Assam a go juh jeh’a mun chom chom a munchim um; mi...

Assam a go juh jeh’a mun chom chom a munchim um; mi 20 thi, phabep kisukha

52
0
SHARE

Assam a go juh jeh’a mun chom chom a munchim um; mi 20 thi, phabep kisukha

Guwahati, June 2: Assam gam a Tuesday nikho a munchim na thilsoh chom chom a chapang thum panna a mi 20 athi in ahi.

Athi atamjo hi Barak valley, Southern Assam mi ahiuvin, midang phabep jong akisukha in ahi. Rescue team hon thilso namun adel lut tauvin ahi. Gamkaiya hi achesa ni phabep sung go hattah ju ahi. Athi holah a mi 7 hi Cachar district mi ahiuvin, mi 7 hi Hailakandi district chule mi 6 hi Karimganj district mi hiu ahi. Athi akehkhat hi chapang ahi, tin sorkar thulhut in aseiyin ahi.

Cachar district a jingkah nidan 7 don a munchim in inmun khat achimkhum na a Jaypur, Tajim Uddin Laskar, ajinu chule atute mithum ahing a avui den ahi. Assam State Disaster Response Force le police ho kitho uva, vengsung miho kithopina a thilong aladoh tauvin ahi. Chapang hohi kum 5 le kum 10 kikah hiu ahi’in chule thilsoh a jong midang phabep akisukha in ahi.

Hailakandi district noi Algapur a jong munchim jeh a numei 4 le chapang khat panna a insung ni a mi 7 athi uvin ahi. Thilsoh athum channa hi Kaliganj area, Karimganj district a ahi’in, numei thum le chapang ni panna a mi 6 thi ahi. Assam State Disaster Response Force, police le vengsung mihon thilong lahna a pan alah uva, chule akisukha ho hospital alhut u ahitai.

Chief Minister Sarbananda Sonowal in relief operation kalsah dinga district administration henga thupeh aneiya chule thilsoh a thi ho insung mite compensation peh dinga jong asei ahi. Hailakandi district mun ni a munchim khohse ahi’in, insung khat a kon mi 5 panna a mi 7 hiche mun a thi a chule midang 5 jong kisukha ahi.

Cachar district a athi mi 7 jong hi abon uva insung khat hiu ahi. Rescue operation gamkaiya achelha jing nalaiye, tin official hon aseibe uvin ahi. Rahimpur kho, Karimganj district a munchim jeh a mi 6 thi a, hiche lah a mi 5 hi insung khat hiu ahi. Assam Forest Minister Parimal Suklabaidya amun a um a chule ‘rescue operation’ apat ahitai.

Assam gam a kal khat lhing go ju ahitan, Monday ni a kon twilen nemsuh ahitai. Twilet jeh a mi 9 thi ahi. Assam State Disaster Management Authority (ASDMA) in asei dungjuiya, gamsunga um district 7 a twilen ahi’in, mihem 1.97 lakh vel twilen in asuhboi ahi. Mi 7,000 vel hi relief camp 45 a um a chule phailei hectare 25,000 asuhset ahitai.

Hiche ho chunga agam uva Covid 19 case jong kal cheh cheh ahi. Assam gam a COVID 19 positive case 1,485 lhing ahitan, hiche lah a active case hi 1,194 hiya, mi 284 damdoh a chule mi 4 natna jeh a thi ahitai.

 

Assam govt. in kithopina Dk. Lakh 4 cheh peding

Guwahati: Assam a munchim jeh a District thum akon mi 20 in thina atoh na chung uva agam govt. in district administration heng a Dk. Lakh 4 cheh peh ding in asei in ahi. Hailakandi, Cachar le Karimganj district sung a munchim jeh a mi 20 in thina atoh uvin midang 19 akitongkha uvin ahi. Hailakandi a mi 7 in thina atoh uvin midang 9 jong akitongkha uvin ahi. Cachar district sung a mi 7 in thina atoh uvin chule Karimganj district a mi 6 in thina atoh uvin midang 10 aki tongkha uvin ahi.

Imphal-Jiri lampi munchim jeh a highway a gari tamtah tang den

Imphal, June 2(ET): Imphal-Jiri lamlen mun chom chom a munchim jeh a gamdang a tangden gamsung mi akipuidoh ho chule thil kipohna truck chom chom a ohden uvin ahi.

