Assam gam a Covid-19 case athah 12 photchen hikit; case nei mi...

Assam gam a Covid-19 case athah 12 photchen hikit; case nei mi 13 ho jouse Nizamuddin Markaz toh kisaina nei hi

114
0
SHARE

Assam gam a Covid-19 case athah 12 photchen hikit; case nei mi 13 ho jouse Nizamuddin Markaz toh kisaina nei hi

Guwahati, Apr 1: Assam gam a COVID-19 positive case 4 aumbe toh kilhon a gamsunga natna neiya mi 5 alhingtai tia Assam Health in aphondoh jou Wednesday nilhah in case thah 8 photchen ahikitin tuhin Assam gam a COVID-19 positive case mi 13 aphatan amaho hi abon uva Nizamuddin case toh kisai ahi.

Wenesday nilhah a Health Minsiter Sharma in twitter mangcha thuphon aneina ah ‘Kiging un Assam a COVID-19 positive case 8 apunbe in tuhin gamsung’a natna nei 13 alhing tan amaho hi Tablighi Jamaat in Nizamuddin Markaz a abol kihopna a panla ahive’ ati.

Adamlou kal be dinga aginmona thu minister pan aseiyin, gamsung dinmun aboipet ahi, ati. Guwahati khopi a COVID-19 chungchang a press conference abolna a Sarma in adamlou mi 5, covid 19 positive hohi abon uva Nizamuddin case toh kisai ahi, tin aseiyin ahi.

“Coronavirus positive hi a test kibol mi 4 hohi Tablighi Jamaat in Hazrat Nizamuddin, Delhi a houthu toh kisaiya kikhopna a pang ahiuve”, tin Sarma in aseiyin chule Gauhati Medical College and Hospital (GMCH) a test abol nauva positive ahi kihedoh ahi, ati. Chule covid 19 case photchenna umho hi March 6-10 sunga Nizamuddin Markaz a um uva, Tablighi Jamaat in abol kikhopna a pang u ahi, tin Health minister in aseibe in ahi. Nizamuddin a pang Assam gam mi midang 4 jong Delhi a coronavirus positive ahi hetdoh ahitan, amaho jong Delhi a kijen u ahi, ati.

Lockdown kikoi gamsung mihon ajuiya, insung a akikhum tup diuvin Sarma in temna aneibe in ahi. Assam gam a achesa Tuesday nikho a coronavirus positive case masapen kisei ahi’in, Northeast India a case athum channa ahi. Assam tilouva Mizoram le Manipur gam a jong case khat cheh um ahi.

Tablighi Jamaat in March 13-15 sunga Delhi khopi a Nizamuddin Markaz agon na a pang mi 24 hi Covid 19 positive ahi Tuesday nikho a photchenna um ahitan, kikhopna a pang mi 2000 val lah a Indonesia, Malaysia, Kyrgyzstan le Saudi Arabia gam mi jong pang ahi. Hiche munvel a um a mi 547 ho list state in tua hi anei ahi.

Prime Minister Narendra Modi in April 14 chan gamsunga ‘lockdown’ bol dinga’ thuphon anei Assam gam a akilha ong poi, tin Assam Chief Minister Sarbananda Sonowal in aseiyin ahi. Gamsung miho ngaichat khoh thil pehna dinga dan phabep kikoi ahi’in, ‘social distancing’ phatah a juiya, lockdown lolhin sah dinga Sonowal in temna aneibe in ahi.

KTU thuso KIM in demna nei; Kuki thusim chungchang a akikum lou diuva sei

Imphal, April 1(ET): Achesa March nisim 22 nikho a Chassad khosung thu toh kisaiya NSCN-IM letterhead a ‘Kuki Tribal Union’ kiti kiloikhomna a President kahi tia amin pe louva thuso umhin organization lunggel ahoilou le alungneo avetsah ahi’in, hiche tobang thuso hi amachang phatchomna ding deihon mi thusah dungjuiya avel vel a aseiyu ahi, tin Kuki Inpi Manipur in thuso aneiyin ahi.

‘Kuki Tribal Union’ kiti min hi kilomlou ahi, ajeh chu Kuki thalheng a kisem kiloikhomna a kisei ahivanga Kuki te chunga achonna le anatoh hi dei umlou tah ahi’in, Kuki phatna ding ahipoi. History hi kinelna bei thutah a witness a pang ding ahi’in, hiche thu a Kuki ho them achan ding ahi. ‘Kuki Tribal Union’ hi Kuki kiloikhomna a kon gamlha tah ahi’in, atah ahina, tahsanna chule Kuki te ‘mandate’ ima neilou ahi, tin KIM Information and Publicity Department in thuso aneiyin ahi.

