Anglo-Kuki War Centenary Lumsong thu’a boina ho KNO/UPF kinganse ta; TC min...

Anglo-Kuki War Centenary Lumsong thu’a boina ho KNO/UPF kinganse ta; TC min dia Kuki Territorial Council kiphatsahna kinei ahi, tia PS Haokip in sei

607
0
SHARE

Anglo-Kuki War Centenary Lumsong thu’a boina ho KNO/UPF kinganse ta; TC min dia Kuki Territorial Council kiphatsahna kinei ahi, tia PS Haokip in sei

B. Lalboi Gangte

CCpur, Nov. 30 (ET) : Kuki Inpi Manipur makai nanoi’a Kuki Nampi kihoukhomna kin-gon tunin B.Vengnom Community hall, CCpur District mun’a anachelha in ahi. Kingon lhandoh na Rev. Khuala Vaiphei, Jt. Secretary KCLF in anei in chuleh lemna thusei Pahend Hangshing Dy. Speaker KIM in ana mang in ahi. Chuleh Inpi toukhom na thulhut ho Khaimang Chongloi, President KIM in anei naban’a Sominthang Doungel, VP KIM in KIM lamkai ho Delhi achenao reports pehna jong ananei in ahi.

Kingon phatsung in State chom chom akon Kuki Inpi ho, Elected Politician ho, Tribe leader ho, Kuki CSOs ho, Intellectual/Social Worker hon angenda to kimat in houlimna ananei uvin chuleh Tripartite Peace Talk thu’a dinmun leh maban kalson dingdan leh Anglo Kuki War Centenary Commemoration 2019 (Nampi Lumsong) thu’a lunggel leh ngaidan seikhom na anei utoh lhon’a akikhom mipi jouse in kilungtoh tah in kithulhuh na ananei uvin ahi. Sominthang Doungel in ahin podoh Agenda “Tripartite Peace Talk thu’a dinmun leh maban kalson ding dan” thu’a ahungkikhom mipin namsung’a Tripartite Peace Talk Govt. India, Govt. Manipur toh nei KNO leh UPF in kihouna anei’u mipin tosot jing ding chuleh angaichat nao dungjui’a mipi in panna thei chan’a pan lah jing ding in kinoptona anei uvin ahi. Chuleh  Jangmang Haokip, Chairman AKWCCC in apodoh agenda “Anglo Kuki War Centenary Commemoration 2019 (Nampi Lumsong)” thu’a Anglo Kuki War 1917-1919 Commemoration thu toh kimat’a Nampi lumsong thu gelkhom na’a PS Haokip President KNO in hiche thu hi KNO leh UPF lamkai ho nganse ding leh aphat lam’a bol thei chan hung kibol ding ahi ati toh lhon in mipin kilungtoh tah in nganse naleh pehdoh najong ananei uvin ahi.

Hiche toh lhon’a PS Haokip, President KNO in  Govt. toh kihouna leh Kuki Territorial Council thu’a KNO leh UPF in kithulhuh naleh kinop tona anei nachung thu’a houlimna aneina’a Territorial Council (TC) hi Govt. in eipeh’u ahi in ahin eihon State joh kithum ahi. Govt. in State vang hitheilou ding ahi jeh chun TC joh kilah uvin lang TC noi’a ahoi hoi kivet uvin lang kilah uvin ti ahi. Chuleh hiche KTC ading hin KNO leh UPF in Charter of Demand Point 40 anakipe in Sept.  20, 2018 nikhon Chief Minister heng’a 1949 Manipur lengpa in phaitol jouse Merger anabol nikho’a Meilhei lengpa ho anavekol chu Kuki ho ahi naban’a Pu-pa khang akipat kingailu tah leh kitosot te akihi nachung chon’a kikhen theilou te kihi ahi ati. Kuki gam le go ho Naga Frame Work Agrrement a jaosah lou ding’a gamgi kisem chai’a amatah in jong aphatsah dungjui’a ama kom ajong kuki gam leh go gamgi ho kipelut ahi.  Kuki te kho leh gam Naga frame work Agreement a inch khat jong jaothei lou ding, 1917-1919 British toh kum thum gaal jeh’a kho kisung mang leh NSCN-IM Th. Muiva Thangkhul lamkai na’a Kuki gam 1992-1997 sung’a ana kisuhmang ho Naga FA a jaothei lou ding in AB Mathur leh India Prime Minister heng’a lekha akipehlut naban’a kimaito in kihoukhom najong anakinei in ahi. Aman aseibe na’a hiche gamgi thuhi State CM phal nabei’a kibolthei lou ding chuleh State phalpeh na ngai ahi ati jeh uvin State CM in jong phatsahna anei ahi dan hilchetna leh kinoptona kineiho kipelut chu amahon jong hetpeh na ananei uvin ahi. Centre leh Kuki thingnoi in kihouna’a Charter of Demand Point 40 kinei ho lah’a 80% kihoulhah na akichai tan chuleh achesa Oct. 10, 2018 nikho’a Kangpokpi mun’a KNO leh UPF in kihouna akinei na’a Territorial Council min ding Kukiland ding’a kinoptona KNO leh UPF in anakinei tan ahi. KTC hi Centre in eipeh’u ahi tan ahin asung’a ipi pi nadei um ham tihi kiche’a kitoukhom’a kiseikhom ji ahi dungjui’a kihouna’a kithulhuh naho ban neicha kineitou ji ahi ati. Sopi uleh nao ten Govt. toh kihouna kinei hi nakhoh sahsoh kei uvin ahi tinjong aseibei.

