Sports  Department), Rs. 18,15,14,000 (Demand No. 28 – State Excise), Rs. 7,33,26,000 (Demand No. 29 – Sales Tax, Other Taxes/Duties on Commodities & Services) chule Rs. 6,90,98,000 (Demand No. 42 – State Academy of Training) ahi.

Demand No 4- Land Revenue, Stamps & Registration and District Administration thu asei uva vote abol nauva CM Biren in House henga gamsunga um thinglhang gamkai jouse ‘land law’ achom a survey bol angaiyin chule phaicham leh thinglhang miho kah a boina soh louva ‘land ownership title’ peh ngai ahi, tin aseiyin ahi. Hiche hi khosung mihon government scheme bailam tah a amu thei nadiu ahi, ati.

Adeh a thinglhang district a lamkai hon ‘survey’ kibol na a atosot diuvin temna aneiyin ahi. Chule phaicham ho chintup angaiyin, hiche jeh a Conservation of Paddyland and Wetlands Act, 2014 kisemdoh ahi, ati. Sorkar in gam leiset hi thil sahna dinga ki kehlen akingahna dinga Imphal a ‘vertical official quarter’ sah nading natoh anei ahi, tin CM in aseiyin ahi.

Sorkar in chenna ding/housing, market, government institution leh adang dang a dinga mun gontoh nadinga ‘overall planning’ achepi got ahi’in, hitobang hi district jouse a jong ngai ahi, tin aseibe in ahi. Revenue Minister jong hi a Karam Shyam in Tax Collection estimate dangka lakh 270.18 lah a Revenue department in 266.44 lakh amu ahi’in, hiche a hi phaicham a kon revenue tax a kimu dangka lakh 240.55 leh Hills House Tax a kimu 25.89 lakh jong pang ahi, ati.

Jiribam district a survey hop 90 kijou ahitan, hiche mun a um hon dan dungjuiya Hills House tax hilouva Revenue Tax apehdiu ahi, ati. District Boundary Commission jong akisem in, ahivanga natoh kipan loulai ahi, tin Karam Shyam in House a aseiyin ahi. Commission in natoh ahin pat teng le district gamgi thu a boina ho kisulham ding ahi, tin aseiyin chule thinglhang kho hohi survey kibol gam ahilou jeh a kho leh kho kikah a gamgi thu ho aseilhah hahsa ding ahi, tin aseiyin chule thinglhang kho hon survey kibol atosot diuvin temna jong aneiyin ahi.

General Financial Rules (GFR), 2017 hi boltei ngai ahi, tin Chief Minister Biren in Demand No 5- Finance Department thu a akihoukhom nauva aseiyin ahi. Finance portfolio jong tuh a House lamkai Biren in ‘Outstanding Debt’ hi kum phabep sunga nemsuh ahitai, tin aseiyin chule March 31, 2011 a Gross State Domestic Product (GSDP) 67 percent a kon March 31, 2019 kum a 40 percent a nemsuh ahi, ati. March 31, 2020 a sorkar in bat hi 37.88 a suhnem ding chule March 31, 2021 a 35.91 percent a nemsah dinga tupna anei ahi, tin aseiyin ahi.

State Own Tax Revenue jong 2016-17 a 586 crore a kon 2017-18 a 790 crore a kal ahi’in, tukum a jong kal cheh dinga kisei ahi, ati. Youth Affairs and Sports Minister Letpao Haokip in Lairikyengbam Leikai a um Astro Turf Football Ground complex a toilet sah dinga kitepna aneiyin chule PWD, IFCD leh MDS kiti mopohna nei department hotoh amun chan lamlen sah nadinga department in aseiding ahi, ati.

Government natohna ho a ‘sportsperson’ ho dinga 10 percent reservation um ahi’in, aboldoh chule lekha asim sang dungjuiya incentive jong um ahi, tin aseiyin ahi.

