Assembly a Manipur Inner Line Permit Guidelines, 2019 kipodoh

Assembly a Manipur Inner Line Permit Guidelines, 2019 kipodoh

180
0
SHARE

Assembly a Manipur Inner Line Permit Guidelines, 2019 kipodoh

Imphal, Feb 27(ET): 11th Manipur Legislative Assembly 10th session ni 10 channi a House lamkai leh Home in-charge jong hi a N Biren Singh in nisim 31, 2019 ni a Manipur Gazette Extraordinary a publish kibol banga ‘Manipur Inner Line Permit Guidelines, 2019’ ape in ahi.

Mapithel Dam toh kisaiya thudoh Water Minister Letpao Haokip in adonbut na’a, dam kisah jeh a kho 6 twi in achup ahi’in, hiche a dinga ‘Relief & Rehabiltation’ kipe ahi, tin aseiyin ahi. Dam in atohkhah insung miho list ‘verify’ kibol a mopohna nei DC henga kipelut ahi’in, Chadong kho a insung 56 tilou adang se in amu ahi’in, amaho hi process achelhah laitah ahi, ati. Dam sahna dinga Land Acquisition Act 1984, Forest Conservation Act, 1980 leh R&R Plan 1990 leh 1998 to kitoh a gam kila ahi, tin jong aseiyin ahi.

MLA Alfred Kanngam Arthur thudoh Deputy CM Y Joykumar in adonbutna a 2009-2010 leh 2010-11 a gamsunga ‘net per capita income’ hi dangka 26,621 leh 28,336 cheh ahi, tin aseiyin chule 2009-10 kum a 21,810 hi a, 2010-11 a 20,711 ahi, tin aseibe in ahi.

School Fagathansi Mission noiya thil sahna dinga sum hi constituency dungjui hilouva school-wise a sanction kibol ahi, tin Education Minister Th Radheshyam in MLA Dr. Chaltonlien Amo thudoh adonbut in chule 2020 academic session a sah dinga tupna um ahi, ati. Mission hi themjilna aphat cheh nadinga kibol ahi, tin jong aseiyin ahi.

Horticulture & Soil Conservation Minister Th Shyamkumar in malcha pom (king chilli) lei bolna dinga district 5 a gam leiset hectare 500 tobang kila ahi’in, DBT mangcha a kithopina leh input ho kipe ahi, ati. Ministry of Agriculture & Farmers Welfare, India government tohgon Mission Organic Value Chain Development in North Eastern Region (MOVCDNER) kiti Central Sector Scheme noi ahi.

Kamjong, Kangpokpi, Ukhrul, Noney leh Pherzawl district a malchapom lei bolna dinga gam leiset 100, 50, 200, 100 leh 50 hectare cheh kila ahi, tin aseiyin chule Kamjong, Kangpokpi, Ukhrul, Noney leh Pherzawl a sum, technology, thila kithopina dinga DBT mangcha a dangka 53,20,000; 6,60,000; 1,04,00,000; 60,40,000 chule 26,60,000 cheh kipe ahi, ati. MLA Alfred Kanngam in Horticulture hi thinglhang mi atamjo kihinso na ahivanga budget lhomcha akikoiye, tia alungkhampi na thu asei ahi.

RD&PR Minister Th Biswajit in Manipur gam a MGNREGS noiya 2019-20 kum a natoh nading nikho 100 (mandatory) lah a ni 31.58 tobang bou kipe ahi, tin aseiyin ahi. Dangka crore 112 tobang kimang lou chule crore 22.09 hi March 2020 a man dinga um ahi’in, chule beneficiary ho ‘direct transfer’ bol nadinga National electronic Fund Management System (NeFMS) pat ding jong akigon lai ahi, tin MLA Surjakumar Okram thusei adonbut in hi.

MLA K Ranjit in Education, Tourism leh Water Resources ‘demand for grants’ a ‘policy cut motion’ abol in, education system lunglhai aumlou dan, phalna beiya jilkung substitute kipe, School Fagathansi Mission kitup tah a akichepi lou, anti-erosion leh Chakpi vadung (LBB&RBB), Serou a 12th plan, North Eastern Council noi 2017-18 sunga ‘flood control’ ho thu dohna jong aneiyin ahi.