Alangkhat’a Khaimang Chongloi, President KIM in houlimna aneina’a achesa Oct. 16, 2019 nikho’a Nampi thulhuh na Manipur Govt. in “Ancestral land” kijih na Lum song ho suhmang ding’a Order anaso toh lhon’a thucheng khelding’a temna ahin nei uvin ahin hiche hi KIM lamkai cheng in kamoh seithei lou’u anahi tah jeh in nam mipite doh ding tin chu achesa Oct. 16, 2019 nikho chun kintah in Nampi Consultative meeting anakikou vin ahi. Meeting achun phatsoh tah hiche chung thu gelkhom naleh seikhom na anakinei in mipi ahung kikhom ho akon in aphat nadi leh asetna thei ding ho seikhomna anakinei in ahi. Chuleh Kuki Research Forum thalheng akon meeting a hungpang ho ngaidan akilan thucheng dang mansang in “Dignity” thucheng hi hileh kilom inte tinjong alungel’u anasei in ahi. Ajeh chu ipu ipateu dinmun leh hina (dignity) kicheh tah nei’a hinkho mang leh kivaihomna nei anahi utoh lhon’a hiche ho jouse tolto chotpha’a British ten Soh le-Kol dan’a vaihomna (Colonized) anei’u doudal na’a gaal anabol’u ahi jeh chun “In defence of our Dignity & Freedom” kiti leh kitoh inte ti’a ngaidan anapeh’u naban’a ahung kikhom mipi ten jong phatsah na anei dungjui uvin kinoptona anakinei ahi ati. Chuleh hiche thucheng kikhel chu Kuki Research Forum ho pohdoh ahi tia amaho achom’a ngohna ding jong aumpon hiche naban’a KIM lamkai ho sehseh kingoh jong chu adih kit pon ahi. Ajeh chu KIM le abahkai jalhang kiloikhomna, Haosa Upa chuleh thu-le-la hethem thei jouse jao na’a mipi kihoukhom na dungjui’a kiphatsah najoh ahibouvin ahi.

Hiche toh lhon’a KIM le Govt. of Manipur  kinoptona Memorandum of Agreement (MoA) ahilou leh kikhut henna soi (sign) kibolna aumpon chuleh Memorial Park semna ding’a Govt. in sum sanction abol jong aum pon, Holiday Declaration leh Recognition thu’a akideisah pen chu Govt. in thupi tah’a hetpehna einei peh ding’u (Official Recognition) chu ahi. Chule holiday eiphon peh tah ujong leh Restricted hilouva General Holiday joh hi ding chu kidei ahi jeh chun avel vel in kinelna leh kihouna chu anakinei in ahi. Ahin hetding khat chu State Govt. in Consolidated nos of General Holiday anei ahi in Manipur Govt. a hin kum khat sung’a 24 general holiday um ahin akalval kihengbe theilou ahi jeh achu Restricted Holiday in phongdoh utin ol-in khelto ding lampi kigong nante anati’u ahi. Chuleh Govt. min’a kiso order chu kum khat tichu 2019 seh ading ahipon akum seh adia kiphongdoh (Declaration) joh ahi. Anglo-Kuki War tihi eihon iseiju ahibou uvin History record dungjui’a Kuki Rebellion, Kuki Uprising, Kuki Rising tia kisunlut ahi jeh in Recognition ahi lou leh Holiday declare akibol ding’a ahi leh record a kisunlut min achu kibol ding / kiphongdoh ding ti ahi jeh’a Kuki Rebellion Day ti’a kiphongdoh ahi in hijong leh agaal chu Kuki te leh British te kisat ahi jeh achu Anglo-Kuki War ti’a atamjo’a kisei ding ahi bouve ati. Vetsahnan 1891 kum’a Meitei ho leh British te anakisat nao chu Anglo-Manipuri War akitipon record dungjui in Khongjom Day tin akiphongdoh in hijong leh atamjon Anglo-Manipuri War tin akisei thou thou uvin ahi tinjong aseibei.