State Excise thu aseikhom nauva Excise in-charge jong hi a House lamkai Biren in State Excise in 2017-18 kum a revenue dangka lakh 38.73 amu’a, 2018-19 kum a 44.97 lakh amu a chule January 31, 2019 chan a lakh 43 amu ahi, tin aseiyin ahi. Natong ding mi alhahsam vanga State Excise in police chule CSO chom chom toh pan alahkhom a 2017-18 a case 2893 chule 2018-19 a case 3197 um ahi, ati.

Opposition MLA K. Ranjit Singh, Dr. Chaltonlien Amo, D. Korungthang, Md. Abdul Nasir, Kh. Joykisan Singh, RK Imo Singh, Surajkumar Okram leh K. Meghachandra in Demands for Grants thu asei sung uva ‘policy cut motion’ aphatsah lounau thu apodoh uvin ahi.

 

Delhi a CAA thu’a boina athah a asokit jeh a thina toh mi 13 lhingta, mi 150 val kisukha

NEW DELHI, Feb 25: New Delhi khopi a Monday nikho a Citizenship Amendment Act (CAA) toson holeh adoudal ho kikah a kinahna thilsoh sangtah aumin, thilsoh a  thi mi 13 alhing tan  chule mi 150 val akisukha e, Guru Tegh Bahadur (GTB) Hospital in Tuesday ni thuso abolna ah aseiyin ahi.

Boina aumjeh a North East District, Delhi a mun 10 a Section 144, CrPC kikoi ahitai. Aboina mun Jaffrabad, Maujpur-Babarpur, Gokulpuri, Johri Enclave leh Shiv Vihar kiti mun khoh ho a police tamtah aum uvin ahi. Delhi Police Special Cell leh Economic Offence Wing (EoW) official hon boina thilsoh jouva khopi sunga dinmun phatah a anga u ahi.

Northeast Delhi a paramilitary sepai company 35 chule Special Cell, Crime Branch leh Economic Offences Wing official ho amun a asol uva chule district chom chom a Delhi police hojong kikou lut be ahi, tin Delhi Police hon thuso anei uvin ahi. Kivenna dinga Welcome metro station a train tamtah alhaisah tah louvu ahi.

Monday nikho a North East District, Delhi a kinahna thilsoh a hi Head constable khat panna a mi 7 thi ahi. Kinahna a thi milham ni hi Shahid leh Furkan ahi, tin asei uvin chule mikhat hi kihe loulai ahi. Furkan hi Bhajanpura mun a CAA toh kisai kinahna a kisukha a thi ahi’in chule Delhi Police Head Constable Rattan Lal jong Gokulpuri a hitobang kinahna thilsoh ma ma a thi ahi. Sikar, Rajasthan gam a cheng ahi’in, 1998 kum a Delhi Police a Constable a lut ahi.

CM Arvind Kejriwal in boina thilso na gamkaiya MLA chule official hotoh meeting abol in chule chamna semna dinga kouna aneiyin ahi. “Police leh milham tamtah kisukha a, mi phabep jong thi ahi’in, inmun leh dukan meiya akihal a akisuhset na thilsoh abon a hi vangset umtah ahi, tin aseiyin ahi. Chule District Magistrate in police hotoh ‘peace march’ abol diuva jong kasei ahi, ati.

Tuesday nikho sun nidan 12.05 don a Kabir Nagar, Maujpur metro station kom a athah a song a kiseto na thilsoh aumkit in ahi. Sun lang a Union Home Minister Amit Shah lamkaina a Delhi CM Arvind Kejriwal, Lt Governor Anil Baijal, Police Commissioner Amulya Patnaik, Congress lamkai Subhash Chopra, BJP lamkai Manoj Tiwari leh Rambir Singh chule adang dang panna a meeting aneikit uvin ahi.