Water Resources grant peh dinga thumna a MLA AK Mirabai injong ‘policy cut motion’ apodoh in, Waithou, Irong Nallah (achunglang), Imphal East leh Lamphelpat a Repair Renovation Restoration (RRR) akichai joulou, fund kipehna a akiselguh aum, chule achesa kum thum sunga program ho akichepi joulou thu aseiyin ahi.

MLA K Gonvindas injong twi kholthem ding (water conservation), flood management leh dam (medium size) ho sah ding thu a alunggel aseiyin, Water Resources Department in Forest Department, PHED, Planning chule Loktak Development Authority toh pan alahkhom ding ahi, ati.

Minor Irrigation, Education leh Water Resources thu a MLA Th Lokeshwar in ‘cut motion’ abol in, Dolaithabi Dam (left leh Right channel) a gam leiset compensation akipeh loulai thu a thudoh aneiyin ahi. Opposition MLA K.Ranjit Singh, Th Lokeshwar Singh, D.Korunthang, Md.Abdul Nasir, Kh Joykishan, Md. Fajur Rahim, R.K.Imo Singh, Alfred Kanngam Arthur, Surjakumar Okram, K.Meghachandra Singh, K.Govindas, A.K.Mirabai Devi in kihouna a Grants chom chom a aphatsah louna thu asei uvin ahi.

Non-prepaid meter consumer ho a kon dan phalna beiya tax akidong e, tia MLA Ranjit in ngohna nei; Power chohna a sum lhasam jing ahi, tia Power Minister in sei

Imphal, Feb 27(ET): Prepaid meter kikoi louna power consumer ho a kon kai akila in, adih louva natohna aum’e, tin opposition MLA K Ranjit in ngohna aneiyin, chule adihlou bol a official ho chunga sorkar in action alah dinga temna aneiyin ahi.

Staff koitobang themmona nei akimudoh le action kilading ahi, tin Power Minister Th Bishwajit in aseiyin ahi. Gamsunga Pre-paid meter 3,35,519 kikoi ahitai, tin Bishwajit in MLA Ranjit thudoh adonbut in ahi. Prepaid meter hi consumer 1.65 a dinga kitopeh loulai ahi. April 2017 a kon January 2020 chan sorkar in Pre-paid meter alah/achoh lou ahi. 2017-18 kum a dangka crore 13.86 hi Pre paid consumer ho a kon kimu a chule 5.19 crore hi prepaid kito peh loulai consumer ho a kon lha khat a kimu ahi. Chule 2018-19 kum a Prepaid consumer leh non-prepaid meter consumer ho a kon lha a dangka crore 14.20 leh 6.05 cheh kimu ahi, ati.

State sorkar in lhaseh a Power chohna a lhahsamna (deficit) ato ahi, tin Minister pa in aseiyin, 2017-18 kum a 337.26 crore, 2018-19 kum a 396.05 crore hi company ho a kon power chohna a kimang ahi, ati. MSPDCL in state sorkar a kon annual grant dangka crore 10 amu ahi’in, 2017-18 kum a state sorkar 9.06 crore deficit che a, 2018-19 kum a crore 12.76 chule 2019-20 kum a crore 12.89 deficit che ahi.

MSDPC staff phabep in non-Prepaid meter consumer ho a kon dangka 1000 kai (tax) phalna beiya akilah uve, tia MLA pa in ngohna aneiya, sorkar in avettup dinga thumna anei ahi. Phalna beiya tax akidon thu tuchan a department in report amupoi, tin Minister pa in adonbut in chule thil dihlou bol ho chunga action akilah theina dinga MLA pa in adihlou kibolna thu ho apeh dinga temna jong aneiyin ahi.

Dan dungjuiya non-Prepaid meter consumer ho a kon ‘power unit’ amandoh utoh kitoh a tax kila ahi. Tax hi achom chom hi ahi, tin aseiyin chule gamsunga dinga pre-paid meter lakh 2 tobang kilahbe vahding ahitai, tin aseibe in ahi.