Changlhah pheng phabep a dinga apupa khong khet dungjuiya achaloh uhi abol thei pen u ahi’in, ‘Kuki Tribal Union’ tia kisei hon Kuki thu a pan alah loudiuvin jong asei uvin ahi. KTU le apu te ho (master) hohin amaho tohgon/lunggel deilam a um document hobou alah uva, thusim alam louva ale u ahi. Chassad le Sampui kho kikah a boina umjing a pan alahgot jeh uva March 16 nikho a Chassad kho meiya kihal lhahna thilsoh um ahi’in, hiche hi tohgon achom um kiselna ahi, ati.

Eastern Kuki Chiefs’ Association (EKCA) in achesa July nisim 25, 2019 kum a ‘press release’ abol nauva July 20, 2019 ni a EKCA le TNL Joint Consultation chungchang suhthengna aneiyu ahi. TNL in meeting jouva thil umdan ho adih louva aledoh uva, amaho deibanga aseiyu hi kidang kasa uve, tia EKCA in asei ahi. Hiche ho a kon thil jouse hi koi tohgon ahi bailam tah a hetdoh thei ahi, ati.

‘KTU’ in Kuki te rights chule historical status chungchang a thusei nading tha aneipon, KTU in Kuki thusim semthu ahi tia asei hi imadang ahipon Kuki thusim jana apehlou chule adihlouva asei na ahi, ati. ‘Kuki Tribal Union’ ahilouleh Kuki thusim hoijoh hi semthu ham ti hetdoh nadinga akikhol diuvin aseibe uvin ahi.

Kuki Tribal Union in alunggel hi apupa vetkolna noiya aumna a akikoithim ule mijouse phatna ding ahi’in, chule Kuki chungchang thu a ima aseilou diu ahi, tin Kuki Inpi Manipur thuso chun aseibe in ahi.

KKL Moreh block in chaga in le meithai kithopina nei

Imphal, April 1(ET): Ni 21 gamsung pumpi kikha jeh a hahsatna tamtah alhun toh kilhon a Kuki Khanglai Lompi (KKL) Moreh in covid 19 jeh a hahsatna ho kimaito pi nading chule society a alhasam ho huna dinga pan ala uvin ahi.

KKL Moreh block in Moreh town le akimvel a um chaga in chule meithai ho kithopina ape uvin ahi. KKL Moreh in Jehovah Jaireh Orphanage Home Moreh kithopina a anchang bag 3 chule Adulam Rehab Centre Moreh kithopina a anchang bag 5 ape uvin ahi. Chaga in a hi chapang 20 vel um a chule Adulam Rehab a hi khamnathei bol mi 30 val um ahi.

Tahsa bukim louva atupa Seiminlun Khongsai toh chengkhom a Nemkhoting Khongsai kiti meithai tehse khat jong KKL Moreh in panpina ape uvin ahi. Moreh town a um Bihari ho, Hill Tribal Council volunteer, K Kholen kho le JH Wajang kho jong KKL in akithopi in ahi.

District administration toh kitho a KKL Moreh in lockdown le curfew jeh a Moreh town a tang den a Kangpokpi district a kon adamlou chule tehse ho anungsol uvin, police, district administration chule Assam Rifles ho panlahna jal a KKL Moreh in achung uva kipathu asei uvin ahi.

‘Helping the Needy’ ti thupi a natong a Kuki Khanglai Lompi hi society a mopohna neipum a mipi kithopina dinga pan la ahi’in, accident, dammo veisetna, natna, chule adang dang a mipi kithopina a panla kiloikhomna ahi. Jat le nam khenna umlouva KKL in pan alah ahi’in, politics toh kisaina aneilou chule sorkar ahilouleh nam douna a kiphinna kibolna ho a panla lou kiloikhomna ahi.

 

Nizamuddin a pang Manipur gam mi 85 alhinge, ti ‘mobile tracking record’ in vetsah

Imphal , April 1(ET): Gamsung thuso a janni a Delhi khopi Nizamuddin a March 13 le 15 kikah sunga Congregration a pang dinga ginmo mi 462 lah a mi 85 hi Manipur gam mi ahi tia thulhut dungjuiya thuso anei jouva COVID-19 Central Control Room in ‘report’ adihpoi, tin suhthengna anei uvin ahi.