ILP umna gam ho’a Centre in CAB chepi lou maithei

IMPHAL, Nov 30 (ET): Home Minister Amit Shah in Citizenship Amendment Bill (CAB) thu toh kisaiya Northeast gam a ‘stakeholder’ hotoh janni nikhon kihouna chom chom apan tai, tin thulhut in aseiyin chule sorkar in Inner Line Permit (ILP) umna gam ho a CAB achepi lou maithei ahi, ati.

Northeast gam a hitobang dan chepi ding hi Sixth Schedule, Constitution noiya um ahi, tia Indian Express thuson jong asei ahi. Achuti a ahileh Arunachal Pradesh, Nagaland leh Mizoram gam hi CAB in ahop tha louding tina ahi’in chule Assam a autonomous mun holeh Bodo Territorial District Area hojong ahi. CAB hi Bangladesh, Pakistan leh Afghanistan gam a kon India gam a hung chenglut a Muslim tilou hou dang ho Indian citizenship peh nading ahi.

Home Minister Amit Shah in politician leh civil society member (Northeast state) hotoh kihouna apan tan, Friday nilhah a Tripura leh Mizoram gam a kon representative hotoh meeting masapen teni abol ahi. Friday, Saturday chule December nisim 3 nikho teng Shah in North East Students’ Organisation, All Bodo Students’ Union chule Meghalaya, Nagaland leh Arunachal Pradesh gam a um simlai kiloikhomna hotoh kihouna aneiding ahi.

Saturday nikho teng CM toh meeting umding ahi, tin official hon asei uvin chule kihouna a pang dinga political party lamkai holeh socio-cultural organization lamkai hojong kouna apeh u ahi. Northeast gam a CAB douna a kiphinna aum jouva Shah in kihouna asem ahi. NESO Secretary General, Sinam Prakash NESO team a pang ahi’in, hetthei khat chu kihouna a Manipur gam a stakeholder ho kouna kipe lou ahi.

Sinam Prakash in NESO dinmun kicheh tah a asei ahi’in, Northeast a Bill kiphatsah louhel ding ahi tia avel a aseikit ahi. Amit Shah toh kihouna anei jouva NESO lamkai Sinam Prakash in, CAB Meet a Manipur stakeholder ho ibol a adon louvu ham tia thudohna kanei leh Home Minister in Coordinating Committee on Manipur Integrity (COCOMI) lamkai hotoh kihouna kanei ahitai, tin eidonbut e, ati.

Hiche a hi Prakash injong Amit Shah henga COCOMI hotoh akimuto nau hi thuchom-Indo Naga thu jeh ahi, tia adonbut leh chomkhat jouva Shah injong CAB thu seikhomna dinga Manipur stakeholder hojong kouna peh dinga kitepna anei ahi, tin aseibe in ahi. Northeast gam sagi a um BJP MP hilou phabep (Lok Sabha leh Rajya Sabha) hon Friday nikho a Prime Minister Narendra Modi henga Assam, Arunchal Pradesh, Meghalaya, Mizoram, Nagaland, Manipur leh Sikkim a CAB, 2019 chepi loudinga lekhathot apeh u ahi.

Lekhathot pe a MP 12 holah a Assam a kon Congress MP Gaurav Gogoi, Pradyut Bordoloi leh Abdul Khaleque jong pang ahi’in, Bill akichepi a ahileh ama ama chenna a tribal gamsung mi dihtah hon chenna ding aneilou diu ahi, tia lunggel aseiyu ahi.

CAB thu kihouna a Manipur CSO ho kouna akipeh loujeh a Shiv Sena Manipur unit in Centre demna sangtah nei

IMPHAL, Nov 30(ET): Shiv Sena, Manipur unit in Saturday nikhon Citizenship Amendment Bill (CAB) thu a Manipur gam a kon political party holeh civil society organization ho kouna akipeh lou thu a Centre sorkar demna sangtah anei uvin ahi.