 

Northeast Delhi boina toh kisai a  CM Kejriwal in MLA ho kihoukhomna neidinga kou

New Delhi, Feb 25: Northeast Delhi lam a boina toh kisai a song kise to nale kino to na ana um toh lhon in Chief  Minister Arvind Kejriwal in MLA ho kou khom na ana nei in ahi.

Hetthei chu Northeast Delhi Jafrabad, Maujpur le adang dang ho a Muslim ho in CAA doudal na a kiphinna ana neina uva Right wing tosot ho in Police toh kitho a ana bulu u ahi. Tuni jingkah lam in jong Brahampuri lhang sung a song a kise to na ana um toh lhon in security personnel ho in flag march ana nei uvin ahi.

Delhi police akon thuso kimu dungjui in thu le la aboi lheh in, muntin akon in thuboi dan hetsah na ahung kinei jing in ahi akiti. Hetthei khat chu police khat jaona a Monday chan a mi 5 lam in thina ana to ahi tan ahi. Police akon thuso kimu dungjui in police officer 11 lam jong akitong kha in ahi akiti. Delhi Chief Minister Arvind Kejriwal in a inn mun a MLA hotoh kihou na an anei toh lhon in mip in kiphinna angah a, boina ho kihou lim a sei cham ding  angai to ding uvin hetsah na ana nei in ahi.

Delhi Metro Rail Corporation (DMRC) in boina toh kisai in Delhi Northeast district ho a metro station nga lam ana khah taovin ahi. Metro station kikhah ho chu Jaffrabad, Maujpur-Babarpur, Gokulpuri, Johri Enclave le Shiv Vihar station ho ahi akiti. Hou ni kikah a boina hi US President Donald Trump Delhi ahung khol jin koncha a ana soh ahi toh lhon in security chung chang a mona ana kipe in hinlah  home secretary Ajay Bhalla in hiche boina Trump kholjin natoh akimat loudan tahlang na ana nei in ahi. Thuso kimu dungjui in tu chan in police in boina toh kisai in koima aman hih lai in ahi akiti. Hiche kiphinna hi Shaheen Bagh akon hung kipan a aban ban a hung chal jing ahi.

Imphal-Ukhrul lamlen a phat teplou bandh kikou kiladoh ta

Imphal, Feb 25(ET): Imphal-Ukhrul leh Imphal-Keibi-Sagolmang lamleng a committee in phat teplou bandh akou phat chomkhat a dinga aladoh tauvin ahi.

Bridge Construction Demand Committee, Iril River in Rural Development Minister Th Biswajit toh Tuesday nikho a kinoptona asem jouva phat teplou bandh kikou kiladoh ahi, tin committee in thuso aneiyin ahi. Huidrom Sekta, Imphal East a RCC lei sah dinga Minister in Lamlai AC MLA umna a committee thalheng hotoh kihouna anei nauva kitepna anei ahi, tin Committee convenor Y Bosan in aseiyin ahi.

Committee in Chief Minister N Biren Singh, RD Minister Th Biswajit leh Lamlai MLA Ksh Biren Singh in thumna angaipeh jeh a kipathu asei uvin ahi. Manipur Press Club, Imphal a convenor Y Bosan in thuso miho akimupi na’a, Huidrom Sekta a lei sahna dinga DPR (detailed project report) hi Department engineer in 2015 kum a soi akai ahitai, ati.

“Ahivanga Loushangkhong kho mihon DPR copy hi alhem/semthu ahi tia asei uva chule lei sahna dinga work order hi Loushangkhong a kipe ahi atiu ahi”, tin aseibe in ahi. Mopohna nei department hon Iril vadung, Huidrom Sekta a aganna thei pen a lei asah diuvin convenor in temna aneiyin chule amun a geotechnical investigation jong kibol ahitai, tin aseibe in ahi.

ECI in Manipur panna a Rajya Sabha member 55 a dinga March 26 teng election bol ding

Imphal, Feb 25(ET): Election Commission in Tuesday nikhon Manipur gam panna a state 17 a Rajya Sabha member 55 a biennial election March 26 nikho teng umding ahi, tin aseiyin chule anikho ma ma a vote kisim ding ahi, ati.