SDFK in NSCN-IM ho chalohna chung’a thuphon bol

Imphal,Feb 27(ET): Socialist Democratic Front of Kukiland (SDFK) Information & Publicity S. Kuki min a kimu thulhut in aseina ah Kaccha/Duplicate Naga nam sepai NSCN (IM) in Kukite chunga thilse avel’a abol kit tah lou diuvin hetsahna khoutah ahin bol uvin ahi.

Thulhut in aseibe na ah achesa 1993 lai a Kuki nam mite mona neilou milham ho chunga khanset na leh lekha Quite notice nahin peh uva, nahin tha ujong tuchan a kilungdam louva kipona nalai ahi ti NSCN(IM) in akihet diu poimo ahi ati. Chuleh hitia kanam mite chung’a khanset nabol jing uhi nangah lou uleh nangho chunga jong SDFK in khansetna hung kibol kha ding ahin, hijeh chun agang thei pen a NSCN in hitobang natoh avelbol lou diuvin hetsah na aneiyin ahi.

NSCN (IM) le Naga mipin Kukite toh damsel in khosa/chengkhom ute natiu leh akisei nangai uva, Pathen min a ikihetthem u ngai ahi ti ihetsoh diudol tah ati.

Simplex natohna mun a kon Avijit kikaimang thu a mi 2 kiman, Dk.lakh 2 val leh meithal toh kimat tha

Imphal, Feb 27(ET): Achesa February 19, nidan 12:10 don a Simplex natohna mun (Jiri Imphal Rly Bridge No 130), Khongsang a kon Avijit Dhar, Simplex Infrastructure Ltd akikaimang thu toh kisaiya FIR No 5(2)2020 NBA PS u/s 364-A/400 IPC & 25(1-C) A. Act jihlut ahitai.

ZUF Kamson group hidinga ginmo hon Nungba police station a kon km 27 a gamlha mun a kon akaimang u ahi. February nisim 26 nikho a ZUF thingnoimi khat aum’e ti thuguh amu utoh kilhon a 37 Assam Rifles, SDPO Lakhipu leh Jirighat Police station team hon Namdailong a operation abol ahi. Operation abol nauva Pouthuilung Gonmei (45), s/o Lt Hungam Gonmei, Jalukie, Peren district, Nagaland amat uva Smith and Wesson 9 mm pistol khat le meichang 5 toh amat tha u ahi.

Amun a thu adoh nauva Noney district a mi kikaimang thu a sum alah uthu aseidoh ahi. Sum (ransom sum) hi Kolkata a mikhat in alah a, Silchar chan lenna a hung ahi. Ama a kon thu ahetdoh utoh kilhon a Cachar police team hon Addl SP (HQ) Jagdish Das lamkaina a Rikhi Poujuan, s/o Rikhi Chuangluliu, Namdailong airport a amat u ahi. Amahin dangka lakh 3 tobang sum amuna kihelou apoh ahi. Thilsoh toh kisaiya Jirighat police station a case ajihlut tauvin ahi.

Kolkata police honjong Makanguang Kamei (29), s/o Abon Kamei, Soubunglong, Leishok, Noney district aman uvin ahi. Akiman mipa hi tua Boys Hostel ICAR-CIFE Kolkata Center, 32 GN Block-5, Salt Lake a um ahi’in, ICAR a Research Scholar hi ahi. Apaneo Sinphuingam Kamei hi ZUF member ahi, ti aseidoh in chule sum analah dinga eiseipeh ahi, ati. Aumna Boys Hostel room a ama sakhao a kon dangka lakh 22.5 amudoh u ahi. Ginmo adang hojong akimat nadinga natoh chelha jing ahi.