NH-37 kom Tousem Sub-division noi, Tamenglong district a um Sibilong kho a munchim (mudslide/landslide) in dukan khat panna a in 2 alhoh a, thil jouse  alhohmang soh ahi. Jiribam langa kon hung thil kipohna truck khat jong bonnang in achim den a, highway alangni a gari tamtah tangden ahi’in, lamlen metre 200 vel hi bon in atom ahi.

BIPL company in NHIDCL noiya lamlen suhthengna natoh apat u ahitai. Monday ni a go hattah ajuh jouva Sibilong a munchim ahi, tin thulhut in aseiyin ahi. Oinamlong le Noney kikah a jong mudslide khat aumin, Sinam kho a jong munchim jeh a Imphal-Jiribam lamlen akikhah in ahi. Highway maintenance group hon lamlen suhthengna dinga pan sangtah alah u ahi, tin sorkar official hon asei uvin ahi.

Alangkhat a, Barak vadung jong khang cheh cheh a, vadung pam a cheng khosung mihon mun dang ajot diuva thuhilna aneiyu ahitai.

 

Covid-19 positive case 89 lhingta; natna nei mi 3 damdoh be

Imphal, June 2(ET): Manipur gam a Covid 19 case kihet be atam cheh cheh in, nilhah nidan a case athah 6 akimudoh be in ahi.

State Health Directorate in thuso anei dungjuiya, tu masanga positive hi a ni 35 bou hinalai naosen pasal khat le kum 21 a upa anu chule kum 19 a upa anunei nivei RT PCR test abol uva Covid 19 negative ahi jouva JNIMS hospital a kon ‘discharge’ abol tauvin, amaho hi ni 14 sung inmun a ‘quarantine’ a um nalai diu ahi, ati. Hiche hi gamsunga dinga lolhinna hetthei umtah ahi, ati.

Hiche toh kilhon a, gamsunga natna a kon damdoh mi 14 lhing ahitan chule natna neiya jong mi 89 lhing a, active case 75 um ahi. Recovery rate hi 16 percent ahi.

Monday nilhah a VRDL, RIMS a test kibol numei khat le pasal khat Novel coronavirus ahi kihedoh ahi. Numeinu hi Imphal West district mi ahi’in, Pune a kon hung kile ahi. Chule pasal pa hi Delhi a kon hung kile ahi.

Kum 36 a upa numei khat jong VRDL, RIMS a covid positive ahi akihedoh in, amanu jong Delhi a kon hung kile, Imphal East District ho ahi. Kum 18, 21 le 22 a upa Imphal East district a kon hi a numei adang thum jong VRDL, JNIMS a Covid 19 positive ahi kihedoh ahi. Amasapen nu hi Pune a kon hung kile hiya chule adang 2 hi Delhi a kon hung kile ahi.

Abon uva COVID Care Facility, RIMS le JNIMS a umdiu ahi’in chule containment le ‘contact tracinng’ hojong abol u ahitai. Tuesday nilhah nidan 4.30 chan a vannoi leiset a Covid 19 case agom a 6,189,879 lhing ahitan, chule tuchan geiya natna jeh a mi 3,75,951 thi a chule mi 2,696,009 dam doh ahitai.

India gam a coronavirus case photchenna kinei agom a 199,785 lhing ahitan, active case 98,287 hiya chule mi 5,612 hi natna jeh a thi ahi.

 

 

Covid-19 akon damdoh khat Ambulance kipe louva Auto a achenna inn kisol

Imphal, June 2(Eastmojo): Thulhut khat in aseina achun kum 22 a upa nungah khang dong khat JNIMS akon Covid-19 natna akon adamdoh juovin a chenna inmun chan Auto in km 100 tobang jot in aki nungsol e ati. Numei nu chu Kamjong district sung a Skipe kho a cheng ahi in, hospital akon Sunday nichun discharged ahi in hospital in achene ding ambulance imacha agonpeh pon ahi. Numei nu penna pa in thuso miho heng a aseina achun JNIMS akon ambulance in Khuman Lampak chan eithah uvin hiche akon gari dang kingaito ding in eiseipeh uvin ajeh kadoh leh ambulance hi district dang lutthei nading permit neilou ahi tin eiseipeh uve ati. Gari dang kahol uvin kachanu dinmun ahet jeh un koimachan eipo nom pouvin achaina in Pangei mi numei auto tol khat ahung kipedoh e ati.

