Assam Rifle holeh AFSPA lahdoh nading a numei kiloikhom hon Imphal kho...

Assam Rifle holeh AFSPA lahdoh nading a numei kiloikhom hon Imphal kho sung’a kijotna nei

67
0
SHARE

Assam Rifle holeh AFSPA lahdoh nading a numei kiloikhom hon Imphal kho sung’a kijotna nei

Imphal, Jan 31 (ET): Tunin Imphal khopi sung ah All Manipur Indigenous Women Forum ho gonna noiyin Manipur gamsung akon Assam rifle holeh Armed Forces (Special power) Act AFSPA lahdoh nading in kijotna abol uvin Forum a lamkai hon aseina achun, numei ho chung a AR ho chaloh na avaltan gamsung a umding in akidei tapon agangthei pen a lahdoh ding kidei ahi ati.

Kijotna chu Wall United Club, Wangkhei ah apat uvin Konung Mamang, Hatta, Minuthong chule Khoyathong ahin jotpa kit uvin achaina ding in Thau ground ah meeting anei uvin ahi. Lampi kijotpet chun “Stop Genocidal Act Indian Armed Forces”, Indian Armed Forces Stop Supressing Our State Police”, Go Back Assam Rifles”, “Punish Indian Armed Forces For Committing Sexual Violence”  kiti placard a ajih uvin chule kholhang jong asam uvin ahi.

Convenor W Prabha in aseina achun AFSPA noiyah Indian Army holeh Assam Rifle hon gamsung milham ho nasatah in asugenthei jing uvin Centre leh State govt. heng ah akinthei pen a ladoh ding in ngehna abol in ahi.

‘Anti-defection case’ a Supreme Court thutanna itobang hijong leh kasan ding ahi: Minister Shyamkumar

Imphal, Jan 31(UNA): Forest and Environment Minister Thounaojam Shyamkumar in ama douna a ‘anti-defection case’ akisem thu a Supreme Court thutanna itobang hijongle kasan ding ahi, tin aseiyin ahi.

Supreme Court hi gamsunga dinga court sangpen/lenpen ahi’in, lawmaker khat hina a court thutanna jana kapeh ding ahi, tin minister pa in Catholic School Canchipur mun a Manipur Catholic Youth Organisation (MCYO) Silver Jubilee man na kin gon a aseiyin ahi.

Minister pa leh BJP a lut Congress MLA adang sagi ho ‘disqualification case’ thu a Manipur Legislative Assembly Speaker in kal li sunga thulhuhna anei dinga Supreme Court in tu naicha thutanna anei ahi. Alangkhat a SC in thupeh anei toh kilhon a Manipur Legislative Assembly Speaker’s Tribunal in Minister Th Shyamkumar douna a kisem ‘disqualification case’ a hearing ajona pen February nisim 4 nikho teng umdinga aphat atep ahitai.

M Ramani, secretary Manipur Legislative Assembly in February nisim 3 kah a document pehbe ding aumle apehlut diuva notice aso ahi. Congress MLA hon petitioner hina a ‘disqualification case’ 15 lang asem u ahi’in, Congress ticket a election ajo jouva BJP a lut Th Shyamkumar disqualify abol diuva Speaker’s Tribunal a ngehna aneiyu ahi.

Speaker’s Tribunal in February nisim 11 jingkah nidan 10.30 teng Congress MLA adang sagi – Oinam Lukhoi, P Brojen, Ngamthang Haokip, Ksh Biren, Y Surchandra, S Bira leh Ginsuanhau Zou douna a kisem disqualification case ho maban chepi dinga asei ahi. Document peh pe ding aumle February nisim 7 kah a thon louva apehlut diuva Assembly secretary in notice aso ahitai.

Themmona neiho akimat toh kilhon a Washima kitha thu a kisemdoh JAC in bandh alahdoh dinga Minister Shyamkumar in temna nei

Imphal, Jan 31(UNA): Khullakpam Washima (19) kitha na thilsoh a themmona neipa kiman ahitai, tin Forest and Environment Minister Th Shyamkumar in JAC hon kiphinna abol alahdoh diuvin temna aneiyin ahi.