Manipur Rajya Sabha MP Kshetrimayum Bhabananda Singh leh Rajasthan gam a RS MP 3, Madhya Pradesh a MP 2, Jharkhand a 2, Himachal Pradesh a 1, Haryana a 2, Gujarat a 4, Chhattisgarh a 2, Bihar a 5, Assam a 3, Telangana a 2 chule Andhra Pradesh a MP 4 hi Rajya Sabha a kon April nisim 9, 2020 teng retire ding ahi.

Election notification March 6 teng kipe ding, chule nomination hi March 13 kah a kibol thei ding ahi. Retire hidinga MP hetthei umtah tah holah a NCP lamkai Sharad Pawar, Union Minister Ramdas Athawale (RPI Athawale), Congress lamkai Motilal Vora leh Union minister anahi Vijay Goel (BJP) jong pang ahi.

Gujarat gam a April 9 teng seat 4 retire ding ahi. BJP in seat 4 lah a seat 3 atuh ahi’in, khat hi Congress a ahi. BJP MP 3 term kichai ding holah a Chunibhai Gohel (Junagadh), Shambhuprasad Tundiya (Ahmedabad) leh Lalsinh Vadodia (Anand) apang in chule Congress MP hi Madhusudan Mistry ahi.

DHS, NHM in Kendriya Vidyalaya, STC/BSF mun’a National Deworming Day 2020 hongdoh; District sung’a Albendazole tablet 18,200 hopdoh ding’a target hi

B.Lalboi Gangte

CCpur, Feb 25 (ET): District Health Society, National Health Mission, Churachandpur tohgon nanoi in tunin Kendriya Vidyalaya, STC/BSF Gangpimual mun’a “National Deworming Day 2020” hondoh na ana kinei in ahi. Kingon achun Jin-gun in Pawan Yadav IAS DC/Ccpur, Jin-ja-um in Dr. Vumchinpau Tonsing, CMO/District Mission Director, District Health Society, Ccpur leh N. Chingkhei Singh, ZEO/Ccpur chuleh Kinnei-nu in Lekhraj Meena, Principal, Kendriya Vidyalaya School ho ana pang uvin ahi. Kingon phatsung’a Dr. jire L. Pudaite, MO, District Nodal Officer, Child Health leh Dr. Jamthianlal Valte, DFWO/Ccpur  teni lamkai nan Guest hon School chapang ho hut-lou (Albendazole tablet) nehsah na ananei uvin ahi. Dr. Vumchinpau Tonsing in houlimna aneina’a School kailai chapang tamtah hut vei jeh’a natna chom chom nei jeh’a School kai thei lou’u ahi dan kholdoh ahi dungjui’a National Deworming Day hi kipandoh ahi. Chuleh hut hi eh-buh lou’a pampot leh theiga pul ho soptheng louva neh jeh leh khutsil theng lou’a thilneh jeh hin hut apensah in ahi. Tuchung National Deworming Day a hut-lou kipe ho hoitah’a lhaidi a kum19 apat anoilam jouse in aneh cheh ding uvin temna anei in ahi.