Union Home Minister Amit Shah in Northeast India a um state jouse tobang a kon simlai kiloikhom ho, CSO chule political party hotoh CAB thu a New Delhi khopi a meeting neidinga tohgon asem ahi’in, hiche a hi Manipur gammi thalheng ho kouna kipelou ahi. Saturday nikho a kihouna apat u ahitai.

Northeast Students Organisation (NESO) delegate holah a pang All Manipur Students Union (AMSU) lamkai khat tilouva gamsung CSO leh political party ho kihouna a pang umlou ahi. Shiv Sena Manipur Unit in Imphal khopi a um office mun a press conference abol nauva president N Tombi in gamsung CSO leh political party ho kouna akipehlou thu a Union Home Minister demna aneiyin, Manipur gamsung hi CAB kiseitil a kon adouna a thuseiya gam holah a pang ahi, ati.

Gamsung a kon CSO hojong CAB thu a kihouna a kouna pehdinga N Tombi in thumna aneiyin chule Manipur chief commissioner anahi Himmat Singh in achesa 1950 kum a asuhmang Inner Line Permit System athah a chepi kit dinga jong thumna aneiyin ahi.

“Gamsung mi dihtah ho venna dinga Manipur gam a ILP chepi kit ngai ahi”, tin Tombi in aseiyin chule ILP kisuhmang dan hi thunoh baotamna um ahi, ati. State sorkar in ILP chepi kit nadinga pan alah ding ahi, ati. “State sorkar in gamsung miho deibanga pan alahding ahi”, tin aseiyin chule Naga Peace Talk jeh a gamsung mihon kiphinna aboljing laiya CAB thu kiseikit hi gamsung miho pohnatna na a thao kisungbe tobang ahi, at. Centre panlah dan chunga Shiv Sena sangtah a lunglhai lou ahi”, tin aseibe in ahi.

Kuki Chiefs’ Association Manipur in kiloikhomna min Kuki Chiefs’ Council a khel ta

Imphal, Nov 30(ET) : Janni chun Kuki Chiefs’ Association Manipur in Kuki Inn, Imphal a Kangpokpi, Chandel, Churachandpur leh Tamenglong akon haosa ho jouse pannan general meeting ananei uvin ahi.

Hiche general meeting phatsung in kithulhuh na phabep jong ananei uvin ahi. Hiche ho chu Haosa ho kiloikhomna Kuki chiefs’ Association khel’a Kuki Chiefs’ Council joh min put sah ding, kiloikhomna vaipo holeh panmun chung chang seikhom na anei uvin post phabep hapbe ahi toh lhon’a post din mun tuh ding jong lhendoh na ananeipai uvin ahi. Hiche post hochu Vice President : Lunthang Haokip chief of L. Khomunnom; Joint Secy. : Haokholen Kipgen Chief of Lhangkichoi; Treasurer : Paotong Doungel Chief of Khoken; Information : M. Thangboi Haokip Chief of Lunglhaimun; Speaker : Thangkam Lupheng Chief of Nunka chuleh Advisor ding in C. Doungel lung kitoh tah in analheng doh uvin ahi.

Hiche toh lhon’a fund chung chang thu’a job card holder jouse Dk. 100/- cheh apeh cheh ding’a anasei’u toh lhon’a tuni chan’a pelou lai hon tuchung job card sum kihop teng apeh cheh ding chuleh ahung lhung ding Dec. nisim 11 or 12 nikho leh executive member thah lhendoh’a umho panna’a Kuki Chiefs’ Council toh toukhom na nei ding injong kiphatsah na ananei tauvin ahi.

Loktak Lake a nga man hon Loktak Inland Waterways project adoudal nau thu seiyu

Imphal, Nov 30(ET): Loktak Lake a ngaman mihon Saturday nikhon Loktak Inland Waterways Project adoudal nau thu sangtah asei uvin ahi.

Union Ministry of Shipping in Manipur gam a Loktak Inland Waterways Project phatsahna anei ahitan, project a hi agom a dangka crore 25.58 lut ding ahi. Saturday nikho a Loktak Lake Areas Fishermen Union Manipur (LLAFUM) in Loktak Lake a hiche project chepi ding adoudalnau thu asei uvin ahi. Northeast India a freshwater lake lenpen a hitobang project khatcha kichepi louding ahi, tin LLAFUM secretary Oinam Rajen in Manipur Press Club mun a thuso miho akihoupi na’a aseiyin ahi.