Minister Th Shyamkumar in thuso miho akimupi na’a, numeinu kitha na thilsoh demna sangtah aneiyin, gamsung dan dungjuiya tolthat pa gotna sangtah kipe ding ahi, ati. Tolthat a pang pa police hon amat ahitan, akithopi adang hojong ni ni-nithum sunga police hon amat diu ahi, tin aseiyin chule hiche case a koima kingaidam louding ahi, ati.

JAC leh vangsetna toh nu insung miten themmona neiho akimat a gotna peh ding hi thumna aneiyu asangpen khat ahi’in, thukholna aum sunga themmona anei uva ahileh gotna kilomtah a kipe ding ahi, tin Minister pa in aseiyin ahi.

Vangsetna toh nu insung mikhat sorkar tohmun peh dinga JAC in thumna anei chungchang a Minister pa in, hiche thu tua Delhi a um Chief Minister henga kasei ahi, ati. CM injong Imphal ahung kile teng athu seikhom ding anopna thu asei ahi, ati. Tu dinmun a local MLA hina a natoh akihol teng leh vangsetna toh nu insung mikhat tohmun kilom peh dinga Minister pa in nopna anei ahi’in chule insung mite ex-gratia peh dinga jong phondohna aneiyin ahi.

Ccpur gamsung a gammang 250 sq km tobang kisuse e: DFO

Imphal, Jan 31(ET): District forest officer Ccpur N. Ganesh IFS in Kangvai a Van Dhan Vikas Kendra (VDVK) kihondohna kin a aseina achun, masang a Churachandpur gamsung chu gammang kihuhbitna lienpen a ana kihe ahi in hinlah tuhin 250 sq km tobang agammang akisusie tan hiche hin limit akhokhel ahitai ati. Mipi hon gammang poimo dan chule kholum khovot ho ahiding bang a umsah jong ahina ban ah ichenna gamsung anop cheh cheh nading a thing le go atamthei pen a huh ding chule thingnou tamtah phuding ahi thu asei in ahi.

VDVK hi PM Modi flasgship programme khat ahi in hiche kihondohna kin ahin DC Ccpur Pawan Yadav IAS, SDO Kangvai Solomon Infimate MCS chule DFO Ccpur N. Ganesh IFS leh official phabep in pan ala uvin ahi.

CAA hin Gandhi lungtup amolso ahi: President

New Delhi, Jan 31: President Ram Nath Kovind in tuni a house teni a toukhomna anei nauva aseina achun, Centre in CAA passed abol hi Mahatma Gandhi deilah tah ahi in, Gandhi in ana sei chu Pakistan leh Bangladesh gamsung akon nam lhom ho India gamsung a refuge ding a ahung lut ule India gammi le sa hina peh hiding in ana sei in hiche tohlhon chun House teni in aphatsah uvin tua manthei ding a aum chung ah kipathu asei in ahi.

Hiche thu asei toh lhon in BJP akon lamkai phabep akipah lheh uvin hinlah opposition ho alhunglhai hihbeh uvin President pu thusei demna aneikit uvin ahi. Hiche CAA hi ningkum 9 Dec achu Lok Sabha in passed abol ahi in chule Rajya Sabha in 12 December nikho a chu passed abolkit ahi.

2022 kum kah a Sikkim, Mizoram, Manipur leh Nagaland khopi a rail network umding ahitai: President Kovind

New Delhi, Jan 31: President Ram Nath Kovind in Friday nikhon 2022 kum kah a Sikkim, Mizoram, Manipur leh Nagaland khopi (capital) ho a rail network umding ahitai, tin aseiyin ahi.

“Sorkar panlah na jal a 2022 kum kah a Sikkim, Mizoram, Manipur leh Nagaland capital hohi Rail network lhung ding ahitai”, tin President Kovind in Joint Session of Parliament a ahoulimna a aseiyin, Budget Session kipatna ahi. Centre leh Assam sorkar in tu naicha Bodo thu a kum somnga val boina um suhthip nadinga Bodo organization hotoh thusim a seithei kinoptona soi akaiyu ahitai”, ati.

