Army ho chatvalji ham Mipi joh leilaji ham

Army ho chatvalji ham Mipi joh leilaji ham

241
0
SHARE

  NSCN-K hon Tamenglong district a Barak lei kom’a IRB ho meithal hoitahtah 4 analahpieh jeh uva Army/Assam Riffles (AR) hon ‘operation’ abolnauva Tamenglong district a Sibilong kho’a kon “mi 2” anamat jeh uva Rongmei Naga numei kiloikhom hon sepai ho chavalna thu asei uhi amuntah a thilsoh gamu ho seitoh kitohlou ahi. Govt security force ho achatvalji pouve tina ahidehpoi. Kum phabep masang chun Security Force ho chung’a ‘ambush’ (buluna) aum’a govt sepai ho athi aum poupouleh anung’a operation kibolna hoa chu kho kihal, khomi ho kibanjep, akithat gei ana umji ahi. Milham, khohelou ahi henasasa’a kiman, kithat ho ana um dalou ahi. Ahin itih ham’a patnin Army/AR hon jong operation kibolteng mona neilou leh khohelou khomi ho moh suhgenthei tiho hi aboltahlou u tithei ahi. Ningkum’a Chandel district a Paraolon kho kom’a NSCN-K holeh KYKL thingnoimi hon Army ho ambush anabol uva Army 18 langjen anatha uchun Army hon operation abolnau ah khohelou khomi kiti tha malah suhgentheina jong anabollou u ahi. Hiche hi Army honjong mipi ho moh suhgenthei theiloudi atiu ban’a khosungmi hon ambush bol thingnoimi ho kithopina apiehlou u ahet jeh ujong ahi. Chuban’a Human Rights thu ahung hat jeh hin govt sepai honjong lunghanna khohelou khomi ho chung’a moh buhlhah hohi khonungleh service a boina thei ahi ahetjeh u ahi. Sibilong kho’a hi ahileh IRB ho manchah chom’a pang Sibilong kho’a kon pasal khangthah 2 AR hon amat jeh uva khomi hon akiman teni chu sepai ho khutna kon chudoh teidi atinalam uva kinotona um, sepai honjong mol analha uva akisukha ana um ahi. Hiche’a akiman teni hi khohelou ahilhon, ahilhonlou khosungmi akon mama’a kichieh sel’a AR ho kom’a guhthim’a “aseidoh” umnung’a kiman lhon dan’in akiseiye. AR hoto khomi ho kinotona kiti jong hi koi kho kel ham ichuom hidiham, numei hotoh AR ho kinoto ahijeh-a AR sipai hon numei ho asotkhah jap jongleh ahiloulangtah (molest) a kiseijeng thei ahi. Akiman teni chu kaplih in umtei lhontante ti ginmo jeh-a chudoh teidi ti hidi ahi.

  Army/AR hon thingnoimi amatnau leh akaplihji nauva hi jou le nal aseinau jong umji mama ahinai. Mi khat mat uva akaplih jou teng uleh bomb ham, pistol hamkhat toh asipbeh jiuva “ding’in akitileh eihin kap jeh uva kikaplih ahi” ti tobang anadim’e. Kon ipi aseitheidi ham tia kikhohsah jeh-a chavalna jong aneiji nauve. Ahin tulang’a vang hi govt sipai hojong chutilom’a kikhohsahna’a aneibehlou u tithei ahitai. Thinglhang hihen phaicham hileh, Civil mi kiloikhomna ho joh hi leisekuong jia sepai hon amat khat chu thingnoimi ahi, thingnoimi to kivop beh ahi henasa’a thingnoimi ahipoi tia pangkhon gojiu ahi. Thingnoimi ham, thingnoi to kivop ho ham akimat tengleh khohelou ahi tisang’a akimat jouva tha ahilouna dia vang mipi hon pan alah thei u ahi.