Project hi akichepi a ahileh Loktak Lake eco-system leh environment sangtah a atohkhah ding ahi, tin aseiyin chule LDA in Loktak Lake huhna ding ahi tia aminput sah a project chom chom achepi ho angah dinga Rajen in thumna aneibe in ahi. Manipur High Court in Loktak lake a Ecosystem tongkha theiya project ho chepi lou dinga tu naicha thutanna anei ahi, tin aseiyin ahi.

State Forest department chule Environment department in government authority ho a kon phalna (clearance) la masa louva Loktak Lake a project ima achepi louna dinga Ban um ahi, tin aseiyin chule LDA in project chepi na dinga mipi phatsahna alahlou ahi, ati. Loktak Lake hi Northeast a ‘Freshwater lake’ lenpen a kihe minthang ahi’in, Manipur gamsung Bishnupur district a um ahi.

‘Floating national park’ khat seh um, Keibul Lamjao National Park hi hiche lake a um ahi. Lake hi 980 sq.km a len ahi.

HSLC exam 2020 bolding simlai ho  KSO Ccpur in Free coaching bolpeh ding

Ccpur, Nov 30 (ET): Tuni chun KSO Ccpur hon khovei a HSLC exam bolding simlai ho gelkhoh najeh in KSO-complex tuibuong ah Orientation Programme chule hiche Free coaching hondohna anei uvin ahi. Hiche kin achun, Lh. Jamkhothang Khongsai, VP (Organising) chule NJ Baite, President KSO-Ccpur hon a oup uvin, thuseina phat jong amang uvin ahi.

Doungel former President KSO-GHQ in simlai ho heng ah tilkhouna thu aseipeh in, lolhinna ding a amasapen a tomngaina poimo ahi dan asei in chule ipi hileh ibol nalam jouse a gunchu tahleh kitah ta a bolding ahi dan asei in ahi. Chule hiche tobang KSO Ccpur hon athon a kichuhtheina ding lampi asempeh uhi mivangpha ahidan u jong asei in ahi. Hun pha leh phat kijen petcha inei sung a masang hinkho ding galdot kom a kitahjiel a bolding ahi dan asei naban ah ijakai Pathen heng a thumna nei a eima jong hapan a pan ding in jong simlai ho tilkhouna anei in ahi. Hiche free coaching hi Mathematics, Science chule English subject ho hiding ahi in, jilkung kituptah leh hetgilna neihon ahil ding uh ahi. Hiche kin ahin, KSO-GHQ akon lamkai phabep chule KSO-Ccpur akon Executive member hon jong a oup uvin ahi.

NPP in CAB doudal na ding a thulhut na nei

Shillong, Nov 30: National People’s Party (NPP) in tuni in Citizenship Amendment Bill (CAB), 2019  doudal na ding in thulhut ijat ham ana nei uvin ahi. Hiche thulhut chu party National Executive Committee Meeting in Constitution Club of India, New Delhi ah kihou khomna a ana nei u ahi.Hiche meeting chu  National President le Meghalaya Chief Minister Conrad K. Sangma in ana lamkai in ahi. Hiche meeting achun state chom chom akon party member ho jaona in  Deputy Chief Minister, Meghalaya Prestone Tyngsong, Home Minister James K. Sangma, Chief Minister lui  DD Lapang le adang dang in panlah na ana nei uvin ahi. Party in kilungtoh tah a CAB oppose ding in kihou lhah na ananei uvin ahi. Chief Minister Conrad Sangma in Northeast gamsung state    Arunachal Pradesh, Manipur, Nagaland  le Assam ho in CAB doudal na ding a panlah na anei toh lhon a hiche doudal na a pan kila khom ding ahi dan tahlang na ana nei in ahi. Kihoukhomna achun CAB hi aki chesah le Northeast gamsunga boina sangtah aum ding dan jong ana sei khom uvin ahi.  NPP lung tup le doi ho gamsung mi ho hetsah na ding a panlah ding dan jat chom chom ho jong kihoukhomna achun ana seikhom uvin ahi.