Chule Tripura, Mizoram leh Centre sorkar chule Bru nam mihon kum som val lhing boina thu a kinoptona asem uva, Bru asanga sim hinkho asem ahi, tin jong aseiyin ahi. Achesa kum nga sunga Centre in kikhelna asem ho thu aseiyin, “Achesa kum nga sung ground level a sorkar in pan alah jeh a India gam a field tamtah a machalna sangtah um ahi”, ati.

Global Innovation a India hi rank 74 a kon 52 lhung a Resolving Insolvency ranking a 108 rank a kon 52 position a kal ahi, tin World Bank in ‘Ease of Doing Business’ ranking apeh thu aseiyin ahi. Performance Index a 10 points a kal a chule Travel and Tourism Competitiveness, World Economic Forum a India gam 52nd position a kon 34th position a kal ahi, ati.

“Kiphinna kiminput sah a boina thilsoh kisem hohin gamsung leh society alhahsam sah ahi. Alangni in kihouna aneikhom a ahileh democracy thahat ding ahi tihi keima sorkar in atahsan ahi”, ati. Achesa Thursday nikho a Jamia a CAA douna a kiphinna bol simlai ho khangthah khat in pistol a akap na thilsoh jouva President in hiche thu asei ahi. Meithal kikapna a simlai khat kisukha ahi.

“Achesa kum 5 sunga sorkar in Bharat century semdoh nadinga foundation atun doh ahi’in, tukum hi gamsunga dinga thupi tah ahi”, tin President Kovind in aseibe in ahi. Union Budget hi Saturday nikho teng apeh diu ahi’in, session phase masapen hi February 11 teng khumkha hiding chule anivei channa session hi March 2 a kon April nisim 3 chan umding ahi.

 

Bank natong hon strike abol jeh a Northeast a banking service tongkha

Guwahati, Jan 31: Bank natong natong hon India pumpi a bandh abol toh kilhon a Friday nikho a bank atamjo akikha a, ATM phabep a sum aumlou jeh in Northeast a banking service atongkha in ahi.

All India Bank Employees’ Association (AIBEA) general secretary CH Venkatachalam in Mumbai, Chennai leh Delhi a strike aumjeh a dangka crore 23,000 lhing cheque lakh 31 kisutheng theilou ahi, tin aseiyin ahi. Gamsung pumpi a strike in banking service sangtah a atohkhah ahi.

Strike bol a natong lamkai hon Northeast gam 8 abon a ni-ni strike kikou donbutna ahoiye, tin asei uvin ahi. ‘Anti-people banking reforms’ douna a natong hon kiphinna abol uva, lo hi 20 per cent kalsah ding, kal sunga ni 5 natoh ding chule pension leh family pension scheme ho semhoi dinga thumna aneiyu ahi.

Northeast gam get a um nationalized bank a natong 80,000 val in strike a pan ala uvin ahi. United Forum of Bank Unions (UFBU) lamkai Jawaharlal Dey in pension scheme thah kisem suhmang dinga uFBU in thumna anei jing’a chule contract employee leh business correspondent ho natoh kibang a lo kibang apeh diuva thumna anei jing ahi, ati.

Regional Rural Banks chom chom a natong honjong bandh atosot uvin, ahin, State Cooperative Bank ho strike a panglou ahi. ATM tamtah akikha jeh a mipi dinga hahsatna asoh in ahi. UFBU hi employee union 9 kipunkhomna ahi’in, Indian Banks Association toh New Delhi a kihouna aneiyu alolhin lou nunga strike akouvu ahi.

Khopi chom chom a bank branch ho maiya kiphinna abol uvin ahi. Economic Survey akipeh ni chule Union Finance Minister Nirmala Sitharaman in Saturday nikho a budget anivei channa apeh ding nikho a strike akouvu ahi. Natong hon November 2017 a kon wage revision settlement vat nalai ahi, tia jong aseiyu ahi. Hiche thu a kihouna hi achesa lha 30 lang ahin neiyu ahitai.