Chingkhei Singh in houlimna aneina’a National Deworming Day hi kum seh Feb. leh August lha sung’a akinei jing toh lhon in tuchung in jong ZEO Office noi’a School um ho leh Private School toh kithokhom’a Albendazole tablet 18,200 hopdoh ding ti ahi. Lekhraj Meena, Principal in houlimna aneina’a National Deworming Day hondoh na ding’a School lhendoh’a aum khah hampha asah thu atahlang in chuleh mi tamtah in Kendriya Vidyalaya hi BSF sung’a umkha ho bou kaina ding’a akoi vang uvin tuhin local simlai 90 percent tobang apolam akon hung kai ahi toh lhon’a koi hijong lunglut nanei ho’a ding in kot akihong jing in ahi ati. Pawan Yadav IAS DC CCpur in houlimna aneina’a National Deworming Day hi achesa Feb. nisim 21 nikho’a hondoh na nei ding chu phat ana lemchang lou jeh’a tuni joh’a hung kihongdoh ahi. Tulai society sung boina jong Politics thil toh tamtah akikai mat tah jeh in simlai hon maban’a themjil na hoitah’a amu theina ding uvin mitakip in jilkung ho gih ahilou leh pressure peh kiti ho abol tah lou ding uvin aphongdoh in ahi. Themjil na inn khat target kiti ho ngah ding chuleh jilkung ho zalenna peh ding hi poimo ahi. Alangkhat’a National Deworming Day ahi toh lhon’a CCpur District hi Open Defecation Free a phon ahi dungjui’a mitakip in mun ong ho toilet a mang lou ding leh neh chah neh masang’a khut siltheng hin hut alhom ding dam jong kidam thei ding ahi ati. Tuchung  National Deworming Day 2020 hi India gamsung pumpi’a kum 19 apat anoilam mi 241 million target ahi toh lhon’a hiche ho ding’a Centre Govt. in Dk. Crore 24 val apoh doh ahi. CCpur District sung’a target hi 82,000 val ahi tinjong aseibei.

Hiche toh lhon’a National Deworming Day kiman sung’a School chom chom leh Angawadi Centre hon kum 19 noilam miho hut-lou (Albendazole tablet) ahoppeh ding’u ahi. Hiche dungjui’a ZEO office a Govt. School, Govt. Aided School leh CBSE School ho’a hut-lou 18,200 tablet hopdoh hi ding, ADC office a ADC noi’a um School ho tablet 7650, CMO Medical Store apat Singngat SDPO Tablet 2000, Lamka CDPO Tablet 5000, Samulamlan CDPO Tablet 3000, Tuibong CDPO Tablet 3300, Sangaikot CDPO Tablet 1500, Saikot CDPO Tablet 2200 leh Henglep CDPO Tablet 2000 peh doh hi ding ahi. Hiche nachung chon’a  CCpur District Private School Association (CDPSA) tablet 35,000 amahon School tin’a chapang ho anehsah ding’u ahi.

Hetthei khat chu India gamsung’a Hut chikhat Soil Transmitted Helminthes (STH) kiti hi chapang ho lah’a atam lheh jeh’a hiche natna suhbei ahi theina ding’a kum khat sung’a National Deworming Day  nivei akinei in ahi. India gamsung pumpi’a chapang kum 1 apat 19 kikah ho Albendezole kiti hut-lou nehsah in aum in ahi. Hitobang hut nei hon ann adulou naban’a athisan’u achao in, alungthim ngaito nao jong asuboi naban’a a themjil nalam asuhboi thei ding ahi jeh’a India Government in agelkhoh jeh’a hitobang programme hi hung kipan doh ahi. World Health Organsation (WHO) in atahlang na’a leiset pumpi’a India hi Soil-Transmitted Helminths (STH) ah asangpen in chapang kum 1-14 kikah mi 220 million hut avei in ahi ati. Chuleh chapang kum 1-2 kikah ho hutlou damdoi (albendazole- 400mg) chang kehni so’a peh ding chuleh kum 1 chung lam ho )albendazole- 400mg) achang lhing’a nehsah ding ahi.

 

Aji that a kingoh Ayekpam court sunga sandal a akise insung miten demna nei; meira paibi hon suhthengna neiyu

Imphal, Feb 25: Ajinu that a ngohna kineiya kiman Ayekpam Chinglensana insung mite le vengsung mihon vangsetna toh nu toson a hung mipi ho demna anei uvin, CJM Imphal West a ahin pui uva sandal a ase u demna anei uvin ahi.

