Anglo Kuki War Film (Biritish to kisat thusim Cinema a boldi...

Anglo Kuki War Film (Biritish to kisat thusim Cinema a boldi tohgon)

264
0
SHARE

Anglo Kuki War Film

(Biritish to kisat thusim Cinema a boldi tohgon)

                           Ahung lhung ding October lha leh Sadar Hills C Aisan kho a Anglo-Kuki War Centenary kingon neidi ti ‘Anglo Kuki War Centenary Celebration Committee’ hon thuphon ahinnei uve. Kum masa (2017) jong chun Chandel district Longpi kho ah hiche Centenary kin ana kimang’e. Ipi thu hileh kum jakhat lhinna (centenary) kiti hi athupina jat chombeh ahi seilouva het ahi. Kum jakhat masang’a ipu ipateuvin haosa ho lamkaina’a chupetna vannoi leiset chung’a ahatpen sapkang (British) te anasat u thusim hi tu khang geija kithang atpina khatna inei uva nampi thu to kisaija thusei thilbol jousen jong hiche thusim hi pansatna’a anei u ahi. Hitobang thusim neiloute ichenkhom piu inheng louheng hon ithangthip peh ten u ahi. Thusim kiti hi thudih, thilsoh tahbah aum’in abang chu atahtah hilou anopna a kisem leh kisei Benglam leh Galngam thusim ho tobang (Fairy tale) loi jong aum’e. Kukiten hangsan tah a British govt kum 2 lang khucheng’a ana kidoupiu thusim hi semthu thusim hilou, leiset umlaisea a kiseidi ahi.  Hitobang thusim neite kahi itiuva kum jakhat lhinna nit maimaija kichaidi dan’a ana umtah jeh in agelkhoh mi loikhat nin tulai khantouna to kitoh a hiche thusim ‘Film’ a boldoh a pha dia ahingel u ahi. Hiche hi Shillong a Kuki Inpi Meghalaya hon ahin ngaito pat u ahi. Ahin ipi hungti hitam chomkhat chu hiche ‘documentary film’ tohgon (project) hi Manipur lang’a abolgo loi jong ahung um’in sumdonna (fund drive) jong akibolpan’e ti thu ahung kithejal’e. Tunaicha jong chun Anglong Kuki War Documentary Film bolna dia sum holna’n Imphal ah Manipur Eleven hotoh Manipur a kon ISL football kichem hon Football kichepna ananei uve. Anglo-Kuki War Documentary Film bolgo hi adondon’a bolthei ahinai. Ahin insung’a Drama kibol kitho tobang sang’a ahoi tah khat bou kibolleh dei um ahi.

                        2017 March a chu Anglo Kuki gal kum jakhat analhing ahitan, hiche masangpeh kum 5 masang beh a Centenary to kisaija boldi-di leh tohgon neidi-di ana neidoh a gal ana kisatpat kum le lha kum jakhat lhin lhin chun thenso thei thei ana kitheiso theileh kilom ditah ahi. Ahin thil ahung lhung di jong kihe keukouva aphat le nikho tah ahung lhun’a thil ahungso tengle bou chatloh bep, kipan bep te ihi jeh un ikigot tup kah uleh akichai kitohji ahidan hiche Film tohgon’a kon jong muthei ahi. Sopi Mizo ten MNF Movement laija govt sepai hotoh ana kikaptonau thusim ho tunin Film jatjat aboldoh un Internet khang ahijeh in YouTube ah vet thei ahitai. Kuki haosa gal lamkai ho suonglim (statue) adondon’a tundohdi inaboipi saosao lai uva pat chun nam pumpi huop din hiche Documentary Film project hi anakipanleh tu gal kichai kal kum jakhat lhinna kin kimanna nikhoa hi thenso thei hidi ahi. Ichennau khopi ho kotbul – Churachanpur, Moreh, Kangpokpi, Saikul hoa ‘Anglo-Kuki War Centenary Gate’ tundohdi ti anagel loi aumvang’in sum le pai hahsat thu paomepi’n bollou ahitai. Documentary Film mi gah vetthei domdi kiti hi hiche ‘Gate’ ho tundohna sang’a ajatsom ajatsomni lang’a sum lutjodi ahi. Film hi ibol ngalleh mi nuisat theibep hilouva phat le sum lutdi hijongleh akilomdom bol’a dei umtah ahi.