‘Hit & Run case’ a themmo na nei mi 4 akimat toh kilhon a NH-102 a phat teplou bandh lahdoh hita

Imphal, Jan 31(ET): Achesa January nisim 29 nilhah a KM Blooming Higher Secondary School kom, Khangabok, Thoubal district a gari in mi ata jouva ajammang na thu a tuni nilhah nidan 4 a kon phat teplou bandh bol dinga kouna umchu police hon mi tanglih a gari amudoh jouva aladoh tauvin ahi.

Kum 57 a upa numei khat gari in atalih’a, thilso pet a car a tou mi 4 jong amat u ahitai. CCTV video a Moirangthem Ongbi Manjuri Devi in NH-102 lamlen cycle a agalkai pet a speed hattah a lhai gari khat in ata’a, apoh pai pai ahi.

Thilsoh chunga lunghang Khangabok vengsung mihon meeting abol uva, police hon themmona nei gari leh gari driver pa amat louleh tuni nilhah nidan 4 a kon Imphal-Moreh lamlen a phat teplou bandh bol ding chule kiphinna chom chom lamkai dinga JAC asemdoh ahi. Thoubal police team honjong athu agelkhoh uva, phatah a thukholna anei jou uva mi tanglih a gari umna ahetdoh u ahi.

Thilsoh a pang gari driver pa panna a mi 4 koi ahi hetdoh hi a, chule police hon mi 4 ho abon uva amat u ahitai. Numei nu tang lih a gari hi Maruti Alto (blue) ahi’in, registration number MN-06 LA 5826 hi ahi. Akiman mi li hohi- Waikhom Buten @ Ellubi singh (27) s/o w. Kumar Singh, Thoubal Bazaar Makha Pakhangkhong Leirak, Kshetrimayum Kanan @ Anand Singh (27) s/o Ksh. Rajen Singh, Thoubal Haokha Kiyam Siphai, Romen Thingujam (27) s/o Th. Munal Singh, Thoubal Haokha Kiyam Siphai chule Waikhom Robinson Singh @ Maru (27) s/o W. Inao Singh, Thoubal Bazaar Makha a cheng ahiuve.

Naga Peace Accord thu a Centre in mipi adih lou ahil ahi, tia NSCN-IM lamkai khat in sei

Kohima, Jan 31: National Socialist Council of Nagaland (NSCN-IM) senior lamkai khat in Naga miho hi India sorkar in adihlouva ahil ahi, tin ngohna aneiyin chule Peace Talk maban chepi nading leh ngaidan kibahlou na ho suhlhap nading lunggel anei pouve, ati.

Achesa July 2019 ni a Nagaland Governor RN Rani in Naga Peace Talk hi lha thum sunga jo tei dinga Prime Minister Narendra Modi in adeisah ahi, tia Isak-Muivah faction, NSCN toh kihouna chungchang a phat anatep ahi’in, ahivanga tuchan a kinoptona sem nadinga kihouna umjing nalai ahi, ati.

National Socialist Council of Nagaland- Unification (NSCN-U) lamkai C Singson in tu naicha Bodo Peace Accord soi kaina aum thu aseiyin, Bodo hon alungtup amolso theiyu ahi ajeh chu Bodoland kisemdoh ding Assam in adoudal lou ahi’in, ahivanga eihon gamsunga eiho Territorial Council inei nading uva Manipur a Meilhei ho hetthem sah ding igot u ahi, tin aseiyin ahi.

Hetthei khat chu Meilhei hon Naga Accord kisem hin Manipur atohkhah loudinga kicheh tah a pan alah u ahi. Tu masanga Coordinating Committee on Manipur Integrity (COCOMI) kiti CSO chom chom sagi kipunkhomna in gamsung pumpi a kiphinna abol uva, Centre leh NSCN-IM in kihouna asem thuchen chule Framework Agreement thuchen aseidoh diu thumna a public alert rally leh cease work kiphinna abol ahi.