State sorkar in Central Control Room mangcha a district DC le SP hotoh kitho a hou thu a kikhopna a pang ho ahol jing ahi, tin suhthengna thuso chun aseiyin ahi. Mi 39 hi Manipur gam pam a um nalai ahi, ati. Sorkar in hiche conference toh kisaina nei mi 14 akholdoh ahitan, hiche lah a mithum hi test bol dinga apui uva chule adang 11 jong screen abol diu ahi. Tua kiholdoh hohi itih a gamsung hung kile uham ti kiseilou ahi.

IT in athah a hiche  chungchang thu akholkit ahi. News published abol masanga Imphal Times in ‘COVID-19 Central Control Room’ 0385-2411668 contact abol a kihouna ho record abol ahi. Atil a phone la hon thutah ahi photchen ding nom louvu ahi’in, chomkhat jouva min list kithang hi ‘official’ ahipoi, tia aseiyu ahi. Sorkar in mi 80 nailam kikhopna a pang hidinga aginmo na thu jong asei ahi, ati.

Tua COVID 19 Central Control Room in Imphal Times thuso nasatah a anelkal a, adihpoi tia asei ahi. Sorkar vaipo hon mipi kichat ding avendoh nom himaithei ahi. Ahivanga civil society lamkai phabep in media le social networking site ho a Delhi khopi Nizamuddin a hou thu a kikhopna a Manipur gam mi 10 apang in chule mikhat ahung kile naipoi, tia asei ahi. Hou lamkai hohin hiche hi kin a pang hon register abol masat ding dan uva amaho record dungjuiya asei ahi.

Tua Imphal Times team hon athu akhol kit nauva report kibol thuso hi adih e, ati ahi. March 13 le 15 sunga Nizamuddin, Delhi a Congregration a mi 2000 val pang ahi’in, government authority in kikhopna a pang ho mobile phone a kon trace abol u ahi’in, March 12 le March 22 sunga Nizamuddin area a North East state ho a kon mobile mang 456 lhing ahi. Mobile mang (user) holah a 7 hi Meghalaya gam a kon chule 85 hi Manipur gam mi ahi, kiti ahi.

Amin le address kitoh lou maithei ahi, hijong le phone mang a mi 85 hi Manipur gam a kon ahiuve, tihi official thulhut in aphotchen ahi. Abon uva Manipur ahung kile nai pouve, ti thu IT in amudoh ahi’in, ahivanga akeh khat tobang gamsung hunglut diu ahitai, tin IT thuson aseibe in ahi. Medical expert hon asei dungjuiya atamjo hi Covid-19 hatna (hotspot) a um ahiuvin, April kal masa ahilouleh kal ni sunga symptoms soh dinga ginmo ahi, ajeh chu natna hi asodoh nadinga kal 2 le 3 lut ahi.

Kikhopna a pang a ahivanga thutah sel ding agot uva ahile May lha kah a Coronavirus hi phase 4 lhung ding chule gamsunga manchah alhahsam jeh a boina sangtah lhung ding ahi. Thuso hi mipi kichat nadinga kisei ahipon, State Health Department in hou lamkai ahiloule CSO phabep suh lunglhai nadinga thutah asel sanga Manipur huhdoh nadinga khoutah a pan alahding deisah na jal ahi, tin thuso chun aseibe in ahi.

Manipur gamsung a school, college kikhah ho kikhah jom nalai ding

Imphal, April 1(ET): Manipur government in thuso abolna achun gamsung a Covid-19 jeh a gamsung pumpi akikha toh lhon in Manipur gamsung a jong themjilna mun kikhah ho kikhah jom nalai ding in asei in chule itih chan kikhah ding ham ti vang seichet ahipon, gamsung a natna dinmun hiding in thuso chun asei in ahi. Education department in thuso abolna achun government order March 12 leh 16 nikho a kiphong doh Manipur gamsung a themjilna mun chom chom government school, private school, coaching, tution centres, boarding chule adang dang ho thuthah aumkit masang se honglou ding in thuphon abol in ahi.