Vangsetna toh a Merina hi ajipa chenna Takyel Khongban Maning Leikai, Imphal khopi a Friday jingkah (February 13) a room sunga akikhailih sa kimudoh ahi’in, numeinu insung miten athi dan ginmona anei uva, ajipa natoh hidinga ngohna aneiyu ahi.

Police hon Merina ajipa Ayekpam Chinglensana leh anaopa Ayekpam Chingthangkhomba hi case toh kisaiya thukholna a February nisim 17 ni a amat u ahi. Chinglensana apa A Chitra sopinu in Merina athi nikho a hospital a apui niuva hi diary chunga lekhathot (suicide note) amudoh a chule Merina hi hiche nilhah a akap e, ti jong ahet ahi. Asopipa in apho a Merina kap ahi’in, athu Chitra in ahetlou chule Merina leh asopipa kihouna jong ipi thu ahi ahetchen lou ahi.

Merina in athi masanga aman ama mobile phone hi anu in a um ahi’in, hospital a apui niuva alah u ahii’in, mobile a kon athu hetdohna thei thil um maithei dinga Chitra in aseibe in ahi. Kum nga masanga Merina nithum lhing ahol mo nau thilsoh um ahi’in, ahivanga Merina insung miten Merina ahin pui uva nithum ni a Chinglensana henga apehdoh u ahi.

“Ka sopipa chapa Chinglensana hin ajinu Merina atha mong a ahile authority hon dan dungjuiya gotna pe hen”, tin Chitra in Manipur Press club a thuso miho akihoupi na a aseiyin ahi. Insung mite leh Takyel Khongpal Maning Leikai a meira paibi hon ni 27 jail a umdinga kimang Ayekpam Chinglen Sana leh anaopa Ayekpam Nanao hi tolthat ahipon chule Ayekpam Chinglensana ajinu merina Chongtham ama leh ama akitha na a pan alapoi, tin suhthengna anei uvin ahi.

Chinglen Sana anuneo Ayekpam Chitra in ima mudohna louva ucha teni Lamphel police station noiya case akisem a akimat hi vangset umtah chule dem thei doltah ahi, ati. Themmona neiya kingoh Chinglen Sana hin themmona aneilou jeh a khongai louva police ho, Merina insung miten akou chan a lungmong tah a che ahi. Chinglen leh asopipa in themmona aneiya ahileh insung miten gotna kipe asan ding ahi, tin aseibe in ahi.

Chinglen insung miten achesa kum nga masanga Merina hin ajipa leh a insung mite henga ima thu hetsahna neilouva nithum kiholmo ahi’in, Merina insung miten amudoh jouva jong apeh louvu, nidan 2 leh 3 jouva bou apehdoh u ahi.

Chinglen Sana in hospital a ajinu thilong amu a athimil’e, tin Chitra in aseiyin, glucose injection akipeh jouva Merina sopipa Chongtham Marshall leh a insung miten inmun a kihouna nei dinga hunam a apuidoh u ahi, ati. Merina akikhai lih nikho a hi asopipa in avil a, laina tah a kihou lhon ahi’in, hitobang a hi nidang a akihou u kahet khah lou ahi, tin Chitra in aseibe in ahi.

 

Class XII Question a suhkhel aumpoi: Edn Minster

Imphal, Feb 25(ET): CoHSEM noiya Class XII themvetna a thudoh kibol hho chunga suhkhel imacha aum poi tin Education Minister pan anaseiyin ahi.