Maharashtra Floor Test: Uddhav Thackeray sorkar in ‘Trust Vote’ a goljona neitau; House a kon BJP MLA hon kijotdohna neiyu

Mumbai, Nov 30: Saturday nikho a Maharashtra Assembly in ‘Floor test’ abolna a Maha Vikas Agadi tosotna a MLA 169 in vote ape in, 4 in vote ape pon, adoudal a vote kipe aumpon chule vote apeh sung uva BJP MLA 105 House a konin akijot doh uvin ahi.

BJP lamkai leh CM anahi Devendra Fadnavis in House proceeding vohhai ding thumna a Governor Bhagat Singh Koshiyari henga lekhathot kapeh diu ahi, tin aseiyin ahi. Session hi ‘illegal’ ahi, tia Fadnavis in asei pro tem Speaker Dilip Walse Patil in asan peh pon, Governor thuhilna dungjuiya kibol ahi, tin aseiyin ahi. Uddhav Thackeray lamkaina sorkar in alangkhat a ‘floor test’ abol nauva MLA 4 in vote apehlou chule BJP legislator ho akijot doh vang uva goljona aneiyin ahi.

BJP Maharashtra unit chief Chandrakant Patil in Governor Bhagat Singh Koshiyari henga Maha Vikas Agadi ub protem speaker khel dinga tohgon anei thu pohdoh dinga aseiyin ahi. “Dan dihlou ahi”, tin Patil in aseiyin chule sorkar thah in dan apalkeh ahi, ati. “Governor henga petition kapeh u ahi’in, Supreme Court chan jong kache maitheiyu ahi”, tin aseiyin ahi.

Thackeray leh minister 6 (Sena, Congress leh NCP MLA 2 cheh) in CM toh ni masa ni a kihahselna aneiyu ahi. Shiv Sena chief hi CM hita jong leh Varsha (CM official residence), Malabar Hill a kichon lou maithei ahi, tin thulhut in aseiyin ahi. Matoshree (kum 50 lhing Thackeray insungmi chenna) a Maharashtra thu kivaipo ding, hijong leh CM in Varsha a meeting thupi jouse abol ding ahi’in, ama office hi Mantralaya floor 6 channa a umding ahi, ati.

Saturday nikho a ni-ni sitting umding kipan ahi’in,trust vote ni masapen ni a abol uva chule House a Minister thah ho phondohna jong aneidiu ahi. Sunday nikho teng Assembly Speaker election umding, hiche jouteng Governor in ‘vote of thanks’ apeh ho thu aseidiu ahi. Speaker thah in Assembly a Opposition Leader phondohna aneiding ahi.

Governor B S Koshyari in December nisim 3 kah a Thackeray in atamjo ahina aphotchen dinga asei ahi’in, member 288 umna ruling coalition hin MLA 162 tosotna aneiyu ahi. Thackeray lamkaina party in election masanga BJP toh kiloikhomna asem vanga seat kihop ding dan thu a kinoptona asemthei loujeh uva Sena, NCP leh Congress in sorkar asemkhom ahi. BJP in seat tampen- 105 amu a, Shiv Sena in 56, NCP in 54 chule Congress in seat 44 amu ahi.

NCP MLA Dilip Walse Patil hi Friday nikho a Assembly pro tem dinga lhendohna aneiyu ahi’in, BJP MLA Kalidas Kolambkar panmun akhel ahi. Kolambkar hi panmun tuh dinga kal masa a bou kilhengdoh ahi. Walse Patil hi Assembly speaker anahi ahi. Shiv Sena president jong hi a Thackeray in CM panmun atuh nadinga achesa Thursday nilhah a cabinet minister adang 6 toh kihahselna anei ahi.

Kum 12 chapang khat in BOSEM exam bolding

Imphal, Nov 30 (ET): Board of Secondary Education Manipur (BoSEM) in khovei leh High School Leaving Certificate (HSLC) examinations bolding in kum 12 chapang khat ana phatsah tauvin ahi. Hiche chapang pa chu Issac Paulallungmuan Vaiphei ahi in ama hi Kangvai Bazar akon ahi. Hiche kiphatsah na hi RIMS a Psychology department hon patep na anei jou uva a IQ ahoi jeh leh tahsan lelna aumlou jeh a BOSEM in jong aphatsah ahi akiti. Test kibol dungjui chun hiche chapang pa IQ chu kum 17 leh lha 5 ho ading toh akibang in chule a IQ chu 144 apha in ahi. Muan Vaiphei in HSLC exam ahin bolding toh lhon a class 10 BOSEM exam bollah a achapang pen a melchih hiding ahitai tin BoSEM secretary chun aseiye.