‘Lockdown’ aum vanga Bihar gam mi ho Dimapur lampi a kon Imphal khopi hung kitol lut jing

Imphal, April 1(ET): India pumpi ‘lockdown’ akibol laiya gamdang mi (non-local) phabep Dimapur lampi a kon Manipur gam jon mi phabep Hatta Telipati, Imphal a aum uvin chule phabep in Imphal khopi ahin jot nahlai ahi, tin thulhut in aseiyin ahi.

Telipati vengsung mikhat in Hatta Area civisl society organization volunteer ho henga athu aseipeh ahi. Hatta Makha Leikai Social NGO Development Organisation le Minuthong Hatta Social Welfare Organisation kiti kiloikhomna ni in April 1 jingkah a Telipati a operation abol nauva Bihar gam mi mithum aum ahetdoh u ahi.

Vice president, Hatta Makha Leikai Social NGO Development Organisation, Asker Ali in thuso miho akimupi na a Bihar gam mi 7 police ho henga kipedoh ding ahi, ati. Gampam mi aume tia akiseina Golapati vel a mi hol dinga phabep ache e, tin jong aseiyin ahi.

Kanglatombi a kon Imphal jon a phabep ahung uve, ti thu jong ajah u ahi’in, Dimapur a kon DI gari hire abol uva hungu ahi. Lockdown khoh pet a iti gamsung hunglut uham ti khol angaiye tin Ali in aseiyin chule gamdang mi gamsunga hunglut ho ‘quarantine’ bol angaiye, tin aseibe in ahi.

Myanmar akon Ccpur jotlut theina ding lampi jouse kikhah

Imphal, April 1(ET): Churachandpur district Administration in Myanmar toh agamgi a kijotmatna lampi jouse munthum ana khah tauvin ahi.

Ccpur DC Pawan Yadav in aseina achun Myanmar akon Ccpur gamsung hunglut theina Suangdai kho a um Border Pillar No.36/37, Behiang a um BP No. 42 chule Suangphuh a um BP No. 41 ho akikhah tai ati. Border point kikhah na natoh chu District police, Assam Rifle hotoh kitho a SDO Singngat leh SDO Suangdoh ho makaina noiya kikhah ahi.

Alangkhat ah Chief Executive Officer ADCC Lalthazam in janhi chun district sung a sumkolvei bolho toh hiche natna chungthu a panlahkhom ding thu a kihou khomna jong anei uvin ahi.

 

Delhi a Northeast mi boina nei hon hetsah na eihin nei u hen: NPMHR-Delhi

New Delhi, April 1:  Naga People’s Movement for Human Rights, Delhi (NPMHR-Delhi) in tuni in Delhi sunga Northeast India mi um ho genthei na le thetna toh ho in kiloikhomna etsah na ahin nei ding uvin temna ana nei uvin ahi.

Hetthei khat chu covid-19 natna jeh a ahung kon doh na China gam ahijeh a nOrtheast mi ho hichenatna toh kisai a ki engbol na hung um jing u ahi. Hitabang phat boilai a mipi in northeast mi chunga boina le suh genthei na anei jing uva, government in jong deibang a kithopina apeh loudan jong tahlang na kiloikhomna in ana nei utoh lhon in hitabang suh genthei na toh ho in kiloikhomna hetsah na ahin nei jing na ding uvin tahlang na ananei uvin ahi.  Hiche boina toh ho in kiloikhomna hetsah na ahin nei ding uva thuphon ana nei utoh lhon in phone no. 9999228582, 9717136251, 7011182692, 9643922343 ahilou le npmhrlink@gmail.com hetsah na ahung kinei na ding in phondoh na ahin nei uvin ahi.

NPMHR hi voluntary organization ahi toh lhon  a member ho kithopina jal a hing jing ahin, kiloikhomna in abol kham kham kithopinanortheast mite apeh ding ahi tin jong kiloikhomna in hetsah na ahin nei uvin ahi. Kiloikhomna in northeast  mi ho ang a koima in kichat tijat anei na lou ding uvin hetsah na ahin nei uvin ahi. NPMHR-Delhi akon thuso kimu chun asei na a COVID-19 hin mipi ho kichat tijat ahin  neisah jou a lhang sung mi phabep hitia ki suhboi hi vangset um tah ahi tin ana sei uvin ahi. Mumbai le Delhi mun a Northeast  mi phabep kisuh genthei na ana kisei naho chung a demna sangtah jong ahin nei uvin ahi.