Anglo-Kuki War Centenary Lumsong chung’a thucheng kikhel Kuki Inpi Delhi leh KSOD...

Anglo-Kuki War Centenary Lumsong chung’a thucheng kikhel Kuki Inpi Delhi leh KSOD & NCR in pomlou; KIM demna sangtah nei ; KIK le KSO-SH in KIM boycott bol

151
0
SHARE

Anglo-Kuki War Centenary Lumsong chung’a thucheng kikhel Kuki Inpi Delhi leh KSOD & NCR in pomlou; KIM demna sangtah nei 

Imphal, Oct 16(ET): Tuni Manipur thusoh kija, Anglo Kuki War Centenary Commemoration hetjing na Janglum Song Chung a jem kijih- ‘In defense of our ancestral land and freedom’ hi ‘in defense of our dignity and  freedom’ in a ki khel tai kiti chung chang thu hi Kuki Inpi Delhi leh KSOD&NCR in aki gel khom in, hichi hi Delhi a um Kuki chaten aki pom pon chule hichi tobang Kuki nampi lungnat na ding a Tangkhul Naga te communal politics kilhep lhah sah chuleh Manipur government pressure le lungthim phalou noiya kun lamkai/ organisation ho jouse demna sang pen aki neiye tin Kuki Inpi Delhi leh KSO Delhi akon kimu thulhut chun aseiyin ahi.

Delhi le akim vel a um Kuki chaten Manipur Govt. in Oct nisim 13, 2019 ni a AKWCC Janglumsong chung a thu jem kijih ‘In defense of our ancestral land and freedom’ lah doh ding a thuso dih lou ana sudoh deilouna jeh in, Delhi a um Kuki chate nampi ngailut na jallin, asun ajan  in aki lhaijin Oct nisim 14,  2019 in KSOD&NCR min in, Prime Minister of India le Home Minister teni Memorandum ana ki pen chule Delhi le a kim vel a um Kuki chaten nampi boina chung a pan lah thei chan lah ding dan seikhomna ana kineiyin ahi. Hiche nikho chun Benjamin Mate, State vice president BJP Manipur jong aki kou in, aman jong BJP lamkai khat hina a Manipur Govt. leh national BJP leaders ho kom a abol thei chan a bol a hichi order dih lou hi alah dohsah ding in thupeh ana kinei in ahi.

Oct nisim 16, 2019 in BJP lamkai len, Shri Ram Madhav, BJP Incharge (North East Region) aki kimupi in Manipur Govt. order dt.13th October 2019 hi gang tah a alah doh sah ding chuleh AKWCC kin gon hi boina um louva Kuki ten iman thei na diuvin Manipur CM jong thupeh apeh ding in tem na ana ki nei in ahi. Chuleh thujem kijih ‘In defense of our ancestral land and freedom’ hi adihtah kajih u ahin, historical facts um kajih u ahi tijong Sh. Ram Madhav kom a hilchetna ana kineiyin ahi.

Manipur a um lamkai pha bep hon Kuki nampi khonung ding gel saona nei louva chule Kuki Inpi le CSOs mun dang a um abahkai (Branch) ho ki houtoh na le kidohto na umlou a Kuki nampi a ding a phalou tah thulhuhna analah u hi akipom pon, Janglumsong chung a thu jem kijih ‘In defense of our ancestral land and freedom’ hi ipi thu ipi la umhen lang kon ipi sei jongleh, hiche thucheng hi kikhel theilou ding, damsung a kichepi jing ding ahi tin jong aseiben ahi.

KIK le KSO-SH in KIM boycott bol; Anglo-Kuki War Centenary kingon a pan kilalou ding’a ahi tia seiyu

Kangpokpi, Oct 16(ET): Kuki Inpi Kangpokpi in tuni thuso abol na ah Anglo-Kuki War (1917-19) Commemoration Stone a kijih ‘Indefence of Our Ancestral Land and Freedom’ kiti chu ‘In Defence of our dignity and Freedom’ tia khel ding’a kilolna Kuki Inpi Manipur in asem hi Kuki Inpi Kangpokpi leh KSO Kangpokpi in akipomtheipon tunia kon in Kuki Inpi Manipur boycott akibol tai. Chule C Aisan, Kangpokpi district Programme a jong deilou vetsahna a pan kila louding ahi ati.

Thulhut in aseibe na ah Kuki Inpi Manipur in Nampi sentiment tongkha a thil abol ahi tah jeh in Nampi khonung ding gelnan hiche hi nunglahdoh hen tin temna jong aneiyin ahi.