Thursday nikho a Ato Kilonser leh Chief Negotiator Thuingaleng Muivah lamkaina a NSCN-IM team hon Interlocutor RN Ravi toh Dimapur a Naga Peace Talk thu a kihouna aneiyu ahi. Thulhut dungjuiya sorkar toh kihouna aban umding ahi’in, ahivanga kihouna a NSCN-IM lamkai Kehoi apang poi, tia kisei ahi. Group in ‘competencies’ list apehlut ahitan ahivanga sorkar in thukhoh khoh ho adalhah ahi, ati.

“Sorkar in Naga ho rights hetpehna aneiding ahi. Nagaland Governor dinga Interlocutor RN Ravi akilhen hi India sorkar tohgon leh duha ahi. Civil society lamkai hotoh kihouna aneiya, keho douna a aman ahi. Achesa kum 70 val pan kila ahitan, rights ineiyu hi koima ki kijoulhep sah louding ahi”, tin Kehoi in aseibe in ahi.

CBI in Nehguh toh kisai a Senior Accountant khat chung a FIR bol

Imphal, Jan 31(ET): Central Bureau  in tuni in Prevention of Corruption Act noi a FIR senior accountant khat chung a file ana bol uvin ahi.

Accountant General a  senior accountant Yuman Sarat Meitei chung a nehguh a ginmo toh lhon a inn kholchil na ana kinei toh lhon in achung a FIR a fila ana kibol khum in ahi akiti. CBI akon thuso kimu chun asei na a Yuman Biren inn kholchil na kinei na a  dangka 31 lakh(approx); sana khi dangka 18 lakh(approx) lam man,  pension passbook 78 le ATM tamtah chuleh insah na lekha,  mi inn choh na, lou lekha, LIC lekha le bank lekha tamtah an akimu doh in ahi.

Agency akon thuso kimu dungjui in Accountant pa chu section 13 (2)  le 13 (1) (b) Prevention of Corruption Act, 1988 (as amended in 2018) toh kisai in achung a case kipan khum ahi akiti. Ama le a innsung mite min a um nei le gou chuleh sum ho akondoh na akihet doh theilou toh lhon a achung thu sei ding a phondoh na kinei ahi akiti.

Numei suse le that a themmo chang mi 4 ho khailih ding thu judge in kahlha ta

New Delhi, Jan 31: Achesa 2012 kum a kum 23 nungah suse le that a themmo chang mi 4 ho Tihar songkul a khailih nading nidan 12 masang tunichun Delhi court in akhongai sah tan ahi. Amaho khailih ding hi tuchung pum a velni judge in achon na, masang bang a khailih ding phat jong bituh abol dehlou ahi.

Hiche thu hi Judge Dharmender Rana in themmo chang khat ngehna President khut a sei bangkhai a um pansan a adang ho khailih ding nikho jong chon dia aseidoh ahi.

Judge Rana in gamsung dan in themmo chang khat alamlou a abolthei lou ahi tolhon a themmo chang mi 4 ho chu kibang a bol ngai ahi e, ati.

Hetding chu themmo chang Pawan Kumar Gupta in ngehna apehjong Supreme Court in asanpihlou ahi. Chuleh Mukesh Singh khel a ding layyer Vrinda Grover in jong AP Singh bang a themmo chang ho khailih lou dia gahtah a court a adinpikit ahi.  Hiche thu a hi kinelna jong tamtah chelha ahitai.

Langkhat a Public  prosecutor Irfan Ahmad in sei bangkhai a um Vinay Sharma ngehna tailou themmo chang adangse vang anikho le aphat gon toh sa dungjui a chelhah sah angai e, ati.

Trial court in January 17 nia chu  themmo chang Mukesh Kumar Singh (32), Pawan Gupta (25), Vinay Kumar Sharma (26) le Akshay Kumar Singh (31) ho se chu February 1 jingkah nidan 6 le Tihar songkul sung a khailih dia thutanna ana bolkhum ahi.

Themmo chang hon achesa December 16, 2012 jan a South Delhi a bus lhei lai sung a asuhset u kum 23 physiotherapy intern bollai nungah nu jong akijenna Singapore hospital a ana mollem ahi.