Government teacher hon Feb 29 a kon an ngol kiphinna pat dinga thuphon neiyu

Imphal, Feb 27(ET): Council of Teachers Association (COTA) kiti elementary a kon higher secondary level chan teaching staff ho kiloikhomna organization in Thursday nikhon 7th Central Revised pay chepi nading chule Manipur Services (Revised Pay) Rules, 2019 semphat nadinga thumna aneiyu state sorkar in anahsah loujeh a ‘relay hunger strike’ bol dinga thuphon anei uvin ahi.

An ngol kiphinna (relay) hi February nisim 29 a kon March nisim 7 sung gamsung pumpi a aboldiu ahi. Manipur Press Club, Imphal a COTA convenor Ch Shantakumar Singh in thuso miho akihoupi na’a, achesa phat ho a kiphinna chom chom akibol vanga sorkar in khohsahna anei dehpoi, tin aseiyin ahi.

State sorkar in 2019 kum a jilkung ho suhnem chehna (downward) revision abol uhin Central 7th Pay Commission recommendation umlo na asuhset ahi, tin Shantakumar in aseiyin ahi. Kum masa August lha a government teachers association hon Chief Minister N Biren Singh henga memorandum apehlut uva, Manipur Services (Revised Pay) Rules, 2019 chepi dinga ngehna aneiyu ahi.

December lha a jong CM Biren henga ‘Ultimatum’ apeh uva ahivanga sorkar in tuchan a donbutna apeh loulai ahi. “Sorkar henga kachan diu thaneina thum nadinga COTA member jouse kigosa kaum u ahi’in, sorkar in thumna abulhit kahse a kiphinna sang cheh umding ahi”, tin Dr Longjam Ritendro, co-convenor, COTA in aseiyin ahi.

State sorkar in College teacher hon UGC 7th Pay scale achepi dinga thumna asanpeh ahitan, ahivanga tuchan geiya state sorkar in government teacher ho dinga hitobang thu suhlhapna ima agon lou ahi, tin Dr Ritendro in aseibe in ahi.

JKS Construction office complex a bomb anapokeh; Gihna a kibol ahi tia NSCN/GPRN in sei

Imphal, Feb 27(ET): Tunin Kakching Police Station hopsung Khangsim kho mun’a um Milan proprietor hina James Khaling and Sons Construction (JKS Construction) leh a partner GR Infra. Pvt. Ltd. office complex mun’a hand grenade hattah khat anapohkeh in ahi tin thulhut chun aseiyin ahi. Ahin hiche thilsoh na’a chun akisukha koima vang ana umpon ahi akiti. Hetthei khat chu hiche thilsoh hi jingkah lam nidan 8:45 vel ahi in hiche hand grenade chun complex sung’a car kikham 2 anasepse in ahi.

Thilsoh chung thu Kakching Police in ajah jah chun amun anadellut pai uvin thilsoh umdan ho kholchil na ananei uvin ahi.

Alangkhat’a hiche thilsoh chung’a NSCN/GPRN in amaho khutnun ahidan phondoh na anei uvin ahi. Chuleh NSCN/GPRN Kilonser (Finance Dept) in thuso aneina’a hiche thilsoh hi GR Infra. Pvt. Ltd. in thu kisei ho nasah’a akoilou jeh uva gihna ding’a kibol ahin akisei ho gangtah’a asuhbulhit lou leh hiche sang’a nasa jo’a kibol nalai ding ahi tinjong tahlang na anei in ahi.

Gari accident a mi khat thi; Khat nasatah’a kitongkha

Imphal, Feb 27 (ET): Tuni jingkah lam chun Imphal-Moreh lamlen Wapi kho kom’a thao po gari khat kol’a ana kitang lha in mi khat in thina atoh in chuleh adang khat nasatah in anakitong kha in ahi tin thulhut chun aseiyin ahi. Thina toh pa hi Imphal West hopsung Yumnam Huidrom akon Mangi chapa Thongam Shanta (21) ahin chuleh akitongkha pa hi (L) Megha chapa Laishram Dhamen (41) ahi akiti. Hetthei khat chu toset toh teni hi Moreh Hospital in anapolut uvin ahin akisuhkhah nalhon a serious jeh chun Imphal khopi sung’a um Raj Medicity Hospital mun’a anapolut uvin ahin Thongam Shanta chun Hospital mun’a thina anatoh tan ahi. Hiche thilsoh chung thu Police hon ajat jat’u chun Sub Divisional Police Officer (SDPO), Moreh Police Station, L Meghavarna leh team hon amun anadellut uvin chu jouvin case registered jong anabol uvin ahi tin thulhut chun aseiyin ahi.

