Anglo-Kuki War Centenary mipi asang’a sim jaona a C. Aisan a loupi...

Anglo-Kuki War Centenary mipi asang’a sim jaona a C. Aisan a loupi tah a kimang; Tuilangkol mipin T. Vaichong mun’a mang, Chassad a jong mipi taokhomna a kingon chelha

219
0
SHARE

 

Anglo-Kuki War Centenary mipi asang’a sim jaona a C. Aisan a loupi tah a kimang; Tuilangkol mipin T. Vaichong mun’a mang, Chassad a jong mipi taokhomna a kingon chelha

Saikul, Oct 17(ET):  Pu le Paten Zalengal ana sat kal’u kum 100 lhinna Anglo-Kuki War Centenary chu gamsung namsung a boina hahsatna ijat ana um jong leh tunin Kangpokpi District, Saikul Sub-Division hopsung’a um C. Aisan khomun ah mipi asang aja pan nan Loupi tah in ana kimang tan ahi.

Kuki Inpi Kumpipa Sholet Lhungdim in Pu Chengjapao Statue Feet 18 a sang a kisem leh Janglum Song hondohna aneiyin Pule pa galsat kal kum 100 lhinna melhet jingna dia kiphut Janglumsong leh  akitung doh Statue chu Dr. T. Lunkim Administrative Secretary KCC in Pathen heng a lhandohna ana neiyin ahi.

Nampi Janglumsong leh Statue hondohna kin achun Pengkul gin ngeitah ana kimut in chuleh Kuki Haosa 20 a kon Pule pate janan gun salute jong ana um in ahi.

Tuni Kin gon chu  Pu Solet Lhungdim Kumpipa makaina ana kimang ahin, Centenary kin toh kisaijin Namsung’a hetthei tah, Pu Dr. T. Lunkim, Pu Lunpi  Gangte, Pu TN. Haokip, Pu Ngamthang Haokip, Pu Yamthong Haokip, Pu C. Doungel, Pu Sholet Lhungdim Kumpipa ho a kon houlimna jong ana um in ahi.

Kom Cultural Troupe, Gangpijang Kuki Cultural Troupe, Jangnoi Cultural Troupe le KCK Saikul Synod ho akon in jong nam lam vetnom um tah tah vetlhah na jong ana um in, hitoh kilhon in Kuki namsung’a lasathem Joicy Lamnunnem Touthang , Hoineilam Haokip chule KUGAA ho akon Pathen vahchoila ngailhah na jong ana um in ahi.

Vaigei tah a thulhut kimu khat in aseina ah tuni kingon a kitungdoh Nampi Janglumsong chu CM thupeh dungjui in Kangpokpi SP makainan song kihongdoh anakilekhu kit e tin tahsan umtah thulhut khat in aseiyin ahi.

Alangkhat ah Kangpokpi District, Twilangkol a T. Vaichong kho a jong lhangsung mipin Haokholal Hangshing Chairman Sadar Hills Autonomous District Council Jin-gun hinan Anglo-Kuki War Centenary loupitah in ana mang uvin ahi.

Kamjong District, Chahsat/Chassad khomun ah jong Anglo-Kuki War Centenary Commemoration Pathen henga taokhom na in ana mang uvin ahi.

Hiche kingon hi Eastern Kuki Chiefs’ Association (EKCA) mopoh na noija kimang ahin, vaihom in Helun Vaiphei Gen. Secy KSO, Kamjong District apang in Thangkhogin Haokip, Chairman KBC No. 17 in phat lhandoh na aneitoh kilhon in Lalboi Haokip, Prez KSO, Kamjong in lemna thusei naphat ana lan chujou in Anglo Kuki War Centenary Commemoration thu ah Seimang Haokip, Gen. Secy, EKCA in houlim na giltah in ana nei in ahi. Chujou in Rev. Thongkhongam Haokip @ Ngamneo Pastor, Centre Church Chassad, KBC No 17 in taokhom na ana lamkai in mipi taona phatbih thum a kihom khen in lunglut tah in taona anei khom uvin ahi.

Mipi taokhom naphat kichai jou in Jamkholun Haokip, Prez EKCA in kipathu seina anei in Ngamlun Haokip, Head Deacon, Pihang Baptist Church in phat chaina anei in ahi. Hiche kin ahin  kho 10 akon hungkhom mipa le gollhang ho chule Chassad khopi akon nungah phabep jaona a taokhom na kin ana man uh ahi.