Hiche thu hi tuni Manipur legislative assembly Budget Session toukhomna question hour a Khangabok Assembly Constituency MLA Okram Surjakumar in tuchung Council of Higher Secondary Education, Manipur noiya kibol Class XII themvetna a Question No. 29 a Nehru in Nation Building lampang’a asei toh Qs 32 na a Bharatya Janata Party election symbol jihdia kisei hohi donlou vailou ahin, akisaipi authority in ahin vettup ding’a tepna anei donbutna a Education Minister pan anasei ahi. Education Minister, Th Radheshyam in aseina ah CoHSEM noiya Class XII themvetna a thudoh kibol ho chungchang suhkhel imacha aumpon, lamkai masahon alunggel ngaidan anasei’u chu adihmo aumpon hicheho hi phate’a geltoh chet’a khantou machalna a neithei ahi tin aseiyin chule Political party symbol khat jihdia thu kidong jong adihmo na aumpoi, hiche hohi syllabus sung’a um sohkei ahi tin donbutna ana neiyin ahi.

 

RIMS pensioner ho dinga 7th Pay phatsah hita

Imphal, Feb 25(ET): Health and Family Welfare Minister in February nisim 24 jan a phatsahna anei dungjuiya RIMS a kum 35 val natong a pensioner ho dinga 7th pay commissioner kichepi pan ding ahitai, tin Director, RIMS L Santa in thuso miho Tuesday nikho a akimupi na a aseiyin ahi.

Ministry henga kum ni val temna akinei jouva phatsahna kipe ahi. “Professor, grade four leh a insung mite ho panna a kum 35 val RIMS a natong a pensioner 890 vel dinga kipana thupha ahi’in, adang hon 7th pay commission hi kum thum masanga amu ahitai”, tin L Santa in Jubilee Hall a thuphon aneina a aseiyin ahi.

Natong ding mi alhahsam jeh a pension ‘release’ akibol nadinga ni 20 vel lut maithei ahi, tin Professor Ch Arunkumar Singh in pensioner ho henga temna aneiyin, phatah a kholtoh ngai ahi, ati. Chule aganna thei pen a fund kipedoh tei ding ahi, tin kitepna aneibe in ahi.

Manipur gam hi ‘Powerhouse of Sports’ ahijom jing e: Minister Letpao Haokip

Imphal, Feb 25(ET): Youth Affairs and Sports Minister Letpao Haokip in tu naicha Guwahati khopi a um Khelo India Meet a lhahsamna phabep umjong leh gamsung hi ‘Power house of sports’ hijing nalai ahi, tin 11th Manipur Legislative Assembly a Youth Affairs and Sports toh kisai Demand No 25 thu asei nauva ‘cut motion’ kipe donbutna aneiyin ahi.

2017 kum a U-17 FIFA World Cup a India thalhenga Manipur gam mi football peh a khangthah 8 in pan alah ahi’in, chule U-17 FIFA Women’s World Cup 2020 a gamsunga kon player 10 kilhengdoh a Ngangom Bala in Ranger FC, Scotland a kichep nadinga contract amu ahi, tin Letpao Haokip in aseiyin ahi.

K Ranjit in House a gamsung in ‘Powerhouse of sports’ title amu hi amansah nathei dinmun a aum’e ajeh chu sports khantouna dinga thil ibol u alhasam e, tia asei ahi. Dangka crore 78 bou budget kisem a hi thepna neiya coach ho iti kilah a chule manchah hoi hoi itih kisem ding ham, tia aseiya chule budget agonpeh be diuva kouna anei ahi.

Thangmeiband MLA Joykisan in football choisang nadinga itobang program kibol em chule All Manipur Football Association budget a tosot nadinga tohgon um em, tia Minister pa thudoh aneiyin chule Lamlong a Astro turf akisemna a football stadium dinmun ahoi loud an thu aseiyin, gallery ho kisa loulai chule stadium a toilet khat jong umlou ahi, ati.

Minister Letpao in adonbut na’a, hiche sa dinga mopohna kipe a MDS ahi’in, agency in boina (scandal) ato jeh a natoh khongai ahi, tin aseiyin, MDS chief thah akilhen jouteng gallery kisa pan kit ding ahi, ati. Keima sum a kon toilet kasah ding ahi, tin kitepna aneiyin chule stadium jotna lamlen asset thu a Works Minister in pan alah dinga temna jong aneibe in ahi.