Imphal-Moreh lampi a pungkah 36 Bandh kikou

Imphal, Feb 27(ET): All Wangjing-Lamding Market Shop and Vendors Welfare Committee thuso in aseina achun Imphal-Moreh lampi kikah a um Wangjing area a Feb 29 jingkah nidan 5 apat march 1 nilhah nidan 5 chan pung 36 bandh kikou ding ahithu aphongdoh in ahi. Thuso in aseina achun hiche Bandh in Wanjing Market building le toilet akisaipi hon sempha louva vel ijat veiham khat akino jouve doun louva akoi jeh uva bandh kikou ahi ati.

Committee thuso in aseibena chun lha li masang a akisaipi ho heng a kiseipan ahi tan hiche kisemphat loujeh in mejoh nupi hon gentheina nasatah atoh jing uvin chule niseh in kolphemeivah mutheina ding in mupi 300 tobang in cheng 5 adolkhom ji uvin hinlah Wangjing-Lamding Municipal Council hon jan nidan pung 9 leh mei athat ji taove ati. Meivah umlou jeh in nupi ho von vengtup a pang hon hahsatna lentah atoh kit uvin ahi.

Government in hahsatna ato hou hetpi ding kideina jeh a bandh kibol ding ahi in hinlah hiche phatsung ahin hou thu a programme neiho, Medical, Fire service, Water service leh Media ho kisu boilou ding ahi tin thuphon chun asei in ahi.

Tribal Market a mejoh ho kah a boina um; Baanchui Khumba in TA&Hills Minister heng a lekha pelut

Imphal, Feb 27 (ET): Tuni chun Namdulong a cheng Baanchui Khumba in TA & Hills, Govt. of Manipur ang ah Boinu Haokip, Rebeka Baite chule nupi thiljoh dang ho minpha in lunglhai louna lekha ana pelut in ahi.

Baanchui in aseina achun keijong Tribal Market, New Checkon a thiljoh theina ding license No WVL No. 235 leh Vendor No. A-l SI. No. 134  nei kahi in hinlah 26 Feb 2020 jing kah a nidang bang a thiljoh ding in Tribal Market kahin jong in jingkah nidan pung 6 don hin Hoinu Haokip leh Rebeka Baite makaina in nupi phabep in hiche mun a touthei lou ding in eihung no uvin chule kampao kilomlou tah tah jong eiso khum uvin kathil joh asum a sim a dangka 4000 tobang jong asusie uve ati.

Hiche tribal market hi Manipur gamsung a tribal ho ding a kibol ahitoh lhon in hinlah a kimvel a cheng tamjep namdang hon amauho bou touthei nading lampi agong uvin midang touho chung a sietna abol jing uve ati. Kachung a gihna eiki bolkhum toh lhon in kathil joh ho jong kaga kilah ngam tapon hiche chungthu a akinaipi police station a lekha kapehlut vang in donbutna aum pon hijeh chun Minister pa in ka hahsatto hi eihetpi a ei gelkhoh pi ding in tin lekha ana pelut in ahi.

Sorkar in assembly a numei leh chapang thilse toh ho thu apohdoh dinga WAD in thumna nei

Imphal, Feb 27(ET): Women Action for Development (WAD) in gamsunga numei leh chapang chunga khansetna thilsoh lhung ho thu state sorkar hetpeh dinga thuso anei uvin ahi.

Sobita Mangsatabam, Secretary, WAD in thuso aneina a House a kikhom political lamkai jousen party khenna umlouva khonung khang huhna ding thu agelkhoh phat ahitai, tin aseiyin, gamsunga numei leh chapang chunga thilse/vangsetna lhung sang cheh cheh a alangkhat a state sorkar in hiche thu aseilou ahi, ati.

