Amin maimaija haina lekha

Amin maimaija haina lekha

372
0
SHARE

Amin maimaija haina lekha

                                  Haina lekha peh (resign kibol) kiti hi bol tahtah loi aumji vang’a amin maimaija bol loi leh bolgoloi umjing ahi. Tulah govt Civil Supply department a kon anchang kihop thua Khurai AC akon MLA L Sushindro @ Yaima in ‘resignation drama’ (Lila) khat ahinbolgo kit tan ahileh a-constituency mipi hon anabolsah tapoi. MLA-pu hin a constituency mipi ho mudingdol anchang amupouve tia amale ama thepmo akichan jeh a MLA akon hai tang’e ti ahi. Ahaigot tahbah ahileh thipbeh a haina lekha apehle hijengdi chu mipi leh thusomi ho masang sang’a anaphon masat ahi. Hiche hi tulah Manipur sorkar sung’a lamkai leh Minister kichuna jeh a boina umto akisamkaina um ahijong muthei ahi. Ajeh chu Civil Supply minister Karam Shyam langnei sihnei jeh a Khurai Constituency dia anchang ho mipi hon amulou ahi tia ngohna um hi Karam Shyam minister a kon kiladoh hen ti doina hijeng ahi. Minister Karam Shyam akilahdohleh Khurai MLA-pun Minister ‘chance’ aneithei diham ti si-al lungthim jong doh tettut thimjeng ahi. Khurai MLA leh anungjui hon FCS anchang kihop thua FCS Minister Karam Shyam ngohna jatjat ahinneijou nung uva Khurai MLA-pa inmaija bomb khat pokeh thilsoh umkit jong chu Minister Karam Shyam leh anungjui ho natoh hinte tia ngohna umkitpai jeng ahi. Ipi hileh Khurai MLA Sushindro in haina lekha apehgot mong mong ahileh aindan sung’a lekha ajih a mi khat agapehsah thei jong ahi. Aphon masatna, ajing jingkah a haina lekha pedia akondoh gotleh mipi hon akelkot (Gate) maija anatin uva lekha jong abokehpeh u ahi. Hiche hi “Lila” (Drama) kitho tobang bou hidan’a seiloi tam ahi. Khurai leh Langthabal Constituency teni a mipi ho kiboltona hung hidoh thim, inheng louheng hileu chempong kimatna kijonto di bangjeng u ahi. Tulai hi hoilai ipi hileh atuh kha-kha hon midangdi gelna umlouva avum avalset setna neh a midang chu athi jongleh akhohpoi ti bangjeng ngen ahitah jeh a boina lou-lou dia boina sohdohji ahi. Ahin ibol tah tahlou ding khat kiseija boina jat khat sodohsah got kiti jong kidah umtah ahi.

            Manipur Assembly a MLA ho Resignation kibolji thu hi totna to akilona sotna pat ahitai. Achesa 2015 kum lang’a Anti Tribal Bill thua Tribal MLA ho ijat nin Resignation letter (haina lekha) anapeh a ahai tahtah koikoi um’am ti jong geldoh thei ahi. Naga MLA haina lekha anape hon jong kum lhung Term lhung lang geijin MLA tolop leh amudiu dol ho akisan thou-thou uve ti ana um ahi. Bill 3 thua Chrachanpur lang’a kon MLA Resignation lekha anape ho Speaker in anasanpehlou jeh ham, amin maimaija anabol jeh uham, haina lekha pehle pehlou kibang anahi. Khatvei veileh ipi thu ham khat jeh a haina lekha pe leh peh dia sei MLA holah a aumji vang hin mipi hon hai tah tah hen tia asapji tengleh koi hai malah kadasasa’n eikihaisah tahbah inte ti bang ngen hiji ahi. Tuchung Khurai MLA Sushildro in ahinboldan hi a-supporter mipi atamdan tahlangna to kilou thim bep ahi. Hitobang BJP Coalition sung’a kiboina hohi Opposition Congress hon jonkapna dia adeibep u ahi.