Khangthah numei nu chu nilhah pung 3 don a hospital akon kisoldoh ahi tan hinlah Kamjong district jonding a ahung kipat doh phat uchun nilhah pung 6 agei tan ajing jingkah pung 2:30 don in Kamjong alhung uvin Km 100 tobang ajot uvin ahi. Alangkhat ah athah a pang auto tol numei nu jong chu achenna vengsung mihon quarantine centre a umding in ano kit uvin ahi.

 

CM Biren soi guh jeh a mithum police hon man

Imphal, Jun 2(UNA): Imphal East police hon Director, Jawaharlal Nehru Institute of Medical Sciences (JNIMS) henga lekhathot chom chom ni akipehna a Chief Minister N Biren Singh soi gu a mithum aman uvin ahi. JNIMS in staff lah ding ati thu toh kisai ahi.

Mithum hohi Nongthombam Ibomcha Singh (47), s/o (L) N Angoucha Singh, Pourabi Mayai Leikai a cheng, Ninglui Keishing (66), s/o Releng Keishing, Bungpa Khunou a cheng chule Khoinaijam Dijen Singh (48), s/o (L) Kh. Kharekpa, Samaram Mayai Leikai a cheng ahi.

SP Imphal East Conference Hall a Imphal East SP Jogeshchandra Haobijam in Tuesday nikho a thuso miho akimupi na’a, achesa May nisim 29 nikho a Director, JNIMS, Professor Th. Bhimo Singh in hiche thu hi Porompat police station a hetsahna anei ahi. Un-Officials (U.O) letter no.1/18/2019 dated 29/1/2019 le 1/29/2020-CM lekhathot hi alhem ahi, tia kisei ahi.

Chief Minister pa soil hem kikaina lekhathot hi ka office a January 31, 2019 ni leh January 17, 2020 ni a ahin thot u ahi, ati. Hiche toh kisaiya Imphal East police station a IPC section chom chom noiya FIR ni kijihlut a chule thukholna chelha ahi, tin SP Imphal East in aseiyin ahi.

Akiman mi thum hohin thilse abol u aphon u ahitai, tin jong asei uvin ahi. Khonung a hitobang thilsoh auma ahile police ho henga hetsah ding chule department hon ‘verify’ abol toh diuvin SP in temna aneiyin ahi. Chule akiman mithum ho gamsung dan dungjuiya gotna kipe ding ahi, tin aseibe in ahi.

Congo a Ebola natna avel a akisei kit e, tia WHO in thuphon nei

Congo, June 2: World Health Organization Director-General Dr Tedros Adhanom Ghebreyesus in Monday nikhon Democratic Republic of Congo a Ebola natna avel a akisei kit na ahi, tia health official hon photchenna aneiyu ahitai, tin asei uvin ahi.

WHO chief in thuphon anei hi Congo a Ebola outbreak jeh a phat sottah agamsunga hahsatna umho avetkol nau phase achaina alhun jouvu ahi. Congo Health Ministry in asei dungjuiya, Wangta a athah a Ebola case 6 kimudoh a, hiche lah a mi 4 thi a chule mi 2 hi kijen nalai ahi. Ebola case hiche sanga atam cheh ding ministry in akichat na thu jong asei uvin ahi.

“COVID 19 hibou mihem dinga thina thei natna ahipoi, tihi ikigeldoh sah nau ahi”, tin Dr Tedros Adhanom Ghebreyesus, WHO Director-General in aseiyin ahi. “Pandemic hi gelkhohna sangtah akipeh vanga WHO in health emergency toh kisai adang dang hojong aboipi jom ahi”, ati. Hetthei khat chu achesa 1976 kum a Congo a Ebola outbreak anaum masapen ahi. Mbandaka le akimvel hi Congo a Ebola outbreak 9 vei channa akhohset na mun ahi’in, May le July 2018 kum a ana kiseithang ahi.

“Phat hahsat pet tah a thilsoh um ahi’in, ahivanga WHO in achesa kum ni sunga hi Health authority, Africa CDC le partnet dang dang hotoh outbreak douna dinga pan alahkhom jing ahi”, tin Dr Mtshidiso Moeti, WHO Regional Director for Afria in aseiyin ahi. WHO in team sol dinga tohgon anei ahi’in, akinaipi gam ho a chal thei ahijeh a aganna thei pen a pan lah ding ahi, ati.

WHO team hohin natna vetkol nadinga authority ho akithopi u ahi’in, Mbandaka a um u ahi. WHO team hon test bol dinga sample alahkhom jing uva chule natna neiho hi koi toh kimuto kha uva chule amaho kon koiyin natna akilah son thei ding ham ti kholna jong anei jingu ahi.