Anglo-Kuki War Centenary nikho a kho phabep in Nampi Lumsong ana tungdoh

B.Lalboi Gangte

CCpur. Oct. 17 (ET): Anglo-Kuki War 1917-1919 Centenary toh kisai’a Kuki Nampi Lumsong  tunin CCpur District hopsung HB Phaicham, L.Gamnomjang leh S.Nabil Kho mite in kilungtoh tah in akho cheh uvin japi mitmu thei ding in ana tungdoh uvin ahi. Hiche Kuki Nampi Lumsong HB.Phaicham,  Tuibong Sub-division sung’a kitundoh na kingon’a Jin-gun T. Samuel Haokip Secretary Home, Kuki National Organisation(KNO) in kum 100 lhinna  Anglo-Kuki War 1917-1919 Anniversary het jing na Nampi Lumsong  hondoh na ananei in chuleh Evangelist. Chinkholam Vaiphei founder of GMFDI in thenso na ananei in ahi. Kingon achun Khaijang Haokip, Ex-president Kuki National Assembly  leh President of ZoRO in jong pan anala lhon in ahi.

Alangkhat’a  L.Gamnomjang kho mite in Nampi Lumsong atundoh’u Daniel Gangte, President, KIC in hondoh na aneiyin chuleh Rev. Dr. Paotinthang Chongloi (Pr.KBC) in thenso na ananei ina hi. Chuleh S.Nabil kho’a Nampi Lumsong chu gamkai MDC Seilenmang Khongsai in hondoh na ananei in ahi.

Singngat Sub-Division Bongbal khomiten jong tuni jingkah lam nidan 9:00 vel in Nampi Lumsuong kum 100 lhinna Centenary Suong hondohna kinchu Haosa Upa, Youth Club hoe khosung mite jaona in loupitah in ana hondoh tauvin ahi.

 Hiche Nampi Lumsong hondohna chu Hondohna chu khosung inpipu Jamkhokai Kipgen in aneiyin chule Henkholal Kipgen Local Pastor in Pathen heng’a thensona aneiyin ahi.

Hemhao Kilong V/A member in Nampi Lumsong kidolona phondoh nale Nampi Galhang ho thusim a houlimna aneiyin ahi.

Kuki Inpi thulhuh na bangin Tengnoupal khomipiten jong tunin Nampi Lumsong hondoh na ana neitauvin ahi. Hichi kin a chun Pastor Thangkholam Chongloi, Tengnoupal Gambih KCC in thenso nale hondohna ananeiyin ahi.

Anglo-Kuki War Centenary nikho ahitoh kilhon in tuni jingkah nidan 7:00 vel in Chalbung Vangkho Kangpokpi District a  Nampi Lumsong hondohna kin anaki nei jin hi che a chun Haosapu Henkai Tuboi in khosunhmite tilkhou na leh  Anglo-Kuki War thu a houlimna aneijin Houbung Head Deacon Lamjasei Singsit nin Pathen hengah Nampi lumsong lhandohna kin ana neijin ahi.

Kangpokpi District S. Changoubung khomi ten jong tuni chun Anglo-Kuki War kum 100 lhinna nampi Lumsong hondoh nale thenso na ana neitao vin Pastor Songthang Lotzem in hondoh nale thensona ana nei ahi.

Alangkhat kit ah Jani nilhah nidan 8:00 velin Keithelmanbi Military Colony (Champhai) a jong Rev Lamkhoseh Chongloi, Pastor, KCBC in Nampi Lumsong hondohna naleh lhandohna aneiyin ahi.

Hiche kinna chun Lamminthang Kipgen, Circle MDC, Dehlam Lhouvum Chairman, VA, KWW, KYA, KMC Ex-Servicemen, KMC Auto Owner Assn, Pastors & Board of Deacons (TBA, KCBC, KBC, BBC, BBBC) chule khosung mipi jaonan Dahpi chupging nale gun salute ana umin in ahi.

Tujang Area Chief Organization (TACO) makai nan jong jani chun Tujang Village Kangpokpi District khomun ah Nampi Lumsong chu Hondoh ana hitan ahi. Ngulkhochon Tujangpan Song Hondoh na aneiyin  Kin Thempu Rev. Satneo Kipgen in Pathen minin thensona ana neiyin ahi.

Kingon achun Lhangsung Haosa ho le nule pa tamtah jaonan ana chelhan chuleh Ngulkhochon Tujangpan Ankong ana semin nehkhomna jong ana um in ahi.