Hiche thu hi tukum Budget Session sung February 28 ni a apohdoh phat u ahitai, ati. Achesa kum thum sunga gamsunga numei le chapang chunga setna thilsoh lhung agom a 871  ahi’in, numei kisuhsetna case 127, tolthana 49, athi dan ginmona um case 45, kisuse a kithat case 3, akiholmo numei 151 um ahi’in, vangsetna toh insung atamjo in thudih a thutanna amulou ahi, ajeh chu sorkar in themmona neiho gotna apehlou jeh chule thil alhahsam jeh ahi, ati.

DNA testing machine umlou, FSL (Pangei) kimanchah thei talou, Judge kilahlou chule court lhahsam ho jeh jong ahi, tin hilchenna aneiyin ahi. Sorkar in khohsahna aneiya ahileh tohgon anei teiding ahi’in, chuting le Beti Bachao Beti Padao thucheng hi gil cheh ding ahi, ati. WAD in atohkhompi CSO, NGO hotoh sorkar chule MLA 60 hon apohdoh diu ‘point’ phabep asem ahi, ati.

Retired judge, police leh crime against Women and Children a natong NGO thalheng ho panna Investigation committee semdoh dinga thumna aneiyin, committee a alhompen a member 5 (pasal 2 leh numei 3) umding ahi, ati. Lha a case 5/10 tobang aganna thei pen a akisei lhah nadinga Adhoc Judge, adeh a numei 10 alahbe diuvin ngehna aneiyin ahi.

POCSO Act 2012 noiya chapang vangsetna toh ho case CBI khut a apet pet a pehdoh ding chule aganna thei pen a thukholna joulou (he na sa sa a) ho gotna peh ding ahi, ati. Follow up process a special Rapporteur kouna peh ding chule numei leh chapang kisuhset a kitha na thu ho akikholna a panla a political leader, sepai leh bureaucrat ho venna peh louding a jong ngehna aneiyin ahi.

UN Convention on Prevention and Punishment of Crime of Genocide thu a Army, paramilitary adeh a Assam Rifle, Police, Judge, Lawyer, CSO ho  dinga capacity building workshop gon dinga temna aneibe in ahi.

 

Kum 13 numei chapang khat human a kisuse

Imphal, Feb 27(ET): Janlhah nidan 11:30 vel chun Imphal East District, Lamlai Police Station hopsung Nongada ah mi 2 in kum 13 chapang khat asuse lhon’e tin tahsan umtah thulhut kimu khat’in aseiyin ahi. Numei chapangnu suse a panla mikhat vengsung mihon aman uvin, police ho khut’in apelut uvin, aloipa jong police hon tunin amandoh tauve akiti.

Khansetna nei tenu chu Sanasam Malemnganba (18) S/o S Inao, Sawombung Awang leh Laishram Tangba (23) S/o Zilangamba, Sawombung Thongkhong akon ahilhon in ahi.

Thulhut kimu dungjui in chapangnu suse a pang teni hi jani nilhah lang’a vangsetna toh numei chapang nu sopi khat kichenna a hung lhon ahi akitin, kichen kichai a konna numei chapangnu anaholmo pan u ahin phat chomkhat jouva phailei khat a kho helouva aum a-insung mite leh vengsung mihon agamudoh’u ahi. Vangsetna toh nu chu JNIMS Hospital analhut uvin ahi.  Numei chapangnu agamudoh nao mun’a Sanasam Malemnganba Aadhar Card amudoh u ahin hiche a kon’a vengsung miten Malemnganba amat uva Imphal East District Police ho khut’a anapehlut u ahi.

Women police station Porompat a ngoh a um teni chung’in case khat ajihlut uvin kholchilna jong apan tauvin ahi. Kholchilna anei dungjui uva numei chapangnu suse chu Sanasam Malemnganba sehbou ahidan ahedoh uvin, ngoh a um khatpa chu Hiripat thilsoh amit a gamu khat mei mei ahidan ahedoh uvin ahi.