Ama ama pao thipi ngapcha loi tam

Ama ama pao thipi ngapcha loi tam

298
0
SHARE

Ama ama pao thipi ngapcha loi tam

                               Pao le ham kiti hi ama pao bou dopsangna dia lunggel natoh ahung um teng pao dang tho hon ahinthimah tenji ahi. Tuchung centre a BJP lamkaina sorkar kijomthel’a aniveichanna dia kihahselna ahung umjou-jouvin India pumpi’a Hindi pao dopsang di ti ahung ginpai jeng kit hi mundang, State   dang dang in noplouna thu ima aseilou vanng’in Tamil Nadu a DMK party in gal boldi geijin gihna thu ahinseipai jeng’e. India pumpi’a mijousen Hindi pao asim’a athodi ti hi tuchung athahbeh ahipoi. Hiche hi 1968 kum langpeh a India govt nin Education policy anabolna’a ‘Three language formula’ kiti – English, Hindi leh gamkai (regional) pao a School a pat lekha simna leh govt kivaipohna a official lekha kijihna leh kithotna hoa mandi/jahdi ti ahi. India sung’a Hindi pao tho tamna hi North India, North West  leh Central India gamkai ho bou ahin South India – Tamil Nadu, Karnataka, Kerala leh Andhara Pradesh hoa Hindi pao tho le he hi tamlou, ama ama gamkai pao bou atho uva athupisah u ahi. South India a Hindi hadou dehset hi mijat tampen Tamil Nadu ahi.  Politics lut jong hinantin hinlah Tamil Nadu a DMK party lamkai MK Stalin nin Centre govt nin  hunam’a India gam jouse’a Hindi chesah di ahintileh BJP lamkaina sorkar chung’a gal kibol di ahi atijeng ahi. Hindi pao thua South India hon kiphinna ananeikhah uva ichan mei anakongkha ham ti Centre injong ahet mama ahijeh a DMK party in “khoibu kisujal kibang di ahi” tia gihna anei hi Centre BJP lamkai hon jong gangtah in adon cheh uvah koima hunam’a Hindi kisimsahlou di ahi tin suhthengna aboljah jah kit jeng uve. British ten India apohlai 1938 kum langpeh a pat South India lang’a Hindi pao chesahdi ti douna a kiphinna khucheng ana umpan ahitai. India in Independent amujou 1965 kum’a jong South India a Hindi douna kiphinna sangtah ana umkit ahi. Tua BJP/NDA sorkar in ‘three language formula’ tia pansa’a India pumpi’a Hindi pao suh-hat di ahinti kit hi 1968 kum lang’a Centre govt nin ‘Education policy’ anagonsa athah beh a suhthou kitdi ti ahi.

                        Centre a BJP ahung hatjomleh Hindi pao tholou gam ho, Hindu hilou hon itobang suhgentheina ahintoh tadem tia akikhoto loi ana um chu BJP govt jong hung kipanvah behseh uto kilou ahi. BJP hohin aphadi agel u ahinai. India gamsung pumpi mi hohi atamjo pao Hindi tho sohkeija hetsohkei di, chondan (culture) jong alhangpi’a kibang nei di ti hin India gam le nam ahatsah dia BJP hon agel ahi. Hindi pao hi ajihthei, asimthei leh athothei ho dia India pumpi sung nah-nah a hoilai mun hoilam gam hijongleh pao le ham lang’a boina atoloudi ahijeh in Hindi akitileh moh thet di jong dihdehlou ahi. South India hon Hindi ahiti thet (deimo) u hi ama ho pao suhnemna hung umkha di ham ti kichatna jong ahi. Ahin Hindi ahiti thet jeh uva South India gam akhel uva North India lang’a ache teng uleh pao hetlou jeh a boina ato kit u ahi. Sopi Mizo hon a-pao ubou pao dan’a agel jeh uva Silchar aphah uva pat boi jeng tam ahi. Manipur a Meitei Mayek lekhajem muntin’a chesah di ti hinchepiloi jong hin thinglhangmi leh phaicham mi kikah a kihetkhelna asodoh dehdehji ahi. Ipao midangin asimthei athothei hi misang’a chungnunna khat ahi. Ahin hunam’a khat ipao thosah di ti ahiteng mi’n athimah ahi.